District News
ചക്കുളത്തുകാവ്: ചക്കുളത്തുകാവ് ഭഗവതി ക്ഷേത്രത്തിലെ കാർത്തിക പൊങ്കാലയോടനുബന്ധിച്ച് പണ്ഡാര പൊങ്കാല അടുപ്പ് ക്ഷേത്ര നടപ്പന്തലിൽ സ്ഥാപിച്ചു. പൊങ്കാല ദിവസം പണ്ഡാര പൊങ്കാല അടുപ്പിൽ അഗ്നി പകർന്ന ശേഷമാണ് ഭക്തരുടെ പൊങ്കാല കലങ്ങളിൽ അഗ്നി പകരുന്നത്.
കാര്യദർശി മണിക്കുട്ടൻ നമ്പൂതിരിയുടെ നേതൃത്വത്തിൽ നടന്ന ചടങ്ങിൽ മുഖ്യകാര്യദർശി രാധാകൃഷ്ണൻ നമ്പൂതിരി, മേൽശാന്തിമാരായ രഞ്ജിത്ത് ബി. നമ്പൂതിരി, ഹരിക്കുട്ടൻ നമ്പൂതിരി, ജനറൽ കൺവീനർ കൺവീനർ അജിത്ത് പിഷാരത്ത് എന്നിവർ നേതൃത്വംനൽകി.
District News
ചക്കുളത്തുകാവ്: ദക്ഷിണേന്ത്യയിലെ ഏറ്റവും വലിയ ഭക്തജനസംഗമത്തിന് വേദിയൊരുങ്ങുന്ന ചക്കുളത്തുകാവില് പൊങ്കാലയ്ക്കുള്ള ഒരുക്കങ്ങള് പൂര്ത്തിയായി. 24 നാണ് പൊങ്കാല. കൈകളില് പുജാദ്രവ്യങ്ങളും നാവില് ദേവീസ്തുതികളുമായി വനിതകള് അണിമുറിയാതെ എത്തുമ്പോള് ചക്കുളത്തുകാവും പരിസരവും കാര്ത്തിക പൊങ്കാലയുടെ പൂണ്യം നുകരുകയായി.
തിരുവല്ല മുതല് തകഴി വരെയും, എസി റോഡില് ചങ്ങനാശേരി-ചെങ്ങന്നൂര് -പന്തളം റൂട്ടിലും, മാന്നാര്-മാവേലിക്കര റൂട്ടിലും, മുട്ടാര്-കിടങ്ങറ, വീയപുരം-ഹരിപ്പാട് റൂട്ടിലും പൊങ്കാല അര്പ്പിക്കുന്നതിനായി ഭക്തര് ഇടം പിടിച്ചു തുടങ്ങി. ക്ഷേത്ര പരിസരത്ത് പൊങ്കാല ഇന്ഫര്മേഷന് സെന്ററുകളില് ക്ഷേത്ര വാളന്റിയേഴ്സിന്റേയും നിര്ദേശങ്ങള് നല്കുവാനായി മൊബൈല് ഫോണ് സംവിധാനവും ഏര്പ്പെടുത്തി.
ക്ഷേത്രത്തില് എത്തിച്ചേരുന്ന ഭക്തജനങ്ങള്ക്ക് പ്രാഥമികാവശ്യങ്ങള്ക്കായി സ്ഥിരം സംവിധാനങ്ങള്ക്ക് പുറമെ താത്കാലിക ശൗചാലയങ്ങളും ഏര്പ്പെടുത്തി കൂടാതെ വിവിധ സാമൂഹ്യ, സാമുദായിക, സാംസ്കാരിക, രാഷ്ട്രീയ സന്നദ്ധസംഘടനകളുടെ ആഭിമുഖ്യത്തില് പ്രവര്ത്തനങ്ങള് സജ്ജമാക്കിയിട്ടുണ്ട്. 3001 വോളന്റിയേഴ്സിന്റെ സേവനം ലഭ്യമാക്കിയിട്ടുണ്ട്.
പൊലിസ്, കെഎസ്ആര്ടിസി, ആരോഗ്യവകുപ്പ്, ഫയര്ഫോഴ്സ്, കെഎസ്ഇബി, വാട്ടര് അഥോറിറ്റി, എക്സൈസ്, വാട്ടര് ട്രാന്സ്പോര്ട്ട്, റവന്യു, തുടങ്ങിയ വിവിധ വകുപ്പുകളുടെ സേവനം പത്തനംതിട്ട, ആലപ്പുഴ ജില്ലാ കളക്ടര്മാരുടെ മേല് നോട്ടത്തില് സജ്ജീകരിച്ചിട്ടുണ്ട്. 2000-ല് പരം പൊലിസിന്റെ സേവനം ലഭ്യമാക്കിയിട്ടുണ്ട്. കെഎസ്ആര്ടിസി, സംസ്ഥാനത്തെ പ്രധാന ഡിപ്പോകളില് നിന്നും ക്ഷേത്രത്തിലേക്ക് പ്രത്യേക സര്വ്വീസുകള് ആരംഭിച്ചു. നീരേറ്റുപുറം എഎന്സി ജംഗ്ഷന്, തലവടി പഞ്ചായത്ത് ഗ്രൗണ്ട് എന്നിവിടങ്ങളില് താത്കാലിക ഓപ്പറേറ്റിംഗ് സ്റ്റാൻ ഡ് പ്രവര്ത്തിക്കുന്നുണ്ട്. ആവശ്യമായ ശുദ്ധജലം വാട്ടര് അഥോറിറ്റി ലഭ്യമാക്കും. വിവിധ പഞ്ചായത്തുകളും തിരുവല്ല- ചെങ്ങന്നൂര് മുന്സിപ്പാലിറ്റികള് പ്രാദേശികമായി ചെയ്യേണ്ട എല്ലാ പ്രവര്ത്തനങ്ങളും ക്രമീകരിച്ചിട്ടുണ്ട്. ആലപ്പുഴ- തിരുവല്ല ആര്ഡിഒ മാര്ക്കാണ് കോ-ഓര്ഡിനേഷന് ചുമതല.
ക്ഷേത്ര പരിസരത്ത് താത്കാലിക ഹെല്ത്തുസെന്ററുകള് തുറന്നു. ചെങ്ങന്നൂര് മുതല് തകഴി വരെ വാഹന പാര്ക്കിംഗിന് പ്രത്യേക സംവിധാനം ഏര്പ്പെടുത്തി. തിരുവനന്തപുരം, കൊല്ലം തുടങ്ങിയ സ്ഥലങ്ങളില്നിന്നും വരുന്ന വാഹനങ്ങള് കാവുംഭാഗം ദേവസ്വം ബോര്ഡ് ഹൈസ്കൂള്, എംജിഎം ഹയര്സെന്ഡറി സ്കൂള് എന്നിവിടങ്ങളില് പാര്ക്കു ചെയ്യാം. കോട്ടയം, തൃശൂര്, പുനലൂര് ഭാഗങ്ങളില് നിന്നും വരുന്ന വാഹനങ്ങള് തിരുവല്ല മുന്സിപ്പില് സ്റ്റേഡിയത്തിലും, ആലപ്പുഴ, എറണാകുളം, കോഴിക്കോട് ഭാഗങ്ങളില് നിന്നും വരുന്ന വാഹനങ്ങള് തിരുവല്ല, എടത്വ പൊലിസ് സ്റ്റേഷന്, വാട്ടര് അഥോറിറ്റി, എടത്വ സെന്റ് അലോഷ്യസ് കോളേജ്, ഹോളി എയ്ഞ്ചല്സ് സ്കൂള്, സെന്റ് തോമസ് ഹയര്സെന്ഡറി സ്കൂള് എന്നീ മൈതാനങ്ങളില് പാര്ക്ക് ചെയ്യേണ്ടതാണ്.
കെഎസ്ആര്ടിസി ബസ്സുകള്ക്കായി നീരേറ്റുപുറം എഎന്സി ജംഗ്ഷന്, തലവടി പഞ്ചായത്ത് ഗ്രൗണ്ട് എന്നിവിടങ്ങളില് താലത്കാലിക ബസ്സ് സ്റ്റാൻ ഡ് പ്രവര്ത്തനം തുടങ്ങിയിട്ടുണ്ട്. പ്ലാസ്റ്റിക്ക് പൂര്ണമായി നിരോധിച്ചും ഹരിത ചട്ടങ്ങള് പാലിച്ചുമാണ് പൊങ്കാലയുടെ ക്രമീകരണങ്ങള് നടത്തിയിരിക്കുന്നത്.
പൊങ്കാലയ്ക്ക് എത്തിച്ചേരുന്ന ഭക്തജനങ്ങളെ വരവേല്ക്കുന്നതിനും പൊങ്കാലയുടെ സുഗമമായ നടത്തിപ്പിനും വിപുലമായ ക്രമീകണങ്ങള് ക്ഷേത്രട്രസ്റ്റിന്റെ ആഭിമുഖ്യത്തില് ഏര്പ്പെടുത്തി.
കൂടാതെ വിവിധ സാമൂഹ്യ, സാമുദായിക, സാംസ്കാരികരാഷ്ട്രീയ സന്നദ്ധസംഘടനകളുടെ ആഭിമുഖ്യത്തില് സൗജന്യ ഭക്ഷണവിതരണവും, ചികിത്സയും ഭക്തജനങ്ങള്ക്ക് ആവശ്യമായ എല്ലാ സൗകര്യങ്ങളും ലഭ്യമാക്കും.
എല്ലാ സര്ക്കാര് ഏജന്സികളെയും ഏകോപിപ്പിച്ചു കൊണ്ട് ആലപ്പുഴ-പത്തനംതിട്ട ജില്ലാ കളക്ടര്മാരുടെ മേല്നോട്ടത്തില് അവലോകനയോഗം നടന്നു. ക്ഷേത്രത്തില് പ്രത്യേകം ക്യൂ കോംപ്ലക്സുകള്, ദര്ശനത്തിനുള്ള ക്രമീകരണങ്ങള്, സൗജന്യ ഭക്ഷണവിതരണം, ചികിത്സ, ആംബുലന്സ് സൗകര്യം തുടങ്ങിയവ സജ്ജമാക്കിയിട്ടുണ്ട്.
24 ന് പുലര്ച്ചെ നാലിന് നിര്മ്മാല്യദര്ശനവും അഷ്ടദ്രവ്യ മഹാഗണപതി ഹോമവും ഒമ്പതിന് വിളിച്ചു ചൊല്ലി പ്രാര്ഥനയും തുടര്ന്ന് ക്ഷേത്ര ശ്രീകോവിലിലെ കെടാവിളക്കില് നിന്നും ക്ഷേത്ര കാര്യദര്ശി മണിക്കുട്ടന് നമ്പൂതിരി കൊടിവിളക്കിലേക്ക് ദീപം പകരും, തുടര്ന്ന് നടപ്പന്തലില് പ്രത്യേകം തയ്യാറാക്കിയ പണ്ടാര പൊങ്കാല അടുപ്പിലേക്ക് ട്രസ്റ്റ് പ്രസിഡന്റും മുഖ്യ കാര്യദര്ശിയുമായ രാധാകൃഷ്ണന് നമ്പൂതിരി അഗ്നി പ്രോജോലിപ്പിച്ചുകൊണ്ട് പൊങ്കാലയ്ക്ക് തുടക്കം കുറിക്കും. ക്ഷേത്ര കാര്യദര്ശി മണിക്കുട്ടന് നമ്പൂതിരിയുടെ അധ്യക്ഷതയില് നടക്കുന്ന സംഗമത്തില് മന്ത്രി രമേശ് ചെന്നിത്തല പൊങ്കാലയുടെ ഉദ്ഘാടം നിരവഹിക്കും. റെജി ചെറിയാന് എംഎല്എ ആമുഖപ്രഭാഷണവും, കൊടിക്കുന്നില് സുരേഷ് എംപി പൊങ്കാല സന്ദേശവും, മാന്നാര് അബ്ദുള് ലത്തീഫ് മുഖ്യപ്രഭാഷണവും നടത്തും. ക്ഷേത്ര മേല്ശാന്തി അശോകന് നമ്പൂതിരിയുടെ കാര്മിക നേതൃത്വത്തില് ട്രസ്റ്റിമാരായ രഞ്ജിത്ത് ബി. നമ്പൂതിരി, ദുര്ഗാദത്തന് നമ്പൂതിരി എന്നിവരുടെ ആഭിമുഖ്യത്തില് പൊങ്കാല സമര്പ്പണ ചടങ്ങുകള് നടക്കും.
11 ന് 500-ല് അധികം വേദ പണ്ഡിതന്മാരുടെ മുഖ്യ കാര്മികത്വത്തില് ഭക്തര് തയ്യാറാക്കിയ പൊങ്കാല നേദിക്കും.വൈകിട്ട് അഞ്ചിന് ക്ഷേത്ര കാര്യദര്ശി മണിക്കുട്ടന് നമ്പൂതിരിയുടെ അധ്യക്ഷതയില് നടക്കുന്ന സാംസ്കാരിക സമ്മേളനം നിയമസഭ സ്പിക്കര് തിരുവഞ്ചൂര് രാധാകൃഷ്ണന് ഉദ്ഘാടനം ചെയ്യും.
അഡ്വ. വര്ഗീസ് മാമ്മന് എംഎല്എ ആമുഖപ്രഭാഷണം നടത്തും. ബിജെപി സംസ്ഥാന ജനറല് സെക്രട്ടറി അനൂപ് ആന്റണി വിശിഷ്ടാതിഥിയാരിക്കും. എടത്വ സെന്റ് ജോര്ജ് ഫൊറോന പള്ളി വികാരി ഫാ. ജോസഫ് കളരിക്കല്, നെടുമ്പ്രം ചീഫ് ഇമാം അമാനുല്ലാഹ് സുഹ്രി എന്നിവര് മുഖ്യസന്ദേശവും, മുഖ്യ കാര്യദര്ശി രാധാകൃഷണന് നമ്പൂതിരി അനുഗ്രഹപ്രഭാഷണവും, ക്ഷേത്ര മേല്ശാന്തി അശോകന് നമ്പൂതിരി മംഗളാരതി
സമര്പപിക്കുകയും മുന് പശ്ചിമബംഗാള് ഗവര്ണര് ഡോ. സി.വി ആനന്ദബോസ് ഐഎഎസ് കാര്ത്തിക സ്തംഭത്തില് അഗ്നി പ്രോജ്വലിപ്പിക്കുന്ന ചടങ്ങുകളും നിര്വഹിക്കും.
ജില്ലാ പഞ്ചായത്ത് അംഗം മഞ്ജു വിജയകുമാര്, പഞ്ചായത്ത് മെംബര്മാരായ അജിത്ത് കുമാര് പിഷാരത്ത്, ഗോകുല് ഗോപാലകൃഷ്ണന്, സുജിമോള്,മോളമ്മ, അജ്ജു സന്തോഷ്, അഡ്വ. ഡി. വിജയകുമാര് എന്നിവര് പങ്കെടുക്കും.
ക്ഷേത്രത്തിലെ പന്ത്രണ്ടു നോയമ്പ് ഉത്സവം ഡിസംബര് 16 മുതല് 27 വരെ നടക്കും. ഡിസംബര് 18 നാണ് നാരീപൂജ. നാരീപുജ ഉദ്ഘാടനം ദേശീയ വനിത കമ്മിഷന് അംഗം നിവേദിത സുബ്രഹ്മണ്യന് നിര്വഹിക്കും.
ഡിസംബര് 26 ന് കലശവും തിരുവാഭരണ ഘോഷയാത്രയും നടക്കുമെന്ന് മുഖ്യകാര്യദര്ശി രാധാക്യഷണന് നമ്പൂതിരി, ക്ഷേത്ര കാര്യദര്ശി മണിക്കുട്ടന് നമ്പൂതിരി, ജനറല് കണ്വീനര് അജിത്ത് പിഷാരത്ത് ഉത്സവകമ്മിറ്റി സെക്രട്ടറി എം.പി. രാജീവ്, വൈസ് പ്രസിഡന്റ് പി..കെ. സ്വാമിനാഥന് എന്നിവര് പത്രസമ്മേളനത്തില് പറഞ്ഞു.
പത്തനംതിട്ട കളക്ടർ ചക്കുളത്തുകാവ് സന്ദർശിച്ചു
എടത്വ: ചക്കുളത്തുകാവ് ശ്രീഭഗവതി ക്ഷേത്രത്തിൽ പൊങ്കാലയോടനുബന്ധിച്ച് പത്തനംതിട്ട കളക്ടർ എ. നിസാമുദീൻ സന്ദർശിച്ചു.
പൊങ്കാലയുടെ അവസാനഘട്ട ഒരുക്കങ്ങൾ വിലയിരുത്താനാണ് കളക്ടർ എത്തിയത്. കാര്യദർശി മണിക്കുട്ടൻ നമ്പൂതിരി, മുഖ്യകാര്യദർശി രാധാകൃഷ്ണൻ നമ്പൂതിരി, ജനറൽ കൺവീനർ അജിത്ത് പിഷാരത്ത്, ഹരിക്കുട്ടൻ നമ്പൂതിരി എന്നിവർ ചേർന്ന് സ്വീകരിച്ചു. വിവിധ വകുപ്പുകളെ ഏകോപിപ്പിച്ച് തീർഥാടകർക്ക് ആവശ്യമായ സേവനം നൽകുമെന്ന് കളക്ടർ ഉറപ്പ് നൽകി.
District News
എടത്വ: പ്രളയദുരിതബാധിതർക്ക് സർക്കാർ പ്രഖ്യാപിച്ച ധനസഹായം അടിയന്തരമായി വിതരണം ചെയ്യണമെന്നാവശ്യപ്പെട്ട് സിപിഎം ജനപ്രതിനിധികൾ എടത്വ വില്ലേജ് ഓഫിസിന് മുന്നിൽ പ്രതിഷേധ സമരം നടത്തി.
ധനസഹായത്തിന് അർഹരായിട്ടും പട്ടികയിൽനിന്ന് ഒഴിവാക്കപ്പെട്ടവരുടെ അപേക്ഷകൾ ഉൾപ്പെടുത്തി സഹായം അനുവദിക്കുക, 10,000 രൂപ പ്രഖ്യാപിച്ചിട്ടും 5,000 രൂപയും 2,100 രൂപയും മാത്രം അക്കൗണ്ടിൽ ലഭിച്ചവർക്ക് ബാക്കി തുക വിതരണം ചെയ്യുക, സർക്കാർ പ്രഖ്യാപിച്ച 14,200 രൂപ മുഴുവൻ ദുരിതബാധിതർക്കും ലഭ്യമാക്കുക തുടങ്ങിയ ആവശ്യങ്ങളുന്നയിച്ചായിരുന്നു പ്രതിഷേധം.ജനപ്രതിനിധികളായ ജീമോൻ ജോസഫ്, വിനിത ജോസഫ് എന്നിവർ സമരത്തിന് നേതൃത്വം നൽകി.
District News
കിടങ്ങറ: കിടങ്ങറ സെന്റ് ഗ്രിഗോറിയോസ് പള്ളിയിലെ വിശുദ്ധ ഗ്രിഗോറിയോസിന്റെ പ്രധാന തിരുനാൾ ഇന്ന് നടക്കും.
രാവിലെ 6.15ന് സപ്ര. വിശുദ്ധ കുർബാന. 9.30ന് ആഘോഷമായ തിരുനാൾ കുർബാന. പ്രസംഗം - ഫാ തോമസ് പാറത്താനം. പ്രദക്ഷിണം-ഫാ. ജോസഫ് തപ്പു തൊട്ടിയിൽ.
District News
ചമ്പക്കുളം: പൂപ്പള്ളി ചമ്പക്കുളം റോഡിലും, മങ്കൊമ്പ് ചമ്പക്കുളം റോഡിന്റെ വശങ്ങളിലും പുല്ലും കാടും വളർന്ന് നില്ക്കുന്നതിനാൽ കാൽനടയാത്രികർ ഭീതിയിൽ .റോഡിന് വശത്തെ ടാർമാർക്ക്കഴിഞ്ഞും പുല്ല് വളർന്ന് റോഡിലേക്ക് ഇറങ്ങിയിരിക്കുന്നതിനാൽ വാഹനങ്ങൾ വരുമ്പോൾ കാൽനടയാത്രക്കാർ പുല്ലിലേക്ക് ഇറങ്ങി നിൽക്കേണ്ട അവസ്ഥയാണ്.
എതിരേ വാഹനങ്ങൾ വന്നാൽ ചെറു വാഹനങ്ങൾ വശത്തേക്ക് ഒതുക്കുമ്പോഴും ഈ പുൽകൂട്ടത്തിലേയ്ക്കാണ് ഒതുക്കേണ്ടി വരുന്നത്.
മഞ്ഞുകാലം വിഷപ്പാമ്പുകളുടെയും മറ്റ് ഇഴ ജന്തുക്കളുടെയും ശല്യം കൂടുതലുണ്ടാകുന്ന സമയമാണ്. വഴിയിറമ്പിലും റോഡിലും രാപകൽ വ്യത്യാസമില്ലാതെ വിഷപ്പാമ്പുകളെയും മറ്റ് ഇഴ ജന്തുക്കളെയും കുട്ടനാട്ടിൽ കാണുക പതിവാണ്.
ചമ്പക്കുളം, നെടുമുടി പഞ്ചായത്തിലെ മിക്ക സ്കൂളുകളിലേയും നിരവധി കുട്ടികളാണ് ഇതുവഴി കാൽനട യാത്ര ചെയ്യുന്നത്.
ഈ വർഷം തന്നെ നെടുമുടി പഞ്ചായത്തിൽ പാമ്പ് കടിയേറ്റ് രണ്ട് പേർ മരിച്ചിരുന്നു.
അധികാരികളുടെ ഭാഗത്തു നിന്ന് അടിയന്തരമായി റോഡിന് വശത്തെ പുല്ല് വെട്ടിമാറ്റി അപകടരഹിത യാത്ര ഉറപ്പു വരുത്തുന്നതിന് നെടുമുടി, ചമ്പക്കുളം ഗ്രാമപഞ്ചായത്ത് അധികൃതർ നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്
District News
ചാരുംമൂട്: കൊല്ലം ബൈപാസ് ജംഗ്ഷൻ മുതൽ ചെങ്ങന്നൂർ ആഞ്ഞിലിമൂട് വരെയുള്ള 54.37 കിലോമീറ്റർ കൊല്ലം -തേനി ദേശീയപാത വികസനത്തിന്റെ ഭാഗമായി ഭൂമി ഏറ്റെടുക്കൽ നടപടികൾ വേഗത്തിലാക്കുന്നതിനുള്ള സംയുക്ത സ്ഥലപരിശോധനയ്ക്ക് തുടക്കമായി. കൊല്ലം-ആലപ്പുഴ ജില്ലകളുടെ അതിർത്തിയായ വയ്യാങ്കരയിൽനിന്ന് ആരംഭിച്ച പരിശോധനയിൽ ആലപ്പുഴ ജില്ലയിലെ താമരക്കുളം, ചുനക്കര, വെട്ടിയാർ, ചെറിയനാട്, ആല, പെണ്ണുക്കര എന്നീ ആറു വില്ലേജുകളിലെ പ്രാഥമിക സർവേ പൂർത്തിയാക്കി. ദേശീയപാത അഥോറിറ്റി ഉൾപ്പെടെ വിവിധ സർക്കാർ വകുപ്പുകളിലെ ഉദ്യോഗസ്ഥരും ഭൂമി ഏറ്റെടുക്കൽ വിഭാഗവും പദ്ധതിയുടെ കൺസൾട്ടൻസിയും സംയുക്തമായാണ് പരിശോധന നടത്തുന്നത്.
പുതിയ അലൈൻമെന്റ് പ്രകാരം ഏറ്റെടുക്കേണ്ട ഭൂമിയുടെ അതിരുകൾ, സർവേ നമ്പറുകൾ, കെട്ടിടങ്ങൾ, വൈദ്യുതി ലൈനുകൾ, കുടിവെള്ള പൈപ്പുകൾ, മറ്റ് അടിസ്ഥാന സൗകര്യങ്ങൾ എന്നിവ പരിശോധിച്ച് നടപടികൾ മുന്നോട്ടുകൊണ്ടുപോകുകയാണ്. ഡിസംബർ 20നകം സംയുക്ത സ്ഥലപരിശോധനയും വിവരങ്ങളുടെ സ്ഥിരീകരണവും പൂർത്തിയാക്കി ഡിസംബർ 31നു മുമ്പ് പുതുക്കിയ വിജ്ഞാപനം പ്രസിദ്ധീകരിക്കുന്നതിനുള്ള നടപടികളാണ് ലക്ഷ്യമിടുന്നത്.
District News
ആലപ്പുഴ: ആധാറുമായി ബന്ധപ്പെട്ട എല്ലാ സേവനങ്ങളും പരാതികളും ഒരിടത്തുതന്നെ പരിഹരിക്കാനാകുന്ന പുതിയ ആധാർ സേവ കേന്ദ്രം ആലപ്പുഴ കൈതവനയിൽ പ്രവർത്തനമാരംഭിച്ചു. ആധാറുമായി ബന്ധപ്പെട്ട ആവശ്യങ്ങൾക്കും തിരുത്തലുകൾക്കുമായി പൊതുജനങ്ങൾ നേരിടുന്ന ബുദ്ധിമുട്ടുകൾക്ക് പുതിയ കേന്ദ്രം ആശ്വാസമാകുമെന്ന് കേന്ദ്രം ഉദ്ഘാടനം നിർവഹിച്ച ജില്ലാ കളക്ടർ ഷാജി വി. നായർ പറഞ്ഞു.
ആധാറുമായി ബന്ധപ്പെട്ട വിവിധ ആവശ്യങ്ങൾക്കും തിരുത്തലുകൾക്കുമായി നിരവധി പരാതികൾ ഉയരാറുണ്ട്. ഇത്തരം പ്രശ്നങ്ങൾ പൂർണമായും ഒരിടത്തുതന്നെ പരിഹരിക്കാൻ കഴിയുന്ന കേന്ദ്രം ജില്ലയിൽ ആരംഭിക്കുന്നത് ഏറെ ആശ്വാസകരമാണെന്ന് കളക്ടർ കൂട്ടിച്ചേർത്തു.
കേന്ദ്രസർക്കാർ എല്ലാ ജില്ലകളിലും യുഐഡിഎഐ സേവ കേന്ദ്രങ്ങൾ ആരംഭിക്കുന്നതിന്റെ ഭാഗമായാണ് ആലപ്പുഴയിലും പ്രവർത്തനമാരംഭിച്ചതെന്ന് യുഐഡിഎഐ ഡയറക്ടർ വിനോദ് ജേക്കബ് ജോൺ പറഞ്ഞു.
വയനാട് ഒഴികെ മറ്റ് ജില്ലകളിൽ ഇത്തരം കേന്ദ്രങ്ങൾ പ്രവർത്തിക്കുന്നുണ്ട്. കേരളത്തിലെ 13-ാമത്തെ ആധാർ സേവ കേന്ദ്രമാണ് ആലപ്പുഴയിലേത്. രാവിലെ 9.30 മുതൽ വൈകിട്ട് 5.30 വരെയാണ് സമയം.
District News
മുഹമ്മ: നാടൻ ബോംബും പെട്രോൾ ബോംബുമായി യുവാവ് പോലീസിന്റെ പിടിയിലായി. മുഹമ്മ പഞ്ചായത്ത് തെക്കത്ത് വീട്ടിൽ കണ്ണൻ (34) എന്നയാളെയാണ് മുഹമ്മ പൊലിസ് അറസ്റ്റ് ചെയ്തത്.
പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ഇയാളുടെ വീട്ടിൽ നടന്ന റെയ്ഡിനിടെയാണ് ബോംബുകൾ കണ്ടെത്തിയത്. ഇയാളുടെ പക്കൽ നിന്ന് മൂന്ന് പെട്രോൾ ബോംബുകളും ഒരു നാടൻ ബോംബും 20 ഗുണ്ടുമാണ് കണ്ടെടുത്തത്. കൂടാതെ ബോംബ് നിർമിക്കാൻ സൂക്ഷിച്ചിരുന്ന പെട്രോളും പോലീസ് കണ്ടെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
ആലപ്പുഴ ജില്ലാ പോലീസ് മേധാവി വിഷ്ണു പ്രദീപ് ഐപിഎസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ ചേർത്തല ഡെപ്യൂട്ടി പോലീസ് സൂപ്രണ്ട് മഞ്ജു ലാലിന്റെ നിർദേശപ്രകാരം ചേർത്തല പോലീസ് ഇൻസ്പെക്ടർ മഞ്ജു ദാസിന്റെ നേതൃത്വത്തിൽ മുഹമ്മ പോലീസ് സ്റ്റേഷൻ എസ്എച്ച്ഒ ഡി. സജീവ് കുമാർ, സബ് ഇൻസ്പെക്ടർമാരായ സന്തോഷ്, ഉത്തമൻ, ബിജുമോൻ സിപിഒമാരായ അഞ്ജിത, ശ്യാം ലാൽ എന്നിവർ ചേർന്നാണ് പ്രതിയെ അറസ്റ്റ് ചെയ്തത്.
എന്തിനാണ് ഇയാൾ ബോബ് നിർമാണം നടത്തിയത് എന്നുള്ളത് അന്വേഷിക്കുകയാണെന്ന് പൊലിസ് പറഞ്ഞു. സ്റ്റെയർകേസിഇയാൾ നിർമാണ പ്രവർത്തനങ്ങൾ ഏറ്റെടുത്തു ചെയ്യുന്നയാളാണ് ഇയാൾ. ഏതെങ്കിലും രാഷ്ട്രീയ പ്രസ്ഥാനവുമായി അടുത്ത് പ്രവർത്തിക്കുന്നയാൾ അല്ലെന്നാണ് പൊലിസ് പറയുന്നത്. മുൻപ് പല കേസുകളിലും കസ്റ്റഡിയിൽ എടുത്തിട്ടുള്ള കണ്ണൻ മുഹമ്മ പൊലിസിന്റെ റൗഡിലിസ്റ്റിൽപ്പെട്ട ആളാണ്. കണ്ണനെ കാപ്പാ ലിസ്റ്റിൽ ഉൾപ്പെടുത്തുമെന്നും പൊലിസ് പറഞ്ഞു.
District News
കായംകുളം: പിതാവിനൊപ്പം വീടിന്റെ ടെറസിൽ കയറിയ ഏഴുവയസുകാരനെ തെരുവു നായ്ക്കൾ ആക്രമിച്ചു.
കായംകുളം പത്തിയൂർ പാറക്കാട്ട് വടക്കതിൽ സിയാസിന്റെ മകൻ അഫാസി (7)നാണ് തെരുവുനായയുടെ കടിയേറ്റത്. അഫാസിന്റെ മുഖത്താണ് കടിച്ചത്.
കുട്ടിയെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇന്നലെ രാവിലെ പിതാവിനൊപ്പം ടെറസിൽ കയറിയതായിരുന്നു. ടെറസിൽ കൂട്ടത്തോടെ കയറി തമ്പടിച്ചുകിടന്ന തെരുവുനായ്ക്കൾ അഫാസിനെ ആക്രമിക്കുകയായിരുന്നു.
District News
ആലപ്പുഴ: ജില്ലയുടെ അവിഭാജ്യ മേഖലയായ കുട്ടനാട് ഉൾപ്പെടെയുള്ള പ്രദേശങ്ങളിലെ പ്രളയ സാധ്യത കുറയ്ക്കാൻ ജലനിർഗമനമാർഗങ്ങൾ മെച്ചപ്പെടുത്തണമെന്ന് മന്ത്രി എം. ലിജു. സംസ്ഥാന ആസൂത്രണ ബോർഡിന്റെ ആഭിമുഖ്യത്തിൽ പതിനഞ്ചാം പഞ്ചവത്സര പദ്ധതി രൂപീകരണവുമായി ബന്ധപ്പെട്ട് പുന്നപ്ര കാർമൽ എൻജിനിയറിംഗ് കോളജിൽ സംഘടിപ്പിച്ച ജില്ലാതല ആശയരൂപീകരണ യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ലീഡിംഗ് ചാനലിന്റെ ആഴം കൂട്ടണം. തോട്ടപ്പള്ളി സ്പിൽവേയുടെ നവീകരണം ആവശ്യമാണ്. പ്രളയ മുന്നൊരുക്കങ്ങളുടെ ഭാഗമായി ജില്ലയിലെ ഉൾനാടൻ കനാലുകൾ, ജലസ്രോതസുകൾ എന്നിവ മെച്ചപ്പെടുത്തി ഉൾനാടൻ ജലഗതാഗതം വികസിപ്പിക്കണം. ഇതിനായി പദ്ധതി രൂപീകരിച്ച് പണമനുവദിക്കണം. അരൂർ മുതൽ കായംകുളം വരെ വിസ്തൃതമായ 82 കിലോമീറ്റർ നീളമുള്ള തീരദേശം തുറമുഖ വികസനത്തിന് മുതൽക്കൂട്ടാകും.
തീരദേശ മേഖലയുടെ ഭൗതിക വികസനത്തിനൊപ്പം അവിടത്തെ ജനങ്ങളുടെ ജീവിത സാഹചര്യങ്ങളും മെച്ചപ്പെടുത്തണം. തീരദേശ ജനതയുടെ അരക്ഷിതാവസ്ഥ പരിഹരിക്കാൻ തൊഴിൽ-സാമൂഹിക-വരുമാന സുരക്ഷിതത്വം ഉറപ്പാക്കണം.
കുട്ടനാടിന്റെ കാർഷിക അന്തരീക്ഷം മെച്ചപ്പെടുത്താൻ ആധുനിക കൃഷിരീതികൾ നടപ്പാക്കണം. പ്രളയകാലത്ത് ബണ്ടുകൾ തകരുന്നത് പ്രതിരോധിക്കാൻ സംവിധാനങ്ങൾ ഒരുക്കണം. പാടശേഖര സംരക്ഷണത്തിന് കൂട്ടായ പ്രവർത്തനം ഉറപ്പാക്കണം. കുട്ടനാട് പാക്കേജ് പരിഷ്കരിക്കാൻ നടപടി സ്വീകരിക്കണം. ജില്ലയുടെ തനതായ വിനോദസഞ്ചാര സാധ്യതകൾ വിപുലീകരിക്കണം. ഒപ്പം പരിസ്ഥിതി സൗഹൃദ ഉത്തരവാദിത്ത വിനോദസഞ്ചാര പദ്ധതികളും പ്രോത്സാഹിപ്പിക്കണം. ജില്ലയുടെ തനതായ ഗ്രാമീണ കാർഷിക സംസ്കാരത്തെയും കലാരൂപങ്ങളെയും വിനോദസഞ്ചാരത്തിലൂടെ ലോകത്തിന് സമയബന്ധിതമായി റോഡുകളുടെ അറ്റകുറ്റപ്പണികൾ തീർക്കണമെന്നും മന്ത്രി പറഞ്ഞു.
സംസ്ഥാനത്തിന്റെ സമുദ്ര-മത്സ്യബന്ധന മേഖലയ്ക്ക് ഉണർവ് നൽകുന്ന ബ്ലൂ ഇക്കോണോമിയുടെ ആസ്ഥാനമായി ആലപ്പുഴ മാറുമെന്ന് ചടങ്ങിൽ അധ്യക്ഷയായ നിയമസഭാ ഡെപ്യൂട്ടി സ്പീക്ക ഷാനിമോൾ ഉസ്മാൻ പറഞ്ഞു.
തദ്ദേശസ്ഥാപനങ്ങൾക്ക് വളർച്ച ഉറപ്പാക്കാനുള്ള ഉത്തരവാദിത്തമുണ്ടെന്നും പ്രവാസികളെയും പ്രാദേശിക സംരംഭകരേയും ഉൾപ്പെടുത്തി തദ്ദേസ്ഥാപന തലത്തിൽ നിക്ഷേപ സംഗമങ്ങൾ നടത്തണമെന്നും ആമുഖ പ്രഭാഷണം നടത്തിയ സംസ്ഥാന ആസൂത്രണ ബോർഡ് വൈസ് ചെയർമാൻ കെ.എം. ചന്ദ്രശേഖർ പറഞ്ഞു.
പ്രധാന നിർദേശങ്ങൾ
തുടർന്ന് ജില്ലയുടെ വിവിധ വികസന വിഷയങ്ങൾ സംബന്ധിച്ച ചർച്ചയിൽ വിവിധ തദ്ദേശസ്വയംഭരണ സ്ഥാപന അധ്യക്ഷർ പ്രസംഗിച്ചു. കുട്ടനാട്ടിൽ പാടശേഖരങ്ങളിൽ പ്രളയാനന്തരം അടിഞ്ഞുകൂടിയ എക്കലും ചെളിയും മാറ്റണം, തോട്ടപ്പള്ളി സ്പിവേയുടെ അറ്റകുറ്റപ്പണി സമയബന്ധിതമായി പൂർത്തിയാക്കണം, തണ്ണീർമുക്കത്ത് ഷട്ടറുകൾ അടയ്ക്കാനും തുറക്കാനും ആധുനിക സജ്ജീകരണങ്ങൾ ഏർപ്പെടുത്തണം, കുടുംബശ്രീ മാതൃകയിൽ യുവ കേരളം മിഷൻ രൂപീകരിക്കണം, ഫിഷറീസ് മേഖലയുടെ വികസനത്തിന് പ്രത്യേക സബ് പ്ലാൻ, മത്സ്യബന്ധന മേഖലയിലുള്ളവർക്ക് നൈപുണ്യ പരിശീലനം, പൊഴികൾ ശുചീകരിച്ച് അവയെ വെള്ളക്കെട്ട് പരിഹരിക്കാനും കാർഷിക സംരക്ഷണത്തിനും പ്രയോജനപ്പെടുത്തണം, കയർ ഉത്പന്നങ്ങളുടെ ഓൺലൈൻ വിപണനം സാധ്യമാക്കണം, കുട്ടനാട് കേന്ദ്രീകരിച്ച് റൈസ് പ്രോസസിംഗ് ക്ലസ്റ്റർ രൂപീകരിക്കണം, വനിതാ സംരംഭകർക്ക് ഇൻക്യൂബേഷൻ കേന്ദ്രം, മിനി ഐടി പാർക്ക്, എഐ അധിഷ്ഠിത ചെറുവ്യവസായങ്ങൾ ആരംഭിക്കണം തുടങ്ങിയവയാണ് പ്രധാന നിർദേശങ്ങൾ.
ജില്ലാ പഞ്ചായത്ത് പ്രസിഡന്റ് എ. മഹേന്ദ്രൻ, ജല്ലാ കളക്ടർ ഷാജി വി. നായർ, ആസൂത്രണ ബോർഡ് അംഗങ്ങളായ ജി. വിജയരാഘവൻ, പി.പി. ബാലൻ, വരുൺ സന്തോഷ്, ശ്രീധർ രാധാകൃഷ്ണൻ, പെർസ്പെക്റ്റീവ് പ്ലാനിംഗ് ഓഫീസർ എം. ഹുസൈൻ, ജില്ലാ പ്ലാനിംഗ് ഓഫീസർ ദീപ ശിവദാസൻ തുടങ്ങിയവർ പങ്കെടുത്തു.
District News
കാടുകുറ്റി: പഠനത്തിനൊപ്പം കായികസംസ്കാരവും വളർത്തിയെടുക്കാൻ കുട്ടികൾക്ക് അവസരമൊരുക്കണമെന്ന് ഉന്നത വിദ്യാഭ്യാസമന്ത്രി റോജി എം. ജോൺ. പുതുതലമുറയുടെ മാനസികവും ബൗദ്ധികവുമായ വികാസത്തോടൊപ്പം ശാരീരികക്ഷമതയും ഉറപ്പാക്കാൻ പരിശീലന പരിപാടികൾ സംഘടിപ്പിക്കണമെന്നും മന്ത്രി പറഞ്ഞു.
സംസ്ഥാനത്തെ 2024-25 അധ്യയന വർഷത്തെ മികച്ച സ്കൂൾ കായികാധ്യാപകനുള്ള ജി.വി. രാജ പുരസ്കാരം നേടിയ അന്നനാട് യൂണിയൻ ഹയർ സെക്കൻഡറി സ്കൂൾ കായികാധ്യാപകൻ ജിബി വി. പെരേപ്പാടനെ ആദരിക്കുന്നതിനായി സ്കൂൾ അധികൃതർ സംഘടിപ്പിച്ച ആദരണീയം പരിപാടി ഉദ്ഘാടനം ചെയ്യുകയായിരുന്നു മന്ത്രി. പുരസ്കാരം തുടർപ്രവർത്തനങ്ങൾക്ക് പ്രചോദനമാകട്ടെയെന്ന് അദ്ദേഹം ആശംസിച്ചു.
ഗ്രാമപഞ്ചായത്ത് പ്രസിഡന്റ് കെ.സി. മനോജ് അധ്യക്ഷത വഹിച്ചു. വൈസ് പ്രസിഡന്റ് മോളി തോമസ്, ജില്ലാ പഞ്ചായത്ത് അംഗം ഷോൺ പെല്ലിശേരി, പഞ്ചായത്ത് സ്ഥിരം സമിതി അധ്യക്ഷൻ എം.ആർ. ഡേവീസ്, ബ്ലോക്ക് അംഗം എം.ആർ. രവീന്ദ്രൻ, സ്കൂൾ മാനേജർ ഐ.കെ. ഗോവിന്ദ്, പ്രിൻസിപ്പൽ ഐ. ജയ, പ്രധാനാധ്യാപിക എം.പി. മാലിനി, പി.ടി.എ പ്രസിഡന്റ് പി.ആർ. രാജേഷ്, മാനേജ്മെന്റ് കമ്മിറ്റി പ്രസിഡന്റ് എം. രാജഗോപാൽ, രജിത ഷൈജു, കെ.കെ. ലിൻസി എന്നിവർ പ്രസംഗിച്ചു.
District News
ഇരിങ്ങാലക്കുട: നഗരസഭയായി വളര്ച്ചയുടെ പാതയില് മുന്നേറുമ്പോഴും സ്വന്തമായി ഒരു പൊതുശ്മശാനം എന്ന അടിസ്ഥാനസൗകര്യം പോലുമില്ലാത്ത നഗരസഭ എന്ന പരിമിതി ഇരിങ്ങാലക്കുടയെ വര്ഷങ്ങളായി പിന്തുടരുകയാണ്. നഗരസഭാ പരിധിയില് മരണപ്പെടുന്നവരുടെ മൃതദേഹങ്ങളുടെ സംസ്കാരച്ചടങ്ങുകള്ക്കായി വിവിധ സ്വകാര്യ, സമുദായ ശ്മശാനങ്ങളെയും മറ്റ് സംവിധാനങ്ങളെയും ആശ്രയിക്കേണ്ട അവസ്ഥയാണ് നിലവിലുള്ളത്.
പൊതുശ്മശാനത്തിനായി അനുയോജ്യമായ സ്ഥലം കണ്ടെത്തുന്നതിനുള്ള നടപടികളാണ് നഗരസഭ അധികൃതര് ആരംഭിച്ചിരിക്കുന്നത്. നഗരസഭയുടെ വാര്ഡ് എട്ട് നമ്പ്യാങ്കാവ് വാര്ഡില് നഗരസഭയുടെ അധീനതയിലുള്ള സ്ഥലമാണ് ഇതിനായി പരിഗണിക്കുന്നത്.
നഗരസഭ ചെയര്മാന് എം.പി. ജാക്സണ്, വൈസ് ചെയര്പേഴ്സണ് ചിന്ത ധര്മരാജന്, സ്റ്റാന്ഡിംഗ് കമ്മിറ്റി ചെയര്മാന്മാരായ അഡ്വ.വി.സി വര്ഗീസ്, റോണി പോള്, വാര്ഡ് കൗണ്സിലര് സി.സി. ഷിബിന് തുടങ്ങിവവര് മൂന്നു മാസം മുമ്പ് സ്ഥലം സന്ദര്ശിച്ച് സാധ്യതകള് വിലയിരുത്തിയിരുന്നു. നിലവില് കാടും പടലവും നിറഞ്ഞു കാടുകയറി കിടക്കുന്ന രണ്ട് ഏക്കറോളം വരുന്ന പ്രദേശമാണിത്. മുന് മന്ത്രി പി.കെ. ചാത്തന് മാസ്റ്ററുടെ സ്മൃതി കുടീരം നിലകൊള്ളുന്ന സ്ഥലത്തോടു ചേര്ന്നാണ് ഈ ഭൂമി.
ജീവിതത്തിന്റെ അവസാനയാത്രയ്ക്കും സ്വന്തം മണ്ണില് ഒരിടം വേണമെന്നുള്ള വര്ഷങ്ങളായുള്ള ആവശ്യം യാഥാര്ഥ്യമാകുമെന്ന പ്രതീക്ഷയിലാണ് നഗരവാസികള്. പൊതുശ്മശാനം ആരംഭിക്കുന്നതിനോട് സമീപവാസികള് പൂര്ണ പിന്തുണയാണ് പ്രകടിപ്പിച്ചത്.
District News
തുരുത്തിപ്പറമ്പ്: വരപ്രസാദനാഥ പള്ളി കുടുംബസമ്മേളന കേന്ദ്രസമിതി വാർഷികം ആഘോഷിച്ചു. കേന്ദ്രസമിതി രൂപത ഡയറക്ടർ ഫാ. ഫ്രീജോ പാറക്കൽ ഉദ്ഘാടനം നിർവഹിച്ചു. വികാരി ഫാ. പോളി പുതുശേരി അധ്യക്ഷത വഹിച്ചു.
കേന്ദ്രസമിതി പ്രസിഡന്റ് ലിബിൻ മുരിങ്ങലേത്ത്, കേന്ദ്രസമിതി രൂപത പ്രസിഡന്റ് ജിക്സൺ നാട്ടേക്കാടൻ, സിസ്റ്റർ പൗളിൻ, കൈക്കാരൻ ജെസ്റ്റിൻ ആച്ചാണ്ടി, ബ്രദർ ബോബിൻ, സെക്രട്ടറി ജോജോ കോട്ടക്കൽ കൺവീനർ ജിൻസൻ ചാതേലി എന്നിവർ പ്രസംഗിച്ചു. ഫാ. ജിതിൻ കാളൻ ഇടവക ഡയറക്ടറി പ്രകാശനം ചെയ്തു.
District News
ഇരിങ്ങാലക്കുട: സെന്റ് ജോസഫ്സ് കോളജില് കംപ്യൂട്ടര് സയന്സ് വിഭാഗത്തിന്റെ അസോസിയേഷന് ദിനാചരണം കൂട്ടനെല്ലൂര് സി. അച്യുതമേനോന് കോളജിലെ കംപ്യൂട്ടര് സയന്സ് വിഭാഗം അസിസ്റ്റന്റ് പ്രഫസര് കെ. കുമരേശന് ഉദ്ഘാടനം ചെയ്തു. ആര്ട്ടിഫിഷ്യല് ഇന്റലിജന്സ്, എഡ്ജ് എഐ, ടൈനി എംഎല് എന്നിവയുടെ പ്രായോഗിക സാധ്യതകളും തൊഴില് ഗവേഷണ മേഖലകളിലെ അവസരങ്ങളും അദ്ദേഹം വിദ്യാര്ഥികളുമായി പങ്കുവച്ചു.
കോളജ് പ്രിന്സിപ്പല് സിസ്റ്റര് ഡോ. ബ്ലെസി അധ്യക്ഷത വഹിച്ചു. സെല്ഫ് ഫിനാന്സിംഗ് പ്രോഗ്രാം കോ-ഓര്ഡിനേറ്റര് സിസ്റ്റര് ഡോ. റോസ് ബാസ്റ്റിന്, കംപ്യൂട്ടര് സയന്സ് വിഭാഗം മേധാവി അമ്പിളി ജേക്കബ്, അസോസിയേഷന് സെക്രട്ടറി അല്വീന പോള് എന്നിവര് പ്രസംഗിച്ചു.
District News
കൊടുങ്ങല്ലൂർ: അഴിക്കോട് മാർത്തോമ പൊന്തിഫിക്കൽ തീർഥകേന്ദ്രത്തോടനുബന്ധമായി ആരംഭിച്ച മാർത്തോമ ഫാമിലി വെൽനസ് സെന്റർ കെ. കെ. വത്സരാജ് എംഎൽഎ ഉദ്ഘാടനം ചെയ്തു. തൃശൂർ ദേവമാത പ്രൊവിൻഷ്യൽ ഫാ. ഡോ. ജോസ് നന്തിക്കര സിഎംഐ അധ്യക്ഷത വഹിച്ചു. തീർഥകേന്ദ്രം റെക്ടർ ഫാ. ഡോ. ജോയ് വട്ടോലി, ഫാ. ഡോ. ബിസ്റ്റൺ കൂള, പഞ്ചായത്ത് പ്രസിഡന്റ് കെ.പി. രാജൻ, ഫാ. വിൻ കുരിശിങ്കൽ, ഫാ. ജോയ് പെരേപ്പാടൻ, വാർഡ് മെമ്പർ പ്രസീന റാഫി, ബ്ലോക്ക് മെമ്പർ ഷെമീം മുഹമ്മദ്, ഫാ. ഡോ. ആന്റോ തെക്കൂടൻ, ഫാ. സെൻജോ നടുവിൽപീടിക എന്നിവർ സംസാരിച്ചു.
പ്രസ്തുത ചടങ്ങിൽ ഫാമിലി വെൽനസ് സെന്റർ ഡയറക്ടറായ ഫാ. ഡോ. ബിസ്റ്റൺ കൂള വിവാഹജീവിതത്തിന്റെ പ്രാധാന്യത്തെക്കുറിച്ച് എഴുതിയ പുസ്തകത്തിന്റെ പ്രകാശനവും നടന്നു. തുടർന്ന് മാർ തോമാശ്ലീഹയുടെ ഭാരത പ്രവേശന തിരുനാളിന് തുടക്കം കുറിച്ചുകൊണ്ട് നവവാരം അധ്യാപകർക്കുള്ള പ്രത്യേക പ്രാർഥനയോടും വിശുദ്ധ കുർബാനയോടും കൂടി ആരംഭിച്ചു. നവംബർ 22ന് നടക്കുന്ന തിരുനാൾ വരെ തുടർന്നുള്ള എല്ലാ ഞായറാഴ്ചകളിലും നാലിന് ദിവ്യബലി ഉണ്ടായിരിക്കും. അടുത്ത ഞായറാഴ്ച ആരോഗ്യ പ്രവർത്തകർക്കായി പ്രത്യേക പ്രാർഥനയും കുർബാനയും ഉണ്ടായിരിക്കും.
District News
പറപ്പൂക്കര: പറപ്പൂക്കര ഫൊറോനയിലെ മതബോധന വിദ്യാർഥികൾക്കായുള്ള ബൈബിൾ കലോത്സവത്തിൽ പറപ്പൂക്കര സെന്റ് ജോണ്സ് ഇടവക ഓവറോൾ ചാന്പ്യൻമാരായി. ആനന്ദപുരം ലിറ്റിൽ ഫ്ളവർ ഇടവകയ്ക്കാണ് രണ്ടാം സ്ഥാനം. നെല്ലായി സെന്റ് മേരീസ് മൂന്നാം സ്ഥാനവും കരസ്ഥമാക്കി. നേരത്തേ ഇരിങ്ങാലക്കുട രൂപത മതബോധന ഡയറക്ടർ ഫാ. സിബു കള്ളാപറന്പിൽ ഉദ്ഘാടനം ചെയ്തു.
ഫൊറോന ഡയറക്ടർ ഫാ. മിൽട്ടണ് തട്ടിൽ കുരുവിള, ഫൊറോന വികാരി ഫാ. റാഫേൽ പഞ്ഞിക്കാരൻ, ജനറൽ കണ്വീനർ ഫാ. ജോണ്സൻ തറയിൽ, ജോയിന്റ് ഡയറക്ടർ ഫാ. വിനോയ് തെറ്റയിൽ, കലോത്സവ കണ്വീനർ ജോസ് അന്തിക്കാടൻ, ജോയിന്റ് കണ്വീനർ ഡിജു തന്പി, പള്ളി ട്രസ്റ്റി ജോയി കാഞ്ഞിരപ്പള്ളൻ, ഫൊറോന സെക്രട്ടറി സിസ്റ്റർ മിനൂബ എന്നിവർ പ്രസംഗിച്ചു.
District News
കയ്പമംഗലം: പനമ്പിക്കുന്ന് നാഷണൽ ഹൈവേയിൽ എട്ടു യുവാക്കളുടെ മരണത്തിന് ഇടയാക്കിയ വാഹനാപകടത്തെ തുടർന്ന് റോഡ് സുരക്ഷയ്ക്കു വേണ്ടി എൻഎച്ച്എഐ കരാർ കമ്പനി അധികൃതർ പ്രശ്നബാധിത പ്രദേശങ്ങൾ സന്ദർശിച്ചു. കയ്പമംഗലം പഞ്ചായത്ത് എംഎൽഎയെയും പങ്കെടുപ്പിച്ചുകൊണ്ട് നടത്തിയ സർവകക്ഷി പ്രതിഷേധയോഗത്തിൽ തീരദേശവികസന സമിതി ഭാരവാഹികൾ കൈപ്പമംഗലം എൻഎച്ച് 66 റോഡ് സുരക്ഷയും വികസനവും എന്ന സമഗ്ര റിപ്പോർട്ട് അവതരിപ്പിച്ച് പഞ്ചായത്തിനും എംഎൽഎക്കും കൈമാറിയിരുന്നു. ഈ സമഗ്ര റിപ്പോർട്ട് ശിവാലയ കമ്പനിക്ക് നൽകിയതിന്റെ അടിസ്ഥാനത്തിലാണ് കമ്പനിയുടെ എൻജിനിയർമാർ ഉൾപ്പെടെയുള്ള ഉദ്യോഗസ്ഥർ വിവിധയിടങ്ങളിൽ പരിശോധനക്ക് എത്തിയത്.
ആദ്യം പഞ്ചായത്തിൽ എത്തി പഞ്ചായത്ത് പ്രസിഡന്റും സെക്രട്ടറിയും മെമ്പർമാരുമായി പ്രശ്നങ്ങൾ ചർച്ച ചെയ്തു. തുടർന്ന് ജനപ്രതിനിധികൾക്കൊപ്പം കയ്പമംഗലം പനമ്പിക്കുന്നിലും വഴിയമ്പലത്തും മൂന്നുപീടിക ബീച്ച് റോഡ് അടിപ്പാതയും സന്ദർശിച്ചു. ഇവിടെ തുടർച്ചയായി നടക്കുന്ന വാഹനാപകടങ്ങളുടെ കാര്യങ്ങൾ പൊതുജനങ്ങൾ പരാതിയായി ഉദ്യോഗസ്ഥരെ ബോധിപ്പിച്ചു.
ആറ് സ്ഥലങ്ങളിൽ ഹമ്പ് വേണമെന്നും ഇൻഡിക്കേഷൻ ലൈറ്റുകൾ, സിഗ്നൽ ലൈറ്റുകൾ, സ്ട്രീറ്റ് ലൈറ്റുകൾ എന്നിവ സ്ഥാപിക്കണമെന്നും പഞ്ചായത്ത് പ്രസിഡന്റ് ബീന സുരേന്ദ്രൻ ആവശ്യപ്പെട്ടു. റോഡിന്റെ ട്രാക്ക് ലൈൻ അടിയന്തിരമായി ആവശ്യമാണെന്നു ശിവാലയ ഉദ്യോഗസ്ഥർക്ക് ബോധ്യപ്പെട്ടതിന്റെ അടിസ്ഥാനത്തിൽ താത്കാലിക പരിഹാരമായി സിഗ്നൽ ലൈറ്റുകൾ, ഹമ്പുകൾ എന്നിവ സ്ഥാപിക്കാമെന്ന് ഉറപ്പു നൽകി.
സേഫ്റ്റി സെക്ഷനുമായി ബന്ധപ്പെട്ട് ശാശ്വതസുരക്ഷ ഉറപ്പുവരുത്താൻ വേണ്ട നിർദേശങ്ങൾ തീരദേശവികസനസമിതി പ്രസിഡന്റ് സക്കീർ ഹുസൈൻ ഉന്നയിച്ചു. ബീച്ച് റോഡ് സമരസമിതി ചെയർമാൻ റഫീക്ക്, കേരള വ്യാപാരി വ്യവസായി മൂന്നുപീടിക യൂണിറ്റ് പ്രസിഡന്റ് ഷിബാദ്, സെക്രട്ടറി ആഷിഫ് തുടങ്ങിയവർ വിവിധ പ്രശ്നങ്ങൾ അവതരിപ്പിച്ചു.
പഞ്ചായത്ത് വൈസ് പ്രസിഡന്റ് കെ.കെ.സക്കറിയ സ്റ്റാൻഡിംഗ് കമ്മിറ്റി ചെയർമാൻമാരായ മണി ഉല്ലാസ്, സുരേഷ് കൊച്ചുവീട്ടിൽ, അൻസാ മോൾ, ജനപ്രതിനിധിയകളായ നസീമ, ലുബ്ന, പി.സി.മനോജ്, കെ.കെ. പവിത്രൻ, ശിവാലയ മ്പനി പ്രതിനിധി ഷിബു, നാഷണൽ ഹൈവേ പ്രതിനിധി ബാബു, വാട്ടർ അഥോറിറ്റി എക്സിക്യൂട്ടീവ് എൻജിനിയർ വിന്നി പോൾ, ഓവർസിയർ അനുമോൾ തുടങ്ങിയവരും ഉണ്ടായിരുന്നു.
District News
തൃശൂർ: പുഞ്ച, മുണ്ടകൻ കൃഷിയിറക്കാനിരിക്കുന്ന കർഷകർക്കു തിരിച്ചടിയായി ഉണക്ക് ഭീഷണിക്കൊപ്പം രാസവള വിലവർധനയും.
ഒരുവർഷത്തിനിടെ അന്പതുശതമാനത്തോളമാണു വിലവർധന. കൂടുതൽ ഉപയോഗിക്കുന്ന ഫാക്ടംഫോസ്, പൊട്ടാഷ് എന്നിവയ്ക്കു വിലയേറിയതോടെ കൃഷിച്ചെലവ് ഇരട്ടിക്കുമെന്നും കർഷകർ പറയുന്നു. തെങ്ങ്, വാഴ, പച്ചക്കറി കൃഷിക്കും വിലവർധന തിരിച്ചടി. ജില്ലയിൽ 13,000 ഹെക്ടർ കോൾപാടങ്ങളിലായി 30,000 കർഷകരാണു നെൽകൃഷി ചെയ്യുന്നത്. മാള, ഒല്ലൂക്കര, പഴയന്നൂർ മേഖലകളിലും കോൾപാടങ്ങളിലും വിതയ്ക്കുള്ള ഒരുക്കങ്ങൾ ആരംഭിച്ചു. സെപ്റ്റംബർ പകുതിയോടെ പാടങ്ങളിലെ വെള്ളമിറക്കി, വൈകിയുള്ള പുഞ്ചക്കൃഷിക്കു വിതയൊരുക്കാറാണു പതിവ്. ഉയർന്നപ്രദേശങ്ങളിലെ മുണ്ടകൻ കൃഷിക്കും ഈ മാസം തുടക്കമാകും. നിലമൊരുക്കിയശേഷം വിതച്ചാൽ 30 ദിവസത്തിനകവും നടീലിനുശേഷം 20 ദിവസത്തിനകവും വളമിടണം. ഒരേക്കറിനു രണ്ടു ചാക്ക് ഫാക്ടംഫോസ്, ഒരുചാക്ക് യൂറിയ, ഒരുചാക്ക് പൊട്ടാഷ് എന്നിവ ആവശ്യമാണ്. കഴിഞ്ഞ വർഷത്തേക്കാൾ ഇരട്ടിത്തുക വളത്തിനു മാത്രം മാറ്റിവയ്ക്കേണ്ടിവരും. എൽനിനോ പ്രതിഭാസത്തിന്റെ ഭാഗമായി വരൾച്ച രൂക്ഷമായാൽ ഉണക്കുണ്ടാകുമെന്ന ആശങ്കയ്ക്കിടെയാണു ഉത്പാദനച്ചെലവും കൂടുന്നത്.
87000 ഹെക്ടറിൽ തെങ്ങ് കൃഷി ചെയ്യുന്ന 80,000 പേരെയും 5000 ഹെക്ടറിൽ കൃഷിയിറക്കുന്ന അരലക്ഷത്തിലധികം വാഴക്കർഷകരെയും പച്ചക്കറി കർഷകരെയും വളം വില ബാധിക്കും. ഓണത്തിനു വിളവെടുക്കാനാണ് പച്ചക്കറി, വാഴ കർഷകർ കൃഷിയിറക്കുന്നത്.
ഒരു വാഴയ്ക്ക് ഒരു കിലോ ഫാക്ടംഫോസ് വേണം. ആദ്യഘട്ടത്തിൽ 250 ഗ്രാം, തുടർന്ന് പ്രതിമാസം 100 ഗ്രാം വീതവും ആവശ്യമാണ്. 50 വാഴയ്ക്ക് വിളവെടുപ്പ് കാലയളവിനിടെ ഒരു ചാക്ക് രാസവളം വേണം. വർഷത്തിൽ രണ്ടുവട്ടം തെങ്ങിന് ഒരു കിലോ ഫാക്ടംഫോസും പൊട്ടാഷും ആവശ്യമാണ്. ഫാക്ടംഫോസ് 50 കിലോ ചാക്കിന് കഴിഞ്ഞവർഷം 1,425 രൂപയെന്നത് നിലവിൽ 2,150 ലേറെ ആയി. പൊട്ടാഷ് (50 കിലോ) 1,700 ൽനിന്ന് 2,200 ആയി. യൂറിയയ്ക്ക് (45 കിലോ) 266.50 രൂപയും ഡിഎപി (50 കിലോ) 1,350 രൂപയുമായി തുടരുന്നു.
District News
തൃശൂർ: ഭാഷാപിതാവ് തുഞ്ചത്ത് എഴുത്തച്ഛന്റെ പ്രതിമ സാംസ്കാരിക തലസ്ഥാനമായ തൃശൂരിൽ സ്ഥാപിക്കുന്നതിനായി സംസ്കാര സാഹിതി ജില്ലാ കമ്മിറ്റി നൽകിയ അപേക്ഷയിന്മേൽ കോർപറേഷൻ ഭരണസമിതി അനുകൂലമായ തീരുമാനമെടുത്തത് തൃശൂരിന്റെ സാംസ്കാരിക പൈതൃകത്തിന് കൂടുതൽ കരുത്തേകുമെന്ന് സംസ്ഥാന ജനറൽ സെക്രട്ടറി എച്ച്. വിൽഫ്രഡ് പറഞ്ഞു.
സംസ്കാര സാഹിതി ജില്ലാ കമ്മിറ്റി നേതൃയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ജില്ലാ ചെയർമാൻ ഗിന്നസ് സത്താർ ആദൂർ അധ്യക്ഷത വഹിച്ചു.
ജില്ലാ കൺവീനർ അനിൽ സമ്രാട്ട്, രാമചന്ദ്രൻ പുതൂർക്കര, ജയപ്രസാദ് കളത്തിൽ, ബേബി മൂക്കൻ, അഡ്വ. ഒ.എസ്. സുജിത്, ശശി വറനാട്ട്, ശിവരാജ് ഒല്ലൂർ, ജോബി, റാഫി ദേവസി, ബാലസു തുടങ്ങിയവർ പ്രസംഗിച്ചു.
District News
തൃശൂർ: ഒരപ്പൻകെട്ട് വാട്ടർ ഫാൾസ് ടൂറിസം പദ്ധതിയുടെ പുരോഗതി വിലയിരുത്താൻ ജില്ലാ കളക്ടർ സ്ഥലം സന്ദർശിക്കും. പുല്ലുകുളം ടൂറിസം പദ്ധതി, ചിയ്യാരം വാക്കിംഗ് സ്ട്രീറ്റ് പദ്ധതി, വല്ലൂർകുത്ത് ടൂറിസം പദ്ധതി എന്നിവയുടെ നടപടികൾ വേഗത്തിലാക്കാനും ടൂറിസം, റോഡ് വികസന യോഗത്തിൽ തീരുമാനമായി.
ഒല്ലൂർ നിയോജകമണ്ഡലത്തിലെ വിവിധ ടൂറിസം, പിഎംജിഎസ്വൈ പ്രവൃത്തികളാണു കെ. രാജൻ എംഎൽഎയുടെ സാന്നിധ്യത്തിൽ ചർച്ചചെയ്തത്.
റോഡ് നിർമാണങ്ങൾ ഉടൻ പുനരാരംഭിക്കാനും നിശ്ചിത സമയപരിധിക്കുള്ളിൽ പൂർത്തിയാക്കാനും തീരുമാനിച്ചു. ഒല്ലൂക്കര ബ്ലോക്ക് പഞ്ചായത്ത് പ്രസിഡന്റ് ശ്രീവിദ്യ രാജേഷ്, വൈസ് പ്രസിഡന്റ് മാത്യൂ നൈനാൻ, പുത്തൂർ ഗ്രാമപഞ്ചായത്ത് പ്രസിഡന്റ് ബിന്ദു സേതുമാധവൻ, പാണഞ്ചേരി ഗ്രാമപഞ്ചായത്ത് പ്രസിഡന്റ് മിനു വർഗീസ് തുടങ്ങിയവർ പങ്കെടുത്തു.
District News
തൃശൂർ: ആരോഗ്യ കുടുംബക്ഷേമ വകുപ്പ്, വനിതാ ശിശു വികസന വകുപ്പ് എന്നിവയുടെ സംയുക്താഭിമുഖ്യത്തിൽ സംസ്ഥാനത്ത് തുടക്കംകുറിച്ച ബാല്യസ്പന്ദനം പരിപാടിയുടെ ജില്ലാതല ഉദ്ഘാടനം എൽത്തുരുത്ത് നിശാഗന്ധി അങ്കണവാടിയിൽ മേയർ ഡോ. നിജി ജസ്റ്റിൻ നിർവഹിച്ചു. കോർപറേഷൻ കൗൺസിലർ കെ. സുമേഷ് അധ്യക്ഷത വഹിച്ചു.
ജില്ലാ മെഡിക്കൽ ഓഫിസർ -ആരോഗ്യം ഇൻ ചാർജ് ഡോ.എൻ.എ. ഷീജ മുഖ്യപ്രഭാഷണവും ജില്ലാ വനിതാ ശിശു വികസന ഓഫിസർ പി. മീര വിഷയാവതരണവും നടത്തി. ആരോഗ്യകേരളം ജില്ലാ പ്രോഗ്രാം മാനേജർ ഡോ. ജിൽഷോ ജോർജ്, ജില്ലാതല ഐസിഡിഎസ് സെൽ പ്രോഗ്രാം ഓഫിസർ എൻ. ദിവ്യ, ഡോ. എം.കെ. ശ്രീജ, സി.സി. മനോജ് ചന്ദ്രൻ തുടങ്ങിയവർ പ്രസംഗിച്ചു.
ചടങ്ങിനോടനുബന്ധിച്ച് കുട്ടികളുടെ സ്ക്രീനിംഗും അങ്കണവാടി വർക്കർമാരുടെ നേതൃത്വത്തിൽ പോഷകാഹാര എക്സിബിഷനും ഉണ്ടായിരുന്നു.
District News
തൃശൂർ: ലോക റാബീസ് ദിനാചരണത്തിന്റെ ഭാഗമായി ഇന്ത്യൻ വെറ്ററിനറി അസോസിയേഷൻ (ഐവിഎ) തൃശൂർ ജില്ലാ യൂണിറ്റിന്റെ നേതൃത്വത്തിൽ മണ്ണുത്തി ഡോണ് ബോസ്കോ കോളജുമായി സഹകരിച്ച് റാബീസ് ബോധവത്കരണ ക്ലാസ് സംഘടിപ്പിച്ചു.
സ്ട്രോംഗർ ടുഗദർ എന്ന ഈ വർഷത്തെ റാബീസ് ദിന സന്ദേശത്തിന്റെ ഭാഗമായി നടപ്പാക്കുന്ന റാബീസ് സ്മാർട്ട് കാന്പസ് 2026 പദ്ധതിയുടെ ഭാഗമായാണു പരിപാടി. മണ്ണുത്തി ഡോണ് ബോസ്കോ കോളജ് പ്രിൻസിപ്പൽ ഫാ.ഡോ. ജിമ്മി ജോസ് ഉദ്ഘാടനംചെയ്തു. ഐവിഎ തൃശൂർ ജില്ലാ പ്രസിഡന്റ് ഡോ.എം. ഗംഗാധരൻ നായർ, മണ്ണുത്തി വെറ്ററിനറി കോളജ് എപ്പിഡമിയോളജി ആൻഡ് പ്രിവന്റീവ് മെഡിസിൻ വിഭാഗം പ്രഫസറും മേധാവിയുമായ ഡോ.പി.എം. ദീപ, എൻഎസ്എസ് പ്രോഗ്രാം ഓഫീസർ ലിജി ഗ്ബോയ്, ഐവിഎ ജില്ലാ ഓർഗനൈസിംഗ് കമ്മിറ്റി ജോയിന്റ് കണ്വീനർ ഡോ. ക്ലാപ്പ് ആന്റോ എന്നിവർ പ്രസംഗിച്ചു.
District News
ചേലക്കര: കേരള വ്യാപാരി വ്യവസായി ഏകോപനസമിതി തൃശൂർ ജില്ലാ കമ്മിറ്റിയുടെ പദ്ധതിയായ "ഹോം ഫോർ എവരിവൺ' ഭവന നിർമാണ പദ്ധതിയിലെ ആദ്യ തറക്കല്ലിടൽ നടന്നു. ചേലക്കര നിയോജകമണ്ഡലത്തിലെ കൊണ്ടാഴി യൂണിറ്റ് അംഗം എം.കെ. സുനിൽകുമാറിന്റെ വീടിന്റെ തറക്കല്ലിടൽ സൂപ്പി പടിയിൽ കെവിവി ഇഎസ് തൃശൂർ ജില്ലാ പ്രസിഡന്റ് കെ.വി. അബ്ദുൾ ഹമീദ് നിർവഹിച്ചു. ചേലക്കര നിയോജകമണ്ഡലം ചെയർമാൻ പി. നാരായണൻകുട്ടി അധ്യക്ഷത വഹിച്ചു.
ജില്ലാ ജനറൽ സെക്രട്ടറി എൻ.ആർ. വിനോദ്കുമാർ, ഭാരവാഹികളായ വി.ടി. ജോർജ്, ജോഷി തേറാട്ടിൽ, സിജോ ചിറക്കക്കാരൻ, എ.ആർ. രഘു, പി.ജി. രഞ്ജു മോൻ, യൂത്ത്വിംഗ് ജില്ലാ ട്രഷറർ സുബൈർ വാഴാലിപ്പാടം, കെ.എം. മുഹമ്മദ്, എം എസ്. വേണുഗോപാൽ, കെ.കെ.പ്രഭ, കദീജ അബ്ദുള്ള എന്നിവർ സംബന്ധിച്ചു. ജില്ല കമ്മിറ്റി പദ്ധതിയുടെ ഭാഗമായി വീടില്ലാത്തവർക്ക് ആദ്യഘട്ടത്തിൽ ജില്ലയിലെ 13 നിയോജക മണ്ഡലങ്ങളിലായി 13 വീടുകളാണ് നിർമിച്ചു നൽകുന്നത്.
District News
എരുമപ്പെട്ടി: കെസിബിസി മദ്യ ലഹരിവിരുദ്ധ സമിതി തൃശൂർ അതിരൂപത വടക്കൻ മേഖല സമ്മേളനം എരുമപ്പെട്ടി തിരുഹൃദയ ഫൊറോന പള്ളിയിൽ നടന്നു. എരുമപ്പെട്ടി, വടക്കാഞ്ചേരി, വേലൂർ, ചേലക്കര ഫൊറോനകൾ സമ്മേളനത്തിൽ പങ്കെടുത്തു.
മദ്യ ലഹരിവിരുദ്ധ സമിതി തൃശൂർ അതിരൂപത ഡയറക്ടർ ഫാ. ഡോ. ദേവസി പന്തല്ലൂക്കാരൻ ഉദ്ഘാടനം ചെയ്തു. ഫൊറോന പള്ളി വികാരി ഫാ. ജോഷി ആളൂർ അധ്യക്ഷനായി. അതിരൂപത പ്രസിഡന്റ് സി.പി. ഡേവിസ് വിഷയാവതരണം നടത്തി.
എരുമപ്പെട്ടി ഫൊറോന പ്രസിഡന്റ്് ജോയ്സൺ ഇരുമ്പൻ, എരുമപ്പെട്ടി ഇടവക പ്രസിഡന്റ്് സി.കെ. ജോർജ്, കുടുംബകൂട്ടായ്മ കേന്ദ്രസമിതി എരുമപ്പെട്ടി ഫൊറോന പ്രസിഡന്റ് കെ.ടി. സിന്റോ, എരുമപ്പെട്ടി തിരുഹൃദയ കോൺവെന്റ്് മദർ സുപ്പീരിയർ സിസ്റ്റർ വിനീത മാത്യു, പോൾ, ശ്രുതി ബെന്നി,റോബിൻ റാഫേൽ,ജോൺസൺ കുന്നംപിള്ളി തുടങ്ങിയവർ സംസാരിച്ചു. ബി.വോക്. ടൂറിസം ഹോസ്പിറ്റാലിറ്റി മാനേജ്മെന്റ്് കാലിക്കട്ട് യൂണിവേഴ്സിറ്റി പരീക്ഷയിൽ മൂന്നാംറാങ്ക് കരസ്ഥമാക്കിയ സി.ടി. എമിലിനെ ആദരിച്ചു.
District News
തൃശൂർ: സെന്റ് തോമസ് കോളജ് മീഡിയ ഡിപ്പാർട്ട്മെന്റിന്റെ ആഭിമുഖ്യത്തിൽ ഫോട്ടോലിങ്കും കെഎസ്എഫ്ഇയും ഓർഗ് പീപ്പിൾസും ചേർന്നു നടത്തുന്ന പിക്ച്ചറെസ്ക് 2026 എക്സിബിഷനു തുടക്കം. പ്രിൻസിപ്പൽ ഫാ.ഡോ. കെ.എ. മാർട്ടിൻ ഉദ്ഘാടനം ചെയ്തു.
സെൽഫ് ഫിനാൻസിംഗ് ഇൻ ചാർജ് ഫാ. ഫ്ലർജിൻ ആന്റണി, സെന്റർ ഫോർ മീഡിയ സ്റ്റഡീസ് ഡയറക്ടർ ഫാ. ഫിജോ ജോസഫ്, മീഡിയ ഡിപ്പാർട്ട്മെന്റ് ഹെഡ് യദുകൃഷ്ണൻ, അധ്യാപകർ എന്നിവർ പങ്കെടുത്തു. വിദ്യാർഥികളുടെ ഫോട്ടോഗ്രാഫി മത്സരവും, വിവിധ കാമറ ബ്രാൻഡുകളെ പരിചയപ്പെടുത്തുന്ന സ്റ്റാളുകളും എക്സിബിഷനിലുണ്ട്. ഇന്നു വൈകിട്ട് പ്രദർശനം സമാപിക്കും.
District News
തൃശൂർ: സെന്റ് ക്ലെയേഴ്സ് കോണ്വെന്റ് ഗേൾസ് ഹയർ സെക്കൻഡറി സ്കൂളിന്റെ പുതിയ കെട്ടിടത്തിന്റെ ഉദ്ഘാടനവും വെഞ്ചരിപ്പുകർമവും തൃശൂർ ആർച്ച്ബിഷപ് മാർ ആൻഡ്രൂസ് താഴത്ത് നിർവഹിച്ചു.
മോണ്. ജെയ്സൻ കൂനംപ്ലാക്കൽ, തൃശൂർ എഫ്സിസി അസീസി പ്രോവിൻസിന്റെ പ്രൊവിൻഷ്യാൾ സുപ്പീരിയർ സിസ്റ്റർ ഫോണ്രിയ, കോർപറേറ്റ് മാനേജർ സിസ്റ്റർ റാണി കുര്യൻ, പിടിഎ പ്രസിഡന്റ് ജി.ബി. കിരണ്, പ്രിൻസിപ്പൽ സിസ്റ്റർ മെറിൻ ജീസ് എന്നിവർ പങ്കെടുത്തു.
District News
ചേലക്കര: കേരള കോൺഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ എംഎൽഎയ്ക്ക് കേരള കോൺഗ്രസ് ചേലക്കര നിയോജക മണ്ഡലം കമ്മിറ്റിയുടെ ആഭിമുഖ്യത്തിൽ സ്വീകരണം നൽകി. കേരളത്തിന്റെ സമഗ്ര വികസനം ലഷ്യമിട്ട് ചടുലമായ പ്രവർത്തനങ്ങൾ നടത്തുന്ന മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള സർക്കാരിന്റെ പ്രവർത്തനങ്ങൾക്ക് എല്ലാവിധ പിന്തുണയും നൽകണമെന്നും അതിനായി കേരളസമൂഹം ഒറ്റക്കെട്ടായി മുന്നോ ട്ടുവരണമെന്നും തോമസ് ഉണ്ണിയാടൻ ആവശ്യപ്പെട്ടു. കേരള കോൺഗ്രസ് നിയോജകമണ്ഡലം പ്രസിഡന്റ്് ഷാജി തോമസ് കൊച്ചുകറുത്തേടത്ത് അധ്യക്ഷത വഹിച്ചു.
ജില്ലാ സെക്രട്ടറി സേതുമാധവൻ പറയംപള്ളിയിൽ, സംസ്ഥാനകമ്മിറ്റി അഗം കെ.യു. ജോർജ്, നിയോജകമണ്ഡലം സെക്രട്ടറി എൽദോ ഐസക്, സതീശ്കുമാർ, മണ്ഡലം പ്രസിഡന്റുമാരായ കെ.ബി. രാഹുൽ, കെ.എം. ജോസ്, ബെൻസൻ വർഗീസ്, ലോഗനാഥൻ, ജീവൻ വർഗീസ്, കെ.കെ. ഖാദർ, പി.എം. അസീസ്, എം.എ. അഷറഫ്, പി.എസ്. അനിൽ എന്നിവർ പ്രസംഗിച്ചു.
District News
പാലപ്പിള്ളി: ചക്കിപ്പറമ്പ് ആദിവാസി ഊരിലും പ്രദേശത്തെ പറമ്പുകളിലും കാട്ടാനക്കൂട്ടമിറങ്ങി വ്യാപകമായി കൃഷി നശിപ്പിച്ചു. രണ്ടുദിവസമായി മേഖലയില് ഭീതിപരത്തുന്ന ആനക്കൂട്ടത്തെ കാടുകയറ്റാന് വനപാലകര് നടപടിയെടുക്കാ ത്തതിനെതിരെ നാട്ടുകാര് പ്രതിഷേധത്തിലാണ്. മലമ്പതി പ്രദേശത്തെ പറമ്പുകളിലും ആദിവാസി ഊരി ലുമാണ് ആനക്കൂട്ടം നാശം വിതച്ചത്.
വാഴ, കവുങ്ങ്, തെങ്ങ്, പച്ചക്കറി എന്നിവയെല്ലാം കാട്ടാനകള് പിഴുതെറിഞ്ഞ നിലയിലാണ്. കുമ്പളപ്പറമ്പില് ഇബ്രാഹിം, കളത്തിങ്കല് ഡേവിസ്, ചീനിക്കല് റഷീദ്, കുമ്പളപ്പറമ്പില് മറിയുമ്മ, ചീനിക്കല് റസാഖ് എന്നിവരുടെ പറമ്പിലാണ് ആനകള് ഇറങ്ങിയത്. സോളാര് വേലി തകര്ത്താണ് ആനക്കൂട്ടം വീട്ടുപറമ്പിലേക്ക് എത്തുന്നത്.
ഒരു മാസത്തിനിടെ പല തവണകളിലാണ് ഇവരുടെ പറമ്പുകളില് ആനകളെത്തി കൃഷി നശിപ്പിച്ചത്. രാത്രികളില് പറമ്പുകളില് തമ്പടിക്കുന്ന ആനകളെ പടക്കം പൊട്ടിച്ചാണ് നാട്ടുകാര് കാടുകയറ്റുന്നത്. വൈകീട്ടാകുന്നതോടെ ഉന്നതിയിലേക്കുള്ള റോഡിലും റബര് തോട്ടങ്ങളിലും ആനകള് നിലയുറപ്പിക്കുന്നതോടെ വിദ്യാര്ഥികള് ഉള്പ്പടെയുള്ളവര് വീടുകളില് എത്തുന്നതു ഭീതിയോടെയാണ്. കാട്ടാന തകര്ത്ത വൈദ്യുതി വേലി പുനഃസ്ഥാപിക്കാന് യാതൊരുവിധ നടപടികളും ഇതുവരെ അധികൃതരുടെ ഭാഗത്തുനിന്നും ഉണ്ടായിട്ടില്ലെന്നും കാട്ടാന ആക്രമണം ഭയന്ന് പുറത്തിറങ്ങാന് പറ്റാതെയായെന്ന് ഉന്നതി നിവാസിയായ പുഷ്പന് പറയുന്നു.
ജനവാസ മേഖലയില് നിലയുറപ്പിച്ചിരിക്കുന്ന ആനക്കൂട്ടത്തെ കാടുകയറ്റാന് ആവശ്യത്തിന് വാച്ചര്മാരെയും ആര്ആര്ടി അംഗങ്ങളെയും നിയോഗിക്കണമെന്നും നാട്ടുകാര് ആവശ്യപ്പെട്ടു. വനാതിര്ത്തിയില് ട്രഞ്ചുകള് തീര്ത്ത് കാട്ടാനകളെ തടയണമെന്ന ആവശ്യത്തിന് വനംവകുപ്പ് യാതൊരു നടപടിയും ഇതുവരെ എടുത്തിട്ടില്ലെന്നും നാട്ടുകാര് ആരോപിച്ചു.
District News
തലോര്: ദീപ്തി ഹൈസ്കൂളിന്റെ സുവര്ണജൂബിലി സമാപനസമ്മേളനം ഉന്നത വിദ്യാഭ്യാസ മന്ത്രി റോജി എം. ജോണ് ഉദ്ഘാടനം ചെയ്തു. ജൂബിലി കമ്മിറ്റി ചെയര് മാന് ജോസഫ് ടാജറ്റ് അധ്യക്ഷത വഹിച്ചു.
സ്കൂള് മാനേജര് ഫാ. ജിയോ ആല നോലിക്കല്, ഹെഡ്മിസ്ട്രസ് റീന കെ. ജോണ്, ഒഎസ്എ പ്രസിഡന്റ് അലോഷ്യസ് കുറ്റിക്കാട്ട്, ഫാ. ജോസ് നന്തിക്കര, ഫാ. ലിജോ ബ്രഹ്മകുളം, ഫാ. ആന്റണി വേലത്തിപ്പറമ്പില്, ഫാ. ജോഷി കണ്ണൂക്കാടന്, പഞ്ചായത്ത് പ്രസിഡന്റ് വി.ടി. വിജയലക്ഷ്മി, ജോസ് ടി. ലൂയിസ്, ഒ.കെ. ജഗദീഷ്, നീന തോമസ്, എ.എസ്. ഷെല്ന തുടങ്ങിയവര് പ്രസംഗിച്ചു.
ജൂബിലിയോടനുബന്ധിച്ച് നിര്ധനരായ ഡയാലിസിസ് രോഗികള്ക്ക് സഹായ പദ്ധതി, വിദ്യാര്ഥികള്ക്ക് സ്കോളര്ഷിപ്പ് പദ്ധതി, ജൂബിലി മെമ്മോറിയല് കെട്ടിട നിര്മാണം, സ് മാര്ട്ട് ക്ലാസ് റൂമുകള് തുടങ്ങിയവയുടെ തറക്കല്ല് ആശിര്വാദവും സുവനീര് പ്രകാശനവും നടന്നു.
District News
വടക്കാഞ്ചേരി: അസി. എൻജിനിയറും ഓവർസിയർമാരും ഇല്ലാതായിട്ട് മാസങ്ങൾപിന്നിടുന്നു. വികസന പ്രവർത്തനങ്ങൾ സ്തംഭിച്ച് തെക്കുംകരപഞ്ചായത്ത്. ജനങ്ങളും ദുരിതത്തിൽ. പഞ്ചായത്തിൽ ഉണ്ടായിരുന്ന എൻജിനിയർ സ്ഥലംമാറി പോകുകയും പകരം വരവൂർ പഞ്ചാ യത്തിലെ എൻജിനിയർക്ക് ചാർജ് നൽകിയിട്ടുണ്ടെങ്കിലും നാളിതുവരെ പഞ്ചായത്തിലേക്കു തിരിഞ്ഞുനോക്കിയിട്ടില്ലന്ന് അധികൃതർ പറഞ്ഞു.
രണ്ട് ഓവർസിയർമാരാണു നിയമപരമായി ഉള്ളത്. എന്നാൽ ആ പോസ്റ്റിലേക്ക് ഉദ്യോഗസ്ഥരെ നൽകിയിട്ടില്ല. പകരം ദിവസവേതനാടിസ്ഥാനത്തിലാണു രണ്ടുപേരെ പഞ്ചായത്ത് നിയമിച്ചിട്ടുള്ളത്.
പഞ്ചായത്തിന്റെ വികസനപ്രവർത്തനങ്ങളും കെട്ടിടനിർമാണം ഉൾപ്പടെയുള്ള പ്രവൃത്തികളും മുന്നോട്ടുപോകണമെങ്കിൽ എൻജിനിയറുടെ സാന്നിധ്യം ഉണ്ടാകണം.
മലയോര - കാർഷിക പഞ്ചായത്തായ തെക്കുംകര പഞ്ചായത്തിൽ19 വാർഡുകളിലും റോഡ് നിർമാണങ്ങൾ നടക്കണമെങ്കിൽ എൻജിനിയറുടെ അംഗീകാരത്തോടെ എസ്റ്റിമേറ്റെടുത്ത് ജില്ലാ ഭരണകൂടത്തിന് സമർപ്പിക്കാനുള്ള സമയപരിധി അവസാനിക്കാനിരിക്കെയാണ് എൻജിനിയറില്ലാതെ പഞ്ചായത്ത് ദുരിതത്തിലായത്.
വിഷയത്തിന്റെ ഗൗരവം ഇന്നു പഞ്ചായത്തിൽ നടക്കുന്ന ഭരണസമിതിയോഗത്തിൽ പ്രത്യേക അജൻഡയായി അവതരിപ്പിക്കാനും ഭരണ - പ്രതിപക്ഷ അംഗങ്ങളുടെ കൂട്ടായ തീരുമാനത്തിന്റെ അടിസ്ഥാനത്തിൽ പഞ്ചായത്ത് ഡെ പ്യൂട്ടി ഡയറക്ടറെകണ്ട് വിവരം ധരിപ്പിക്കാനും വിഷയം ഗൗരവമായി എടുത്തില്ലെങ്കിൽ ഓഫീസിനുമുന്നിൽ പ്രസിഡന്റും വൈസ് പ്രസിഡന്റുമുൾപ്പടെയുള്ളവർ കുത്തിയിരുന്ന് പ്രതിഷേധിക്കുമെന്നും വൈസ് പ്രസിഡന്റ്് ഇ.എൻ. ശശി വ്യക്തമാക്കി.
സംസ്ഥാനത്ത് ഭരണമാറ്റംവന്നതോടെ പഞ്ചായത്തിൽ സെക്രട്ടറിയേയും സ്ഥലംമാറ്റിയിരുന്നു. പകരം സെക്രട്ടറിയുടെ ചുമതല അസി. സെക്രട്ടറിക്കായിരുന്നു. എന്നാൽ, ദീർഘനാളുകൾക്കുശേഷം കഴിഞ്ഞ ദിവസമാണു സെക്രട്ടറി തെക്കുംകരയിലെത്തിയത്.
District News
വടക്കഞ്ചേരി: ഗ്രാമറോഡുകളിൽ പൊന്തക്കാടുകൾ വെട്ടിത്തെളിക്കുന്ന തിരക്കുകളിലാണ് പഞ്ചായത്ത് മെംബർമാർ.
വടക്കഞ്ചേരി പഞ്ചായത്ത് ഉൾപ്പെടെ പഞ്ചായത്തുകളിലെ വാർഡുകളിൽ കാടുമുടിയ റോഡുകൾ യന്ത്രസംവിധാനത്തോടെ വൃത്തിയാക്കി ആളുകൾക്ക് യാത്ര ചെയ്യാനുള്ള സൗകര്യം ഒരുക്കുന്നത് മെംബർമാരാണിപ്പോൾ.
നേരത്തെ തൊഴിലുറപ്പ് പദ്ധതി വഴിയാണ് കാടുവെട്ടൽ നടന്നിരുന്നത്. എന്നാലിപ്പോൾ ഫണ്ടില്ലാത്തതിനാൽ മെംബർമാർതന്നെ ഇതിനായി മുന്നിട്ടിറങ്ങിയിരിക്കുകയാണ്. ഗ്രാമവഴികൾ പലതും കാടുമൂടി.
പാമ്പ്, പന്നി തുടങ്ങിയവയുടെ ശല്യം രൂക്ഷമായ സ്ഥിതിയുണ്ട്. വാർഡുകളിൽ അഞ്ചുംആറും കിലോമീറ്റർദൂരം കാടുവെട്ടൽ നടത്തണം. മംഗലം മൂച്ചിതൊടി, എസ് സി ഉന്നതി റോഡ്, ചോഴിയംകാട് എന്നീ റോഡുകളിലായി നാലുകിലോമീറ്റർദൂരം കാടുവെട്ടൽ നടത്തേണ്ടി വരുന്നുണ്ടെന്നു മംഗലം വടുകൻതൊടി വാർഡ് മെംബർ കെ. ശിവദാസൻ പറഞ്ഞു. എവിടേയും പണിത്തിരക്കായതോടെ കാടുവെട്ടുന്നവരെ കിട്ടാനും ബുദ്ധിമുട്ടുണ്ട്.
നേരത്തെ ബുക്ക് ചെയ്താണ് മെംബർമാർ ഇപ്പോൾ വാർഡുകളിൽ കാടുവെട്ടാൻ ആളുകളെ എത്തിക്കുന്നത്.
വഴികൾ വൃത്തിയാക്കാൻ ചെലവാകുന്ന പണം പിന്നീട് പഞ്ചായത്തിൽനിന്ന് നൽകുമെന്ന് വടക്കഞ്ചേരി പഞ്ചായത്ത് മെംബർ സെക്രട്ടറി ഉമ്മർ ഫാറൂക്ക് പറഞ്ഞു.
District News
പാലക്കാട്: ഹോര്ട്ടികോര്പ് മുഖേന പൊതുവിപണിയില് നടപ്പിലാക്കുന്ന സബ്സിഡി നിരക്കിലുള്ള സവാള വില്പനയുടെ ജില്ലാതല ഉദ്ഘാടനവും ആദ്യ വില്പനയും കളക്ടറേറ്റ് പരിസരത്ത് ജില്ലാ പഞ്ചായത്ത് പ്രസിഡന്റ് എസ്.ബി. രാജു നിര്വഹിച്ചു.
ഹോര്ട്ടികോര്പിന്റെ തെരഞ്ഞെടുത്ത ഔട്ട്ലെറ്റുകൾ വഴി കിലോയ്ക്ക് 35രൂപ നിരക്കിലാണ് സവാള ലഭ്യമാക്കുന്നത്.
District News
ചിറ്റൂർ: ഗണേശോത്സവദിനത്തിൽ ചിറ്റൂർ പുഴപ്പാലം അടച്ചുപൂട്ടിയത് നിമജ്ജന ഘോഷയാത്രയ്ക്ക് തടസമാവുന്നതായി ആരോപിച്ച് ബിജെപി പ്രവർത്തകർ ചിറ്റൂർ- തത്തമംഗലം നഗരസഭാ കാര്യാലയിൽ പ്രതിഷേധവുമായെത്തി.സെക്രട്ടറി സ്ഥലത്തില്ലാത്തതിനാൽ സൂപ്രണ്ടിന്റെ ചേംബറിലെത്തി വിഷയത്തിൽ തർക്കത്തിലേർപ്പെട്ടു.
പാലം നവീകരണ ജോലികൾ പൂർണമായും പൊതുമരാമത്ത് റോഡ് വിഭാഗത്തിന്റെ നിയന്ത്രണത്തിലാണെന്നും നഗരസഭക്ക് ഇതിൽ ഇടപെടാനാകില്ലെന്നും പ്രതിഷേധക്കാരെ അറിയിച്ചു. ഇത് ഏറെനേരം വാഗ്വാദങ്ങൾക്കിടയാക്കി. പിന്നീട് പൊതുമരാമത്ത് ജീവനക്കാർ നിമജ്ജന ഘോഷയാത്ര പോവുന്നസമയം അറിയിച്ചാൽ സഞ്ചാരസൗകര്യം ഏർപ്പെടുത്താമെന്ന് അറിയിച്ചു. ബിജെപി ഈസ്റ്റ് ജില്ലാ ജനറൽസെക്രട്ടി എ.കെ. ഓമനക്കുട്ടൻ, വി. രമേശ്, എ. ദണ്ഡപാണി, ബി. കണ്ണജ്യോതി, വി.ടി. രാമദാസ് എന്നിവരുടെ നേതൃത്വത്തിലാണ് നഗരസഭാ സൂപ്രണ്ടുമായി ചർച്ച നടത്തിയത്.
ഗണേശോത്സവം ഇന്ന്: പലയിടത്തും ഗതാഗത നിയന്ത്രണം
പാലക്കാട് നഗരത്തിൽ
പാലക്കാട്: ഗണേശോത്സവ ഘോഷയാത്രകളുടെ ഭാഗമായി ഇന്ന് നഗരത്തിൽ ഗതാഗത നിയന്ത്രണം. രാവിലെ പത്തുമുതൽ വൈകുന്നേരം അഞ്ചുവരെ മേപ്പറന്പ് ഭാഗത്തുനിന്ന് മേലാമുറിയിലേക്കും മൂന്നുമുതൽ മേലാമുറിയിൽനിന്ന് ശകുന്തള ജംഗ്ഷൻ ഭാഗത്തേക്കും മൂന്നുമുതൽ ടൗണ്ബസ് സ്റ്റാൻഡ് ഭാഗത്തേക്ക് ബിഒസി റോഡ് വഴി മാർക്കറ്റിലേക്കും ചുണ്ണാന്പുത്തറയിലേക്കും ഗതാഗതനിയന്ത്രണം ഉണ്ടായിരിക്കും.
ഉച്ചയ്ക്കുശേഷം മൂന്നുമുതൽ താരേക്കാട് നിന്ന് മുനിസിപ്പൽ സ്റ്റാൻഡ് ഭാഗത്തേക്കും ഗതാഗതനിയന്ത്രണം ഉണ്ടാകും. മുനിസിപ്പൽ സ്റ്റാൻഡിലേക്ക് വരുന്ന ബസുകൾ മൂന്നുമുതൽ ഒലവക്കോട് ചാത്തപുരം ശേഖരിപുരം മണലി വഴി സ്റ്റേഡിയം ബസ് സ്റ്റാൻഡിൽവന്ന് തിരിച്ചുപോകണം. വൈകുന്നേരം അഞ്ചുമുതൽ കോട്ടമൈതാനം ഭാഗത്തുനിന്ന് സുൽത്താൻപേട്ടവഴി വിക്ടോറിയ കോളജ് ഭാഗത്തേക്കും കൊപ്പം ശേഖരിപുരം, ചുണ്ണാന്പുത്തറ, സ്റ്റേഡിയം ഭാഗത്തു നിന്നും വിക്ടോറിയ കോളജ് ഭാഗത്തേക്കും നിയന്ത്രണമുണ്ടാകും.
വൈകുന്നേരം ഏഴുമുതൽ ഒലവക്കോട് ഭാഗത്തുനിന്ന് ചാത്തപുരം റോഡിലേക്ക് ഗതാഗത നിയന്ത്രണമുണ്ടായിരിക്കും. ഒലവക്കോട് എത്തുന്ന വാഹനങ്ങൾ റെയിവേഗേറ്റ് കാവിൽപാട്, പേഴുംകര മേപ്പറന്പ് വഴി ടൗണിലേക്ക് പ്രവേശിക്കണം. കോയന്പത്തൂർ ഭാഗത്തുനിന്ന് കോഴിക്കോട് ഭാഗത്തേക്കുള്ള ചരക്കുവാഹനങ്ങളും വലിയ വാഹനങ്ങളും, മേപ്പറന്പ്, പറളി, മുണ്ടൂർ വഴിയും തിരിച്ചും അതുവഴി പോകേണ്ടതാണ്.
മണ്ണാർക്കാട് നഗരത്തിൽ
മണ്ണാർക്കാട്: ഗണേശോത്സവത്തോട് അനുബന്ധിച്ച് ഇന്ന് ഉച്ചയ്ക്കുശേഷം മൂന്നുമുതൽ രാത്രി എട്ടുവരെ നഗരത്തിൽ ഗതാഗത നിയന്ത്രണം ഏർപ്പെടുത്തി.
കോഴിക്കോട് ഭാഗത്തുനിന്ന് പാലക്കാട് ഭാഗത്തേക്കുള്ള വലിയ വാഹനങ്ങൾ ആര്യമ്പാവിൽനിന്ന് തിരിഞ്ഞ് കരിമ്പുഴ- തിരുവാഴിയോട്- കടമ്പഴിപ്പുറം- കോങ്ങാട് വഴിയും പാലക്കാട് ഭാഗത്തുനിന്ന് കോഴിക്കോട് ഭാഗത്തേക്കുള്ള വാഹനങ്ങൾ മുണ്ടൂർ- കോങ്ങാട്- കടമ്പഴിപ്പുറം- തിരുവാഴിയോട്- കരിമ്പുഴ ആര്യമ്പാവ് വഴിയും പോകണം. പാലക്കാട് ഭാഗത്തുനിന്ന് മണ്ണാർക്കാട് ടൗണിലേക്കുവരുന്ന ബസുകൾ നെല്ലിപ്പുഴവന്ന് തിരിച്ചു പോകണം.
വടക്കഞ്ചേരി ടൗണിൽ
വടക്കഞ്ചേരി: ഗണേശോത്സവത്തോടനുബന്ധിച്ച് വടക്കഞ്ചേരി ടൗണിൽ നടക്കുന്ന നിമജ്ജന ഘോഷയാത്രയുടെ ഭാഗമായി ഇന്ന് വൈകീട്ട് നാലുമുതൽ ഏഴുവരെ ടൗണിൽ ഗതാഗത നിയന്ത്രണം ഏർപ്പെടുത്തുമെന്ന് പൊലിസ് അറിയിച്ചു.
പാലക്കാട്, നെന്മാറ ഭാഗത്തുനിന്ന് വരുന്ന വാഹനങ്ങൾ ചെറുപുഷ്പം ടിബി ജംഗ്ഷനിൽനിന്ന് റോയൽ ജംഗ്ഷൻ വഴി തങ്കം തിയറ്റർ കവലയിലൂടെവന്ന് സ്റ്റാൻഡിലെത്തി പോകണം. കിഴക്കഞ്ചേരി ഭാഗത്ത് നിന്നുവരുന്ന വാഹനങ്ങൾ ടൗണിൽ സുനിത ജംഗ്ഷൻവഴി സ്റ്റാൻഡിൽ പ്രവേശിച്ച് അതേവഴിക്കുതന്നെ പോകണം.
മന്ദത്ത് നടക്കുന്ന നിമജ്ജന ഘോഷയാത്രാ സംഗമം ഹിന്ദു ഐക്യവേദി സംസ്ഥാന രക്ഷാധികാരി കെ.പി. ശശികല ടീച്ചർ ഉദ്ഘാടനം ചെയ്യും. വിവിധ ദേശങ്ങളിൽ നിന്നുള്ള ഗണേശ വിഗ്രഹങ്ങൾ മന്ദത്ത് സംഗമിക്കും. തുടർന്ന് വാദ്യഘോഷങ്ങളോടെ മംഗലംപുഴയിൽ നിമജ്ജനം ചെയ്യും.
നെന്മാറ ടൗണിൽ
നെന്മാറ: വിനായക ചതുർഥിയോടനുബന്ധിച്ചുള്ള നിമജ്ജന ഘോഷയാത്രയുടെ ഭാഗമായി നെന്മാറ ടൗണിൽ ഗതാഗത നിയന്ത്രണം. ഉച്ചയ്ക്കുശേഷം മൂന്നുമുതൽ പൊള്ളാച്ചിയിൽനിന്ന് തൃശൂർ ഭാഗത്തേക്കുവരുന്ന ചരക്കുവാഹനങ്ങൾ കൊല്ലങ്കോട് കോവിലകംമുക്ക് വഴി തിരിഞ്ഞ് പല്ലാവൂർ- കുനിശേരി- ആലത്തൂർ വഴിയും തൃശൂർ ഭാഗത്തുനിന്ന് പൊള്ളാച്ചി ഭാഗത്തേക്കുവരുന്ന ചരക്കുവാഹനങ്ങൾ ചിറ്റിലഞ്ചേരി വഴി തിരിഞ്ഞ് തൃപ്പാളൂർ- കുനിശേരി- പല്ലാവൂർ- കൊല്ലങ്കോട് വഴിയും പോകേണ്ടതാണെന്നു നെന്മാറ പൊലിസ് അറിയിച്ചു.
പാലക്കാട് നഗത്തിൽ വൈദ്യുതി
വിതരണം തടസപ്പെടും
പാലക്കാട്: ഗണേശവിഗ്രഹ നിമജ്ജന ഘോഷയാത്രയോടനുബന്ധിച്ച് ഇന്ന് ഉച്ചയ്ക്കുശേഷം നഗരത്തിലെ വിവിധ പ്രദേശങ്ങളില് വൈദ്യുതി വിതരണം ഭാഗികമായി തടസപ്പെടുമെന്ന് കെഎസ്ഇബി പാലക്കാട് ഇലക്ട്രിക്കല് ഡിവിഷന് എക്സിക്യൂട്ടിവ് എന്ജിനീയര് അറിയിച്ചു.
ഘോഷയാത്ര കടന്നുപോകുന്ന റൂട്ടുകളില് ഉച്ചയ്ക്ക് രണ്ടുമുതല് രാത്രി പത്തുവരെയാണ് വൈദ്യുതി നിയന്ത്രണമുണ്ടാകുക. മൂത്താന്തറ, മേലാമുറി, വലിയങ്ങാടി, മാര്ക്കറ്റ് റോഡ്, ബിഒസി റോഡ്, ആര്എസ് റോഡ്, ജിബി റോഡ്, കോളജ് റോഡ്, താരേക്കാട്, വിക്ടോറിയ കോളജ് പരിസരം, ചാത്തപുരം, കല്പാത്തി എന്നീ പ്രദേശങ്ങളിലാണ് വൈദ്യുതി വിതരണം തടസപ്പെടുക.
District News
ചിറ്റൂർ: പൊതുമരാമത്ത് വകുപ്പ് അധികൃതരുടെ നേതൃത്വത്തിൽ ചിറ്റൂർ പുഴപ്പാലം നവീകരണ ജോലികൾക്കു ഇന്നലെ രാവിലെ തുടക്കമായി.
ആദ്യ നടപടിയെന്ന നിലയിൽ കോളജ് റോഡിന്റെ ഭാഗത്തുനിന്നുള്ള സ്ലാബ് ജോയിന്റിലെ തകരാറിലായ ബെയറിംഗ് നീക്കംചെയ്യൽ തുടങ്ങി. പാലം അടച്ചിട്ട പ്രവൃത്തികളായതിനാൽ ഗതാഗതനിയന്ത്രണവും ഇന്നലെ തുടങ്ങി. പാലത്തിലൂടെ യാത്ര കാൽനടക്കാർക്കു മാത്രമായി ചുരുക്കി.
പാലത്തിനിരുവശത്തും സ്വകാര്യബസുകൾ മുൻനിശ്ചയപ്രകാരമെത്തി യാത്രക്കാരെ ഇറക്കി മടങ്ങി. യാത്രികർ പാലത്തിലൂടെ നടന്ന് മറുവശത്ത് നിർത്തിയിരുന്ന ബസിൽ കയറി യാത്ര തുടർന്നു.
അന്തർസംസ്ഥാന കെഎസ്ആർടിസി ഉൾപ്പെടെ ബസുകൾ മേട്ടുപ്പാളയം, വണ്ടിത്താവളം, അണിക്കോട് വഴിയാണ് സർവീസ് നടത്തിയത്. ഇതുകൂടാതെ പാലത്തുള്ളി അത്തിക്കോട് വഴിയും ചെറിയ വാഹനങ്ങൾക്കു ഗതാഗതം ക്രമീകരിച്ചിട്ടുണ്ട്.
അമ്പാട്ടുപാളയത്തുനിന്ന് നിലമ്പതി ആറ്റാംചേരി വഴിയിലും ഗതാഗതം ക്രമീകരിച്ചിരുന്നു. ബദൽ റോഡുകളിൽ എവിടെയും കാര്യമായ ഗതാഗതക്കുരുക്ക് ഉണ്ടായില്ല.
ഗതാഗത നിയന്ത്രണത്തിന്റെ ആദ്യദിനമായതിനാൽ തമിഴ്നാട്ടിൽനിന്ന് കാറിലും ഇരുചക്രവാഹനങ്ങളിലും എത്തിയവർ വഴിയറിയാതെ കുഴങ്ങി.
District News
പാലക്കാട്: ഹിന്ദി ദിനത്തോടനുബന്ധിച്ച് ഗവ. വിക്ടോറിയ കോളജിൽ ഹിന്ദി ദിനാചരണവും ഹിന്ദി പക്ഷാചരണ ആഘോഷവും ദേശീയോദ്ഗ്രഥന നാടക അവതരണവും നടന്നു. ഗവ. വിക്ടോറിയ കോളജ്, ഐക്യുഎസി (പാലക്കാട്), പാലക്കാട് ഹിന്ദി മഹാവിദ്യാലയം, സൗഹൃദം ദേശീയവേദി എന്നിവയുടെ സംയുക്താഭിമുഖ്യത്തിലായിരുന്നു പരിപാടി. സൗഹൃദം ദേശീയവേദി ജില്ലാ പ്രസിഡന്റും നാടക സംവിധായകനുമായ പി.വി. സഹദേവൻ ഹിന്ദി ദിനാഘോഷം ഉദ്ഘാടനം ചെയ്തു. ഹിന്ദി വിഭാഗം മേധാവി ഡോ.എസ്.എൽ. സിന്ധു അധ്യക്ഷത വഹിച്ചു.
ദക്ഷിണ ഭാരത ഹിന്ദിപ്രചാരസഭ മുൻ കേന്ദ്രസമിതി അംഗം അക്ബർ ബാദുഷ, സൗഹൃദം തീയറ്റേഴ്സ് ജില്ലാ കോ- ഓർഡിനേറ്റർ പി. ആന്റണി റോബർട്ട്, ഡോ.എസ്. സൗമ്യ, മൂന്നാംവർഷ ഹിന്ദി വിദ്യാർഥി എസ്. പ്രകീഷ്, ഗുരുവായൂരപ്പൻ, കെ. കാദർ മൊയ്തീൻ, കെ.എം. ഫാത്തിമ, പി. ഷീജ, കെ.കെ. സിന്ധു, എൻ. ഗോകുൽദാസ്, കെ. സുദേവൻ പ്രസംഗിച്ചു.
District News
അഗളി: അട്ടപ്പാടിയെ പരിസ്ഥിസൗഹൃദ ടൂറിസ്റ്റ് ഹബ്ബാക്കി മാറ്റണമെന്ന് വ്യാപാരി വ്യവസായി സമിതി അട്ടപ്പാടി ഏരിയാസമ്മേളനം സർക്കാരിനോടാവശ്യപ്പെട്ടു. ടൂറിസ്റ്റുകളുടെ അട്ടപ്പാടിയിലേക്കുള്ള ഒഴുക്ക് കണക്കിലെടുത്താണ് സമ്മേളനം പ്രമേയത്തിലൂടെ ഇക്കാര്യം ആവശ്യപ്പെട്ടത്.
ഗൂളിക്കടവ് വ്യാപാര വ്യവസായ സമിതി ഓഫീസ് അങ്കണത്തിൽ നടന്ന യോഗം ജില്ലാ സെക്രട്ടറി എം. അനന്തൻ ഉദ്ഘാടനം ചെയ്തു. കോട്ടത്തറ ട്രൈബൽ സ്പെഷ്യാലിറ്റി ഹോസ്പിറ്റൽ സൂപ്രണ്ട് ഡോ. ഷിജിൻ ജോൺ ആളൂരിനെ ചടങ്ങിൽ ആദരിച്ചു.
പൊതു വിദ്യാഭ്യാസ മേഖലയിലെ മികച്ച സേവനത്തിനുള്ള ആദരവ് ലഭിച്ച കാരര ഗവ. ജിയുപി സ്കൂളിനുവേണ്ടി പ്രധാനാധ്യാപിക സിന്ധു സാജൻ ആദരം ഏറ്റുവാങ്ങി. എസ്എസ്എൽസി, പ്ലസ്ടു വിഭാഗങ്ങളിൽ സമ്പൂർണ എപ്ലസ് കരസ്ഥമാക്കിയ അട്ടപ്പാടിയിലെ മുഴുവൻ സ്കൂളുകളിലേയും വിദ്യാർഥികളെ അനുമോദിച്ചു.
പോഷകാഹാരശോഷണം അനുഭവിക്കുന്ന രോഗികൾക്ക് പോഷകാഹാരം കിറ്റ് വിതരണോദ്ഘാടനവും നടത്തി. കരാട്ടെ വിഭാഗത്തിൽ അട്ടപ്പാടിക്ക് മെഡൽ നേടിക്കൊടുത്ത ജെനിയെ യോഗം അനുമോദിച്ചു. പുതിയ ഭാരവാഹികളായി സുനിൽകുമാർ- പ്രസിഡണ്ട്, ജിജിപി മാഞ്ഞുരാൻ- സെക്രട്ടറി, ബിജു, സുകു- വൈസ് പ്രസിഡന്റുമാർ, കെ.പി. രതീഷ്, ജിജോമോൻ- ജോയിന്റ് സെക്രട്ടറിമാർ, ത്യാഗരാജൻ- ട്രഷറർ എന്നിവരെ തെരഞ്ഞെടുത്തു.
District News
വടക്കഞ്ചേരി: പരിസ്ഥിതിലോല മേഖല വിഷയവുമായി ബന്ധപ്പെട്ട് കിഴക്കഞ്ചേരി പഞ്ചായത്തിലെ പതിനെട്ടാം വാർഡായ വാൽകുളമ്പിൽ പ്രത്യേക ഗ്രാമസഭായോഗം ചേർന്നു.
കോടിയാട്ടിൽ ആർക്കൈഡിൽ നടന്ന യോഗത്തിൽ പഞ്ചായത്ത് പ്രസിഡന്റ് പി.എം. കലാധരൻ അധ്യക്ഷത വഹിച്ചു. ഏല്യാസ് മാലിക്കുടിയിൽ പ്രമേയം അവതരിപ്പിച്ചു. പഞ്ചായത്ത് മെംബർമാരായ ലീലാമ്മ ജോസഫ്, എ. തങ്കപ്പൻ, പഞ്ചായത്ത് കോ-ഓർഡിനേറ്റർ ഷിജു, റെന്നി അറയ്ക്കൽ, എ.എ. ജോർജ് എന്നിവർ പ്രസംഗിച്ചു. ഇഎസ്എയുടെ വിശദവിവരങ്ങളും ഭൂപടവും കേരള ബയോ ഡൈവേഴ്സിറ്റി ബോർഡിന്റെ വെബ്സൈറ്റിൽ പ്രസിദ്ധീകരിച്ചുവെന്ന് വിജ്ഞാപനത്തിൽ പറയുന്നുണ്ടെങ്കിലും തിരിച്ചറിയാനുള്ള സൂചനകളില്ലാതെ ഒന്നിൽകൂടുതൽ ഭൂപടങ്ങൾ വെബ്സൈറ്റിൽ നൽകിയത് ആശയക്കുഴപ്പം ഉണ്ടാക്കുന്നുണ്ട്.
ഇക്കാര്യത്തിൽ വ്യക്തത വരുത്തണം. ഇഎസ്എ കരട് വിജ്ഞാപനത്തിന്മേൽ കേരളസർക്കാർ തയാറാക്കുന്ന റിപ്പോർട്ടും ഭൂപടവും പ്രസിദ്ധീകരിച്ച് പരാതികൾ പരിഹരിച്ച ശേഷമേ കേന്ദ്രസർക്കാരിന് സമർപ്പിക്കാവൂ എന്നും യോഗം പ്രമേയത്തിലൂടെ ആവശ്യപ്പെട്ടു.
District News
കൂറ്റനാട്: തൃത്താല ഉപജില്ലയിലെ ചാത്തനൂർ ജിഎൽപി സ്കൂൾമുറ്റത്ത് ഹരിതക്ലബിലെ വിദ്യാർഥികൾ ഒരുക്കിയ ചെണ്ടുമല്ലിത്തോട്ടം കൺകുളിർക്കും കാഴ്ച.
കളിസ്ഥലം, കുട്ടികളുടെ പാർക്ക്, വിശ്രമകേന്ദ്രം, ഡിജിറ്റൽ സൗകര്യങ്ങളോടെയുള്ള ശീതീകരിച്ച ക്ലാസ് മുറികൾ, ഓഡിറ്റോറിയം തുടങ്ങി ആധുനിക സൗകര്യങ്ങളുള്ള സ്കൂളിന് അഴകായാണ് ചെണ്ടുമല്ലിത്തോട്ടം പരിലസിക്കുന്നത്.
ഹരിത ക്ലബിലെ വിദ്യാർഥികളും അധ്യാപകരും പിടിഎ പ്രവർത്തകരും ചേർന്നാണ് ചെണ്ടുമല്ലിത്തോട്ടം ഒരുക്കിയത്.
ആഫ്രിക്കൻ മാരിഗോൾഡ് ഇനത്തിൽപ്പെട്ട ഓറഞ്ച്, മഞ്ഞ നിറങ്ങളിലുള്ള ചെണ്ടുമല്ലിയുടെ ഇരുനൂറോളം തൈകളാണ് ഹരിത ക്ലബിന്റെ നേതൃത്വത്തിൽ നട്ടുപിടിപ്പിച്ചത്.
ഓണത്തിനുമുമ്പുതന്നെ പൂക്കൾ വിരിഞ്ഞുതുടങ്ങി. സ്കൂളിൽ ഓണപ്പൂക്കളമൊരുക്കിയതും ഇവിടത്തെ പൂക്കൾ ഉപയോഗിച്ചുതന്നെയെന്നു അധ്യാപകരായ എൻ.വി. സുമ, വി.പി. മഞ്ജു, കെ. രഞ്ജിനി എന്നിവർ പറഞ്ഞു.
ചെണ്ടുമല്ലിക്ക് പുറമെ വിവിധ ഔഷധസസ്യങ്ങളും വിദ്യാവനം പദ്ധതിയും ഇവിടെ നടപ്പാക്കിയിട്ടുണ്ട്.
ചാത്തനൂർ ഗ്രാമീണ വായനശാലയുടെ സഹായത്തോടെ വിവിധതരം പച്ചക്കറികളും സ്കൂൾ തോട്ടത്തിൽ കൃഷി ചെയ്യുന്നുണ്ട്. ഉത്പാദിപ്പിക്കുന്ന പച്ചക്കറികൾ കുട്ടികളുടെ ഉച്ചഭക്ഷണത്തിനായി ഉപയോഗിക്കുന്നു.
ഔഷധസസ്യങ്ങളെക്കുറിച്ച് വിദ്യാർഥികൾക്ക് പഠിക്കുന്നതിനായി അവയുടെ ശാസ്ത്രീയനാമം, ഗുണങ്ങൾ, ഉപയോഗം, ഉത്ഭവം എന്നിവ രേഖപ്പെടുത്തിയ പോസ്റ്ററുകളും പ്രദർശിപ്പിച്ചിട്ടുണ്ട്.
നാനൂറോളം വിദ്യാർഥികൾ പഠിക്കുന്ന സ്കൂളിലെ മുഴുവൻ കുട്ടികളെയും ഉൾപ്പെടുത്തിയാണ് ഹരിത ക്ലബിന്റെ നേതൃത്വത്തിൽ പ്രവർത്തനങ്ങൾ നടത്തുന്നത്.
District News
പാലക്കാട്: ജില്ലയിലെ ഡാമുകളിൽ അടിഞ്ഞുകിടക്കുന്ന ചെളിയും മണലും നീക്കംചെയ്താൽ വെള്ളത്തിന്റെ സംഭരണശേഷി കൂട്ടാമെന്നും അതുവഴി കർഷകർക്കുള്ള വെള്ളംലഭ്യത, വൈദ്യുതി ഉത്പാദനക്കുറവ് എന്നിവ പരിഹരിക്കാൻ കഴിയുമെന്ന് മുൻ എംപിയും കേരള കോൺഗ്രസ് സംസ്ഥാന സെക്രട്ടറി ജനറലുമായ അഡ്വ. ജോയ് എബ്രഹാം.
കേരള കോൺഗ്രസ് ജില്ലാ കമ്മിറ്റി യോഗം ചെയ്യുകയായിരുന്നു അദ്ദേഹം.
ഈവിഷയം അടിയന്തരമായി മന്ത്രിയുടെയും സർക്കാരിന്റേയും ശ്രദ്ധയിൽ കൊണ്ടുവരുമെന്നും അദ്ദേഹം പറഞ്ഞു. യോഗത്തിൽ ജില്ലാ പ്രസിഡന്റ് ജോബി ജോൺ അധ്യക്ഷത വഹിച്ചു, ജനറൽ സെക്രട്ടറി കെ. ശിവരാജേഷ്, നേതാക്കളായ വി.കെ. വർഗീസ്, പി.കെ. മാധവവാര്യർ, തോമസ് ജേക്കബ്, എൻ.പി. ചാക്കോ, എം.വി. രാമചന്ദ്രൻനായർ, വി.എ. ബെന്നി, ചാർളി മാത്യു, ഉമ്മർ കിളിയകാടൻ, പി.വി. ഹാൻസൺ, ജോസ് പീറ്റർ, എസ്. സുന്ദർരാജൻ, ബിജുപൂഞ്ചോല, എൻ.വി. സാബു, ബേബി മുല്ലമംഗലം,അഡ്വ. ജയൻ തോമസ്, വി.കെ. സുബ്രഹ്്മണ്യൻ, മണികണ്ഠൻ എലവഞ്ചേരി, രവീന്ദ്രനാഥ്, കമുറുദീൻ, രാജൻ വർഗീസ് തുടങ്ങിയവർ പ്രസംഗിച്ചു.
District News
തളിപ്പറമ്പ്: ഓണവിപണി ലക്ഷ്യമിട്ട് വിയർപ്പൊഴുക്കി നടത്തിയ ചെണ്ടുമല്ലികൾ കാലം തെറ്റി പൂത്തത് വർണകാഴ്ചയൊരുക്കുന്പോൾ കർഷകർക്ക് നഷ്ടത്തിൽ കൂപ്പു കുത്തി കർഷകർ. മഴയായിരുന്നു ഇത്തവണ വില്ലനായത്. ഓണക്കാലത്തെ മഴ മാറിയതോടെയാണ് മിക്കയിടങ്ങളിലെയും പൂപ്പാടങ്ങൾ പൂത്തത്.
വ്യക്തിപരമായും കുടുംബശ്രീ ജെ എൽജി ഗ്രൂപ്പുകളിലൂടെ നിരവധി പേരാണ് ചെണ്ടുമല്ലി കൃഷിയിറക്കിയിരുന്നത്. കരിമ്പം പാറക്കണ്ടത്തിലെ പി.പി. സന്ദീപ് കുമാർ എന്ന യുവകർഷകൻ ഇത്തരം കർഷകരുടെ പ്രതിനിധിയാണ്. ഏറെ പ്രതീക്ഷയോടെയായിരുന്നു കുറുമാത്തൂർ അതിരിയാടുള്ള തന്റെ പച്ചക്കറി കൃഷിയിടത്തിനു സമീപം രണ്ടിനം ചെണ്ടുമല്ലികളുടെ പൂക്കൃഷി ആരംഭിച്ചത്.
ഹൈബ്രിഡ് വിത്ത് വാങ്ങി സ്വന്തമായി ഉത്പാദിപ്പിച്ച 700ൽ അധികം ചെടികളാണ് ഓണവിപണി ലക്ഷ്യമിട്ട് പരിപാലിച്ചത്. ഓണത്തിന് പൂക്കച്ചവടത്തിലൂടെ വലിയൊരുതുക പ്രതീക്ഷിച്ചിരുന്ന സന്ദീപിന്റെ കണക്കു കൂട്ടലുകൾ മഴ കവർന്നു. ഇപ്പോൾ തെയ്യംകലാകാരൻമാരുൾപ്പെടെയുള്ളവർ ദിവസേന എത്തി കുറച്ചു പൂക്കൾ കൊണ്ടുപോകുന്നത് മാത്രമാണ് ആശ്വാസം. കുറുമാത്തൂർ കൃഷിഭവനിലെ ഉദ്യോഗസ്ഥർ പൂവിന് വിപണി കണ്ടെത്താൻ ശ്രമിച്ചെങ്കിലും വിജയിച്ചില്ല. മറ്റുള്ളവർ കുടുംബസമേതം പൂപ്പാടത്ത് എത്തി ഫോട്ടോകൾ എടുക്കുന്ന് കാണുന്നത് സന്തോഷം പകരുന്നതാണെങ്കിലും സന്ദീപിനെ പോലുള്ള കർഷകരുടെ കണ്ണീരൊപ്പാൻ സർക്കാർതലത്തിൽ നടപടി വേണമെന്ന ആവശ്യം ഉയരുന്നുണ്ട്.
District News
തളിപ്പറമ്പ്: കേന്ദ്ര-സംസ്ഥാന സർക്കാരുകളുടെയും തളിപ്പറമ്പ് നഗരസഭയുടെയും സംയുക്ത പങ്കാളിത്തത്തോടെ അമൃത് 2.0 പദ്ധതിയിലുൾപെടുത്തി പുതുതായി നിർമിച്ച പുഷ്പഗിരിയിലെ ഒരു ലക്ഷം ലിറ്ററിന്റെ കുടിവെള്ള സംഭരണി നാടിന് സമർപ്പിച്ചു.
നഗരസഭാ പരിധിയിലെ കുടിവെള്ള ക്ഷാമത്തിന് ശാശ്വത പരിഹാരം കാണുന്നതിനായി ഏഴ് കോടിയോളം രൂപ ചെലവഴിച്ച് പുഷ്പഗിരിയിലും പുളിമ്പറമ്പിലുമായി പുതുതായി രണ്ട് കൂറ്റൻ ജലസംഭരണികളാണ് നിർമിക്കുന്നത്. ഇതിൽ നിർമിണം പൂർത്തിയായ പുഷ്പഗിരിയിലെ ജലസംഭരണിയാണ് ഇപ്പോൾ നാടിന് സമർപ്പിച്ചത്.
ഗാന്ധി നഗർ വൈഎംസിഎ ഹാളിൽ നടന്ന ചടങ്ങിൽ കെ. സുധാകരൻ എംപി ഉദ്ഘാടനം നിർവഹിച്ചു. തളിപ്പറമ്പ് നഗരസഭാ ചെയർപേഴ്സൺ പി.കെ. സുബൈർ അധ്യക്ഷത വഹിച്ചു. ടി.കെ ഗോവിന്ദൻ എംഎൽഎ മുഖ്യാതിഥിയായി. തളിപ്പറമ്പ് നഗരസഭാ സെക്രട്ടറി കെ.പി. സുബൈർ പദ്ധതി റിപ്പോർട്ട് അവതരിപ്പിച്ചു.
വൈസ് ചെയർപേഴ്സൺ ദീപ രഞ്ജിത്ത്, സ്റ്റാൻഡിംഗ് കമ്മിറ്റി ചെയർപേഴ്സൺമാരായ കെ. മുഹമ്മദ് ബഷീർ, പി.പി. വത്സല, പുല്ലായിക്കൊടി ചന്ദ്രൻ, പി.സി. നസീർ, കൗൺസിലർമാരായ കെ.വി. മുഹമ്മദ് കുഞ്ഞി, കെ. മുഹമ്മദ് ഫിയാസ്, ടി. ബാലകൃഷ്ണൻ, അശോക് കുമാർ അഞ്ചാമര, അമൃത് മിഷൻ അർബൻ ഇൻഫ്രാസ്ട്രക്ചർ കം വാട്ടർ എക്സ്പേർട്ട് കൃഷ്ണപ്രിയ, മുൻ നഗരസഭാ ചെയർപേഴ്സൺമാരായ മഹമ്മൂദ് അള്ളാംകുളം, മുർഷിദ കൊങ്ങായി, രാഷ്ട്രീയ പാർട്ടി പ്രതിനിധികളായ സി.പി.വി. അബ്ദുള്ള, അഡ്വ. ടി. മോഹൻദാസ്, പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സൺ പി. റജുല എന്നിവർ പ്രസംഗിച്ചു.
District News
ആലക്കോട്: രയറോം പുഴയിൽ കുട്ടാപറമ്പ്-നെടുവോട് പഴയ പാലത്തിന് സമീപം റഗുലേറ്റർ കം ബ്രിഡ്ജ് നിർമിക്കണമെന്ന ആവശ്യത്തിന് മൂന്ന് പതിറ്റാണ്ടായിട്ടും പരിഹാരമായില്ല. പാലം യാഥാർഥ്യമായാൽ നെടുവോട്, പരപ്പ, അളുമ്പ്, ചാത്തമംഗലം, മൂന്നാംകുന്ന്, കുട്ടാപറമ്പ്, പൂവഞ്ചാൽ പ്രദേശങ്ങളിലെ ജനങ്ങളുടെ യാത്രാക്ലേശത്തിന് പരിഹാരമാകും. ആലക്കോട്, ഉദയഗിരി പഞ്ചായത്തുകളിലെ ഗ്രാമപ്രദേശങ്ങളിലെ ജലസേചനത്തിനും കൃഷിക്കും പദ്ധതി പ്രയോജനപ്പെടും.
കുടിയേറ്റത്തിന്റെ ആദ്യകാലത്ത് ചങ്ങാടത്തെ ആശ്രയിച്ചാണ് ജനങ്ങൾ പുഴ കടന്നിരുന്നത്. പിന്നീട് നാട്ടുകാരുടെ ശ്രമഫലമായി മുളകൊണ്ടുള്ള പാലം നിർമിച്ചു. ജനങ്ങളുടെ നിരന്തര ആവശ്യത്തെ തുടർന്ന് ആലക്കോട് പഞ്ചായത്ത് പാലം നിർമിച്ചുനൽകി.
15 വർഷം മുമ്പുവരെ എല്ലാ വർഷവും അറ്റകുറ്റപ്പണി നടത്തി പാലം സംരക്ഷിച്ചിരുന്നു. പിന്നീട് അറ്റകുറ്റപ്പണിക്ക് തുക വകയിരുത്താതായതോടെ തൂക്കുപാലം നശിച്ച് ഉപയോഗശൂന്യമായി. ഇതോടെ മഴക്കാലത്ത് പുഴ കടക്കാൻ വീണ്ടും ചങ്ങാടത്തെ ആശ്രയിക്കേണ്ട അവസ്ഥയിലാണ് പ്രദേശവാസികൾ. ആലക്കോട്, വായാട്ടുപറമ്പ്, കണിയംചാൽ, കാർത്തികപുരം, മണക്കടവ് പ്രദേശങ്ങളിലെ ഹൈസ്കൂളുകളിലേക്ക് വിദ്യാർഥികളടക്കം നൂറുകണക്കിന് പേർ സഞ്ചരിച്ചിരുന്ന പാത കൂടിയാണിത്. പാലം തകർന്നതോടെ യാത്രാസൗകര്യം പൂർണമായി തടസപ്പെട്ടു.
നേരത്തെ നാലു കിലോമീറ്റർ സഞ്ചരിച്ചാൽ ആലക്കോട് എത്തുമായിരുന്നു. എന്നാൽ ഇപ്പോൾ 10 കിലോമീറ്ററോളം ചുറ്റിസഞ്ചരിക്കണം. യാത്രാക്ലേശത്തിനും കാർഷിക മേഖലയിലെ ജലക്ഷാമത്തിനും പരിഹാരമാകുന്ന വിധത്തിൽ റഗുലേറ്റർ കം ബ്രിഡ്ജ് നിർമിക്കണമെന്നാണ് നാട്ടുകാരുടെ ആവശ്യം. കഴിഞ്ഞ യുഡിഎഫ് സർക്കാരിന്റെ അവസാന കാലത്തും ജി. സുധാകരൻ മന്ത്രിയായിരുന്ന സമയത്തും തിരുവനന്തപുരത്തുനിന്നുൾപ്പടെ ഉദ്യോഗസ്ഥർ സ്ഥലത്തെത്തി പരിശോധന നടത്തിയിരുന്നു. എന്നാൽ പിന്നീട് പദ്ധതിയുമായി ബന്ധപ്പെട്ട് തുടർനടപടികളൊന്നും ഉണ്ടായില്ല.
District News
ഇരിക്കൂർ: ഇരിക്കൂറിന്റ ചിരകാല സ്വപ്നമായ മിനി സിവിൽ സ്റ്റേഷന്റെ (റവന്യു ടവർ) യാഥാർഥ്യത്തിലേക്ക്. വി.ഡി. സതീശൻ സർക്കാർ കന്നി ബജറ്റിൽ അഞ്ചു കോടി വകയിരുത്തിയതോടെ സ്ഥല പരിശോധനയ്ക്കും പ്രാഥമിക ചർച്ചകൾക്കും പിന്നാലെ കെട്ടിടത്തിന്റെ രൂപരേഖയും തയാറാക്കി. ഇരിക്കൂർ പഞ്ചായത്ത് കോൺഫറൻസ് ഹാളിൽ സജീവ് ജോസഫ് എംഎൽഎയുടെ നേതൃത്വത്തിൽ ചേർന്ന യോഗം റവന്യു ടവറുമായി ബന്ധപ്പെട്ട വിഷയങ്ങൾ ചർച്ച ചെയ്തു.
നിലവിൽ രജിസ്ട്രാർ ഓഫീസും വില്ലേജ് ഓഫിസും സ്ഥിതി ചെയ്യുന്ന 85 സെന്റ് സ്ഥലം, സമീപത്ത് പൊലിസ് വകുപ്പിന് കീഴിലുള്ള 35 സെന്റ് സ്ഥലവും ചേർത്ത് ആകെ 1.20 ഏക്കറിലാണ് മിനി സിവിൽ സ്റ്റേഷൻ പണിയുക. പൂർണമായും എയർ കണ്ടീഷൻ ചെയ്ത് ആറു നിലകളിലായി ലിഫ്റ്റ് ഉൾപ്പെടെയുള്ള സൗകര്യത്തോടെയുള്ളതായിരിക്കും കെട്ടിടം. 35 കോടി രൂപയാണ് കെട്ടിടത്തിനും അനുബന്ധ നിർമാണ പ്രവൃത്തികൾക്കും ചെലവ് പ്രതീക്ഷിക്കുന്നത്. യോഗത്തിൽ ഇരിക്കൂർപഞ്ചായത്ത് പ്രസിഡന്റ് സി.കെ. മുഹമ്മദ് അധ്യക്ഷത വഹിച്ചു.
കഴിഞ്ഞ ദിവസം നടന്ന ഉന്നതതല യോഗത്തിൽ അവതരിപ്പിച്ച ഡ്രോയിംഗ് പ്രകാരം 4039 ചതുരശ്ര മീറ്റർ സ്ഥലത്ത് ഗ്രൗണ്ട് ഫ്ലോർ കൂടാതെ അഞ്ചു നിലകൾ, 6898.56 ചതുരശ്ര മീറ്റർ വിസ്തീർണത്തിലാണ് കെട്ടിടം. പൊലിസ് വകുപ്പിന്റെ അധീനതയിലുള്ള 35 സെന്റ് സ്ഥലം വിശാലമായ പാർക്കിംഗ് സൗകര്യത്തിനായി ഉപയോഗപ്പെടുത്താനാണ് തീരുമാനം. പൊതുമരാമത്ത് ബിൽഡിംഗ് വിഭാഗം ചീഫ് എക്സിക്യുട്ടീവ് എൻജിനിയർ സി. സവിത, അസി. എക്സിക്യുട്ടീവ് എൻജിനിയർ ആശിഷ് കുമാർ ബി.കെ എന്നിവർ പദ്ധതിയുടെ സാങ്കേതികവശങ്ങൾ വിശദീകരിച്ചു.
District News
ഏലപ്പീടിക: നെടുംപൊയില് - പേര്യ ചുരത്തിലെ 29-ാം മൈലില് നാലാം ഹെയര്പിന് വളവിന് സമീപം റോഡിലേക്ക് ഇടിഞ്ഞു വീണ മണ്ണും പറക്കല്ലുകളും ഒരു മാസത്തിലേറെ ആയിട്ടും പൂർണമായും നീക്കിയില്ല. ഇക്കഴിഞ്ഞ ഓഗസ്റ്റ് ഒന്നിന് രാത്രിയായിരുന്നു റോഡിലേക്ക് മണ്ണും കൂറ്റന് പാറക്കല്ലുകളും ഇടിഞ്ഞു വീണത്. ചുരത്തിലെ ഗതാഗതം പുനഃസ്ഥാപിക്കുന്നതിനായി റോഡിന്റെ ഒരുവശത്ത് നിന്ന് മാത്രമാണ് മണ്ണും പാറക്കല്ലുകളും നീക്കിയത്.
ഇവ റോഡില് നിന്നും പൂര്ണമായി നീക്കാത്തതിനാൽഒരു വശത്ത് കൂടി മാത്രമാണ് വാഹനങ്ങൾ കടന്നുപോകുന്നത്. രണ്ടു വശത്തും നിന്നു വാഹനങ്ങൾ വരികയാണെങ്കിൽ ഒന്ന് കടന്നുപോകുന്നത് വരെ രണ്ടാമത്തെ വാഹനം കാത്തുനിൽക്കേണ്ടി വരികയാണ്. മണ്ണിടിച്ചില് ഉണ്ടായിടത്ത് ഇനിയും ഇടിച്ചിൽ സാധ്യത നിലനിൽക്കുന്ന ഭീഷണി ഉയർത്തുന്നുണ്ട്. പാറകളില് വിളളല് രൂപപ്പെട്ട നിലയിലാണ്.
കണ്ണൂരിനെ വയനാടുമായും കർണാടക, തമിഴ്നാട് എന്നീ സംസ്ഥാനങ്ങളുമായും ബന്ധിപ്പിക്കുന്ന പ്രധാന റോഡുകളിൽ ഒന്നാണിത്. യാത്രാ, ചരക്കുവാഹനങ്ങളായി രാപ്പകൽ വ്യത്യാസമില്ലാതെ ദിവസേന നൂറുകണക്കിന് വാഹനങ്ങൾ കടന്നു പോകുന്ന ചുരം പാത കൂടിയാണിത്. മണ്ണും പാറക്കല്ലും പൂർണമായു നീക്കാത്തത് വാഹന ഡ്രൈവർമാരെയും യാത്രക്കാരെയും ബുദ്ധിമുട്ടിലാക്കുന്നുണ്ട്.
District News
തലശേരി: വരുമാനം സൃഷ്ടിക്കുന്ന വകുപ്പാക്കി ഫിഷറീസ് വകുപ്പിനെ മാറ്റുകയാണ് ലക്ഷ്യമെന്ന് മന്ത്രി വി.ഇ. അബ്ദുൾ ഗഫൂര്. തലശേരി സബ് കളക്ടര് ഓഫിസ് ഓഡിറ്റോറിയത്തില് ജില്ലാ വകുപ്പുതല അവലോകന യോഗത്തിൽ സംസാരിക്കുകയായിരുന്നു അദ്ദേഹം. സംസ്ഥാന വരുമാനത്തിന്റെ 1.76ശതമാനം മാത്രമാണ് ഫിഷറീസ് വകുപ്പിന്റെ സംഭാവന. അത് അഞ്ച് ശതമാനമാക്കി ഉയര്ത്തുകയാണ് സ്വപ്നം. പിഴവുകളില്ലാതെ മുന്നോട്ട് പോകേണ്ടതുണ്ട്. മത്സ്യമേഖലയിലെ വിവിധ ഏജന്സികള് നടപ്പിലാക്കുന്ന പദ്ധതികളുടെ സ്ഥിതിവിവരകണക്കുകള് ഏജന്സികളുടയും വകുപ്പിന്റെയും പക്കലുള്ള ഭൂമി സംബന്ധിച്ച വിവരങ്ങള് തുടങ്ങിയവ ശേഖരിക്കേണ്ടതുണ്ട്. പാതി വഴിയിലായ പദ്ധതികളുടെ വിവരങ്ങളും മനസിലാക്കണം. ഒപ്പം സര്ക്കാരിന്റെ പുതിയ പദ്ധതികള് നടപ്പിലാക്കുകയും വേണം- മന്ത്രി പറഞ്ഞു.
തലായി ഹാര്ബറിന്റെയും ഗോപാല്പേട്ട ഫിഷ് ലാൻഡിംഗ് സെന്ററിന്റെയും ശോച്യാവസ്ഥയ്ക്ക് പരിഹാരം കാണും. ജില്ലയിലെ ഉള്നാടന് മത്സ്യമേഖലയെ ശക്തിപ്പെടുത്തും. മത്സ്യബന്ധന ബോട്ടുകള് ട്രാന്സ്പോണ്ടറുകള് പ്രവര്ത്തിപ്പിക്കുന്നുണ്ടോ എന്ന കാര്യത്തില് കര്ശന പരിശോധനയും നടപടിയും കൈക്കൊള്ളണമെന്നും മന്ത്രി പറഞ്ഞു.
ഫിഷറീസ് വകുപ്പ് ജില്ലയില് നടത്തിയ പ്രവര്ത്തനങ്ങളെക്കുറിച്ചും അടിയന്തരാവശ്യങ്ങളെക്കുറിച്ചുമുള്ള രൂപരേഖ ഫിഷറീസ് ഡെപ്യൂട്ടി ഡയറക്ടര് ആര്. ജുഗ്നു അവതരിപ്പിച്ചു. സാമൂഹ്യനീതി വകുപ്പിന്റെ ആഭിമുഖ്യത്തില് ജില്ലയില് നടത്തിയ പ്രവര്ത്തനങ്ങളുടെ രൂപരേഖ ജില്ലാ സാമൂഹ്യ നീതി ഓഫീസര് പി.ബിജു അവതരിപ്പിച്ചു. അവലോകന യോഗത്തില് തലശേരി നഗരസഭാ ചെയര്പേഴ്സണ് കാരായി ചന്ദ്രശേഖരന് അധ്യക്ഷത വഹിച്ചു. ഫിഷറീസ് വകുപ്പ് സ്പെഷല് സെക്രട്ടറി അബ്ദുൾ നാസര് ആമുഖപ്രഭാഷണം നടത്തി. ഫിഷറീസ് ജോയിന്റ് ഡെപ്യൂട്ടി ഡയറക്ടര് പി. അനീഷ്, മന്ത്രിയുടെ പി.എസ്. എന്. പത്മകുമാര് എന്നിവര് സംസാരിച്ചു. മന്ത്രി തലായി മത്സ്യബന്ധന തുറമുഖം സന്ദര്ശിച്ച് സ്ഥിതിഗതികള് വിലയിരുത്തി. തുടർന്ന് തലായിയിലെ ഫീഡ് മില്ലും തലശേരിയിലെ മത്സ്യമാര്ക്കറ്റും മന്ത്രി സന്ദര്ശിച്ചു.
മന്ത്രി വി.ഇ. അബ്ദുള് ഗഫൂര് കണ്ണൂര് സിറ്റി ഹാര്ബറും സന്ദര്ശിച്ചു. മന്ത്രിയായി ചുമതലയേറ്റ ശേഷം ആദ്യമായി സിറ്റി ഹാര്ബറിലെത്തിയ മന്ത്രിയെ മത്സ്യത്തൊഴി ലാളികള് സ്വീകരിച്ചു. ഹാര്ബറിലെ സൗകര്യങ്ങള് മന്ത്രി നേരിട്ട് വിലയിരുത്തി. ഹാര്ബറിലെ അടിസ്ഥാന സൗകര്യങ്ങള് ഉള്പ്പെടെയുള്ള സംവിധാനങ്ങള് മെച്ചപ്പെടുത്തുന്നതിനായുള്ള നടപടികള് സ്വീകരിക്കുമെന്ന് മന്ത്രി വി.ഇ. അബ്ദുള് ഗഫൂര് പറഞ്ഞു.
ടി.ഒ. മോഹനന് എംഎല്എ, മേയര് പി. ഇന്ദിര, ഡപ്യൂട്ടി മേയര് കെ.പി. താഹിര്, ഫിഷറീസ് വകുപ്പ് സ്പെഷല് സെക്രട്ടറി അബ്ദുള് നാസര്, ജോയിന്റ് ഡപ്യൂട്ടി ഡയറക്ടര് പി. അനീഷ്, ഡപ്യൂട്ടി ഡയറക്ടര് ആര്. ജുഗ്നു, അസിസ്റ്റന്റ് ഡയറക്ടര് ജെ. താര തുടങ്ങിയവര് മന്ത്രിയോടൊപ്പമുണ്ടായിരുന്നു.