പേരാമ്പ്ര: നാദാപുരം, പേരാമ്പ്ര മണ്ഡലങ്ങളെ ബന്ധിപ്പിച്ച് കുറ്റ്യാടി പുഴക്ക് കുറുകെ ചവറംമൂഴിയിൽ നിര്മിക്കുന്ന പുതിയ പാലത്തിന്റെ പ്രവൃത്തി ഉദ്ഘാടനം മന്ത്രി പി.എ. മുഹമ്മദ് റിയാസ് ഓണ്ലൈനായി നിര്വഹിച്ചു.
പേരാമ്പ്ര നിയോജക മണ്ഡലത്തിലെ ചങ്ങരോത്ത് പഞ്ചായത്തിൽ പെട്ട ഒറ്റക്കണ്ടം ഹോളി ഫാമിലി യുപി സ്കൂളിൽ നടന്ന ചടങ്ങിൽ ടി.പി. രാമകൃഷ്ണന് എംഎല്എ അധ്യക്ഷത വഹിച്ച് ശിലാസ്ഥാപന ഫലകം അനാച്ഛാദനം ചെയ്തു. മലയോര ഹൈവേ പദ്ധതിയില് ഉള്പ്പെടുത്തി കിഫ്ബി ഫണ്ടായ 9.289 കോടി രൂപ വിനിയോഗിച്ചാണ് പാലം നിര്മിക്കുന്നത്. എംഎൽഎ ഇ.കെ. വിജയന് മുഖ്യാതിഥിയായി.
പടത്തുകടവ് ഹോളി ഫാമിലി ചർച്ച് വികാരി ഫാ. തോമസ് പൊരിയത്ത്, ചക്കിട്ടപാറ ഗ്രാമപഞ്ചായത്ത് പ്രസിഡന്റ് മോളി തോമസ് ആയിത്തമറ്റം, ചങ്ങരോത്ത് ഗ്രാമപഞ്ചായത്ത് പ്രസിഡന്റ് നസീമ വാഴയില്, വൈസ് പ്രസിഡന്റ് എസ്. സുനന്ദ്, പേരാമ്പ്ര ബ്ലോക്ക് പഞ്ചായത്ത് സ്ഥിരം സമിതി അധ്യക്ഷ യു. അനിത, മരുതോങ്കര ഗ്രാമ പഞ്ചായത്ത് അധ്യക്ഷ പി.പി. സുപ്രഭ, ജനപ്രതിനിധികളായ ബിൻസി തോമസ്, സ്വാതി മിഥുൻ, സന്തോഷ് കോശി, രാഷ്ട്രീയ പാർട്ടി പ്രതിനിധികളായ ബേബി കാപ്പുകാട്ടിൽ, കെ.കെ. വിനോദൻ, സി.ഡി. പ്രകാശ്, എ. ബാലചന്ദ്രൻ, ഒ.ടി. രാജൻ, ഉണ്ണി വേങ്ങേരി, കെആർഎഫ്ബി എൻജിനീയർമാരായ ഇ.ജി. വിശ്വപ്രകാശ്, പി. രജിന, വി. അമൽജിത്ത് എന്നിവർ പ്രസംഗിച്ചു.
77.4 മീറ്റർ നീളവും 12.50 മീറ്റർ വീതിയുമുള്ള പാലത്തിന്റെ നിർമാണ കരാറുകാർ ഊരാളുങ്കൽ ലേബർ കോൺട്രാക്ട് കോ ഓപ്പറേറ്റീവ് സൊസൈറ്റിയാണ്. മരുതോങ്കര പഞ്ചായത്ത് ഭാഗത്ത് 150 മീറ്ററും, ചക്കിട്ടപാറ പഞ്ചായത്ത് ഭാഗത്ത് 60 മീറ്ററും എന്ന ക്രമത്തിൽ സമീപന റോഡും നിർമിക്കും. ഒരു വർഷം കൊണ്ട് പാലം പണി പൂർത്തീകരിക്കാനാണ് ലക്ഷ്യമിടുന്നത്.
സൗകര്യ പ്രദമായ റോഡിനു വേണ്ടി വർഷങ്ങളായി കാത്തിരിക്കുന്ന കുടിയേറ്റ പ്രദേശങ്ങളായ ചവറം മൂഴി, ഒറ്റക്കണ്ടം മേഖലകളുടെ സമഗ്ര വികസന സ്വപ്നമാണ് പാലം പൂർത്തിയാകുന്നതോടെ യാഥാർഥ്യമാകുന്നത്.