കാസര്ഗോഡ് ജനറല് ആശുപത്രിയില് നിര്മിച്ച പുതിയ മോര്ച്ചറി കെട്ടിടം.
കാസര്ഗോഡ്: ജനറല് ആശുപത്രിയില് അത്യാധുനിക സൗകര്യങ്ങളോടെ നിര്മിച്ച പുതിയ മോര്ച്ചറി കെട്ടിടം എന്.എ. നെല്ലിക്കുന്ന് എംഎല്എ ഉദ്ഘാടനം ചെയ്തു. എംഎല്എയുടെ ആസ്തിവികസന ഫണ്ടിൽ നിന്ന് 1.20 കോടി രൂപ ചെലവഴിച്ചാണ് അത്യാധുനിക സൗകര്യങ്ങളോടു കൂടിയ ഈ കെട്ടിടം നിര്മിച്ചത്.
ഒരേസമയം കൂടുതല് മൃതദേഹങ്ങള് ശാസ്ത്രീയമായി സൂക്ഷിക്കാനുള്ള ഫ്രീസര് സംവിധാനവും വിപുലമായ പോസ്റ്റ്മോര്ട്ടം ടേബിളുകളും പരിശോധനാമുറികളും പുതിയ മന്ദിരത്തില് ഒരുക്കിയിട്ടുണ്ട്. പുതിയ കെട്ടിടം പ്രവര്ത്തനസജ്ജമായതോടെ 24 മണിക്കൂറും മോര്ച്ചറി സേവനം ലഭ്യമാകും. പഴയ മോര്ച്ചറിയിലെ സ്ഥലപരിമിതിക്കും അപര്യാപ്തതകള്ക്കും ഇതോടെ ശാശ്വത പരിഹാരമായിരിക്കുകയാണ്.
നഗരസഭ ചെയര്പേഴ്സണ് ഷാഹിന സലീം അധ്യക്ഷത വഹിച്ചു. വൈസ്ചെയര്മാന് കെ.എം. ഹനീഫ്, സ്ഥിരംസമിതി അധ്യക്ഷരായ മെഹ്റുന്നീസ ഹമീദ്, ഷമീന മുജീബ്, ഹമീദ് ബെദിര, എന്.ആര്. വിദ്യാശ്രീ, ജാഫര് കമാല്, വാര്ഡ് കൗണ്സിലര് രാമകൃഷ്ണ ഹൊള്ള, ഡെപ്യൂട്ടി ഡിഎംഒ ബി. സന്തോഷ്, അസി. എക്സിക്യൂട്ടീവ് എന്ജിനിയര് പി.എം. യമുന എന്നിവര് പ്രസംഗിച്ചു. ആശുപത്രി സൂപ്രണ്ട് ഡോ. ശ്രീകുമാര് മകുന്ദന് സ്വാഗതവും ഫോറന്സിക് സര്ജന് ഡോ. എം. രോഹിത് നന്ദിയും പറഞ്ഞു.