പന്തളം സ്വാമി അയ്യപ്പൻ മുനിസിപ്പൽ ബസ് സ്റ്റാൻഡ്.
പന്തളം: ശബരിമല തീർഥാടകരടക്കം നൂറുകണക്കിന് യാത്രക്കാർ ദിവസവും ബസ് കയറാൻ ബുദ്ധിമുട്ടുമ്പോൾ ശബരിമല അയ്യപ്പന്റെ നാമത്തിൽ നിർമിച്ച് ഉദ്ഘാടനം കഴിഞ്ഞ പന്തളം നഗരസഭാ ബസ് സ്റ്റാൻഡ് ഇനിയും തുറന്നുകൊടുത്തില്ല. മണ്ഡലകാലം ആരംഭിച്ചിട്ടും ബസ് സ്റ്റാൻഡ് പ്രവർത്തനസജ്ജമാക്കാത്തത് തീർഥാടകരെയും മറ്റു യാത്രക്കാരെയും ഒരേപോലെ ദുരിതത്തിലാക്കുകയാണ്.
പന്തളത്തെത്തുന്ന തീർഥാടകർ ഏറ്റവും കൂടുതൽ ബുദ്ധിമുട്ടുന്നത് പമ്പയിലേക്കും പത്തനംതിട്ടയിലേക്കും ബസ് കയറുന്നതിനാണ്. എവിടെനിന്ന് ബസ് കയറണമെന്നുപോലും അറിയാതെ പലരും വിഷമിക്കുന്നു. സ്വകാര്യ ബസ് സ്റ്റാൻഡും കെഎസ്ആർടിസി സ്റ്റാൻഡും സമീപത്തായി പ്രവർത്തിക്കുന്ന പുതിയ സംവിധാനം യാഥാർഥ്യമായാൽ യാത്രക്കാർക്ക് ഏറെ പ്രയോജനപ്പെടും.
തദ്ദേശ തെരഞ്ഞെടുപ്പിനു മുമ്പ് അന്നത്തെ നഗരസഭാ കൗൺസിൽ തിടുക്കത്തിൽ നിർമാണപ്രവർത്തനങ്ങൾ നടത്തി പേരിന് ഉദ്ഘാടനം നടത്തിയതല്ലാതെ പിന്നീട് സ്റ്റാൻഡ് പ്രവർത്തനസജ്ജമാക്കാനുള്ള നടപടികളൊന്നും ഉണ്ടായില്ല. കാത്തിരിപ്പുകേന്ദ്രം ഉൾപ്പെടെയുള്ള പ്രാഥമിക സൗകര്യങ്ങൾ ഒരുക്കിയിട്ടുണ്ടെങ്കിലും മറ്റു നിർമാണപ്രവർത്തനങ്ങൾ പൂർത്തിയായിട്ടില്ല.
റീജണൽ ട്രാൻസ്പോർട്ട് അഥോറിറ്റിയുടെ അനുമതി ലഭിക്കുന്നതിനായി മുട്ടാർ നീർച്ചാലിനോടു ചേർന്ന് സംരക്ഷണഭിത്തി നിർമിക്കുകയും ബസുകൾക്ക് കയറാനും ഇറങ്ങാനുമുള്ള വഴി ഒരുക്കുകയും ചെയ്യേണ്ടതുണ്ട്.
75 ലക്ഷം രൂപ ചെലവിലാണ് ‘സ്വാമി അയ്യപ്പൻ മുനിസിപ്പൽ ബസ് ടെർമിനൽ’ നിർമിച്ചത്. പന്തളം കവലയ്ക്കു സമീപം പ്രവർത്തിക്കുന്ന നിലവിലെ സ്റ്റാൻഡ് കെഎസ്ആർടിസി സ്റ്റാൻഡിനോടു ചേർന്ന സ്ഥലത്തേക്ക് മാറ്റാനും പഴയ സ്ഥലത്ത് നഗരസഭാ ഓഫീസ് കോംപ്ലക്സ് നിർമിക്കാനുമായിരുന്നു മുൻ ഭരണസമിതിയുടെ തീരുമാനം. ഇതിനായി മണ്ണുപരിശോധന പൂർത്തിയാക്കുകയും ഓഫീസ് കോംപ്ലക്സിന് ഫണ്ട് അനുവദിച്ചുകൊണ്ടുള്ള സർക്കാർ ഉത്തരവ് ലഭിക്കുകയും ചെയ്തിരുന്നു. ബസ് സ്റ്റാൻഡ് പന്തളം കവലയിൽനിന്ന് മാറ്റുന്നത് നഗരത്തിലെ ഗതാഗതക്കുരുക്കിനും പരിഹാരമാകുമായിരുന്നു.
മണ്ഡലകാലത്ത് തീർഥാടകരുടെ തിരക്ക് വർധിക്കുന്ന സാഹചര്യത്തിൽ അവശേഷിക്കുന്ന ജോലികൾ അടിയന്തരമായി പൂർത്തിയാക്കി ബസ് സ്റ്റാൻഡ് തുറന്നുകൊടുക്കണമെന്നാണ് യാത്രക്കാരുടെ ആവശ്യം.
Tags : Pandalam Municipal Nttuvishesham Districtnews