കൊല്ലം: മുഖ്യമന്ത്രിയായിരുന്ന ഉമ്മൻ ചാണ്ടിക്ക് എതിരെ സോളാർ സാമ്പത്തിക തട്ടിപ്പ് കേസിലെ പ്രതി നൽകിയ വ്യാജ പീഡനപരാതി അദ്ദേഹത്തിന്റെ ആരോഗ്യത്തെ മോശമായി ബാധിച്ചെന്ന് മുൻ പ്രൈവറ്റ് സെക്രട്ടറി പി.
എസ്. ശ്രീകുമാർ കൊട്ടാരക്കര ഒന്നാം ക്ലാസ് ജുഡീഷൽ മജിസ്ട്രേട്ട് കോടതിയിൽ മൊഴി നൽകി. സോളർ അന്വേഷണ കമ്മിഷനു മുന്നിൽ സോളർ പീഡനക്കേസിലെ പരാതിക്കാരി ഹാജരാക്കിയ കത്തിൽ നാല് പേജ് കൂട്ടിച്ചേർത്തതിനു പിന്നിൽ ഗൂഢാലോചന ഉണ്ടെന്ന് ആരോപിച്ച് അഡ്വ. സുധീർ ജേക്കബ്, അഡ്വ. ജോളി അലക്സ് മുഖേന ഫയൽ ചെയ്ത ഹർജിയിലാണ് നടപടികൾ.
കേസിൽ സോളാർ പീഡനക്കേസിലെ പരാതിക്കാരി ഒന്നാം പ്രതിയും കെ.ബി. ഗണേഷ്കുമാർ രണ്ടാം പ്രതിയുമാണ്. കോടതി കുറ്റവിമുക്തനാക്കിയ ഘട്ടത്തിൽ ഉമ്മൻ ചാണ്ടി അസുഖം കൂടി ബംഗളൂരു ആശുപത്രിയിൽ ചികിത്സയിലായിരുന്നു. സത്യം തെളിഞ്ഞു എന്നാണ് അദ്ദേഹം തന്നോട് പ്രതികരിച്ചതെന്നും ശ്രീകുമാർ മൊഴി നൽകി.
സോളർ സാമ്പത്തിക തട്ടിപ്പ് കേസിലെ പ്രതിയായ സോളർ പീഡനക്കേസ് പരാതിക്കാരി ഒരു തവണ മാത്രമാണ് മുഖ്യമന്ത്രി ഉമ്മൻ ചാണ്ടിയുടെ ഓഫിസിൽ വന്നതെന്നും 2013ലാണെന്നും ശ്രീകുമാറിന്റെ മൊഴിയിലുണ്ട്.
പഴ്സനൽ സെക്യൂരിറ്റി ഓഫിസർ അറിയിച്ചതിനെ തുടർന്ന് താൻ മുഖ്യമന്ത്രിയുടെ മുറിയിലെത്തി. ലക്ഷ്മി
നായർ എന്ന സ്ത്രീ വന്നിട്ടുണ്ടെന്നും ദുരിതാശ്വാസ നിധിയിലേക്കു ചെക്ക് തരാൻ വന്നതാണെന്നും അദ്ദേഹം അറിയിച്ചു. ചെക്ക് വാങ്ങി ഫിനാൻസ് സെക്രട്ടറിക്കു നൽകി. പിന്നീടാണ് ഇവർ സോളർ സാമ്പത്തിക തട്ടിപ്പ് കേസിലെ പ്രതിയാണെന്ന് അറിയുന്നതെന്നും ശ്രീകുമാർ പറഞ്ഞു.
മന്ത്രിയായിരുന്ന കെ.ബി.ഗണേഷ്കുമാറിന്റെ കുടുംബപ്രശ്നം ഒത്തുതീർപ്പാക്കാൻ ഉമ്മൻ ചാണ്ടി വളരെയധികം കഷ്ടപ്പെട്ട വിവരം തനിക്കറിയാമെന്നും പാർട്ടി ചെയർമാൻ എന്ന നിലയിൽ പിതാവ് ആർ.ബാലകൃഷ്ണപിള്ള ആവശ്യപ്പെട്ടതിനാലാണ് ഗണേഷ്കുമാറിനു രാജിവയ്ക്കേണ്ടി വന്നതെന്നും ശ്രീകുമാർ കോടതിയിൽ പറഞ്ഞു. വിവാദം കാരണം ഉറക്കം നഷ്ടപ്പെട്ടെന്നും രക്തസമ്മർദം വളരെയധികം വർധിച്ചെന്നും മരുന്നു കഴിക്കുകയാണെന്നും ഗണേഷ്കുമാർ തന്നോടു പറഞ്ഞിരുന്നതായി ഒാർക്കുന്നുണ്ടെന്നും അദ്ദേഹം പറഞ്ഞു. മന്ത്രിസഭ അധികാരം ഒഴിഞ്ഞതിനു ശേഷമാണ് ഉമ്മൻ ചാണ്ടിക്കെതിരെ സോളർ കമ്മിഷനും പിന്നീടു വന്ന സർക്കാരിനും സോളർ പീഡനക്കേസിലെ പരാതിക്കാരി പരാതി നൽകിയതെന്നും ശ്രീകുമാർ മൊഴിയിൽ പറഞ്ഞു.
മനോരമയിലെ മുതിർന്ന മാധ്യമപ്രവർത്തകൻ ജോൺ മുണ്ടക്കയത്തിന്റെ മൊഴിയും കോടതി രേഖപ്പെടുത്തി. ഉമ്മൻ ചാണ്ടിയുമായി ദീർഘകാലത്തെ ബന്ധം ഉണ്ടെന്നും ആരോപണം അദ്ദേഹത്തെ വളരെയധികം മാനസിക സംഘർഷത്തിലെത്തിച്ചെന്നും ആരോഗ്യത്തെ ബാധിച്ചെന്നും അദ്ദേഹവും മൊഴി നൽകി. കോടതി കേസ് അടുത്ത മാസം 17ന് വീണ്ടും പരിഗണിക്കും.