വളയംകുളത്തെ സെമി ഹമ്പിന് സമീപത്തെ അപകടകരമായ കുഴികള്
ചങ്ങരംകുളം: കുറ്റിപ്പുറം-തൃശൂര് സംസ്ഥാന പാതയിലെ സെമി ഹമ്പുകളും സമീപത്തെ കുഴികളും വാഹനങ്ങളുടെയും യാത്രക്കാരുടെയും നടുവൊടിക്കുന്നു.
രാത്രികാലങ്ങളില് ഹമ്പുകളും കുഴികളും തിരിച്ചറിയാന് കഴിയാതെ ദിനംപ്രതി വാഹനങ്ങള് അപകടത്തില്പ്പെടുന്നതായി നാട്ടുകാര് പറയുന്നു. ചിയ്യാനൂര് പാടത്തും വളയംകുളത്തും സ്ഥിതി ചെയ്യുന്ന ഹമ്പുകളാണ് യാത്രക്കാര്ക്ക് കെണിയാവുന്നത്. സംസ്ഥാനത്തെ ഏറ്റവും തിരക്കേറിയ പാതകളിലൊന്നായ തൃശൂര്-കുറ്റിപ്പുറം റോഡിലാണ് ഈ ദുരിതം.
ദീര്ഘദൂര വാഹനങ്ങളും ഇതര സംസ്ഥാനങ്ങളില് നിന്നെത്തുന്ന ചരക്ക് വാഹനങ്ങളും തീര്ഥാടകര് സഞ്ചരിക്കുന്ന വാഹനങ്ങളും അപകടത്തില്പ്പെടുന്നത് ഇവിടെ പതിവായിരിക്കുകയാണ്. മുന്നറിയിപ്പ് ബോര്ഡുകളോ തെരുവുവിളക്കുകളോ ഇല്ലാത്തതാണ് അപകടങ്ങള്ക്ക് പ്രധാന കാരണം. റോഡിന്റെ ഗതി തിരിച്ചറിയാന് റിഫ്ലക്ടറുകള് സ്ഥാപിക്കുകയും പാതയോരങ്ങളിലെ പൊന്തക്കാടുകള് വെട്ടിത്തെളിച്ച് വിളക്കുകള് സ്ഥാപിക്കുകയും ചെയ്താല് ഒരു പരിധിവരെ അപകടങ്ങള് ഒഴിവാക്കാനാകും. കഴിഞ്ഞ ദിവസങ്ങളില് ബൈക്ക് അപകടങ്ങളില്പ്പെട്ട് നിരവധി പേര്ക്ക് പരിക്കേറ്റിരുന്നു. റോഡിന്റെ അപകടാവസ്ഥ പലതവണ പൊതുമരാമത്ത് വകുപ്പിനെയും ഉദ്യോഗസ്ഥരെയും അറിയിച്ചിട്ടും നടപടിയുണ്ടായില്ലെന്ന് നാട്ടുകാര് ആരോപിക്കുന്നു.
ശബരിമല സീസണ് കൂടി എത്തുന്നതോടെ അപകടസാധ്യത വര്ധിക്കുകയാണ്. പാതയോരത്തെ മണ്ണും അവശിഷ്ടങ്ങളും നീക്കം ചെയ്യുകയും കുഴികളടച്ച് റിഫ്ലക്ടറുകളും വിളക്കുകളും സ്ഥാപിച്ച് യാത്രക്കാരുടെ സുരക്ഷ ഉറപ്പാക്കണമെന്നുമാണ് നാട്ടുകാരുടെ ആവശ്യം.