ഒരു റോ-റോ മാത്രം സർവീസ് നടത്തുന്നതിനാൽ വൈപ്പിൻ ജെട്ടിയിൽ ഇന്നലെ അനുഭവപ്പെട്ട വാഹനത്തിരക്ക്.
വൈപ്പിൻ : സ്റ്റിയറിംഗ് തകരാറിനെ തുടർന്ന് വൈപ്പിൻ-ഫോർട്ടുകൊച്ചി റൂട്ടിലെ രണ്ട് റോ-റോ സർവീസുകളിൽ ഒന്ന് മുടങ്ങിയിട്ട് ഇന്നേക്ക് അഞ്ചുദിവസം. ഒരു റോ-റോ മാത്രമാണ് ഇപ്പോൾ സർവീസിനുള്ളത്. ഇതാകട്ടെ ഏത് നിമിഷവും തകരാറിലാകാമെന്നാണ് ജീവനക്കാർ പറയുന്നത്. ഇവിടെ അടിക്കടി റോ-റോ തകരാറിലാകുന്നത് പതിവായതോടെ ജനങ്ങൾ എന്നും പെരുവഴിയിൽ വലയുകയാണ്. ഉത്തരവാദിത്തപ്പെട്ട കൊച്ചിൻ കോർപറേഷൻ അധികൃതർ ആകട്ടെ കാണാത്ത ഭാവം നടിക്കുന്നതിനാൽ പ്രതിഷേധം വ്യാപകമാണ്.
ഇതിന്റെ ഭാഗമായി ഇന്ന് എളങ്കുന്നപ്പുഴ പഞ്ചായത്ത് റസിഡന്റ്സ് അസോസിയേഷൻ അപക് സ് കൗൺസിലിന്റെ നേതൃത്വത്തിൽ കോർപറേഷൻ ഓഫീസിനു മുന്നിൽ രാവിലെ 10ന് ശ്രദ്ധ ക്ഷണിക്കൽ സമരം സംഘടിപ്പിച്ചിട്ടുണ്ട്. നാലു മാസങ്ങൾക്ക് മുമ്പ് മുഖ്യമന്ത്രി ഉദ്ഘാടനം ചെയ്ത പുതിയ റോ-റോ സർവീസിനിറക്കി യാത്രാദുരിതം പരിഹരിക്കുകയെന്നതാണ് ആവശ്യം. സമരത്തിന് റോ-റോ പാസഞ്ചേഴ്സ് അസോസിയേഷനും ഫെറി പാസഞ്ചേഴ്സ് അസോസിയേഷനും പിന്തുണ പ്രഖ്യാപിച്ചതായി ഭാരവാഹികളായ ജോണി വൈപ്പിൻ, ഫ്രാൻസിസ് ചമ്മണി എന്നിവർ അറിയിച്ചു.
ഇതിനിടെ പുതിയ റോ-റോ സർവീസ് നടത്തുക, സർവീസ് കിൻ കോയിൽനിന്നു മാറ്റി കോർപ്പറേഷൻ നേരിട്ടു നടത്തുക തുടങ്ങിയ ആവശ്യങ്ങൾ ഉന്നയിച്ച് കെഎൽസിഎ ഓച്ചന്തുരുത്ത് യൂണിറ്റ് ഇന്നലെ മേയർക്ക് നിവേദനം നൽകിയിട്ടുണ്ട്. നിവേദക സംഘത്തിൽ ഭാരഹികളായ റോയ് ഡിക്കുഞ്ഞ, ബെന്നറ്റ് കുറുപ്പശേരി, സാബു വാര്യത്ത്, ആന്റണി സജി തുടങ്ങിയവർ ഉണ്ടായിരുന്നു.
Tags : 'Attention-drawing' protest today Nattuvishesham DistrictNews