തിരുവനന്തപുരം കോർപറേഷൻ കൗൺസിലിൽ പ്രതിപക്ഷ കൗൺസിലർമാർ പ്രതിഷേധിച്ചപ്പോൾ.
തിരുവനന്തപുരം : കോർപറേഷൻ കൗണ്സിൽ യോഗത്തിൽ പതിവുപോലെ ഇന്നലെയും ഭരണ-പ്രതിപക്ഷാംഗങ്ങൾ തമ്മിൽ ബഹളം. അഹമ്മദാബാദ് കോർപറേഷനുമായി സഹകരിച്ചു നടപ്പിലാക്കാൻ ഉദ്ദേശിക്കുന്ന ഇരട്ട നഗരം പദ്ധതിയുടെ പേരിലായിരുന്നു ബഹളം.
പദ്ധതിയുമായി ബന്ധപ്പെട്ട ചർച്ചയിൽ മേയർ വി.വി. രാജേഷിനൊപ്പം വിവാദ വ്യവസായി കൂടി പങ്കെടുത്തെന്ന് ആരോപിച്ചു ഇടതു കൗണ്സിലർമാർ യോഗത്തിൽ പ്രതിഷേധമുയർത്തി. ഇടതു കൗണ്സിലർമാരുടെ പ്രതിഷേധത്തോടു യുഡിഎഫ് അംഗങ്ങളും യോജിച്ചതോടെ കൗണ്സിൽ യോഗം അലങ്കോലമായി. ഇതിനിടെ ധാരണാപത്രം ഒപ്പുവയ് ക്കാനുള്ള തീരുമാനത്തിൽ പ്രതിഷേധിച്ച് ഇടതു കൗണ്സിലർമാർ യോഗം ബഹിഷ്ക്കരിച്ച് ഇറങ്ങിപ്പോയി.
നഗരത്തിന്റെ സന്പൂർണ വികസനം ലക്ഷ്യമിട്ടാണ് അഹമ്മദാബാദ് കോർപറേഷനുമായി സഹകരിച്ചു തിരുവനന്തപുരം കോർപറേഷൻ ഇരട്ട നഗരം പദ്ധതി നടപ്പിലാക്കുന്നത്. ഇതുമായി ബന്ധപ്പെട്ടുള്ള പ്രാഥമിക ചർച്ചകൾ നടന്നു.
മാലിന്യ സംസ്കരണം, റോഡ് വികസനം, ജലാശയങ്ങളുടെ നവീകരണം, സാങ്കേതികവിദ്യാ കൈമാറ്റം, ഗതാഗത നിയന്ത്രണം തുടങ്ങിയ മേഖലകളിൽ സഹകരണം ലക്ഷ്യമിട്ടാണ് ഇരട്ട നഗരം പദ്ധതി നടപ്പാക്കുന്നത്. മേയർ, ആരോഗ്യ സ്ഥിരം സമിതി അധ്യക്ഷൻ എം.ആർ. ഗോപൻ, ധനകാര്യ സ്ഥിരം സമിതി അംഗം വി.ജി. ഗിരികുമാർ, കോർപറേഷൻ സെക്രട്ടറി, ഹെൽത്ത് ഓഫിസർ, ഹെൽത്ത് സൂപ്പർവൈസർ എന്നിവരാണു കോർപറേഷനെ പ്രതിനിധീകരിച്ചു ചർച്ചയിൽ പങ്കെടുത്തത്. ചർച്ചയിൽ വിവാദ വ്യവസായി പങ്കെടുത്ത ചിത്രം ഉയർത്തിക്കാട്ടി ഇടതു കൗണ്സിലർമാർ ബഹളം വച്ചു. ഡീലിന്റെ ഭാഗമായാണു വ്യവസായി പങ്കെടുത്തതെന്നായിരുന്നു പ്രതിപക്ഷത്തിന്റെ ആരോപണം. ബഹളത്തിനിടെ ഒൗദ്യോഗിക അജണ്ടളെല്ലാം പാസാക്കി കൗണ്സിൽ യോഗം പിരിഞ്ഞു.
Tags : businessman's name Nttuvishesham Districtnews