മീനന്തറ ടൂറിസം പദ്ധതിയുടെ ഭാഗമായി ടൈലുകള് പാകി മനോഹരമാക്കിയ വടവാതൂര് ബണ്ട് റോഡ്
ഇങ്ങനെ പോരാ...
വാടവാതൂര്: വടവാതൂര് ബണ്ട് റോഡിലെ മീനന്തറ ടൂറിസം പദ്ധതിയുടെ ഭാഗമായി ഗ്രാമീണ വിനോദസഞ്ചാര കേന്ദ്രത്തില് അടിസ്ഥാന സൗകര്യം ഒരുക്കണമെന്ന ആവശ്യം ശക്തമാകുന്നു. വിജയപുരം പഞ്ചായത്തിലെ വടവാതൂര് ബണ്ട് റോഡ് വിനോദ സഞ്ചാരികള്ക്ക് നയനമനോഹരമായ കാഴ്ചകളാണ് സമ്മാനിക്കുന്നത്. പാറമ്പുഴക്കരയെയും വടവാതൂര്ക്കരയെയും ബന്ധിപ്പിക്കുന്നതാണ് വടവാതൂര് ബണ്ട് റോഡ്.
നൂറുകണക്കിന് ഏക്കര് പാടശേഖരത്തിന് നടുവിലൂടെ പോകുന്ന റോഡില് മൂന്ന് പാലമാണുള്ളത്. ഒന്ന് മീനന്തറയാറിന് കുറുകെയും രണ്ടെണ്ണം മണലുംകുഴി തോടിനും കരിമ്പിന് തോടിനും കുറുകേയുമാണ്. അമയന്നൂര്, മാലം, വടവാതൂര്, പൊന്പള്ളി, ഇറഞ്ഞാല് എന്നീ പ്രദേശങ്ങള് ഉള്പ്പെടുന്നതാണ് വടവാതൂര് പാടശേഖരം.
പാറമ്പുഴ മോസ്കോ കവലയില് നിന്നും വടവാതൂര്കവലയ്ക്കും കെകെ റോഡിനു സമീപം സ്ഥിതിചെയ്യുന്ന മില്മയുടെ എതിര്വശത്തും എത്തിച്ചേരുന്ന റോഡാണ് വടവാതൂര് ബണ്ട് റോഡ്. കെകെ റോഡിന്റെ ഭാഗത്തുനിന്നും മെഡിക്കല് കോളജിലേക്കും ഏറ്റുമാനൂര്ക്കും എംസി റോഡിലേക്കും കോട്ടയം നഗരത്തിന്റെ തിരക്കില്പ്പെടാതെ വേഗത്തില് എത്താന് കഴിയുന്നതാണ് ഈ റോഡ്. പണ്ട് കാര്ഷിക ആവശ്യത്തിനായി വയലോരത്ത് നിര്മിച്ച മട പിന്നീട് വീതികൂട്ടി മണ്ണിട്ടുയര്ത്തി റോഡാക്കുകയായിരുന്നു.
പുതുവത്സര ആഘോഷത്തിന്റെ ഭാഗമായ കോട്ടയം കാര്ണിവല് ഇവിടെയാണ് നടക്കുന്നത്. വടവാതൂര് കടത്ത് കടവില് മീനന്തറ ടൂറിസം പദ്ധതിയുടെ ഭാഗമായി കുട്ടികളുടെ പാര്ക്കും സ്ഥാപിച്ചിട്ടുണ്ട്.