പ്രതീകാത്മക ചിത്രം
കൊച്ചി: ബാലാവകാശ നിയമപ്രകാരം കുറ്റകൃത്യങ്ങളിൽ ഏർപ്പെടുന്ന കുട്ടികൾക്ക് ഇളവ് ലഭിക്കുന്ന ഉയർന്ന പ്രായപരിധി 18ൽനിന്ന് 16 വയസായി കുറയ്ക്കുന്ന കാര്യം നിയമനിർമാണ സഭകൾ ആലോചിക്കേണ്ട സമയം അതിക്രമിച്ചെന്ന് ഹൈക്കോടതി.
പതിനാറു വയസെത്തുമ്പോൾത്തന്നെ കുട്ടികൾ ആവശ്യത്തിനു മാനസികവളർച്ച നേടുന്നുണ്ടെന്ന ഇപ്പോഴത്തെ പ്രവണത ചൂണ്ടിക്കാട്ടിയാണ് ജസ്റ്റീസ് എ. ബദറുദ്ദീന്റെ സുപ്രധാന നിരീക്ഷണം.
23 വയസില് താഴെയുള്ളവര്ക്ക് മദ്യം വില്ക്കുന്നതും വിളമ്പുന്നതും വിലക്കുന്ന കേരള അബ്കാരി നിയമത്തിലെ 15ബി വകുപ്പ് കര്ശനമായി നടപ്പാക്കാന് നിര്ദേശിക്കണമെന്നാവശ്യപ്പെട്ടു മാധ്യമപ്രവര്ത്തകന് വിനോദ് വിക്രമന് പിള്ള നല്കിയ ഹര്ജി പരിഗണിക്കുകയായിരുന്നു കോടതി.
23 വയസില് താഴെയുള്ളവര്ക്ക് മദ്യം വില്ക്കുന്നതും വിളമ്പുന്നതും ഉപയോഗിക്കുന്നതും അബ്കാരി നിയമപ്രകാരം നിരോധിച്ചിട്ടുള്ളതാണെങ്കിലും കൃത്യമായി നടപ്പാക്കുന്നില്ലെന്നു ചൂണ്ടിക്കാട്ടിയാണ് ഹര്ജി.
ലൈസന്സുള്ള സ്ഥലങ്ങളില് പ്രായപൂര്ത്തിയാകാത്തവര്ക്കു മദ്യം ലഭ്യമാകുന്നത് തടയാത്തത് എക്സൈസ് ഉദ്യോഗസ്ഥരടക്കമുള്ളവരുടെ വീഴ്ചകൊണ്ടാണ്. ഇതു മുതലെടുത്ത് 18 വയസില് താഴെയുള്ളവര് പോലും ബാറുകളിലും മറ്റും കയറി മദ്യപിച്ചശേഷം അപകടങ്ങള് വരുത്തിവയ്ക്കുന്നതായി നെടുമ്പാശേരിയില് മൂന്നുപേരുടെ മരണത്തിനിടയാക്കിയ വാഹനാപകടത്തിന്റെ പശ്ചാത്തലത്തില് ഹര്ജിക്കാരന് ചൂണ്ടിക്കാട്ടി. നെടുമ്പാശേരിയിലെ അടക്കം അപകടത്തിനു കാരണക്കാരായ ഉദ്യോഗസ്ഥര്ക്കെതിരേ വിജിലന്സ് അന്വേഷണം നടത്തണമെന്നാണ് ഹർജിയിലെ ആവശ്യം.
23 വയസില് താഴെയുള്ളവര്ക്കു മദ്യം വില്ക്കുന്നതും വിളമ്പുന്നതും ഉപയോഗിക്കുന്നതും തടയുന്ന കേരള അബ്കാരി ആക്ടിലെ വകുപ്പുകള് കര്ശനമായി നടപ്പാക്കാന് സ്വീകരിച്ച നടപടികള് വ്യക്തമാക്കി വിശദീകരണം നല്കാന് സര്ക്കാരിനു നിര്ദേശം നല്കിയ കോടതി ഹര്ജി വീണ്ടും 24ന് പരിഗണിക്കാന് മാറ്റി.
Tags : Legal protection Criminal cases Kerala High Court Suggests considering Age Limit Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash