കൽപ്പറ്റ: സമഗ്രവും സുസ്ഥിരവുമായ വികസനം എങ്ങനെ നടപ്പിലാക്കാമെന്നതിന്‍റെ ഉത്തമ ഉദാഹരണമാണ് നൂൽപ്പുഴ കുടുംബാരോഗ്യ കേന്ദ്രമെന്ന് ആരോഗ്യം വനിതാ ശിശുവികസനം മന്ത്രി വീണാ ജോർജ്. നൂൽപ്പുഴ കുടുംബാരോഗ്യ കേന്ദ്രത്തിലെ വിവിധ പദ്ധതികളുടെ ഉദ്ഘാടനവും ’ഭൂമിക്കൊരു തണൽ’ ആശമാർക്കുള്ള കിറ്റ് വിതരണത്തിന്‍റെ ജില്ലാതല ഉദ്ഘാടനംവും നിർവഹിച്ചു പ്രസംഗിക്കുകയായിരുന്നു മന്ത്രി. ഐ.സി. ബാലകൃഷ്ണൻ എംഎൽഎ ചടങ്ങിൽ അധ്യക്ഷത വഹിച്ചു.
ആശുപത്രിയിൽ പുതുതായി പണികഴിപ്പിച്ച കൽമണ്ഡപം, ആദിവാസി ഗർഭിണികൾക്കായുള്ള പ്രസവപൂർവ പാർപ്പിടം പ്രതീക്ഷ, വനിതകൾ ക്കായുള്ള വിശ്രമകേന്ദ്രം, ഫിറ്റ്നസ് സെന്‍റർ ആൻഡ് ജിംനേഷ്യം എന്നിവയുടെ ഉദ്ഘാടനവും മന്ത്രി നിർവഹിച്ചു. കാനറ ബാങ്കിന്‍റെ സിഎസ്ആർ ഫണ്ടിൽ നിന്നുള്ള ഫിസിയോ തെറാപ്പി വിഭാഗത്തിലേക്കുള്ള ലിഫ്റ്റിന്‍റെ ശിലാസ്ഥാപനവും സുൽത്താൻ ബത്തേരി അർബൻ കോഓപ്പറേറ്റീവ് ബാങ്കിന്‍റെ സിഎസ്ആർ ഫണ്ടിൽ നിന്നുള്ള ഫുള്ളി ഓട്ടോമാറ്റിക്ക് ബയോകെമിസ്ട്രി അനലൈസറിന്‍റെ സ്വിച്ച് ഓണ്‍ കർമവും ആദിവാസി വയോജനങ്ങൾക്കായുള്ള ഇഹെൽത്ത് കാർഡിന്‍റെ വിതരണവും ഫിസിയോ തെറാപി യുണിറ്റിലേക്കുള്ള നൂതന ഉപകരണങ്ങളുടെ സമർപ്പണവും ചടങ്ങിൽ നടന്നു.
ആദിവാസി വിഭാഗങ്ങളിലെ ഗർഭിണികൾക്കായി പ്രത്യേകം തയാറാക്കിയിട്ടുള്ള ഷെൽട്ടർ ഹോം ആണ് പ്രതീക്ഷ. ഗർഭിണിക്കും കുടുംബത്തിനും ഒന്നടങ്കം താമസിക്കാനുള്ള എല്ലാ സൗകര്യങ്ങളും പ്രതീക്ഷയിൽ ഒരുക്കിയിട്ടുണ്ട്. ഫീൽഡ് തലത്തിൽ റിസ്ക് അനാലിസിസ് നടത്തി കണ്ടെത്തുന്ന ഗർഭിണികളെ പ്രതീക്ഷിത പ്രസവ തീയതിക്ക് ഒരാഴ്ച മുൻപ് പ്രതീക്ഷയിൽ എത്തിക്കും. 20 ലക്ഷം രൂപ ചെലവിലാണ് പ്രതീക്ഷ കെട്ടിടം നിർമിച്ചിരിക്കുന്നത്. ആദിവാസി ഗർഭിണികളിലെ വിളർച്ച തടയുക എന്ന ലക്ഷ്യത്തോടെ ആരംഭിച്ച തരാട്ട് പദ്ധതിയും മന്ത്രി ഉദ്ഘാടനം ചെയ്തു.
ജീവിതശൈലി രോഗങ്ങൾ കുറയ്ക്കുന്നതിനായി നൂൽപ്പുഴ ഗ്രാമപഞ്ചായത്ത് വകയിരുത്തിയ 10 ലക്ഷം രൂപ ചെലവിലാണ് ഫിറ്റ്നസ് സെന്‍റർ ആൻഡ് ജിം നിർമിച്ചിരിക്കുന്നത്. 2021 - 2022 സാന്പത്തിക വർഷത്തെ പദ്ധതിയിൽ നിന്നും അഞ്ച് ലക്ഷം രൂപ വകയിരുത്തിയാണ് വാഷ് റൂം, റിലാക്സ് ഏരിയ, മുലയൂട്ടുന്ന അമ്മമാർക്കായി ഫീഡിംഗ് റും എന്നിവ ഉൾപ്പെടെയുള്ള വനിത വിശ്രമകേന്ദ്രം നിർമിച്ചത്.
കുടുംബാരോഗ്യ കേന്ദ്രത്തിൽ എത്തുന്ന രോഗികൾക്കും കൂട്ടിരിപ്പുകാർക്കും വിശ്രമിക്കുന്നതിനായി അഞ്ച് ലക്ഷം രൂപ ചെലവഴിച്ചാണ് കൽമണ്ഡപം നിർമിച്ചിരിക്കുന്നത്. ബത്തേരി അർബൻ കോ ഓപ്പറേറ്റീവ് ബാങ്കാണ് ഫുള്ളി ബയോകെമിസ്ട്രി അനലൈസർ കുടുംബാരോഗ്യ കേന്ദ്രത്തിന് നൽകിയത്. കാനറ ബാങ്കിന്‍റെ സിഎസ്ആർ ഫണ്ടിൽ നിന്നും 13.5 ലക്ഷം രൂപ ഉപയോഗിച്ചാണ് ഫിസിയോ തെറാപ്പി യൂണിറ്റിലേക്കുള്ള ലിഫ്റ്റിന്‍റെ നിർമാണം. ഫിസിയോ തെറാപ്പി യൂണിറ്റിലേക്ക് പുതിയതായി വാങ്ങിയിട്ടുള്ള ആധുനിക ഉപകരണങ്ങളായ റോബോട്ടിക് ഹാൻഡ് മെഷിൻ മുതലായവ മന്ത്രി നാടിന് സമർപ്പിച്ചു. നൂൽപ്പുഴ ഗ്രാമ പഞ്ചായത്തിലെ 60 വയസിനു മുകളിൽ പ്രായമുള്ള ആദിവാസി വിഭാഗങ്ങളിൽ ഉൾപ്പെടുന്ന എല്ലാ വയോജനങ്ങൾക്കും പ്ലാസ്റ്റിക് പ്രിന്‍റഡ് ഇഹെൽത്ത് പെർമെനന്‍റ് കാർഡിന്‍റെ വിതരനോദ്ഘാടനവും ചടങ്ങിൽ നടന്നു.
നൂൽപ്പുഴ ഗ്രാമപഞ്ചായത്ത് പ്രസിഡന്‍റ ഷീജ സതീഷ്, വൈസ് പ്രസിഡന്‍റ് എൻ.എ. ഉസ്മാൻ, ജില്ലാ പഞ്ചായത്ത് ഡിവിഷൻ അംഗം അമൽ ജോയ്, ഗ്രാമപഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ മിനി സതീശൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ഗോപിനാഥൻ ആലത്തൂർ, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഓമന പ്രേമൻ, ബ്ലോക്ക് പഞ്ചായത്ത് അംഗങ്ങളായ പുഷ്പ അനൂപ്, എം.എ. അസൈനാർ, മണി സി. ചോയ്മൂല, ജില്ലാ മെഡിക്കൽ ഓഫീസർ ഡോ.കെ. സക്കീന, ഡിപിഎം ഡോ. സമീഹ സെയ്തവി, മെഡിക്കൽ ഓഫീസർ ഡോ.വി.പി. ഖാദർ മുഹമ്മദ്, കാനറ ബാങ്ക് റീജണൽ ഹെഡ് വി.സി. സത്യപാൽ, അർബൻ ബാങ്ക് ചെയർമാൻ സണ്ണി ജോർജ്, വിവിധ തദ്ദേശ സ്വയംഭരണസ്ഥാപന പ്രതിനിധികൾ തുടങ്ങിയവർ പങ്കെടുത്തു.