കൊല്ലം: മീറ്റർ കമ്പനിജീവനക്കാരുടെ ആവശ്യങ്ങൾ അടിയന്തിരമായി പരിഹരിയ്ക്കണമെന്ന് പി.സി. വിഷ്ണുനാഥ് എംഎൽഎ. മീറ്റേഴ്സ് എംപ്ലോയീസ് അസോസിയേഷൻ ഐഎൻറ്റിയുസി പള്ളിമുക്കിൽ മീറ്റർ കമ്പനിയ്ക്ക് മുന്നിൽ സംഘടിപ്പിച്ച പ്രതിഷേധ ധർണ ഉദ്ഘാടനം ചെയ്തു പ്രസംഗിയ്ക്കുകയായിരുന്നു അദ്ദേഹം.
കഴിഞ്ഞ ഇരുപത്തി മൂന്നു മാസമായി തൊഴിലാളികളുടെ പ്രൊവിഡന്റ് ഫണ്ട് വിഹിതം അടച്ചിട്ട്. ശമ്പളം കൃത്യമായി നൽകുന്നില്ല. ചികിത്സാ സഹായങ്ങൾ ലഭിയ്ക്കുന്നില്ല. ദീർഘ കാല കരാർ അനുസരിച്ചുള്ള വേതന വർധന നടപ്പാക്കിയിട്ടില്ല. തൊഴിലാളികൾക്ക് നിയമാനുസൃതമായി ലഭിയ്ക്കേണ്ടുന്ന ന്യായമായ ആവശ്യങ്ങൾ ഒന്നും തന്നെ ലഭിയ്ക്കുന്നില്ല.
പിഎഫ് മുടങ്ങി കിടക്കുന്നതു മൂലം ജീവനക്കാരുടെ മക്കളുടെ വിവാഹവും വിദ്യാഭ്യാസവും വായ്പ എടുക്കാൻ കഴിയാത്തതിനാൽ മുടങ്ങുകയാണ്. നാഷണൽ ഹൈവേ യുടെ സൈഡിൽ സ്ഥിതി ചെയ്യുന്ന ആറര ഏക്കറോളം ഭൂമി വൻകിട കോർപറേറ്റ്കൾക്ക് കൈമാറുവാനുള്ള ശ്രമങ്ങളാണ് നടന്നു വരുന്നത്. കമ്പനി മാനേജ് മെൻഡിന്റെ കെടുകാര്യസ്ഥതയും ധൂർത്തുമാണ് കമ്പനിയെ ഈ അവസ്ഥയിൽ എത്തിച്ചത്. ഇതിൽ പ്രതിഷേധിച്ചാണ് ധർണ സംഘടിപ്പിച്ചത്.
കെപിസിസി നിർവാഹക സമിതി അംഗവും യൂണിയൻ പ്രസിഡന്റുമായ അഡ്വ. എ. ഷാനവാസ്ഖാൻ അധ്യക്ഷതവഹിച്ചു. ഐഎൻറ്റിയുസി ജില്ലാ ട്രെഷറർ അൻസാർ അസിസ്, വടക്കേവിള ശശി, ബി. ശങ്കരനാരായണ പിള്ള, എം. നൗഷാദ്, പാലത്തറ രാജീവ്, കോതേത്തു ഭാസുരൻ, ഒ. ബി. രാജേഷ്, മണക്കാട് സലിം, പെരിനാട് മുരളി,മോഹൻലാൽ, അഡ്വ. ജി. അജിത്, വീരേന്ദ്രകുമാർ, ഷീബാ തമ്പി, അൻവർദീൻ ചാണിക്കൽ, സുരേഷ് ബാബു, എസ്. നാസറുദീൻ, നൗഷാദ് താജുദീൻ പള്ളിമുക്കു സുധീർ കൂട്ടു വിള, മുനീർ ബാനു എന്നിവർ പ്രസംഗിച്ചു.