ചിത്രത്തിന്റെ ടീസറിൽ നിന്നും
മോഹൻലാലിനെ നായകനാക്കി പ്രിയദർശൻ ഒരുക്കിയ സൂപ്പർഹിറ്റ് ചിത്രം ‘ഒപ്പ’ത്തിന്റെ ഹിന്ദി റീമേക്ക് ടീസർ എത്തി. ‘ഹായ്വാൻ’ എന്നാണ് സിനിമയ്ക്കു പേരിട്ടിരിക്കുന്നത്. സെയ്ഫ് അലി ഖാൻ ആണ് മോഹൻലാൽ അവതരിപ്പിച്ച അന്ധനായ കഥാപാത്രമായി എത്തുക. സമുദ്രക്കനി അവതരിപ്പിച്ച വില്ലൻ വേഷത്തിൽ അക്ഷയ് കുമാർ എത്തുന്നു.
ബൊമ്മൻ ഇറാനി, ശ്രീയ പിൽഗോങ്കർ, സയ്യാമി ഖേർ, രാജ്പാൽ യാദവ്, ഷരീബ് ഹാഷ്മി, രാജേഷ് ശർമ, മനോജ് ജോഷി എന്നിവരാണ് മറ്റ് അഭിനേതാക്കൾ. ഛായാഗ്രഹണം ദിവാകർ മണി, സംഗീതം പ്രീതിം. സിനിമയുടെ വിഎഫ്എക്സ് സൂപ്പർവൈസർ പ്രിയദർശന്റെ മകൻ സിദ്ധാർഥ് പ്രിയദർശനാണ്.
കൊച്ചിയിലാണ് സിനിമയുടെ ആദ്യ ഘട്ട ചിത്രീകരണം ആരംഭിച്ചത്. ഊട്ടി, മുംബൈ എന്നിവിടങ്ങളാണ് മറ്റ് ലൊക്കേഷൻസ്. മലയാളത്തിലെ കഥയുടെ അതേ പകർപ്പായല്ല, ഒപ്പം ഹിന്ദിയിലെത്തുന്നത്. കഥയിലും കഥാപാത്രങ്ങളിലും വ്യത്യാസങ്ങൾ ഉണ്ടായേക്കും.
നെടുമുടി വേണു ചെയ്ത വേഷം ചെയ്യുന്നത് ബൊമൻ ഇറാനിയാണ്. പ്രൊഡക്ഷൻ ഡിസൈൻ സാബു സിറിൽ. കെവിഎൻ പ്രൊഡക്ഷന്സ് ആണ് നിർമാണം. 17 വർഷങ്ങൾക്കു ശേഷമാണ് സെയ്ഫ് അലിഖാനും അക്ഷയ് കുമാറും ഒന്നിക്കുന്നത്. 2008ൽ റിലീസ് ചെയ്ത ‘തഷാനി’ലാണ് ഇരുവരും അവസാനമായി ഒന്നിച്ചെത്തിയത്. ചിത്രം സെപ്റ്റംബർ 11ന് റിലീസിനെത്തും.