മന്ത്രി എം. ലിജു
തിരുവനന്തപുരം: സംസ്ഥാനത്തെ ഐടി പാർക്കുകളിൽ ഒന്നിലേറെ മദ്യശാല ലൈസൻസ് അനുവദിക്കുന്നതു സംബന്ധിച്ച ചട്ടഭേദഗതിയിലെ നിലവിലെ വ്യവസ്ഥകൾ മാറ്റിവയ്ക്കാൻ നിയമസഭാ ധനകാര്യ സബ്ജക്ട് കമ്മിറ്റിയിൽ എക്സൈസ് മന്ത്രി എം. ലിജു ആവശ്യപ്പെട്ടു.
സമിതി ചെയർമാൻ കൂടിയായ മുഖ്യമന്ത്രി വി.ഡി. സതീശന്റെ അധ്യക്ഷതയിൽ ചേർന്ന സബ്ജക്ട് കമ്മിറ്റി യോഗത്തിലാണ് മന്ത്രിയുടെ നിർദേശത്തത്തുടർന്ന് മുഖ്യമന്ത്രിയും അനുകൂലിച്ചതോടെ ഐടി പാർക്കുകളിലെ മദ്യശാല ലൈസൻസ് ഭേദഗതി തത്കാലം മാറ്റിവയ്ക്കാൻ തീരുമാനിച്ചത്.
ഐടി പാർക്കുകളിൽ ഡെവലപ്പർമാർക്ക് വിദേശ മദ്യ വിപണനം നടത്താൻ അനുമതി നൽകുന്ന എഫ്എൽ- 4 സി ലൈസൻസ് അനുവദിച്ചു കഴിഞ്ഞ പിണറായി സർക്കാർ 2025 ഏപ്രിൽ 25 ന് ചട്ടം രൂപീകരിച്ചിരുന്നു. ഒരു ഡെവലപ്പർക്ക് ഒരു ലൈസൻസ് മാത്രം നൽകാനായിരുന്നു വ്യവസ്ഥ. ഡവലപ്പർ എന്ന നിർവചനത്തിൽ ടെക്നോപാർക്ക് സിഇഒ ആയിരുന്നു വന്നിരുന്നത്. എന്നാൽ, മദ്യശാല ലൈസൻസിലെ തലവേദന പേടിച്ച് ഇവർ ബാർ ലൈസൻസിന് അപേക്ഷിച്ചില്ല. ഇതിനാൽ പല ടെക്നോപാർക്കുകളിലും മദ്യവിൽപനശാല വന്നില്ല.
തുടർന്ന്, 2026 ജനുവരിയിൽ ഡെവലപ്പർ കൂടാതെ കോ ഡെവലപ്പർമാർക്കും ഡെവലപ്പർ ചുമതലപ്പെടുത്തുന്ന മൂന്നാമത് ഏതൊരാൾക്കും മദ്യശാല ലൈസൻസ് അനുവദിക്കുന്നതിനും ഒരാളുടെ പേരിൽ ഒന്നിലധികം ലൈസൻസുകൾ അനുവദിക്കുന്നതിനും വ്യവസ്ഥ ഉൾപ്പെടുത്തി പിണറായി സർക്കാർ ചട്ടം ഭേദഗതി ചെയ്യുന്നതിന് കരട് തയാറാക്കി.
ഈ ചട്ടം ധനകാര്യ സബ്ജക്റ്റ് കമ്മിറ്റിയുടെ പരിഗണനയ്ക്കു വന്നപ്പോൾ, ഡെവലപ്പർ ചുമതലപ്പെടുത്തുന്ന മൂന്നാമത് ഏതൊരാൾക്കും ലൈസൻസ് അനുവദിക്കുന്നതിനുള്ള വ്യവസ്ഥയിൽ ഉൾപ്പെടെ വ്യക്തത വരുത്തേണ്ടതിനാൽ പുതിയ മദ്യനയം വന്നതിനുശേഷം കരടുചട്ടം പരിഗണിച്ചാൽ മതിയെന്നു എക്സൈസ് മന്ത്രി എം.ലിജു പറഞ്ഞു. ഇതിനോടു മുഖ്യമന്ത്രിയും യോജിച്ചു. ഇതേതുടർന്ന ചട്ടത്തിന്റെ പരിഗണന മാറ്റിവച്ചു.
Tags : Multiple liquor outlet licenses IT parks Minister M. Liju Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash Amendment