പ്രധാനമന്ത്രി നരേന്ദ്ര മോദി
ന്യൂഡൽഹി: മൂന്നാം നരേന്ദ്രമോദി സർക്കാർ അധികാരത്തിലെത്തി രണ്ടര വർഷം പിന്നിടുന്നതിനിടെ കേന്ദ്രമന്ത്രിസഭാ പുനഃസംഘടനയെക്കുറിച്ചുള്ള ചർച്ചകൾ വീണ്ടും സജീവമാകുന്നു.
2029ലെ ലോക്സഭാ തെരഞ്ഞെടുപ്പിന് രണ്ടര വർഷം മാത്രം ശേഷിക്കെ, മികച്ച പ്രകടനം കാഴ്ചവയ്ക്കാത്തവരെയും വിവാദങ്ങളിൽപ്പെട്ടവരെയും മന്ത്രിസഭയിൽനിന്ന് ഒഴിവാക്കിയേക്കുമെന്നാണ് സൂചന. രാഷ്ട്രീയലക്ഷ്യങ്ങൾകൂടി പരിഗണിച്ച് പുതിയ കക്ഷികൾക്കു മന്ത്രിസഭയിൽ പ്രാതിനിധ്യം നൽകാനും സാധ്യതയുണ്ടെന്നാണ് അഭ്യൂഹം.
പുനഃസംഘടന ഉടനുണ്ടായേക്കുമെന്ന വാർത്തകൾക്കിടെ പ്രധാനമന്ത്രി നരേന്ദ്രമോദിയുടെ അധ്യക്ഷതയിൽ ബുധനാഴ്ച രാത്രി മന്ത്രിസഭായോഗം ചേർന്നിരുന്നു. മന്ത്രിമാരുടെ പ്രവർത്തനമികവും ഏൽപ്പിച്ച ചുമതലകളിലെ പുരോഗതിയും പ്രധാനമന്ത്രി വിലയിരുത്തിയെന്നാണു റിപ്പോർട്ട്. മന്ത്രിസഭാ പുനഃസംഘടനയുടെ മുന്നോടിയായാണു യോഗത്തെ രാഷ്ട്രീയകേന്ദ്രങ്ങൾ കാണുന്നത്.
നേരത്തേ ജൂണിൽ മന്ത്രിസഭാ അഴിച്ചുപണി ഉണ്ടായേക്കുമെന്ന് ദേശീയമാധ്യമങ്ങൾ റിപ്പോർട്ട് ചെയ്തിരുന്നെങ്കിലും നീറ്റ് ചോദ്യപേപ്പർ ചോർച്ചയെത്തുടർന്നുണ്ടായ പ്രതിഷേധങ്ങളും കേന്ദ്രമന്ത്രി ധർമേന്ദ്ര പ്രധാന്റെ രാജിയുമായി ബന്ധപ്പെട്ട സാഹചര്യങ്ങളും കാരണം നീക്കം നീണ്ടുപോകുകയായിരുന്നു.
നിയമസഭാ തെരഞ്ഞെടുപ്പ് നടക്കാനിരിക്കുന്ന നിർണായക സംസ്ഥാനങ്ങൾക്കു കൂടുതൽ പ്രാതിനിധ്യം നൽകുന്ന രീതിയിലായിരിക്കും മന്ത്രിസഭയുടെ പുനഃസംഘടനയെന്നാണ് പുറത്തുവരുന്ന സൂചനകൾ. രാജിവച്ച ധർമേന്ദ്ര പ്രധാനു പുറമെ എൽ. മുരുകൻ, ജോർജ് കുര്യൻ, രവ്നീത് സിംഗ് ബിട്ടു എന്നിവർ ഈ വർഷം മന്ത്രിസഭയിൽനിന്ന് പുറത്തുപോയിരുന്നു. ഒഴിവുകൾ നികത്തുന്നതിനൊപ്പം കൂടുതൽ പേരെ ഉൾപ്പെടുത്താനും ചില സുപ്രധാന വകുപ്പുകൾ പരസ്പരം മാറ്റിനൽകാനും ധാരണയുണ്ടായേക്കും.
അതിനിടെ, ഇന്ത്യാ സഖ്യത്തിൽനിന്ന് പുറത്തുപോയ ഡിഎംകെ കേന്ദ്രമന്ത്രിസഭയിൽ ഇടംപിടിച്ചേക്കുമെന്ന അഭ്യൂഹവും ശക്തമാണ്. എന്നാൽ തമിഴ്നാട്ടിൽ ബിജെപിയുടെ സഖ്യകക്ഷിയായ എഐഎഡിഎംകെയെ പിണക്കിക്കൊണ്ട് ഡിഎംകെയുമായി സഹകരിക്കാൻ ബിജെപി തയാറാകാനിടയില്ലെന്നാണു വിലയിരുത്തൽ. അതിനാൽ ഡിഎംകെയുടെ മന്ത്രിസഭാപ്രവേശനം സംബന്ധിച്ച അഭ്യൂഹങ്ങൾക്ക് രാഷ്ട്രീയമായ വെല്ലുവിളികളുമുണ്ട്.
Tags : Union Cabinet Reshuffle Narendra Modi Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash