ചൈനയിലെ ഷെൻജെനിൽ ഏഷ്യ-പസഫിക് സാമ്പത്തിക സഹകരണ ഉച്ചകോടിയിൽ വിരുന്നിനു മുന്നോടിയായി സംഗീതജ്ഞരുടെ പ്രകടനം ആസ്വദിക്കുന
ഷെൻജെൻ: ആഗോള സമാധാനവും സുരക്ഷയും ഉറപ്പാക്കുന്നതിനും അന്താരാഷ്ട്ര സഹകരണം ശക്തിപ്പെടുത്തുന്നതിനും നിർണായക തീരുമാനങ്ങളുമായി അമേരിക്ക-ചൈന-റഷ്യ വൻശക്തികളുടെ ത്രിരാഷ്ട്ര ഉച്ചകോടിക്കു സമാപനം.
യുഎസ് പ്രസിഡന്റ് ഡോണൾഡ് ട്രംപ്, ചൈനീസ് പ്രസിഡന്റ് ഷി ജിൻപിംഗ്, റഷ്യൻ പ്രസിഡന്റ് വ്ലാഡിമിർ പുടിൻ എന്നിവർ പങ്കെടുത്ത ഉച്ചകോടിയിൽ ഐക്യരാഷ്ട്രസഭയുടെ പരിഷ്കരണം, ആഗോള ഊർജലഭ്യത വർധിപ്പിക്കൽ, ആണവായുധ ഭീഷണി കുറയ്ക്കൽ തുടങ്ങിയ വിഷയങ്ങളിൽ ധാരണയായി. “സമാധാനത്തിലേക്കുള്ള പ്രഖ്യാപനം” എന്നപേരിൽ പുറത്തിറക്കിയ സംയുക്ത പ്രസ്താവനയിലാണു തീരുമാനങ്ങൾ വ്യക്തമാക്കിയത്.
യുഎൻ രക്ഷാസമിതിയിലെ സ്ഥിരാംഗങ്ങളെന്ന നിലയിൽ ആഗോള വെല്ലുവിളികൾ ഫലപ്രദമായി നേരിടാൻ ഐക്യരാഷ്ട്രസഭയെ പ്രാപ്തമാക്കുന്ന പരിഷ്കാരങ്ങൾക്ക് മൂന്നു രാജ്യങ്ങളും പിന്തുണ പ്രഖ്യാപിച്ചു. ആഗോള ഊർജ പ്രതിസന്ധി പരിഹരിക്കുന്നതിന്റെ ഭാഗമായി, ശുദ്ധീകരിച്ച പെട്രോളിയം ഉത്പന്നങ്ങളുടെ ഉത്പാദനവും വിതരണവും വർധിപ്പിക്കാനും ധാരണയായി. സുസ്ഥിരമായ ഊർജ വിതരണത്തിന്റെ പ്രാധാന്യവും നേതാക്കൾ ചൂണ്ടിക്കാട്ടി.
ആണവയുദ്ധത്തിൽ ആർക്കും വിജയിക്കാനാകില്ലെന്നും അത്തരമൊരു സാഹചര്യം ഒരിക്കലും ഉണ്ടാകരുതെന്നും മൂന്നു രാഷ്ട്രനേതാക്കളും ആവർത്തിച്ചു. ആണവ അപകടസാധ്യത കുറയ്ക്കുന്നതിനും ആയുധവ്യാപനം തടയുന്നതിനും സംയുക്ത ചർച്ചകൾ നടത്താനും തീരുമാനിച്ചു.
അന്താരാഷ്ട്ര ക്രിമിനൽ കോടതി (ഐസിസി) ഉൾപ്പടെയുള്ള അന്താരാഷ്ട്ര സ്ഥാപനങ്ങൾ അധികാരപരിധി ദുരുപയോഗം ചെയ്യരുതെന്നും രാജ്യങ്ങളുടെ പരമാധികാരവും ഉന്നത ഉദ്യോഗസ്ഥർക്കുള്ള നിയമപരമായ പരിരക്ഷയും മാനിക്കണമെന്നും സംയുക്ത പ്രഖ്യാപനത്തിൽ ആവശ്യപ്പെട്ടു.
അമേരിക്കയുടെ പ്രധാന എതിരാളികളായ ചൈനയുടെയും റഷ്യയുടെയും പ്രസിഡന്റുമാരുമായി ട്രംപ് നടത്തുന്ന ആദ്യ ത്രിരാഷ്ട്ര കൂടിക്കാഴ്ചയെന്ന പ്രത്യേകതയും ഇതിനുണ്ട്.
ആണവായുധരഹിത നിലപാടിൽ ഒറ്റക്കെട്ട്
ആണവയുദ്ധത്തിൽ വിജയിക്കാനാകില്ലെന്നും ഒരിക്കലും പോരാടരുതെന്നുമുള്ള വരികൾ സംയുക്ത പ്രഖ്യാപനത്തിൽ ഉൾപ്പെടുത്തിയത് ആഗോള സമാധാനത്തിലേക്കുള്ള ശുഭസൂചനയാണ്. ആണവായുധങ്ങളുടെ എണ്ണം കുറയ്ക്കുന്നതിനും അവയുടെ ഉപയോഗസാധ്യത ഇല്ലാതാക്കുന്നതിനും മൂന്നു രാജ്യങ്ങൾക്കും സവിശേഷമായ ഉത്തരവാദിത്വമുണ്ടെന്ന് ട്രംപ് പറഞ്ഞു.
ആണവായുധങ്ങൾ പൂർണമായി നിരോധിക്കുകയും നശിപ്പിക്കുകയും ചെയ്യേണ്ടതിന്റെ ആവശ്യകത ഷി ജിൻപിംഗ് ഉന്നയിച്ചു. രണ്ടാം ലോകമഹായുദ്ധത്തിലെ വിജയികളെന്ന പൊതുചരിത്രം അനുസ്മരിച്ച പുടിൻ, അന്താരാഷ്ട്ര സമാധാനം നിലനിർത്തുന്നതിൽ മൂന്നു രാജ്യങ്ങൾക്കും സംയുക്ത ഉത്തരവാദിത്വമുണ്ടെന്നും ചൂണ്ടിക്കാ ട്ടി. ചൈനയുടെ ഔദ്യോഗിക വാർത്താ ഏജൻസിയായ സിൻഹുവയും റഷ്യൻ പ്രസിഡന്റിന്റെ ഓഫിസായ ക്രെംലിനുമാണ് കൂടിക്കാഴ്ചയുടെ വിവരങ്ങൾ പുറത്തുവിട്ടത്.
Tags : Conclusion Historic Trilateral Summit US China Russia Donald Trump Xi Jinping Vladimir Putin Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash International News