സംഗീതും ഭാര്യയും, കുഞ്ഞിന്റെ ചിത്രം
ആദ്യത്തെ കൺമണിക്ക് പേരിട്ട് നടൻ സംഗീത് പ്രതാപും ഭാര്യയും. താര റെയ്ൻ സംഗീത് എന്നാണ് കുഞ്ഞിന് പേരിട്ടിരിക്കുന്നത്. ന്യൂബോൺ ബേബി ഫോട്ടോ ഷൂട്ടിൽ നിന്നുള്ള ചിത്രങ്ങളും താരം പങ്കുവച്ചിട്ടുണ്ട്.
‘‘വിണ്ണിലെ നക്ഷത്രങ്ങളിൽ കുറിക്കപ്പെട്ട്, ഒരു കുളിർമഴ പോലെ ഞങ്ങളിലേക്ക് പെയ്തിറങ്ങിയവളാണ് നീ... പൊടീ, നീ ഞങ്ങളുടെ കൊച്ചുനക്ഷത്രമാണ്, ഞങ്ങളുടെ കുഞ്ഞുറാണിയാണ്; ഞങ്ങളുടെ ജീവിതത്തിൽ ഇന്നോളം സംഭവിച്ചതിൽ വച്ച് ഏറ്റവും മനോഹരമായ പുണ്യമാണ് നീ.’’കുഞ്ഞിന്റെ ചിത്രങ്ങൾ പങ്കുവച്ച് സംഗീതും ആൻസിയും കുറിച്ചു.
ഈ മാസം ആദ്യമാണ് ഇരുവർക്കും പെൺകുഞ്ഞ് ജനിച്ചത്. സംഗീത് പ്രതാപ് നായകനായി എത്തുന്ന പുതിയ ചിത്രമാണ് 'ഹലോ ഡിയർ'. മമിത ബൈജുവാണ് ചിത്രത്തിലെ നായിക. ഡിനോയ് പൗലോസ് തിരക്കഥയെഴുതി സംവിധാനം ചെയ്യുന്ന റൊമാന്റിക് കോമഡി ചിത്രമാണിത്.
ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാനാണ് നിർമാണം. സുരേഷ് കൃഷ്ണയും ചിത്രത്തിൽ പ്രധാന വേഷത്തിലെത്തുന്നുണ്ട്.
Tags : Sangeeth Prathap Daughter Newborn Name Reveal Sangeeth