Deepika
ADVERTISEMENT
Business
മുംബൈ: ഇന്ത്യൻ ഓഹരി വിപണി ഇന്നലെ വൻ തിരിച്ചുവരവ് നടത്തി. ക്രൂഡ് ഓയിൽ വിലയിലുണ്ടായ കുറവ്, ഐടി ഓഹരികളിലുണ്ടായ ഉയർന്ന വാങ്ങൽ തുടങ്ങി വിവിധ ഘടകങ്ങൾ സെൻസെക്സിലും നിഫ്റ്റിയിലും ശക്തമായ മുന്നേറ്റത്തിന് വഴിയൊരുക്കുകയും എട്ട് ആഴ്ച നീണ്ടുനിന്ന നഷ്ടത്തിന്‍റെ പരന്പരയ്ക്ക് വിരാമമിടുകയും ചെയ്തു. വ്യാഴാഴ്ചയിലെ വ്യാപാര ദിനത്തിലെ കനത്ത തകർച്ചയ്ക്ക് ശേഷമാണ് വിപണിയുടെ ഈ തിരിച്ചുവരവ്.
സെൻസെക്സ് 850 പോയിന്റിലധികം ഉയർന്ന് 72,472ലും നിഫ്റ്റി 50 സൂചിക 280 പോയിന്റിലധികം നേട്ടമുണ്ടാക്കി 22,520ലും വ്യാപാരം അവസാനിപ്പിച്ചു. ഈ ശക്തമായ നേട്ടം ബിഎസ്ഇയിൽ ലിസ്റ്റ് ചെയ്തിട്ടുള്ള എല്ലാ കന്പനികളുടെയും ആകെ വിപണി മൂല്യത്തിൽ 4 ലക്ഷം കോടിയിലധികം രൂപയുടെ വർധനയുണ്ടാക്കി. ഇത് ആകെ മൂല്യം 465 ലക്ഷം കോടി രൂപയായി ഉയർത്തി.
മേഖലകൾ പരിശോധിച്ചാൽ, നിഫ്റ്റി ഐടി മൂന്നു ശതമാനം ഉയർന്ന് നേട്ടത്തിന് നേതൃത്വം നൽകിയപ്പോൾ നിഫ്റ്റി എഫ്എംസിജി, നിഫ്റ്റി പിഎസ്‌യു ബാങ്ക്, നിഫ്റ്റി പ്രൈവറ്റ് ബാങ്ക്, നിഫ്റ്റി റിയൽറ്റി, നിഫ്റ്റി ഫിനാൻഷ്യൽ സർവീസസ് തുടങ്ങി മറ്റ് പല മേഖലകളും നേട്ടമുണ്ടാക്കി. നിഫ്റ്റി ഓയിൽ ആൻഡ് ഗ്യാസ് മാത്രമാണ് നഷ്ടത്തിലായ ഏക മേഖല. വിപണിയിലെ അനിശ്ചിതത്വം അളക്കുന്ന ’ഇന്ത്യ വിക്സ്’ ആറു ശതമാനം കുറഞ്ഞു.
വിപണിയുടെ തിരിച്ചുവരവിനു കാരണങ്ങൾ
1) മിഡ്ടേം തെരഞ്ഞെടുപ്പ് വരെ ഇറാനെതിരെ ആക്രമണമില്ലെന്ന് ട്രംപ്
നവംബറിൽ നടക്കുന്ന കോണ്ഗ്രസ് മിഡ്ടേം തെരഞ്ഞെടുപ്പിന് മുന്പ് യുഎസ് ഇറാനെ ആക്രമിക്കില്ലെന്ന് വ്യാഴാഴ്ച യുഎസ് പ്രസിഡന്റ് ഡോണാൾഡ് ട്രംപ് പറഞ്ഞു. സംഘർഷം അവസാനിപ്പിക്കുന്നതിനായി ഇരുരാജ്യങ്ങളും തമ്മിൽ ഫലപ്രദമായ ചർച്ചകൾ നടക്കുന്നുണ്ടെന്നും അദ്ദേഹം കൂട്ടിച്ചേർത്തു.
2) ഐടി ഓഹരികളിൽ ശക്തമായ വാങ്ങൽ
ഐടി ഓഹരികളിലുണ്ടായ കനത്ത കുതിപ്പ് സെൻസെക്സിനെയും നിഫ്റ്റിയെയും ഉയരങ്ങളിലേക്ക് നയിച്ചു. ടാറ്റ കണ്‍സൾട്ടൻസി സർവീസസ് രണ്ടാം പാദത്തിൽ അവരുടെ ഏകീകൃത അറ്റാദായത്തിൽ 15 ശതമാനം വാർഷിക വളർച്ചയോടെ 13,884 കോടി രൂപ നേടിയെന്ന് റിപ്പോർട്ട് ചെയ്തുകൊണ്ട് ഐടി പ്രവർത്തനഫല പ്രഖ്യാപനങ്ങൾക്ക് തുടക്കമിട്ടു.
3) എണ്ണവില കുറഞ്ഞു
ട്രംപിന്റെ പ്രഖ്യാപനത്തെ തുടർന്ന് ബ്രെന്‍റ് ക്രൂഡ് ഫ്യൂച്ചേഴ്സ് ബാരലിന് 103 ഡോളറിന് താഴെയാവുകയും ഡബ്ല്യുടിഐ ക്രൂഡ് ഫ്യൂച്ചേഴ്സ് ബാരലിന് 90 ഡോളറിനടുത്ത് വ്യാപാരം നടത്തുകയും ചെയ്തു.
4) രൂപയുടെ മൂല്യം വർധിച്ചു
യുഎസ് ഡോളർ ദുർബലമായതും റിസർവ് ബാങ്ക് നടത്തിയ ഇടപെടലുകളും കാരണം ഇന്നലെ രൂപയുടെ മൂല്യം ഉയർന്നു. വ്യാപാരം പൂർത്തിയായപ്പോൾ രൂപയുടെ മൂല്യം 16 പൈസ ഉയർന്ന് 96.72 എന്ന നിലയിലെത്തി.
5) ബോണ്ട് യീൽഡുകൾ ശാന്തമാകുന്നു
ആഗോള ബോണ്ട് വിറ്റഴിക്കൽ അല്പം കുറഞ്ഞതോടെ ബോണ്ട് യീൽഡുകൾ വർഷങ്ങളിലെ ഉയർന്ന നിരക്കിൽ നിന്ന് താഴേക്ക് പോയി. യുഎസ് 30 വർഷ ബോണ്ട് യീൽഡ് 5.6 ശതമാനത്തിന് താഴെയെത്തി. ബെഞ്ച്മാർക്ക് 10 വർഷ നോട്ടുകളുടെ യീൽഡ് 5.2 ശതമാനമായും രണ്ട് വർഷത്തെ നോട്ടുകളുടേത് 4.75 ശതമാനമായും കുറഞ്ഞു.
6) സാങ്കേതിക തിരിച്ചു വരവ്
വ്യാഴാഴ്ച നിഫ്റ്റി പ്രധാന സാങ്കേതിക ലെവലുകൾ തകർത്ത് പുതിയ 52 ആഴ്ചയിലെ താഴ്ന്ന നിലവാരത്തിലെത്തിയത് ഒരു ടെക്നിക്കൽ റീബൗണ്ടിന് കളമൊരുക്കി.
International
വാഷിംഗ്ടൺ ഡിസി: ആറര പതിറ്റാണ്ടിനു ശേഷം അമേരിക്കൻ സൈന്യത്തിൽ വധശിക്ഷ നടപ്പാക്കുന്നു. ആർമി മേജർ നിദാൽ മാലിക് ഹസന്‍റെ വധശിക്ഷയ്ക്ക് അമേരിക്കൻ പ്രസിഡന്റ് ഡോണൾഡ് ട്രംപ് അംഗീകാരം നൽകി.
വെടിവച്ചാണു വധശിക്ഷ നടപ്പാക്കുക. 2009ലെ ഫോർട്ട് ഹുഡ് കൂട്ട വെടിവയ്പിന്‍റെ പേരിലാണ് നിദാൽ മാലിക്കിനു വധശിക്ഷ വിധിച്ചത്. 1961നുശേഷം യുഎസ് സൈന്യം വധശിക്ഷ നടപ്പാക്കിയിട്ടില്ല.
വധശിക്ഷ നടപ്പാക്കേണ്ട സമയവും സ്ഥലവും ആർമി സെക്രട്ടറി തീരുമാനിക്കുമെന്ന് പെന്‍റഗൺ വക്താവ് ഷോൺ പാർനെൽ അറിയിച്ചു.
2009 നവംബർ അഞ്ചിന് ടെക്സസിലെ ഫോർട്ട് ഹുഡിൽ നിദാൽ മാലിക് ഹസൻ നടത്തിയ വെടിവയ്പിൽ 13 പേർ കൊല്ലപ്പെടുകയും മുപ്പതിലധികം പേർക്ക് പരിക്കേൽക്കുകയും ചെയ്തിരുന്നു.
കേസിൽ ഹസൻ കുറ്റക്കാരനാണെന്നു സൈനിക കോടതി കണ്ടെത്തി. 2013ൽ അദ്ദേഹത്തിനു വധശിക്ഷ വിധിച്ചു.
International
ന്യൂഡൽഹി: ഗുരുതരമായി പരിക്കേറ്റിട്ടും സമയോചിതമായി പ്രവർത്തിച്ച് കോക്ക്പിറ്റിന്‍റെ വാതിൽ തുറന്നുകൊടുക്കുകയും യാത്രക്കാരുടെയും മറ്റു ജീവനക്കാരുടെയും സഹായത്തോടെ അക്രമിയെ കീഴടക്കാൻ സഹായിക്കുകയും ചെയ്ത സ്മിതിനെ പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡോണൾഡ് ട്രംപും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും അഭിനന്ദിച്ചു.
"ക്യാപ്റ്റൻ സ്മിത് മച്ചാർ ഒരു യഥാർഥ ഹീറോയാണ്. ജീവൻ അപകടത്തിലായ അവസ്ഥയിലും അദ്ദേഹം കാണിച്ച അസാമാന്യ ധൈര്യവും നിശ്ചയദാർഢ്യവുമാണ് നൂറുകണക്കിനു മനുഷ്യജീവനുകൾ രക്ഷിച്ചത്,"-മോദി എക്സിൽ കുറിച്ചു. പ്രധാനമന്ത്രി സ്മിതിന്‍റെ കുടുംബവുമായി ഫോണിൽ സംസാരിക്കുകയും ആവശ്യമായ എല്ലാ പിന്തുണയും ഉറപ്പുനൽകുകയും ചെയ്തു.
ഗുരുതരമായി പരിക്കേറ്റിട്ടും അസാമാന്യ ധൈര്യവും ആത്മവീര്യവും പ്രകടിപ്പിച്ച ക്യാപ്റ്റൻ സ്മിത് മച്ചാർ ഒരു യഥാർഥ ഹീറോയാണെന്ന് നെതന്യാഹുവും വിശേഷിപ്പിച്ചു. അക്രമിയായ സഹപൈലറ്റിന്‍റെ കുത്തേറ്റ് രക്തത്തിൽ കുളിച്ച നിലയിലും തന്‍റെ അവസാന ഊർജവും സംഭരിച്ച് സ്മിത് കോക്ക്പിറ്റിന്‍റെ സ്റ്റീൽ വാതിൽ തുറന്നുകൊടുത്തതാണ് വലിയൊരു ദുരന്തം ഒഴിവാക്കിയത്. ഇത് മറ്റൊരു 'സെപ്റ്റംബർ 11' മോഡൽ വിമാന ദുരന്തമാകുന്നത് തടഞ്ഞതായി നെതന്യാഹു വ്യക്തമാക്കി.
കുത്തേറ്റു ഗുരുതരമായി പരിക്കേറ്റ അവസ്ഥയിലും സമയോചിതമായി ഇടപെട്ടു വലിയൊരു ദുരന്തം ഒഴിവാക്കിയ ക്യാപ്റ്റൻ സ്മിത് മച്ചാറിനെ യുഎസ് പ്രസിഡന്റ് ഡോണൾഡ് ട്രംപും അഭിനന്ദിച്ചു. "പുറത്തുനിന്ന് ആർക്കും എളുപ്പത്തിൽ തുറക്കാൻ കഴിയാത്ത കട്ടിയുള്ള സ്റ്റീൽ വാതിലുകളാണ് കോക്ക്പിറ്റിലുള്ളത്. രക്തത്തിൽ കുളിച്ചുകിടക്കുമ്പോഴും പൈലറ്റ് ആ വാതിൽ തുറന്നുകൊടുത്തതാണ് രക്ഷാപ്രവർത്തനത്തിൽ വഴിത്തിരിവായത്'-ട്രംപ് പറഞ്ഞു.
International
വാഷിംഗ്ടൺ ഡിസി: യുദ്ധം അവസാനിപ്പിക്കാൻ ഇറാന് ഇളവുകൾ വാഗ്ദാനം ചെയ്തുവെന്ന വാർത്തകൾ അമേരിക്കൻ പ്രസിഡന്‍റ ്ട്രംപ് നിഷേധിച്ചു. ഇറാന് ഒരു വാഗ്ദാനവും നല്കിയിട്ടില്ലെന്ന് അദ്ദേഹം പറഞ്ഞു.
ആണവപദ്ധതികൾ അവസാനിപ്പിക്കാൻ തയാറായാൽ ഉപരോധങ്ങൾ ഇളയ്ക്കാമെന്നും മരവിപ്പിച്ച ആസ്തികൾ വിട്ടുകൊടുക്കാമെന്നും ട്രംപ് ഭരണകൂടം ഇറാനെ അറിയിച്ചുവെന്നായിരുന്നു റിപ്പോർട്ടുകൾ.
ഇറാൻ-അമേരിക്ക യുദ്ധം അവസാനിപ്പിക്കാൻ മധ്യസ്ഥശ്രമങ്ങൾ പുനരാരംഭിച്ചിരിക്കേയാണ് ഈ വാർത്ത പുറത്തുവന്നത്. ന‍യതന്ത്രമാർഗത്തിലൂടെയേ സംഘർഷം അവസാനിക്കൂവെന്ന് ഇറാൻ ഞായറാഴ്ച പറയുകയുണ്ടായി.
ഏഴു ദിവസത്തിനുള്ളിൽ യുദ്ധം അവസാനിപ്പിക്കാനും ഹോർമുസ് കടലിടുക്ക് തുറക്കാനുമുള്ള പദ്ധതി ഇറാൻ ന്യൂയോർക്കിലെ യുഎൻ സമ്മേളനത്തിനിടെ മധ്യസ്ഥർവഴി അമേരിക്കയ്ക്കു കൈമാറിയിരുന്നു. പദ്ധതി തള്ളിയെന്ന് ട്രംപ് പിന്നിാലെ അറിയിക്കുകയുണ്ടായി.
International
വാഷിംഗ്ടൺ ഡിസി: മുഖ്യശത്രുവായ ചൈനയ്ക്ക് ആയുധം വിൽക്കാൻ അമേരിക്ക തയാറാണെന്ന് പ്രസിഡന്റ് ട്രംപ്. കഴിഞ്ഞയാഴ്ച വൈറ്റ് ഹൗസ് സന്ദർശിച്ച ചൈനീസ് പ്രസിഡന്റ് ഷി ചിൻപിംഗിനോടാണ് ട്രംപ് ഇക്കാര്യം പറഞ്ഞത്.
ചൈനയിലെ യുഎസ് അംബാസഡർ ഡേവിഡ് പെർഡ്യു ഒരഭിമുഖത്തിൽ ഇക്കാര്യം വെളിപ്പെടുത്തുകയായിരുന്നു. തായ്‌വാനെക്കുറിച്ചുള്ള സംസാരത്തിനിടെയാണ് ചൈനയ്ക്കും ആയുധം നല്കാൻ തയാറാണെന്ന് ട്രംപ് പറഞ്ഞത്.
അമേരിക്ക ലോകത്തെല്ലായിടത്തും ആയുധം വിൽക്കുന്നുണ്ടെന്നും ഏതെങ്കിലുമൊരു ഘട്ടത്തിൽ അമേരിക്കൻ ആയുധം വാങ്ങാൻ ചൈനയ്ക്കു താത്പര്യമുണ്ടോയെന്നും ഷിയോട് ട്രംപ് ചോദിച്ചുവെന്നാണ് അംബാസഡർ പെർഡ്യൂ പറഞ്ഞത്. തായ്‌വാൻ വിഷയത്തിൽ അമേരിക്കൻ നിലപാടിൽ മാറ്റമില്ലെന്നും പെർഡ്യൂ കൂട്ടിച്ചേർത്തു.
ജനാധിപത്യഭരണകൂടം നിലവിലുള്ള തായ്‌വാനെ വിഘടിത പ്രവിശ്യയായിട്ടാണ് ചൈന പരിഗണിക്കുന്നത്. ബലം പ്രയോഗിച്ചും തായ്‌വാനെ പിടിച്ചെടുക്കുമെന്നുള്ളത് ചൈനയുടെ ഔദ്യോഗിക നയമാണ്. അതേസമയം തായ്‌വാന്‍റെ സംരക്ഷണത്തിന് ആയുധം നല്കാൻ നിർദേശിക്കുന്ന നിയമം അമേരിക്കൻ പാർലമെന്‍റ് പാസാക്കിയിട്ടുണ്ട്. പ്രസിഡന്റ് ട്രംപിന്റെ കാലത്താണ് അമേരിക്ക തായ്വാന് ഏറ്റവും കൂടുതൽ ആയുധം വിറ്റിട്ടുള്ളത്.
അമേരിക്കയുമായുള്ള ബന്ധത്തിലെ ഏറ്റവും വലിയ കല്ലുകടി തായ്‌വാനാണെന്ന് ചൈന കരുതുന്നു. തായ്‌വാൻ വിഷത്തിൽ ഇടപെടുന്പോൾ ജാഗ്രത കാട്ടണമെന്ന് ഷി വൈറ്റ്ഹൗസ് സന്ദർശനത്തിനിടെ ട്രംപിനോട് പറഞ്ഞുവെന്നാണ് റിപ്പോർട്ട്.
International
കാരക്കാസ്: വെനസ്വേലൻ ഭരണകൂടം 39 രാഷ്‌ട്രീയത്തടവുകാരെ കൂടി മോചിപ്പിച്ചു. വെനസ്വേലയിലെ ഇടക്കാല പ്രസിഡന്റ് ഡെൽസി റോദ്രിഗസ് അമേരിക്കൻ പ്രസിഡന്‍റ ്ട്രംപുമായി കൂടിക്കാഴ്ച നടത്തിയതിനു പിന്നാലെയാണിത്.
മുൻ പ്രസിഡന്റ് നിക്കോളാസ് മഡുറോയെ വധിക്കാൻ ശ്രമിച്ചെന്ന ആരോപണത്തിൽ 2018ൽ ശിക്ഷിക്കപ്പെട്ട വിൽഡർ വെലാസ്ക്വയും മോചിതനായി.
മഡുറോയെ അമേരിക്കൻ സേന തട്ടിക്കൊണ്ടുപോയശേഷം ആയിരത്തിലധികം രാഷ്‌ട്രീയത്തേടവുകാരാണ് വെനസ്വേലയിൽ മോചിതരായിട്ടുള്ളത്. ഓഗസ്റ്റിൽ 130 പേരെ മോചിപ്പിച്ചിരുന്നു. ഇനിയും നൂറുകണക്കിന് രാഷ്‌ട്രീയത്തടവുകാർ ജയിലുകളിലുണ്ടെന്നാണ് റിപ്പോർട്ട്.
മഡുറോയ്ക്കുശേഷം ഇടക്കാല പ്രസിഡന്‍റായ ഡെൽഹി റോദ്രിഗസ് ന്യൂയോർക്കിലെ യുഎൻ സമ്മേളനത്തിനിടെയാണ് ട്രംപിനെ കണ്ടത്. വെനസ്വേലയിൽ പൊതുതെരഞ്ഞെടുപ്പ് നടത്തുമെന്ന് യുഎൻ പ്രസംഗത്തിൽ വാഗ്ദാനം ചെയ്തു. എന്നാൽ കൃത്യമായ തീയതി പ്രഖ്യാപിച്ചില്ല.
International
വാഷിംഗ്ടൺ ഡിസി: അമേരിക്കയിലെ സിഎൻഎൻ വാർത്താ ചാനലിന് പ്രസിഡന്‍റ ്ട്രംപിന്‍റെ വിമാനത്തിൽ വിലക്ക്. പ്രസിഡന്‍റിന്‍റെ ഔദ്യോഗിക വസതിയായ വൈറ്റ്ഹൗസിൽ ഏർപ്പെടുത്തിയ വിലക്ക് കോടതി റദ്ദാക്കിയതിനു പിന്നാലെയാണ് ഔദ്യോഗിക വിമാനമായ എയർഫോഴ്സ് വണ്ണിലും സിഎൻഎൻ സമാന നടപടി നേരിട്ടത്.
ടെന്നസിയിലെ ഒരു പരിപാടിക്ക് ട്രംപിനൊപ്പം വിമാനത്തിൽ യാത്ര ചെയ്യാനുള്ള മാധ്യമസംഘത്തിൽ സിഎൻഎന്നിനെ നേരത്തേ ഉൾപ്പെടുത്തിയിരുന്നതാണ്. എന്നാൽ, വെള്ളിയാഴ്ച രാത്രി വൈറ്റ്ഹൗസ് ഇറക്കിയ പട്ടികയിൽ സിഎൻഎൻ ഉണ്ടായിരുന്നില്ല.
കഴിഞ്ഞയാഴ്ച സിഎൻഎൻ, പൊളിറ്റിക്കോ, എംഎസ് നൗ എന്നീ മാധ്യമസ്ഥാപനങ്ങളെ വൈറ്റ്ഹൗസ് വാർത്തകൾ റിപ്പോർട്ട് ചെയ്യുന്നതിൽനിന്ന് ട്രംപ് വിലക്കിയിരുന്നു. വ്യാജ വാർത്തകൾ നല്കുന്നു എന്നാരോപിച്ചായിരുന്നിത്.
മാധ്യമങ്ങളുടെ ഹർജിയിൽ വിലക്ക് പിൻവലിക്കാൻ കോടതി ഇടക്കാല ഉത്തരവിറക്കി. എന്നാൽ ചൈനീസ് പ്രസിഡന്റ് ഷി ചിൻപിംഗിന് വ്യാഴാഴ്ച രാത്രി വൈറ്റ്ഹൗസിൽ നല്കിയ വിരുന്നിൽ മൂന്നു സ്ഥാപനങ്ങളിലെയും മാധ്യമപ്രവർത്തകർക്ക് പ്രവേശനം ലഭിച്ചില്ല. വെള്ളിയാഴ്ചയാണ് കോടതി ഉത്തരവു പ്രകാരം ഇവർക്ക് വൈറ്റ്ഹൗസിൽ പ്രവേശനം ലഭിച്ചത്.
വിലക്കുനേരിട്ടവരോട് ഐക്യദാർഢ്യം പ്രഖ്യാപിച്ച് പ്രമുഖ മാധ്യമസ്ഥാപനങ്ങൾ വൈറ്റ്ഹൗസ് റിപ്പോർട്ടിംഗ് നിർത്തിയിരുന്നു. ഇതേത്തുടർന്ന് ‘ട്രംപ് ടിവി’ എന്ന പേരിൽ വൈറ്റ്ഹൗസിന്‍റെ സ്ട്രീമിംഗ് ചാനൽ പുറത്തിറക്കിയിരുന്നു.
International
വാഷിംഗ്ടൺ ഡിസി: അമേരിക്കൻ പ്രസിഡന്റ് ട്രംപും ചൈനീസ് പ്രസിഡന്റ് ഷി ചിൻപിംഗും നടത്തിയ കൂടിക്കാഴ്ചയിൽ ഊഷ്മളത നിറഞ്ഞുനിന്നെങ്കിലും തകർക്കവിഷയങ്ങളിൽ കാര്യമായ പുരോഗതി ഉണ്ടായില്ലെന്ന് റിപ്പോർട്ട്.
വ്യാഴാഴ്ച വൈറ്റ് ഹൗസിലെ ഓവൽ ഓഫീസിൽ നടന്ന കൂടിക്കാഴ്ച മൂന്നു മണിക്കൂർ നീണ്ടു. വ്യാപാരം, പരസ്പരം ചുമത്തിയിള്ള ഇറക്കുമതി ചുങ്കങ്ങൾ, നിർമിത ബുദ്ധി തുടങ്ങിയവ ചർച്ചാവിഷയങ്ങളായി.
ചൈന-അമേരിക്ക വ്യാപാരംയുദ്ധം അവസാനിപ്പിക്കാനായി കഴിഞ്ഞ വർഷം ഉണ്ടാക്കിയ താത്കാലിക ഉടന്പടി രണ്ടു മാസത്തേക്കു കൂടി നീട്ടാൻ ധാരണയായി. വരുന്ന നവംബറിൽ അവസാനിക്കേണ്ടിയിരുന്ന ഉടന്പടി 2027 ജനവരി വരെ നീളും. തർക്കവിഷയങ്ങളിൽ കൂടുതൽ ചർച്ചയ്ക്ക് സമയം കണ്ടെത്താൻ വേണ്ടിയാണിത്. ഇതിനു പുറമേ 3000 കോടി ഡോളർ മൂല്യം വരുന്ന ഉത്പന്നങ്ങളുടെ ഇറക്കുമതി ചുങ്കങ്ങൾ കുറയ്ക്കാനും ഇരു പക്ഷവും സമ്മതിച്ചു.
അതേസമയം, അമേരിക്കൻ നിർമിത ഇലക്‌ട്രോണിക് ചിപ്പുകൾ ചൈനയ്ക്കു നല്കുന്നതിലുള്ള നിയന്ത്രണം, അപൂർവ ധാതുക്കളുടെ കയറ്റുമതി, തന്ത്രപ്രധാന ഉത്പന്നങ്ങൾക്കുമേലുള്ള ഇറക്കുമതി ചുങ്കം തുടങ്ങിയവയുമായി ബന്ധപ്പെട്ട പ്രധാന പ്രശ്നങ്ങൾക്കൊന്നും പരിഹാരമുണ്ടായില്ല.
നിർമിതബുദ്ധി മനുഷ്യന്‍റെ നിയന്ത്രണത്തിൽ തുടരണമെന്നും ജനങ്ങൾക്കുവേണ്ടി അമേരിക്കയും ചൈനയും ഉത്തരവാദിത്വമുള്ള രാജ്യങ്ങളായി തുടരണമെന്നും ഷി നിർദേശിച്ചു.
ഇതിനിടെ, പിന്നാന്പുറ ചർച്ചകളിൽ തായ്വാന് വിഷയത്തിലെ അമേരിക്കൻ ഇടപെടലുകളെക്കുറിച്ച് ട്രംപിന് ഷി മുന്നറിയിപ്പു നല്കിയതായി ചൈനീസ് മാധ്യമങ്ങൾ റിപ്പോർട്ട് ചെയ്തു. തായ്‌വാൻ വിഷയത്തെ ജാഗ്രതയോടെ കൈകാര്യം ചെയ്യണമെന്ന് ട്രംപിനോട് ഷി ആവശ്യപ്പെട്ടത്രേ.
വ്യാഴാഴ്ച ട്രംപ് ഷിയ്ക്കു വൈറ്റ്ഹൗസിൽ നല്കിയ അത്താഴവിരുന്നിൽ ആപ്പിൾ, ആമസോൺ, ഗൂഗിൾ, ടെസ്‌ല തുടങ്ങിയ കന്പനികളുടെ മുതലാളിമാർ പങ്കെടുത്തു.
International
വാഷിംഗ്ടൺ ഡിസി: സിഎൻഎൻ, എംഎസ് നൗ, പൊളിറ്റിക്കോ മാധ്യമസ്ഥാപനങ്ങളിലെ ജേർണലിസ്റ്റുകൾക്ക് പ്രഖ്യാപിച്ച വൈറ്റ്ഹൗസ് വിലക്ക് പിൻവലിക്കാൻ യുഎസ് പ്രസിഡന്റ് ട്രംപിനോട് കോടതി ആവശ്യപ്പെട്ടു. ട്രംപിന്റെ ഉത്തരവ് ഭരണഘടനാ ലംഘനമാകാം എന്നഭിപ്രായപ്പെട്ടാണ് വാഷിംഗ്ടൺ ഡിസി ടിസ്ട്രിക്റ്റ് കോടതി ജഡ്ജി ടിം കെല്ലിയുടെ വിധി.
സെപ്റ്റംബർ 18നാണ് മൂന്നു സ്ഥാപനങ്ങളിലെയും മാധ്യമപ്രവർത്തകർക്ക് വൈറ്റ്ഹൗസ് വാർത്തകൾ റിപ്പോർട്ട് ചെയ്യുന്നതിൽ വിലക്കേർപ്പെടുത്തിയത്. വ്യാജ വാർത്തകൾ നല്കുന്നു എന്നാരോപിച്ചായിരുന്നിത്. നടപടി ചോദ്യംചെയ്ത് മാധ്യമങ്ങൾ നല്കിയ ഹർജിയാണ് കോടതി പരിഗണിച്ചത്.
ദേശസുരക്ഷയുടെ പേരിലാണ് വിലക്കെന്ന ട്രംപ് ഭരണകൂടത്തിന്‍റെ വാദം കോടതി അംഗീകരിച്ചില്ല. മാധ്യമപ്രവർത്തരുടെ പ്രസ് പാസുകൾ ഉടൻ തിരിച്ചു നല്കണമെന്ന് കോടതി നിർദേശിച്ചു.
സെപ്റ്റംബർ 19 മുതൽ മൂന്നു സ്ഥാപനങ്ങളിലെയും മാധ്യമപ്രവർത്തകർക്ക് വൈറ്റ്ഹൗസിൽ പ്രവേശനമില്ലായിരുന്നു. ഇതിൽപ്രതിഷേധിച്ച് പ്രമുഖ മാധ്യമസ്ഥാപനങ്ങൾ വൈറ്റ്ഹൗസ് വാർത്തകൾ നല്കുന്നത് നിർത്തിവച്ചിരുന്നു.
International
ന്യൂയോർക്ക്: വെനസ്വേലയിലെ ഇടക്കാല പ്രസിഡന്റ് ഡെൽസി റോദ്രിഗസ് അമേരിക്കൻ പ്രസിഡന്റ് ട്രംപുമായി കൂടിക്കാഴ്ച നടത്തി. ന്യൂയോർക്കിൽ യുഎൻ പൊതുസഭാ സമ്മേളനത്തിനിടെയായിരുന്നു കൂടിക്കാഴ്ച.
അമേരിക്കൻ സേന വെനസ്വേലയിൽനിന്നു തട്ടിക്കൊണ്ടുവന്ന പ്രസിഡന്റ് നിക്കോളാസ് മഡുറോയെ പാർപ്പിച്ചിരിക്കുന്ന ജയിലിൽനിന്ന് ഏതാനും കിലോമീറ്ററുകൾ അകലെയാണ് ട്രംപും ഡെൽസിയും ചർച്ച നടത്തിയത്.
മഡുറോയുടെ വൈസ് പ്രസിഡന്‍റായിരുന്നു ഡെൽസി. ട്രംപിന്റെ അനുഗ്രാശിസുകളോടെയാണ് ഡെൽസി വെനസ്വേലയുടെ ഇടക്കാല പ്രസിഡന്‍റായത്. ഇതിനുശേഷം ട്രംപും ഡെൽസിയും നടത്തുന്ന ആദ്യ കൂടിക്കാഴ്ചയാണിത്.
ഊർജം, ഖനനം, സുരക്ഷ തുടങ്ങിയ വിഷയങ്ങളിൽ സഹകരണം വർധിപ്പിക്കുന്നതിനെക്കുറിച്ചാണ് ട്രംപുമായി ചർച്ച നടത്തിയതെന്ന് ഡെൽസി പറഞ്ഞു. അമേരിക്കൻ വിദേശകാര്യ സെക്രട്ടറി മാർക്കോ റൂബിയോ, വൈറ്റ്ഹൗസ് ചീഫ് ഓഫ് സ്റ്റാഫ് സൂസി വൈൽസ് എന്നിവരും ചർച്ചയിൽ പങ്കെടുത്തു.
അമേരിക്കൻ കന്പനികളെ വെനസ്വേലൻ എണ്ണ ഖനനം ചെയ്യാൻ അനുവദിക്കുന്ന കരാറിൽ ഡെൽസി ഭരണകൂടം നേരത്തേ ഒപ്പുവച്ചിരുന്നു. ലോകത്തിൽ ഏറ്റവും കൂടുതൽ എണ്ണ നിക്ഷേപമുള്ള രാജ്യങ്ങളിലൊന്നാണ് വെനസ്വേല.
മയക്കുമരുന്നുമായി ബന്ധപ്പെട്ട കുറ്റങ്ങളാണ് മഡുറോയ്ക്കെതിരേ അമേരിക്കയിൽ ചുമത്തിയിട്ടുള്ളത്.
International
ന്യൂയോർക്ക്: സമാധാന കരാറിനു തയാറായില്ലെങ്കിൽ ഇറാനെ ഉന്മൂലനം ചെയ്യേണ്ടിവരുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. യുഎൻ പൊതുസഭാ സമ്മേളനത്തെ അഭിസംബോധന ചെയ്യുന്പോഴായിരുന്നു ട്രംപിന്റെ ഭീഷണി.
ഇറാനെ പശ്ചിമേഷ്യയിലെ പ്രധാന ശക്തിയാക്കി മാറ്റാൻ സഹായിക്കുന്ന കരാറിലെത്തുക അല്ലെങ്കിൽ ഇറാനെ ഉന്മൂലനം ചെയ്യുക ഏന്നീ രണ്ട് വഴികളാണ് തനിക്കുമ മുന്നിലുള്ളതെന്നും താൻ ഒരു തീരുമാനം എടുക്കേണ്ടതുണ്ടെന്നും ട്രംപ് പറഞ്ഞു.
അമേരിക്കയിൽ മിഡ്ടേം തെരഞ്ഞെടുപ്പ് നടക്കുന്ന നവംബർ മൂന്നിനുശേഷം ഇറാനുമായി കരാർ ഉണ്ടാക്കാനാകുമെന്നും ട്രംപ് പ്രത്യാശിച്ചു.
ഇറാനെ ആക്രമിച്ചതിനെ ട്രംപ് ന്യായീകരിച്ചു. അണ്വായുധം സ്വന്തമാക്കുന്നതിൽനിന്ന് ഇറാനെ തടഞ്ഞത് അമേരിക്കൻ ആക്രമണം ആണെന്ന് അദ്ദേഹം അവകാശപ്പെട്ടു.
ട്രംപിന്റെ പ്രസംഗത്തിനിടെ ഇറേനിയൻ പ്രതിനിധി സംഘം ഇറങ്ങിപ്പോയി. ഇറേനിയൻ പ്രസിഡന്റ് പസെഷ്കിയാനും വിദേശകാര്യമന്ത്രി അബ്ബാസ് അരാഗ്ചിയും യുഎൻ സമ്മേളനത്തിൽ പങ്കെടുക്കാൻ ന്യൂയോർക്കിൽ ഉണ്ടായിരുന്നെങ്കിലും ട്രംപിന്റെ പ്രസംഗം കേൾക്കാനെത്തിയില്ല.
അമേരിക്കയ്ക്ക് നേരെയുള്ള വിദേശ ഭീഷണികളെ വെച്ചുപൊറുപ്പിക്കില്ലെന്നും ട്രംപ് വ്യക്തമാക്കി. ഗ്രീൻലാൻഡ് വിഷയത്തിലുണ്ടാക്കിയ കരാർ, യൂറോപ്യൻ സഖ്യകക്ഷികളുമായും കാനഡയുമായുള്ള ഭിന്നതകൾ മുതലായ വിഷയങ്ങൾ ട്രംപ് പ്രസംഗത്തിൽ പരാമർശിച്ചു.
കമ്യൂണിസ്റ്റുകാർ ഭരിക്കുന്ന ക്യൂബയിൽ അടിസ്ഥാനപരമായ മാറ്റത്തിനാണ് അമേരിക്ക ശ്രമിക്കുന്നതെന്ന് ട്രംപ് അവകാശപ്പെട്ടു. ക്യൂബ എല്ലാംകൊണ്ടും പരാജയപ്പെട്ട രാജ്യമാണ്. മുന്പു കാണാത്തവിതം ക്യൂബ വീണുകൊണ്ടിരിക്കുകയാണ്. ക്യൂബ വീഴും. കമ്യൂണിസം അമേരിക്കൻ വരാൻ പോകുന്നില്ല. പകരം ക്യൂബയിലേക്ക് സ്വാതന്ത്ര്യം വരുമെന്ന് ട്രംപ് കൂട്ടിച്ചേർത്തു. ഈ പരാമർശങ്ങൾക്കിടെ ക്യൂബൻ പ്രതിനിധി സംഘം സഭ ബഹിഷ്കരിച്ചു.
International
വാഷിംഗ്ടൺ ഡിസി: പശ്ചിമേഷ്യാ സംഘർഷം അവസാനിപ്പിക്കാൻ ഇറാനുമേൽ സമ്മർദം ചെലുത്താമെന്ന് ചൈന അമേരിക്കയെ അറിയിച്ചതായി റിപ്പോർട്ട്. ഇതിനു പകരമായി തായ്വാന് ആയുധം നല്കുന്നത് അമേരിക്ക അവസാനിപ്പിക്കണം.
പതിറ്റാണ്ടിനുശേഷം വൈറ്റ്ഹൗസിൽ ഔദ്യോഗിക സന്ദർശനത്തിനെത്തുന്ന ചൈനീസ് പ്രസിഡന്റ് ഷി ചിൻപിംഗ് അമേരിക്കൻ പ്രസിഡന്റ് ട്രംപിനെ ഇക്കാര്യം നേരിട്ടറിയിക്കുമെന്ന് റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്തു. ബുധനാഴ്ച ആരംഭിക്കുന്ന സന്ദർശനം വെള്ളിയാഴ്ചയാണ് അവസാനിക്കുന്നത്. വെള്ളിയാഴ്ച നാഷണൽ ആർക്കൈവ്‌സിൽ ട്രംപുമായി നടത്തുന്ന കൂടിക്കാഴ്ചയിലായിരിക്കും തായ്‌വാൻ വിഷയം ഷി പരാമർശിക്കുക.
തായ്വാന് ആയുധം നല്കുന്നതുമായി ബന്ധപ്പെട്ട തർക്കങ്ങൾ അവസാനിപ്പിക്കാൻ ലക്ഷ്യമിട്ട് അമേരിക്കയും ചൈനയും 1982ൽ ഒപ്പുവച്ച സംയുക്ത പ്രഖ്യാപനത്തിലെ ചില നിബന്ധനകൾ ട്രംപിനെ ഷി ഓർമിപ്പിക്കുമെന്നാണ് ചില ഉന്നത വൃത്തങ്ങൾ പറഞ്ഞത്.
തായ്വാന് ആയുധം നല്കുന്നത് ക്രമേണ കുറയ്ക്കുമെന്നും ദീർഘകാലത്തേക്ക് അയുധം നല്കാൻ ഉദ്ദേശിക്കുന്നില്ലെന്നും അമേരിക്ക പ്രഖ്യാപനത്തിൽ വാഗ്ദാനം ചെയ്യുന്നുണ്ട്.
ജനാധിപത്യ ഭരണകൂടം നിലവിലുള്ള തായ്‌വാനെ വിഘടിത പ്രവിശ്യയായിട്ടാണ് ചൈന പരിഗണിക്കുന്നത്. ബലം പ്രയോഗിച്ചും തായ്‌വാനെ പിടിച്ചെടുക്കുമെന്നുള്ളത് ചൈനയുടെ ഔദ്യോഗിക നയമാണ്.
നയതന്ത്രതലത്തിൽ അമേരിച്ച ചൈനയെയാണ് അംഗീകരിക്കുന്നതെങ്കിലും വർഷങ്ങളായി തായ്വാന് ആയുധങ്ങൾ വിൽക്കുന്നുണ്ട്. തായ്‌വാന്‍റെ സ്വയം പ്രതിരോധത്തിന് സഹായം നല്കണമെന്ന നിയമവും അമേരിക്ക പാസാക്കിയിട്ടുള്ളതാണ്.
തായ്‌വാനുള്ള ആയുധ വിൽപ്പന ചൈന-യുഎസ് ബന്ധത്തിലെ പ്രധാന കല്ലുകടിയാണ്. യുഎസ്-ചൈന ബന്ധത്തിലെ ഏക പ്രശ്നം തായ്‌വാനാണെന്ന് ഷി ചിൻപിംഗ് ട്രംപിനെ അറിയിച്ചതായും റിപ്പോർട്ടിൽ പറയുന്നു. ഓർഡർ നല്കിയിട്ടുള്ള ആയുധങ്ങൾ പോലും തായ്‌വാനു നല്കരുതെന്നാണ് ചൈന ആവശ്യപ്പെടുന്നത്.
ഇതിനു പകരമായി പശ്ചിമേഷ്യാ പ്രശ്നം അവസാനിപ്പിക്കാൻ ചൈനയുടെ സഹായം ട്രംപിന് ഷി വാഗ്ദാനം ചെയ്യുന്നു. ഇറാനുമേൽ സ്വാധീനം ചെലുത്താൻ ശേഷിയുള്ള അപൂർവം രാജ്യങ്ങളിലൊന്നാണ് ചൈന. പാശ്ചാത്യ ഉപരോധത്തിൽ വലയുന്ന ഇറാന്‍റെ ഏറ്റവും വലിയ വാണിജ്യ പങ്കാളിയാണ് ചൈന.
നവംബറിൽ അമേരിക്കയിൽ നടക്കുന്ന ഇടക്കാല തെരഞ്ഞെടുപ്പിൽ ഇറാൻ യുദ്ധം പ്രതിഫിലിക്കുമെന്ന പ്രവചനങ്ങളിൽ ആശങ്കപ്പെട്ടിരിക്കുന്ന ട്രംപ് ചൈനീസ് പ്രസിഡന്‍റിന്‍റെ വാഗ്ദാനത്തോട് അനുകൂലമായി പ്രതികരിക്കുമോ എന്നതിൽ വ്യക്തതയില്ല. തായ്വാന് ഏറ്റവും കൂടുതൽ ആയുധം വിറ്റ അമേരിക്കൻ പ്രസിഡന്റ് എന്ന ഖ്യാതി ട്രംപിനുണ്ട്.
International
വാഷിംഗ്ടണ്: ഇറാനുമാായുള്ള നയതന്ത്ര-സൈനിക തര്‍ക്കങ്ങള്‍ രൂക്ഷമായിരിക്കെ, വിഷയത്തില്‍ അന്തിമ തീരുമാനങ്ങളിലേക്ക് കടക്കുകയാണെന്ന മുന്നറിയിപ്പുമായി യു.എസ് പ്രസിഡന്റ് ഡോണള്‍ഡ് ട്രംപ്. ഇറാന് ഭരണകൂടം തങ്ങളുടെ നിലപാടുകളില്‍ മാറ്റം വരുത്തിയില്ലെങ്കില്‍ 'വളരെ വലിയ കാര്യങ്ങള്‍ ഉടന്‍ തന്നെ സംഭവിക്കാന്‍ പോകുന്നു' എന്ന് ഫോക്‌സ് ന്യൂസിന് നല്കിയ അഭിമുഖത്തില്‍ ട്രംപ് വ്യക്തമാക്കി.
ഇറാനെതിരെയുള്ള യുഎസ് നിലപാടില്‍ പ്രധാനമായും മൂന്ന് വഴികളാണ് നിലവിലുള്ളതെന്ന് ട്രംപ് ചൂണ്ടിക്കാട്ടി. ഇറാന് മേല്‍ പൂര്‍ണ സൈനിക നടപടി സ്വീകരിക്കുക, സാമ്പത്തിക ഉപരോധങ്ങളിലൂടെ രാജ്യത്തെ കൂടുതല്‍ തകര്‍ച്ചയിലേക്ക് തള്ളിയിടുക, ഉഭയകക്ഷി ധാരണയിലൂടെയോ കരാറിലൂടെയോ പ്രശ്നം പരിഹരിക്കുക.
ഐക്യരാഷ്ട്രസഭയുടെ പൊതുസഭ ഉച്ചകോടിയില്‍ പങ്കെടുക്കാന്‍ ഇറാന് പ്രസിഡന്റ് മസൂദ് പെസഷ്‌കിയാന്‍ ന്യൂയോര്‍ക്കിലേക്ക് എത്താനിരിക്കെയാണ് ട്രംപിന്റെ പ്രതികരണം. ഉപരോധങ്ങള്‍ അവസാനിപ്പിക്കാനും ഹോര്‍മുസ് പ്രതിസന്ധി പരിഹരിക്കാനും ഖത്തര്‍ വഴി തങ്ങളുടെ വ്യവസ്ഥകള്‍ അമേരിക്കയെ അറിയിച്ചതായി ടെഹ്റാന്‍ വ്യക്തമാക്കിയിട്ടുണ്ട്. യുഎന്‍ ഉച്ചകോടിയുടെ ഭാഗമായി പെസഷ്‌കിയാനുമായി കൂടിക്കാഴ്ച നടത്താന്‍ താന്‍ തയാറാണെന്ന സൂചനയും ട്രംപ് നല്കിയിട്ടുണ്ട്.
International
വാഷിംഗ്ടൺ ഡിസി: പതിറ്റാണ്ടിനുശേഷം വൈറ്റ് ഹൗസ് സന്ദർശിക്കാനെത്തുന്ന ചൈനീസ് പ്രസിഡന്റ് ഷി ചിൻപിംഗിനെ അമേരിക്കൻ പ്രസിഡന്റ് ട്രംപ് വിമാനത്താവളത്തിൽ നേരിട്ടു സ്വീകരിക്കും. ഷിയും പത്നി പെംഗ് ലിയുവാനും ബുധനാഴ്ചയാണ് വാഷിംഗ്ടൺ ഡിസിക്കു സമീപമുള്ള ആൻഡ്രൂസ് സംയുക്ത സൈനിക താവളത്തിൽ വിമാനമിറങ്ങുന്നത്. ട്രംപ് അവരെ കാത്തുനിൽക്കുമെന്നാണ് അറിയിപ്പ്.
ഷിയുടെ സന്ദർശനത്തിന് ട്രംപ് ഭരണകൂടം നല്കുന്ന പ്രാധാന്യമാണ് ഇതിൽനിന്നു വ്യക്തമാകുന്നത്. അമേരിക്കൻ പ്രസിഡന്‍റുമാർ സാധാരണ ഒരു രാഷ്‌ട്രത്തലവനെയും വിമാനത്താവളത്തിൽ സ്വീകരിക്കാറില്ല. ട്രംപിന്റെ രണ്ടാം ഭരണകാലത്ത് ഇത്തരം സ്വീകരണം ആദ്യമാണ്. ആദ്യ ഭരണകാലത്ത് 2017ൽ അന്നത്തെ കുവൈറ്റ് അമീറിനെ വിമാനത്താവളത്തിൽ സ്വീകരിച്ചിരുന്നു.
ബിവൈഡി, ഷവോമി തുടങ്ങിയ പ്രമുഖ കന്പനികളുടെ നേതാക്കൾ ഉൾപ്പെടുന്ന വലിയ ബിസിനസ് പ്രതിനിധി സംഘവും ഷിയ്ക്കൊപ്പം അമേരിക്കയിലെത്തും. വ്യാഴാഴ്ച ട്രംപും പത്നി മെലാനിയയും ഷിയ്ക്കും പത്നിക്കും നല്കുന്ന സ്റ്റേറ്റ് ഡിന്നറിൽ അമേരിക്കയിലെ വൻകിട കന്പനികളായ ആമസോണിന്‍റെ മേധാവി ജെഫ് ബസോസ്, ടെസ്‌ല മുതലാളി ഇലോൺ മസ്ക്, ഗൂഗിൾ മേധാവി സുന്ദർ പിച്ചെ തുടങ്ങിയവർ പങ്കെടുക്കുന്നുണ്ട്.
ഷി-ട്രംപ് കൂടിക്കാഴ്ചയിൽ വ്യാപാരം, ചുങ്കം, നിർമിതബുദ്ധി, തായ്‌വാൻ, പശ്ചിമേഷ്യാ പ്രതിസന്ധി, അപൂർവ ധാതുക്കളുടെ കയറ്റുമതി മുതലായ വിഷയങ്ങൾ ചർച്ചയാകും. തന്ത്രപ്രാധാന്യമില്ലാത്ത ചില വസ്തുക്കളുടെ ഇറക്കുമതി ചുങ്കം കുറയ്ക്കുന്ന പ്രഖ്യാപനങ്ങൾ ഉണ്ടായേക്കാം. വെള്ളിയാഴ്ച ത്രിദിന സന്ദർശനം പൂർത്തിയാക്കി ഷി മടങ്ങും.
2015ൽ ബറാക് ഒബാമ പ്രസിഡന്‍റായിരിക്കേയാണ് ഷി ഇതിനു മുന്പ് വൈറ്റ്ഹൗസിൽ ഔദ്യോഗിക സന്ദർശനം നടത്തിയിട്ടുള്ളത്. ഷി 2017ലും 2023ലും രണ്ട് ഉച്ചകോടികൾക്കായി അമേരിക്കയിലെ ഫ്ലോറിഡയിലും സാൻഫ്രാൻസിസ്കോയിലും സന്ദർശനം നടത്തിയിരുന്നു.
ട്രംപ് മാർച്ചിൽ ചൈനയിലെത്തി ഷിയുമായി കൂടിക്കാഴ്ച നടത്തിയിരുന്നു.
International
വാഷിംഗ്ടൺ ഡിസി: ഗ്രീൻലാൻഡിന്‍റെ സുരക്ഷയ്ക്കായി ഡെന്മാർക്കും അമേരിക്കയും തമ്മിൽ കരാർ ഉണ്ടാക്കാൻ തീരുമാനിച്ചു. ഗ്രീൻലാൻഡിനെ സ്വന്തമാക്കുമെന്ന അമേരിക്കൻ പ്രസിഡന്റ് ട്രംപിന്റെ പ്രഖ്യാപനത്തോടെ ഉടലെടുത്ത നയതന്ത്ര പ്രശ്നത്തിനാണ് ഇതോടെ പരിഹാരമായത്.
ഉത്തരധ്രുവത്തിൽ തന്ത്രപ്രാധാന്യമുള്ള ഗ്രീൻലാൻഡിന്‍റെ സുരക്ഷാകാര്യങ്ങളിൽ അമേരിക്കയ്ക്ക് സ്ഥിരം നിയന്ത്രണം ലഭിക്കുന്ന കരാറാണിതെന്ന് ട്രംപ് അറിയിച്ചു. ഡെന്മാർക്കിലെയും ഗ്രീൻലാൻഡിലെയും നേതാക്കൾ കരാറിനെ സ്വാഗതം ചെയ്തു.
അടുത്തയാഴ്ച ന്യൂയോർക്കിൽ യുഎൻ പൊതുസഭാ സമ്മേളനത്തിനിടെ കരാർ ഒപ്പുവയ്ക്കും എന്നാണ് അറിയിപ്പ്. കരാറിന്‍റെ വിശദാംശങ്ങൾ പുറത്തുവിട്ടിട്ടില്ല.
അമേരിക്കയ്ക്ക് ഒരു ചിലവുമില്ലാതെയാണ് കരാർ സാധ്യമായതെന്ന് ട്രംപ് പറഞ്ഞു. കരാർ പ്രകാരം അമേരിക്കയുടെ അനുമതിയില്ലാതെ ശത്രുരാജ്യങ്ങൾക്ക് ഗ്രീൻലാൻഡിൽ സൈനിക താവളം തുറക്കാനാവില്ല. ചിലതരം നിക്ഷേപങ്ങളും അസാധ്യമാകുമെന്ന് ട്രംപ് കൂട്ടിച്ചേർത്തു.
ഡെന്മാർക്കിന്‍റെ പരമാധികാരവും ഗ്രീൻലാൻഡിന്‍റെ സ്വയംനിർണയാവകാശവും കരാറിൽ സംരക്ഷിക്കപ്പെടുന്നതായി ഡാനിഷ് പ്രധാനമന്ത്രി മെറ്റെ ഫ്രെഡറിക്സണും ഗ്രീൻലാൻഡ് പ്രധാനമന്ത്രി യെൻസ് ഫ്രഡറിക് നീൽസണും പ്രതികരിച്ചു.
ഡെന്മാർക്കിലെ സ്വയംഭരണ പ്രദേശമായ ഗ്രാൻലാൻഡിനെ അമേരിക്കയോട് കൂട്ടിച്ചേർക്കാനുള്ള ട്രംപിന്റെ ആഗ്രഹം വലിയ പ്രതിസന്ധിക്കിടയാക്കിയിരുന്നു. അമേരിക്കയുടെ ദേശീയ സുരക്ഷയ്ക്ക് ഗ്രീൻലാൻഡ് വേണമെന്നായിരുന്നു ട്രംപിന്റെ നിലപാട്. ശത്രുരാജ്യങ്ങളായ ചൈനയും റഷ്യയും ഗ്രീൻലാൻഡിൽ സ്വാധീനം ശക്തമാക്കുമെന്ന് അദ്ദേഹം വാദിച്ചു. ഗ്രീൻലാൻഡിലെ വിലയ്ക്കു വാങ്ങാൻ തയാറാണെന്നും വേണ്ടിവന്നാൽ ബലംപ്രയോഗിച്ച് കൂട്ടിച്ചേർക്കുമെന്നും ട്രംപ് പറഞ്ഞിരുന്നു. പാശ്ചാത്യ സൈനിക കൂട്ടായ്മയായ നാറ്റോയിൽ വലിയ എതിർപ്പിനും ഭിന്നതയ്ക്കും ട്രംപിന്റെ നീക്കം വഴിവച്ചിരുന്നു.
International
വാഷിംഗ്ടൺ ഡി.സി: പ്രമുഖ അന്താരാഷ്ട്ര വാർത്താ മാധ്യമങ്ങളായ സിഎൻഎൻ, എം.എസ് നൗ, പൊളിറ്റിക്കോ എന്നിവയ്ക്ക് വൈറ്റ് ഹൗസിൽ പ്രവേശന വിലക്കേർപ്പെടുത്തി യുഎസ് പ്രസിഡന്റ് ഡോണൾഡ് ട്രംപ്. ട്രൂത്ത് സോഷ്യലിലൂടെയാണ് വിലക്ക് ഉടനടി പ്രാബല്യത്തിൽ വരുത്തുന്നതായി ട്രംപ് പ്രഖ്യാപിച്ചത്.
ഈ മാധ്യമങ്ങൾ തന്‍റെ ഭരണകൂടത്തിനെതിരെ നിരന്തരം "വ്യാജവാർത്തകളും നുണകളും" പ്രചരിപ്പിക്കുകയാണെന്ന് ട്രംപ് ആരോപിച്ചു. ട്രംപ് ഭരണകൂടത്തെ മോശമായി ചിത്രീകരിക്കാൻ ഈ മാധ്യമങ്ങൾ മനഃപൂർവം ശ്രമിക്കുകയാണെന്ന് ഓവൽ ഓഫീസിൽ മാധ്യമപ്രവർത്തകരോട് സംസാരിക്കവേ ട്രംപ് വ്യക്തമാക്കി. മറ്റ് പ്രമുഖ മാധ്യമങ്ങൾക്കെതിരെയും ഭാവിയിൽ സമാന നടപടിയുണ്ടാകുമെന്ന മുന്നറിയിപ്പും അദ്ദേഹം നൽകി.
ബൈഡൻ ഭരണകൂടത്തിന്‍റെ കാലത്ത് 'പൊളിറ്റിക്കോ' എന്ന മാധ്യമത്തിന് എട്ട് ദശലക്ഷം ഡോളറിന്‍റെ ഗവൺമെന്‍റ് സബ്‌സ്‌ക്രിപ്‌ഷൻ ലഭിച്ചതായും ഇത് വലിയ അഴിമതിയാണെന്നും ട്രംപ് ആരോപിച്ചു. അമേരിക്കൻ ഭരണഘടന വാഗ്ദാനം ചെയ്യുന്ന പത്രസ്വാതന്ത്ര്യത്തിൻമേലുള്ള കടന്നുകയറ്റമാണ് ഇതെന്നും തങ്ങളുടെ വാർത്താസംഘത്തിന് പൂർണ പിന്തുണ നൽകുമെന്നും സിഎൻഎൻ വ്യക്തമാക്കി.
റിപ്പോട്ടേഴ്സ് വിത്തൗട്ട് ബോർഡേഴ്സ് ഉൾപ്പെടെയുള്ള അന്താരാഷ്ട്ര മാധ്യമ കൂട്ടായ്മകളും നീക്കത്തിനെതിരെ രംഗത്തെത്തിയിട്ടുണ്ട്.
International
സ്ട്രാസ്ബർഗ്: യൂറോപ്യൻ യൂണിയന്‍റെ (ഇയു) അസോസിയേറ്റ് അംഗമാകാൻ കാനഡയ്ക്കു ക്ഷണം. യൂറോപ്യൻ കമ്മീഷൻ പ്രസിഡന്റ് ഉർസുല ഫോൺ ദെർ ലെയ്‌ന്‌ കഴിഞ്ഞദിവസം സ്ട്രാസ്ബർഗിലെ യൂറോപ്യൻ പാർലമെന്‍റിൽ നടത്തിയ പ്രസംഗത്തിലാണ് ക്ഷണം മുന്നോട്ടുവച്ചത്. കനേഡിയൻ പ്രധാനമന്ത്രി മാർക്ക് കാർണിയും പാർലമെന്‍റിൽ സന്നിഹിതനായിരുന്നു. ഇതിനിടെ, ഇയു-കാനഡ സഖ്യത്തിനു മുന്നറിയിപ്പു നല്കി അമേരിക്കൻ പ്രസിഡന്റ് ട്രംപ് രംഗത്തെത്തിയിട്ടുണ്ട്.
വ്യാപാരവിഷയങ്ങളിലടക്കം പ്രസിഡന്റ് ട്രംപിൽനിന്നുള്ള ശത്രുതാ മനോഭാവമാണ് കാനഡയെയും യൂറോപ്പിനെയും അടുപ്പിക്കുന്നത്. കാനഡ യൂറോപ്യൻ രാജ്യമല്ലാത്തതിനാൽ ഇയുവിൽ പൂർണ അംഗത്വം സാധ്യമല്ല. ഇതു മറികടക്കാനാണ് അസോസിയേറ്റ് അംഗത്വം. സാങ്കേതികവിദ്യ, പ്രതിരോധം, ഊർജം, അപൂർവധാതുക്കൾ തുടങ്ങിയ മേഖലകളിൽ ആഴത്തിലുള്ള സഹകരണമാണ് ഇതിലൂടെ ലക്ഷ്യമിടുന്നത്. ഉർസുലയുടെ നിർദേശം ഇയുവിൽ അംഗത്വമുള്ള 27 രാജ്യങ്ങളും അംഗീകരിക്കേണ്ടതുണ്ട്.
ജനക്ഷേമം മുൻനിർത്തിയാണ് കാനഡയും യൂറോപ്പും ബന്ധം ശക്തിപ്പെടുത്തുന്നതെന്ന് മാർക്ക് കാർണി വിശദീകരിച്ചു. രാജ്യങ്ങളുടെ പരമാധികാരം, സ്വാതന്ത്ര്യം, ജനാധിപത്യം, നിയമവാഴ്ച തുടങ്ങിയ കാര്യങ്ങൾ അട്ടിമറിക്കപ്പെടുന്നതു തടയലും സ്വതന്ത്രവിപണിയെ ആരും നിയന്ത്രിക്കുന്നില്ലെന്ന് ഉറപ്പാക്കലുമാണ് ഇതിലൂടെ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
അതേസമയം, കാനഡയെ ഒപ്പം കൂട്ടാനുള്ള ഇയു തീരുമാനത്തെ ശത്രുതാപരമായ നീക്കമായിട്ടായിരിക്കും അമേരിക്ക പരിഗണിക്കുകയെന്ന് ട്രംപ് പറഞ്ഞു. നല്ല ലക്ഷ്യത്തോടെയല്ല ഈ നീക്കമെങ്കിൽ യൂറോപ്യൻ യൂണിയൻ കനത്ത ചുങ്കം നേരിടേണ്ടിവരും. ചില കാര്യങ്ങളിൽ ഇയുവുമായുള്ള വാണിജ്യ ഇടപാടുകൾ തന്നെ അമേരിക്ക നിർത്തിയേക്കുമെന്ന് അദ്ദേഹം കൂട്ടിച്ചേർത്തു.
International
വാഷിംഗ്ടൺ: റഷ്യൻ ഊർജ മേഖലയ്ക്ക് മേൽ ഉപരോധം ശക്തമാക്കുന്ന ബില്ലിന് അമേരിക്കൻ പ്രതിനിധി സഭയുടെ അംഗീകാരം. 159-നെതിരെ 262 വോട്ടുകൾക്കാണ് 'ലിൻഡ്സെ ഒ. ഗ്രഹാം റഷ്യ-ഇറാൻ ഉപരോധ ബിൽ 2026' പ്രതിനിധി സഭ പാസാക്കിയത്.
റഷ്യയിൽ നിന്ന് എണ്ണയും പ്രകൃതിവാതകവും വാങ്ങുന്ന ഇന്ത്യ ഉൾപ്പെടെയുള്ള അഞ്ച് മുൻനിര രാജ്യങ്ങൾക്ക് മേൽ 100 ശതമാനം വരെ ഇറക്കുമതി തീരുവ ചുമത്താൻ അമേരിക്കൻ പ്രസിഡന്റ് ഡോണൾഡ് ട്രംപിന് അധികാരം നൽകുന്നതാണ് പുതിയ നിയമനിർമാണം.
സെനറ്റ് മുൻപ് പാസാക്കിയ ബില്ല് പ്രതിനിധി സഭയും അംഗീകരിച്ചതോടെ, ട്രംപ് ഒപ്പുവെക്കുന്നതോടെ ഇത് നിയമമായി മാറും. റഷ്യൻ ക്രൂഡ് ഓയിലിന്‍റെ മുൻനിര വാങ്ങലുകാരായ ഇന്ത്യയെയും ചൈനയെയും ലക്ഷ്യമിട്ടാണ് ബില്ലിലെ ഉയർന്ന തീരുവ വ്യവസ്ഥകൾ. ഇന്ത്യയിൽ നിന്നുള്ള ഉത്പന്നങ്ങൾക്ക് 100% വരെ നികുതി ഏർപ്പെടുത്താൻ ഈ നിയമം യുഎസ് പ്രസിഡന്‍റിന് അധികാരം നൽകുന്നുണ്ട്. ദേശീയ താത്പര്യം മുൻനിർത്തി ഏതെങ്കിലും രാജ്യങ്ങൾക്ക് ഇളവ് നൽകാൻ പ്രസിഡന്‍റിന് അധികാരമുണ്ടാകും.
International
വാഷിംഗ്ടൺ ഡിസി: യുഎസ് സുപ്രീംകോടതിയിൽനിന്നു പ്രസിഡന്റ് ഡോണൾഡ് ട്രംപിന് വീണ്ടും തിരിച്ചടി. നവംബറിൽ നടക്കുന്ന ഇടക്കാല തെരഞ്ഞെടുപ്പിൽ തപാൽ വോട്ടിംഗ് നിയന്ത്രിക്കാനുള്ള ട്രംപിന്റെ പദ്ധതി സുപ്രീംകോടതി തള്ളി.
തപാൽ ബാലറ്റുകളുമായി ബന്ധപ്പെട്ട പുതിയ നിബന്ധനകൾ നടപ്പിലാക്കുന്നതിൽനിന്ന് യുഎസ് പോസ്റ്റൽ സർവീസിനെ തടഞ്ഞ ഫെഡറൽ കോടതി ഉത്തരവിനെതിരായ ഹർജിയിലാണു സുപ്രധാന വിധി. ഫെഡറൽ കോടതി ഉത്തരവ് ശരിവച്ച പരമോന്നത കോടതി ട്രംപ് ഭരണകൂടത്തിന്‍റെ ഹർജി തള്ളി.
ഇതോടെ നിലവിലെ രീതിയിൽ വോട്ടെടുപ്പ് തുടരാൻ സംസ്ഥാനങ്ങൾക്കു വഴിതുറന്നു. എന്നാൽ ഇടക്കാല വിധി അന്തിമമാകാൻ സാധ്യതയില്ല. യാഥാസ്ഥിതിക പക്ഷക്കാരനായ ജസ്റ്റീസ് ബ്രെറ്റ് കവനോ കേസ് നടപടികൾ പുരോഗമിക്കുമ്പോൾ ഭാവിയിൽ ട്രംപിന് അനുകൂല വിധി ഉണ്ടായേക്കാമെന്ന സൂചന നൽകി.
തപാൽവോട്ടിന് അർഹരായ വോട്ടർമാരുടെ പട്ടിക സംസ്ഥാനങ്ങൾ കേന്ദ്രീകൃത ഓൺലൈൻ പോർട്ടലിലേക്കു നൽകണമെന്നും, പ്രത്യേക ബാർ കോഡുകളുള്ള ഏകീകൃത കവറുകൾ മാത്രമേ ബാലറ്റുകൾ അയയ്ക്കാൻ ഉപയോഗിക്കാവൂ എന്നുമായിരുന്നു യുഎസ് പോസ്റ്റൽ സർവീസ് വഴി നടപ്പാക്കാൻ ശ്രമിച്ച പ്രധാന നിർദേശം.
ഈ നിബന്ധനകൾ പാലിക്കാത്ത സംസ്ഥാനങ്ങളിലെ ബാലറ്റുകൾ വിതരണം ചെയ്യാൻ പോസ്റ്റൽ സർവീസിനു വിസമ്മതിക്കാമെന്ന വ്യവസ്ഥയും ഇതിലുണ്ടായിരുന്നു. എന്നാൽ, തെരഞ്ഞെടുപ്പിന് ഏതാനും ആഴ്ചകൾ മാത്രം ബാക്കിനിൽക്കേ അഴിച്ചുപണി അസാധ്യമാണെന്നും ഇത് ദശലക്ഷക്കണക്കിന് ആളുകളുടെ വോട്ടവകാശം ഇല്ലാതാക്കുമെന്നും ചൂണ്ടിക്കാട്ടി ഇരുപത്തിമൂന്നിലധികം സംസ്ഥാനങ്ങളും സംഘടനകളും കോടതിയെ സമീപിക്കുകയായിരുന്നു.
തെരഞ്ഞെടുപ്പിനോടനുബന്ധിച്ച് ജീവനക്കാർക്കു പരിശീലനം നൽകാനാവില്ലെന്ന് തപാൽ ജീവനക്കാരുടെ സംഘടനയും പറഞ്ഞു. രണ്ട് വർഷം മുമ്പ് നടന്ന പൊതുതെരഞ്ഞെടുപ്പിൽ 30 ശതമാനം പേരാണു തപാൽവോട്ട് രേഖപ്പെടുത്തിയത്. ഇതിൽ ഭൂരിപക്ഷവും ഡെമോക്രാറ്റുകളായിരുന്നു. ട്രംപ് അധികാരത്തിൽ തിരിച്ചെത്തിയ ശേഷം തപാൽ വോട്ട് നിയന്ത്രിക്കാൻ ശ്രമിച്ചിരുന്നു.
International
ന്യൂയോർക്ക്: അമേരിക്കൻ പ്രസിഡന്റ് ഡോണൾഡ് ട്രംപിന്റെ മകൻ ഡോണൾഡ് ട്രംപ് ജൂനിയറിന്‍റെ വിവാഹാഘോഷത്തിനു പണം മുടക്കിയത് റഷ്യൻ ശതകോടീശ്വരനെന്ന് ട്രംപ് ജൂണിയറിന്‍റെ ഭാര്യ ബെറ്റിന ആൻഡേഴ്സന്‍റെ ഇൻസ്റ്റഗ്രാം പോസ്റ്റ്.
റഷ്യൻ പ്രസിഡന്റ് പുടിനുമായി അടുത്ത ബന്ധമുള്ള കോടീശ്വരൻ ഒമർ ക്രെംലെവിനെയാണ് ബെറ്റിന ‘വിവാഹാനന്തരമുള്ള ഞങ്ങളുടെ രണ്ടു രാത്രികളെ അസുലഭമാക്കിയ ആഘോഷങ്ങൾക്ക് ആതിഥ്യം വഹിച്ച പ്രിയ സുഹൃത്ത്’ എന്ന് പോസ്റ്റിൽ വിശേഷിപ്പിക്കുന്നത്.
International
ഇസ്‌ലാമാബാദ്: യുഎൻ പൊതുസഭാ സമ്മേളനത്തിൽ പങ്കെടുക്കാനായി അമേരിക്കയിലെത്തുന്ന പാക്കിസ്ഥാൻ പ്രധാനമന്ത്രി ഷഹ്ബാസ് ഷരീഫ് പ്രസിഡന്റ് ട്രംപുമായി കൂടിക്കാഴ്ച നടത്തുമെന്ന് അറിയിപ്പ്.
യുഎൻ പൊതുസഭയിൽ പങ്കെടുക്കുന്ന രാഷ്‌ട്രത്തലവന്മാർക്കായി ട്രംപും ഭാര്യ മെലാനിയയും സെപ്റ്റംബർ 23ന് ന്യൂയോർക്കിൽ പ്രത്യേക അത്താഴവിരുന്ന് സംഘടിപ്പിച്ചിട്ടുണ്ട്. ഷഹ്ബാസ് ഷരീഫിനു വിരുന്നിലേക്ക് ക്ഷണമുണ്ട്.
ഫെബ്രുവരിൽ ട്രംപിന്റെ ‘സമാധാന ബോർഡ്’ ഉദ്ഘാടനത്തോട് അനുബന്ധിച്ചാണ് ഇരുവരും ഇതിനു മുന്പ് കൂടിക്കാഴ്ച നടത്തിയിട്ടുള്ളത്.
സെപ്റ്റംബർ 22ന് ന്യൂയോർക്കിലെത്തുന്ന ഷരീഫ് 25നാണ് യുഎഎൻ പൊതുസഭയെ അഭിസംബോധന ചെയ്യുക. പഹൽഗാം ഭീകരാക്രമണത്തിനു മറുപടിയായി ഇന്ത്യ സിന്ധുനദീജല കരാർ റദ്ദാക്കിയ വിഷയം ഷരീഫ് പൊതുസഭയിൽ ഉന്നയിക്കുമെന്നാണ് സൂചന.
കരാർ മാനിക്കാൻ ഇന്ത്യ തയാറാകണമെന്ന് ഹേഗിലെ മധ്യസ്ഥ കോടതി അടുത്തിടെ ഉത്തരവിട്ടിരുന്നു. കോടതിക്ക് ഇതു പറയാൻ അധികാരമില്ലെന്നാണ് ഇന്ത്യ പ്രതികരിച്ചത്.
International
ഡബ്ലിൻ: സൗദിയിലെ ഈസ്റ്റ്-വെസ്റ്റ് എണ്ണ പൈപ്പിനുനേർക്കുണ്ടായ ആക്രമണത്തിനു പിന്നിൽ ഇറാൻ ആയിരിക്കാമെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. അയർലൻഡിൽ സന്ദർശനം നടത്തുന്നതിനിടെയാണ് അദ്ദേഹം ഇതു പറഞ്ഞത്.
സൗദിയുടെ ഭരണനിയന്താവ് മുഹമ്മദ് ബിൻ സൽമാൻ രാജകുമാരനുമായി സംസാരിച്ചതായും ട്രംപ് മാധ്യമപ്രവർത്തകരെ അറിയിച്ചു.
ഇറാന്‍റെ പിന്തുണയുള്ള യെമനിലെ ഹൂതി വിമതർ അമേരിക്കൻ ഭരണകൂടത്തെ ബന്ധപ്പെട്ടുവെന്നും അമേരിക്ക സംഘർഷത്തിൽ ഇടപെടരുതെന്ന് അഭ്യർഥിച്ചതായും ട്രംപ് പറഞ്ഞു. ചെങ്കടൽവഴി ഭൂരിഭാഗം കപ്പലുകളെയും ഹൂതികൾ കടത്തിവിടുന്നുണ്ട്. സൗദിയുടെ കപ്പലുകൽ മാത്രമാണ് തടയുന്നത്. അക്കാര്യം ശരിപ്പെടുത്തേണ്ടതുണ്ടെന്നും ട്രപ് കൂട്ടിച്ചേർത്തു.
International
ഡബ്ലിൻ: ബ്രിട്ടന്‍റെ ഭാഗമായ വടക്കൻ അയർലൻഡും സ്വതന്ത്ര അയർലൻഡും ഒന്നാകുന്നതു കാണാൻ ആഗ്രഹിക്കുന്നതായി അമേരിക്കൻ പ്രസിഡന്റ് ഡോണൾഡ് ട്രംപ്. അയർലൻഡ് സന്ദർശിച്ച ട്രംപ് പ്രധാനമന്ത്രി മൈക്കിൾ മാർട്ടിനുമായി കൂടിക്കാഴ്ച നടത്തുന്നതിനിടെയായിരുന്നു വിവാദ പരാമർശം.
“പ്രശ്നമുണ്ടാക്കാൻ എനിക്കു താത്പര്യമില്ല. പക്ഷേ ഞാൻ പറയട്ടെ, അയർലൻഡുകൾ ഏകീകരിക്കുന്നതു കാണാൻ ഞാനിഷ്ടപ്പെടുന്നു. സ്വാഭാവികമായും അതു സംഭവിക്കപ്പെടും” - ട്രംപ് പറഞ്ഞു.
വടക്കൻ അയർലൻഡ് ബ്രിട്ടൻ വിടുന്നതു സംബന്ധിച്ച് ഹിത പരിശോധന നടത്താൻ ആലോചനയില്ലെന്ന് ബ്രിട്ടീഷ് പ്രധാനമന്ത്രി ആൻഡി ബേർനാം അടുത്തകാലത്തു പറഞ്ഞിരുന്നു. 1998ലെ ഗുഡ്ഫ്രൈഡേ ഉടന്പടി പ്രകാരം ഇത്തരമൊരു ഹിതപരിശോധന വേണമോ എന്നു നിശ്ചയിക്കാനുള്ള അധികാരം ബ്രിട്ടീഷ് സർക്കാരിനുണ്ട്. വടക്കൻ അയർലൻഡ് ബ്രിട്ടനിൽ തുടരണം എന്നുവാദിക്കുന്ന യൂണിയനിസ്റ്റുകളും ഐറിഷ് ദേശീയവാദികളും തമ്മിൽ മൂന്നു പതിറ്റാണ്ട് തുടർന്ന രക്തരൂക്ഷിത സംഘർഷം അവസാനിപ്പിച്ച ഉടന്പടിയാണിത്.
വടക്കൻ അയർലൻഡിലെ ഭൂരിഭാഗം പേരും ബ്രിട്ടനിൽ തുടരാൻ ഇഷ്ടപ്പെടുന്നു എന്നാണ് അഭിപ്രായ സർവേകൾ പറയുന്നത്.
International
റിയാദ്: യെമനിലെ ഹൂതി വിമതരെ നേരിടാൻ അമേരിക്കൻ പ്രസിഡന്റ് ട്രംപിനോട് സഹായം ചോദിച്ച് സൗദി രാജകുമാരൻ മുഹമ്മദ് ബിൻ സൽമാൻ. എന്നാൽ ട്രംപ് സഹായിക്കാൻ തയാറായില്ല. അമേരിക്കൻ മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്.
ഇറാന്‍റെ പിന്തുണയുള്ള ഹൂതികൾ യെമൻ തീരത്ത് മുന്നേറ്റം തുടർന്ന വ്യാഴാഴ്ച മുഹമ്മദ് ബിൻ സൽമാൻ രണ്ടു തവണ ട്രംപിനെ ഫോണിൽ വിളിച്ചുവത്രേ. ഹൂതികൾക്കെതിരേ അമേരിക്ക ആക്രമണം നടത്തണമെന്ന് അദ്ദേഹം ട്രംപിനോട് അഭ്യർഥിച്ചു.
ഹൂതികൾക്കെതിരേ ഇപ്പോൾ നേരിട്ടു സൈനിക നടപടിക്ക് അമേരിക്കയ്ക്കു താത്പര്യമില്ലെന്ന് ട്രംപ് ഭരണകൂടത്തിലെ ഉന്നതർ വെളിപ്പെടുത്തിയെന്നും റിപ്പോർട്ടിലുണ്ട്.
അതേസമയം, സുപ്രധാന കപ്പൽപാത സ്ഥിതി ചെയ്യുന്ന ചെങ്കടൽത്തീരത്തെ പുതിയ സംഭവവികാസങ്ങൾ ട്രംപ് ഭരണകൂടത്തെ ഉത്കണ്ഠയിലാക്കുന്നുണ്ട്. സൗദിക്കു സഹായം നല്കാൻ അമേരിക്ക തയാറാണെങ്കിലും ഹൂതികളെ നേരിട്ട് ആക്രമിക്കാൻ മടിയാണ്.
അമേരിക്കൻ സേനയിലെ പശ്ചിമേഷ്യാ പ്രദേശത്തിന്‍റെ ചുമതലയുള്ള യുഎസ് സെൻട്രൽ കമാൻഡിന്‍റെ മേധാവി അഡ്മിറൽ ബ്രാഡ് കൂപ്പർ വ്യാഴാഴ്ച സൗദിയിലെത്തി ഉന്നത വൃത്തങ്ങളുമായി ചർച്ച നടത്തി.
ഇറാനെതിരായ സൈനിക നടപടിക്കും ഹോർമുസ് കടലിടുക്കിന്‍റെ സുരക്ഷയ്ക്കുമാണ് അമേരിക്ക ഇപ്പോൾ മുൻഗണന നല്കുന്നതെന്ന് യുഎസ് വൃത്തങ്ങൾ സൗദി നേതൃത്വത്തെ ധരിപ്പിച്ചിട്ടുണ്ട്.
International
വാഷിംഗ്ടൺ ഡിസി: നവംബറിലെ മിഡ്ടേം തെരഞ്ഞെടുപ്പിൽ ഭരണപക്ഷ റിപ്പബ്ലിക്കൻ പാർട്ടി കോൺഗ്രസിലെ ഇരു സഭകളിലും ഭൂരിപക്ഷം നേടിയാൽ പ്രായപൂർത്തിയായ ഓരോ അമേരിക്കക്കാരനും 5,000 ഡോളർവച്ചു നല്കുമെന്ന് പ്രസിഡന്റ് ട്രംപ്. ട്രംപിന്റെ ഇറേനിയൻ യുദ്ധം മൂലം റിപ്പബ്ലിക്കൻ പാർട്ടിക്ക് ജനപ്രതിനിധിസഭയിലും സെനറ്റിലും ഭൂരിപക്ഷം നഷ്ടമായേക്കുമെന്ന സൂചനയ്ക്കിടെയാണ് ഈ വാഗ്ദാനം.
പാർട്ടി കൺവെൻഷനിലാണ് ട്രംപ് പ്രഖ്യാപനം നടത്തിയത്. ഇതിനുള്ള പണം എങ്ങനെ കണ്ടെത്തും എന്നതിനെക്കുറിച്ച് അദ്ദേഹം വിശദീകരിച്ചില്ല.
അമേരിക്കയിൽ പ്രായപൂർത്തിയായ 27 കോടി പേരുണ്ട്. ഇത്രയും പേർക്ക് അയ്യായിരം വച്ചു നല്കാൻ 1.3 ലക്ഷം കോടി ഡോളർ വേണ്ടിവരും.
തെരഞ്ഞെടുപ്പ് ജയിക്കാൻ അമേരിക്കൻ പ്രസിഡന്റ് വോട്ടർമാർക്ക് പണം വാഗ്ദാനം ചെയ്യുന്ന ആദ്യ സംഭവമായിരിക്കുമിത്. ഇതിന്‍റെ നിയമസാധുതയെക്കുറിച്ചും പ്രായോഗികതയെക്കുറിച്ചുമെല്ലാം ചോദ്യങ്ങൾ ഉയർന്നുകഴിഞ്ഞു. ട്രംപിന്‍റേത് ശൂന്യമായ വാഗ്ദാനമാണെന്ന് പ്രതിപക്ഷ ഡെമോക്രാറ്റുകൾ പ്രതികരിച്ചു.
ട്രംപ് ലോകരാജ്യങ്ങൾക്ക് ഇറക്കുമതി ചുങ്കം ചുമത്തി പിരിച്ചെടുത്തതിൽനിന്ന് ഇതിനാവശ്യമായ തുക കണ്ടെത്താനാകുമെന്ന് വൈസ് പ്രസിഡന്റ് ജെ.ഡി. വാൻസ് സൂചിപ്പിച്ചു. അടിസ്ഥാനപരമായി അമേരിക്കൻ തൊഴിലാളികൾക്ക് ട്രംപ് നല്കുന്ന ഡിവിഡന്‍റ് ആണിതെന്നും വാൻസ് വിശദീകരിക്കാൻ ശ്രമിച്ചു.
ഇറാൻ യുദ്ധം മൂലം ഇന്ധനത്തിന്‍റെയും അവശ്യവസ്തുക്കളുടെയും വില ഉയരുന്നത് അമേരിക്കൻ ജനതയെ അസ്വസ്ഥരാക്കുന്നുണ്ട്. ട്രംപിന്റെ ജനപ്രീതിയിൽ വലിയ ഇടിവുണ്ടെന്നാണ് അഭിപ്രായ സർവേകൾ പറയുന്നത്. യുദ്ധം അവസാനിപ്പിക്കാനായി റിപ്പബ്ലിക്കൻ നേതാക്കൾ ട്രംപിനുമേൽ സമ്മർദം ചെലുത്തുന്നുണ്ട്.
International
മോസ്കോ: അമേരിക്കൻ പ്രസിഡന്റ് ഡോണൾഡ് ട്രംപ്, റഷ്യൻ പ്രസിഡന്റ് വ്ലാദിമിർ പുടിൻ, ചൈനീസ് പ്രസിഡന്റ് ഷി ചിൻപിംഗ് എന്നിവരുടെ ത്രികക്ഷി ചർച്ചയ്ക്കു സാധ്യത. ട്രംപും പുടിനും ഫോണിൽ ഇക്കാര്യം ചർച്ച ചെയ്തുവെന്ന് റഷ്യൻ വൃത്തങ്ങൾ അറിയിച്ചു.
നവംബറിൽ ചൈനയിലെ ഷെൻസെൻ നഗരത്തിൽ നടക്കുന്ന ഏഷ്യാ-പസഫിക് സാന്പത്തിക സഹകരണ ഉച്ചകോടിയായിരിക്കും വേദി. ഇതിനു മുന്പ് മൂന്നു നേതാക്കളും ത്രികക്ഷി കൂടിക്കാഴ്ച നടത്തിയിട്ടില്ല.
നവംബർ 18-19 തീയതികളിൽ നിശ്ചയിച്ചിരിക്കുന്ന ഉച്ചകോടിയിൽ പുടിൻ പങ്കെടുക്കുമെന്നാണ് റഷ്യൻ വൃത്തങ്ങൾ സൂചിപ്പിച്ചിട്ടുള്ളത്. ട്രംപ് പങ്കെടുക്കുന്ന കാര്യം വൈറ്റ്ഹൗസ് വൃത്തങ്ങൾ പ്രഖ്യാപിച്ചിട്ടില്ല.
യുക്രെയ്ൻ യുദ്ധം അടക്കമുള്ള വിഷയങ്ങൾ ലോക നേതാക്കളുടെ പ്രഥമ ത്രികക്ഷി കൂടിക്കാഴ്ചയിൽ ചർച്ചയായേക്കും.
International
മോസ്കോ: റഷ്യ-യുക്രെയ്ൻ യുദ്ധം അവസാനിപ്പിക്കുന്നതിനുള്ള ചർച്ചകൾക്കായി അമേരിക്കൻ പ്രതിനിധിസംഘം മോസ്കോയിലെത്തി. യുഎസ് പ്രസിഡന്റ് ഡോണൾഡ് ട്രംപിന്റെ പ്രത്യേക ദൂതൻ സ്റ്റീവ് വിറ്റ്‌കോഫ്, മരുമകൻ ജാരെദ് കുഷ്‌നർ എന്നിവരടങ്ങുന്ന സംഘമാണ് റഷ്യൻ തലസ്ഥാനത്തെത്തിയത്. റഷ്യയിലെ ചർച്ചകൾക്കുശേഷം സംഘം യുക്രെയ്ൻ തലസ്ഥാനമായ കീവും സന്ദർശിക്കും.
അമേരിക്കൻ സംഘത്തിന്‍റെ സന്ദർശനത്തിന്‍റെ പശ്ചാത്തലത്തിൽ ഇന്നലെ രാത്രിമുതൽ കീവിനുനേർക്കുള്ള ആക്രമണങ്ങൾ മൂന്നു ദിവസത്തേക്ക് നിർത്തിവയ്ക്കാൻ പുടിൻ ഉത്തരവിട്ടു. എന്നാൽ ഈ താത്കാലിക ആശ്വാസം തലസ്ഥാനമായ കീവിനു മാത്രമായിരിക്കുമെന്നും യുക്രെയ്ന്‍റെ മറ്റു ഭാഗങ്ങളിൽ ആക്രമണം തുടരുമെന്നും ക്രെംലിൻ വക്താവ് ദിമിത്രി പെസ്കോവ് വ്യക്തമാക്കി.
യുഎസ് സംഘത്തിന്‍റെ യുക്രെയ്ൻ സന്ദർശനത്തിനുള്ള മുന്നൊരുക്കങ്ങളുടെ ഭാഗമായാണ് ആക്രമണം താത്കാലികമായി നിർത്തിവയ്ക്കുന്നതെന്ന് ക്രെംലിൻ അറിയിച്ചു.
യുദ്ധം അവസാനിപ്പിക്കാനുള്ള നിർദേശങ്ങളുമായാണ് പ്രതിനിധിസംഘം റഷ്യയിലേക്കു പുറപ്പെട്ടിരിക്കുന്നതെന്ന് ട്രംപ് അവകാശപ്പെട്ടെങ്കിലും വിട്ടുവീഴ്ചകൾക്കു തയാറല്ലെന്ന സൂചനയാണ് റഷ്യ നൽകുന്നത്.
മോസ്കോ സന്ദർശനത്തിനുശേഷം ഇന്നു കീവിലെത്തുന്ന അമേരിക്കൻ സംഘവുമായി യുദ്ധം അവസാനിപ്പിക്കുന്നതിനുള്ള പ്രായോഗിക വഴികൾ ചർച്ച ചെയ്യുമെന്ന് യുക്രെയ്ൻ പ്രസിഡന്റ് വൊളോഡിമിർ സെലൻസ്കി വ്യക്തമാക്കി.
International
ടെഹ്റാൻ: ഇറാനിലെ പ്രധാന എണ്ണക്കയറ്റുമതി കേന്ദ്രമായ ഖാർഗ് ദ്വീപിനു സമീപം നങ്കൂരമിട്ടിരുന്ന എണ്ണ ടാങ്കറിനു നേർക്ക് അമേരിക്കൻ ആക്രമണം. നാലു മിസൈലുകൾ കപ്പലിൽ പതിച്ചതായി ഇറേനിയൻ മാധ്യമങ്ങൾ റിപ്പോർട്ട് ചെയ്തു.
ആക്രണവാർത്ത സ്ഥിരീകരിക്കാൻ അമേരിക്ക തയാറായിട്ടില്ല. ഇറാന്‍റെ ഭാഗത്തുനിന്നും പ്രതികരണം ഉണ്ടായിട്ടില്ല.
ആക്രമണത്തിൽ ആളപായമോ പരിക്കോ ഇല്ലെന്നാണ് റിപ്പോർട്ടിൽ പറയുന്നത്. കപ്പലിലുണ്ടായിരുന്ന ജീവനക്കാരെ ഒഴിപ്പിച്ചുമാറ്റി.
ഫെബ്രുവരിയിൽ യുദ്ധം ആരംഭിക്കുന്നതിനു മുന്പ് ഇറാന്‍റെ എണ്ണക്കയറ്റുമതിയുടെ 90 ശതമാനവും ഖാർഗ് ദ്വീപിലൂടെ ആയിരുന്നു. ഏപ്രിലിൽ അമേരിക്ക ഇറാന് നാവിക ഉപരോധം ഏർപ്പെടുത്തിയതോടെ ഖാർഗ് വഴിയുള്ള എണ്ണക്കയറ്റുമതി ഗണ്യമായി കുറഞ്ഞു.
ഖാർഗ് ദ്വീപ് പിടിച്ചെടുക്കുമെന്ന് അമേരിക്കൻ പ്രസിഡന്റ് ട്രംപ് പറഞ്ഞിട്ടുണ്ട്. അദ്ദേഹം ഓഗസ്റ്റ് അവസാനം ഖാർഗ് ദ്വീപിനെ അമേരിക്കൻ സേന ആക്രമിക്കുന്നതിന്‍റെ വീഡിയോ നിർമിത ബുദ്ധിയിൽ തയാറാക്കി പുറത്തുവിടുകയുണ്ടായി.
ഖാർഗിനു നേർക്കുള്ള ഏത് ആക്രമണവും, യുദ്ധവും ഉപരോധവും മൂലം സാന്പത്തികമായി തകർന്നടിഞ്ഞ ഇറാന് വലിയ ആഘാതമായിരിക്കും.
ഖാർഗ് ദ്വീപിനെ ആക്രമിച്ചാൽ കനത്ത തിരിച്ചടി നല്കുമെന്ന് ഇറാൻ മുന്നറിയിപ്പു നല്കിയിട്ടുണ്ട്.
International
വാഷിംഗ്ടൺ ഡിസി: ഇറാൻകാർക്ക് ഇപ്പോൾ ബാത്ത്റൂമിൽ പോലും പോകാൻ പറ്റാത്ത അവസ്ഥയാണെന്ന് യുഎസ് പ്രസിഡന്‍റ ്ട്രംപ്. ഇറാനിലെ മുഴുവൻ കാര്യങ്ങളും അമേരിക്കൻ നിരീക്ഷണത്തിലാണെന്ന് അവകാശപ്പെടുന്നതിനിടെയാണ് ട്രംപ് ഇക്കാര്യം പറഞ്ഞത്.
ചൊവ്വാഴ്ച രാത്രിയിലെ അമേരിക്കൻ ആക്രമണത്തിൽ ഇറാനു കനത്ത അടിയാണ് ഏറ്റതെന്ന് ട്രംപ് പറഞ്ഞു. ഹോർമുസ് കടലിടുക്ക് ഇപ്പോൾ അമേരിക്കയുടെ നിയന്ത്രണത്തിലാണ്.
ദശലക്ഷക്കണക്കിന് വീപ്പ എണ്ണ കയറ്റിയ കപ്പലുകളാണ് അമേരിക്ക ഓരോ ദിവസവും ഹോർമുസിലൂടെ പുറത്തെത്തിക്കുന്നത്. ഭൂരിഭാഗം സമയത്തും കാര്യമായ കുഴപ്പം ഉണ്ടാകാറില്ല. വല്ലപ്പോഴുമൊരിക്കൽ ഇറാനൊരു ഡ്രോൺ ആക്രമണം നടത്തും. പക്ഷേ, കടലിടുക്കിന്‍റെ പൂർണ നിയന്ത്രണം അമേരിക്കയ്ക്കാണ്.
റഡാർ സംവിധാനങ്ങളും മിസൈലുകളും പുനർനിർമിക്കാനുള്ള ശ്രമത്തിലായിരന്നു ഇറാൻ. കടലിൽ മൈനുകൾ വിതറുന്ന റോക്കറ്റ് വികസിപ്പിക്കാനും ശ്രമിച്ചിരുന്നു. ഞാൻ ആദ്യമായിട്ടാണ് ഇത്തരമൊരു കാര്യം കേൾക്കുന്നത്. ഇങ്ങനയൊക്കെ ആരാണു ചെയ്യുക.
പക്ഷേ, ഇതൊക്കെ അമേരിക്ക കാണുന്നുണ്ടായിരുന്നു. ഇറാൻകാർ ചെയ്യുന്നതെല്ലാം അമേരിക്ക നിരീക്ഷിക്കുന്നുണ്ട്. അവർക്ക് അനങ്ങാൻ പോലും പറ്റില്ല. അമേരിക്കക്കാർ കാണാതെ ബാത്ത്റൂമിൽ പോലും പോകാൻ ഇറാൻകാർക്കു പറ്റില്ല. ഇറാന്‍റെ ആയുധ വികസനപദ്ധതികളെല്ലാം അമേരിക്ക ആക്രമിച്ചു നശിപ്പിച്ചുവെന്നും ട്രംപ് കൂട്ടിച്ചേർത്തു.
ചൊവ്വാഴ്ച രാത്രിയിലെ അമേരിക്കൻ ആക്രമണത്തിൽ 18 പേർ കൊല്ലപ്പെടുകയും 108 പേർക്കു പരിക്കേൽക്കുകയും ചെയ്തുവെന്നാണ് ഇറാൻ അറിയിച്ചത്. വിവാഹ ആഘോഷത്തിനു നേർക്കും ആക്രമണമുണ്ടായി.
യുഎസ് ആക്രമണത്തിനു മറുപടിയായി കുവൈറ്റ്, ജോർഡൻ, യുഎഇ, ബഹ്റിൻ, ഇറാക്ക് എന്നീ രാജ്യങ്ങളിലെ അമേരിക്കൻ സൈനിക താവളങ്ങൾക്കു നേർക്ക് ഇറാൻ മിസൈലുകളും ഡ്രോണുകളും പ്രയോഗിച്ചു.
International
വാഷിംഗ്ടൺ ഡിസി: പ്രസിഡന്റ് ട്രംപിൻെ മുഖചിത്രത്തോടു കൂടിയ ഡോണളർ നാണയം യുഎസ് മിന്‍റ് (കമ്മട്ടം) പുറത്തിറക്കി. ജീവിച്ചിരിക്കുന്ന യുഎസ് പ്രസിഡന്‍റിന്‍റെ ചിത്രം നാണയത്തിൽ പ്രത്യക്ഷപ്പെടുന്നത് ഒരു നൂറ്റാണ്ടിനിടെ ആദ്യമാണെന്നു പറയുന്നു.
ഒരു ഡോളറാണ് നാണയത്തിന്‍റെ മൂല്യം. വിനിമയത്തിനായി ഇവ ഉപയോഗിക്കാമെന്നാണ് അറിയിപ്പ്.
ബുധനാഴ്ചയാണ് പുറത്തിറക്കിയത്. 25 എണ്ണത്തിന്‍റെ പാക്കറ്റ് 61 ഡോളർ കൊടുത്തു വാങ്ങാം. നൂറെണ്ണത്തിന്‍റെ പാക്കറ്റിന് 154.5 ഡോളറാണ് വില. പുറത്തിറക്കിയ ഉടൻ വിറ്റു തീർന്നുവെന്നാണ് അറിയിപ്പ്. ഇനി പുതിയവ അടിച്ചിറക്കണം.
ട്രംപിന്റെ പ്രതിച്ഛായ അടിച്ചേൽപ്പിക്കാനുള്ള പുതിയ നീക്കത്തിൽ വിമർശനം ശക്തമാണ്. അമേരിക്കൻ നിയമ പ്രകാരം ജീവിച്ചിരിക്കുന്ന പ്രസിഡന്‍റിന്‍റെ ചിത്രം നാണയത്തിലോ കറൻസി നോട്ടിലോ ഉൾപ്പെടുത്താൻ പാടില്ല.
എന്നാൽ പ്രത്യേക സാഹചര്യത്തിൽ നാണയം ഇറക്കാൻ ട്രഷറി സെക്രട്ടറിക്ക് അനുമതി നല്കുന്ന നിയമം ട്രംപിന്റെ ഒന്നാം ഭരണകാലത്തു പാസാക്കിയിരുന്നു. ഇതു പ്രകാരം അമേരിക്കൻ സ്വാതന്ത്ര്യദിനത്തിന്‍റെ 250-ാം വാർഷികത്തോട് അനുബന്ധിച്ച് ട്രംപിന്റെ ചിത്രമുള്ള നാണയം പുറത്തിറക്കുകയായിരുന്നു.
നാണയത്തിന് സ്വർണനിറമാണെങ്കിലും ഇതിൽ സ്വർണത്തിന്‍റെ അംശമില്ല. 88.5 ശതമാനം ചെന്പാണ്. സിങ്ക്, മാംഗനീസ്, നിക്കൽ തുടങ്ങിയ ലോഹങ്ങളും ഉൾപ്പെടുന്നു.
“സ്വതന്ത്ര്യം” എന്ന വാക്കും “ദൈവത്തിൽ ഞങ്ങൾ വിശ്വസിക്കുന്നു” എന്ന ദേശീയ മുദ്രാവാക്യവും നാണയത്തിൽ രേഖപ്പെടുത്തിയിട്ടുണ്ട്.
സ്വാതന്ത്ര്യദിനത്തിന്‍റെ 150-ാം വാർഷികം ആഘോഷിച്ച 1926ൽ അന്നത്തെ പ്രസിഡന്റ് കാൽവിൻ കൂളിഡ്ജിന്‍റെ ചിത്രം രേഖപ്പെടുത്തിയ അര ഡോളർ കറൻസി നോട്ട് പുറത്തിറക്കിയിരുന്നു.
International
വാഷിംഗ്ടൺ ഡിസി: അമേരിക്കയിൽ എച്ച്-4 വീസക്കാരുടെ തൊഴിലെടുക്കാനുള്ള അവകാശം റദ്ദക്കാനുള്ള നീക്കത്തിൽ ട്രംപ് ഭരണകൂടം. എച്ച്-1 ബി പോലുള്ള പ്രധാന വർക്ക് വീസകൾ ലഭിക്കുന്നവരുടെ ആശ്രിതരായ പങ്കാളികൾക്കും 21 വയസിനു താഴെയുള്ള അവിവാഹിതരായ മക്കൾക്കും ലഭിക്കുന്ന വീസയാണ് എച്ച്-4.
എച്ച്-1 ബി വീസക്കാരുടെ പങ്കാളികളായ എച്ച്-4 വീസക്കാർക്ക് തൊഴിലെടുക്കാൻ നല്കുന്ന അനുമതി റദ്ദാക്കാനാണ് നീക്കം. എച്ച്-ബി വീസക്കാരിൽ ഭൂരിഭാഗവും ഇന്ത്യക്കാരാണ്. അതിനാൽ പ്രസിഡന്റ് ട്രംപിന്റെ ഈ കുടിയേറ്റവിരുദ്ധ നടപടിയും ബാധിക്കുക ഇന്ത്യക്കാരെയായിരിക്കും.
2014 മുതൽ 2017 വരെയുള്ള കണക്കെടുത്താൽ എച്ച് -4 വീസക്കാരിൽ തൊഴിലെടുക്കാൻ അനുമതി ലഭിച്ചതിൽ 93 ശതമാനവും ഇന്ത്യക്കാരാണെന്നു കാണാം. ഇതിൽത്തന്നെ 94 ശതമാനം വനിതകളായിരുന്നു.
എന്നു മുതലാണ് ട്രംപ് ഭരണകൂടത്തിന്‍റെ പുതിയ തീരുമാനം നടപ്പാക്കുക എന്നറിയിച്ചിട്ടില്ല.
International
വാഷിംഗ്ടൺ ഡിസി: പ്രസിഡന്റ് ട്രംപിന്റെ കനേഡിയൻ നയങ്ങളോടും അമേരിക്കൻ ജനതയ്ക്കു മതിപ്പില്ല. വ്യാപാര ചർച്ച പൊളിഞ്ഞതിനു പിന്നാലെ കാനഡയ്ക്കു മേൽ 50 ശതമാനം ഇറക്കുമതി ചുങ്കം ചുമത്തിയ ട്രംപിന്റെ നടപടിക്കു തീർത്തും സ്വീകാര്യതയില്ലെന്ന് റോയിട്ടേഴ്സ്/ഇപ്സോസ് അഭിപ്രായ സർവേയിൽ തെളിഞ്ഞു. ഒന്‍റാരിയോ തടാകത്തിന്‍റെ പേര് അമേരിക്കൻ തടാകം എന്നാക്കിയ ട്രംപിന്റെ നടപടിയും തെറ്റായി എന്നാണ് സർവേയിൽ പങ്കെടുത്തവർ അഭിപ്രായപ്പെട്ടത്.
സഹോദരരാജ്യത്തെപ്പോലെ തുടരുന്ന കാനഡയോട് പ്രസിഡന്റ് ട്രംപ് വ്യാപാര കാര്യങ്ങളിൽ സ്വീകരിക്കുന്ന ശത്രുതാ മനോഭാവം അമേരിക്കൻ ജനതയിൽ കട ുത്ത അതൃപ്തിക്കു കാരണമായി എന്നാണ് തെളിയുന്നത്.
സർവേയിൽ, കാനഡയ്ക്കുമേൽ അധികച്ചുങ്കം ചുമത്തുന്നതിനെ പിന്തുണച്ചത് 20 ശതമാനം പേർ മാത്രമാണ്. 57 ശതമാനം പേർ നടപടിയെ എതിർത്തു. 21 ശതമാനത്തിന് ക്യതമായ നിലപാടില്ലായിരുന്നു. കുറച്ചുപേർ ഇക്കാര്യങ്ങളെക്കുറിച്ച് കേട്ടറിവില്ലാത്തവരായിരുന്നു.
വ്യാപാര ചർച്ച പൊളിഞ്ഞതിനു പിന്നാലെയാണ് യുഎസ്-കാനഡ അതിർത്തിയിലെ ഒന്‍റാരിയോ തടാകത്തിന്‍റെ പേരും ട്രംപ് അമേരിക്കൻ തടാകം എന്നാക്കി ഉത്തരവ് പുറപ്പെടുവിച്ചത്. കാനഡയിലെ ഒന്‍റാരിയോ പ്രവിശ്യയുടെ പേരാണ് തടാകത്തിന്.
തടാകത്തിന്‍റെ പേരുമാറ്റത്തെ സർവേയിൽ പിന്തുണയ്ക്കാൻ തയാറായത് 14 ശതമാനം പേരാണ്.
ട്രംപിന്റെ നയങ്ങൾ നവംബറിലെ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിക്കു വലിയ തിരിച്ചടി സമ്മാനിക്കുമെന്നാണ് സൂചന. ഇറാൻ യുദ്ധം മൂലം ജീവിതച്ചെലവ് ഉയർന്നത് തെരഞ്ഞെടുപ്പിൽ പ്രതിഫലിക്കുമെന്ന് മുന്പൊരു അഭിപ്രായ സർവേയിൽ തെളിഞ്ഞിരുന്നു.
International
ഹേഗ്: യുഎസ് പ്രസിഡന്റ് ഡോണൾഡ് ട്രംപിന്റെ മുഖത്തിന്‍റെ ആകൃതിയോടു സാമ്യമുള്ള മാരക ലഹരിഗുളികയെക്കുറിച്ച് മുന്നറിയിപ്പുമായി നെതർലൻഡ്‌സിലെ മയക്കുമരുന്ന് വിരുദ്ധ മാനസികാരോഗ്യ സംഘടനയായ ട്രിംബോസ് ഇൻസ്റ്റിറ്റ്യൂട്ട്. മരണത്തിനുവരെ കാരണമായേക്കാവുന്ന ഗുളികകൾ കർശനമായി വിലക്കി രാജ്യത്ത് ചുവപ്പുജാഗ്രത പുറപ്പെടുവിച്ചു.
ലഹരിമരുന്ന് പരിശോധിക്കുന്ന ഡച്ച് ഡ്രഗ് ടെസ്റ്റിംഗ് കേന്ദ്രങ്ങളിൽ കഴിഞ്ഞദിവസങ്ങളിൽ ഇത്തരം ഗുളികകൾ ലഭിച്ച പശ്ചാത്തലത്തിലാണ് മുന്നറിയിപ്പ്. പച്ച, മഞ്ഞ നിറങ്ങളിലാണ് ഗുളികകൾ വിപണിയിലുള്ളത്. ഒരുവശത്ത് ട്രംപിന്റെ മുഖസാമ്യമുള്ള മരുന്നിന്‍റെ മറുവശത്ത് ‘എൻഎൽ’, ‘ട്രംപ്’ എന്നിങ്ങനെ എഴുതിയിട്ടുണ്ട്. സാധാരണ ലഹരിഗുളികകളിൽ അടങ്ങിയിട്ടുള്ള എംഡിഎംഎ ഘടകത്തിനു പകരം ഇതിൽ മാരകമായ പാരാ-മെഥോക്‌സിമെഥാംഫെറ്റാമെൻ (പിഎംഎംഎ) അടങ്ങിയിരിക്കുന്നു.
ഇതിന്‍റെ ഉപയോഗം ശരീരതാപം അമിതമായി കൂടാനിടയാക്കും. എംഡിഎംഎയെക്കാൾ സാവധാനമാണ് പിഎംഎംഎയുടെ പ്രവർത്തനം എന്നതിനാൽ അമിത അളവിൽ ഗുളിക കഴിക്കാനുള്ള സാധ്യതയുണ്ടെന്നും അത് ജീവഹാനിക്ക് കാരണമാകാമെന്നും മുന്നറിയിപ്പുണ്ട്. രാജ്യത്ത് ഇതുവരെ ഗുളിക കഴിച്ച് ആർക്കും ആരോഗ്യപ്രശ്നമോ മരണമോ റിപ്പോർട്ടുചെയ്തിട്ടില്ല. 2017ൽ ജർമൻ പോലീസും സമാനമായ ഓറഞ്ചുനിറത്തിലുള്ള ട്രംപിന്റെ മാഖാകൃതിയിലുള്ള ഗുളികകൾ പിടിച്ചെടുത്തിരുന്നു.
International
വാഷിംഗ്ടൺ ഡിസി: കാനഡയുമായി വ്യാപാരചർച്ച പൊളിഞ്ഞതിന്‍റെ അരിശം തീരാത്ത അമേരിക്കൻ പ്രസിഡന്റ് ഡോണൾഡ് ട്രംപ്, ഒന്‍റാരിയോ തടാകത്തിന്‍റെ പേര് അമേരിക്കൻ തടാകം എന്നാക്കാൻ ഉത്തരവിറക്കി.
ഇരു രാജ്യങ്ങൾക്കുമിടയിൽ സ്ഥിതി ചെയ്യുന്ന തടാകം കാനഡയിലെ ഒന്‍റാരിയോ പ്രവിശ്യയുടെ പേരിലാണ് അറിയപ്പെടുന്നത്. തടാകത്തിന്‍റെ വടക്ക്, പടിഞ്ഞാറ്, തെക്കുപടിഞ്ഞാറ് ഭാഗങ്ങളിൽ ഒന്‍റാരിയോ പ്രവിശ്യ ആണ്. ബാക്കി ഭാഗങ്ങളിൽ അമേരിക്കയിലെ ന്യൂയോർക്ക് സംസ്ഥാനവും.
കഴിഞ്ഞയാഴ്ചയാണ് അമേരിക്ക-കാനഡ വ്യാപര ചർച്ച പൊളിഞ്ഞത്. അമേരിക്കൻ നിർദേശങ്ങൾ അംഗീകരിക്കാവില്ല എന്നു വ്യക്തമാക്കി കനേഡിയൻ പ്രധാനമന്ത്രി മാർക്ക് കാർണി അവസാന നിമിഷം ചർച്ചയിൽനിന്ന് പിന്മാറുകയായിരുന്നു.
ഇതോടെ കാനഡയ്ക്കുമേൽ അമേരിക്കയുടെ 50 ശതമാനം ചുങ്കം നിലവിൽവന്നു. കാനഡയും അമേരിക്കയ്ക്കെതിരേ സമാന നടപടികൾ പ്രഖ്യാപിച്ചു.
ഒന്‍റാരിയോ തടാകത്തിന്‍റെ പേരുമാറ്റം 30 ദിവസത്തിനുള്ളിൽ നടപ്പാക്കണം എന്നാണ് ട്രംപ് ഉത്തരവിലൂടെ ബന്ധപ്പെട്ട അമേരിക്കൻ അധികൃതരോട് നിർദേശിച്ചിരിക്കുന്നത്.
അതേസമയം, ഒരോന്നിനും അതിന്‍റെ പേരുണ്ടെന്നും ഈ തടാകം ഇന്നും എന്നും ഒന്‍റാരിയോ തടാകം എന്നറിയിപ്പെടുമെന്നും മാർക്ക് കാർണി പ്രതികരിച്ചു. ഈ പേര് നിലവിൽവന്നിട്ട് 400 വർഷമായെന്നും അദ്ദേഹം ചൂണ്ടിക്കാട്ടി.
ട്രംപ് 2025ൽ രണ്ടാമത് അധികാരത്തിലേറിയതിനു പിന്നാലെ മെക്സിക്കൻ ഉൾക്കടലിന്‍റെ പേര് അമേരിക്കൻ ഉൾക്കടൽ എന്നാക്കി ഉത്തരവിറക്കിയിരുന്നു. മെക്സിക്കോ ഇതിനെ ശക്തമായി എതിർത്തു.
അമേരിക്കയിൽ ലഭിക്കുന്ന ഗൂഗിൾ മാപ്പിൽ ‘അമേരിക്കൻ ഉൾക്കടൽ’ എന്നാണ് രേഖപ്പെടുത്തിയിരിക്കുന്നത്. മെക്സിക്കോയിലെ ഗൂഗിൾ മാപ്പിൽ ‘മെക്സിക്കൻ ഉൾക്കടൽ’ എന്നും. ഇതര ഭാഗങ്ങളിൽ ‘മെക്സിക്കൻ ഉൾക്കടൽ (അമേരിക്കൻ ഉൾക്കടൽ)’ എന്നു കാണും .
International
വാഷിംഗ്ടൺ ഡിസി: എച്ച്-1ബി വീസയ്ക്ക് ലക്ഷം ഡോളർ ഫീസ് പുനസ്ഥാപിച്ച് സ്ഥിരപ്പെടുത്താനുള്ള നീക്കത്തിൽ ട്രംപ് ഭരണകൂടം. ഇതിനുള്ള നിയമത്തിന്‍റെ കരട് ഫെഡറൽ രജിസ്റ്ററിൽ പ്രസിദ്ധീകരിച്ചു. പൊതുജനങ്ങൾക്ക് അഭിപ്രായം അറിയിക്കാൻ ഒരു മാസത്തെ സമയമുണ്ട്. വർഷാവസാനത്തോടെ നിയമത്തിന് അന്തിമരൂപമാകും.
വൈദഗ്ധ്യം കൂടുതൽ വേണ്ട മേഖലകളിലെ തൊഴിലുകൾക്കായി അനുവദിക്കുന്ന എച്ച്-1ബി വീസയ്ക്കുള്ള ഫീസ് ഒരു ലക്ഷം ഡോളറായി കുത്തനെ ഉയർത്താനുള്ള താത്കാലിക ഉത്തരവ് പ്രസിഡന്റ് ട്രംപ് കഴിഞ്ഞ വർഷം പുറത്തിറക്കിയിരുന്നു. നേരത്തേ 2,000 മുതൽ 5,000 വരെ ഡോളറാണ് ഫീസായി നല്കേണ്ടിയിരുന്നത്.
കോടതി ഇക്കഴിഞ്ഞ ജൂണിൽ അധികഫീസ് നിയമവിരുദ്ധമെന്ന് പ്രഖ്യാപിക്കുകയും അതു പിരിക്കുന്നത് തടയുകയും ചെയ്ത് ഉത്തരവ് പുറപ്പെടുവിച്ചു. ഇതിനെതിരേയുള്ള ട്രംപ് ഭരണകൂടത്തിന്‍റെ അപ്പീൽ ഉന്നത കോടതി പരിഗണിച്ചുവരികയാണ്.
കോടതി ഉത്തരവിന്‍റെ പശ്ചാത്തലത്തിലും ഫീസ് ഈടാക്കുന്നതിൽനിന്ന് പിന്നോട്ടില്ലെന്നാണ് പുതിയ നീക്കത്തിലൂടെ ട്രംപ് ഭരണകൂടം വ്യക്തമാക്കുന്നത്. 1.03 ലക്ഷം ഡോളർ ഫീസ് ഈടാക്കാനാണ് പുതിയ നിർദേശം.
എച്ച്-1ബി വീസയുടെ ഗുണഭോക്താക്കളിൽ ഭൂരിഭാഗവും ഇന്ത്യക്കാരാണ്. അതിനാൽ ട്രംപിന്റെ നീക്കത്തിൽ തിരിച്ചടി നേരിടുന്നതും അമേരിക്ക സ്വപ്നം കാണുന്ന ഇന്ത്യൻ ടെക്കികളായിരിക്കും. കുടിയേറ്റവിരുദ്ധ നിലപാടുകളുടെ ഭാഗമായിട്ടാണ് എച്ച്-1ബി വീസക്കാരെയും ട്രംപ് ലക്ഷ്യമിടുന്നത്.
National
ന്യൂഡൽഹി: കഴിഞ്ഞ ജൂണിൽ ഫ്രാൻസിൽ നടന്ന ജി 7 ഉച്ചകോടിയുടെ അനുബന്ധമായി പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡോണൾഡ് ട്രംപും തമ്മിൽ നടത്തിയ കൂടിക്കാഴ്ചയ്ക്ക് മുൻപ് മാധ്യമങ്ങളുമായി സംവാദം വേണ്ടെന്ന ഇന്ത്യയുടെ അഭ്യർഥന ട്രംപ് തള്ളിയതായി റിപ്പോർട്ട്. ഇന്ത്യയിലെ യുഎസ് അംബാസഡർ സെർജിയോ ഗോറാണ് ഒരു മാധ്യമ പരിപാടിയിൽ ഇക്കാര്യം വെളിപ്പെടുത്തിയത്.
പ്രസിഡന്റ് ട്രംപിന്റെ അപ്രതീക്ഷിത പെരുമാറ്റ രീതികൾ മുന്നിൽ കണ്ടാണ് ഇന്ത്യ മുൻകരുതൽ എന്ന നിലയിൽ മാധ്യമപ്രവർത്തകരുടെ ചോദ്യോത്തര വേള ഒഴിവാക്കണമെന്ന് ആവശ്യപ്പെട്ടിരുന്നത്. ഉന്നതതല നയതന്ത്ര സന്ദർശനങ്ങളുടെ ഭാഗമായി നേതാക്കളുടെ മാധ്യമ സമ്പർക്കത്തെക്കുറിച്ച് മുൻകൂട്ടി ധാരണയിലെത്തുന്നത് സാധാരണ നടപടിയാണെന്നും ഇന്ത്യ അത്തരം നിലപാടാണ് വ്യക്തമാക്കിയതെന്നും അധികൃതർ അറിയിച്ചു.
ഇന്ത്യൻ ഭാഗത്തുനിന്നുള്ള അഭ്യർഥന ട്രംപിനെ അറിയിച്ചെങ്കിലും, കൂടിക്കാഴ്ച ആരംഭിച്ചയുടൻ മാധ്യമപ്രവർത്തകരോട് "എന്തെങ്കിലും ചോദ്യങ്ങളുണ്ടോ?" എന്ന് ചോദിച്ച് ട്രംപ് അത് ഒരു പൂർണ വാർത്താസമ്മേളനമാക്കി മാറ്റുകയായിരുന്നു. ഇറാന് എതിരായ യുഎസ് സൈനിക നടപടിക്കിടെ ഇന്ത്യൻ നാവികർ കൊല്ലപ്പെട്ടതിനും ഹോർമൂസ് കടലിടുക്കിലെ ഗതാഗത തടസങ്ങൾക്കും തൊട്ടുപിന്നാലെയായിരുന്നു ഈ നിർണായക കൂടിക്കാഴ്ച നടന്നത്.
International
വാഷിംഗ്ടൺ ഡിസി: സൗദി അറേബ്യ, തുർക്കി, പാക്കിസ്ഥാൻ എന്നീ രാജ്യങ്ങൾ തമ്മിൽ ഒപ്പുവച്ച സംയുക്ത പ്രതിരോധകരാറിനെ സ്വാഗതം ചെയ്ത് യുഎസ് പ്രസിഡന്റ് ഡോണൾഡ് ട്രംപ്. മേഖലയിലെ സുരക്ഷ ഉറപ്പാക്കുന്നതിനുള്ള ധീരമായ, സുപ്രധാനമായ ആദ്യ ചുവടുവയ്പാണെന്നാണു കരാറിനെ ട്രംപ് വിശേഷിപ്പിച്ചത്.
‘സൗദി, തുർക്കി, പാക്കിസ്ഥാൻ എന്നീ രാജ്യങ്ങൾ അടുത്തിടെ ഒപ്പുവച്ച സംയുക്ത പ്രതിരോധകരാറിൽ വലിയ സന്തോഷമുണ്ട്.
പശ്ചിമേഷ്യൻ രാജ്യങ്ങൾ ഒന്നിച്ചുനിൽക്കുന്നതിന്‍റെയും തങ്ങളുടെ സുരക്ഷ കൂടുതൽ ഫലപ്രദമായി ഉറപ്പാക്കാൻ രാജ്യങ്ങൾക്കു സാധിക്കുമെന്നതിന്‍റെയും തെളിവാണിത്.’-സാമൂഹികമാധ്യമമായ ട്രൂത്ത് സോഷ്യലിൽ ട്രംപ് കുറിച്ചു.
International
വാഷിംഗ്ടൺ ഡിസി: അമേരിക്കൻ പ്രസിഡന്‍റ ്ട്രംപ് കഴിഞ്ഞമാസം തുർക്കിയിലെ നാറ്റോ ഉച്ചകോടി കഴിഞ്ഞു മടങ്ങവേ രഹസ്യമായി വിമാനം മാറാൻ കാരണം ഇസ്രയേൽ നല്കിയ ഇന്‍റലിജൻസ് മുന്നറിയിപ്പ്. എന്നാൽ ഇസ്രേലി മുന്നറിയിപ്പിന് സാധുത ഇല്ലെന്നാണ് അമേരിക്കൻ ചാരസംഘടനകൾ വിലയിരുത്തിയത്. എന്നിരുന്നാലും മുൻകരുതലെന്ന നിലയിലാണ് ട്രംപിനെ എയർഫോഴ്സ് വൺ വിമാനത്തിൽനിന്ന് ചെറിയ സൈനിക വിമാനത്തിലേക്കു മാറ്റിയതെന്ന് റിപ്പോർട്ടുകളിൽ പറയുന്നു.
ട്രംപിന്റെ എയർഫോഴ്സ് വൺ വിമാനത്തിനു നേർക്ക് ഇറാൻ മിസൈൽ പ്രയോഗിച്ചേക്കാം എന്നായിരുന്നു ഇസ്രിേലി ഇന്‍റലിജൻസ് മുന്നറിയിപ്പ്. ഇസ്രേലി സർക്കാർ ഇക്കാര്യം അമേരിക്കൻ ചാരസംഘടനയായ സിഐഎയെയാണ് അറിയിച്ചത്. എന്നാൽ ഇസ്രേലി മുന്നറിയിപ്പിൽ കാര്യമില്ലെന്ന നിഗമനത്തിലാണ് സിഐഎ എത്തിയത്.
തുർക്കിയിലെ ചാരസംഘടനകളും ഭീഷണിയെക്കുറിച്ച് അന്വേഷിച്ചു. ട്രംപിനെ വധിക്കാനുള്ള പദ്ധതികൾ ഇന്നലെന്ന നിഗമനത്തിലാണ് അവരും എത്തിയത്.
എന്നാൽ മുന്പ് വധശ്രമങ്ങൾ നേരിട്ടിട്ടുള്ള ട്രംപിന്റെ കാര്യത്തിൽ വിട്ടുവീഴ്ച വേണ്ടെന്നാണ തീരുമാനത്തിലാണ് അമേരിക്കൻ സുരക്ഷാ ഉദ്യോഗസ്ഥർ അവസാനമെത്തിയത്. പ്രസിഡന്‍റിന്‍റെ സുരക്ഷാ ചുമതലയുള്ള സീക്രട്ട് സർവീസ് ഏജൻസിയാണ് വിമാനം മാറാനുള്ള പദ്ധതി തയാറാക്കിയതും നടപ്പാക്കിയതും.
ട്രംപ് കാറ്ററിംഗ് ട്രക്കിൽ രഹസ്യമായി പുറത്തു കടന്ന് സൈനിക വിമാനത്തിൽ കയറിയെങ്കിലും യുഎസ് വിദേശകാര്യ സെക്രട്ടറി മാർക്കോ റൂബിയോ, ട്രഷറി സെക്രട്ടറി സ്കോട്ട് ബസന്‍റ് എന്നിവർ എയർഫോഴ്സ് വണ്ണിൽ തുടർന്നു. ട്രംപ് വിമാനം മാറിയതിനെക്കുറിച്ച് റൂബിയോയ്ക്ക് അറിവുണ്ടായിരുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്.
International
വാഷിംഗ്ടൺ ഡിസി: കഴിഞ്ഞ മാസം നാറ്റോ ഉച്ചകോടി കഴിഞ്ഞ് തുർക്കിയിൽനിന്ന് മടങ്ങവേ രഹസ്യമായി വിമാനം മാറിയെന്ന് അമേരിക്കൻ പ്രസിഡന്റ് ഡോണൾഡ് ട്രംപ് സ്ഥിരീകിരച്ചു. ഭീഷണിയുടെ പശ്ചാത്തലത്തിൽ സീക്രട്ട് സർവീസും സൈന്യവും ആവശ്യപ്പെട്ടതിനാലായിരുന്നു ഇത്. അവർ പറഞ്ഞത് അനുസരിക്കേണ്ടിവന്നുവെന്നാണ് ട്രംപ് വിശദീകരിച്ചത്.
ഇറാനിൽനിന്നുള്ള ഭീഷണി മൂലമായിരുന്നു ഇതെന്ന് അമേരിക്കൻ മാധ്യമങ്ങൾ നേരത്തേ റിപ്പോർട്ട് ചെയ്തിരുന്നു.
കഴിഞ്ഞമാസം എട്ടിനായിരുന്നു സംഭവം. തുർക്കിയിൽനിന്ന് മടങ്ങനായി എയർഫോഴ്സ് വൺ വിമാനത്തിൽ കയറിയ ട്രംപിനെ സുരക്ഷാ ഉദ്യോഗസ്ഥർ രഹസ്യമായി ട്രക്കിലേക്കു മാറ്റി മറ്റൊരു വിമാനത്തിൽ കയറ്റിക്കൊണ്ടുപോകുകയായിരുന്നു. എയർഫോഴ്സ് വണ്ണിലുണ്ടായിരുന്ന മാധ്യമപ്രവർത്തകരോ, ചില വൈറ്റ് ഹൗസ് ജീവനക്കാരോ ഇക്കാര്യം അറിഞ്ഞില്ല. കഴിഞ്ഞ ദിവസം അമേരിക്കൻ മാധ്യമങ്ങൾ റിപ്പോർട്ട് ചെയ്തപ്പോഴാണ് ഇക്കാര്യം പുറംലോകം അറിഞ്ഞത്.
തനിക്ക് വലിയ ഭീഷണി ഉണ്ടായിരുന്നുവെന്നാണ് ഊഹിക്കുന്നതെന്ന് ട്രംപ് പറഞ്ഞു. “ഞാൻ അതിനെക്കുറിച്ച് കൂടുതൽ ചോദിച്ചില്ല. എനിക്ക് ഒരുപാട് ഭീഷണികളുള്ളതാണ്. നിങ്ങൾക്കതിനെക്കുറിച്ചൊന്നും അറിയില്ല”.
Sports
ന്യൂയോര്‍ക്ക്: ഫിഫ പ്രസിഡന്റ് ജിയാനി ഇന്‍ഫാന്‍റീനോയ്ക്കായി ഒടുവില്‍ അമേരിക്കന്‍ പ്രസിഡന്റ് ഡോണള്‍ഡ് ട്രംപ് രംഗത്തിറങ്ങി.
ഇന്‍ഫാന്‍റീനോയുടെ രാജിക്കായുള്ള സമ്മര്‍ദം അതിശക്തമായിരിക്കേയാണ് ട്രംപിന്റെ രംഗപ്രവേശം. പ്രസിഡന്റ് സ്ഥാനത്തുനിന്ന് ഇന്‍ഫാന്‍റീനോയെ നീക്കുന്നത് അതിഭീകരമായ അബദ്ധം ആയിരിക്കുമെന്നു ട്രംപ് പറഞ്ഞു.
ഫിഫ പ്രസിഡന്റ് സ്ഥാനം നാലാം തവണയും മോഹിച്ചാണ് ഇന്‍ഫാന്‍റീനോയുടെ നീക്കം. ലോകകപ്പ് അടക്കമുള്ള ടൂര്‍ണമെന്‍റുകളിലേക്ക് സ്വകാര്യനിക്ഷേപം സ്വീകരിക്കാനുള്ള പദ്ധതിയാണ് ഇന്‍ഫാന്‍റീനോയ്ക്ക് എതിരായ പടയൊരുക്കത്തിനു കാരണം.
അടുത്ത വര്‍ഷം മാര്‍ച്ചില്‍ നടക്കാനിരിക്കുന്ന ഫിഫ പ്രസിഡന്റ് തെരഞ്ഞെടുപ്പിനു മുമ്പുതന്നെ ഇന്‍ഫാന്‍റീനോയെ പുറത്താക്കാനുള്ള നീക്കമാണ് യൂറോപ്യന്‍ ഫുട്‌ബോള്‍ സംഘടനയായ യുവേഫയുടെ നേതൃത്വത്തില്‍ നടക്കുന്നത്.
അമേരിക്ക, കാനഡ പ്രതിപക്ഷം
തിങ്കളാഴ്ച യൂറോപ്പ്, നോര്‍ത്ത് അമേരിക്ക, ഏഷ്യ കോണ്‍ഫെഡറേഷനുകള്‍ സംയുക്തമായി ജിയാനി ഇന്‍ഫാന്‍റീനോയ്ക്ക് എതിരേ അന്വേഷണം ആവശ്യപ്പെട്ടുള്ള തുറന്ന് കത്ത് എഴുതിയിരുന്നു. ഇതിനെ 2026 ലോകകപ്പ് ആതിഥേയരായിരുന്ന അമേരിക്ക, കാനഡ അസോസിയേഷനുകള്‍ പിന്തുണച്ചു.
2026 ഫിഫ ലോകകപ്പിലെ ആതിഥേയരില്‍ മെക്സിക്കോ മാത്രമാണ് ഇന്‍ഫാന്‍റീനോയെ പിന്തുണച്ചത്. ഇതിനു പിന്നാലെയാണ് ഇന്‍ഫാന്‍റീനോയ്ക്കു പിന്തുണയുമായി ട്രംപ് എത്തിയതെന്നതാണ് ശ്രദ്ധേയം.
2016 ഫെബ്രുവരിയിലാണ് ഇന്‍ഫാന്‍റീനോ ഫിഫ പ്രസിഡന്റ് സ്ഥാനത്ത് എത്തിയത്. 2027ല്‍ ചുമതല അവസാനിക്കും. എന്നാല്‍, അടുത്ത തെരഞ്ഞെടുപ്പില്‍ മത്സരിക്കാനുള്ള സന്നദ്ധത ഇന്‍ഫാന്‍റീനോ അറിയിച്ചു. തെരഞ്ഞെടുക്കപ്പെട്ടാല്‍ 2031വരെ ഇന്‍ഫാന്‍റീനോ തുടരും.
International
വാഷിംഗ്ടൺ ഡിസി: പ്രസിഡന്റ് ട്രംപിന്റെ മുൻ അഭിഭാഷകനായ റ്റോഡ് ബ്ലാഞ്ച് യുഎസ് അറ്റോർണി ജനറലായി നിയമിക്കപ്പെട്ടു. ട്രംപിന്റെ നാമനിർദേശം യുഎസ് സെനറ്റ് വോട്ടെടുപ്പിലൂടെ അംഗീകരിക്കുകയായിരുന്നു. നൂറംഗ സെനറ്റിൽ 49ന് എതിരേ 50 വോട്ടുകൾക്കാണ് നാമനിർദേശം പാസായത്. ട്രംപിന്റെ റിപ്പബ്ലിക്കൻ പാർട്ടിയിൽപ്പെട്ട രണ്ട് അംഗങ്ങൾ എതിർത്തു വോട്ട് ചെയ്തു.
അമേരിക്കൻ നീതിന്യായ വകുപ്പിന്‍റെ തലവനായ യുഎസ് അറ്റോർണി ജനറൽ പദവിയിൽ പ്രസിഡന്റ് ട്രംപുമായി നേരിട്ടു ബന്ധമുള്ളയാൾ നിയമിക്കപ്പെടുന്നതിൽ റിപ്പബ്ലിക്കൻ പാർട്ടിയിൽ തന്നെ ചിലർക്ക് എതിർപ്പുണ്ടായിരുന്നു. സ്വതന്ത്രമായി പ്രവർത്തിക്കുന്ന യുഎസ് അറ്റോർണി ജനറൽമാർ വൈറ്റ് ഹൗസിന്‍റെ സമ്മർദങ്ങളെ അതിജീവിച്ച ചരിത്രമാണ് ഇതുവരെയുള്ളത്.
പ്രമുഖ ക്രിമിനൽ അഭിഭാഷകനായിരുന്നു റ്റോഡ് ബ്ലാഞ്ച്. ട്രംപിനെതിരായ ക്രിമിനൽ കേസുകളിൽ അദ്ദേഹം നിയമോപദേശം നല്കിയിരുന്നു. 2020ലെ തെരഞ്ഞെടുപ്പ് അട്ടിമറിക്കേസിലും സ്വകാര്യ വസതിയിൽ രഹസ്യ രേഖകൾ സൂക്ഷിച്ചതുമായ ബന്ധപ്പെട്ട കേസിലും ട്രംപിന്റെ നിയമസംഘത്തെ നയിച്ചത് റ്റോഡ് ബ്ലാഞ്ച് ആയിരുന്നു.
യുഎഎസ് അറ്റോർണി ജനറലായിരുന്ന പാം ബോണ്ടി ഏപ്രിലിൽ രാജിവച്ച പശ്ചാത്തലത്തിലാണ് റ്റോഡ് ബ്ലാഞ്ചിന്‍റെ നിയമനം. ഏപ്രിൽ മുതൽ അദ്ദേഹം ഇടക്കാല അറ്റോർണി ജനറൽ പദവി വഹിച്ചുവരികയായിരുന്നു.
International
ലോസ് ആഞ്ചലസ്: അമേരിക്കൻ പ്രസിഡന്‍റ ട്രംപിന്റെ ഉടമസ്ഥതയിലുള്ള ഗോൾഫ് കളിസ്ഥലത്തിനു സമീപം ആയുധവുമായി ഒരാൾ അറസ്റ്റിലായി. ലോസ് ആഞ്ചലസിലെ റാഞ്ചോ പാലോസ് വെർദെയിലുള്ള ‘ട്രംപ് നാഷണൽ ഗോൾഫ് കോഴ്സിൽ’ ട്രംപ് സന്ദർശനത്തിനെത്തുന്നതിനു മുന്പായിരുന്നു സംഭവം.
ഷെനീൻ ജോൺ തായേൽ എന്ന മുപ്പത്തെട്ടുകാരനാണ് അറസ്റ്റിലായത്. ഇയാളുടെ പക്കൽനിന്ന് തോക്കും മറ്റ് നിരോധിത ആയുധങ്ങളും കണ്ടെടുത്തു. പിന്നീട് വീട്ടിൽ നടത്തിയ തെരച്ചിലിൽ കൂടുതൽ തോക്കുകളും വെടിയുണ്ടകളും കണ്ടെത്തി.
ഗോൾഫ് കളിസ്ഥലത്തു പ്രവേശിച്ച ഇയാൾ ഫോട്ടോകളും വീഡിയോകളും പകർത്തുകയും സുരക്ഷാ സംവിധാനങ്ങൾ നിരീക്ഷിക്കുയും ചെയ്തു. മഫ്റ്റിയിലായിരുന്ന സുരക്ഷാ ഉദ്യോഗസ്ഥരാണ് ഇയാളെ പിടികൂടിയത്. 25 കിലോമീറ്റർ അകലെയുള്ള ഒരു പോലീസ് സ്റ്റേഷനിൽ ഇയാൾക്കെതിരേ ഒരു മോഷണക്കേസുള്ളതായി കണ്ടെത്തിയിട്ടുണ്ട്.
റിപ്പബ്ലിക്കൻ പാർട്ടിക്കു ഫണ്ട് കണ്ടെത്താനായി ട്രംപ് ചൊവ്വാഴ്ച ഈ ഗോൾഫ് കോഴ്സിൽ
International
റിയാദ്: ഇറാനുമായുള്ള സംഘർഷം വർധിപ്പിക്കരുതെന്ന് സൗദി ഭരണനിയന്താവ് മുഹമ്മദ് ബിൻ സൽമാൻ രാജകുമാരൻ അമേരിക്കൻ പ്രസിഡന്റ് ട്രംപിനോട് ആവശ്യപ്പെട്ടു.
ഇറാനെ ആക്രമിക്കാനുള്ള പദ്ധതി ഉപേക്ഷിച്ചെന്ന് ട്രംപ് അറിയിച്ച ശനിയാഴ്ച ഇരുവരും ഫോണിൽ സംസാരിച്ചുവെന്നാണു റിപ്പോർട്ട്.
അമേരിക്കൻ ആക്രമണത്തിനു പ്രതികാരമായി സൗദി അടക്കമുള്ള ഗൾഫ് രാജ്യങ്ങളിലെ എണ്ണ ഉത്പാദന-വിതരണ സംവിധാനങ്ങളെ ഇറാൻ ലക്ഷ്യമിട്ടേക്കുമെന്ന ആശങ്ക ട്രംപിനെ മുഹമ്മദ് രാജകുമാരൻ ധരിപ്പിച്ചുവെന്നാണു റിപ്പോർട്ടിൽ പറയുന്നത്.
കഴിഞ്ഞയാഴ്ച ഇറാക്കിലെ ഇറാൻ അനുകൂല സായുധസംഘങ്ങൾക്കുമേൽ യുഎസ് നടത്തിയ ആക്രമണത്തിൽ സൗദിയും പങ്കുചേർന്നിരുന്നു.
International
ന്യൂയോര്‍ക്ക്: ഗാസയിലെ ഹമാസ് ഭീകരരെ സമ്പൂര്‍ണമായി നിരായുധീകരിക്കുന്നതിനു കരാറിലെത്തിയെന്ന് യുഎസ് പ്രസിഡന്റ് ഡോണള്‍ഡ് ട്രംപ്.
ഇസ്രേലി സൈന്യം ഗാസയില്‍നിന്നു ഘട്ടംഘട്ടമായി പിന്മാറാനും ധാരണയായെന്ന് അദ്ദേഹം സോഷ്യൽ മീഡിയയിൽ അറിയിച്ചു. ട്രംപ് രൂപവത്കരിച്ച "ബോര്‍ഡ് ഓഫ് പീസ്' ആണ് ചരിത്രപരമായ കരാറിലെത്തിയത്. ഗാസയില്‍ പുതിയ ഭരണകൂടം സ്ഥാപിക്കുന്നതിനും കരാറായി. ഘട്ടങ്ങളായാണു കരാർ നടപ്പാക്കുകയെന്ന് ട്രംപ് പറഞ്ഞു.
“ഹമാസിന്‍റെ നിരായുധീകരണം പൂർത്തിയായാൽ ഇസ്രേലി സേനയെ ഗാസയിൽനിന്നു പിൻവലിക്കും. പുതിയ പലസ്തീൻ പോലീസിനൊപ്പം ചേർന്ന് ഇന്‍റർനാഷണൽ സ്റ്റെബിലൈസേഷൻ ഫോഴ്സ് ഗാസയിലെ ജനങ്ങളുടെ സുരക്ഷ ഉറപ്പാക്കും” -ട്രംപ് ട്രൂത്ത് സോഷ്യലിൽ കുറിച്ചു.
അതേസമയം, കരാറിൽ അവ്യക്തത തുടരുകയാണെന്ന വിലയിരുത്തലുണ്ട്.
ഹമാസ് ആയുധങ്ങൾ കൈമാറണമെന്നും തുരങ്കശൃംഖല നശിപ്പിക്കണമെന്നും ട്രംപ് നേരത്തേ അവതരിപ്പിച്ച 20 ഇന സമാധാന പദ്ധതിയിൽ ആവശ്യപ്പെടുന്നുണ്ട്. ഇസ്രേലി സേന പിന്മാറിയശേഷം പുതിയ ടെക്നോക്രാറ്റിക് പലസ്തീനിയൻ സർക്കാർ ഗാസയുടെ ഭരണം ഏറ്റെടുക്കുക, അന്താരാഷ്ട്ര സുരക്ഷാസേനയെ വിന്യസിക്കുക, ഗാസയുടെ പുനരുദ്ധാരണം നടത്തുക എന്നിവയും സമാധാന പദ്ധതിയിലെ നിർദേശങ്ങളാണ്.
ഒന്പതു മാസം മുന്പാണ് അമേരിക്കയുടെ മധ്യസ്ഥതയിൽ ഗാസയിൽ സമാധാന കരാർ ഒപ്പുവച്ചത്. എന്നാൽ, ഹമാസിന്‍റെ നിരായുധീകരണം, ഗാസയുടെ പുനർനിർമാണം തുടങ്ങിയ വിഷയങ്ങളിൽ ഇസ്രയേൽ-ഹമാസ് ചർച്ച വഴിമുട്ടി. യുദ്ധാനന്തര ഗാസയുടെ പുനര്‍നിര്‍മാണം, ഭരണം, സുരക്ഷ എന്നിവയുടെ മേല്‍നോട്ടത്തിനായി ഈ വര്‍ഷം ആദ്യം രൂപവത്കരിച്ച അന്താരാഷ് ട്ര സംഘടനയാണ് ബോര്‍ഡ് ഓഫ് പീസ്. ഡോണള്‍ഡ് ട്രംപ് ആണ് ഇതിന്‍റെ സ്ഥാപക ചെയര്‍മാന്‍.
വെടിനിർത്തൽ ധാരണയിലെ സുപ്രധാന ഭാഗമായ നിരായുധീകരണത്തിനു തങ്ങൾ സമ്മതിച്ചതായി ഇന്നലെ ഹമാസ് നേതൃത്വം അറിയിച്ചു. എന്നാൽ, ട്രംപിന്റെ കരാർ ഇസ്രയേലിനു സ്വീകാര്യമല്ലെന്ന് തീവ്ര വലതുപക്ഷ നേതാവും സുരക്ഷാ മന്ത്രിയുമായ ഇറ്റാമർ ബെൻ ഗിവർ പറഞ്ഞു.
ഹമാസിന്‍റെ യഥാർഥത്തിലുള്ള നിരായുധീകരണം പൂർത്തിയായാൽ മാത്രമേ ഗാസയിൽനിന്നു സേനയെ പിൻവലിക്കൂ എന്നാണു മുതിർന്ന ഇസ്രേലി ഉദ്യോഗസ്ഥൻ പറഞ്ഞത്.
International
വാഷിംഗ്ടൺ ഡിസി: ഇറാനുമായി നല്ലരീതിയിൽ ചർച്ച നടക്കുകയാണെന്നും കരാറിനു സാധ്യതയുണ്ടെന്നും അമേരിക്കൻ പ്രസിഡന്റ് ഡോണൾഡ് ട്രംപ് പറഞ്ഞു. ചർച്ച പരാജയപ്പെട്ടാൽ ഇറാനെതിരായ ആക്രമണം പുനരാരംഭിക്കുമെന്നും അദ്ദേഹം ഭീഷണി മുഴക്കി.
ഇതിനിടെ സൗദി, ജോർദാൻ, ഇറാഖ് എന്നീ രാജ്യങ്ങളിൽ ഇറാൻ അനുകൂലികൾ ഡ്രോൺ ആക്രമണം നടത്തി. അമേരിക്കൻ സേന ശനിയാഴ്ച മുതൽ ഇറാനിൽ ആക്രമണം നിർത്തിവച്ചിരിക്കുകയാണ്.
ഇറാനും അമേരിക്കയും മധ്യസ്ഥരുടെ സഹായത്താൽ സന്ദേശങ്ങൾ കൈമാറുന്നതായി ഇറേനിയൻ വിദേശകാര്യ മന്ത്രാലയം വക്താവ് ഇസ്മയിൽ ബാഗേയിൽ സ്ഥിരീകരിച്ചു. ഇറാൻ നയതന്ത്രമാർഗം ഉപേക്ഷിച്ചിട്ടില്ല.
ചർച്ച വേണണെന്ന് ഇറാൻ ആവശ്യപ്പെട്ടുവെന്ന വാർത്ത വ്യാജമാണെന്ന് അദ്ദേഹം കൂട്ടിച്ചേർത്തു. ട്രംപിന്റെ സ്വയംപ്രഖ്യാപിത വെടിനിർത്തൽ തുടരുന്നിടത്തോളം കാലം ഇറാൻ ആക്രമണം നടത്തില്ലെന്ന് മറ്റൊരു ഉന്നത ഉദ്യോഗസ്ഥനും പറഞ്ഞതായി വാർത്താ ഏജൻസി റിപ്പോർട്ട് ചെയ്തു.
അതേസമയം, അമേരിക്ക നിയമവിരുദ്ധ നാവിക ഉപരോധത്തിനു ശ്രമിക്കുകയാണെന്ന് ഇറേനിയൻ സൈന്യം ആരോപിച്ചു. ഇതിനു പിന്നാലെ സൗദിയിലെ പെട്രോളിയും ഉത്പാദന കേന്ദ്രങ്ങളെ ലക്ഷ്യമിട്ട് ഡ്രോൺ ആക്രമണമുണ്ടായി. ഡ്രോണുകൾ വെടിവച്ചിട്ടതായി സൗദി അറിയിച്ചു.
ഇറാന്‍റെ പിന്തുണയോടെ ഇറാക്കിൽ പ്രവർത്തിക്കുന്ന സായുധഗ്രൂപ്പുകളാണ് ആക്രമണത്തിനു പിന്നിൽ. ഇവർക്ക് ഉചിതമായ തിരിച്ചടി നല്കുമെന്ന് സൗദി കൂട്ടിച്ചേർത്തു.
സൗദിയുടെ ചെങ്കടൽ തീരത്തെ യാൻബു തുറമുഖത്തേക്ക് എണ്ണ എത്തിക്കുന്ന ഈസ്റ്റ്-വെസ്റ്റ് പെപ്പ്‌ലൈന്‌ ലക്ഷ്യമിട്ട് ആക്രമണം നടത്തിയതായി യെമനിലെ ഹൂതികളും അറിയിച്ചു.
International
വാഷിംഗ്ടൺ ഡിസി: മിസൈൽ പ്രതിരോധ സംവിധാനങ്ങളുടെ ശേഖരത്തിൽ കടുത്ത ക്ഷാമം അനുഭവപ്പെടുന്നതിനെത്തുടർന്ന് ഇറാനെതിരേയുള്ള സൈനിക ആക്രമണങ്ങൾ കൂടുതൽ വ്യാപിപ്പിക്കാനുള്ള നീക്കം താത്കാലികമായി മാറ്റിവച്ച് അമേരിക്കൻ പ്രസിഡന്റ് ഡോണാൾഡ് ട്രംപ്.
മുതിർന്ന യുഎസ് ഉദ്യോഗസ്ഥരെ ഉദ്ധരിച്ച് ന്യൂയോർക്ക് ടൈംസ് ആണ് ഇക്കാര്യം റിപ്പോർട്ട് ചെയ്തത്.
പശ്ചിമേഷ്യയിൽ വിന്യസിച്ചിരിക്കുന്ന അമേരിക്കൻ പ്രതിരോധ സംവിധാനങ്ങളിലെ പേട്രിയറ്റ് മിസൈലുകൾ അടക്കമുള്ള ആയുധശേഖരം അതിവേഗം തീരുന്നതായി പെന്‍റഗണിലെ സൈനിക ഉപദേഷ്ടാക്കൾ ട്രംപിനു മുന്നറിയിപ്പു നൽകിയിരുന്നു.
ഈ ഘട്ടത്തിൽ ആക്രമണം കൂടുതൽ കടുപ്പിച്ചാൽ യുഎസ് സൈനികതാവളങ്ങളുടെയും ഗൾഫ് മേഖലയിലെ സഖ്യരാജ്യങ്ങളുടെയും സുരക്ഷ അപകടത്തിലാകുമെന്നാണു വിലയിരുത്തൽ.
International
വാഷിംഗ്ടൺ ഡിസി: മൂന്നുമാസം മുന്പ് വെടിവയ്പിനെത്തുടർന്ന് മാറ്റിവച്ച വൈറ്റ്ഹൗസ് മാധ്യമപ്രവർത്തകരുടെ വാർഷിക യോഗം വെള്ളിയാഴ്ച നടന്നു. പ്രസിഡന്റ് ട്രംപ് മുഖ്യാതിഥിയായി പങ്കെടുത്തു.
ഒരു മണിക്കൂറിലേറെ നീണ്ട പ്രസംഗത്തിൽ തനിക്കിഷ്ടമുള്ള ചില മാധ്യമപ്രവർത്തകരെ പ്രശംസിക്കാനും അല്ലാത്തവരെ പരസ്യമായി അധിക്ഷേപിക്കാനും ട്രംപ് മുതിർന്നു. മുൻ പ്രസിഡന്റ് ബറാക് ഒബാമ, കലിഫോർണിയ ഗവർണർ ഗാവിം ന്യൂസം തുടങ്ങിയവരെയും ട്രംപ് പരിഹസിച്ചു.
മികച്ച മാധ്യമപ്രവർത്തകർക്കുള്ള പുരസ്കാരങ്ങളും ട്രംപ് വിതരണം ചെയ്തു. ഇതിൽ ഭൂരിഭാഗവും ട്രംപിനും അദ്ദേഹത്തിന്‍റെ സർക്കാരിനും എതിരേയുള്ള റിപ്പോർട്ടുകളുടെ പേരിൽ ലഭിച്ച പുരസ്കാരങ്ങളായിരുന്നു.
വാൾഡോർഫ് അസ്റ്റോറിയ ഹോട്ടലിൽ കനത്ത സുരക്ഷയോടെ ആയിരുന്നു പരിപാടി. അടുത്ത വർഷത്തെ യോഗം പതിവുപോലെ ഹിൽട്ടൺ ഹോട്ടലിൽ നടത്തുമെന്ന് വൈറ്റ്ഹൗസ് മാധ്യപ്രവർത്തക കൂട്ടായ്മ അറിയിച്ചു.
ഹിൽട്ടൻ ഹോട്ടലിൽ ഏപ്രിലിൽ നടന്ന ആദ്യയോഗത്തിൽ വെടിവയ്പുണ്ടായിരുന്നു. ട്രംപ്, പത്നി മെലാനിയ, വൈസ് പ്രസിഡന്റ് വാൻസ് തുടങ്ങിയവരെ ഒഴിപ്പിച്ചുമാറ്റേണ്ടിവന്നു. അക്രമിയെ പിടികൂടാൻ സഹായിച്ച സീക്രട്ട് സർവീസ് ഉദ്യോഗസ്ഥനും ട്രംപ് വെള്ളിയാഴ്ചത്തെ യോഗത്തിൽ അവാർഡ് സമ്മാനിച്ചു.
International
വാഷിംഗ്ടൺ ഡിസി: ഇന്ത്യ, ചൈന, ബ്രിട്ടൻ തുടങ്ങി ഏറ്റവും പ്രധാനപ്പെട്ട 60 വ്യാപാര പങ്കാളികൾക്കുമേൽ അമേരിക്കയിലെ ട്രംപ് ഭരണകൂടം ഇറക്കുമതിച്ചുങ്കം ചുമത്തി. ഈ രാജ്യങ്ങളിൽ നിർബന്ധിത തൊഴിൽ അവസാനിപ്പിക്കാൻ നടപടികളില്ല എന്നു പറഞ്ഞാണിത്. 10 മുതൽ 12.5 വരെ ശതമാനം ചുങ്കമാണു ചുമത്തിയിരിക്കുന്നത്. ഇന്ത്യയുടേത് 10 ശതമാനമാണ്.
ട്രംപ് കഴിഞ്ഞ വർഷം ജനുവരിയിൽ അധികാരത്തിലേറിയതിനു പിന്നാലെ ആരംഭിച്ച വ്യാപാരയുദ്ധത്തിന്‍റെ തുടർച്ചയാണ് ഈ നടപടി. ഇത്തവണ ചുങ്കം ചുമത്താൻ ‘നിർബന്ധിത തൊഴിലിനെ’ കൂട്ടുപിടിച്ചെന്നേയുള്ളൂ.
അമേരിക്കയിലേക്കുള്ള ഇറക്കുമതിയുടെ 99.4 ശതമാനവും പുതിയ ചുങ്കത്തിനു കീഴിൽ വരും. എണ്ണ, പ്രകൃതിവാതകം, യുഎസ്-മെക്സിക്കോ-കാനഡ ഉടന്പടിയുടെ ഭാഗമായുള്ള ഉത്പന്നങ്ങൾ എന്നിവയെ ചുങ്കത്തിൽനിന്ന് ഒഴിവാക്കി.
കഴിഞ്ഞ വർഷം ഏപ്രിലിൽ ട്രംപ് ലോകരാജ്യങ്ങൾക്കുമേൽ കനത്ത ചുങ്കം ചുമത്തിയിരുന്നു. എന്നാൽ, ഇതിൽ ഭൂരിഭാഗവും നിയമവിരുദ്ധമാണെന്ന് അമേരിക്കൻ സുപ്രീംകോടതി ഈ വർഷം ഫെബ്രുവരിയിൽ വിധിച്ചു.
വിട്ടുകൊടുക്കാൻ തയാറല്ലാതിരുന്ന ട്രംപ് ഭരണകൂടം എല്ലാ രാജ്യങ്ങൾക്കുംമേൽ താത്കാലികമായി പത്തു ശതമാനം കരം ചുമത്തി. ഇതിന്‍റെ കാലാവധി വ്യാഴാഴ്ച അർധരാത്രി 12ന് അവസാനിച്ചു. ഇതിനു പകരമായിട്ടാണ് നിർബന്ധിത തൊഴിലിന്‍റെ പേരിലുള്ള പുതിയ ചുങ്കം. ഇത് വെള്ളിയാഴ്ച പുലർച്ചെ 12.01 നു നിലവിൽ വന്നു.
നിർബന്ധിത തൊഴിലിനെതിരേ നിയമമൊന്നും ഇല്ലാത്ത ചൈന, ബ്രിട്ടൻ, ജപ്പാൻ തുടങ്ങിയ രാജ്യങ്ങൾക്കുമേൽ 12.5 ശതമാനം ചുങ്കമാണ് ട്രംപ് ഭരണകൂടം ചുമത്തിയിരിക്കുന്നത്. ഇത്തരം നിയമങ്ങൾ നടപ്പാക്കിയതിന്‍റെ പേരിലാണ് ഇന്ത്യ, ശ്രീലങ്ക, യൂറോപ്യൻ യൂണിയൻ രാജ്യങ്ങൾക്കുമേൽ 10 ശതമാനം ചുങ്കം മാത്രം ചുമത്തിയത്.
International
വാഷിംഗ്ടൺ ഡിസി: ചെങ്കടലിലെ കപ്പലാക്രമണത്തിന് ഇറാനും അവരുടെ പിന്തുണയുള്ള യെമനിലെ ഹൂതികൾക്കും ശിക്ഷ നല്കുമെന്ന് അമേരിക്കൻ പ്രസിഡന്റ് ട്രംപ്. ചെങ്കടലിൽ ഇനി കപ്പലുകൾ ആക്രമിക്കപ്പെട്ടാൽ അതിന് ഉത്തരവാദി ഇറാനായിരിക്കും.
ഇറാനെതിരേ വൻ സൈനിക ഓപ്പറേഷൻ പുനരാരംഭിക്കുന്നതിനെക്കുറിച്ച് ആലോചനയിലാണെന്നും ട്രംപ് അറിയിച്ചു. ഇറാൻ ആവശ്യത്തിനു വേദന അനുഭവിച്ചിട്ടില്ല.
ചരക്കുകപ്പലുകൾക്കുണ്ടാകുന്ന നഷ്ടം ഇറാന്‍റെ പണം ഉപയോഗിച്ചു വീട്ടുമെന്നും ട്രംപ് കൂട്ടിച്ചേർത്തു. ഉപരോധത്തിന്‍റെ ഭാഗമായി മരവിപ്പിച്ചിട്ടുള്ള ഇറേനിയൻ ആസ്തികൾ ചെലവഴിക്കുന്നതിനെക്കുറിച്ചാണു ട്രംപ് സൂചിപ്പിച്ചത്. മറ്റൊരു രാജ്യത്തിന്‍റെ സ്വത്ത് കവരുന്നത് അംഗീകരിക്കാനാവില്ലെന്ന് ഇറേനിയൻ വിദേശകാര്യമന്ത്രി അബ്ബാസ് അരാഗ്ചി പ്രതികരിച്ചു.
ഇതിനിടെ, ചെങ്കടൽ വഴി സൗദിയുടെ കയറ്റുമതി നിലച്ചത് ആഗോള വിപണിയിൽ എണ്ണവില നൂറു ഡോളറിനു മുകളിലെത്താൻ ഇടയാക്കി. ഇറാന്‍റെ പിന്തുണയുള്ള ഹൂതികൾ സൗദിക്കെതിരേ നാവിക ഉപരോധം പ്രഖ്യാപിച്ചിരിക്കുകയാണ്. രണ്ട് സൗദി എണ്ണ ടാങ്കറുകളെ ആക്രമിച്ചതായി ഹൂതികൾ കഴിഞ്ഞദിവസം അറിയിച്ചിരുന്നു.
ആക്രമണം തുടരുന്നു
ഇറാൻ-യുഎസ് സംഘർഷത്തിനു ശമനമില്ല. വ്യാഴാഴ്ച രാത്രിയും വെള്ളിയാഴ്ച പുലർച്ചെയും ഇറാനിൽ യുഎസ് ബോംബിട്ടു. ഖെഷം ദ്വീപിലും ഹോർമുസ് കടലിടുക്കിലും അമേരിക്കൻ മിസൈലുകൾ പതിച്ചു.
അഹ്‌വാസ് നഗരത്തിലുണ്ടായ മറ്റൊരാക്രമണത്തിൽ നാലു പേർ കൊല്ലപ്പെടുകയും അഞ്ചു പേർക്കു പരിക്കേൽക്കുകയും ചെയ്തു.
അറബിരാജ്യങ്ങളിലെ അമേരിക്കൻ സൈനിക താവളങ്ങളെ ലക്ഷ്യമിട്ട് ഇറാനും മിസൈൽ-ഡ്രോൺ ആക്രമണം നടത്തി.
International
വാഷിംഗ്ടൺ ഡിസി: സൗദി ഇസ്രയേലിനെ അംഗീകരിച്ചാൽ മാത്രമേ അമേരിക്കയുമായുള്ള ആണവക്കരാർ യാഥാർഥ്യമാകൂ എന്ന് പ്രസിഡന്റ് ട്രംപ്. സൗദി-യുഎസ് ആണവക്കരാർ പശ്ചിമേഷ്യയിൽ ആയുധമത്സരത്തിന് വഴിവയ്ക്കുമെന്ന വിമർശനങ്ങൾക്കിടെയാണു ട്രംപ് പുതിയ വ്യവസ്ഥ പ്രഖ്യാപിച്ചത്.
അറബി രാജ്യങ്ങളും ഇസ്രയേലും തമ്മിലുള്ള ബന്ധം മെച്ചപ്പെടുത്തിയ ഏബ്രഹാം ഉടന്പടിയിൽ സൗദിയും ചേരണമെന്നാണു ട്രംപ് സോഷ്യൽ മീഡിയയിൽ കുറിച്ചത്. ട്രംപിന്റെ ഒന്നാം ഭരണകാലത്ത് 2020ലാണ് ഈ ഉടന്പടിയുണ്ടായത്.
യുഎഇ, ബഹ്റിൻ രാജ്യങ്ങളാണ് അദ്യം ഉടന്പടിയിൽ ചേർന്നത്. ഇതോടെ ഇവരും ഇസ്രയേലും തമ്മിൽ സാധാരണ നിലയിലുള്ള നയതന്ത്രബന്ധം യാഥാർഥ്യമായി. സുഡാൻ, മൊറോക്കോ എന്നീ മുസ്‌ലിം രാജ്യങ്ങളും പിന്നീട് ഇസ്രയേലിനെ അംഗീകരിക്കാൻ തയാറായി. സൗദി ഏബ്രഹാം ഉടന്പടിയിൽ ചേരുമോ എന്നതിൽ വ്യക്തതയില്ല.
സൗദിയുമായുള്ള അമേരിക്കയുടെ സിവിലിയൻ ആണവക്കരാർ സൈനികേതര ആവശ്യങ്ങൾക്കു മാത്രമുള്ളതാണെന്നും ട്രംപ് സോഷ്യൽ മീഡിയയിൽ കുറിച്ചു. കുറിപ്പിൽ ‘ആണവ ഇന്ധന സന്പുഷ്ടീകരണം ഉണ്ടാവില്ല’ എന്ന് ബ്രാക്കറ്റിൽ ചേർത്തിട്ടുണ്ട്.
അമേരിക്കൻ സാങ്കേതികവിദ്യയിൽ സൗദിയുടെ ഊർജാവശ്യത്തിന് റിയാക്ടറുകൾ നിർമിക്കാനുള്ള കരാറാണു ബുധനാഴ്ച പ്രഖ്യാപിക്കപ്പെട്ടത്. ഇതിനായി സൗദിക്കു സ്വന്തം നിലയിൽ ആണവ ഇന്ധനമായ യുറേനിയം സന്പുഷ്ടീകരിക്കാനും അനുമതിയുണ്ടാകുമെന്നായിരുന്നു ആദ്യ അറിയിപ്പ്.
സൗദിക്ക് അണ്വായുധം സ്വന്തമാക്കാനുള്ള വഴിയൊരുങ്ങിയെന്നും പശ്ചിമേഷ്യയിൽ അണ്വായുധ മത്സരമുണ്ടാകുമെന്നും വിമർശനമുയർന്നു. യുറേനിയം സന്പുഷ്ടീകരണത്തിന്‍റെ തോത് ഉയർത്തി അണുബോംബ് നിർമിക്കാനാകും. നിലവിൽ അണ്വായുധം സ്വന്തമായുള്ള ഏക രാജ്യം ഇസ്രയേലാണ്. ഇറാന്‍റെ പക്കൽ ഉയർന്ന തോതിൽ സന്പുഷ്ടീകരിച്ച യുറേനിയമുണ്ട്.
സൗദി-യുഎസ് ആണവക്കരാർ ഇസ്രേലി നേതൃത്വത്തെ ഭീതിയിലാഴ്ത്തിയെന്ന റിപ്പോർട്ടുകളുണ്ടായിരുന്നു. ഇസ്രേലി പ്രധാനമന്ത്രി ബെഞ്ചമിൻ നെതന്യാഹുവോ അദ്ദേഹത്തിന്‍റെ മന്ത്രിസഭയിലെ ഉന്നതരോ വിഷയത്തിൽ പ്രതികരിച്ചില്ല.
പക്ഷേ, മുൻ പ്രധാനമന്ത്രി നഫ്താലി ബെന്നറ്റ്, മുൻ പ്രതിരോധമന്ത്രി ലീബർമാൻ എന്നിവർ കരാറിനെ വിമർശിക്കുകയും കരാറിന് യുഎസ് കോൺഗ്രസിന്‍റെ അനുമതി ലഭിക്കാതിരിക്കാൻ ഇസ്രയേൽ സമ്മർദം ചെലുത്തണമെന്ന് ആവശ്യപ്പെടുകയും ചെയ്തിരുന്നു.
International
വാഷിംഗ്ടൺ ഡിസി: സൗദി അറേബ്യയിൽ സിവിലിയൻ ആവശ്യങ്ങൾക്കുള്ള ആണവോർജ നിലയങ്ങൾക്കു സ്വന്തമായി യൂറേനിയം സമ്പുഷ്‌ടീകരിക്കാൻ വഴിതുറക്കുന്ന ചരിത്രപരമായ ആണവ കരാറിന് അംഗീകാരം നൽകി യുഎസ് പ്രസിഡന്റ് ഡോണൾഡ് ട്രംപ്.
2008 മുതൽ യുഎസും സൗദിയും തമ്മിൽ നടന്നുവരുന്ന ആണവ സഹകരണ ചർച്ചകളുടെ തുടർച്ചയായാണ് ഈ പ്രഖ്യാപനം. 30 വർഷത്തെ കാലാവധിയുള്ള ഈ കരാറിലൂടെ അമേരിക്കൻ കമ്പനികൾ സാങ്കേതികവിദ്യയും മേൽനോട്ടവും നൽകി സൗദിയിലെ ആണവ പദ്ധതിക്ക് പിന്തുണ നൽകും.
യുറേനിയം സമ്പുഷ്‌ടീകരണം ആരംഭിക്കുന്നതിനുമുന്നോടിയായി, ഇത് ആവശ്യമാണോയെന്നും വാണിജ്യപരമായി ലാഭകരമാണോയെന്നും യുഎസ്-സൗദി സംയുക്ത സംഘം പരിശോധിക്കും.
നിർണായക സാങ്കേതികവിദ്യകൾ നേരിട്ടു കൈമാറാതെ, അമേരിക്കൻ കമ്പനികളുടെ നിയന്ത്രണത്തിലാകും സമ്പുഷ്‌ടീകരണ പ്ലാന്‍റ് സൗദിയിൽ നിർമിക്കുക. അടുത്ത പത്തു വർഷത്തേക്ക് സൗദി അറേബ്യ സ്വന്തമായി സമ്പുഷ്‌ടീകരണ സാങ്കേതികവിദ്യ വികസിപ്പിക്കുന്നതോ മറ്റു രാജ്യങ്ങളിൽനിന്ന് വാങ്ങുന്നതോ കരാർ വിലക്കുന്നു. കരാർ ഔദ്യോഗികമായി പ്രഖ്യാപിച്ചശേഷം അനുമതിക്കായി യുഎസ് കോൺഗ്രസിനുമുന്പിൽ സമർപ്പിക്കും.
യൂറേനിയം സമ്പുഷ്‌ടീകരിക്കാനുള്ള ശേഷി ഭാവിയിൽ ആണവായുധ നിർമാണത്തിലേക്കു നയിച്ചേക്കാമെന്നതിനാൽ ഈ നീക്കം അമേരിക്കയ്ക്കുള്ളിലും മധ്യപൂർവേഷ്യൻ മേഖലയിലും ചർച്ചകൾക്കു വഴിവച്ചിട്ടുണ്ട്. സൗദി അറേബ്യ ആണവ സാങ്കേതികവിദ്യ കൈവരിക്കുന്നതിൽ മേഖലയിലെ പ്രധാന സഖ്യകക്ഷിയായ ഇസ്രയേൽ ആശങ്ക പ്രകടിപ്പിച്ചുകഴിഞ്ഞു.
മേഖലയിലെ സൗദിയുടെ പ്രധാന എതിരാളിയായ ഇറാൻ നിലവിൽ യുറേനിയം സമ്പുഷ്‌ടീകരിച്ചു ശേഖരിക്കുന്നുണ്ട്. ഇറാൻ ആണവായുധം വികസിപ്പിച്ചാൽ സൗദിയും ആ വഴി സ്വീകരിക്കുമെന്ന് സൗദി കിരീടാവകാശി മുഹമ്മദ് ബിൻ സൽമാൻ മുന്പ് വ്യക്തമാക്കിയിരുന്നു.
Business
വാഷിംഗ്ടൺ ഡിസി: ഇന്ത്യക്കുമേൽ അമേരിക്കൻ പ്രസിഡന്റ് ഡോണൾഡ് ട്രംപിന്റെ തീരുവ ഇടിത്തീ വീണ്ടും. ജനറിക് മരുന്നുകൾക്ക് 200 ശതമാനംവരെ തീരുവ വർധിപ്പിക്കുമെന്നു ട്രംപ് പ്രഖ്യാപിച്ചു.
ഘട്ടംഘട്ടമായാണു തീരുവ വർധിപ്പിക്കുക. അമേരിക്കയില്‍ മരുന്ന് ഉത്പാദനം പ്രോത്സാഹിപ്പിക്കുകയെന്ന ലക്ഷ്യത്തോടെയുള്ള ട്രംപിന്റെ നടപടി ഇന്ത്യക്കു കനത്ത തിരിച്ചടിയാകും. യുഎസിലേക്ക് ഏറ്റവും കൂടുതൽ ജെനറിക് മരുന്നുകൾ കയറ്റുമതി ചെയ്യുന്ന രാജ്യമായതുകൊണ്ടുതന്നെ ഈ തീരുമാനം ഇന്ത്യയെ സാരമായി ബാധിച്ചേക്കാം. യുഎസിൽ വിൽക്കുന്ന ജനറിക് മരുന്നുകളിൽ 40-50 ശതമാനവും ഇന്ത്യയിൽനിന്ന് ഇറക്കുമതി ചെയ്യുന്നതാണ്.
പുതിയ പ്രഖ്യാപനപ്രകാരം ഓഗസ്റ്റ് ഒന്നു മുതൽ തുടർന്നുള്ള രണ്ട് വർഷത്തേക്ക് എല്ലാ ജനറിക് മരുന്നുകളുടെയും ഇറക്കുമതി തീരുവ പൂജ്യം ശതമാനമായി തുടരും. എന്നാൽ ഇതിനുശേഷം വരുന്ന 2028 ഓഗസ്റ്റ് മുതൽ ഇത് 100 ശതമാനം തീരുവയാകും. അതിനുശേഷം 2029 ഓഗസ്റ്റ് മുതൽ 200 ശതമാനമായും കുത്തനെ ഉയർത്തുമെന്ന് ട്രംപ് വ്യക്തമാക്കി.
തന്‍റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് ട്രംപ് ഇക്കാര്യം പങ്കുവെച്ചത്. മരുന്ന് നിർമാണം രാജ്യത്തിനുള്ളിൽ തന്നെ ഉറപ്പാക്കുകയെന്ന ലക്ഷ്യത്തോടെയാണ് പുതിയ നീക്കം.
ട്രംപ് പ്രഖ്യാപിച്ചത് എന്താണ്?
ഓഗസ്റ്റ് 1 മുതൽ യുഎസിലേക്ക് എത്തുന്ന ജനറിക് മരുന്നുകൾക്ക് ആദ്യ രണ്ട് വർഷത്തേക്ക് പൂജ്യം ശതമാനം നികുതിയായിരിക്കും ഉണ്ടായിരിക്കുകയെന്ന് ട്രൂത്ത് സോഷ്യലിലെ പോസ്റ്റിൽ ട്രംപ് വ്യക്തമാക്കി. അതിനുശേഷം, അടുത്ത ഒരു വർഷത്തേക്ക് നികുതി 100 ശതമാനമായും മൂന്നാം വർഷം മുതൽ 200 ശതമാനമായും ഉയർത്തും.
മരുന്ന് നിർമാണം യുഎസിൽ തിരികെ കൊണ്ടുവരാനാണ് ഈ പദ്ധതിയുടെ ലക്ഷ്യം. അനുവദിച്ചിട്ടുള്ള സമയത്തിനുള്ളിൽ നിർമാണ പ്ലാന്‍റുകളും ഉപകരണങ്ങളും സ്ഥാപിക്കാൻ തയാറാകാത്ത കന്പനികൾക്ക് കനത്ത പിഴയുണ്ടാകുമെന്നും ട്രംപ് തന്‍റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിൽ കുറിച്ചു.
അമേരിക്കയിലെ ജനങ്ങളെ സംരക്ഷിക്കുക എന്നതാണ് ഈ നയത്തിന്‍റെ ലക്ഷ്യമെന്നും പേറ്റന്‍റുള്ളതും ബ്രാൻഡഡ് ആയതും നൂതനവുമായ മരുന്നുകളുടെ കാര്യത്തിൽ നിലവിലുള്ള രീതി മാറ്റമില്ലാതെ തുടരുമെന്നും അദ്ദേഹം വ്യക്തമാക്കി.
ബ്രാൻഡഡ് മരുന്നുകൾ നിർമിക്കുന്ന സ്ഥാപനങ്ങളുമായി ധാരണയിലെത്തുകയോ നിർമാണം യുഎസിലേക്ക് മാറ്റുകയോ ചെയ്തില്ലെങ്കിൽ 100 ശതമാനം താരിഫ് ചുമത്തുന്ന ഉത്തരവിൽ കഴിഞ്ഞ ഏപ്രിൽ രണ്ടിന് ട്രംപ് ഒപ്പുവച്ചിരുന്നു.
ഇന്ത്യക്ക് വൻ ആഘാതമാകും
ലോകമെന്പാടും വൻതോതിൽ ജനറിക് മരുന്നുകൾ വിതരണം ചെയ്യുന്നതിനാൽ ഇന്ത്യയെ ‘ലോകത്തിന്റെ ഫാർമസി’ എന്നാണ് വിളിക്കാറ്. ട്രംപിന്റെ പുതിയ നയം ഇന്ത്യക്കാണ് ഏറ്റവും വലിയ തിരിച്ചടിയാകുക. അമേരിക്കയിലേക്ക് ഏറ്റവും കൂടുതൽ ജനറിക് മരുന്നുകൾ കയറ്റുമതി ചെയ്യുന്നത് ഇന്ത്യയാണ്.
ഗ്ലോബൽ ട്രേഡ് റിസർച്ച് ഇനിഷ്യേറ്റീവിന്‍റെ റിപ്പോർട്ട് പ്രകാരം 2025ൽ യുഎസ് 213 ബില്യണ്‍ ഡോളറിന്‍റെ ഫാർമസ്യൂട്ടിക്കൽ ഉത്പന്നങ്ങളാണ് ഇറക്കുമതി ചെയ്തത്.
ജനറിക് മരുന്നുകൾ കയറ്റുമതി ചെയ്യുന്ന രാജ്യങ്ങളിൽ ഇന്ത്യക്ക് വലിയ പങ്കാണുള്ളത്. കഴിഞ്ഞ വർഷം ഇന്ത്യ 970 കോടി ഡോളറിന്‍റെ മരുന്നുകളാണ് യുഎസിലേക്ക് കയറ്റി അയച്ചത്. ഇന്ത്യയുടെ ആകെ ആഗോള ഫാർമ കയറ്റുമതിയായ 25.8 ബില്യണ്‍ ഡോളറിന്‍റെ 38 ശതമാനത്തോളമാണിത്.
ഉയർന്ന രക്തസമ്മർദം, പ്രമേഹം, കാൻസർ, പകർച്ചവ്യാധികൾ, മാനസികാരോഗ്യ പ്രശ്നങ്ങൾ എന്നിവയുടെ ചികിത്സയ്ക്കായി ഇന്ത്യൻ ജനറിക് മരുന്നുകൾ വ്യാപകമായി ഉപയോഗിച്ചുവരുന്നു.
ന്യൂയോർക്ക് ടൈംസിന്‍റെ റിപ്പോർട്ടിന്റെ അടിസ്ഥാനത്തിൽ സ്റ്റാറ്റിനുകൾ, ആന്റിബയോട്ടിക്കുകൾ തുടങ്ങിയ ജനറിക് മരുന്നുകളാണ് അമേരിക്കക്കാരുടെ കുറിപ്പടികളിൽ ഏകദേശം 90 ശതമാനവും. ഇവ കൂടുതലായും ഇന്ത്യയിലാണ് നിർമിക്കുന്നത്.
എന്നാൽ, ഇവയുടെ നിർമാണത്തിനാവശ്യമായ ചേരുവകൾക്കായി ചൈനയെയാണ് ആശ്രയിക്കുന്നത്. അമേരിക്കയുടെ നയരൂപകർത്താക്കൾ ഇത് രാജ്യത്തിന്‍റെ സുരക്ഷയ്ക്ക് ഭീഷണിയാണെന്നു തിരിച്ചറിഞ്ഞിട്ടുണ്ട്.
ഹെൽത്ത് കെയർ അനലിറ്റിക്സ് സ്ഥാപനമായ IQVIAയുടെ കണക്കുകൾ പ്രകാരം യുഎസ് ഫാർമസികളിൽ നല്കുന്ന എല്ലാ ജനറിക് മരുന്ന് കുറിപ്പടികളുടെയും 47 ശതമാനവും വിതരണം ചെയ്യുന്നത് ഇന്ത്യൻ ഫാർമസ്യൂട്ടിക്കൽ കന്പനികളാണ്.
അളവിൽ മാത്രം ഒതുങ്ങുന്നതല്ല ഇന്ത്യൻ ജനറിക് മരുന്നുകൾ യുഎസിനു നൽകുന്ന സംഭാവന. 2022ൽ മാത്രം 219 ബില്യണ്‍ ഡോളറും കഴിഞ്ഞ ഒരു പതിറ്റാണ്ടിൽ മാത്രം 1.3 ട്രില്യണ്‍ ഡോളറും യുഎസ് ആരോഗ്യമേഖലയ്ക്ക് ലാഭമുണ്ടാക്കിക്കൊടുത്തതായി കണക്കാക്കപ്പെടുന്നു.
Sports
ഭൂഗോള കാല്‍പ്പന്ത് പോരാട്ടത്തിന്‍റെ ആവേശത്തിനും ആരവത്തിനും സ്പാനിഷ് വസന്തത്തോടെ പര്യവസാനം. ഇനിയൊരു ലോകകപ്പിനായി 2030 വരെ കാത്തിരിക്കണം എന്നതാണ് ആരാധകരെ സംബന്ധിച്ച് ഇപ്പോഴുള്ള വിഷമം. നീണ്ട നാലു വര്‍ഷങ്ങളുടെ കാത്തിരിപ്പ്..! അതെ, ഇപ്പോള്‍ മുതല്‍ ബ്രസീലിലെയും അര്‍ജന്‍റീനയിലെയുമെല്ലാം ആരാധകര്‍ 2030 ലോകകപ്പിനായുള്ള പണസമാഹരണം തുടങ്ങിക്കഴിഞ്ഞു; അവര്‍ അങ്ങനെയാണ്... 2026 സമ്മാനിച്ച ചില സുപ്രധാന മുഹൂര്‍ത്തങ്ങളിലൂടെ...
ഉദിച്ചുയര്‍ന്ന് വൊസീഞ്ഞ
ലോകകപ്പിലെ നവാഗതരായിരുന്നു കേപ് വെര്‍ദെ. അറ്റ്‌ലാന്‍റിക് സമുദത്തിലെ ദ്വീപസമൂഹമായ കേപ് വെര്‍ദെയുടെ ലോകകപ്പ് യോഗ്യത അദ്ഭുതപ്പെടുത്തുന്നതായിരുന്നു. കരുത്തരായ കാമറൂണിനെ അടക്കം കീഴടക്കിയാണ് അവര്‍ മുന്നേറിയത്. അതിനെ ശരിവയ്ക്കുന്ന പ്രകടനമാണ് അവര്‍ പുറത്തെടുത്തത്. ടീമിന്‍റെ ഗോള്‍വലയം കാത്ത വൊസീഞ്ഞയുടെ മാസ്മരിക പ്രകടനം ഏറെ ശ്രദ്ധ പിടിച്ചുപറ്റി.
ഗ്രൂപ്പ്-എച്ചില്‍ സ്‌പെയിനിനെതിരേ തകര്‍പ്പന്‍ ഏഴു സേവുകള്‍ നടത്തിയാണ് വൊസീഞ്ഞ ലോകശ്രദ്ധയാകര്‍ഷിച്ചത്. റൗണ്ട് ഓഫ് നോക്കൗട്ടില്‍ അര്‍ജന്‍റീനയ്‌ക്കെതിരേ 3-2ന് തോറ്റെങ്കിലും മെസിയെയും സംഘത്തെയും കേപ് വെര്‍ദെ വിറപ്പിച്ചു. മെസിയുടെ മൂന്ന് ഫ്രീകിക്ക് ഉള്‍പ്പെടെ ഏഴ് ഗോള്‍ ശ്രമങ്ങളാണ് വൊസീഞ്ഞ നിര്‍വീര്യമാക്കിയത്. നാലു കളികളിലായി 18 സേവ് ഈ ഗോള്‍കീപ്പര്‍ നടത്തി. 40-ാം വയസില്‍ ലോകകപ്പില്‍ അരങ്ങേറ്റം നടത്തിയ വൊസീഞ്ഞ തലയെടുപ്പോടെയാണ് കളിക്കളം വിട്ടത്. 25-ാം വയസില്‍ പ്രഫഷണല്‍ ഫുട്‌ബോള്‍ രംഗത്തെത്തെത്തിയ വൊസീഞ്ഞ പോര്‍ച്ചുഗല്‍ രണ്ടാംഡിവിഷന്‍ ക്ലബ്ബായ ഷാവേസിന്‍റെ താരമാണ്.
വിവേചനം നേരിട്ട് ഇറാന്
ലോകകപ്പില്‍ കടുത്ത വിവേചനവും അടിച്ചമര്‍ത്തലും നേരിട്ട് ഇറാന് മടങ്ങി. പശ്ചിമേഷ്യന്‍ യുദ്ധത്തിന്‍റെ പശ്ചാത്തലത്തില്‍ അമേരിക്കയില്‍നിന്ന് കടുത്ത വിവേചനമാണ് ലോകകപ്പില്‍ ഇറാന് നേരിട്ടത്. അമേരിക്ക മുഖ്യ ആതിഥേയരായ ടൂര്‍ണമെന്‍റില്‍ ഇറാന് കളിക്കുമോയെന്ന് സംശയമുണ്ടായിരുന്നു. മത്സരങ്ങള്‍ മെക്‌സിക്കോയിലേക്ക് മാറ്റണമെന്ന് ആവശ്യപ്പെട്ടെങ്കിലും ഫിഫ അനുവദിച്ചില്ല. ഒടുവില്‍ കളിക്കാരുടെ സുരക്ഷയില്‍ വിട്ടുവീഴ്ചയില്ലെന്ന് പ്രഖ്യാപിച്ച് കളിക്കാന്‍ തീരുമാനിക്കുകയായിരുന്നു.
എന്നാല്‍, ഇറാന് പരിശീലനവും താമസ സ്ഥലവും ഒരുക്കിയിരുന്നത് മെക്‌സിക്കോയിലായിരുന്നു. ഗ്രൂപ്പ് ഘട്ടത്തിലെ മൂന്നു കളികളും അമേരിക്കയിലെ സ്റ്റേഡിയങ്ങളിലാണ് നടന്നത്. മത്സരശേഷം മതിയായ വിശ്രമത്തിന് പോലും സമയം ലഭിക്കാതെ കളിക്കാരും ഒഫീഷല്‍സും മെക്സിക്കോയിലെ ടിഹുവാനയിലേക്ക് വിമാനം കയറേണ്ടിവന്നു.
വിവാദക്കളികള്‍
അര്‍ജന്‍റീന- ഈജിപ്ത് പ്രീക്വാര്‍ട്ടര്‍ മത്സരത്തില്‍ റഫറിയുടെ തീരുമാനങ്ങള്‍ക്കെതിരേയുള്ള പ്രതിഷേധങ്ങള്‍ ഇനിയും അടങ്ങിയില്ല. മത്സരത്തില്‍ രണ്ടിനെതിരേ മൂന്ന് ഗോളുകള്‍ക്ക് ജയിച്ച് അര്‍ജന്‍റീന ക്വാര്‍ട്ടറില്‍ കടന്നെങ്കിലും ‘വാര്‍' തീരുമാനം ചര്‍ച്ചയായി. 79-ാം മിനിറ്റ് വരെ രണ്ടു ഗോളുകള്‍ക്ക് പിന്നിട്ടു നിന്നശേഷം അവിശ്വസനീയ തിരിച്ചുവരവ് നടത്തിയാണ് അര്‍ജന്‍റീന ജയം സ്വന്തമാക്കിയത്. ഈജിപ്തിനായി യാസെര്‍ ഇബ്രാഹിമും മൊസ്തഫ സീക്കോയുമാണ് സ്‌കോര്‍ ചെയ്തത്. എന്നാല്‍, സീക്കോ ആദ്യം നേടിയ ഗോള്‍ മത്സരം നിയന്ത്രിച്ച ഫ്രഞ്ച് റഫറി ഫ്രന്‍സ്വ ലെറ്റെക്‌സിയറെ ‘വാര്‍' പരിശോധനയില്‍ റദ്ദാക്കിയതും അര്‍ജന്‍റീനയുടെ വിജയഗോളും വിവാദമായി. ഗോളിനു മുമ്പ് മുഹമ്മദ് സലയെ ബോക്‌സില്‍വച്ച് അര്‍ജന്‍റീനയുടെ ജൂലിയന്‍ ആല്‍വരെസ് ഫൗള്‍ ചെയ്തതിന് റഫറി ‘വാര്‍' പരിശോധന അനുവദിച്ചില്ലെന്ന് ഈജിപ്ഷന്‍ ടീം ചൂണ്ടിക്കാട്ടി. ഇത് അനീതിയാണെന്നായിരുന്നു ഈജിപ്ത് പരിശീലകന്‍ ഹൊസം ഹസന്‍ പ്രതികരിച്ചത്.
റഫറിമാര്‍ മത്സരം നിയന്ത്രിക്കുന്നത് നീതിപൂര്‍വമല്ലെന്ന് പല കോണുകളില്‍നിന്ന് ആക്ഷേപമുയര്‍ന്ന ലോകകപ്പാണിത്.
ട്രംപിന്റെ ഇടപെടല്‍
ചുവപ്പുകാര്‍ഡ് കണ്ടു പുറത്തായ യുഎസ് താരം ഫൊളാരിന്‍ ബലോഗന്‍റെ വിലക്ക് നീക്കണമെന്ന ആവശ്യവുമായി അമേരിക്കന്‍ പ്രസിഡന്റ് ഡോണള്‍ഡ് ട്രംപ് നടത്തിയ ഇടപെടല്‍ വിവാദങ്ങളുയര്‍ത്തി. ഇക്കാര്യത്തില്‍ ഫിഫ പ്രസിഡന്റ് ജിയാനി ഇന്‍ഫാന്‍റിനോ നടപ്പാക്കിയതാകട്ടെ, ട്രംപിന്റെ തീരുമാനങ്ങളും. ബോസ്‌നിയ ആന്‍ഡ് ഹെര്‍സെഗൊവിനയുമായുള്ള മത്സരത്തിലാണ് ബലോഗന് ചുവപ്പു കാര്‍ഡ് കിട്ടിയത്. ട്രംപിന്റെ ഇടപെടലില്‍ ചുവപ്പുകാര്‍ഡ് ഫിഫ റദ്ദാക്കി. ഇതേത്തുടര്‍ന്ന് രാഷ്‌ട്രീയ നിഷ്പക്ഷത ലംഘിച്ചതായി ആരോപിച്ച് ഫിഫയ്ക്കും ഇന്‍ഫാന്‍റിനോയ്ക്കുമെതിരേ അന്വേഷണം ആവശ്യപ്പെട്ട് എഴുപതിലധികം യൂറോപ്യന്‍ പാര്‍ലമെന്‍റ് അംഗങ്ങള്‍ രംഗത്തുവന്നു.
സംഘാടനം പിഴച്ചു
2026 ലോകകപ്പിന്‍റെ സംഘാടനം മോശമായിരുന്നെന്ന് ഉറുഗ്വെ പരിശീലകന്‍ മാഴ്‌സെലോ ബിയേല്‍സ തുറന്നടിച്ചു. വിമാനത്താവളത്തില്‍ കളിക്കാരെയും ഫോട്ടോഗ്രാഫര്‍മാരെയും റഫറിമാരെയും പരിശീലകരെയും തടഞ്ഞുവച്ചു. അമേരിക്ക വീസ അനുവദിക്കാത്തതിനാല്‍ ആഫ്രിക്കന്‍ ഫുട്‌ബോളിലെ കഴിഞ്ഞവര്‍ഷത്തെ മികച്ച റഫറിയായി തെരഞ്ഞെടുക്കപ്പെട്ട സോമാലിയക്കാരന്‍ ഒമര്‍ അബ്ദുള്‍ കാദിര്‍ അര്‍ടാനെ ഫിഫ റഫറിമാരുടെ പട്ടികയില്‍നിന്നൊഴിവാക്കി. അമേരിക്ക വീസ അനുവദിക്കാത്തതായിരുന്നു കാരണം. ഇറാഖ് താരം അയ്‌മെന്‍ ഹുസൈനെ ഏഴ്മണിക്കൂറാണ് വിമാനത്താവളത്തില്‍ ചോദ്യം ചെയ്തത്. സെനഗല്‍ ടീമിനും ഈ പ്രശ്‌നംം നേരിട്ടു.
ബൈ, ബൈ
ലോകകപ്പിന്‍റെ ആകര്‍ഷകമായ ബ്രസീല്‍ താരം നെയ്മര്‍, പോര്‍ച്ചുഗലിന്‍റെ ക്രിസ്റ്റ്യാനോ റൊണാള്‍ഡോ, ക്രൊയേഷ്യയുടെ ലൂക്കാ മോഡ്രിച്ച്, ബെല്‍ജിയത്തിന്‍റെ കെവിന്‍ ഡിബ്രൂയിന്‍ തുടങ്ങിയവരൊന്നും 2030 ലോകകപ്പിനുണ്ടായേക്കില്ല. കിലിയന്‍ എംബപ്പെയും എര്‍ലിംഗ് ഹാലണ്ടിനും ജൂഡ് ബെല്ലിങ്ഗമിനുമെല്ലാം ഇനിയും സമയമുണ്ട്. പോര്‍ച്ചുഗലിന്‍റെ ക്രിസ്റ്റ്യാനൊയും നെയ്മറും കണ്ണീരോടെ മടങ്ങി. ഫൈലിലെ തോല്‍വിയില്‍ മെസിയുടെ കണ്ണും നിറഞ്ഞു.
നോര്‍വെയെ ചരിത്രത്തിലാദ്യമായി ലോകകപ്പിന്‍റെ ക്വാര്‍ട്ടര്‍ ഫൈനലിലെത്തിച്ചാണ് എര്‍ലിംഗ് ഹാലണ്ട് കളം വിട്ടത്. കളിച്ച മത്സരത്തിലെല്ലാം മൈതാനം വിറപ്പിച്ച് നോര്‍വെ സൂപ്പര്‍ താരം ഹാലണ്ട് ഏവരുടെയും മനംകവര്‍ന്നു.
ക്ലൈമാക്‌സ് അടി
അര്‍ജന്‍റീന x സ്‌പെയിന്‍ ഫൈനല്‍ അവസാനിച്ചത് കയ്യാങ്കളിയില്‍. ഫൈനല്‍ വിസിലിനു പിന്നാലെ നടന്ന കയ്യാങ്കളി ലോകപോരാട്ടത്തിന്‍റെ മാന്യതയ്ക്കു കളങ്കമായി. അര്‍ജന്‍റീനയുടെ നഹ്വേല്‍ മോളിന സ്‌പെയിനിന്‍റെ റോഡ്രിയുമായി ഉന്തുംതള്ളുമുണ്ടായി. സംഭവസ്ഥലത്തെത്തിയ അര്‍ജന്‍റീനയുടെ ലിയാന്ഡ്രൊ പരേഡസ് സ്‌പെയിനിന്‍റെ എറിക് ഗാര്‍സ്യയുടെ കഴുത്തില്‍ കൈവച്ചു, ഗാവിയെ ഇടിച്ചിട്ടു. റഫറിയും ടീം അംഗങ്ങളുമെത്തിയാണ് രംഗം ശാന്തമാക്കിയത്. സംഭവത്തില്‍ അര്‍ജന്‍റൈന്‍ ടീമിനെതിരേ ഫിഫ അന്വേഷണം പ്രഖ്യാപിച്ചിട്ടുണ്ട്.
International
ബെയ്റൂട്ട്: അമേരിക്ക സന്ദർശിക്കുന്ന ലബനീസ് പ്രസിഡന്റ് ജോസഫ് ഔൺ നാളെ വൈറ്റ്ഹൗസിൽ പ്രസിഡന്റ് ട്രംപുമായി കൂടിക്കാഴ്ച നടത്തും.
തെക്കൻ ലബനനിലെ ഇസ്രേലി സേനാ പിന്മാറ്റത്തിനും ഹിസ്ബുള്ള നിരായുധീകരണത്തിനുമുള്ള പദ്ധതി അദ്ദേഹം ട്രംപിനു സമർപ്പിക്കുമെന്നാണു റിപ്പോർട്ട്.
രണ്ടു പതിറ്റാണ്ടിനിടെ അമേരിക്ക സന്ദർശിക്കുന്ന ആദ്യ ലബനീസ് പ്രസിഡന്‍റാണ് ഔൺ. ട്രംപുമായി അദ്ദേഹം മുഖാമുഖ കൂടിക്കാഴ്ച നടത്തുന്നതും ആദ്യമാണ്.
കഴിഞ്ഞമാസം 26ന് അമേരിക്കയുടെ മധ്യസ്ഥതയിൽ ലബനനും ഇസ്രയേലും തമ്മിലുണ്ടാക്കിയ ധാരണ നടപ്പാക്കാൻ ഇസ്രയേലിനുമേൽ സമ്മർദം ചെലുത്താൻ ട്രംപിനോട് ഔൺ ആവശ്യപ്പെടും.
ഹിസ്ബുള്ളയെ നേരിടാനായി തെക്കൻ ലബനനിൽ ഇസ്രേലി സേന അധിനിവേശം തുടരുകയാണ്. മേഖലയിലെ ആയിരക്കണക്കിനു ലബനീസ് പൗരന്മാർ പലായനം ചെയ്തിരുന്നു.
ഹിസ്ബുള്ളയെ നിരായുധീകരിക്കാനുള്ള വിശദമായ പദ്ധതിയും ഔൺ തയാറാക്കിയിട്ടുണ്ട്. ഇത് ട്രംപിനു കൈമാറും. അതേസമയം, നിരായുധീകരണം അംഗീകരിക്കില്ലെന്നാണ് ഹിസ്ബുള്ള വ്യക്തമാക്കിയിട്ടുള്ളത്. ലബനൻ ഇസ്രയേലുമായി നേരിട്ടു ചർച്ച നടത്തുന്നതും ഹിസ്ബുള്ളയ്ക്കു സ്വീകാര്യമല്ല.
International
വാഷിംഗ്ടൺ ഡിസി: അമേരിക്കയിലെ ട്രക്ക് ഡ്രൈവിംഗ് മേഖലയിൽ ജോലി ചെയ്യുന്നവർക്ക് തിരിച്ചടിയായി യുഎസ് പ്രസിഡന്റ് ഡോണൾഡ് ട്രംപിന്റെ പുതിയ നീക്കം. കുടിയേറ്റക്കാരായ ട്രക്ക് ഡ്രൈവർമാർക്ക് പകരമായി വിരമിച്ച യുഎസ് സൈനികരെ നിയമിക്കുമെന്നാണ് ട്രംപ് പ്രഖ്യാപിച്ചിരിക്കുന്നത്.
വിദേശികളായ പല ഡ്രൈവർമാരും മദ്യത്തിനും ലഹരിമരുന്നിനും അടിമകളാണെന്നും റോഡുകളിൽ നിരവധി ജീവനുകൾ പൊലിയാൻ ഇവർ കാരണമാകുന്നുണ്ടെന്നും ആരോപിച്ചാണ് ട്രംപിന്റെ പുതിയ നീക്കം. ഈ നിർദേശം നടപ്പിലാക്കുകയാണെങ്കിൽ അമേരിക്കയിലെ ട്രക്ക് ഡ്രൈവിംഗ് മേഖലയിൽ ജോലി ചെയ്യുന്ന ഒന്നര ലക്ഷത്തോളം വരുന്ന ഇന്ത്യൻ ഡ്രൈവർമാരെ ഇത് ഗുരുതരമായി ബാധിക്കും. പെൻസിൽവേനിയയിൽ നടന്ന സൈനിക നിക്ഷേപ സംഗമത്തിലാണ് കുടിയേറ്റക്കാരായ ഡ്രൈവർമാരെ ട്രക്ക് ഡ്രൈവിംഗ് മേഖലയിൽ നിന്ന് ഒഴിവാക്കാനുള്ള ഭരണകൂടത്തിന്‍റെ പദ്ധതി അദ്ദേഹം വെളിപ്പെടുത്തിയത്.
അനധികൃതമായി രാജ്യത്ത് പ്രവേശിച്ച കൃത്യമായ രേഖകളോ ഡ്രൈവിംഗ് ലൈസൻസോ ഇല്ലാത്ത കുടിയേറ്റക്കാരായ ട്രക്ക് ഡ്രൈവർമാർക്കെതിരെ രാജ്യവ്യാപകമായി കർശന നടപടികൾ സ്വീകരിച്ചു വരികയാണെന്ന് ട്രംപ് പറഞ്ഞു. സൈന്യത്തിൽ വലിയ വാഹനങ്ങൾ ഓടിച്ച് പരിചയമുള്ള ഏതൊരു അമേരിക്കക്കാരനും കൊമേഴ്സ്യൽ ഡ്രൈവിംഗ് ലൈസൻസിന് അർഹതയുണ്ടായിരിക്കുമെന്നും ട്രംപ് വ്യക്തമാക്കി.
ഈ വർഷം മാർച്ച് മാസത്തിൽ മാത്രം നിയമപരമായ രേഖകളുള്ള രണ്ട് ലക്ഷത്തോളം കുടിയേറ്റക്കാരായ ഡ്രൈവർമാരുടെ ലൈസൻസുകൾ ഭരണകൂടം റദ്ദാക്കിയിരുന്നു. നോർത്ത് അമേരിക്കൻ പഞ്ചാബി ട്രക്കേഴ്സ് അസോസിയേഷന്‍റെ കണക്കനുസരിച്ച് യുഎസിലെ ട്രക്ക് ഡ്രൈവിംഗ് മേഖലയിൽ 1,30,000 നും 1,50,000 നും ഇടയിൽ പഞ്ചാബി-ഹരിയാന സ്വദേശികൾ ജോലി ചെയ്യുന്നുണ്ട്.
International
വാഷിംഗ്ടണ് ഡിസി: ഇറാന്‍റെ പരമോന്നത നേതാവ് മുജ്തബ ഖമനയിയുടെ പ്രധാന സാമ്പത്തിക സ്രോതസായ അലി അൻസാരിയെയും മറ്റ് 13 വ്യക്തികളെയും സ്ഥാപനങ്ങളെയും ലക്ഷ്യമിട്ട് അമേരിക്കയുടെ സാമ്പത്തിക വിലക്ക്. ഇറാൻ ഭരണ നേതൃത്വത്തിന്‍റെ സാമ്പത്തിക സ്രോതസുകൾ ഇല്ലാതാക്കുക എന്ന ലക്ഷ്യത്തോടെയാണ് യുഎസ് ട്രഷറി ഡിപ്പാർട്ട്മെന്‍റ് പുതിയ നിയന്ത്രണങ്ങൾ പ്രഖ്യാപിച്ചത്.
ഇറാൻ - യുഎസ് സംഘർഷം ഒരിടവേളയ്ക്ക് ശേഷം വീണ്ടും രൂക്ഷമായതിനിടെയാണ് അമേരിക്കുടെ പുതിയ നീക്കം. ഐആർജിസിക്ക് സാമ്പത്തിക സഹായം നൽകി എന്നാണ് ദുബായ് ആസ്ഥാനമായി പ്രവർത്തിക്കുന്ന വ്യവസായി അലി അൻസാരിക്കെതിരായ ആരോപണം. നേരത്തെ ബ്രിട്ടനും അൻസാരിക്കെതിരെ സമാനമായ രീതിയിൽ ഉപരോധം ഏർപ്പെടുത്തിയിരുന്നു. പൊതു പണം ദുരുപയോഗം ചെയ്ത് അൻസാരി വിദേശ രാജ്യങ്ങളിൽ വൻതോതിൽ റിയൽ എസ്റ്റേറ്റ്, വാണിജ്യ നിക്ഷേപങ്ങൾ നടത്തിയെന്നാണ് യുഎസിന്‍റെ വാദം.
യുഎസ് ഉപരോധം മറികടന്ന് ഇറാനിയൻ ബാങ്കുകൾക്കായി കോടിക്കണക്കിന് ഡോളറിന്‍റെ വിദേശ നാണ്യ ഇടപാടുകൾ നടത്തുന്ന ഇറാന്‍റെ മൂന്ന് മണി എക്സ്ചേഞ്ച് ഹൗസുകളെയും അമേരിക്ക ലക്ഷ്യമിട്ടു. ഹോങ്കോംഗ്, യുഎഇ എന്നിവിടങ്ങൾ കേന്ദ്രീകരിച്ച് പ്രവർത്തിക്കുന്ന വിദേശ ഷെൽ കമ്പനികളെയും യുഎസ് ട്രഷറി വിഭാഗം കരിമ്പട്ടികയിൽ പെടുത്തിയിട്ടുണ്ട്. ഇറാൻ ഭരണകൂടത്തിന്‍റെ സാമ്പത്തിക അടിത്തറ തകർക്കുകയാണ് തങ്ങളുടെ ലക്ഷ്യമെന്ന് യുഎസ് സ്റ്റേറ്റ് ഡിപ്പാർട്ട്മെന്‍റ് വക്താവ് ടോമി പിഗോട്ട് വ്യക്തമാക്കി.
International
വാഷിംഗ്ടൺ ഡിസി: യുഎസ് പ്രസിഡന്റ് ഡോണൾഡ് ട്രംപിനെ വധിക്കാൻ ഇറാൻ അതീവരഹസ്യമായി പദ്ധതി തയാറാക്കിയതായി ഇസ്രയേലിന്‍റെ മുന്നറിയിപ്പ്. ഇതുമായി ബന്ധപ്പെട്ടുള്ള നിർണായക രഹസ്യാന്വേഷണ വിവരങ്ങൾ ഇസ്രയേൽ അമേരിക്കയ്ക്കു കൈമാറിയതായി യുഎസ് മാധ്യമങ്ങൾ റിപ്പോർട്ട് ചെയ്തു.
അമേരിക്കയും ഇറാനും തമ്മിൽ വീണ്ടും വ്യോമാക്രമണങ്ങൾ ശക്തമാകുകയും മേഖലയിൽ സമ്പൂർണ യുദ്ധഭീതി നിലനിൽക്കുകയും ചെയ്യുന്ന പശ്ചാത്തലത്തിലാണു പുതിയ വിവരങ്ങൾ പുറത്തുവരുന്നത്.
നാറ്റോ ഉച്ചകോടിക്കുശേഷം തുർക്കിയിൽനിന്നു മടങ്ങാൻ ട്രംപ് സുരക്ഷാമുൻകരുതലുകളുടെ ഭാഗമായി പഴയ വിമാനം ഉപയോഗിച്ചതു നേരത്തേ വലിയ ചർച്ചയായിരുന്നു.
ട്രംപിനെ വധിക്കാനുള്ള ഇറാന്‍റെ നീക്കങ്ങളെക്കുറിച്ച് അമേരിക്ക നിരന്തരം നിരീക്ഷിച്ചുവരികയായിരുന്നെന്നും എന്നാൽ ഇസ്രയേൽ ഇപ്പോൾ നൽകിയ മുന്നറിയിപ്പ് തികച്ചും പുതിയതും ഒരു പ്രത്യേക പദ്ധതിയെക്കുറിച്ചുള്ളതുമാണെന്നും സിഎൻഎൻ റിപ്പോർട്ട് ചെയ്തു. ഇറാന്‍റെ ഭാഗത്തുനിന്നുള്ള പുതിയ നീക്കങ്ങളെക്കുറിച്ചാണ് വിവരങ്ങൾ ലഭിച്ചതെന്ന് വാൾസ്ട്രീറ്റ് ജേർണലും സ്ഥിരീകരിച്ചു.
International
ടെഹ്റാൻ: അമേരിക്ക-ഇസ്രയേൽ സംയുക്ത സൈനിക നീക്കത്തിൽ കൊല്ലപ്പെട്ട മുൻ ഇറാൻ പരമോന്നത നേതാവ് ആയത്തുള്ള അലി ഖമനയ്‌യുടെ തകർന്ന ഔദ്യോഗിക വസതിയുടെ ദൃശ്യങ്ങൾ ഇറാൻ പുറത്തുവിട്ടു. ടെഹ്റാനിലെ അതീവ സുരക്ഷിതമായ ഭരണകൂട സമുച്ചയത്തിനുനേരേ നടന്ന ആക്രമണത്തിനുശേഷം ആദ്യമായാണ് തകർന്ന കെട്ടിടങ്ങളുടെ ദൃശ്യങ്ങൾ ഇറാൻ പുറത്തുവിടുന്നത്.
ഖമനയ്‌യുടെ സംസ്കാര ചടങ്ങുകളോട് അനുബന്ധിച്ചാണ് ദൃശ്യങ്ങൾ പുറത്തുവന്നത്. ഫെബ്രുവരി 28-ന് നടന്ന ശക്തമായ വ്യോമാക്രമണത്തിലാണ് പരമോന്നത നേതാവിന്‍റെ വസതി തകരുന്നതും കൊല്ലപ്പെടുന്നതും. സമുച്ചയത്തിനുള്ളിലെ ഇമാം ഖൊമേനി ഹുസൈനിയ എന്ന പ്രാർഥനാ ഹാൾ പൂർണമായും തകർന്നടിഞ്ഞ നിലയിലാണു ദൃശ്യങ്ങളിലുള്ളത്.
നേരത്തെ, ഉപഗ്രഹ ചിത്രങ്ങളിലൂടെ ഖമനയ്‌യുടെ വസതി തകർന്നുതരിപ്പണമായതു പുറംലോകം കണ്ടിരുന്നെങ്കിലും, വസതിക്കകത്തുനിന്നുള്ള ദൃശ്യങ്ങൾ ഇറാൻ ഭരണകൂടം റിലീസ് ചെയ്യുന്നത് ഇതാദ്യമാണ്. ഫെബ്രുവരിയിൽ നടന്ന ആക്രമണത്തിൽ ഖമനയ്‌യുടെ കുടുംബാംഗങ്ങളും കൊല്ലപ്പെട്ടിരുന്നു.
International
വാഷിംഗ്ടൺ ഡിസി: യുഎസ് സ്‌ട്രൈക്കർ ഫോളാരിൻ ബലഗോണിന്‍റെ ചുവപ്പ് കാർഡിൽ ഫിഫയുമായി ഇടപെടൽ നടത്തിയതായി സ്ഥിരീകരിച്ച് അമേരിക്കൻ പ്രസിഡന്റ് ഡോണൾഡ് ട്രംപ്. ബോസ്‌നിയയ്‌ക്കെതിരായ മത്സരത്തിൽ ചുവപ്പ് കാർഡ് കിട്ടിയതിനെ തുടർന്ന് ബലഗോണിന് ലഭിച്ച ഒരു മത്സരത്തിലെ വിലക്ക് പുനഃപരിശോധിക്കാൻ താൻ ഫിഫയോട് ആവശ്യപ്പെട്ടതായി ട്രംപ് പറഞ്ഞു.
ഫിഫ പ്രസിഡന്റ് ജിയാനി ഇൻഫന്‍റീനോയുമായി സംസാരിച്ചതായി സ്ഥിരീകരിച്ച ട്രംപ്, എന്നാൽ ഒരു പുനഃപരിശോധന ആവശ്യപ്പെടുക മാത്രമാണ് ചെയ്തതെന്നു, വിലക്ക് റദ്ദാക്കാൻ പറഞ്ഞിട്ടില്ലെന്നും കൂട്ടിച്ചേർത്തു.
നേരിട്ട് റെഡ് കാർഡ് ലഭിച്ചതോടെ ഫോളാരിൻ ബലഗോണിന് ബെൽജിയവുമായുള്ള പ്രീ ക്വാർട്ടറിൽ കളിക്കാൻ കഴിയുമായിരുന്നില്ല. ട്രംപ് ഇടപെടൽ നടത്തിയതിന് പിന്നാലെ ഒരു മത്സരത്തിലെ വിലക്ക് ഒരു വർഷത്തേക്ക് ഫിഫ നീട്ടാൻ തീരുമാനിച്ചിരുന്നു. ഇത് ഫുട്‌ബോൾ ലോകത്ത് വലിയ പ്രതിഷേധങ്ങൾക്ക് വഴിവച്ചിരുന്നു. യുവേഫയടക്കം ഇതിനെതിരെ കടുത്ത വിമർശനവുമായി രംഗത്തെത്തിയിട്ടുണ്ട്.
International
വാഷിംഗ്ടൺ ഡിസി: ടെഹ്‌റാനിൽ ഇറാൻ പരമാധികാര നേതാവ് ആയത്തുള്ള ഖമനയ്‌യുടെ വിലാപയാത്രയിൽ പങ്കെടുത്ത ലക്ഷക്കണക്കിനു ജനങ്ങളെ കണ്ടതിൽ തനിക്ക് അദ്ഭുതമുണ്ടെന്നും ഇറാനിലെ ഭൂരിഭാഗം ജനങ്ങളും അന്തരിച്ച പരമോന്നത നേതാവിന് എതിരാണെന്നാണു താൻ വിശ്വസിക്കുന്നതെന്നും യുഎസ് പ്രസിഡന്റ് ഡോണൾഡ് ട്രംപ്.
അമേരിക്കയുടെ 250-ാം സ്വാതന്ത്ര്യദിനത്തോടനുബന്ധിച്ച് വാഷിംഗ്ടണിലെ നാഷണൽ മാളിൽ നടന്ന ‘സല്യൂട്ട് ടു അമേരിക്ക’ചടങ്ങിൽ സംസാരിക്കവേയാണ് ട്രംപിന്റെ പരാമർശം.
ഖമനയ്‌യുടെ സംസ്കാരച്ചടങ്ങുകൾ സസൂക്ഷ്മം നിരീക്ഷിച്ചുവരികയാണെന്ന് യുഎസ് മാധ്യമമായ ആക്സിയോസിനു നൽകിയ അഭിമുഖത്തിൽ ട്രംപ് പറഞ്ഞു. ഇറാന്‍റെ ഒട്ടുമിക്ക ഉന്നത നേതാക്കളും ഒരൊറ്റ സ്ഥലത്ത് ഒത്തുകൂടിയ ഈ ചടങ്ങ് വലിയൊരു ‘സൈനിക അവസര’മായിരുന്നുവെന്നും ട്രംപ് പറഞ്ഞു.
“അമേരിക്ക വിചാരിച്ചിരുന്നെങ്കിൽ ഇറാന്‍റെ ഭരണനേതൃത്വത്തെ അവിടെവച്ച് ലക്ഷ്യമിടാമായിരുന്നു. നയതന്ത്ര ചർച്ചകൾ പരിഗണിച്ചാണ് അതിനു മുതിരാത്തത്.
ഒരൊറ്റ ഷോട്ട്, അവരെയെല്ലാം നമുക്ക് ഒന്നിച്ച് ഇല്ലാതാക്കാമായിരുന്നു. എന്നാൽ നമ്മൾ അതു ചെയ്യില്ല, കാരണം അങ്ങനെ ചെയ്താൽ പിന്നീട് നമുക്ക് ചർച്ചകൾ നടത്താൻ അവിടെ ആരും അവശേഷിക്കില്ല’’- ട്രംപ് പറഞ്ഞു.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN