National
ന്യൂഡൽഹി: ഡൽഹി ഉൾപ്പടെ ആറു സംസ്ഥാനങ്ങളിൽ എസ്ഐആർ സമയക്രമം നീട്ടി. ഈ സംസ്ഥാനങ്ങളിൽ കരട് വോട്ടർ പട്ടികയ്ക്കെതിരേ പരാതികളും ആക്ഷേപങ്ങളും സമർപ്പിക്കാനുള്ള സമയപരിധി ഈ മാസം അവസാനിരിക്കെയാണ് കേന്ദ്ര തെരഞ്ഞെടുപ്പു കമ്മിഷന്റെ നടപടി.
ഡൽഹിയിൽ പരാതികൾ സമർപ്പിക്കാനുള്ള അവസാന തീയതി നവംബർ 25 ആയി നീട്ടി. അന്തിമ വോട്ടർപട്ടിക ഡിസംബർ 22ന് പ്രസിദ്ധീകരിക്കും.
ഡൽഹിയിൽ കരട് വോട്ടർപട്ടിക പ്രസിദ്ധീകരിച്ചപ്പോൾ 43 ലക്ഷത്തോളം ആളുകളുടെ പേരുകൾ വെട്ടിയതായി ആക്ഷേപമുയർന്നിരുന്നു.
ഡൽഹിയിൽ ഉൾപ്പടെ സമയക്രമം നീട്ടുന്ന കാര്യത്തിൽ പുനഃപരിശോധന നടത്താൻ സുപ്രീംകോടതി കഴിഞ്ഞദിവസം ആവശ്യപ്പെട്ടതോടെയാണു കമ്മിഷന്റെ നടപടി. കൂടാതെ ഡൽഹി ചീഫ് ഇലക്ടറൽ ഓഫിസറും എസ്ഐആർ ഷെഡ്യൂൾ നീട്ടി നൽകണമെന്ന് കേന്ദ്ര തെരഞ്ഞെടുപ്പു കമ്മിഷനോട് ആവശ്യപ്പെട്ടിരുന്നു.
ആന്ധ്രപ്രദേശ്, ഹരിയാന എന്നി സംസ്ഥാനങ്ങളിൽ ആക്ഷേപങ്ങൾ തീർപ്പാക്കുന്നതിനുള്ള സമയം നവംബർ 20 വരെ നീട്ടിയിട്ടുണ്ടെന്നും അവിടത്തെ അന്തിമ വോട്ടർ പട്ടിക നവംബർ 30ന് പ്രസിദ്ധീകരിക്കുമെന്നും കമ്മിഷൻ അറിയിച്ചു.
നാഗാലാൻഡ്, തെലുങ്കാന, മഹാരാഷ്ട്ര എന്നിവിടങ്ങളിലും നവംബർ 30ന് അന്തിമ വോട്ടർ പട്ടിക പ്രസിദ്ധീകരിക്കും.
പുതുക്കിയ ഷെഡ്യൂൾ സംബന്ധിച്ച വിവരം രാഷ്ട്രീയ പാർട്ടികളെയും ബന്ധപ്പെട്ട എല്ലാവരെയും അറിയിക്കാൻ ഉദ്യോഗസ്ഥർക്കു നിർദേശം നൽകിയിട്ടുണ്ട്.
Viral
ദേശീയപാതയിൽ ഗതാഗതത്തിന് തടസമുണ്ടാക്കിയും ജീവന് ഭീഷണിയായ തരത്തിൽ അപകടകരമായ രീതിയിൽ അഭ്യാസപ്രകടനങ്ങൾ നടത്തിയും യുവാക്കൾ നടത്തിയ ജന്മദിനാഘോഷം വൻ വിവാദത്തിലേക്ക്.
ഉത്തർപ്രദേശിലെ ഹാപ്പൂരിൽ നാഷണൽ ഹൈവേ ഒമ്പതിൽ രാജാ കി ഹവേലി ഹോട്ടലിന് സമീപമായിരുന്നു ഈ സംഭവം. പൊതുവഴിയിലെ ഈ ആഘോഷത്തിന്റെ ദൃശ്യങ്ങൾ സാമൂഹിക മാധ്യമങ്ങളിൽ വൈറലായതോടെ വലിയ രീതിയിലുള്ള ജനരോഷമാണ് ഉയർന്നുവന്നത്.
നിർത്തിയിട്ടിരുന്ന കാറിന്റെ ബോണറ്റിൽ അഞ്ചോളം കേക്കുകൾ നിരത്തിവെച്ച്, വാളുകൊണ്ട് അത് മുറിക്കുന്ന യുവാവിന്റെ ദൃശ്യങ്ങളാണ് പ്രധാനമായും പുറത്തുവന്നത്. ഇയാളെ ചുറ്റിപ്പറ്റി നിന്ന സുഹൃത്തുക്കൾ ഉറക്കെ ആർത്തുവിളിക്കുകയും പാർട്ടി പോപ്പർ പൊട്ടിക്കുകയും ചെയ്യുന്നത് വീഡിയോയിൽ കാണാം.
ഇതിനുപുറമെ മറ്റ് ചില ചെറുപ്പക്കാർ അതിവേഗത്തിൽ സഞ്ചരിക്കുന്ന കാറിന്റെ ജനലിലൂടെ വെളിയിലേക്ക് ആഞ്ഞുനിൽക്കുന്നതും മോട്ടോർ സൈക്കിളിൽ അപകടകരമായ സ്റ്റണ്ടുകൾ നടത്തുന്നതും ദൃശ്യങ്ങളിലുണ്ട്.
തങ്ങളുടെ ഇൻസ്റ്റാഗ്രാം അക്കൗണ്ടിൽ പോസ്റ്റ് ചെയ്ത വീഡിയോകൾ പിന്നീട് ഡിലീറ്റ് ചെയ്തെങ്കിലും, അതിനോടകം തന്നെ ദൃശ്യങ്ങൾ മറ്റ് പ്ലാറ്റ്ഫോമുകളിൽ വ്യാപകമായി പ്രചരിച്ചിരുന്നു. സംഭവം ശ്രദ്ധയിൽപ്പെട്ടതിനെ തുടർന്ന് ബാബുഗഡ് പൊലിസ് ഉടൻതന്നെ കർശന നടപടി സ്വീകരിച്ചു.
കേസിൽ ഉൾപ്പെട്ട എട്ട് പേരെ പൊലിസ് അറസ്റ്റ് ചെയ്യുകയും ആഘോഷത്തിനായി ഉപയോഗിച്ച കാറും മോട്ടോർ സൈക്കിളും കസ്റ്റഡിയിലെടുക്കുകയും ചെയ്തു. അറസ്റ്റിലായവരിൽ ഹിന്ദു രക്ഷാ ദളിന്റെ ജില്ലാ ഭാരവാഹിയും ഉൾപ്പെടുന്നുണ്ട്.
ഒക്ടോബർ 29-നാണ് സംഭവം തങ്ങളുടെ ശ്രദ്ധയിൽപ്പെട്ടതെന്നും തുടർന്നാണ് പ്രതികൾക്കെതിരെ അന്വേഷണം ഊർജിതമാക്കിയതെന്നും ഹാപ്പൂർ പൊലിസ് സൂപ്രണ്ട് അറിയിച്ചു. അറസ്റ്റിലായതിന് പിന്നാലെ പ്രതികൾ പൊലിസ് സ്റ്റേഷനിൽ കൈകൂപ്പി മാപ്പ് അപേക്ഷിച്ചു നിൽക്കുന്ന ദൃശ്യങ്ങളും പുറത്തുവന്നിട്ടുണ്ട്.
പൊതുനിരത്തുകളിലെ ഇത്തരം ഉത്തരവാദിത്തമില്ലാത്ത പെരുമാറ്റങ്ങൾക്കെതിരെയും ആയുധങ്ങൾ പ്രദർശിപ്പിച്ചുള്ള ആഘോഷങ്ങൾക്കെതിരെയും ശക്തമായ നിയമനടപടികൾ സ്വീകരിക്കുമെന്ന മുന്നറിയിപ്പാണ് പൊലിസ് നൽകുന്നത്.
National
ഫിറോസാബാദ്: നഴ്സിംഗ് വിദ്യാർഥിനിയെ മരിച്ച നിലയിൽ കണ്ടെത്തിയ സംഭവത്തിൽ കോളജ് പ്രിൻസിപ്പലിനും മകനുമെതിരെ ആരോപണവുമായി കുടുംബം. മെയിൻപുരി സ്വദേശിനിയായ പ്രീതി മരിച്ച സംഭവത്തിൽ കോളജ് പ്രിൻസിപ്പലും മകനുമെതിരെ അന്വേഷണം നടത്തണമെന്ന് ആവിശ്യപ്പെട്ട് കുടുംബം പൊലിസിൽ പരാതി നൽകി.
പ്രീതി ഫിറോസാബാദ് കോളജ് ഓഫ് നഴ്സിംഗിലെ ഒന്നാം വർഷ വിദ്യാർഥിനിയായിരുന്നു. ബുധനാഴ്ച രാവിലെ ഹോസ്റ്റലിലെ മറ്റ് വിദ്യാർഥിനികൾ പ്രഭാതഭക്ഷണത്തിനായി മെസിലേക്ക് പോയപ്പോഴാണ് പ്രീതിയെ കാണാതായ വിവരം ശ്രദ്ധയിൽപ്പെട്ടത്. തുടർന്ന് സിസിടിവി ദൃശ്യങ്ങൾ പരിശോധിച്ച പൊലിസ് പുലർച്ചെ 2.30ന് പ്രീതി പുറത്തേക്ക് പോകുന്നത് കണ്ടെത്തി.
തുടർന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. കോളജ് പ്രിൻസിപ്പൽ സുരേഷ് ദാക്ഷും മകൻ യാഷും ചേർന്ന് പ്രീതിയെ കൊലപ്പെടുത്തിയെന്നാണ് സഹോദരൻ രോഹിത് ആരോപിച്ചത്. തുടർന്ന് അന്വേഷണം ആവശ്യപ്പെട്ട് മൃതദേഹവുമായി റോഡ് ഉപരോധിച്ചിരുന്നു. ഉന്നത പൊലിസ് ഉദ്യോഗസ്ഥർ ഇടപെട്ടതോടെയാണ് കുടുംബം ഉപരോധം അവസാനിപ്പിച്ചത്.
National
ലക്നോ: ഉത്തർപ്രദേശിൽ സർക്കാർ ജോലിക്ക് ഉദ്യോഗാർഥികളുടെ സ്വാഭാവ പരിശോധന നടപടിക്രമങ്ങൾ കർശനമാക്കി യോഗി സർക്കാർ. രാജ്യത്ത് അക്രമ സ്വഭാവമുള്ള പ്രക്ഷോഭങ്ങളിലൂടെയോ നിയമവിരുദ്ധ മാർഗങ്ങളിലൂടെയോ ഭരണമാറ്റം ലക്ഷ്യമിട്ട് പ്രവർത്തിക്കുന്നവർക്ക് സർക്കാർ ജോലി നിഷേധിക്കുമെന്നാണ് സർക്കാർ വ്യക്തമാക്കുന്നത്.
നിയമനവകുപ്പ് പ്രിൻസിപ്പൽ സെക്രട്ടറി എം. ദേവരാജ് പുറത്തിറക്കിയ ഉത്തരവിലാണ് ഇക്കാര്യം വ്യക്തമാക്കുന്നത്. അടുത്തിടെ നടന്ന പ്രതിഷേധങ്ങൾക്കിടയിൽ ഉയർന്ന ഭരണമാറ്റ ആഹ്വാനങ്ങളെ തുടർന്നുണ്ടായ വിവാദങ്ങളുടെ പശ്ചാത്തലത്തിലാണ് പുതിയ നീക്കം.
എന്നാൽ ഏതെങ്കിലും പ്രത്യേക രാഷ്ട്രീയ പ്രത്യയശാസ്ത്രം വച്ചുപുലർത്തുന്നു എന്നത് മാത്രം ഒരു ഉദ്യോഗാർഥിക്ക് ജോലി നിഷേധിക്കാനുള്ള കാരണമാകില്ലെന്ന് സർക്കാർ ഉത്തരവിൽ വ്യക്തമാക്കുന്നുണ്ട്. കൂടാതെ ഉദ്യോഗാർഥിക്കെതിരെ ഒരു എഫ്ഐആർ രജിസ്റ്റർ ചെയ്യപ്പെടുകയോ അല്ലെങ്കിൽ ഏതെങ്കിലും കേസിൽ അന്വേഷണം നിലനിൽക്കുകയോ ചെയ്യുന്നതുകൊണ്ട് മാത്രം അയാൾക്ക് ജോലി നിഷേധിക്കപ്പെടില്ലെന്നും ഉത്തരവിൽ വ്യക്തമാക്കുന്നു.
വിവിധ സർക്കാർ വകുപ്പുകൾ, കോർപറേഷനുകൾ, കൗൺസിലുകൾ, തദ്ദേശ സ്ഥാപനങ്ങൾ എന്നിവിടങ്ങളിലേക്കുള്ള ഡയറക്ട് റിക്രൂട്ട്മെന്റിനാണ് പുതിയ ഉത്തരവ് ബാധകമാകുക. അലഹബാദ് കോടതിയുടെ നിർദേശപ്രകാരമാണ് സർക്കാർ നടപടി.
National
ലക്നോ: ഉത്തർ പ്രദേശിലെ സമാജ്വാദി പാർട്ടി നേതാവ് അസം ഖാന്റെ നിയന്ത്രണത്തിലുള്ള മുഹമ്മദ് അലി ജൗഹർ സർവകലാശാലയുടെ ഭൂമിയും ആസ്തികളും ഇഡി കണ്ടുകെട്ടി. അസം ഖാനെതിരായ കള്ളപ്പണം വെളുപ്പിക്കൽ കേസുമായി ബന്ധപ്പെട്ടാണ് നടപടി.
1,170 കോടിരൂപയുടെ വിപണിമൂല്യമുള്ള ആസ്തികളാണ് കണ്ടുകെട്ടിയത്. സർവകലാശാലയുടെ ഉടമസ്ഥർ മൗലാന മൊഹമ്മദ് അലി ജൗഹർ ട്രസ്റ്റാണ്. സർവകലാശാലയുടെ ഓണററി ചാൻസലർ പദവിയും അസം ഖാൻ വഹിക്കുന്നുണ്ട്.
സർവകലാശാലയുടെ വികസനത്തിനുവേണ്ടി സർക്കാർ ഫണ്ടും നിർമാണ സാമഗ്രികളും മറ്റ് പൊതുവിഭവങ്ങളും വഴിമാറ്റിയെന്ന് ഇഡി അറിയിച്ചു. പൊതുമരാമത്ത് ജോലികൾക്കായുള്ള സർക്കാർപണം സർവകലാശാലയ്ക്ക് വേണ്ടി വകമാറ്റിയെന്നും കണ്ടെത്തിയിട്ടുണ്ട്.
National
ന്യൂഡൽഹി: കർണാടകയിലെയും ഉത്തർപ്രദേശിലെയും ലെജിസ്ലേറ്റീവ് കൗൺസിൽ (എംഎൽസി) തെരഞ്ഞെടുപ്പുകളുടെ വിവരങ്ങൾ പുറത്തുവന്നു. കർണാടകയിൽ നടന്ന നാല് സീറ്റുകളിലേക്കുള്ള തെരഞ്ഞെടുപ്പിൽ ഭരണകക്ഷിയായ കോൺഗ്രസിനെ പൂർണമായി പരാജയപ്പെടുത്തി ബിജെപി - ജെഡിഎസ് (എൻഡിഎ) സഖ്യം മുഴുവൻ സീറ്റുകളും തൂത്തുവാരി.
അതേസമയം, ഉത്തർപ്രദേശിലെ 11 സീറ്റുകളിലേക്ക് നടന്ന വോട്ടെണ്ണലിൽ പ്രധാനമന്ത്രിയുടെ മണ്ഡലമായ വാരണാസിയിൽ സമാജ്വാദി പാർട്ടി (എസ്പി) ബിജെപിയെ ഞെട്ടിച്ച് വൻ വിജയം കൊയ്തു. എന്നാൽ ഗോരഖ്പൂർ ഉൾപ്പെടെയുള്ള ചില മണ്ഡലങ്ങളിൽ ഭരണകൂടം ബിജെപിക്ക് അനുകൂലമായി വോട്ടെണ്ണലിൽ അട്ടിമറി നടത്തുന്നുവെന്ന് ആരോപിച്ച് സമാജ്വാദി പാർട്ടിയും സ്വതന്ത്ര സ്ഥാനാർത്ഥികളും വോട്ടെണ്ണൽ ബഹിഷ്കരിച്ചു.
കർണാടകയിൽ കോൺഗ്രസിന് തിരിച്ചടി
കർണാടകയിലെ നാല് എംഎൽസി സീറ്റുകളിലേക്ക് ഒക്ടോബർ 23-ന് നടന്ന തെരഞ്ഞെടുപ്പിന്റെ ഫലം കോൺഗ്രസിന് വലിയ തിരിച്ചടിയായി. മത്സരിച്ച ഒരു സീറ്റിൽ പോലും ജയിക്കാൻ ഭരണകക്ഷിയായ കോൺഗ്രസിന് കഴിഞ്ഞില്ല. ബിജെപി മൂന്ന് സീറ്റുകളിലും സഖ്യകക്ഷിയായ ജെഡിഎസ് ഒരു സീറ്റിലും വിജയിച്ചു. കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയുടെ തട്ടകത്തിൽ ഉൾപ്പെടെ ബിജെപി സ്ഥാനാർഥിയാണ് വിജയക്കൊടി പാറിച്ചത്. ഇവിടെ ബിജെപിയുടെ ശശിൽ ജി. നമോഷി കോൺഗ്രസിന്റെ ശരണപ്പ മട്ടൂരിനെ പരാജയപ്പെടുത്തിയാണ് അഞ്ചാം തവണയും വിജയം നേടിയത്.
മോദിയുടെ തട്ടകമായ വാരണാസിയിൽ എസ്പിക്ക് ചരിത്ര വിജയം
ഉത്തർപ്രദേശിൽ അഞ്ച് ബിരുദധാരികളുടെയും ആറ് അധ്യാപകരുടെയും മണ്ഡലങ്ങളുൾപ്പെടെ 11 സീറ്റുകളിലേക്കാണ് വോട്ടെണ്ണൽ നടന്നത്. ഇതിൽ 55.24 ശതമാനം വോട്ടിംഗാണ് രേഖപ്പെടുത്തിയത്.
വാരണാസിയിൽ ബിജെപിയുടെ പ്രമോദ് കുമാർ മിശ്രയെ 4,898 വോട്ടുകൾക്ക് തോൽപ്പിച്ചാണ് സമാജ്വാദി പാർട്ടിയുടെ ലാൽ ബിഹാരി യാദവ് മണ്ഡലം നിലനിർത്തിയത്. വാരാണസിയിൽ തിരിച്ചടിയുണ്ടായെങ്കിലും ലഖ്നൗ, മീററ്റ്-സഹാറൻപൂർ, ബറേലി-മൊറാദാബാദ് ടീച്ചേഴ്സ് മണ്ഡലങ്ങളിലും മീററ്റ് ഗ്രാജുവേറ്റ്സ് മണ്ഡലത്തിലും ബിജെപി വിജയം കൊയ്തു.
ആദ്യ മൂന്ന് റൗണ്ടുകൾക്ക് ശേഷം ഭരണകൂടവും ഉദ്യോഗസ്ഥരും ഇടപെട്ട് ബിജെപി സ്ഥാനാർത്ഥിക്ക് അനുകൂലമായി വോട്ടെണ്ണൽ അട്ടിമറിച്ചെന്ന് ആരോപിച്ച് എസ്പി സ്ഥാനാർത്ഥി സഞ്ജയൻ ത്രിപാഠിയും സ്വതന്ത്ര സ്ഥാനാർത്ഥി രാജീവ് യാദവും വോട്ടെണ്ണൽ കേന്ദ്രം ബഹിഷ്കരിച്ചു. വോട്ടർപട്ടികയിൽ 30 ശതമാനത്തോളം വ്യാജ പേരുകൾ തിരുകിക്കയറ്റിയെന്ന് എസ്പി സ്ഥാനാർത്ഥി ഡാനിഷ് അക്തറും ആരോപിച്ചു.
*എന്താണ് ദ്വിമണ്ഡലസഭ
ഇന്ത്യയിൽ ഉത്തർപ്രദേശ്, ബിഹാർ, മഹാരാഷ്ട്ര, കർണാടക, ആന്ധ്രാപ്രദേശ്, തെലങ്കാന എന്നീ ആറ് സംസ്ഥാനങ്ങളിൽ മാത്രമാണ് നിലവിൽ ലെജിസ്ലേറ്റീവ് കൗൺസിൽ സംവിധാനമുള്ളത്. ജനങ്ങൾ നേരിട്ട് പ്രതിനിധികളെ തെരഞ്ഞെടുക്കുന്ന നിയമസഭയ്ക്ക് പുറമെ, സമഗ്രവും കുറ്റമറ്റതുമായ നിയമനിർമാണവും ഭരണനിർവഹണവുമാണ് ലെജിസ്ലേറ്റീവ് കൗൺസിലുകളുടെ ലക്ഷ്യം
ബിരുദധാരികളും അധ്യാപകരും തദ്ദേശ സ്വയംഭരണ പ്രതിനിധികളും ഉൾപ്പെടുന്ന വൈവിധ്യമാർന്ന സമൂഹങ്ങളുടെ ശബ്ദം സഭയിൽ ഉറപ്പാക്കാനുമാണ് ഈ ഉപരിസഭ നിലകൊള്ളുന്നത്. രാജ്യസഭയെപ്പോലെ പിരിച്ചുവിടപ്പെടാത്ത ഒരു സ്ഥിരം സഭയായതിനാൽ, ഓരോ രണ്ടു വർഷം കൂടുമ്പോഴും കൃത്യമായ ഇടവേളകളിൽ ഇവെടെ തിരഞ്ഞെടുപ്പുകൾ നടക്കുകയും പുതിയ അംഗങ്ങൾ സഭയുടെ ഭാഗമാവുകയും ചെയ്യുന്നു.
Viral
ഉത്തർപ്രദേശിലെ മഹോബയിലുള്ള ജില്ലാ ആശുപത്രിയിൽ രണ്ട് തെരുവ് കാളകൾ അത്യാഹിത വിഭാഗത്തിലേക്ക് അപ്രതീക്ഷിതമായി കയറിച്ചെന്നത് രോഗികളിലും കൂട്ടിരിപ്പുകാരിലും വലിയ ഭീതി പരത്തി.
ബുധനാഴ്ച വൈകുന്നേരമുണ്ടായ ഈ അപ്രതീക്ഷിത സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ സർക്കാർ ആശുപത്രിയിലെ സുരക്ഷാ സംവിധാനങ്ങൾക്കെതിരെ കടുത്ത വിമർശനമാണ് ഉയരുന്നത്.
പ്രധാന കവാടത്തിലൂടെ അകത്തുകടന്ന മൃഗങ്ങൾ നേരെ രോഗികൾ ചികിത്സയിൽ കഴിയുന്ന വാർഡിലേക്കാണ് എത്തിയത്. ഇത് വാർഡിൽ വലിയ പരിഭ്രാന്തി സൃഷ്ടിക്കുകയും രോഗികൾ കിടക്കകളിൽ നിന്ന് താഴെയിറങ്ങി സുരക്ഷിത സ്ഥാനത്തേക്ക് മാറാൻ ശ്രമിക്കുകയും ചെയ്തു.
ആശുപത്രി ജീവനക്കാരുടെയും മറ്റും സമയോചിതമായ ഇടപെടലിനെത്തുടർന്ന് ഒരു കാളയെ പെട്ടെന്നുതന്നെ പുറത്തിറക്കാൻ കഴിഞ്ഞെങ്കിലും, രണ്ടാമത്തെ കാള ഏറെനേരം വാർഡിൽ അലഞ്ഞുതിരിഞ്ഞു നടന്നത് ആശങ്ക ഇരട്ടിയാക്കി.
ഒടുവിൽ രണ്ടാമത്തെ കാളയെയും പുറത്തേക്ക് തുരത്താൻ സാധിച്ചതിനാൽ വലിയ ദുരന്തങ്ങൾ ഒഴിവായി. സംഭവത്തിൽ ആർക്കും പരിക്കുകൾ റിപ്പോർട്ട് ചെയ്തിട്ടില്ലെങ്കിലും രോഗികളുടെ സുരക്ഷ ചോദ്യം ചെയ്യപ്പെടുന്ന അവസ്ഥയാണുണ്ടായത്.
ആശുപത്രിയിൽ സുഹൃത്തിനെ കാണാനെത്തിയ ഒരാൾ ഈ സംഭവത്തിന് നേരിട്ട് സാക്ഷിയാവുകയും രോഗികൾ കിടക്കുന്ന സ്ഥലത്ത് മൃഗങ്ങൾ കയറിവരുന്നത് അപകടത്തിന് ഇടയാക്കുമെന്ന് ചൂണ്ടിക്കാണിക്കുകയും ചെയ്തു.
രാത്രികാലങ്ങളിൽ ആശുപത്രിയിൽ ആവശ്യത്തിന് സുരക്ഷാ ജീവനക്കാരില്ലാത്തതാണ് ഇത്തരം വീഴ്ചകൾക്ക് കാരണമെന്നും രോഗികൾക്ക് ഭയമില്ലാതെ ചികിത്സ ഉറപ്പാക്കാൻ മുൻകരുതലുകൾ വേണമെന്നും അദ്ദേഹം ആവശ്യപ്പെട്ടു.
ജില്ലാ ആശുപത്രി പരിസരത്ത് തെരുവ് മൃഗങ്ങളുടെ ശല്യം രൂക്ഷമാണെന്ന പരാതികൾ നിലനിൽക്കെയാണ് ഇപ്പോൾ ഇത്തരത്തിലൊരു ഗുരുതര സുരക്ഷാ വീഴ്ച ഉണ്ടായിരിക്കുന്നത്.
National
നാഗ്പുർ: കഫേ ഉടമയുടെ മരണത്തെ തുടർന്ന് ഒളിവിൽ പോയ സോഷ്യൽ മീഡിയ ഇൻഫ്ലുവൻസർ ശ്രദ്ധ ദുബെ പിടിയിൽ. നാഗ്പുരിൽ നിന്നാണ് ശ്രദ്ധയെ യുപി പൊലിസ് കസ്റ്റഡിയിലെടുത്തത്. ശ്രദ്ധ ദുബെയുടെ സഹോദരി രശ്മി ദുബെയും ഡ്രൈവർ ഡാനിഷും പിടിയിലായിട്ടുണ്ട്.
ലക്നോവിൽ നിരവധി റെസ്റ്റോറന്റുകളുടെ ഉടമയായ ശിവ ശർമ്മ ശ്രദ്ധ ദുബെയുടെ അപ്പാർട്ട്മെന്റിന്റെ നാലാം നിലയിൽ നിന്ന് വീണ് മരിക്കുകയായിരുന്നു. ശ്രദ്ധ കൊലപ്പെടുത്തിയതാണെന്ന് ആരോപിച്ച് ശിവയുടെ കുടുംബം രംഗത്തെത്തിയിരുന്നു.
അറസ്റ്റില് നിന്ന് രക്ഷപ്പെടാന് ശ്രദ്ധ പല സ്ഥലങ്ങളിലായി ഒളിവില് കഴിയുകയായിരുന്നുവെന്നാണ് പൊലിസ് പറയുന്നത്. ഇവരെക്കുറിച്ച് വിവരം നല്കുന്നവര്ക്ക് പൊലിസ് 50,000 രൂപ പാരിതോഷികവും പ്രഖ്യാപിച്ചിരുന്നു.
യുപി പൊലിസിന്റെ പ്രത്യേക ദൗത്യസംഘവും നാഗ്പുര് പൊലിസും ചേർന്നാണ് മൂവരെയും പിടികൂടിയത്. ശിവയുടെ മരണത്തിന് പിന്നാലെ മൂവരും ലക്നോവിൽ നിന്ന് നേപ്പാളിലേക്ക് കടന്നിരുന്നു. പിന്നീട് നേപ്പാളില് നിന്ന് റായ്ബറേലി വഴി ആഗ്രയിലെത്തി. അവിടെനിന്ന് നാഗ്പൂരിലേക്ക് യാത്ര തിരിക്കുകയായിരുന്നു.
നിയമനടപടികൾ പൂർത്തിയാക്കിയ ശേഷം പ്രതികളെ ലക്നോവിലേക്ക് കൊണ്ടുവരുമെന്ന് പൊലിസ് അറിയിച്ചു.
National
പ്രയാഗ്രാജ്: ഭൂമി തർക്കത്തെത്തുടർന്ന് അന്പത്തിരണ്ടുകാരനായ അഭിഭാഷകൻ വെടിയേറ്റു കൊല്ലപ്പെട്ടു. സതീഷ്കുമാർ ശ്രീവാസ്തവ ആണ് കൊല്ലപ്പെട്ടത്. വ്യാഴാഴ്ച സലോറി മേഖലയിലാണ് സംഭവം. മറ്റൊരു അഭിഭാഷകനാണു വെടിവെച്ചതെന്നാണ് നിഗമനം. കൊല്ലപ്പെട്ട സതീഷ് ശ്രീവാസ്തവ കോളജിൽ ലാബ് അറ്റൻഡന്റായി ജോലി ചെയ്തിരുന്നു.
അഡീഷണൽ ഗവ. അഡ്വക്കറ്റ് ദേവേന്ദ്ര നാഥ് മിശ്ര, ലൈസൻസുള്ള റിവോൾവർ ഉപയോഗിച്ച് ഭർത്താവിനെ വെടിവെച്ചു കൊലപ്പെടുത്തിയെന്നാണു സതീഷിന്റെ ഭാര്യ വർഷയുടെ ആരോപണം. നസൂൽ ഭൂമിയുമായി ബന്ധപ്പെട്ട തർക്കമാണ് സംഭവത്തിനു പിന്നിലെന്നാണു വിവരം.
വ്യാഴാഴ്ച ഉച്ചയോടെ തർക്കഭൂമിയിലെത്തിയ ദേവേന്ദ്ര നാഥ് മിശ്ര, സതീഷ് സ്ഥാപിച്ചിരുന്നുവെന്നു പറയപ്പെടുന്ന പൂട്ടു തകർത്തതോടെയാണു സംഘർഷമുണ്ടായതെന്ന് ഡെപ്യൂട്ടി പോലീസ് കമ്മീഷണർ സാഗർ ജെയിൻ പറഞ്ഞു. തുടർന്നുണ്ടായ തർക്കത്തിനിടെ വെടിയുതിർക്കുകയും സതീഷിന്റെ വയറ്റിൽ വെടിയേൽക്കുകയുമായിരുന്നു.
ദേവേന്ദ്ര നാഥ് മിശ്ര, ഭാര്യ ശൈൽ മിശ്ര, മകൻ അമരേന്ദ്ര നാഥ് മിശ്ര, നിപേന്ദ്ര മിശ്ര എന്നിവർക്കും തിരിച്ചറിയാത്ത പത്തു പേർക്കും എതിരേ വർഷ പോലീസിൽ പരാതി നൽകി. ജില്ലാ സെഷൻസ് കോടതിയിലെ അഭിഭാഷകനായിരുന്ന സതീഷ്, ഈശ്വർ ശരൺ ഡിഗ്രി കോളേജിൽ ലാബ് അസിസ്റ്റന്റായും ജോലി ചെയ്തിരുന്നു.
National
ലക്നോ: യുപിയിൽനിന്ന് എട്ടു ബിജെപി സ്ഥാനാർഥികളും രണ്ട് എസ്പി സ്ഥാനാർഥികളും എതിരില്ലാതെ രാജ്യസഭയിലേക്കു തെരഞ്ഞെടുക്കപ്പെട്ടു.
യുപി മന്ത്രി ധരംപാൽ സിംഗുംപ്രമുഖ ബിസിനസുകാരൻ ധൻരാജ് പരിമൾ നാത്വാനിയും തെരഞ്ഞെടുക്കപ്പെട്ടവരിൽ ഉൾപ്പെടുന്നു. സമാജ്വാദി പാർട്ടി സ്ഥാനാർഥിയായാണ് ധൻരാജ് രാജ്യസഭാംഗമാകുന്നത്.
ഉത്തരാഖണ്ഡിൽനിന്ന് ബിജെപിയിലെ ദിനേശ് ആര്യ എതില്ലാതെ രാജ്യസഭയിലേക്കു തെരഞ്ഞെടുക്കപ്പെട്ടു.
ബംഗാളിൽനിന്നു ബിജെപി അംഗം കോയൽ മല്ലിക്ക് (രുക്മിണി മല്ലിക്ക്) എതിരില്ലാതെ തെരഞ്ഞെടുക്കപ്പെട്ടു.
National
മഥുര: വൃന്ദാവനിലെ ഒരു റെസിഡൻഷ്യൽ സ്കൂളിൽ ജലസംഭരണി വൃത്തിയാക്കുന്നതിനായി ഉള്ളിൽ കടന്ന നാലു വിദ്യാർഥികൾ ശ്വാസംമുട്ടി മരിച്ചു. ഒരു കുട്ടി അബോധാവസ്ഥയിലായി. ചൊവ്വാഴ്ച രാവിലെ വൃന്ദാവൻ ഗുരുകുലത്തിലാണു സംഭവം.
ജലസംഭരണിയിൽനിന്ന് ദുർഗന്ധം വമിച്ചതോടെ അത് വൃത്തിയാക്കാനാണുകുട്ടികൾ ഉള്ളിലിറങ്ങിയത്. ഒരു വിദ്യാർഥിയാണ് ആദ്യം ഇറങ്ങിയത്. കൂട്ടുകാരനെ കാണാത്തതിനാൽ മറ്റുള്ളവർ പിന്നാലെ ഇറങ്ങുകയായിരുന്നു.
നാലു പേരെയും കാണാതായതോടെ നാട്ടുകാർ ടാങ്കിലിറങ്ങി കുട്ടികളെ പുറത്തെടുത്ത് ആശുപത്രിയിലെത്തിക്കുകയായിരുന്നു. മധ്യപ്രദേശിലെ ജബൽപുർ സ്വദേശി മനു കതാര (24), മീററ്റ് സ്വദേശി ഋഷഭ് ശർമ (18), കൗശാംബി സ്വദേശി ആര്യൻ ശർമ (18), മധ്യപ്രദേശിലെ വിദിഷ സ്വദേശി ദേവാൻഷ് (17) എന്നിവരാണു മരിച്ചത്.
അബോധാവസ്ഥയിലായ വിദ്യാർഥി രുദ്ര വിദേഷ് (18) അപകടനില തരണം ചെയ്തതായി ആശുപത്രി സൂപ്രണ്ട് ഡോ. വിനീത് യാദവ് അറിയിച്ചു. ഇയാൾ ചികിത്സയിൽ തുടരുകയാണ്. സംഭവത്തിൽ ജില്ലാ മജിസ്ട്രേറ്റിന്റെ നേതൃത്വത്തിലുള്ള അന്വേഷണത്തിന് ജില്ലാ മജിസ്ട്രേറ്റ് ചന്ദ്ര പ്രകാശ് സിംഗ് ഉത്തരവിട്ടു.
National
കാൺപുർ: ഫത്തേപുർ മൽവയിലെ ഇരുനിലക്കെട്ടിടത്തിൽ എൽപിജി സിലിണ്ടറുകൾ പൊട്ടിത്തെറിച്ചുണ്ടായ അപകടത്തിൽ ഒരാൾകൂടി മരിച്ചതോടെ മരണസംഖ്യ അഞ്ചായി ഉയർന്നു. സിലിണ്ടറിലുണ്ടായ വാതകചോർച്ചയാണ് അപകടകാരണമായത്.
വീടിനുള്ളിലുണ്ടായിരുന്ന സോളാർ പവർ ബാറ്ററികൾകൂടി പൊട്ടിത്തെറിച്ചതോടെ സമീപത്തെ വീടുകൾക്കും കേടുപാടുകളുണ്ടായിട്ടുണ്ട്.
National
ലക്നോ: ഉത്തർപ്രദേശിൽ കഴിഞ്ഞ രണ്ടു ദിവസമായി പെയ്യുന്ന കനത്ത മഴയിൽ മരിച്ചവരുടെ എണ്ണം 56 ആയി. 46 പേർക്ക് പരിക്കേറ്റിട്ടുണ്ട്. സംസ്ഥാനത്തിന്റെ വിവിധ ഭാഗങ്ങളിലായി ആയിരത്തിലധികം വീടുകൾ തകരുകയും വലിയ തോതിൽ കൃഷിനാശം സംഭവിക്കുകയും ചെയ്തു.
വെള്ളിയാഴ്ചയും ശനിയാഴ്ചയുമായി പെയ്ത കനത്ത മഴയിൽ സംസ്ഥാനത്തെ പല നഗരങ്ങളിലും രൂക്ഷമായ വെള്ളക്കെട്ടാണുണ്ടായത്. ഗംഗാ എക്സ്പ്രസ് വേ ഉൾപ്പെടെയുള്ള പ്രധാന പാതകളിൽ വെള്ളം കയറിയതിനെത്തുടർന്ന് ഗതാഗതം തടസപ്പെട്ടു.
കഴിഞ്ഞ 48 മണിക്കൂറിനിടെ സാധാരണ ലഭിക്കേണ്ടതിനേക്കാൾ 775 ശതമാനം അധികം മഴയാണ് ഉത്തർപ്രദേശിൽ രേഖപ്പെടുത്തിയത്. സാധാരണ നിലയിൽ 7.6 മില്ലിമീറ്റർ മഴ ലഭിക്കേണ്ട സ്ഥാനത്ത് ശരാശരി 66.5 മില്ലിമീറ്റർ മഴ ലഭിച്ചതായി കണക്കുകൾ വ്യക്തമാക്കുന്നു.
Viral
ഭർത്താവിന്റെ വേർപാടിനു പിന്നാലെ മരുമകളുടെ ജീവിതം നാലു ചുവരുകൾക്കുള്ളിൽ ഒതുങ്ങിപ്പോകരുതെന്ന് ആഗ്രഹിച്ച ഒരു കുടുംബം ഉത്തർപ്രദേശിൽ നിന്നുള്ള വേറിട്ടൊരു കാഴ്ചയാവുകയാണ്.
ദുരന്തത്തിന്റെ നിഴൽ വീണ ജീവിതത്തിൽ തളർന്നുപോകാതെ, മുപ്പത്തൊന്നുകാരിയായ മീനാക്ഷി എന്ന മരുമകൾക്ക് പുനർവിവാഹത്തിലൂടെ പുതിയൊരു ജീവിതം സമ്മാനിക്കുകയായിരുന്നു ഈ കുടുംബം.
ഹരിദ്വാർ സ്വദേശിയായ മീനാക്ഷി 2017-ലാണ് ഖതൗലിയിലെ രോഹിതിനെ വിവാഹം കഴിക്കുന്നത്. ഇവർക്ക് രണ്ട് പെൺമക്കളുമുണ്ട്. എന്നാൽ കഴിഞ്ഞ ഓഗസ്റ്റിൽ ഈ കുടുംബത്തെ തേടിയെത്തിയത് വലിയൊരു ആഘാതമായിരുന്നു.
രോഗബാധിതനായിരുന്ന രോഹിതിന്റെ പിതാവ് ഓം പാൽ മരണപ്പെട്ട് തൊട്ടടുത്ത ദിവസം തന്നെ മകൻ രോഹിതും ലോകത്തോട് വിടപറഞ്ഞു. പെട്ടെന്നുണ്ടായ ഈ ദുരന്തത്തിൽ രണ്ടു കുഞ്ഞുങ്ങളുമായി ഒറ്റപ്പെട്ടുപോയ മീനാക്ഷിയുടെ ഭാവി ഓർത്താണ് അമ്മായിയമ്മ സുനിത ദേവി ആശങ്കപ്പെട്ടത്.
മരുമകളെ വീട്ടിൽ നിർത്തി അവരുടെ ജീവിതം പാഴാക്കരുതെന്ന് തീരുമാനിച്ച്, അവരുടെ ഭാവിസുരക്ഷ മുൻനിർത്തി മറ്റൊരു വിവാഹം കഴിപ്പിച്ചു നൽകാൻ അമ്മായിയമ്മ മുൻകൈ എടുക്കുകയായിരുന്നു.
തുടർന്ന് രാജസ്ഥാനിൽ സ്വന്തമായി ബിസിനസ് നടത്തുന്ന യോഗേഷുമായി മീനാക്ഷിയുടെ വിവാഹം ആര്യസമാജം ക്ഷേത്രത്തിൽ വെച്ച് പ്രൗഢമായി നടത്തി. ചടങ്ങുകളിൽ രോഹിതിന്റെ സഹോദരൻ മോഹിത് സ്വന്തം സഹോദരന്റെ സ്ഥാനം ഏറ്റെടുത്താണ് കന്യാദാനം നിർവഹിച്ചത്.
ആരുടെയും സമ്മർദ്ദമില്ലാതെ, പൂർണ സമ്മതത്തോടെയാണ് പുതിയൊരു ജീവിതത്തിലേക്ക് കാൽവെച്ചതെന്ന് മീനാക്ഷി വ്യക്തമാക്കി. തനിക്കൊപ്പം ഉറച്ചുനിന്ന കുടുംബത്തിന് നന്ദി പറയുന്ന മീനാക്ഷിക്കും മക്കൾക്കും ഇനിയും തങ്ങളുടെ തണലുണ്ടാകുമെന്ന് അമ്മായിയമ്മ സുനിതയും ഉറപ്പുനൽകുന്നു.
വിദ്യാഭ്യാസമോ പദവിയോ അല്ല, മാനുഷിക മൂല്യങ്ങളാണ് മനുഷ്യരെ വേറിട്ടുനിർത്തുന്നത് എന്ന് തെളിയിച്ച ഈ കുടുംബത്തിന്റെ മനസിന് സോഷ്യൽ മീഡിയയിലുടനീളം വൻ പ്രശംസയാണ് ലഭിക്കുന്നത്.
Viral
ഉത്തർപ്രദേശിലെ മൊറാദാബാദിൽ ചരക്കുലോറി മറിഞ്ഞുണ്ടായ അപകടത്തിന് പിന്നാലെ വേറിട്ടൊരു കാഴ്ചയ്ക്കാണ് വഴിയോരം സാക്ഷ്യം വഹിച്ചത്. ഹരിയാനയിൽ നിന്ന് രുദ്രപൂരിലെ പ്രൊഡക്ഷൻ യൂണിറ്റിലേക്ക് വൻതോതിൽ നെയ്യുമായി പോവുകയായിരുന്ന ലോറിയുടെ നിയന്ത്രണം നഷ്ടപ്പെട്ട് റോഡിലേക്ക് മറിയുകയായിരുന്നു.
വാഹനം തലകീഴായി മറിഞ്ഞതോടെ അതിലുണ്ടായിരുന്ന ലിറ്റർ കണക്കിന് നെയ്യ് പാതയോരത്തേക്ക് ഒഴുകിപ്പരന്നു. അപകടത്തിൽ ആർക്കും ജീവഹാനിയോ പരിക്കോ സംഭവിച്ചില്ല എന്നത് വലിയ ആശ്വാസമായി.
എന്നാൽ അപകടവിവരമറിഞ്ഞ് സ്ഥലത്തെത്തിയ നാട്ടുകാർ ഡ്രൈവറെ സഹായിക്കുന്നതിന് പകരം കവറുകളും പാത്രങ്ങളുമായെത്തി റോഡിലെ അഴുക്കിൽ കലർന്ന നെയ്യ് കോരിയെടുക്കാൻ മത്സരബുദ്ധിയോടെ തിരക്കു കൂട്ടുകയായിരുന്നു.
ജനങ്ങൾ കൂട്ടത്തോടെ തടിച്ചുകൂടിയതോടെ പ്രദേശത്ത് മണിക്കൂറുകളോളം കനത്ത ഗതാഗതക്കുരുക്ക് അനുഭവപ്പെട്ടു. വിവരം അറിഞ്ഞെത്തിയ പൊലിസ് സംഘമാണ് ആളുകളെ സ്ഥലത്തുനിന്ന് മാറ്റുകയും റോഡിൽ കിടന്ന വാഹനം നീക്കം ചെയ്ത് ഗതാഗതം പൂർവസ്ഥിതിയിലാക്കുകയും ചെയ്തത്.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ വലിയ രീതിയിലുള്ള വിമർശനങ്ങളാണ് ഉയർന്നുവരുന്നത്. അപകടത്തിൽപ്പെട്ടവരെ തിരിഞ്ഞുനോക്കാതെ റോഡിലെ വൃത്തിഹീനമായ സാഹചര്യം പോലും വകവെക്കാതെ സാധനങ്ങൾ കടത്തിക്കൊണ്ടുപോകുന്നതിലെ യുക്തിയില്ലായ്മയെ പലരും രൂക്ഷമായി ചോദ്യം ചെയ്തു.
ഇത്തരം നെയ്യ് ഭക്ഷണത്തിൽ ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങൾക്കിടയാക്കുമെന്നും അല്ലെങ്കിൽ ഇത് കുറഞ്ഞ വിലയ്ക്ക് വിപണിയിൽ വിൽക്കാനാണ് സാധ്യതയെന്നും ആളുകൾ അഭിപ്രായപ്പെടുന്നു.
ഏതാനും ദിവസങ്ങൾക്ക് മുൻപ് മഹാരാഷ്ട്രയിലെ പാൽഗറിൽ പാൽ ടാങ്കർ മറിഞ്ഞപ്പോഴും സമാനമായ രീതിയിൽ ജനങ്ങൾ പാൽ ശേഖരിക്കാൻ തടിച്ചുകൂടിയത് വാർത്തയായിരുന്നു.
National
ഷാജഹാൻപുർ: ഉത്തർപ്രദേശിൽ ശ്മശാനത്തിൽ എരിയുന്ന ചിതയിൽ വച്ച് ഇറച്ചി പാചകം ചെയ്ത സംഭവത്തിൽ ഒരാൾ പിടിയിൽ. യുപി ഷാജഹാൻപുർ ജില്ലയിലെ നത്താപുർ ഗ്രാമത്തിലാണ് സംഭവം. ഞായറാഴ്ച ആയിരുന്നു സംഭവം നടന്നത്.
ഗ്രാമവാസിയായ വീർപാലിന്റെ പിതാവ് മരിച്ചതിനെ തുടർന്ന് ശ്മശാനത്തിലാണ് സംസ്കാരച്ചടങ്ങുകൾ നടത്തിയത്. വൈകിട്ട് വീർപാൽ ശ്മശാനത്തിലെത്തിയപ്പോഴാണ് മൂന്നുപേർ ചിതയിലെ തീയിൽ പാത്രംവെച്ച് ഇറച്ചി പാചകം ചെയ്യുന്നത് ശ്രദ്ധയിൽപ്പെട്ടത്.
വിവരം അറിയിച്ചതിനെ തുടർന്ന് പൊലിസ് സ്ഥലത്തെത്തി പ്രതികളിലൊരാളായ സുരേന്ദ്രനെ പിടികൂടി. ഇയാൾക്കൊപ്പമുണ്ടായിരുന്ന മറ്റ് രണ്ടുപേർ ഓടിരക്ഷപ്പെട്ടു.
National
ലഖ്നൗ: മൊബൈൽ നെറ്റ്വർക്ക് കൃത്യമായി ലഭിക്കാത്തതിൽ രോഷാകുലരായ നാട്ടുകാർ ടെലികോം കമ്പനി ജീവനക്കാരനെ ടവറിൽ കെട്ടിയിട്ടു. ഉത്തർപ്രദേശിലെ ഫത്തേപ്പൂരിലെ ഹർദൗലി ഗ്രാമത്തിലാണ് സംഭവം. രണ്ട് വർഷമായി ഗ്രാമത്തിൽ റേഞ്ച് ലഭിക്കുന്നില്ലെന്നും തുടർച്ചയായി പരാതി നൽകിയിട്ടും കമ്പനി നടപടിയെടുത്തില്ലെന്നും ആരോപിച്ചായിരുന്നു പ്രതിഷേധം.
വീഡിയോ സോഷ്യൽ മീഡിയയിൽ പ്രചരിച്ചതോടെ വൻ വാർത്താശ്രദ്ധ നേടി. 5ജി റീചാർജ് ചെയ്തിട്ടും ഇന്റർനെറ്റോ കോൾ സൗകര്യമോ ലഭിക്കുന്നില്ലെന്നാണ് ഗ്രാമവാസികളുടെ പ്രധാന പരാതി. അറ്റകുറ്റപ്പണിക്കായി ഗ്രാമത്തിലെത്തിയ ടെക്നീഷ്യനെയാണ് ഗ്രാമവാസികൾ തടഞ്ഞുവച്ച് ടവറിൽ കെട്ടിയിട്ടത്. കമ്പനി ഉദ്യോഗസ്ഥർ സ്ഥലത്തെത്തി പ്രശ്നം പരിഹരിക്കാതെ ഇയാളെ വിട്ടയക്കില്ലെന്ന് ഗ്രാമവാസികൾ വാശിപിടിച്ചു.
വിവരമറിഞ്ഞ് ബിന്ദ്കി പൊലിസ് സ്ഥലത്തെത്തിയാണ് സാങ്കേതിക വിദഗ്ധനെ മോചിപ്പിച്ചത്. സംഭവത്തിൽ സാങ്കേതിക വിദഗ്ധന്റെ പരാതിയിൽ പൊലിസ് കേസ് രജിസ്റ്റർ ചെയ്തു. വീഡിയോ ദൃശ്യങ്ങൾ പരിശോധിച്ച് കുറ്റക്കാർക്കെതിരെ നടപടിയെടുക്കുമെന്ന് പൊലിസ് അറിയിച്ചു.
National
ബറേലി(യുപി): ഉത്തർപ്രദേശിലെ ബറേലി ജില്ലയിൽ രാംഗംഗാ നദിയിലുണ്ടായ ശക്തമായ തീരശോഷണത്തെത്തുടർന്ന് നൂറ്റാണ്ടുകൾ പഴക്കമുള്ള ക്ഷേത്രം ഒഴുകിപ്പോയി.
ഇതിനിടെ, കിച്ചാ നദിക്കരയിൽ നിർമാണത്തിലിരുന്ന ജലസംഭരണി നദിയിലേക്ക് തകർന്നുവീണു. ഇരുസംഭവങ്ങളിലും ആളപായമില്ലെന്ന് ജില്ലാ അധികാരികൾ അറിയിച്ചു. കപുർപുർ ഗ്രാമത്തിലാണ് നൂറ്റാണ്ടുകൾ പഴക്കമുള്ളതെന്നു വിശ്വസിക്കുന്ന ഈ ക്ഷേത്രം സ്ഥിതി ചെയ്തിരുന്നത്.
ദിവസങ്ങളായി തുടരുന്ന തീരശോഷണത്തെത്തുടർന്ന് ക്ഷേത്രം പൂർണമായും രാംഗംഗയുടെ ഒഴുക്കിൽ അകപ്പെടുകയായിരുന്നു. ബുധനാഴ്ച രാവിലെയാണ് ക്ഷേത്രം നദിയിൽ ഒഴുകിപ്പോകുന്നതായി ഗ്രാമവാസികളുടെ ശ്രദ്ധയിൽപ്പെട്ടത്.
ജൽ ജീവൻ മിഷന്റെ ഭാഗമായി നാല് കോടി രൂപ ചെലവിൽ നിർമിച്ചുവരികയായിരുന്ന ഓവർഹെഡ് ജലസംഭരണിയാണ് നാലു സെക്കൻഡിനുള്ളിൽ നദിയിലേക്ക് പതിച്ചതെന്ന് അധികൃതർ പറഞ്ഞു.
ടാങ്കിന്റെ ചുറ്റുമതിൽ നാലു ദിവസം മുമ്പ് തകർന്നുപോയിരുന്നു. നദിയിൽ നിന്ന് എട്ട് മുതൽ പത്ത് മീറ്റർ വരെ മാത്രം അകലെയുള്ള മറ്റൊരു ഓവർഹെഡ് ടാങ്കും തകർന്നുവീഴാനുള്ള സാധ്യതയുണ്ടെന്ന് അധികൃതർ പറഞ്ഞു.
Kerala
ലക്നോ: ഉത്തർപ്രദേശിൽ സ്വന്തം തോക്കിൽ നിന്ന് വെടിയേറ്റ് വനിത പൊലിസ് ഉദ്യോഗസ്ഥയ്ക്ക് ദാരുണാന്ത്യം. കൗശാംബി ജില്ലയിലെ മാൻജാൻപുരിലെ വനിത പൊലിസ് ഉദ്യോഗസ്ഥ പ്രിയങ്ക യാദവ് (25) ആണ് മരിച്ചത്.
ചൊവ്വാഴ്ചയായിരുന്നു സംഭവം. സർക്കാർ അനുവദിച്ച ഇൻസാസ് റൈഫിളായിരുന്നു സംഭവ സമയത്ത് പ്രിയങ്കയുടെ പക്കലുണ്ടായിരുന്നത്. സംഭവത്തെ തുടർന്ന് ഡ്യൂട്ടിയിലുണ്ടായിരുന്നവർ പ്രിയങ്കയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
National
ന്യൂഡൽഹി: വരുന്ന നിയമസഭാ തെരഞ്ഞെടുപ്പിൽ ഉത്തർപ്രദേശിൽ ബിജെപിയെ കാത്തിരിക്കുന്നത് കടുത്ത വെല്ലുവിളിയാണെന്ന് ഇന്ത്യ ടുഡേ-സി വോട്ടർ മൂഡ് ഓഫ് ദി നേഷൻ സർവേ. ജനറേഷൻ സിനെക്കാൾ (ജെൻ സി) ഉപരിയായി അവരെ വളർത്തിയെടുത്ത തലമുറയാണ് (ജെൻ എക്സ്) നിലവിൽ ബിജെപിയെ ആശങ്കപ്പെടുത്തുന്നതെന്നാണ് വിദഗ്ധരുടെ വിലയിരുത്തൽ.
ആറുമാസത്തിനകം തെരഞ്ഞെടുപ്പിനെ നേരിടാനൊരുങ്ങുന്ന യുപിയിൽ ഭരണകക്ഷിക്ക് കാര്യങ്ങൾ കടുപ്പമാകും എന്നാണ് സർവേ സൂചിപ്പിക്കുന്നത്. ഇന്നുതന്നെ തെരഞ്ഞെടുപ്പ് നടക്കുകയാണെങ്കിൽ സംസ്ഥാനത്തെ 80 ലോക്സഭാ സീറ്റുകളിൽ 41 എണ്ണവും 'ഇന്ത്യാ' മുന്നണി നേടുമെന്നാണ് പുതിയ സർവേ പ്രവചിക്കുന്നത്. എന്നാൽ ബിജെപി നേതൃത്വം നൽകുന്ന എൻഡിഎ സഖ്യത്തിന് 38 സീറ്റുകൾ മാത്രമേ ലഭിക്കൂ.
കഴിഞ്ഞ ജനുവരിയിൽ നടത്തിയ എംഒടിഎൻ സർവേയിൽ എൻഡിഎയ്ക്ക് 48 സീറ്റുകളും 'ഇന്ത്യാ' മുന്നണിക്ക് 31 സീറ്റുകളുമാണ് പ്രവചിച്ചിരുന്നത്. ഇതിൽനിന്നും വലിയൊരു രാഷ്ട്രീയ മാറ്റമാണ് നിലവിലെ കണക്കുകൾ കാണിക്കുന്നത്.
ലോക്സഭാ തെരഞ്ഞെടുപ്പിനെ അടിസ്ഥാനമാക്കിയുള്ളതാണ് ഈ സർവേ ഫലങ്ങളെങ്കിലും, 2027 ലെ ഉത്തർപ്രദേശ് നിയമസഭാ തെരഞ്ഞെടുപ്പിന്റെ കൃത്യമായ പ്രവചനമായി ഇതിനെ കാണാനാകില്ല എന്നൊരു മുൻകരുതലും സർവേ മുന്നോട്ടുവയ്ക്കുന്നുണ്ട്.
എങ്കിലും കഴിഞ്ഞ ഒരു ദശാപ്തക്കാലമായി ബിജെപിയുടെ രാഷ്ട്രീയ ആധിപത്യത്തിന്റെ കേന്ദ്രമായ ഉത്തർപ്രദേശിൽ പാർട്ടിക്ക് വലിയൊരു രാഷ്ട്രീയ പ്രതിസന്ധിയാണ് പുതിയ കണക്കുകൾ ചുണ്ടിക്കാണിക്കുന്നത്.
Viral
പ്രകൃതിയുടെ കോപത്തിന് മുന്നിൽ മനുഷ്യരും മൃഗങ്ങളും ഒരുപോലെ വിറച്ച നാളുകൾക്കാണ് ഉത്തർപ്രദേശിലെ ബഹ്റൈച്ച് സാക്ഷ്യം വഹിച്ചത്.
നേപ്പാളിലുണ്ടായ പ്രകൃതിദുരന്തത്തിന്റെ പ്രതിഫലനമെന്നോണം അതിർത്തി നദികൾ കരകവിഞ്ഞൊഴുകിയപ്പോൾ, ഗിരിജാപൂരി ബാരേജിന് സമീപത്തെ കുത്തിയൊലിക്കുന്ന വെള്ളത്തിലേക്ക് അഞ്ച് കാട്ടാനകൾ അപ്രതീക്ഷിതമായി അകപ്പെടുകയായിരുന്നു.
കൂട്ടത്തിൽ നീന്തി രക്ഷപ്പെടാൻ ശേഷിയില്ലാത്ത രണ്ട് കുഞ്ഞുങ്ങളും ഉണ്ടായിരുന്നു. സാധാരണഗതിയിൽ വലിയ പ്രളയമുണ്ടാകുമ്പോൾ സ്വന്തം ജീവൻ രക്ഷിക്കാൻ ഏതു ജീവിയും നെട്ടോട്ടമോടാറുണ്ട്. എന്നാൽ ഇവിടെ കണ്ടത് അത്യപൂർവ്വമായ ഒരു സ്നേഹക്കാഴ്ചയായിരുന്നു.
സ്വന്തം സുരക്ഷിതത്വം നോക്കാതെ, പ്രക്ഷുബ്ധമായ ജലപ്രവാഹത്തിൽ മുങ്ങിത്താഴാൻ തുടങ്ങിയ കുഞ്ഞുങ്ങളെ ആ മൂന്ന് മുതിർന്ന ആനകൾ ശരീരത്തോട് ചേർത്തുപിടിച്ചു. വെള്ളത്തിന്റെ ശക്തിയിൽ ഒഴുകിപ്പോകുമ്പോഴും അവർ ആ കുഞ്ഞുങ്ങളെ തനിച്ചാക്കിയില്ല.
ഉദ്യോഗസ്ഥയായ സുപ്രിയ സാഹു സമൂഹമാധ്യമങ്ങളിൽ പങ്കുവെച്ച ദൃശ്യങ്ങളിലൂടെയാണ് ഈ ദാരുണവും അതേസമയം വികാരനിർഭരവുമായ സംഭവം ലോകമറിഞ്ഞത്. കലിയടങ്ങാത്ത ഒഴുക്കിനെതിരെയുളള ആ മൃഗങ്ങളുടെ പോരാട്ടം വന്യജീവി സ്നേഹികളുടെ മനസിനെ ഒന്നാകെ ഉലച്ചു.
ബാരേജിന്റെ അപകടകരമായ വാതിലുകളിലേക്ക് സംഘം അടുക്കുന്നതുകണ്ട വനംവകുപ്പും ജലസേചന വിഭാഗവും ഒട്ടും സമയം കളയാതെ രംഗത്തിറങ്ങി. ബാരേജിലൂടെയുള്ള ജലമൊഴുക്കിന്റെ ശക്തി അടിയന്തരമായി കുറച്ചതാണ് ഈ ദൗത്യത്തിൽ വഴിത്തിരിവായത്.
വെള്ളത്തിന്റെ ശക്തി മാറി ഒഴുക്കിന് അല്പം ശാന്തത വന്നതോടെ, ഉദ്യോഗസ്ഥർ ആനകളെ സമയോചിതമായി കരയിലേക്ക് വഴിതിരിച്ചുവിട്ടു. മണിക്കൂറുകൾ നീണ്ട പരിശ്രമങ്ങൾക്കൊടുവിൽ അഞ്ച് ആനകളും സുരക്ഷിതമായി അടുത്തുള്ള വനമേഖലയിലേക്ക് കയറിപ്പോയി.
മനുഷ്യർക്ക് മാത്രം അവകാശപ്പെട്ട ഒന്നല്ല കൂട്ടായ്മയും കരുതലുമെന്ന് തെളിയിച്ച ഈ ആനക്കൂട്ടം, പ്രകൃതിദുരന്തങ്ങളിൽപ്പെടുന്നത് മനുഷ്യ ജീവനുകൾ മാത്രമല്ലെന്ന വലിയൊരു ഓർമ്മപ്പെടുത്തൽ കൂടിയാണ് ബാക്കിവെക്കുന്നത്.
National
ലക്നോ: ഉത്തർപ്രദേശ് സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ (യുപിഎസ്ആർടിസി) ബസുകളിൽ സ്ത്രീകൾക്കു സൗജന്യയാത്ര പ്രഖ്യാപിച്ച് യോഗി ആദിത്യനാഥ് സർക്കാർ.
അറുപതു വയസുകഴിഞ്ഞ സ്ത്രീകൾക്കുമാത്രമായി പരിമിതപ്പെടുത്തിയാണ് ലോക്മാത അഹല്യബായി മാതൃശക്തി യോജന എന്ന പേരിലുള്ള പദ്ധതിക്കു സംസ്ഥാന സർക്കാർ അംഗീകാരം നൽകി.
ഏകദേശം ഒരു കോടിയിലധികം സ്ത്രീകൾക്കു പദ്ധതിയിലൂടെ പ്രയോജനം ലഭിക്കുമെന്നാണു പ്രതീക്ഷിക്കുന്നതെന്ന് യുപി ഗതാഗതമന്ത്രി ദയാശങ്കർ സിംഗ് പറഞ്ഞു.
National
ന്യൂഡൽഹി: പുറത്തുനിന്നുള്ളവരും യുട്യൂബർമാരും സർക്കാർ സ്കൂളുകളിലേക്കു പ്രവേശിക്കുന്നതു നിരോധിച്ച് ഉത്തർപ്രദേശ്. രാജ്യത്തുടനീളമുള്ള സർക്കാർ സ്കൂളുകളുടെ ശോചനീയാവസ്ഥ സമൂഹമാധ്യമങ്ങളിൽ കോക്രോച്ച് ജനതാ പാർട്ടിയുടെ (സിജെപി) നേതൃത്വത്തിൽ തുറന്നുകാട്ടുന്നതിനിടയിലാണ് യുട്യൂബർമാർ സംസ്ഥാനത്തെ സ്കൂളുകളിൽ പ്രവേശിക്കുന്നത് നിരോധിച്ചുകൊണ്ട് യുപിയിലെ വിവിധ ജില്ലാ വിദ്യാഭ്യാസ ഓഫീസർമാർ ഉത്തരവുകൾ പുറപ്പെടുവിച്ചിരിക്കുന്നത്.
സ്കൂളുകളിലെത്തി വീഡിയോകൾ റിപ്പോർട്ട് ചെയ്യുന്നത് പഠനത്തെ തടസപ്പെടുത്തുവെന്നും അധ്യാപന തൊഴിലിന്റെ അന്തസിനെ ബാധിക്കുകയും ചെയ്യുന്നുവെന്നാണ് അയോധ്യയിലെ സർക്കാർ സ്കൂളുകളിൽ പുറത്തുനിന്നുള്ളവരുടെ പ്രവേശനം നിരോധിച്ചുകൊണ്ടുള്ള അയോധ്യ ബേസിക് എഡ്യുക്കേഷൻ ഓഫീസറുടെ ഉത്തരവിൽ പറയുന്നത്. യുപിയിലെ അസംഗഡ്, ബല്ലിയ, ബസ്തി, ബൽറാംപുർ, ഷംലി, ആഗ്ര തുടങ്ങിയ സ്കൂളിലേക്കും പുറത്തുനിന്നുള്ളവരുടെ പ്രവേശനം നിരോധിച്ചുകൊണ്ടുള്ള ഉത്തരവുകൾ ഇതിനോടകമുണ്ട്.
പുറത്തുനിന്നുള്ളവർ സർക്കാർ സ്കൂളുകളിൽ പ്രവേശിക്കരുതെന്ന് കഴിഞ്ഞദിവസം രാജസ്ഥാൻ സർക്കാരും ഉത്തരവ് പുറപ്പെടുവിച്ചിരുന്നു. രാജ്യത്തുടനീളമുള്ള സർക്കാർ സ്കൂളുകളുടെ മോശം അവസ്ഥകൾക്കു പരിഹാരം കണ്ടെത്താനായി സ്വാതന്ത്ര്യദിനത്തിൽ സിജെപി ആരംഭിച്ച സ്കൂൾ ഠീക് കരോ കാമ്പയിൻ മഹാരാഷ്ട്രയിലെയും രാജസ്ഥാനിലെയും നിരവധി സർക്കാർ സ്കൂളുകളിൽ മതിയായ ടോയ്ലറ്റ് സൗകര്യങ്ങൾപ്പോലും നിലവിലില്ലാത്തത് സമൂഹമാധ്യമങ്ങളിലൂടെ ചൂണ്ടിക്കാട്ടിയിരുന്നു.
യുപിയിലെ നിരവധി സർക്കാർ സ്കൂളുകളിലെ വിദ്യാർഥികളാകട്ടെ സ്കൂളുകളിലെ മോശം ഭക്ഷണനിലവാരത്തിനെതിരേയും കുടിവെള്ള പ്രശ്നങ്ങൾക്കെതിരേയും തെരുവുകളിൽ സമരത്തിനിറങ്ങുകയുമാണ്. യുപിയിലെ ലക്നോയിലും ഹസൻഗഞ്ജിലും കന്നൗജിലും ഹാമിർപുരിലുമെല്ലാം നൂറുകണക്കിനു വിദ്യാർഥികളാണ് സ്കൂളുകളിലെ മോശം അവസ്ഥകൾക്കെതിരേ പ്രതിഷേധിക്കാൻ ക്ലാസ്റൂമുകൾ ബഹിഷ്കരിച്ചത്.
Viral
വെറും 16 രൂപയ്ക്ക് ഇഷ്ടമുള്ള വസ്ത്രങ്ങൾ സ്വന്തമാക്കാം, അതും 16 മിനിറ്റ് നേരത്തേക്ക് മാത്രം. കാൺപൂരിലെ ആലം മാർക്കറ്റിലെ വസ്ത്രശാല ഉടമ റെയിസ് ആലമിന്റെ ജന്മദിനാഘോഷത്തോട് അനുബന്ധിച്ച് പ്രഖ്യാപിച്ച ഈ ഓഫറാണ് ശനിയാഴ്ച രാത്രി നഗരത്തെ ഭീതിയുടെ മുൾമുനയിലാക്കിയത്.
സോഷ്യൽ മീഡിയ റീലുകളിലൂടെയും വീഡിയോകളിലൂടെയും വിവരമറിഞ്ഞ് ആയിരക്കണക്കിന് ആളുകൾ ഒരേ സമയം വിപണിയിലേക്ക് ഇരച്ചെത്തിയതോടെ പ്രദേശം തികച്ചും അനിയന്ത്രിതമായ തിരക്കിലേക്ക് നീങ്ങി.
ജീൻസ്, ഷർട്ടുകൾ, ടി-ഷർട്ടുകൾ, തുടങ്ങിയ അത്യാകർഷകമായ മോഡലുകൾ തുച്ഛമായ വിലയ്ക്ക് ലഭിക്കുമെന്നറിഞ്ഞ് സ്ത്രീകളും യുവാക്കളുമടക്കം വലിയൊരു ജനസഞ്ചയമാണ് അല്പസമയത്തിനുള്ളിൽ കടയ്ക്ക് മുന്നിൽ തടിച്ചുകൂടിയത്.
സമയം അവസാനിക്കുന്നതിന് മുൻപ് വസ്ത്രങ്ങൾ സ്വന്തമാക്കാൻ ആളുകൾ പരസ്പരം തള്ളിക്കയറിയത് പ്രദേശത്ത് തിക്കും തിരക്കിനും കാരണമായി. ഇതോടെ മാർക്കറ്റിലെ ഗതാഗതം പൂർണമായും സ്തംഭിക്കുകയും കാൽനടയാത്ര പോലും സാധ്യമല്ലാത്ത അവസ്ഥയാവുകയും ചെയ്തു.
സ്ഥിതിഗതികൾ ഗുരുതരമായതോടെ വിവിധ പൊലീസ് സ്റ്റേഷനുകളിൽ നിന്നുള്ള വൻ പൊലീസ് സംഘം സംഭവസ്ഥലത്തെത്തി. മൈക്ക് വഴി മുന്നറിയിപ്പ് നൽകിയും ആളുകളെ നിർബന്ധപൂർവ്വം തിരിച്ചയച്ചുമാണ് പൊലീസ് ജനക്കൂട്ടത്തെ പിരിച്ചുവിട്ടത്.
തുടർന്ന് ക്രമസമാധാനം പുനഃസ്ഥാപിക്കാൻ പ്രദേശത്ത് കൂടുതൽ സുരക്ഷാ ഉദ്യോഗസ്ഥരെ വിന്യസിച്ചു. നിയമനടപടികൾക്കായി പ്രദേശത്തെ ദൃശ്യങ്ങൾ പൊലീസ് ക്യാമറയിൽ പകർത്തിയിട്ടുണ്ട്.
മുൻകൂട്ടി സുരക്ഷാ മുൻകരുതലുകൾ എടുക്കാതെ പൊതുജനങ്ങൾക്ക് ബുദ്ധിമുട്ടുണ്ടാക്കുന്ന രീതിയിലും ജീവന് ഭീഷണിയാകുന്ന വിധത്തിലും ആളുകളെ തടിച്ചുകൂടാൻ വഴിയൊരുക്കിയതിന് കടയുടമകൾക്കെതിരെ പൊലീസ് കേസെടുത്തു.
മുഹമ്മദ് ആലം, റെയിസ് ആലം, സൽമാൻ ആലം എന്നിവർക്കും കണ്ടാലറിയാവുന്ന മറ്റുള്ളവർക്കുമെതിരെയാണ് എഫ്ഐആർ രജിസ്റ്റർ ചെയ്തിരിക്കുന്നത്. കേസിന്റെ അന്വേഷണ ഭാഗമായി കടയുടമയുടെ സഹോദരനെ പൊലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്.
National
ലക്നോ: മന്ത്രവാദിയെ കൊലപ്പെടുത്തി മൃതദേഹം കാട്ടിൽ ഒളിപ്പിച്ച കേസിൽ ആറുപേരെ പോലീസ് അറസ്റ്റ് ചെയ്തു. ഉത്തർപ്രദേശിലെ വാരണാസിയിൽ മന്ത്രവാദി അനിഷ് ഉപാധ്യായ കൊല്ലപ്പെട്ട കേസിൽ സോനു, വിശാൽ, വികാസ് കുമാർ ഗോണ്ട്, സാഹിൽ ഗോണ്ട്, രോഹിത് കശ്യപ്, മോഹിത് കശ്യപ് എന്നിവരാണ് അറസ്റ്റിലായത്.
കുടുംബത്തിലെ സാമ്പത്തിക ബുദ്ധിമുട്ടുകളും രോഗങ്ങളും മാറ്റാൻ പൂജകൾക്കായി അനിഷിനെ പ്രതികൾ വിളിച്ചു വരുത്തുകയായിരുന്നു. അഞ്ച് ദിവസത്തോളം പൂജകൾ നടത്തിയെങ്കിലും പുരോഗതി ഉണ്ടാകാത്തതിനാൽ ഇവർ തമ്മിൽ തർക്കമുണ്ടായി. തുടർന്ന് അനിഷിനെ കൊലപ്പെടുത്തുകയായിരുന്നു. അറസ്റ്റിലായവർ ബന്ധുക്കളാണെന്നും പോലീസ് പറഞ്ഞു.
ജൂലൈ ഒമ്പതിനാണ് അനിഷിനെ കാണാനില്ലെന്ന് കാണിച്ച് ഭാര്യ പോലീസിൽ പരാതി നൽകിയത്. കഴിഞ്ഞ 13ന് ഭർത്താവ് കൊല്ലപ്പെട്ടതായും മൃതദേഹം കാട്ടിൽ ഒളിപ്പിച്ചെന്നും കാണിച്ച് അവർ വീണ്ടും പരാതി നൽകി. ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതികൾ കുടുങ്ങിയത്. കൃത്യത്തിന് ഉപയോഗിച്ചതായി കരുതുന്ന ആയുധങ്ങൾ പോലീസ് കണ്ടെടുത്തു.
Viral
ഉത്തർപ്രദേശിലെ ലക്നോവിൽ അന്തരിച്ച എഴുപത്തഞ്ചുകാരന്റെ മൃതദേഹത്തിൽനിന്ന് വെള്ളക്കടലാസുകളിൽ പെരുവിരലടയാളം പതിപ്പിച്ചെടുക്കുന്ന ദൃശ്യങ്ങൾ സമൂഹമാധ്യമങ്ങളിൽ വൻ വിവാദമാകുന്നു.
റഹിമാബാദ് പോലീസ് സ്റ്റേഷൻ പരിധിയിലെ ഖദൗന ഗ്രാമത്തിൽ അടുത്തിടെ അന്തരിച്ച ഛത്രപാലിന്റെ സംസ്കാരച്ചടങ്ങുകൾക്കിടെയാണ് ഈ സംഭവം നടന്നത്. കുടുംബാംഗങ്ങൾ തമ്മിലുള്ള സ്വത്ത് തർക്കമാണ് ഇതിന് പിന്നിലെന്നാണ് സംശയിക്കുന്നത്.
മകനും മരുമകളുമായി വർഷങ്ങളായി അകൽച്ചയിലായിരുന്ന ഛത്രപാൽ, സ്വന്തം സ്വത്തുക്കളിൽനിന്ന് മകനെ ഒഴിവാക്കി മുൻപ് പത്രപ്പരസ്യം നൽകിയിരുന്നു.
ഇതിനുപിന്നാലെ പെട്ടെന്നുണ്ടായ മരണവും, വ്യാജ രേഖകൾ ഉണ്ടാക്കാനായി മൃതദേഹത്തിൽനിന്ന് വിരലടയാളം എടുത്തതും വലിയ സംശയങ്ങൾക്ക് ഇടയാക്കിയിട്ടുണ്ട്.
സംഭവത്തിൽ ഔദ്യോഗിക പരാതി ലഭിച്ചിട്ടില്ലെങ്കിലും പ്രചരിക്കുന്ന വീഡിയോയുടെ അടിസ്ഥാനത്തിൽ റഹിമാബാദ് പോലീസ് അന്വേഷണം ആരംഭിച്ചിട്ടുണ്ട്.
Viral
മോഷണം നടത്താൻ കയറിയ ഷോറൂമിൽ നാലര മണിക്കൂറോളം രാജകീയമായി സമയം ചെലവഴിച്ച്, വിലകൂടിയ ബൈക്കുമായി കടന്നുകളഞ്ഞ കള്ളന്റെ വാർത്ത കേട്ട് ഞെട്ടിയിരിക്കുകയാണ് ഉത്തർപ്രദേശിലെ വാരാണസി നിവാസികളും പോലീസും.
മണ്ഡുവാഡിഹ് പോലീസ് സ്റ്റേഷൻ പരിധിയിലെ പ്രമുഖ ബൈക്ക് ഷോറൂമിലാണ് സിനിമകളെപ്പോലും വെല്ലുന്ന തരത്തിലുള്ള ഈ വിചിത്ര സംഭവം അരങ്ങേറിയത്.
രാത്രി പൂട്ടിയിട്ട ഷോറൂമിനുള്ളിൽ കടന്ന മോഷ്ടാവ് സാധാരണ മോഷണം പോലെ ധൃതിപിടിച്ച് സാധനങ്ങൾ എടുത്ത് ഓടാനല്ല ശ്രമിച്ചത്. മറിച്ച്, അവിടെയൊരു 'റിസോർട്ട് സ്റ്റേ' മോഡലിൽ മണിക്കൂറുകളോളം തികച്ചും സ്വസ്ഥനായി സമയം ആസ്വദിക്കുകയായിരുന്നു.
അകത്തുകയറിയ അയാൾ റഫ്രിജറേറ്ററിൽ നിന്ന് വെള്ളമെടുത്ത് കുടിക്കുകയും സ്വന്തമായി ചൂടുകാപ്പി ഉണ്ടാക്കി ആസ്വദിക്കുകയും ചെയ്തു. തുടർന്ന് ഷോറൂമിലെ വാഷ്റൂമിൽ കയറി കുളിച്ച്, നനഞ്ഞ വസ്ത്രങ്ങൾ അവിടെയുണ്ടായിരുന്ന ഒരു ബൈക്കിന് മുകളിൽ ഉണക്കാനിട്ടു.
ഇതിനെല്ലാമൊടുവിൽ പുതിയൊരു ബൈക്ക് കവർ കീറിയെടുത്ത് ഉടുതുണിയാക്കി മാറ്റി, കമ്പ്യൂട്ടറിൽ ബോളിവുഡിലെ പ്രശസ്തമായ 'ലുങ്കി ഡാൻസ്' പാട്ടുവെച്ച് മനസ് തുറന്ന് നൃത്തം ചെയ്യാനും ഇയാൾ മടിച്ചില്ല.
ഒടുവിൽ ഷോറൂമിലുണ്ടായിരുന്ന ബ്രാൻഡഡ് ടി-ഷർട്ടും ക്യാപ്പും ധരിച്ച് പുതിയ ലുക്കിലാണ് ഇയാൾ പുറത്തിറങ്ങിയത്. പുറപ്പെടുന്നതിന് മുൻപ് ഷോറൂം മാനേജരുടെ നാലേമുക്കാൽ ലക്ഷത്തോളം രൂപ വിലമതിക്കുന്ന കെടിഎം ബൈക്കും സ്റ്റാർട്ട് ചെയ്താണ് ഇയാൾ അവിടെനിന്ന് സ്ഥലം വിട്ടത്.
സംഭവത്തിന്റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ രസകരമായ പ്രതികരണങ്ങളാണ് ജനങ്ങളുടെ ഭാഗത്തുനിന്ന് ഉയരുന്നത്. മോഷ്ടിക്കുന്നതിന് മുൻപ് ആ മനുഷ്യൻ ജീവിതം ആവോളം ആസ്വദിച്ചു എന്നാണ് ചിലർ തമാശയായി കുറിച്ചത്.
സംഭവത്തിൽ മണ്ഡുവാഡിഹ് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പ്രദേശം കേന്ദ്രീകരിച്ചുള്ള സിസിടിവി ദൃശ്യങ്ങളും വിരലടയാളങ്ങളും പരിശോധിച്ചു വരികയാണെന്നും പ്രതിയെ ഉടൻ പിടികൂടുമെന്നും വാരാണസി പോലീസ് വ്യക്തമാക്കി.
Viral
ബറേലിയിലെ രാംപൂർ ഗാർഡനിലുള്ള ഒരു പ്രമുഖ ജിമ്മിന് മുന്നിൽ നിർത്തിയിട്ടിരുന്ന വാഹനം കേടുവരുത്തിയതിനെച്ചൊല്ലിയുണ്ടായ വാക്കുതർക്കം ഒടുവിൽ വലിയ സംഘർഷത്തിൽ കലാശിച്ചു. തർക്കത്തിനിടെ ഒരു കൂട്ടം യുവാക്കൾ ചേർന്ന് മന്നു സാരി എന്നറിയപ്പെടുന്ന ട്രാൻസ്ജെൻഡർ വ്യക്തിയെ ക്രൂരമായി മർദിക്കുകയായിരുന്നു.
ആക്രമണത്തിന്റെ ദൃശ്യങ്ങൾ സമൂഹമാധ്യമങ്ങളിൽ നിമിഷനേരം കൊണ്ട് പ്രചരിക്കുകയും വലിയ പ്രതിഷേധത്തിന് ഇടയാക്കുകയും ചെയ്തതോടെ പോലീസ് വിഷയത്തിൽ ഇടപെട്ടു.
തുടർന്ന് ജിം ഉടമയ്ക്കും അദ്ദേഹത്തിന്റെ ഒപ്പമുണ്ടായിരുന്ന ആളുകൾക്കുമെതിരെ നടപടി ആവശ്യപ്പെട്ട് ഇരയായ വ്യക്തി കോട്വാളി പൊലീസിനെ സമീപിക്കുകയായിരുന്നു.
പരാതിയുടെ അടിസ്ഥാനത്തിൽ ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം പോലീസ് കേസ് രജിസ്റ്റർ ചെയ്തു. സംഭവവുമായി ബന്ധപ്പെട്ട് പ്രേം നഗർ സ്വദേശിയായ അർവാനി ശർമ്മ, ബരാദരി സ്വദേശിയായ സഞ്ജീവ് കുമാർ എന്നിവരെ പോലീസ് ഇതിനകം അറസ്റ്റ് ചെയ്തിട്ടുണ്ട്. കേസിൽ കൂടുതൽ അന്വേഷണം തുടരുകയാണെന്ന് പൊലീസ് വ്യക്തമാക്കി.
National
ഗോണ്ട: ഉത്തർപ്രദേശിൽ കാമുകനെ കാണാൻ ജയിലിലെത്തിയ പെൺകുട്ടിയിൽ നിന്ന് വെടിയുണ്ടകളും പണവും കണ്ടെടുത്തു. വ്യാജ തിരിച്ചറിയൽ കാർഡുമായാണ് പെൺകുട്ടി ജയിലിലെത്തിയത്. 10 വെടിയുണ്ടകളാണ് പെൺകുട്ടിയിൽ നിന്ന് കണ്ടെടുത്തത്.
യുപിയിലെ ഗോണ്ട ഡിവിഷണൽ ജയിലിൽ ഇക്കഴിഞ്ഞ വ്യാഴാഴ്ചയായിരുന്നു സംഭവം. ഹർഷു കശ്യപ് എന്ന തടവുകാരനെ കാണാനാണ് പെൺകുട്ടിയും മറ്റൊരു യുവാവും ജയിലിലെത്തിയത്. സുരക്ഷാ പരിശോധനയ്ക്കിടെ തിരിച്ചറിയൽ രേഖകൾ വ്യാജമാണെന്ന് കണ്ടെത്തുകയായിരുന്നു.
തുടർന്ന് നടത്തിയ പരിശോധനയിലാണ് പെൺകുട്ടിയുടെ പക്കൽ നിന്നും വെടിയുണ്ടകൾ കണ്ടെടുത്തത്. തുടർന്ന് പെൺകുട്ടിയെയും പിടിച്ചെടുത്ത വസ്തുക്കളും പോലീസിന് കൈമാറുകയായിരുന്നു. തന്റെ പിതാവിന്റെ ലൈസൻസുള്ള തോക്കിൽ നിന്നാണ് വെടിയുണ്ടകൾ കൈക്കലാക്കിയതെന്ന് പെൺകുട്ടി പോലീസിന് മൊഴി നൽകി.
National
ലക്നോ: ഭർത്താവിനെ തലയ്ക്കടിച്ച് കൊലപ്പെടുത്തിയെന്ന ഭാര്യയുടെ മൊഴിയിൽ പോലീസ് അന്വേഷണം ആരംഭിച്ചു. മഥുര സ്വദേശിയായ മനോജ് സോണി കൊല്ലപ്പെട്ടതായാണ് ഇയാളുടെ ഭാര്യ മൊഴി നൽകിയിരിക്കുന്നത്. മകളുടെയും മകളുടെ കാമുകന്റെയും സഹായത്തോടെയാണ് കൃത്യം നടത്തിയതെന്നും മൃതദേഹം യമുനാതീരത്തെ വനമേഖലയിൽ കത്തിച്ചശേഷം കുഴിച്ചിട്ടെന്നുമാണ് മൊഴി നൽകിയിരിക്കുന്നത്.
സംഭവത്തിൽ മനോജിന്റെ ഭാര്യ നൈന (40), മകൾ ഭക്തി, ഭക്തിയുടെ കാമുകൻ വിമൽ ചൗധരി (22) എന്നിവരെ പോലീസ് കസ്റ്റഡിയിലെടുത്ത് ചോദ്യം ചെയ്യുകയാണ്. അതേസമയം മനോജിന്റെ മൃതദേഹം കണ്ടെത്തിയിട്ടില്ലെന്ന് പോലീസ് പറഞ്ഞു. കഴിഞ്ഞ മൂന്ന് ദിവസമായി വനമേഖലയിൽ വ്യാപക തെരച്ചിൽ നടത്തിയിട്ടും മൃതദേഹം കണ്ടെത്താനാകാത്തതിനാൽ കൊലപാതകം നടന്നതായി പോലീസ് സ്ഥിരീകരിച്ചിട്ടില്ല.
അതേസമയം മനോജിനെ ഏപ്രിൽ 18 മുതൽ കാണാനില്ല. ഏപ്രിൽ 21ന് നൈന ഭർത്താവിനെ കാണാനില്ലെന്ന് കാണിച്ച് പോലീസിൽ പരാതി നൽകിയിരുന്നു. എന്നാൽ കാരണമൊന്നും വ്യക്തമാക്കാതെ അടുത്ത ദിവസം തന്നെ പരാതി പിൻവലിച്ചു. മൂന്ന് ആഴ്ച കഴിഞ്ഞിട്ടും മനോജിനെക്കുറിച്ച് വിവരമൊന്നും ലഭിക്കാതിരുന്നതിനെ തുടർന്ന് സഹോദരൻ രാംബാബു പോലീസിൽ പരാതി നൽകുകയായിരുന്നു.
മയക്കുമരുന്ന് കലർത്തിയ പാൽ മനോജിന് നൽകി അബോധാവസ്ഥയിലാക്കിയശേഷം തലയിൽ കല്ലുകൊണ്ട് ഇടിച്ചു കൊന്നുവെന്നാണ് ഭാര്യ മൊഴി നൽകിയത്. തുടർന്ന് മകളും മകളുടെ കാമുകനും ചേർന്ന് മൃതദേഹം യമുനാതീരത്തെ അക്രൂർ ഗ്രാമത്തിന് സമീപമുള്ള വനമേഖലയിലേക്ക് കൊണ്ടുപോയി കത്തിച്ചെന്നുമാണ് മൊഴി. മൃതദേഹമോ മറ്റ് നിർണായക തെളിവുകളോ കണ്ടെത്തിയാൽ മാത്രമേ കേസിൽ കൂടുതൽ വ്യക്തത ലഭിക്കൂവെന്നും അന്വേഷണ സംഘം വ്യക്തമാക്കി.
National
ലഖ്നോ: ഇലക്ട്രോണിക് വോട്ടിംഗ് മെഷീനുകളിൽ ക്രമക്കേടില്ലെന്ന് വരുത്തിതീർക്കാൻ ഉപതെരഞ്ഞെടുപ്പുകളിൽ ബിജെപി മനഃപൂർവം തോറ്റതാണെന്ന് സമാജ്വാദി പാർട്ടി അധ്യക്ഷൻ അഖിലേഷ് യാദവ്. ബിഹാറിലെ ബങ്കിപുർ, മധ്യപ്രദേശിലെ ദതിയ മണ്ഡലങ്ങളെ കുറിച്ചായിരുന്നു അഖിലേഷിന്റെ പരാമർശം.
രണ്ട് നിയമസഭാ ഉപതെരഞ്ഞെടുപ്പുകളിലും ബോധപൂർവം ബിജെപി തോറ്റതാണെന്നാണ് അഖിലേഷ് യാദവ് ആരോപിച്ചു. ഇവിഎമ്മുകളെ കുറിച്ചുള്ള പ്രതിപക്ഷത്തിന്റെ വിമർശനങ്ങളെ പ്രതിരോധിക്കാനും പൊതുജനങ്ങളെ തെറ്റിദ്ധരിപ്പിക്കാനുമാണ് ബിജെപി ശ്രമമെന്ന് അഖിലേഷ് യാദവ് പറഞ്ഞു.
സോഷ്യലിസ്റ്റ് നേതാവ് ജനേശ്വർ മിശ്രയുടെ ജന്മവാർഷികത്തോടനുബന്ധിച്ച് സംഘടിപ്പിച്ച ചടങ്ങിൽ സംസാരിക്കുകയായിരുന്നു അഖിലേഷ്. ഉത്തർപ്രദേശ്, പശ്ചിമബംഗാൾ തെരഞ്ഞെടുപ്പുകളിൽ ബിജെപി ഉപയോഗിച്ച മോഡൽ ഈ ഉപതെരഞ്ഞെടുപ്പുകളിൽ മനഃപൂർവം ഒഴിവാക്കിയെന്നും അദ്ദേഹം അഭിപ്രായപ്പെട്ടു.
ക്രമക്കേട് നടത്താതെ തെരഞ്ഞെടുപ്പിൽ ജയിക്കാൻ കഴിയുമോയെന്ന് പരിശോധിക്കാനും തെരഞ്ഞെടുപ്പ് പ്രക്രിയ സുതാര്യമാണെന്ന് വരുത്തിത്തീർക്കാനും ബിജെപി തോറ്റുകൊടുക്കുകയായിരുന്നുവെന്നും അഖിലേഷ് യാദവ് കൂട്ടിച്ചേർത്തു.
National
ന്യൂഡൽഹി: നിയമസഭാ തെരഞ്ഞെടുപ്പ് അടുത്തിരിക്കെ യുപിയിൽ രാഷ്ട്രീയ നീക്കങ്ങൾ സജീവമാക്കി പാർട്ടികൾ. സമാജ്വാദി പാർട്ടി അധ്യക്ഷൻ അഖിലേഷ് യാദവിന്റെ പിഡിഎ തന്ത്രത്തെ (പിന്നോക്ക, ദളിത്, ന്യൂനപക്ഷ) പൊളിക്കാൻ ബിജെപി നീക്കങ്ങൾ ആരംഭിച്ചു. 2024 ലെ ലോക്സഭാ തെരഞ്ഞെടുപ്പിൽ യുപിയിൽ എൻഡിഎ സഖ്യത്തേക്കാൾ കൂടുതൽ സീറ്റുകൾ ഇന്ത്യ മുന്നണിക്ക് നേടിക്കൊടുത്തത് അഖിലേഷിന്റെഈ തന്ത്രമായിരുന്നു.
വരാനിരിക്കുന്ന നിയമസഭാ തെരഞ്ഞെടുപ്പിലും ജാതി രാഷ്ട്രീയത്തിലായിരിക്കും എസ്പി ഊന്നൽ നൽകുകയെന്ന് റിപ്പോർട്ടുകളുണ്ട്. അതേസമയം കഴിഞ്ഞതവണത്തെ ആ തന്ത്രം ഇത്തവണ വിജയിക്കില്ലെന്നാണ് ബിജെപിയുടെ വിലയിരുത്തൽ. 2024ൽ കുർമി സമുദായത്തിന് കൂടുതൽ സീറ്റുകൾ നൽകി ഒപ്പം നിർത്തിയത് എസ്പിക്ക് നേട്ടമായിരുന്നു.
കൂടാതെ പാസി വിഭാഗത്തിന്റെ വോട്ടുകളും എസ്പി-കോൺഗ്രസ് സഖ്യത്തിന് ലഭിച്ചു. ബിജെപി സംവരണം എടുത്തുുകളയുമെന്ന പ്രതിപക്ഷ പ്രചാരണവും എസ്സി വോട്ടർമാരെ ഭരണകക്ഷിയിൽ നിന്ന് അകറ്റിയിരുന്നു. ഇത് മറികടക്കാനാണ് ബിജെപി ഇപ്പോൾ പുതിയ തന്ത്രങ്ങൾ മെനയുന്നത്.
കുർമി സമുദായാംഗമായ പങ്കജ് ചൗധരിയെ സംസ്ഥാന അധ്യക്ഷനായി നിയമിച്ചതും യാദവേതര ഒബിസി വിഭാഗങ്ങൾക്ക് കൂടുതൽ സീറ്റുകൾ നൽകാൻ തീരുമാനിച്ചതും ഇതിന്റെ ഭാഗമാണ്. അസദുദ്ദീൻ ഒവൈസിയും ചന്ദ്രശേഖറും തമ്മിലുള്ള സഖ്യസാധ്യതകളെയും പാർട്ടി സൂക്ഷ്മമായി നിരീക്ഷിക്കുന്നുണ്ട്. ഈ സഖ്യം യാഥാർത്ഥ്യമായാൽ അത് തെരഞ്ഞെടുപ്പിനെ ത്രികോണ മത്സരമാക്കി മാറ്റും.
അത് തങ്ങൾക്ക് ഗുണം ചെയ്യുമെന്നുമാണ് ബിജെപിയുടെ കണക്കുകൂട്ടൽ. അയോധ്യയിലെ രാമക്ഷേത്രത്തിലെ വഴിപാട് തുകയുമായി ബന്ധപ്പെട്ട വിവാദങ്ങളും പ്രതിപക്ഷം ഉയർത്തുന്നുണ്ട്. എന്നാൽ പ്രതിപക്ഷത്തിന്റെ നീക്കങ്ങൾ ഒടുവിൽ തങ്ങൾക്ക് അനുകൂലമായ അന്തരീക്ഷമാണ് സൃഷ്ടിച്ചിട്ടുള്ളതെന്ന് ബിജെപി വിലയിരുത്തുന്നു.
തെരഞ്ഞെടുപ്പ് അടുക്കുന്നതോടെ പ്രധാനമന്ത്രി നരേന്ദ്ര മോദി എല്ലാ മാസവും യുപി സന്ദർശിക്കും. കേന്ദ്ര ആഭ്യന്തര മന്ത്രി അമിത് ഷായും സംസ്ഥാനത്തെ ആറ് മേഖലകളിലും സന്ദർശനം നടത്തും. മുഖ്യമന്ത്രി യോഗി ആദിത്യനാഥും സംസ്ഥാനവ്യാപകമായി പര്യടനം ആരംഭിച്ചുകഴിഞ്ഞു.
Viral
ഉത്തർപ്രദേശിലെ ബല്ലിയയിൽ വീട്ടുകാരെ വിഷപ്പാമ്പിൽ നിന്ന് കാത്തുരക്ഷിക്കാൻ സ്വന്തം ജീവൻ ബലിനൽകിയ 'ടോമി' എന്ന വളർത്തുനായയുടെ വീരഗാഥ നാടിനെയാകെ കണ്ണീരണിയിക്കുന്നു. അർദ്ധരാത്രിയിൽ വീടിന് നേരെ വന്ന മൂർഖൻ പാമ്പിനോട് ഒൻപത് വയസുള്ള ടോമി മണിക്കൂറോളമാണ് പോരാടിയത്.
ഞായറാഴ്ച പുലർച്ചെ രണ്ടുമണിയോടെ വീട്ടുകാർ ഉറങ്ങുമ്പോഴാണ് പാമ്പ് വീടിന് സമീപത്തേക്ക് ഇഴഞ്ഞെത്തിയത്. അപകടം മുൻകൂട്ടി തിരിച്ചറിഞ്ഞ ടോമി ഉറക്കെ കുരച്ച് വീട്ടുകാരെ ഉണർത്താൻ ശ്രമിച്ചു.
തുടർന്ന് പാമ്പ് വീടിനുള്ളിലേക്ക് കടക്കാതിരിക്കാൻ മുൻവാതിലിന് മുന്നിൽ പ്രതിരോധം തീർത്ത ടോമി, ഭയന്നോടാതെ പാമ്പിനെ നേരിടുകയായിരുന്നു. ഏതാണ്ട് ഒരു മണിക്കൂറോളം നീണ്ട കടുത്ത പോരാട്ടത്തിനൊടുവിൽ ടോമി പാമ്പിനെ വധിച്ചെങ്കിലും, പോരാട്ടത്തിനിടയിൽ അവന് കടിയേറ്റിരുന്നു.
പാമ്പിനെ കൊന്ന് കുടുംബത്തിന്റെ സുരക്ഷ ഉറപ്പാക്കിയതിന് തൊട്ടുപിന്നാലെ, വിഷം ശരീരത്തിൽ പടർന്ന് അവൻ മണ്ണിലേക്ക് വീണു. അധികം വൈകാതെ ആ വിശ്വസ്ത മിത്രം ജീവൻ വെടിയുകയും ചെയ്തു.
കഴിഞ്ഞ ഒൻപത് വർഷമായി തങ്ങളുടെ കൂടെയുണ്ടായിരുന്ന ടോമിയുടെ വേർപാട് ആ കുടുംബത്തിന് നികത്താനാവാത്ത നഷ്ടമാണ് ഉണ്ടാക്കിയിരിക്കുന്നത്.
അന്ന് രാത്രി അവൻ ആ പാമ്പിനെ തടഞ്ഞിരുന്നില്ലെങ്കിൽ വീടിനുള്ളിൽ വലിയൊരു ദുരന്തം സംഭവിച്ചേനേ എന്ന് കുടുംബാംഗങ്ങൾ കണ്ണീരോടെ ഓർക്കുന്നു.
നാട്ടുകാരും അയൽവാസികളും ചേർന്ന് ടോമിക്ക് കണ്ണീരിൽ കുതിർന്ന യാത്രയയപ്പാണ് നൽകിയത്. സ്നേഹത്തിന്റെയും ധീരതയുടെയും പ്രതീകമായ ടോമിയുടെ ഓർമ്മകൾ ആ നാടിന്റെ മനസിൽ എന്നും ഉണ്ടാകും.
National
ലക്നോ: പോലീസ് റിക്രൂട്ട്മെന്റ് പരീക്ഷയിൽ പരാജയപ്പെട്ടതിൽ മനംനൊന്ത് യുവതി ജീവനൊടുക്കി. തിങ്കളാഴ്ച ഉച്ചയ്ക്ക് രണ്ടരയോടെയാണ് സംഭവം. ഉച്ചയായിട്ടും യുവതിയെ പുറത്തേക്ക് കാണാത്തതിൽ സംശയം തോന്നിയ വീട്ടുകാർ റൂമിന്റെ വാതിൽ തുറന്ന് പരിശോധിച്ചപ്പോഴാണ് മൃതദേഹം കണ്ടെത്തിയത്.
മീററ്റിൽ നടന്ന സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. ഉത്തർപ്രദേശ് പോലീസ് റിക്രൂട്ട്മെന്റ് പരീക്ഷയിൽ പരാജയപ്പെട്ടതിനെ തുടർന്ന് യുവതി കടുത്ത മാനസിക സമ്മർദ്ദത്തിലായിരുന്നുവെന്ന് പ്രാഥമിക അന്വേഷണത്തിൽ വ്യക്തമായതായി അധികൃതർ പറഞ്ഞു.
സംഭവസ്ഥലത്ത് നിന്ന് സംശയാസ്പദമായ ഒന്നും കണ്ടെത്തിയിട്ടില്ലെന്നും പോലീസ് വ്യക്തമാക്കി. പോസ്റ്റ്മോർട്ടം റിപ്പോർട്ടിന്റെയും മറ്റ് കണ്ടെത്തലുകളുടെയും അടിസ്ഥാനത്തിൽ തുടർ നിയമനടപടികൾ സ്വീകരിക്കുമെന്നും മൃതദേഹം കുടുംബത്തിന് കൈമാറുമെന്നും അധികൃതർ പറഞ്ഞു.
National
ന്യൂഡൽഹി: അയോധ്യ രാമക്ഷേത്രത്തിലെ സംഭാവനക്കൊള്ളയുമായി ബന്ധപ്പെട്ട് പാർലമെന്റിന് മുന്നിൽ നടത്തിയ പ്രതിഷേധത്തിൽ രാഹുൽ ഗാന്ധി ഉൾപ്പെടെയുള്ള പ്രതിപക്ഷ എംപിമാർക്കെതിരെ കേസെടുത്ത് വാരാണസി പോലീസ്.
സനാതന ധർമത്തെ അപമാനിച്ചുവെന്നും മതവികാരം വ്രണപ്പെടുത്തിയെന്നും ആരോപിച്ച് ഒരു കൂട്ടം സന്യാസിമാർ നൽകിയ പരാതിയിലാണ് നടപടി. രാഹുൽ ഗാന്ധിക്ക് പുറമേ സ്വതന്ത്ര എംപി രാജേഷ് രഞ്ജൻ എന്ന പപ്പു യാദവ്, സമാജ്വാദി പാർട്ടി എംപി അവധേഷ് പ്രസാദ് എന്നിവർക്കെതിരെയും കേസെടുത്തു.
കാഷായ വസ്ത്രം ധരിച്ചു പൂജാരിയുടെ രൂപത്തിൽ എത്തിയ പപ്പു യാദവ് കാണിക്കപ്പണം മോഷ്ടിക്കുന്നതാണ് പ്രതിപക്ഷ എംപിമാരുടെ പ്രതീകാത്മക പ്രതിഷേധം. കോട്വാലി പോലീസ് സ്റ്റേഷനിൽ ലഭിച്ച രേഖാമൂലമുള്ള പരാതിയുടെ അടിസ്ഥാനത്തിലാണ് എഫ്ഐആർ രജിസ്റ്റർ ചെയ്തതെന്ന് കാശി സോണിലെ ഡെപ്യൂട്ടി കമ്മീഷണർ ഗൗരവ് ബൻസ്വാൾ അറിയിച്ചു.
Viral
ആശുപത്രി അധികൃതർ മരണം സ്ഥിരീകരിച്ച് ഒരു ദിവസത്തിന് ശേഷം, സംസ്കാര ചടങ്ങുകൾക്കായി കൊണ്ടുപോകുന്നതിനിടെ വയോധികയ്ക്ക് ജീവനുണ്ടെന്ന് കണ്ടെത്തിയ സംഭവം വൻ നടുക്കമുണ്ടാക്കുന്നു.
ഉത്തർപ്രദേശിലെ ബറേലിയിൽ നടന്ന ഈ അപൂർവ്വ സംഭവം വൈദ്യശാസ്ത്ര രംഗത്തെ മരണ സ്ഥിരീകരണ പ്രോട്ടോക്കോളുകളെക്കുറിച്ചും ആശുപത്രികളുടെ ജാഗ്രതയെക്കുറിച്ചും വലിയ ചോദ്യങ്ങളാണ് ഉയർത്തുന്നത്.
65-കാരിയായ ഷീല ദേവിക്കാണ് ഈ അത്ഭുതകരമായ അനുഭവമുണ്ടായത്. നിലവിൽ ആഗ്രയിലെ സ്വകാര്യ ആശുപത്രിയിൽ തീവ്രപരിചരണത്തിൽ കഴിയുന്ന ഇവരുടെ ആരോഗ്യാവസ്ഥ ഇപ്പോഴും അതീവ ഗുരുതരമായി തുടരുകയാണ്.
സംസാരിക്കാനോ മറ്റോ ഉള്ള ശേഷി ഇവർക്ക് ഇതുവരെ തിരിച്ചുകിട്ടിയിട്ടില്ല. ചൊവ്വാഴ്ച രാത്രിയാണ് ബറേലിയിലെ സ്വകാര്യ ആശുപത്രി അധികൃതർ ഷീല ദേവി മരിച്ചതായി കുടുംബത്തെ അറിയിക്കുന്നത്.
തുടർന്ന് സംസ്കാര ചടങ്ങുകൾക്കായി മൃതദേഹം ജന്മനാടായ ആഗ്രയിലേക്ക് റോഡ് മാർഗം കൊണ്ടുപോകാൻ ബന്ധുക്കൾ തീരുമാനിക്കുകയായിരുന്നു.
എന്നാൽ യാത്രയ്ക്കിടെ ബുധനാഴ്ച രാത്രിയോടെ വാഹനത്തിലുണ്ടായിരുന്ന ബന്ധുക്കൾ ഷീല ദേവിയുടെ ശരീരത്തിൽ നേരിയ ചലനങ്ങൾ ശ്രദ്ധിച്ചു.
തുടർന്ന് നടത്തിയ പരിശോധനയിൽ ഇവർ ശ്വസിക്കുന്നുണ്ടെന്ന് വ്യക്തമായതോടെ ബന്ധുക്കൾ ഞെട്ടിപ്പോയി. ഒട്ടും സമയം കളയാതെ തൊട്ടടുത്തുള്ള ആശുപത്രിയിലേക്ക് വാഹനം തിരിച്ചുവിട്ട് ഇവരെ അടിയന്തര ചികിത്സയ്ക്കായി പ്രവേശിപ്പിക്കുകയായിരുന്നു.
തെറ്റായ വിവര നൽകിയ ആദ്യ ആശുപത്രിയുടെ പേരുവിവരങ്ങൾ കുടുംബം ഇതുവരെ പരസ്യമാക്കിയിട്ടില്ല. കരൾ സംബന്ധമായ ഗുരുതരമായ രോഗത്തെ തുടർന്ന് ഷീല ദേവി ഏറെ നാളായി ചികിത്സയിലായിരുന്നു.
മഞ്ഞപ്പിത്ത ബാധയെ തുടർന്ന് ഡൽഹിയിൽ വെച്ച് ശസ്ത്രക്രിയയ്ക്ക് വിധേയയായ ഇവരെ, പിന്നീട് ബദൗൺ ആരോഗ്യ വകുപ്പിൽ ജോലി ചെയ്യുന്ന ഇളയ മകന്റെ കൂടെ താമസിക്കുന്നതിനിടയിലാണ് ബറേലിയിലെ ആശുപത്രിയിൽ പ്രവേശിപ്പിച്ചത്.
ഇവിടെ ചികിത്സയിലിരിക്കെ ആരോഗ്യാവസ്ഥ പെട്ടെന്ന് മോശമാവുകയും തുടർന്ന് മരണം സംഭവിച്ചതായി ഡോക്ടർമാർ വിധിയെഴുതുകയുമായിരുന്നു.
മരണ സർട്ടിഫിക്കറ്റ് നൽകുന്നതിലും മരണം സ്ഥിരീകരിക്കുന്നതിലും ഡോക്ടർമാരുടെ ഭാഗത്തുനിന്ന് ഗുരുതരമായ വീഴ്ച സംഭവിച്ചിട്ടുണ്ടോ എന്ന കാര്യത്തിൽ വലിയ സംശയങ്ങളാണ് പൊതുസമൂഹത്തിൽ ഉയരുന്നത്.
ശ്വാസോച്ഛ്വാസം, ഹൃദയമിടിപ്പ്, രക്തചംക്രമണം, നാഡീവ്യൂഹത്തിന്റെ പ്രതികരണങ്ങൾ എന്നിവ പൂർണമായും നിലച്ചുവെന്ന് കൃത്യമായ പരിശോധനകളിലൂടെ ഉറപ്പുവരുത്തിയ ശേഷമാണ് സാധാരണയായി മരണം ഔദ്യോഗികമായി സ്ഥിരീകരിക്കാറുള്ളത്.
സംഭവത്തിന്റെ പശ്ചാത്തലത്തിൽ ആരോഗ്യ വകുപ്പ് അധികൃതർ അന്വേഷണം നടത്തുമെന്നാണ് പ്രതീക്ഷിക്കുന്നത്. അപൂർവ്വമായ എന്തെങ്കിലും വൈദ്യശാസ്ത്ര പ്രതിഭാസമാണോ അതോ ഡോക്ടർമാരുടെ ഭാഗത്തുനിന്നുണ്ടായ അശ്രദ്ധയാണോ ഇതിന് കാരണമെന്ന് അന്വേഷണത്തിലൂടെ മാത്രമേ പുറത്തുവരികയുള്ളൂ.
National
ലക്നോ: എംഎൽഎഹോസ്റ്റലിൽനിന്ന് വീണ് മുൻ മന്ത്രി മരിച്ചു. ബിജെപി നേതാവ് നാനാക് റാം ഭുർജി(68) ആണ് കെട്ടിടത്തിന്റെ പിൻഭാഗത്തുനിന്ന് താഴെ വീണത്.
ഒരാൾ വീണുകിടക്കുന്നുവെന്ന വിവരം എംഎൽഎഹോസ്റ്റലിന്റെ ചുമതലയുള്ള ഓഫീസർ അറിയിച്ചതിനെത്തുടർന്ന് പോലീസ് എത്തി പരിശോധിച്ചപ്പോഴാണ് മുൻ മന്ത്രിയാണെന്നു വ്യക്തമായത്. ഉടൻതന്നെ ആശുപത്രിയിലെത്തിച്ചുവെങ്കിലും മരണം സംഭവിച്ചിരുന്നു.
പുതിയ കെട്ടിടത്തിൽ നാനാക് റാം ഭുർജിക്ക് മുറി അനുവദിച്ചിരുന്നില്ല. അദ്ദേഹം എങ്ങനെ കെട്ടിടത്തിലെത്തി എന്നതിലും അപകടത്തിൽപ്പെട്ടതിലും വ്യക്തതയില്ല.
വിഷാദരോഗം ബാധിച്ചിരുന്ന ഭുർജി സമീപനാളുകളിൽ ഹോസ്റ്റലിനു സമീപം ചുറ്റിത്തിരിയാറുണ്ടായിരുന്നു. പോസ്റ്റ്മോർട്ടം റിപ്പോർട്ട് ഉൾപ്പെടെ ലഭിച്ചശേഷം വിശദമായി അന്വേഷിക്കുമെന്ന് പോലീസ് അറിയിച്ചു.
National
ലക്നോ: കാമുകനുമായി ഫോണിൽ സംസാരിക്കുന്നതിനിടെ കരഞ്ഞ മൂന്നു വയസുകാരനെ ശ്വാസം മുട്ടിച്ചു കൊലപ്പെടുത്തിയ കേസിൽ അമ്മ അറസ്റ്റിൽ. ഉത്തർപ്രദേശിലെ മഥുരയിൽ നടന്ന സംഭവത്തിൽ റുചി ജിൻഡൽ (32) ആണ് അറസ്റ്റിലായത്. കുട്ടിയുടെ പിതാവ് കൃഷ്ണ മുരാരി ഗുപ്ത മെഡിക്കൽ ഷോപ്പ് നടത്തുകയാണ്.
സംഭവ ദിവസം ഭാര്യ റുചി ജിൻഡൽ ഭർത്താവിനെ വിളിച്ച് മകൻ തുടർച്ചയായി കരഞ്ഞതിനെ തുടർന്ന് അസുഖബാധിതനായെന്നും പിന്നീട് പ്രതികരിക്കുന്നില്ലെന്നും പറഞ്ഞു. തുടർന്ന് കുഞ്ഞിനെ ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. അന്നേദിവസം കുട്ടിക്ക് പോളിയോ തുള്ളിമരുന്ന് നൽകിയിരുന്നതിനാൽ അതിനെ തുടർന്നാണ് മരണം സംഭവിച്ചതെന്നു കരുതി മൃതദേഹം സംസ്കരിക്കുകയായിരുന്നു.
എന്നാൽ, തിങ്കളാഴ്ച ഭാര്യ കാമുകനോടു ഫോണിൽ സംഭവത്തെക്കുറിച്ച് സംസാരിക്കുന്നതു ഭർത്താവ് കേട്ടതോടെയാണ് സംശയം ഉയർന്നത്. തുടർന്ന് പോലീസിൽ വിവരം അറിയിക്കുകയായിരുന്നു. കുട്ടിയുടെ മൃതദേഹം പുറത്തെടുത്തു പോസ്റ്റുമോർട്ടം നടത്തുമെന്നു പോലീസ് പറഞ്ഞു.
National
ലക്നോ: അയോധ്യ രാമക്ഷേത്രത്തിലെ സംഭാവനക്കൊള്ളയുമായി ബന്ധപ്പെട്ട കേസിൽ പ്രത്യേക അന്വേഷണ സംഘത്തെ പുനഃസംഘടിപ്പിച്ചു. സുപ്രീംകോടതിയുടെ കർശന നിർദേശത്തെത്തുടർന്നാണ് മുതിർന്ന മൂന്ന് ഐപിഎസ് ഉദ്യോഗസ്ഥരെ ഉൾപ്പെടുത്തി പുതിയ സംഘത്തിന് രൂപം നൽകിയിരിക്കുന്നത്.
ലക്നോ റേഞ്ച് ഐജി എസ്.കിരൺ, അയോധ്യ റേഞ്ച് ഡിഐജി സോമൻ വർമ്മ, അയോധ്യ എസ്എസ്പി ഡോ. ഗൗരവ് ഗ്രോവർ എന്നിവരാണ് പുതിയ അംഗങ്ങൾ. മോഷണവുമായി ബന്ധപ്പെട്ട ക്രിമിനൽ അന്വേഷണങ്ങളും സാങ്കേതിക പരിശോധനകളും കൂടുതൽ ഫലപ്രദമായി കൈകാര്യം ചെയ്യണം.
ഇതിനായി പരിചയസമ്പന്നരായ പോലീസ് ഉദ്യോഗസ്ഥരെ ഉൾപ്പെടുത്തണമെന്ന് ചീഫ് ജസ്റ്റീസ് സൂര്യകാന്ത് അധ്യക്ഷനായ ബെഞ്ച് സർക്കാരിന് നിർദേശം നൽകിയിരുന്നു. നേരത്തെ ലക്നോ കമ്മീഷണർ വിജയ് വിശ്വാസ് പന്ത്, ധനകാര്യ സ്പെഷ്യൽ സെക്രട്ടറി നീൽ രത്തൻ കുമാർ എന്നിവരടങ്ങുന്ന സംഘമായിരുന്നു അന്വേഷണം നടത്തിയിരുന്നത്.
അതേസമയം പുതിയ എസ്ഐടിയുടെ നേതൃത്വത്തിൽ ഇതിനോടകം അന്വേഷണം ആരംഭിച്ചതായാണ് റിപ്പോർട്ട്. നേരത്തെ സിസിടിവി ദൃശ്യങ്ങളും സംഭാവന രജിസ്റ്ററും പണം എണ്ണുന്ന നടപടിക്രമങ്ങളും സാമ്പത്തിക രേഖകളും എസ്ഐടി സംഘം പരിശോധനയ്ക്ക് വിധേയമാക്കിയിരുന്നു. പുനഃസംഘടിപ്പിച്ച പുതിയ അന്വേഷണ സംഘം കേസിന്റെ പുരോഗതി സംബന്ധിച്ച റിപ്പോർട്ട് തിങ്കളാഴ്ച സുപ്രീംകോടതിയിൽ സമർപ്പിക്കും.
National
ന്യൂഡൽഹി: നേപ്പാൾ അതിർത്തി വഴി ഇന്ത്യയിലേക്ക് നുഴഞ്ഞുകയറാൻ ശ്രമിച്ച ഖലിസ്ഥാൻ അനുകൂലിയെയും അമേരിക്കൻ പൗരനെയും സുരക്ഷാസേന പിടികൂടി. ഖലിസ്ഥാൻ അനുകൂല സംഘടനയായ വാരിസ് പഞ്ചാബ് ഡേ പ്രവർത്തകൻ വിക്രംജിത് സിംഗ്, യുഎസ് പൗരനും ഖലിസ്ഥാൻ അനുകൂലിയുമായ മൻവീർ സിംഗ് ധില്ലൻ എന്നിവരാണ് പിടിയിലായത്.
ഉത്തർപ്രദേശിലെ റുപായ്ദിഹ പോസ്റ്റിന് സമീപത്തുവെച്ചാണ് ഇവർ പിടിയിലായത്. ഇവർക്ക് ഒത്താശ ചെയ്ത സുരേഷ് കുമാർ പഥക്, ദിലീപ് ഉപാധ്യായ, രാഹുൽ കുമാർ എന്നിവരെയും അറസ്റ്റ് ചെയ്തെന്ന് യുപി പോലീസ് പറഞ്ഞു. പിടിയിലായ വിക്രംജിത് സിംഗ് 2023-ൽ പഞ്ചാബിലെ പോലീസ് സ്റ്റേഷൻ ആക്രമിച്ച കേസിലെ പ്രതിയാണ്.
അതിർത്തി കടക്കാൻ ശ്രമിക്കവേ ഇരുവരുടെയും നീക്കങ്ങളിൽ സംശയം തോന്നിയ സുരക്ഷാ ഉദ്യോഗസ്ഥർ തടഞ്ഞുവെച്ച് പരിശോധിക്കുകയായിരുന്നു. നടനും ഖലിസ്ഥാൻ നേതാവുമായ ദീപ് സിദ്ധു 2021-ൽ രൂപീകരിച്ച സംഘടനയാണ് വാരിസ് പഞ്ചാബ് ഡേ. പിന്നീട് അമൃത്പാൽ സിംഗ് ഇതിന്റെ നേതൃത്വം ഏറ്റെടുത്തിരുന്നു.
പിടിയിലായ വിദേശ പൗരന് അന്താരാഷ്ട്ര ഭീകരബന്ധങ്ങളുണ്ടോ എന്നതുൾപ്പെടെയുള്ള കാര്യങ്ങളിൽ കേന്ദ്ര ഏജൻസികൾ അന്വേഷിക്കുന്നുണ്ട്. അറസ്റ്റിലായ ഇരുവരെയും ചോദ്യം ചെയ്തുവരുകയാണ്.
National
മൊഹോബ: ഉത്തർപ്രദേശിലെ ജൈത്പുരിൽ പുരാതന ഹനുമാൻ ക്ഷേത്രത്തിലെ പൂജാരിയെ അക്രമികൾ കൊലപ്പെടുത്തി.
കുൽപാഹർ പോലീസ് സ്റ്റേഷൻ പരിധിയിലുള്ള ക്ഷേത്രവളപ്പിൽ ശനിയാഴ്ച രാവിലെയാണ് 65കാരനായ പൂജാരി ഉദിത് നാരായൺ മിശ്രയുടെ മൃതദേഹം കണ്ടെത്തിയത്.
വടികൊണ്ട് അടിച്ച പാടുകൾ മൃതദേഹത്തിലുണ്ടെന്ന് മൊഹോബ എസ്പി വന്ദന സിംഗ് അറിയിച്ചു. വെള്ളിയാഴ്ച രാത്രി പൂജാരിക്കു മർദനമേറ്റുവെന്നാണ് നിഗമനം.
ഹാമിർപുർ സ്വദേശിയായ മിശ്ര 16 വർഷമായി ക്ഷേത്രത്തിനു സമീപമാണു കഴിഞ്ഞിരുന്നത്. അക്രമികളെ കണ്ടെത്താനായി അന്വേഷണം തുടരുകയാണെന്നു പോലീസ് അറിയിച്ചു.
Viral
വാരണാസിയിലെ സപ്തസാഗർ മരുന്ന് മാർക്കറ്റ് പരിസരത്ത് കഴിഞ്ഞദിവസം ഒരു വിദേശ പൗരൻ കടുത്ത പരിഭ്രാന്തി സൃഷ്ടിച്ചു. അർദ്ധനഗ്നനായെത്തിയ ഇയാൾ കോട്വാലി പോലീസ് സ്റ്റേഷൻ പരിധിയിലുള്ള നിരവധി വീടുകളിൽ അതിക്രമിച്ചു കയറി അക്രമം അഴിച്ചുവിടുകയായിരുന്നു.
വീടുകളിലെ ഗൃഹോപകരണങ്ങൾ പുറത്തേക്ക് വലിച്ചെറിഞ്ഞും തടയാൻ ശ്രമിച്ച പ്രദേശവാസികൾക്ക് നേരെ തിരിഞ്ഞും ഇയാൾ അക്രമാസക്തനായി പെരുമാറി.
ലഹരി പാനീയമായ ഭാംഗ് കഴിച്ചതിനെത്തുടർന്നാണ് ഇയാൾ ഇത്തരത്തിൽ പെരുമാറിയതെന്ന് ചില പ്രാദേശിക വൃത്തങ്ങൾ സൂചിപ്പിക്കുന്നുണ്ടെങ്കിലും ഔദ്യോഗികമായി ഇത് സ്ഥിരീകരിച്ചിട്ടില്ല.
ഒരു താമസയോഗ്യമായ കെട്ടിടത്തിനുള്ളിൽ ഉറക്കെ നിലവിളിച്ചും ചാടിയും പരിഭ്രാന്തി പരത്തിയ ഇയാളെ ഒടുവിൽ നാട്ടുകാർ ചേർന്നാണ് കീഴ്പ്പെടുത്തിയത്.
തുടർന്ന് വിവരമറിഞ്ഞ് സ്ഥലത്തെത്തിയ പോലീസ് സംഘം ഇയാളെ കസ്റ്റഡിയിലെടുക്കാൻ ശ്രമിച്ചെങ്കിലും ഇടുങ്ങിയ തെരുവുകളിലൂടെ ഓടി ആളുകളെ പിന്തുടർന്ന് ആക്രമിക്കാൻ ഇയാൾ വീണ്ടും മുതിർന്നു.
മുകൾനിലകളിലെ സാധനങ്ങൾ താഴേക്ക് എറിഞ്ഞ് അക്രമം തുടർന്ന വിദേശിയെ ശാന്തനാക്കാൻ പ്രദേശവാസികൾ പരമാവധി ശ്രമിച്ചെങ്കിലും ഇയാൾ വഴങ്ങിയില്ല.
ഇതിനിടെ തടയാൻ ശ്രമിച്ച ഒരു നാട്ടുകാരന്റെ കൈയിൽ ഇയാൾ കടിക്കുകയും ചെയ്തു. സ്ഥിതിഗതികൾ സങ്കീർണമായതോടെ സ്ഥലത്തെത്തിയ കോട്വാലി പോലീസ് അനുനയത്തിൽ താഴെയിറക്കാൻ ശ്രമിച്ചെങ്കിലും ഉദ്യോഗസ്ഥരോടും ഇയാൾ അക്രമസ്വഭാവമാണ് കാണിച്ചത്.
തിരിച്ചുപോകാൻ ആവശ്യപ്പെട്ട് പോലീസിന് നേരെ ഇയാൾ ഉറക്കെ ആക്രോശിച്ചതായും ദൃക്സാക്ഷികൾ പറയുന്നു. ഒടുവിൽ കസ്റ്റഡിയിലെടുത്ത ഇയാളെ പോലീസ് മെഡിക്കൽ പരിശോധനകൾക്കായി കബീർചൗര ഡിവിഷണൽ ആശുപത്രിയിലേക്ക് മാറ്റി.
വിദേശിയുടെ മാനസിക നിലയിലുണ്ടായ തകരാറാണോ അതോ ലഹരിമരുന്നിന്റെ അമിത ഉപയോഗമാണോ ഈ അസാധാരണ പെരുമാറ്റത്തിന് പിന്നിലെന്ന് പരിശോധിച്ചു വരികയാണെന്ന് കോട്വാലി ഇൻസ്പെക്ടർ ദയാശങ്കർ വ്യക്തമാക്കി. ഇയാളുടെ കൃത്യമായ വിലാസവും ഏത് രാജ്യക്കാരനാണെന്ന വിവരവും കണ്ടെത്താനുള്ള ശ്രമത്തിലാണ് അധികൃതർ.
National
ഗോരഖ്പുര്: ഉത്തര്പ്രദേശിലെ ഗോരഖ്പുരിൽ ഭർതൃമാതാവിനെ കുത്തിപ്പരിക്കേൽപ്പിച്ച യുവതി പിടിയിൽ. ഫോണ് വിളിക്കുന്നതുമായി ബന്ധപ്പെട്ട തര്ക്കമാണ് ആക്രമണത്തിൽ കലാശിച്ചത്. ഗോരഖ്പുരിലെ മാല്മലിയ ജഗ്ദീഷ്പുര് ഗ്രാമത്തിലാണ് സംഭവം.
ആക്രമണത്തിൽ ഗുരുതരമായി പരിക്കേറ്റ ആശാ ദേവി നിലവിൽ ഗോരഖ്പുര് എയിംസില് ചികിത്സയിലാണ്. സംഭവത്തിന് പിന്നാലെ ആശാ ദേവിയുടെ മരുമകൾ വന്ദനയെ പോലീസ് കസ്റ്റഡിയിലെടുത്തിട്ടുണ്ട്.
തിങ്കളാഴ്ച രാത്രി വന്ദന ഫോണിലൂടെ ഒരു യുവാവിനോട് സംസാരിക്കുന്നത് ശ്രദ്ധയില്പ്പെട്ട ആശാ ദേവി ഇത് ചോദ്യംചെയ്തു. ഇതേ തുടർന്ന് ഇരുവരും തമ്മിൽ വലിയ തർക്കമുണ്ടായി. ഇതിൽ പ്രകോപിതയായ വന്ദന കത്തിയെടുത്ത് ആശാദേവിയെ ആക്രമിക്കുകയായിരുന്നു.
ഗുരുതരമായി പരിക്കേറ്റ ആശാ ദേവിയെ ബന്ധുക്കള് ആശുപത്രിയിലെത്തിക്കുകയായിരുന്നു. വിവരം അറിഞ്ഞ് സ്ഥലത്തെത്തിയ പോലീസ് വന്ദനയെ കസ്റ്റഡിയിലെടുത്തു. ഇവർ ആക്രമണത്തിന് ഉപയോഗിച്ച കത്തിയും പോലീസ് കണ്ടെടുത്തിട്ടുണ്ട്.
National
അയോധ്യ: അയോധ്യ രാമക്ഷേത്രത്തിലെ സംഭാവനക്കൊള്ളയുമായി ബന്ധപ്പെട്ട കേസിൽ ശ്രീരാമ ജന്മഭൂമി തീർഥ ക്ഷേത്ര ട്രസ്റ്റ് ജനറൽ സെക്രട്ടറി ചന്പത് റായിയെ പോലീസ് ചോദ്യംചെയ്തു. ക്രമക്കേടിന്റെ ധാർമിക ഉത്തരവാദിത്വം ഏറ്റെടുത്ത് വിശ്വഹിന്ദു പരിഷത് വൈസ് പ്രസിഡന്റുകൂടിയായ ചന്പത് റായി രാജിക്കത്തു നൽകിയിരുന്നുവെങ്കിലും ക്രമക്കേട് മറച്ചുവയ്ക്കാൻ ഇദ്ദേഹം ശ്രമിച്ചിരുന്നോ എന്നാണ് അന്വേഷണസംഘം പരിശോധിക്കുന്നത്. ചന്പത് റായിയെ ചോദ്യംചെയ്തുവെന്ന് സ്ഥിരീകരിക്കുന്ന പോലീസ് വിശദാംങ്ങൾ വെളിപ്പെടുത്തുന്നില്ല.
കഴിഞ്ഞമാസം ഏഴിന് സമാജ്വാദി പാർട്ടി നേതാവ് അഖിലേഷ് യാദവാണ് ക്ഷേത്രക്കൊള്ളയെക്കുറിച്ച് ആരോപണം ഉന്നയിക്കുന്നത്. അതിനു രണ്ടുദിവസം മുന്പ് ക്ഷേത്രം ജീവനക്കാരനായ അവിനാശ് ശുക്ലയുടെ വസതിയിനിന്ന് പണമടങ്ങിയ ബാഗ് പിടിച്ചെടുക്കുന്ന വീഡിയോ സമൂഹമാധ്യമങ്ങളിൽ പ്രചരിച്ചിരുന്നു. സംഭാവനയായി ലഭിച്ച തുകയായിരുന്നു ബാഗിൽ ഉണ്ടായിരുന്നത്. സംഭാവനയായി ലഭിച്ച തുക നഷ്ടമായ വിവരം അറിഞ്ഞിട്ടും പരാതിപ്പെടാൻ ചന്പത് റായി തയ്യാറായില്ല എന്ന ആരോപണം ശക്തമാണ്.
ട്രസ്റ്റ് അടിയന്തരയോഗം തിങ്കളാഴ്ച
ലക്നോ: സംഭാവനക്കൊള്ളയിൽ വൻ ജനരോഷം ഉയരുന്ന സാഹചര്യത്തിൽ ശ്രീരാമ ജന്മഭൂമി തീർഥ ക്ഷേത്ര ട്രസ്റ്റിന്റെ യോഗം നേരത്തെയാക്കി. ഈ മാസം 11 നു ചേരാനിരുന്ന യോഗം തിങ്കളാഴ്ചതന്നെ അടിയന്തരമായി ചേരും. ട്രസ്റ്റ് ജനറൽ സെക്രട്ടറി ചന്പത് റായിയുടെ രാജിക്കത്ത് ഉൾപ്പെടെ യോഗം ചർച്ച ചെയ്യും.അംഗങ്ങളായ 14 പേരും തിങ്കളാഴ്ച അയോധ്യയില് ഉണ്ടാകണമെന്ന് ട്രസ്റ്റ് അധ്യക്ഷനായ മഹന്ത് നൃത്യ ഗോപാൽ ദാസ് നിർദേശിച്ചിരിക്കുന്നത്.
ദൈനംദിന പ്രവര്ത്തനങ്ങള് ഉയര്ന്ന തലത്തില് നിരീക്ഷിച്ച് സുതാര്യത ഉറപ്പുവരുത്താനുള്ള തീരുമാനം യോഗം എടുത്തേക്കും. ട്രസ്റ്റ് ട്രഷറര് ഗോവിന്ദ് ഗേവ് ഗിരിയുടെ പേരിലാണ് അടിയന്തരയോഗം വിളിച്ചിരിക്കുന്നത്.
National
ബുലന്ദ്ഷഹർ: ഉത്തർപ്രദേശിൽ കുടുംബ വഴക്കിനെ തുടർന്ന് ഭാര്യയെ കഴുത്തറുത്ത് കൊലപ്പെടുത്തി ഭർത്താവ്. ബുലന്ദ്ഷഹറിലെ ഹാജിപൂർ ഗ്രാമത്തിലാണ് സംഭവം. ഹാജിപൂർ സ്വദേശി ഗീത(25) ആണ് കൊല്ലപ്പെട്ടത്.
വാക്കുതർക്കമാണ് കൊലപാതകത്തിലേക്ക് നയിച്ചതെന്ന് പോലീസ് അറിയിച്ചു. സംഭവത്തെ തുടർന്ന് ഗീതയുടെ ഭർത്താവ് മോനുവിനായി പോലീസ് അന്വേഷണം ഊർജിതമാക്കിയിട്ടുണ്ട്. ഏഴുമാസം മുൻപാണ് ഗീതയും മോനുവും വിവാഹിതരായത്.
ഇരുവരും തമ്മിലുണ്ടായ വഴക്കിനിടെ മോനു മൂർച്ചയേറിയ ആയുധം ഉപയോഗിച്ച് യുവതിയുടെ കഴുത്തറുത്ത് കൊലപ്പെടുത്തുകയായിരുന്നു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി അയച്ചിട്ടുണ്ടെന്ന് പോലീസ് വ്യക്തമാക്കി.