കിംഗ്ഫിഷര്‍ ജീവനക്കാര്‍ വീണ്ടും പ്രതിഷേധത്തിലേക്ക്
Thursday, November 15, 2012 2:17 AM IST
മുംബൈ: കഴിഞ്ഞ മേയിലെ ശമ്പളം നല്‍കാമെന്ന വാഗ്ദാനം പാലിക്കാന്‍ കിംഗ്ഫിഷര്‍ മാനേജ്മെന്റിനു കഴിയാത്ത സാഹചര്യത്തില്‍ ജീവനക്കാര്‍ വീണ്ടും പ്രതിഷേധത്തിലേക്കു തിരിയുമെന്നു സൂചന. 17-ാം തീയതിയോടെ ശമ്പളം നല്‍കണമെന്നാണു ജീവനക്കാര്‍ ആവശ്യപ്പെട്ടിരിക്കുന്നത്. ദീപാവലി വന്നുപോയിട്ടും തങ്ങള്‍ക്ക് പണം കിട്ടിയില്ലെന്നു അവര്‍ പരാതിപ്പെടുന്നു. ശമ്പളം സംബന്ധിച്ച് ഒരുവാക്കു പോലും മാനേജ്മെന്റ് ഭാഗത്തു നിന്ന് ഉണ്ടായിട്ടില്ല. ശനിയാഴ്ചയോടെ പണം കിട്ടുന്നില്ലെങ്കില്‍ അടുത്ത പരിപാടികള്‍ ആലോചിക്കും. ലൈസന്‍സ് നഷ്ടപ്പെട്ട് വിമാനം പറപ്പിക്കാന്‍ കഴിയാത്ത കിംഗ്ഫിഷറിലെ 30,00 ജീവനക്കാര്‍ക്കാണ് എട്ടുമാസമായി ശമ്പളം മുടങ്ങിയിരിക്കുന്നത്. ദീപാവലിയോടെ മേയ് മാസത്തെ ശമ്പളക്കുടിശിക നല്‍കാമെന്നു കഴിഞ്ഞമാസം കമ്പനി അധികൃതര്‍ ഉറപ്പു നല്‍കിയിരുന്നു.