ബാല്‍ താക്കറെ അന്തരിച്ചു |

Click here for detailed news of all items

ബാല്‍ താക്കറെ അന്തരിച്ചു

Saturday, November 17, 2012 6:30 AM IST

മുംബൈ: ശിവസേന നേതാവ് ബാല്‍ താക്കറെ അന്തരിച്ചു. 86 വയസായിരുന്നു. ഉച്ചകഴിഞ്ഞ് 3.33 നായിരുന്നു അന്ത്യം. ശ്വാസതടസം അനുഭവപ്പെട്ടതിനെത്തുടര്‍ന്നു ഗുരുതരാവസ്ഥയിലായ താക്കറെയുടെ ജീവന്‍ രക്ഷിക്കാനുള്ള ശ്രമങ്ങളുമായി ഡോക്ടര്‍മാരുടെ സംഘം വസതിയായ മാതോശ്രീയില്‍ ക്യാമ്പ് ചെയ്യുകയായിരുന്നു.

1926 ജനുവരി 23ന് പുനെയില്‍ ജനിച്ച ബാല്‍ കേശവ് താക്കറെ മുംബൈയില്‍ നിന്നും പ്രസിദ്ധീകരിച്ചിരുന്ന 'ഫ്രീ പ്രസ് ജേര്‍ണലി'ല്‍ കാര്‍ട്ടൂണിസ്റ് ആയിട്ടാണ് ഔദ്യോഗികജീവിതം ആരംഭിച്ചത്. പിന്നീട് 1960ല്‍ 'മര്‍മിക്' എന്ന പേരില്‍ സ്വന്തം രാഷ്ട്രീയ വാരികയുമായി രാഷ്ട്രീയ രംഗത്തേക്ക് കടന്നുവന്നു. സംയുക്ത മഹാരാഷ്ട്ര മൂവ്മെന്റിലൂടെ ദേശീയതലത്തില്‍ ശ്രദ്ധേയനായ പിതാവിന്റെ (കേശവ് സീതാറാം താക്കറെ) രാഷ്ട്രീയ ആദര്‍ശങ്ങളില്‍ പ്രചോദിതനായാണ് ബാല്‍ താക്കറെ മഹാരാഷ്ട്ര വാദവുമായി രാഷ്ട്രീയത്തിലേക്ക് വരുന്നത്.

1966 ജൂണ്‍ 19ന് 'ശിവസേന' രൂപീകരിച്ചു. പിന്നീട് 1980 -കളില്‍ മറാത്തി ഭാഷ പത്രം 'സാമ്ന'യും ഹിന്ദി പത്രം 'ദോഫര്‍ കാ സാമ്ന'യും ആരംഭിച്ചു. തീവ്ര മഹാരാഷ്ട്ര വാദവും ഹിന്ദുത്വ അജണ്ടയുമുള്ള ശിവസേനയുടെ നിലപാടുകള്‍ പലപ്പോഴും ഇസ്ലാം മതവിശ്വാസികളടക്കമുള്ള ന്യൂനപക്ഷങ്ങള്‍ക്ക് എതിരായിരുന്നു. എല്‍ടിടിഇ യോട് അനുകൂല സമീപനം പുലര്‍ത്തിയ ശിവസേന 'വലന്റൈന്‍സ് ഡേ' ആഘോഷങ്ങള്‍ക്കെതിരെ കര്‍ക്കശ നിലപാടാണ് സ്വീകരിച്ചത്. ശിവസനേ ഉയര്‍ത്തിയ മറാത്ത വാദം ബിഹാര്‍ അടക്കമുള്ള ഉത്തരേന്ത്യന്‍ തൊഴിലാളികള്‍ക്ക് മഹാരാഷ്ട്രയില്‍ ഭീഷണിയായിരുന്നു.

രാഷ്ട്രീയപരമായി കമ്മ്യൂണിസ്റ് വിരുദ്ധ നിലപാടുകള്‍ കൈകൊണ്ട ശിവസേന സമാന ഹിന്ദുത്വ നയങ്ങള്‍ സ്വീകരിക്കുന്ന ബിജെപിയുമായി അടുത്തു. 1995 -ല്‍ ശിവസേന-ബിജെപി സഖ്യം മഹാരാഷ്ട്രയില്‍ അധികാരത്തിലെത്തി. 1995-99 വരെ നീണ്ട ഭരണത്തിന്റെ 'റിമോട്ട് കണ്ട്രോള്‍' താക്കറെയുടെ കൈയിലായിരുന്നു. 1999 മുതല്‍ 2005 വരെയുള്ള ആറ് വര്‍ഷം ഇലക്ഷനില്‍ മത്സരിക്കുന്നതില്‍ നിന്നും വോട്ട് ചെയ്യുന്നതിനും ബാല്‍ താക്കറെയെ ഇലക്ഷന്‍ കമ്മീഷന്‍ വിലക്കിയിരുന്നു.

1996 താക്കറെക്ക് നഷ്ടങ്ങളുടെ വര്‍ഷമായിരുന്നു. ഏപ്രില്‍ 20ന് മൂത്ത പുത്രന്‍ ബിന്ദുമാധവ് (ബിന്ദ) താക്കറെ വാഹനാപകടത്തില്‍ മരിച്ചു. സെപ്റ്റംബറില്‍ ഹൃദയാഘാതത്തെ തുടര്‍ന്ന് ഭാര്യ മീനയും മരണത്തിന് കീഴടങ്ങി.
ബിന്ദയെ കൂടാതെ ശിവസേനയില്‍ സജീവമായ ഉദ്ധവ് താക്കറെ, ജയ്ദേവ് താക്കറെ എന്നീ രണ്ട് മക്കള്‍ കൂടി താക്കറെക്കുണ്ട്.