തമിഴ്നാട് നിയമസഭാ മന്ദിരം: ഹര്‍ജി സുപ്രീം കോടതി തള്ളി
Thursday, January 31, 2013 6:53 PM IST
ന്യൂഡല്‍ഹി: തമിഴ്നാട്ടിലെ നിയമസഭാ മന്ദിരം ഫോര്‍ട്ട് സെന്റ് ജോര്‍ജിലെ പഴയ കെട്ടിടത്തിലേക്ക് മാറ്റാനുള്ള ജയലളിത സര്‍ക്കാരിന്റെ തീരുമാനത്തെ ചോദ്യം ചെയ്തു സമര്‍പ്പിച്ച ഹര്‍ജി സുപ്രീംകോടതി തള്ളി. ചീഫ് ജസ്റീസ് അല്‍ത്തമാസ് കബീര്‍ അധ്യക്ഷനായ ഡിവിഷന്‍ ബെഞ്ചിന്റേതാണ് ഉത്തരവ്. പരാതി മറ്റൊരു ഫോറത്തില്‍ ഉന്നയിക്കാവുന്നതാണെന്നു കോടതി വ്യക്തമാക്കി. നിയമ സഭയും സെക്രട്ടേറിയറ്റും പുതിയ മന്ദിരത്തില്‍ നിന്നു പഴയ മന്ദിരത്തിലേക്ക് മാറ്റാനുള്ള ജയലളിത സര്‍ക്കാരിന്റെ തീരുമാനത്തിനെതിരേ ഡിഎംകെ നേതാവ് ആര്‍. വീരമണി സമര്‍പ്പിച്ച ഹര്‍ജിയാണ് തള്ളിയത്.

നിയമസഭയുടെ പ്രവര്‍ത്തനം പുതിയ കെട്ടിടത്തിലേക്കു മാറ്റിയ ഡിഎംകെ സര്‍ക്കാരിന്റെ തീരുമാനം മറികടക്കാനാണ് ജയലളിതയുടെ നടപടിയെന്ന വാദം ഹര്‍ജിയില്‍ത്തന്നെ ഉന്നയിച്ചിട്ടുണ്െടന്നും അതിനാല്‍ കോടതിക്ക് ഇക്കാര്യത്തില്‍ തീര്‍പ്പുകല്പിക്കാനാകില്ലെന്നും ബെഞ്ച് വ്യക്തമാക്കി. കോടികള്‍ മുടക്കിയാണ് കരുണാനിധി മുഖ്യമന്ത്രിയായിരുന്ന കാലത്ത് പുതിയ മന്ദിരം നിര്‍മിച്ചത്. എന്നാല്‍, ജയലളിത അധികാരത്തിലെത്തിയ 2011 മെയില്‍ തന്നെ നിയമസഭയുടെ പ്രവര്‍ത്തനം പഴയ കെട്ടിടത്തില്‍ തുടരാനും പുതിയ കെട്ടിടം സൂപ്പര്‍ സ്പെഷാലിറ്റി ആശുപത്രിയാക്കാനും തീരുമാനിക്കുകയായിരുന്നു. മദ്രാസ് ഹൈക്കോടതിയും ഈ തീരുമാനം ശരിവെച്ചിരുന്നു.