സൈന്യത്തിന് ആദരം 20 മുതൽ കോൺഗ്രസിന്‍റെ ജയ് ഹിന്ദ് സഭകൾ
Friday, May 16, 2025 2:00 AM IST
ന്യൂഡൽഹി: സൈന്യത്തിന് ആദരമർപ്പിച്ച് ഈ മാസം 20 മുതൽ രാജ്യവ്യാപകമായി ജയ് ഹിന്ദ് സഭകൾ സംഘടിപ്പിക്കുമെന്ന് കോണ്ഗ്രസ്.
രാജ്യത്തെ പ്രധാന നഗരങ്ങളിൽ നടത്തുന്ന റാലികളിൽ സൈന്യത്തിലെ മുതിർന്ന ഉദ്യോഗസ്ഥരും പാർട്ടി നേതാക്കളും പൊതുജനങ്ങളും പങ്കാളികളാകുമെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ അറിയിച്ചു.
ഇതുസംബന്ധിച്ച് എക്സിൽ പോസ്റ്റ് ചെയ്ത കുറിപ്പിൽ സുരക്ഷാ വീഴ്ചകൾ, ദേശീയസുരക്ഷ കൈകാര്യം ചെയ്യുന്ന സർക്കാരിന്‍റെ രീതി, ദേശീയസുരക്ഷാ കാര്യങ്ങളിലെ യുഎസ് ഇടപെടലിൽ സർക്കാർ പാലിക്കുന്ന മൗനം എന്നീ വിഷയങ്ങളിൽ ഗുരുതര ചോദ്യമുയർത്തണമെന്നും വേണുഗോപാൽ ആവശ്യപ്പെട്ടു.
ഡൽഹി, കൊച്ചി, സിംല, ഹൽദ്വാനി, പാറ്റ്ന, ജബൽപുർ, പുന, ഗോവ, ബംഗളൂരു, ഗോഹട്ടി, കോൽക്കത്ത, ഹൈദരാബാദ്, ഭുവനേശ്വർ, പത്താൻകോട്ട് എന്നിവിടങ്ങളിലാണ് ജയ് ഹിന്ദ് സഭകൾ സംഘടിപ്പിക്കുക.