യാത്ര മുടങ്ങി; കൊച്ചി വിമാനത്താവളത്തിൽ യാത്രക്കാർ പ്രതിഷേധിച്ചു : Deepika.com Kerala News |

Click here for detailed news of all items

യാത്ര മുടങ്ങി; കൊച്ചി വിമാനത്താവളത്തിൽ യാത്രക്കാർ പ്രതിഷേധിച്ചു

Saturday, April 20, 2024 12:52 AM IST

നെടുമ്പാശേരി: യാത്ര മുടങ്ങിയതിൽ പ്രതിഷേധിച്ച് കൊച്ചി വിമാനത്താവളത്തിൽ യാത്രക്കാരുടെ ബഹളം. ഇന്നലെ എമിറേറ്റ്‌സ് എയർലൈൻസ് വിമാനത്തിൽ പോകാനെത്തിയ യാത്രക്കാരാണ് വിമാനത്താവളത്തിൽ പ്രതിഷേധിച്ചത്.

ദുബായിലേക്കുള്ള യാത്രക്കാരെ കൊണ്ടുപോകാൻ തയാറായെങ്കിലും അവിടെനിന്നു മറ്റിടങ്ങളിലേക്കു പോകുന്നതിന് ടിക്കറ്റെടുത്തിരുന്നവരെ കൊണ്ടുപോകാൻ വിമാന കമ്പനി തയാറായില്ല. ഇതാണു പ്രതിഷേധത്തിനിടയാക്കിയത്.

ദുബായിൽ കനത്ത മഴ പെയ്തതിന്‍റെ ഭാഗമായി താറുമാറായ വിമാന സർവീസുകൾ സാധാരണ നിലയിലായി വരുന്നതേയുള്ളൂ. അതിനാലാണ് ദുബായിൽനിന്നും മറ്റു രാജ്യങ്ങളിലേക്കു പോകുന്നതിന് ടിക്കറ്റെടുത്തിരുന്ന യാത്രക്കാരെ കൊണ്ടുപോകാൻ വിമാനക്കമ്പനി വിസമ്മതിച്ചത്.

യുകെ, കാനഡ, അയർലൻഡ് തുടങ്ങിയ സ്ഥലങ്ങളിലേക്കു പോകുന്നതിന് എമിറേറ്റ്‌സ് വിമാനത്തിൽ ടിക്കറ്റെടുത്തിരുന്ന അമ്പതോളം പേർക്കാണു യാത്ര നിഷേധിച്ചത്.

ബഹളം വച്ച യാത്രക്കാരെ നെടുമ്പാശേരി പോലീസും സിഐഎസ്എഫും ചേർന്നാണു ശാന്തരാക്കിയത്. യാത്ര മുടങ്ങിയവർ നെടുമ്പാശേരി പോലീസ് സ്റ്റേഷനിൽ എത്തി വിമാന കമ്പനിക്കെതിരേ പരാതി നൽകി. ഇന്നലെ രാവിലെ 10.30ന് പോകേണ്ട വിമാനം 12നാണ് കൊച്ചിയിൽനിന്നു ദുബായിലേക്കു പറന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.