ഇരിട്ടി ബസ് സ്റ്റാൻഡിൽ മോട്ടോർ വാഹന വകുപ്പ് നടത്തിയ മിന്നൽ പരിശോധന.
ഇരിട്ടി: മോട്ടോർ വാഹന വകുപ്പ് നടത്തിയ മിന്നൽ പരിശോധനയിൽ നിയമലംഘനം നടത്തിയ 30 ബസുകൾക്കെതിരെ നടപടി. 60000 രൂപ പിഴ ഈടാക്കി. നികുതി അടയ്ക്കാതെ സർവീസ് നടത്തിയ അന്തർസംസ്ഥാന ബസുകൾ ഉൾപ്പെടെയുള്ള വാഹനങ്ങൾ പരിശോധനയിൽ പിടിയിലായി.
എയർഹോൺ ഉപയോഗം, സ്പീഡ് ഗവേണർ സംവിധാനം വിച്ഛേദിക്കൽ, ജിപിഎസ് സംവിധാനം പ്രവർത്തിക്കാത്തത് തുടങ്ങിയ നിയമലംഘനങ്ങളും കണ്ടെത്തി. കാലാവധി കഴിഞ്ഞ ഡ്രൈവിംഗ് ലൈസൻസ് ഉപയോഗിച്ചു പോന്ന ഡ്രൈവറെ കണ്ടെത്തിയും നടപടിയെടുത്തു.
ബസുകളുടെ അമിതവേഗം ഉൾപ്പെടെയുള്ള നിയമലംഘനങ്ങൾ സംബന്ധിച്ച് പൊതുജനങ്ങളിൽനിന്ന് പരാതികൾ ഉയർന്ന സാഹചര്യത്തിൽ ജില്ലാ കളക്ടറുടെ നിർദേശപ്രകാരമാണ് പരിശോധന നടത്തിയത്.
ഇരിട്ടി ജോയിന്റ് ആർടിഒ ഓഫിസ് പരിധിയിൽ പെടുന്ന ഇരിട്ടി ബസ് സ്റ്റാൻഡിലും പരിസരങ്ങളിലും മോട്ടോർ വെഹിക്കിൾ ഇൻസ്പെക്ടർ എം.പി. റിയാസ്, അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ കെ. ബൈജു എന്നിവരുടെ നേതൃത്വത്തിലായിരുന്നു പരിശോധന. വരും ദിവസങ്ങളിലും പരിശോധന തുടരും.