നെന്മാറ: ജില്ലയിൽ ലഹരിവസ്തുക്കളുടെ വില്പനയും ഉപയോഗവും തടയുന്നതിനായി പോലീസ് നടപ്പിലാക്കി വരുന്ന ‘ഓപ്പറേഷൻ തൂഫാൻ’ നടപടികളുടെ ഭാഗമായി നടത്തിയ വ്യാപക പരിശോധനയിൽ കഞ്ചാവും നിരോധിത പുകയില ഉത്പന്നങ്ങളുമായി നാലു പേർ പോലീസിന്റെ പിടിയിലായി.
നെന്മാറ സ്റ്റേഷൻ ഇൻസ്പെക്ടർ അനീഷിന്റെ നേതൃത്വത്തിൽ വെള്ളിയാഴ്ച കയറാടി പയ്യാങ്കോട് പ്രദേശത്ത് നടത്തിയ പരിശോധനയിലാണ് 54 ഗ്രാം കഞ്ചാവുമായി മൂന്ന് യുവാക്കളെ പോലീസ് അറസ്റ്റ് ചെയ്തത്. പിടിയിലായവർ തിരുപ്പൂർ വഞ്ചിപ്പാളയം സുഭാഷ് (18), കയറാടി പയ്യാങ്കോട് ഷിബു (25), കയറാടി പയ്യാങ്കോട് ആദർശ് (19) എന്നിവരാണ്. സ്കൂൾ വിദ്യാർഥികളെയും യുവാക്കളെയും ലക്ഷ്യമാക്കി ലഹരിവസ്തുക്കൾ വിതരണം ചെയ്ത് വരികയായിരുന്നു പ്രതികളെന്നാണ് പോലീസിന്റെ പ്രാഥമിക അന്വേഷണത്തിൽ കണ്ടെത്തിയത്.
വെള്ളിയാഴ്ച നെന്മാറ ബസ് സ്റ്റാൻഡിൽ നടത്തിയ മറ്റൊരു പരിശോധനയിൽ 27 പാക്കറ്റ് സർക്കാർ നിരോധിത പുകയില ഉത്പന്നങ്ങളുമായി നെന്മാറ പാപ്പാനി സ്വദേശി സതീഷ് (47) എന്നയാളെ പോലീസ് അറസ്റ്റ് ചെയ്തു.
പിടിച്ചെടുത്ത പുകയില ഉത്പന്നങ്ങൾ എവിടെ നിന്നാണ് എത്തിച്ചതെന്നും ഇവയുടെ വിതരണ ശൃംഖലയിൽ മറ്റ് ആളുകൾ ഉൾപ്പെട്ടിട്ടുണ്ടോയെന്നും പോലീസ് അന്വേഷണം നടത്തിവരികയാണ്.
Tags : Nattuvishesham Local News Operation Toofan Four youths arrested