അഞ്ജുനാഥ്
കാഠ്മണ്ഡു: എവറസ്റ്റിന്റെ ബേസ് ക്യാമ്പിലേക്കുള്ള സാഹസിക യാത്രയ്ക്കിടെ മലയാളി യുവാവിന് നേപ്പാളിൽ ദാരുണാന്ത്യം. കണ്ണൂർ തലശേരി എരഞ്ഞോളി സ്വദേശി അഞ്ജുനാഥ് കാവിങ്ങൽ വളപ്പിലാണ് മരിച്ചത്. വ്യാഴാഴ്ചയാണ് യുവാവിനെ മരിച്ച നിലയിൽ കണ്ടെത്തിയത്. ട്രാവൽ വിത്ത് അഞ്ജുനാഥ് എന്ന പേരിൽ സമൂഹമാധ്യമങ്ങളിൽ യാത്രാവിവരങ്ങൾ പങ്കുവെച്ചിരുന്ന അഞ്ജുനാഥ്, എവറസ്റ്റ് ബേസ് ക്യാമ്പിലേക്കുള്ള യാത്രയ്ക്കിടെയാണ് മരണപ്പെട്ടത്.
അന്നപൂർണ ബേസ് ക്യാമ്പിൽ നിന്നുള്ള ദൃശ്യങ്ങളും വിവിധ മലനിരകളുടെ മനോഹരമായ കാഴ്ചകളും അദ്ദേഹം പതിവായി സമൂഹമാധ്യമങ്ങളിലൂടെ പങ്കുവെച്ചിരുന്നു. എവറസ്റ്റ് ബേസ് ക്യാമ്പിലേക്കുള്ള യാത്രാമധ്യേ സമുദ്രനിരപ്പിൽനിന്ന് ഏകദേശം 5,164 മീറ്റർ ഉയരത്തിലുള്ള ഗൊരക്ഷേപ്പിലാണ് അഞ്ജുനാഥിനെ മരിച്ച നിലയിൽ കണ്ടെത്തിയത്.
എവറസ്റ്റ് ബേസ് ക്യാമ്പ് ട്രെക്കിങ്ങിലെ അവസാനത്തെ പ്രധാന താമസകേന്ദ്രങ്ങളിലൊന്നാണ് ഗൊരക്ഷേപ്. കഴിഞ്ഞ വർഷം അന്നപൂർണ ബേസ് ക്യാമ്പ് ട്രെക്കിംഗ് വിജയകരമായി പൂർത്തിയാക്കിയ ശേഷമാണ് അഞ്ജുനാഥ് എവറസ്റ്റ് ബേസ് ക്യാമ്പ് ലക്ഷ്യമാക്കി യാത്ര തിരിച്ചത്.
Tags : TragicDeath Nepal Trekking EverestBaseCamp Anjunath Kannur