21

തിരുവനന്തപുരം:തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയ്ക്കിടെ മരണപ്പെട്ട വയോധികയുടെ ബന്ധുക്കളെ തേടി പൊലിസ്. രോഗിയോടൊപ്പം കൂട്ടിരിപ്പുകാരാരും ഇല്ലാതിരുന്നതിനാല്‍ മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹത്തിന്റെ ബന്ധുക്കളെ കണ്ടെത്താന്‍ പൊതുജനങ്ങളുടെ സഹായം തേടുകയാണ്് പൂന്തുറ പൊലീസ്. 

ബീമാപള്ളി വാര്‍ഡ് ബദരിയ മദ്രസ മില്‍ക്ക് കോളനിയില്‍ താമസിച്ചിരുന്ന ശാന്തകുമാരിയുടെ (65) മൃതദേഹമാണ് ഏറ്റെടുക്കാനാളില്ലാതെ മോര്‍ച്ചറിയില്‍ സൂക്ഷിച്ചിരിക്കുന്നത്. പൊലിസ് നടത്തിയ പ്രാഥമിക അന്വേഷണങ്ങളിലും പരിശോധനകളിലും മറ്റ് സ്‌റ്റേഷനുകളിലേക്ക് ക്രൈം മെമ്മോ അയച്ചുള്ള അന്വേഷണങ്ങളിലും ബന്ധുക്കളെക്കുറിച്ച് യാതൊരു വിവരവും ലഭ്യമായിട്ടില്ല. സംഭവത്തില്‍ പൂന്തുറ പൊലിസ് സ്‌റ്റേഷനില്‍ കേസ് രജിസ്റ്റര്‍ ചെയ്ത് അന്വേഷണം പുരോഗമിക്കുകയാണ്.

സ്‌ട്രോക്ക് ഉണ്ടായതിനെ തുടര്‍ന്നാണ് ശാന്തകുമാരിയെ മെഡിക്കല്‍ കോളജില്‍ പ്രവേശിപ്പിച്ചിരുന്നതെന്നും വീടിന് പരിസരത്തും ബന്ധുക്കളാരെയും കണ്ടെത്താനായില്ലെന്നും പൊലിസ് അറിയിച്ചു. കഴിഞ്ഞ 15ന് ആണ് ഇവര്‍ മരിച്ചത്. തുടര്‍ന്ന് മൃതദേഹം മോര്‍ച്ചറിയില്‍ സൂക്ഷിച്ചിരിക്കുകയാണ്. മരിച്ച വ്യക്തിയുടെ ബന്ധുക്കളെക്കുറിച്ചോ അവരെക്കുറിച്ചുള്ള വിവരങ്ങളോ അറിയാവുന്നവര്‍ താഴെ പറയുന്ന നമ്പറുകളിലോ പൂന്തുറ പൊലീസ് സ്‌റ്റേഷനിലോ വിവരമറിയിക്കണമെന്ന് അധികൃതര്‍ അഭ്യര്‍ഥിച്ചു. പൂന്തുറ പോലീസ് സ്‌റ്റേഷന്‍: 9497902133, 9497987009, 7306221588.

Tags : Police relatives elderly woman died treatment mortuary Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash