ADVERTISEMENT

ADVERTISEMENT

പോലീസ് ഉദ്യോഗസ്ഥർക്ക് റെയിൻകോട്ട് വിതരണം ചെയ്തു

കൊല്ലം: പോലീസ് അസോസിയേഷൻ, പോലീസ് ഓഫീസേഴ്സ് അസോസിയേഷൻ സിറ്റി ജില്ലാ കമ്മിറ്റികളുടെ നേതൃത്വത്തിൽ ഡോ.രവി പിള്ള ഫൗണ്ടേഷനുമായി സഹകരിച്ച് സിറ്റിയിലെ പോലീസ് ഉദ്യോഗസ്ഥർക്ക് റെയിൻകോട്ടുകൾ വിതരണം ചെയ്തു.

കെഎസ്എഫ്ഇ ചെയർമാൻ കെ. വരദരാജൻ ഉദ്ഘാടനം ചെയ്ത യോഗത്തിൽ സിറ്റി പോലീസ് കമ്മീഷണർ കിരൺ നാരായണൻ മുഖ്യാതിഥിയായിരുന്നു. കെപിഎ ജില്ലാ പ്രസിഡന്‍റ് എൽ. വിജയൻ അധ്യക്ഷൻ വഹിച്ചു. യോഗത്തിൽ ആർപി ഗ്രൂപ്പ് പ്രതിനിധികളായ പിആർഒ ജി.സുനിൽകുമാർ, റാവിസ് മാനേജർ സാം കെ ഫിലിപ്പ്, ജനൽ മാനേജർ പ്രേം,

ഉപാസന ജിഎം രാജീവ് അഞ്ചൽ, റെനി തമ്പി, എം. എസ്.ശരത് ,അഡീഷൽ എസ്പി സക്കറിയ മാത്യു, സ്പെഷൽ ബ്രാഞ്ച് എസിപി എ.പ്രതീപ്കുമാർ, കൊല്ലം എസിപി എസ്. ഷെരീഫ്. പോലീസ് സൊസൈറ്റി സെക്രട്ടറി എസ്.ആർ. ഷിനോദാസ്,

കെപിഎ ജില്ലാ പ്രസിഡന്‍റ് എൽ.അനിൽകുമാർ, കെപിഒഎ സിറ്റി ജില്ലാ സെക്രട്ടറി ജിജു സി നായർ, കെപിഎഒ സിറ്റി ജില്ലാ സെക്രട്ടറി സി.വിമൽകുമാർ എന്നിവർ പ്രസംഗിച്ചു.

ADVERTISEMENT

തിരക്കുള്ള റോഡ് തടഞ്ഞു ഇലക്ട്രിസിറ്റി ബോർഡിന്‍റെ ട്രാൻസ് ഫോർമർ മാറ്റം

കൊല്ലം: വഴിയാത്രക്കാർക്കോ വാഹനങ്ങളിൽ പോകുന്നവർക്കോ യാതൊരു സുരക്ഷയും ഒരുക്കാതെ തിരക്കുള്ള റോഡ് തടഞ്ഞു ഇലക്ട്രിസിറ്റി ബോർഡിന്‍റെ ട്രാൻസ് ഫോർമർ മാറ്റം യാത്രക്കാരുടെയും വാഹനം ഓടിക്കുന്നവരുടെയും പ്രതിഷേധത്തിനിടയാക്കി. കൊല്ലം ശാരദ മഠത്തിനു സമീപമുള്ള ട്രാൻസ് ഫോർമറാണ് യാതൊരു സുരക്ഷാ സംവിധാനങ്ങളും ഒരുക്കാതെ ഇ ബി ഉദ്യോഗസ്ഥർമാറ്റിയത്.സ്കൂളുകളും കോളജുകളും വിട്ടു വിദ്യാർഥികൾ മടങ്ങുന്ന സമയത്താണ് സംഭവം. ശാരദ മഠത്തിൽ നിന്ന് പോളയത്തോട്, കടപ്പാക്കട, തിരിച്ച് ചിന്നക്കടയിലേക്കും വരേണ്ട വാഹനങ്ങൾ പോകുന്ന റോഡിൽ ജെ സി ബി റോഡിനു കുറുകെ നിർത്തി ഇലക്ട്രിസിറ്റി ജീവനക്കാർ തടയുകയായിരുന്നു. ഇരു വശങ്ങളിൽ നിന്നും എത്തിയ വാഹനങ്ങൾ ആകട്ടെ റോഡിൽ നിർത്തിയിരിക്കുന്ന ജെ സി ബി കണ്ടാണ് ബ്രേക്ക് ഇട്ടു വിവരം തിരക്കുന്നത്.യാതൊരു സുരക്ഷാ ക്രമീകരങ്ങളും ചെയ്യാതെയായിരുന്നു ട്രാൻസ് ഫോർമർ മാറ്റം. ഇത് മൂലം രണ്ടു മണിക്കൂറാണ് തിരക്കുള്ള ഈ റോഡിൽ ഗതാഗതം തടസപ്പെട്ടത്. ടു വീലർ യാത്രക്കാരും വിദ്യാർഥികളും ജെ സി ബിക്ക് അടിയിലൂടെയാണ് യാത്ര ചെയ്യേണ്ടി വന്നത്. യാതൊരു മുൻ കരുതൽ നടപടികൾ ഇല്ലാതെയും സുരക്ഷാ ബോർഡുകൾ സ്ഥാപിക്കാതെയുമുള്ള ഇ ബി ഉദ്യോഗസ്ഥരുടെ നടപടിയെ വാഹനങ്ങളിൽ എത്തിയവർ ചോദ്യം ചെയ്തത് വാക്ക് തർക്കത്തിനും ഇടയാക്കി.

വാഹനാപകടക്കേസില്‍ വ്യാജ തെളിവ് നല്‍കി അഭിഭാഷകയും ഗുമസ്തനുമുള്‍പ്പെടെ അഞ്ചുപേര്‍ക്കെതിരേ കേസ്; മൂന്ന് പേര്‍ അറസ്റ്റില്‍

കൊല്ലം: വാഹനാപകടക്കേസില്‍ പോലീസിനെ കബളിപ്പിച്ച് വ്യാജതെളിവ് നല്‍കിയ മൂന്ന് പേരെ കൊല്ലം ഈസ്റ്റ് പോലീസ് അറസ്റ്റ് ചെയ്തു. അഭിഭാഷകയും ഗുമസ്തനും ഉള്‍പ്പെടെ അഞ്ചുപേര്‍ക്കെതിരെയാണ് കേസ് രജിസ്റ്റര്‍ ചെയ്തിരിക്കുന്നത്. 2025 മെയ് 22-ന് ഉച്ചയ്ക്ക് കൊല്ലം കടപ്പാക്കട സ്പോര്‍ട്സ് ക്ലബിന് സമീപമുണ്ടായ വാഹനാപകടത്തിലാണ് കേസിനാസ്പദമായ സംഭവം. ഷെര്‍ന സഞ്ചരിച്ച വാഹനത്തില്‍ ഇടിച്ചത് മറ്റൊരു വാഹനമാണെന്ന് കാണിച്ച് ഇന്‍ഷുറന്‍സ് തുക തട്ടിയെടുക്കുന്നതിനായി ഇവര്‍ പോലീസിന് വ്യാജ പരാതി നല്‍കുകയായിരുന്നു. എന്നാല്‍, പോലീസ് നടത്തിയ വിശദമായ പരിശോധനയില്‍ ഇത് വ്യാജമാണെന്ന് കണ്ടെത്തുകയും, വ്യാജതെളിവ് നല്‍കിയ സംഘത്തിനെതിരെ കേസെടുക്കുകയുമായിരുന്നു. ഈ കേസുമായി ബന്ധപ്പെട്ട് പിടിയിലായ ഷെര്‍ന, അജിത്ത്, വിനോദ് എന്നിവരെ നോട്ടീസ് നല്‍കി വിട്ടയച്ചു. സംഭവത്തില്‍ കൂടുതല്‍ അന്വേഷണം നടന്നുവരികയാണെന്ന് പോലീസ് അറിയിച്ചു. .

വന മഹോത്സവം 2025 : തെന്മലയില്‍ വിപുലമായ പരിപാടികള്‍

തെന്മല : വനമഹോത്സവ ഭാഗമായി ഏഴുവരെ കേരള വനം വകുപ്പ് ശെന്തുരുണി വന്യജീവി സങ്കേതത്തിൽ വിവിധ പരിപാടികൾ സംഘടിപ്പിക്കുന്നു. ആഘോഷപരിപാടികളുടെ ഡിവിഷൻ തല ഉദ്ഘാടനം ശെന്തുരുണി വൈൽഡ് ലൈഫ് വാർഡൻ എസ് .ഹരിലാല്‍ ഹീരലാൽ വൃക്ഷതൈ നട്ട് നിര്‍വഹിച്ചു. പൊതുജനങ്ങളുടെയും ഇക്കോ ഡവലപ്മെന്‍റ് കമ്മിറ്റി അംഗങ്ങളുടെയും ഇക്കോ ടൂറിസം ജീവനക്കാരുടെയും വനം വകുപ്പ് ഉദ്യോഗസ്ഥരുടെയും സഹകരണത്തോടെയാണ് പരിപാടികൾ സംഘടിപ്പിച്ചിട്ടുള്ളത്. പ്രവര്‍ത്തനങ്ങളുടെ ഭാഗമായി തെന്മല ഡാം പത്തേക്കർ റോഡിലെ പ്ലാസ്റ്റിക് മാലിന്യങ്ങൾ നീക്കം ചെയ്ത ശേഷം റോഡിലെ കുഴികൾ മണ്ണിട്ട് നികത്തി ഗതാഗത യോഗ്യമാക്കി. വരും ദിവസങ്ങളിൽ വനത്തിനുള്ളിലും പരിസരങ്ങളിലും വൃക്ഷ തൈകൾ നടുകയും,വീത്തൂട്ട് എന്നപേരിൽ വിത്തുണ്ടകൾ നിക്ഷേപിക്കുകയും ചെയ്യും. വിദേശി സസ്യങ്ങളും കളകളും നിർമാർജനം ചെയ്യുകയും, ലഹരി ബോധവൽക്കരണ ക്ലാസ്, പരിസ്ഥിതി ബോധവൽക്കരണ ക്യാമ്പ്, ഇക്കോ ടൂറിസം സന്ദർശകർക്കായി സ്പോട്ട് ക്വിസ്, റീൽ മേക്കിങ് മത്സരം എന്നിവയും സംഘടിപ്പിച്ചിട്ടുണ്ട്. പരിപാടികളിൽ താല്പര്യമുള്ള സ്കൂൾ കോളജ് വിദ്യാർഥികൾക്കും പൊതുജനങ്ങൾക്കും പങ്കെടുക്കാവന്നതാണെന്നു അസിസ്റ്റന്‍റ് വൈല്‍ഡ് ലൈഫ് വാര്‍ഡന്‍ റ്റി. എസ്. സജു അറിയിച്ചു

യുവാവിന്‍റെ കൈകള്‍ അടിച്ചൊടിച്ച കേസ് സഹോദരന്മാര്‍ അറസ്റ്റില്‍

പുനലൂര്‍ : വീട്ടില്‍ അതിക്രമിച്ചുകയറി കമ്പിവടി കൊണ്ട് യുവാവിന്‍റെ കൈകള്‍ അടിച്ചൊടിച്ച കേസില്‍ സഹോദരന്മാര്‍ അറസ്റ്റില്‍. കരവാളൂര്‍ വെഞ്ചേമ്പ് രഞ്ജിത് ഭവനില്‍ രഞ്ജിത് (36), ശ്രീകുമാര്‍ (34) എന്നിവരാണ് അറസ്റ്റിലായത്. കരവാളൂര്‍ വെഞ്ചേമ്പ് മൂഴിയില്‍ പടിഞ്ഞാറ്റേതില്‍ വീട്ടില്‍ സേതു (32)വിനാണ് മര്‍ദനമേറ്റത്. ഇക്കഴിഞ്ഞ 16നായിരുന്നു സംഭവം. സാരമായി പരിക്കേറ്റ സേതു പുനലൂര്‍ താലൂക്ക് ആശുപത്രിയിലും തിരുവനന്തപുരം മെഡിക്കല്‍ കോളജ് ആശുപത്രിയിലും ചികിത്സയിലായിരുന്നു. പോലീസ് കേസെടുത്തെങ്കിലും പ്രതികളെ പിടികൂടാനായില്ല. ഇക്കഴിഞ്ഞ രാത്രി വെഞ്ചേമ്പില്‍ നിന്നാണ് ഇവരെ അറസ്റ്റുചെയ്തതെന്നും വഴിത്തര്‍ക്കത്തെത്തുടര്‍ന്നുള്ള മുന്‍വൈരാഗ്യമാണ് മര്‍ദനത്തിന് കാരണമെന്നും എസ്എച്ച്ഒ ടി .രാജേഷ്‌കുമാര്‍ പറഞ്ഞു.

ടൈപ്പിസ്റ്റിനോട് മോശം പെരുമാറ്റം: ജൂണിയർ സൂപ്രണ്ടിന് സ്ഥലംമാറ്റം

കൊല്ലം: ഫയർ ആൻഡ് റസ്ക്യൂ ജില്ലാ ഓഫീസിലെ ജൂണിയർ സൂപ്രണ്ട് എച്ച്. ഹരീഷിനെ പാലക്കാട് ജില്ലാ ഓഫീസിലേയ്ക്ക് സ്ഥലം മാറ്റി. മോശം പെരുമാറ്റം സംബന്ധിച്ച് ഓഫീസിലെ വനിതാ ടൈപ്പിസ്റ്റ് ഇദ്ദേഹത്തിനെതിരേ പരാതി നൽകിയിരുന്നു. ഇതിന്‍റെ അടിസ്ഥാനത്തിൽ ജില്ലാ ഓഫീസർ നൽകിയ റിപ്പോർട്ടിനെ തുടർന്നാണ് ഫയർ ഫോഴ്സ് ഡയറക്ടർ ജനറൽ സ്ഥലംമാറ്റ ഉത്തരവ് ഇറക്കിയത്. അന്തിമ റിപ്പോർട്ട് വരുമ്പോൾ ഇദ്ദേഹത്തിനെതിരേ വകുപ്പുതല അച്ചടക്ക നടപടി ഉണ്ടാകുമെന്നും സൂചനയുണ്ട്. പകരം പാലക്കാട് ജില്ലാ ഓഫീസിലെ ജൂണിയർ സൂപ്രണ്ട് പി.ജി.ബിമോദിനെ കൊല്ലത്തേയ്ക്ക് മാറ്റി നിയമിച്ചിട്ടുമുണ്ട്.

കത്തികാട്ടി ഭീഷണിപ്പെടുത്തി പണംതട്ടിയ കേസ്: രണ്ടുപേർ പിടിയിൽ

കൊട്ടിയം: അന്യ സംസ്ഥാന തൊഴിലാളികൾ വാടകയ്ക്ക് താമസിക്കുന്ന സ്ഥലത്ത് ഓട്ടോയിലെത്തി താമസക്കാരായ തൊഴിലാളികളുടെ കഴുത്തിൽ കത്തി വെച്ച് 20,000 രൂപയും അഞ്ച് മൊബൈൽ ഫോണുകളും തട്ടി എടുത്ത അഞ്ചംഗ സംഘത്തിലെ രണ്ടുപേരെ കൊട്ടിയം പോലീസ് അറസ്റ്റ് ചെയ്തു. ഉളിയക്കോവിൽ, ആറ്റൂർ ചിറ വീട്ടിൽ ഹരികൃഷ്ണൻ (35 ),സർവീസ് സ്റ്റേഷനിൽ ജോലിചെയ്യുന്ന കേരളപുരത്ത് വാടകയ്ക്ക് താമസിക്കുന്ന ചെന്നൈ, അരുമ്പാക്കം, എംഎംഡിഎ കോളനിയിൽ അഹമ്മദ് ഷാ എന്നിവരെയാണ് കൊട്ടിയം പോലീസ് അറസ്റ്റ് ചെയ്തത്. 28ന് രാത്രി 9. 30 ഓടുകൂടി കൊട്ടിയം പീടിക മുക്കിൽറഷീദിന്‍റെ ഉടമസ്ഥതയിൽ ഉള്ള കെട്ടിടത്തിലായിരുന്നു സംഭവം. അഞ്ച്അന്യസംസ്ഥാന തൊഴിലാളികൾ വാടകയ്ക്ക് താമസിക്കുന്ന വീട്ടിൽ ഓട്ടോയിലെത്തിയ അഞ്ചംഗ സംഘം കതകിനു മുട്ടുകയും തൊഴിലാളികളിൽ ഒരാൾ വന്ന് കതക് തുറന്നപ്പോൾ അകത്തു കയറിയ സംഘം അവിടെയുണ്ടായിരുന്ന ഇതര സംസ്ഥാന തൊഴിലാളികളുടെ കഴുത്തിൽ കത്തി വെച്ച് ഭീഷണിപ്പെടുത്തി പണവും മൊബൈൽഫോണും തരാൻ ആവശ്യപ്പെടുകയും അത് കൈക്കലാക്കി കടന്നു കളയുകയുമായിരുന്നു. സംഭവം നടന്നയുടൻ കൊട്ടിയം പോലീസിൽ ഇവർ പരാതി കൊടുക്കുകയും പ്രതികൾ സഞ്ചരിക്കുന്ന ഓട്ടോ കേന്ദ്രമാക്കിയും, നിരീക്ഷണ കാമറകൾ കേന്ദ്രീകരിച്ചും കൊട്ടിയം പോലീസ് നടത്തിയ അന്വേഷണത്തിൽ കേരളപുരം സ്വദേശിയിൽ നിന്നും വാടകക്കെടുത്ത ഓട്ടോയാണെന്ന് കണ്ടെത്തുകയും പ്രതികളെ തിരിച്ചറിയുകയുമായിരുന്നു. കേസിൽ മൂന്നു പേർ കൂടി പിടിയിലാകാനുണ്ടെന്ന് പോലീസ് പറഞ്ഞു . പിടിയിലായവരിൽഹരികൃഷ്ണന്‍റെ പേരിൽ വിവിധ സ്റ്റേഷനുകളിൽ മോഷണം, അക്രമം, അബ്കാരി കേസ് ഉൾപ്പെടെ പത്തോളം കേസുകൾ നിലവിലുള്ളതായി പോലീസ് പറഞ്ഞു. കൊട്ടിയം എസ് എച്ച് ഒ പ്രദീപ്കുമാറിന്‍റെ നിർദ്ദേശപ്രകാരം കൊട്ടിയം എസ് ഐ.നിധിൻ നളന്‍റെ നേതൃത്വത്തിൽ എസ് ഐ മാരായ അനിൽകുമാർ, ജോയ്, സിപി ഒ മാരായ ശംഭു , പ്രവീൺ ചന്ദ്,ചന്ദു, വിഷ്ണു എന്നിവരടങ്ങിയ സംഘമാണ് പ്രതികളെ പിടികൂടിയത്.

കൊല്ലം രൂപത കാത്തലിക് സ്കൂൾസ് സ്റ്റാഫ് അസോസിയേഷൻ മാർച്ചും ധർണയും നടത്തി

കൊല്ലം : ഡി ഇ ഒ യെ ഉടൻ നിയമിക്കുക, അധ്യാപക അനധ്യാപക നിയമനങ്ങൾ അംഗീകരിക്കുക എന്നീ ആവശ്യങ്ങൾ ഉന്നയിച്ചു കൊല്ലം രൂപത കാത്തലിക് സ്കൂൾസ് സ്റ്റാഫ് അസോസിയേഷന്‍റെ നേതൃത്വത്തിൽ കൊല്ലം കളക്‌ട്രേറ്റ് മാർച്ചും ധർണയും സംഘടിപ്പിച്ചു. വിദ്യാഭ്യാസ രംഗത്ത് നിസ്തുലമായ സംഭാവനകൾ നൽകിയ കൊല്ലം കോർപറേറ്റ് മാനേജ്മെന്‍റിലെ വിദ്യാലയങ്ങളിൽ വർഷങ്ങളായി അധ്യാപക അനധ്യാപക നിയമനങ്ങൾ അംഗീകരിച്ച് ലഭിക്കാത്ത സ്ഥിതിയാണ് . നിയമനങ്ങൾ അംഗീകരിച്ചു നൽകേണ്ട ജില്ലാ വിദ്യാഭ്യാസ ഓഫീസർ പോലും നിലവിലില്ലാത്ത സ്ഥിതിയാണ് കൊല്ലത്ത്. ഇനിയും പ്രശ്ന പരിഹാരമുണ്ടായില്ലെങ്കിൽ ശക്തമായ പ്രതിഷേധങ്ങളുമായി സംഘടന മുന്നോട്ട് പോകുമെന്ന് കൊല്ലം രൂപത വിദ്യാഭ്യാസ സെക്രട്ടറി ഫാ.ബിനു തോമസ് അധ്യക്ഷ പ്രസംഗത്തിൽ പറഞ്ഞു. സർക്കാരിന്‍റെ സാമ്പത്തിക ബാധ്യത ആണ് നിയമാനുസൃതമായുള്ള എയ്ഡഡ് സ്കൂൾ നിയമനങ്ങൾക്ക് അംഗീകാരം നൽകാത്തത്തിന്‍റെ കാരണമെന്നും, കടുത്ത സാമ്പത്തിക ബുദ്ധിമുട്ടുള്ള ഈ അധ്യാപകരും അനധ്യാപകരും ഇന്ന് ആത്മസംഘർഷത്തിലാണെന്നും ഉദ്ഘാടന പ്രസംഗത്തിൽ പി .സി .വിഷ്ണുനാഥ് എംഎൽഎ പറഞ്ഞു. ഈ വിഷയം കൂടുതൽ ശക്തമായി നിയമ സഭയിൽ ഉന്നയിക്കുമെന്നും പി. സി .വിഷ്ണുനാഥ്‌ എം എൽ എ പറഞ്ഞു. സി എസ് എസ് എ പ്രസിഡന്‍റ് ആർ.ബർണാഡ് , സെക്രട്ടറി സുമേഷ് ദാസ്, കിരൺ ക്രിസ്റ്റഫർ, ഷൈൻ കൊടുവിള, സിസ്റ്റർ റെയ, റെയ്നി റയമൺഡ്,ജയറാണി സെബാസ്റ്റ്യൻ, സുനിൽ ബെഞ്ചമിൻ, പ്രവീൺ, ഡേവിഡ് ജോൺ, ആഷ്‌ലി ,ഡലിൻ ഡേവിഡ്, രഞ്ചിത്ത് എന്നിവർ മാർച്ചിന് നേതൃത്വം നൽകി.

പുറ്റിംഗൽ വെടിക്കെട്ട് ദുരന്തക്കേസ്: സ്ഥിരം ജഡ്ജിയെ നിയമിച്ചു

കൊല്ലം :പരവൂർ പുറ്റിംഗൽ വെടിക്കെട്ട് ദുരന്ത കേസിന്‍റെ വിചാരണയ്ക്ക് അനുവദിച്ച പ്രത്യേക കോടതിയിൽ സ്‌ഥിരം ജഡ്‌ജിയെ നിയമിച്ചു. ഡോ.സി.എസ്.മോഹിതിനെയാണ് നിയമിച്ചത്. അദ്ദേഹം ഇന്നലെ ചുമതലയേറ്റു. ജില്ലാ അഡീഷണൽ സെഷൻസ് കോടതി ജഡ്‌ജിക്കു താൽക്കാലിക ചുമതല നൽകിയായിരുന്നു കേസ് നടപടികൾ ഇതുവരെ തുടർന്നു വന്നിരുന്നത്. കുറ്റപത്രം സംബന്ധിച്ച പ്രാഥമിക വാദം കേൾക്കുന്നതിനായി കേസ് നാളെ പരിഗണിക്കും. അന്ന് എല്ലാ പ്രതികളും ഹാജരാകണമെന്നും കോടതി നിർദേശിച്ചിട്ടുണ്ട്. വെടിക്കെട്ട് അപകടത്തെക്കുറിച്ച് അന്വേഷിച്ച് ക്രൈംബ്രാഞ്ച് സംഘം തയാറാക്കിയ കുറ്റപത്രത്തി അടിസ്‌ഥാനത്തിൽ പ്രതികൾക്ക് എതിരേ കോടതി വിവിധ വകുപ്പുകൾ ചുമത്തുന്നതുമായി ബന്ധപ്പെട്ടാണു പ്രാഥമിക വാദം കേൾക്കുന്നത്. പ്രതികൾ വിടുതൽ ഹർജി ( ഡിസ്ചാർജ് പെറ്റീഷൻ ) സമർപ്പിക്കുകയാണെങ്കിൽ അതുകൂടി പരിഗണിച്ചായിരിക്കും പ്രാഥമിക വാദം തുടങ്ങുന്നത്. കേസിൽ ജാമ്യം നേടിയ ശേഷം ഒളിവിൽ പോയതിനെ തുടർന്നു പിടികിട്ടാപ്പുള്ളിയായി പ്രഖ്യാപിച്ച 30ാം പ്രതി അടൂർ ഏറത്ത് രാജ് ഭവനിൽ അനുരാജിന്‍റെ (അനു) ജാമ്യക്കാരനിൽ നിന്ന് പിഴ ഈടാക്കുന്നത് സംബന്ധിച്ച കേസ് ഇന്നു വീണ്ടും പരിഗണിക്കും. രണ്ട് ജാമ്യക്കാരിൽ ഒരാൾ പിഴ തുക അടയ്ക്കുകയുണ്ടായി. വ്യക്കരോഗത്തിനു ചികിത്സയിൽ ആയതിനാൽ പിഴ ഒഴിവാക്കണമെന്നുകാണിച്ചു ഒന്നാം ജാമ്യക്കാരൻ കോടതിയിൽ അപേക്ഷ നൽകിയിട്ടുണ്ട്. വെടിക്കെട്ട് അപകടക്കേസിൽ 59 പ്രതികൾ ആണ് ഉണ്ടായിരുന്നത്. ഇവരിൽ 14 പേർ ജീവിച്ചിരിപ്പില്ല. അവശേഷിക്കുന്നവരിൽ പിടികിട്ടാപ്പുള്ളി ഒഴികെ 44 പ്രതികൾക്കെതിരെ ആണു വിചാരണ നടപടികൾ ആരംഭിക്കാൻ പോകുന്നത്. 2016 ഏപ്രിൽ 10നു പുലർച്ചെ രണ്ടിനായായിരുന്നു വെടിക്കെട്ട് അപകടം നടന്നത്. 110 പേർ മരിക്കുകയും 656 പേർക്ക് പരിക്കേൽക്കുകയും ചെയ്തു എന്നാണ് ഔദ്യോഗിക കണക്ക്. കൊല്ലം കളക്ടറേറ്റിന് സമീപത്തെ ടി.എം. വർഗീസ് സ്മാരക ഹാളിന് വടക്കുവശത്താണ് പ്രത്യേക കോടതി പ്രവർത്തിക്കുന്നത്. ഇനി മുതൽ എല്ലാ ശനിയാഴ്ചകളിലും കേസ് പരിഗണിച്ചേക്കും എന്നാണ് വിവരം. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ കെ.പി.ജബ്ബാർ, അഡ്വ. അമ്പിളി ജബ്ബാർ എന്നിവർ കോടതിയിൽ ഹാജരായി.

പ്രഫഷണൽ കോൺഗ്രസ് കാമ്പയിൻ

കൊല്ലം: ഓൾ ഇന്ത്യ പ്രഫഷണൽ കോൺഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ ഫോർ അന്ന ഫോർ ഓൾ കാമ്പയി െ ന്‍റ ജില്ലാതല പൊതുസമ്പർക്ക പരിപാടിയും ഒപ്പ് ശേഖരണവും തേവള്ളി എ. എ. റഹീംസ് ജലദർശിനിയിൽ സംഘടിപ്പിച്ചു. ജോലിസ്ഥലത്തെ അമിത സമ്മർദംമൂലം അന്ന സെബാസ്റ്റ്യൻ എന്ന യുവ ചാർട്ടേർഡ് അക്കൗണ്ടന്‍റ് മരണത്തിനു കീഴടങ്ങിയ സാഹചര്യത്തിലാണ് കാമ്പയിൻ സംഘടിപ്പിച്ചത്. ഓൾ ഇന്ത്യ പ്രഫഷണൽ കോൺഗ്രസ് ജില്ലാ പ്രസിഡന്‍റ് ഡോ.ആമീൻ ആസാദ് അധ്യക്ഷത വഹിച്ചു, കൊല്ലം ഡിസിസി പ്രസിഡന്‍റ് പി. രാജേന്ദ്രപ്രസാദ് ഉദ്ഘാടനം ചെയ്തു. എഐപിസി സ്റ്റേറ്റ് പ്രസിഡന്‍റ് രഞ്ജിത് ബാലൻ, സ്റ്റേറ്റ് വൈസ് പ്രസിഡന്‍റ് ആനന്ദ് മോഹൻ രാജൻ, ഡോ.അലക്സാണ്ടർ ജേക്കബ്,ശാസ്ത്രവേദി പ്രസിഡന്‍റ് അച്യുത ശങ്കർ, അഡ്വ.ദിവ്യ ശ്രീനിവാസൻ.എസ്. നായർ, ഫർഹാൻ യാസീൻ, ഡോ. ഗൗരി മോഹൻ, ഫസലു റഹ്മാൻ, ബി. ശ്രീകുമാർ,ദീപ ഈശ്വർ, എസ്. പ്രവീൺ, ഡോ.ഹൈഫ മുഹമ്മദ് അലി, ഡോ. അശ്വതി ആനന്ദ് തുടങ്ങിയവർ പ്രസംഗിച്ചു.

മൈലം റോയൽ വൈസ് മെൻസ് ക്ലബ്

കൊട്ടാരക്കര : മൈലം കേന്ദ്രമായി പ്രവർത്തനമാരംഭിച്ച റോയൽ വൈസ് മെൻസ് ക്ലബ് ആലപ്പുഴ ജില്ലാ കളക്ടർഅലക്സ് വർഗീസ് ഉദ്ഘാടനം ചെയ്തു. കൊട്ടാരക്കര വൈസ് മെൻസ് ക്ലബ് പ്രസിഡൻന്‍റ് മാത്യു വർഗീസ് അധ്യക്ഷത വഹിച്ചു. ലെഫ്റ്റനന്‍റ് റീജണൽ ഡയറക്ടർ പ്രഫ. ജി. ജേക്കബ്, മുൻ ലെഫ്റ്റനന്‍റ് റീജണൽ ഡയറക്ടർ ജേക്കബ് മാത്യു കുരാക്കാരൻ എന്നിവർ സ്ഥാനാരോഹണ ചടങ്ങുകൾക്ക് നേതൃത്വം നൽകി. ചാരിറ്റി പ്രവർത്തനങ്ങളുടെ ഉദ്ഘാടനം ഡിസ്ട്രിക്ട് ഗവർണർ അഡ്വ. തുളസീധരൻ പിള്ള നിർവഹിച്ചു. റവ.ജോസ്.ടി.ഏബ്രഹാം, റവ.സ്കറിയ തോമസ്, എസ്.ഉദയകുമാർ, പ്രഫ. പി. കെ.വർഗീസ്, സജി വർഗീസ്, എം.ആർ.അജി, സൂസൻ ഫിലിപ്പ് എന്നിവർ പ്രസംഗിച്ചു. ഭാരവാഹികൾ: റവ.ഡോ.പി.ജെ.മാമച്ചൻ( പ്രസിഡന്‍റ്), ജോർജ് ജോൺ(സെക്രട്ടറി), പി.സി.രാജു(ട്രഷറർ).

പ്ലാസ്റ്റിക് മുക്ത പരിസരം,രോഗരഹിത സമൂഹം പദ്ധതിക്ക് തുടക്കം കുറിച്ച് ഗവ.ടിടിഐ

കൊല്ലം: അന്താരാഷ്‌ട്ര പ്ലാസ്റ്റിക് ബാഗ് രഹിത ദിനത്തിൽ പേപ്പർ ബാഗ് വിതരണം ചെയ്ത് വിദ്യാർഥികൾ. 'പ്ലാസ്റ്റിക് മുക്തപരിസരം, രോഗരഹിത സമൂഹം' എന്ന ഒരു വർഷം നീണ്ടു നിൽക്കുന്ന പരിപാടിയിൽ പ്ലാസ്റ്റിക് ബാഗ് വിരുദ്ധ സന്ദേശം നൽകുന്നതിനായി ഗവ.ടി ടി ഐയിലെ വിദ്യാർഥികൾ സ്വയം നിർമിച്ച പേപ്പർ ബാഗുകളും പ്ലാസ്റ്റിക്കിന്‍റെ ദൂഷ്യതയെ ഉദ്ബോധിപ്പിക്കുന്ന പ്ലക്കാഡുകളുമേന്തിയാണ് സ്കൂളിന്‍റെ പരിസര പ്രദേശങ്ങളിലെ വീടുകളിലും, കടകളിലും എത്തിയത്. ബാഗ് വിതരണ ഉദ്ഘാടനം സമീപവാസി ജോസ് സാമുവൽ ജോസഫിന് നൽകി പ്രിൻസിൽ ഇ.ടി.സജി നിർവഹിച്ചു. ഈ കാലഘട്ടത്തിന്‍റെ അനിവാര്യതയാണ് പ്ലാസ്റ്റിക് രഹിത സമൂഹവും പരിസ്ഥിതിയുമെന്ന് ദിന സന്ദേശം നൽകി കൊണ്ട് പ്രിൻസിപ്പൾ പറഞ്ഞു. പരിപാടിക്ക് അധ്യാപകരായ പി.കെ.ഷാജി, ജി.ലെനൊ, ഇ.എം.അൻസർ,എൻ. പ്രസീദ, രജിൻ ചന്ദ്രൻ എന്നിവർ നേതൃത്വം നൽകി.

പ്രഥമാധ്യാപികയെ ആദരിച്ചു

പാരിപ്പള്ളി: കല്ലുവാതുക്കൽ ഗവ.ഹൈസ്കൂളിലെ പ്രഥമാധ്യാപിക ജെസി വർഗീസിനെ അമ്മ ചാരിറ്റബിൾ ട്രസ്റ്റ് ആദരിച്ചു. കഴിഞ്ഞ അധ്യായന വർഷങ്ങളിൽ കുട്ടികളുടെ പ്രവേശനം ഏറെ കുറവായിരുന്ന സ്കൂളിൽ ജെസി വർഗീസ് പ്രഥമാധ്യാപികയായി എത്തിയതോടെ കൂടുതൽ കുട്ടികൾ പ്രവേശനം നേടുകയായിരുന്നു. ജെസിവർഗീസി ന്‍റെ നേതൃത്വത്തിൽ നടന്ന പ്രവർത്തനങ്ങളുടെ ഫലമായി ഈ വർഷം 51 കുട്ടികളാണ് പുതുതായി പ്രവേശനം നേടിയത്. അമ്മ ചാരിറ്റബിൾ ട്രസ്റ്റ് ഉൾപ്പെടെയുള്ളവരുടെ സഹായത്താൽ കുട്ടികൾക്കായി ബസ് സൗകര്യവും ഏർപ്പെടുത്തിയിട്ടുണ്ട്. ഇ - സ്മാർട്ട് ബോർഡുകൾ ഉൾപ്പെടെ ഹൈടെക് സംവിധാനങ്ങളും സ്കൂളിൽ ഒരുക്കി. സ്കൂളിൽ നടന്ന ചടങ്ങിൽ അമ്മ ചാരിറ്റബിൾ ട്രസ്റ്റ് ചെയർമാനും പൂർവ വിദ്യാർഥിയുമായ വി.എസ്.സന്തോഷ്കുമാർ പൊന്നാടയണിയിച്ച് പ്രഥമാധ്യാപിക ജെസി വർഗീസിനെ ആദരിച്ചു. ‌‌ പഞ്ചായത്തംഗം അജയകുമാർ സ്റ്റാഫ് സെക്രട്ടറി ആർ. ബി. ഷിബി, സീനിയർ അസിസ്റ്റന്‍റ് ആർ.ബിന്ദു, എസ്. സുഷന്ത, ഡി.എം.സുനി തുടങ്ങിയവർ പ്രസംഗിച്ചു.

കൊല്ലത്ത് 1.92 ലക്ഷം കുടുംബങ്ങള്‍ തൊഴിലുറപ്പ് പദ്ധതിയില്‍; സംസ്ഥാനത്ത് നാലാമത്

കൊല്ലം: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലൂടെ ഈ സാമ്പത്തികവര്‍ഷം ജില്ലയില്‍ സൃഷ്ടിച്ചത് 24.59 ലക്ഷം തൊഴില്‍ദിനങ്ങള്‍ . 1.92 ലക്ഷം കുടുംബങ്ങള്‍ സജീവമായി തൊഴിലുറപ്പ് പദ്ധതിയില്‍ ജോലി ചെയ്തു വരികയാണ്. അവശ്യമേഖലകളിലെ ജോലികള്‍ യഥാസമയം നിര്‍വഹിക്കുന്നതിന് സഹായകമായ പ്രവര്‍ത്തനത്തിലൂടെ തൊഴില്‍ദിന മുന്നേറ്റത്തില്‍ സംസ്ഥാനത്ത് നാലാമതാണ് കൊല്ലം. 385.15 കോടി രൂപ ചെലവഴിച്ച് 96.41 ലക്ഷം തൊഴില്‍ ദിനങ്ങള്‍ പൂര്‍ത്തീകരിച്ചാണ് ഈ നേട്ടം കൊല്ലം സ്വന്തമാക്കിയത്. 323.86 കോടി രൂപ കൂലി ഇനത്തിലും, 46.58 കോടി രൂപ മെറ്റീരിയല്‍ ഇനത്തിലും ചെലവഴിച്ചു. 136743 കുടുംബങ്ങള്‍ക്ക് തൊഴില്‍ നല്‍കിയതില്‍ 67281 കുടുംബങ്ങള്‍ 100 ദിനം പൂർത്തിയാക്കി. ജില്ലയിലെ 25860 പട്ടികജാതി കുടുംബങ്ങള്‍ക്കും 1145 പട്ടിക വർഗ കുടുംബങ്ങള്‍ക്കും തൊഴിലുറപ്പ് പദ്ധതിയിൽ തൊഴില്‍ നൽകാനായി. 19.18 ലക്ഷം തൊഴില്‍ദിനങ്ങള്‍ പട്ടികജാതി കുടുംബങ്ങള്‍ക്കും 1.43 ലക്ഷം തൊഴില്‍ദിനങ്ങള്‍ പട്ടിക വർഗ കുടുംബങ്ങള്‍ക്കും ലഭിച്ചു. 13279 പട്ടികജാതി കുടുംബങ്ങളും 723 പട്ടികവര്‍ഗ കുടുംബങ്ങളും 100 തൊഴില്‍ദിനങ്ങള്‍ പൂര്‍ത്തീകരിച്ചു. 46.58 കോടി മെറ്റീരിയല്‍ ഇനത്തില്‍ ചിലവഴിച്ച് 417 കോണ്‍ക്രീറ്റ് റോഡുകള്‍, 41 കാര്‍ഷിക കുളങ്ങള്‍, 237 കന്നുകാലിതൊഴുത്തുകള്‍, 148 ആട്ടിന്‍കൂടുകള്‍, 140 കോഴിക്കൂടുകള്‍, 47 ജലസേചന കിണറുകള്‍, ആറ് എസ് എച്ച് ജി വര്‍ക്ക്‌ഷെഡുകള്‍, 11 അങ്കണവാടി കെട്ടിടങ്ങള്‍ എന്നിവയുടെ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനുള്ള പ്രവൃത്തികള്‍ പൂര്‍ത്തിയാക്കി. ശുചിത്വമേഖലയുടെ വികസന ഭാഗമായി 986 സോക്ക് പിറ്റുകള്‍, 152 കമ്പോസ്റ്റ് പിറ്റുകള്‍, 37 അസോള ടാങ്കുകള്‍ എന്നിവ നിർമിച്ചു. ആസ്തി നിര്‍മാണപ്രവര്‍ത്തനത്തിനും, നീര്‍ത്തടാടിസ്ഥാനത്തില്‍ മണ്ണ് - ജല സംരക്ഷണത്തിനും ഊന്നല്‍ നല്‍കിയുള്ളതായിരുന്നു പ്രവര്‍ത്തനങ്ങള്‍. കാര്‍ഷിക മേഖലയെ അഭിവൃദ്ധിപ്പെടുത്തുന്നതിനും ഗ്രാമീണ മേഖലയില്‍ സാമ്പത്തിക ഭദ്രത ഉറപ്പുവരുത്തുന്നതിനും സാധിച്ചു. 2025-26 സാമ്പത്തിക വര്‍ഷം ജില്ലയില്‍ ഒരുകോടി ഒരുലക്ഷത്തി നാല്പത്തി ആറായിരം തൊഴില്‍ദിനങ്ങള്‍ ആവശ്യപ്പെട്ടു. ഇതിനായി ഗ്രാമപഞ്ചായത്തുകള്‍ അംഗീകരിച്ച് തയാറാക്കിയ ലേബര്‍ ബജറ്റും ആക്ഷന്‍ പ്ലാനും ജില്ലാ പഞ്ചായത്തിന്‍റെ അംഗീകാരത്തോടെ സംസ്ഥാന മിഷന് നൽകിയിരുന്നു. കേന്ദ്ര ഗ്രാമവികസന മന്ത്രാലയത്തിന്റെ അംഗീകാരം 52.85 ലക്ഷം തൊഴില്‍ദിനങ്ങള്‍ക്ക് മാത്രമാണ് കിട്ടിയത്. എന്ന് ദേശീയ ഗ്രാമീണ തൊഴിലുറപ്പ് പദ്ധതി ജോയിന്‍റ് ഡയറക്ടര്‍ ആര്‍.എസ്. അനു പറഞ്ഞു.

വന്യജീവി ഭീഷണി; നടപടികള്‍ കൂടുതല്‍ കാര്യക്ഷമമാക്കുമെന്ന് കളക്ടര്‍

കൊല്ലം : വന്യജീവി ഭീഷണിയും അനുബന്ധ സംഘര്‍ഷവും നിയന്ത്രിക്കാന്‍ ബന്ധപ്പെട്ടവകുപ്പുകളുടെ ഏകോപനത്തോടെ കൂടുതല്‍ ഉര്‍ജിതമായ നടപടികള്‍ സ്വീകരിക്കാന്‍ തീരുമാനം. മനുഷ്യ-വന്യജീവിസംഘര്‍ഷ ലഘൂകരണ - നിയന്ത്രണ സമിതിയുടെ ജില്ലാതലയോഗത്തിലാണ് തീരുമാനം. ജില്ലാ കളക്ടർ എന്‍. ദേവീദാസ് അധ്യക്ഷത വഹിച്ചു. വന്യജീവി ഭീഷണി നേരിടാൻ ബോധവത്കരണം നടത്താനും പ്രാദേശിക ജാഗ്രതസമിതികള്‍ പുന:സംഘടിപ്പിക്കാനും കളക്ടർ നിര്‍ദേശം നല്‍കി. അതിവേഗപ്രതികരണ സംഘങ്ങള്‍ സജ്ജമാക്കാനും, ജനങ്ങൾക്ക് ബന്ധപ്പെടാനുള്ള കേന്ദ്രങ്ങൾ, പ്രാദേശികമായി ഭീഷണികൂടുതലുള്ള ഇടങ്ങള്‍ തുടങ്ങിയവ കണ്ടെത്തി അറിയിക്കാൻ തദേശസ്വയംഭരണസ്ഥാപന അധ്യക്ഷന്മാരെ ചുമതലപ്പെടുത്തി. തദേശവാസികളില്‍ സന്നദ്ധരായവരെ ഉള്‍പ്പെടുത്തി പഞ്ചായത്തുകള്‍ പ്രാഥമിക പ്രതിരോധസേന സജ്ജമാക്കും. ജില്ലയില്‍ 22 സംഘങ്ങള്‍ ഇത്തരത്തിൽ രൂപീകരിച്ചു. വനാതിര്‍ത്തികളില്‍ അനധികൃത വിനോദസഞ്ചാര കേന്ദ്രങ്ങള്‍ പ്രവര്‍ത്തിക്കാന്‍ അനുവദിക്കില്ല. മൃഗങ്ങളെ ആകര്‍ഷിക്കുന്ന പൈനാപ്പിള്‍, കശുവണ്ടി, പ്ലാവ്, മാവ്, വാഴ എന്നിവയുടെ കൃഷി വനാതിര്‍ത്തികളില്‍ ഒഴിവാക്കണം. കൃഷി നാശനഷ്ടങ്ങള്‍ക്ക് സമയബന്ധിതമായി നഷ്ടപരിഹാരം നല്‍കുന്നുണ്ട്. കഴിഞ്ഞ അഞ്ചു വര്‍ഷങ്ങളില്‍ കൃഷിനാശം, അപകടമരണം, പരിക്ക് എന്നിവക്കായി 3.65 കോടി രൂപ വിതരണം ചെയ്തിട്ടുണ്ട്. വനത്തിനുള്ളില്‍ വന്യ മൃഗങ്ങൾക്ക് ഭക്ഷണ - ജലലഭ്യത ഉറപ്പാക്കാന്‍ 2024-25 സാമ്പത്തിക വര്‍ഷം വനം വകുപ്പ് ജില്ലയിലെ വനമേഖലയില്‍ 66 കുളങ്ങളും, 50 ബ്രഷ് വുഡ് തടയണകളും നിർമിച്ചിട്ടുണ്ട്‌. വന്യമൃഗങ്ങള്‍ ഇറങ്ങുന്നത് തടയാന്‍ 2.5 കിലോമീറ്റര്‍ ആന കിടങ്ങുകളും, 52.62 കിലോമീറ്റര്‍ സൗരോര്‍ജ വേലികളും നിലവിലുണ്ട്. ഇവ കൂടാതെ നബാര്‍ഡിന്‍റെ ധനസഹായത്തോടെ 17 കിലോമീറ്റര്‍ സോളാര്‍ ഫെന്‍സിംഗ്, 31.2 കിലോമീറ്റര്‍ തൂക്കുവേലി, 9.5 കിലോമീറ്റര്‍ ആന കിടങ്ങുകളുടെ നിര്‍മാണവും പുരോഗമിക്കുന്നുവെന്ന് സമിതി കണ്‍വീനർ അനില്‍ ആന്‍റണി വ്യക്തമാക്കി. കാട്ടുപന്നികളുടെ ആക്രമണം രൂക്ഷമായ സ്ഥലങ്ങളിൽ ആവശ്യമെങ്കില്‍ ഷൂട്ടര്‍മാരെ നിയോഗിച്ച് പരിഹരിക്കും. പാമ്പുകടി അപകടങ്ങള്‍ ഒഴിവാക്കാന്‍ 'സര്‍പ്പ' പദ്ധതി രൂപീകരിച്ച് 20 പേര്‍ക്ക് പരിശീലനം നല്‍കി. പ്രഥമ ശുശ്രൂഷ നല്‍കുന്നതുമായി ബന്ധപ്പെട്ട് പൊതുജനങ്ങള്‍ക്കും ആരോഗ്യ പ്രവര്‍ത്തകര്‍ക്കും ബോധവത്കരണ പരിപാടികള്‍ നടത്താന്‍ ആരോഗ്യ വകുപ്പിന് നിര്‍ദേശവും നല്‍കിയിട്ടുണ്ട്. വനമേഖലയിലെ അനധികൃത മദ്യനിര്‍മാണം തടയാന്‍ എക്‌സൈസ് വകുപ്പ് നടപടി സ്വീകരികാണാമെന്നും യോഗം ആവശ്യപ്പെട്ടു. വന്യജീവികള്‍ ഇറങ്ങുന്ന ആദിവാസിമേഖലയില്‍ ആരോഗ്യ പരിരക്ഷയും പാര്‍പ്പിടവും കൂടുതല്‍ മെച്ചപ്പെടുത്തണം. സംഘര്‍ഷ സാധ്യതാമേഖലകളില്‍ മാലിന്യസംസ്‌ക്കരണം ഉറപ്പാക്കണം. കാടുമൂടികിടക്കുന്ന സ്വകാര്യ എസ്റ്റേറ്റുകള്‍, ഉപേക്ഷിക്കപ്പെട്ട സ്വകാര്യ ഭൂമികള്‍ എന്നിവ വൃത്തിയാക്കാന്‍ ഉടമസ്ഥര്‍ക്ക് നിര്‍ദ്ദേശം നല്‍കണം. വന ഭൂമി നിരീക്ഷിക്കാന്‍ ഡ്രോണുകള്‍ പ്രയോജനപ്പെടുത്താമെന്നും ജില്ലാ കളക്ടര്‍ യോഗത്തിൽ പറഞ്ഞു. എ ഡി എം.ജി. നിര്‍മല്‍ കുമാര്‍, പുനലൂര്‍ ഡിഎഫ് ഒ വൈ. എം. ഷാജികുമാര്‍, അച്ചന്‍കോവില്‍ ഡി എഫ്ഒ എസ്. അനീഷ്, മൃഗസംരക്ഷണം, ടൂറിസം, എക്‌സൈസ്, കൃഷി, റവന്യൂ വകുപ്പുകളിലെ ഉദ്യോഗസ്ഥര്‍ തുടങ്ങിയവർ പങ്കെടുത്തു.

കൊല്ലം മേയർ അഴിമതിയിൽ ഒന്നാമതാകാൻ മത്സരിക്കുന്നു: അഡ്വ.വി.വി. രാജേഷ്

കൊല്ലം: കഴിഞ്ഞ നാല് വർഷം കോർപറേഷൻ ഭരിച്ച സിപിഎം മേയറുടെ അഴിമതിയെ തോൽപ്പിക്കാനാണ് നിലവിലെ സിപിഐ മേയർ പരിശ്രമിക്കുന്നതെന്ന് ബിജെപി തിരുവനന്തപുരം മുൻ ജില്ലാ അധ്യക്ഷൻ അഡ്വ.വി.വി. രാജേഷ്. കോർപ്പറേഷനെ മാലിന്യ കൂമ്പാരമാക്കി ജനങ്ങളെ ബുദ്ധിമുട്ടിക്കുന്ന മേയറുടെ അനാസ്ഥക്കെതിരേ 'നഗരമാലിന്യം മേയർക്ക്' എന്ന മുദ്രാവാക്യമുയർത്തി ബിജെപി കോർപറേഷൻ കമ്മറ്റിയുടെ നേതൃത്വത്തിൽ കോർപറേഷൻ ഓഫീസിലേക്ക് നടത്തിയ മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്‍റ് എസ്. പ്രശാന്ത് അധ്യക്ഷത വഹിച്ചു. പ്രതീകാന്മകമായി തലയിൽ ഏറ്റി പ്രകടനമായി കൊണ്ടുവന്ന മാലിന്യം മേയർക്ക് നൽകിയേ പോകൂ എന്ന തീരുമാനത്തിൽ കോർപ്പറേഷനിലെ ബിജെപി കൗൺസിലർമാരും പ്രവർത്തകരും ഉറച്ചുനിന്നു. തുടർന്ന് പ്രവർത്തകരെ പോലീസ് അറസ്റ്റ് ചെയ്തു. ജില്ലാ ജനറൽ സെക്രട്ടിമാരായ വി. എസ്. ജിതിൻ ദേവ് , പ്രകാശ് പാപ്പാടി, ഇടവട്ടം വിനോദ്, സംസ്ഥാന കമ്മറ്റി അംഗം എ. ജി. ശ്രീകുമാർ എന്നിവർ പ്രസംഗിച്ചു. കൗൺസിലർമാരായ പാർലമെന്‍റ് പാർട്ടി ലീഡർ റ്റി. എ. ഗിരീഷ്,അനീഷ്, അഭിലാഷ്,ശൈലജ, സജിതാനന്ദ ടീച്ചർ, കൃപാവിനോദ് ജില്ലാ വൈസ് പ്രസിഡ ന്‍റ ുമാരായ ശൈലേന്ദ്ര ബാബു, വെറ്റ മുക്ക് സോമൻ, ശശികലാറാവു, ബൈജു കൂനമ്പായിക്കുളം, സെക്രട്ടറിമാരായ ഹരിഷ് തെക്കടം അഡ്വ. വേണുഗോപാൽ, സാം രാജ്, ശ്രീലാൽ അഞ്ജനാ സുരേഷ് സുഗന്ധി, ട്രഷറർ രാജൻ പിള്ള, യുവമോർച്ച ജില്ല പ്രസിഡന്‍റ് പ്രണവ് താമരക്കുളം മണ്ഡലം പ്രസിഡ ന്‍റ ുമാരായ സുരാജ് ഷൈൻ, സജു, നിഷ പദ്മകുമാർ എന്നിവർ നേത്യത്വം നൽകി.

ഗവർണർ മാതാഅമൃതാനന്ദമയിയെ സന്ദർശിച്ചു

അമൃതപുരി (കൊല്ലം): കേരള ഗവർണർ രാജേന്ദ്ര ആർലേക്കർ മാതാഅമൃതാനന്ദമയി യുമായി കൂടിക്കാഴ്ച നടത്തി. ഗവർണറെയും പത്നിയെയും സ്വാമി പ്രണവാമൃതാനന്ദ പുരിയുടെ നേതൃത്വത്തിൽ പൊന്നാടയണിയിച്ച് സ്വീകരിച്ചു. സാധാരണ ജനങ്ങൾക്കും സമൂഹത്തിനും വേണ്ടിയാണ് മാതാഅമൃതാനന്ദമയിയുടെ പ്രവർത്തനങ്ങളെന്ന് ഗവർണർ രാജേന്ദ്ര വിശ്വനാഥ് അർലേകർ പറഞ്ഞു. മാതാഅമൃതാനന്ദമയിയുടെ ഒരോ പ്രവർത്തനങ്ങളും സാധാരണക്കാരുടെ ഉന്നമനം ലക്ഷ്യമാക്കിയാണ്. അധ്യാത്മികതയും സേവനവും ഒരുപോലെയാണ് അവർ കാണുന്നത്. ആ നിസ്വാർഥ സേവനം വലിയ പുണ്യമാണ്. ദൈവത്തിന്‍റെ പ്രതിരൂപമായിട്ടാണ് ഇവരെ കാണുന്നതെന്നും കൂടിക്കാഴ്ചയിലൂടെ വലിയ പരിവർത്തനമാണ് മനസിലുണ്ടായതെന്നും ഗവർണറുടെ ഭാര്യ അനഘ ആർലേക്കർ പറഞ്ഞു. രണ്ടുമണിക്കൂറോളം സംവദിച്ച ഗവർണർ ആശ്രമവും പരിസരവും സന്ദർശിച്ചു.

വെടിക്കുന്നിന് ശാശ്വത തീരസംരക്ഷണം; 9.8 കോടിയുടെ പദ്ധതിക്ക് അംഗീകാരം

തിരുവനന്തപുരം: കൊല്ലം നഗരത്തിലെ മുണ്ടയ്ക്കൽ പാപനാശം മുതൽ കൊല്ലം ബീച്ച് വരെയുള്ള ഒരു കിലോമീറ്റർ ദൈർഘ്യമുള്ള വെടിക്കുന്ന് പ്രദേശം സംരക്ഷിക്കാനായി 9.8 കോടി രൂപയുടെ പദ്ധതിക്ക് കിഫ്ബിയിൽ നിന്ന് സാന്പത്തിക സഹായം ലഭ്യമാക്കും. തീരദേശ ഹൈവേയ്ക്ക് സമാന്തരമായി സ്ഥിതിചെയ്യുന്ന പ്രദേശത്തെ മത്സ്യത്തൊഴിലാളി വീടുകൾ വർഷങ്ങളായി കടലാക്രമണ ഭീഷണിയിലാണ്. കഴിഞ്ഞ കാലവർഷത്തിലും ഇവിടെ നിരവധി വീടുകൾക്കു നാശനഷ്ടമുണ്ടായിരുന്നു. ഈ സാഹചര്യത്തിൽ വെടിക്കുന്ന് പ്രദേശം സംരക്ഷിക്കുന്നതിനുള്ള പദ്ധതി രൂപരേഖ തയാറാക്കാൻ സംസ്ഥാന തീരദേശ വികസന കോർപറേഷനെ ചുമതലപ്പെടുത്തി. തുടർന്ന് ഐഐടി ചെന്നൈ മാതൃകാ പഠനം പൂർത്തിയാക്കുകയും പുലിമുട്ടുകളും ടെട്രാപോഡുകളും ഉപയോഗിച്ചുള്ള തീരസംരക്ഷണം നിർദേശിക്കുകയും ചെയ്തതായി മന്ത്രി സജി ചെറിയാൻ പറഞ്ഞു. ഐഐടി പഠനത്തിന്‍റെ അടിസ്ഥാനത്തിൽ 60 മീറ്റർ നീളത്തിലുള്ള രണ്ട് പുലിമുട്ടുകളും 30 മീറ്റർ നീളത്തിലുള്ള നാല് പുലിമുട്ടുകളുമാണ് പദ്ധതിയിൽ ഉൾപ്പെടുത്തിയിട്ടുള്ളത്. പുലിമുട്ടുകൾ ടെട്രാപോഡുകൾ ഉപയോഗിച്ച് ആവരണം ചെയ്യുന്നത് ശക്തമായ തിരമാലകളെ പ്രതിരോധിക്കാനാകും. പുലിമുട്ടുകൾ സ്ഥാപിക്കുന്നതിലൂടെ, വെടിക്കുന്ന് പ്രദേശം അഭിമുഖീകരിക്കുന്ന കഠിനമായ കടലാക്രമണത്തിന് ശാശ്വത പരിഹാരമുണ്ടാകുമെന്ന് പ്രതീക്ഷിക്കുന്നതായി മന്ത്രി സജി ചെറിയാൻ പറഞ്ഞു.

ബിഎംജിഎച്ച് എസിൽ കെ സിഎസ്എൽ യൂണിറ്റ് തുടങ്ങി

കുളത്തുപ്പുഴ: കുളത്തുപ്പുഴ ബി എം ജി എച്ച് എസിൽ കെ സി എസ്എൽ യൂണിറ്റിന്‍റെ ഉദ്ഘാടനം ഫാ. ജോസഫ് തോട്ടത്തിൽ കടയിൽ നിർവഹിച്ചു. സ്കൂൾ ഹെഡ്മാസ്റ്റർ കെ. ഷാജുമോൻ അധ്യക്ഷത വഹിച്ചു. യൂണിറ്റ് ഡയറക്ടർ ഫാ. മാത്യു ചരിവുകാലായിൽ ആമുഖസന്ദേശം നൽകി. പിടിഎ പ്രസിഡന്‍റ് ഷൈജു ഷാഹുൽ ഹമീദ്, ഫാ. വിൽ‌സൺ ചരുവിള, സി. ഐശ്വര്യ, സി. ആൻസ് മേരി, യൂണിറ്റ് പ്രസിഡന്റ്‌ ബിപിന ബിജു സെക്രട്ടറി ലിയ അനിമോൻ, വൈസ് പ്രസിഡന്‍റ്അനീറ്റ ഡെഞ്ചു, ട്രഷറർ അജിൽ സജി നൈനാൻ, ജോയിൻ സെക്രട്ടറി ആഷർ ജോർജ് എന്നിവർ പ്രസംഗിച്ചു. കുട്ടികളുടെ കലാവിരുന്നും ഉണ്ടായിരുന്നു.

മൈലക്കാട് യുപിഎസിൽ ഡോക്ടർമാരെ ആദരിച്ചു

കൊട്ടിയം: ഡോക്ടേഴ്സ് ദിനത്തോടനുബന്ധിച്ച് മൈലക്കാട് പഞ്ചായത്ത് യു പിഎസിൽ വിവിധ പരിപാടികൾ നടന്നു. ആദിച്ചനല്ലൂർ പ്രാഥമികാരോഗ്യ കേന്ദ്രത്തിലെ മെഡിക്കൽ ഓഫീസർ ഡോ.ജിത വിജയൻ ,ഡോ. അഖില എന്നിവരെ കുട്ടികൾ ആദരിച്ചു. വിദ്യാർഥിയിൽ നിന്നും ഒരു ഡോക്ടറിലേക്കുള്ള വഴി എന്ന വിഷയത്തിൽ കുട്ടികൾ ഡോക്ടറുമാരുമായി അഭിമുഖം നടത്തി.പ്രവർത്തനങ്ങൾക്ക് അധ്യാപകരായ പ്രസാദ് കർമ ഗീതു,രത്നാകരൻ, ജ്യോതി ലക്ഷ്മി എന്നിവർ നേതൃത്വം നൽകി.

ചവറ ബ്ലോക്ക് പഞ്ചായത്തിൽ ജോബ് സ്റ്റേഷൻ ഉദ്ഘാടനം

ചവറ: വിജ്ഞാൻ കേരളാ പദ്ധതിയുടെ ഭാഗമായി കേരളത്തിലെ അഭ്യസ്തവിദ്യരായ 18നും 59 വയസിനും ഇടയിൽ പ്രായമുള്ള തൊഴിൽ അന്വേഷകർക്ക് വേണ്ടി ആരംഭിച്ചിട്ടുള്ള ജോബ് സ്റ്റേഷൻ ചവറ ബ്ലോക്ക് പഞ്ചായത്തിൽ ആരംഭിച്ചു. എല്ലാവർക്കും രജിസ്റ്റർ ചെയ്യാൻ സാധിക്കുന്ന കേരള സർക്കാർ സ്ഥാപനമായ കേ-ഡിസ്കിന്‍റെഡി ഡബ്യൂഎംഎസ് എന്ന പോർട്ടലിൽ ചവറ ബ്ലോക്ക് പഞ്ചായത്തിന്‍റെ പരിധിയിലുള്ള ചവറ, നീണ്ടകര, തെക്കുംഭാഗം, തേവലക്കര,പന്മന ഗ്രാമപഞ്ചായത്തുകളിലെ തൊഴിൽ അന്വേഷകരെ രജിസ്റ്റർ ചെയ്യാൻ സഹായിക്കുകയും, തൊഴിൽമേള നടത്തി തൊഴിൽ നൽകുകയും അതോടൊപ്പം തൊഴിൽ ദാതാക്കൾക്ക് അവരുടെ ആവശ്യാനുസരണം തൊഴിൽ ചെയ്യാൻ പ്രാപ്തരായവരെ കണ്ടെത്തി നൽകുകയുമാണ് ജോബ് സ്റ്റേഷൻ ചെയ്യുന്നത്. ചവറ ബ്ലോക്ക് പഞ്ചായത്ത്‌ പ്രസിഡന്‍റ് സന്തോഷ്‌ തുപ്പാശേരി ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്‍റ് സോഫിയ സലാം ചടങ്ങിൽ അധ്യക്ഷയായി.പന്മന ഗ്രാമ പഞ്ചായത്ത്‌ പ്രസിഡന്‍റ് ശ്രീകല, സ്ഥിരം സമിതി അധ്യക്ഷരായ എം. പ്രസന്നൻ ഉണ്ണിത്താൻ, ജോസ് വിമൽരാജ്, നിഷാ സുനീഷ്, പ്രഭാകരൻ പിള്ള, പന്മന ബാലകൃഷ്ണൻ,സജി അനിൽ, എം .സീനത്തു, ആർ .രതീഷ്,ബി ഡി ഓ പ്രേം ശങ്കർ, പ്ലാൻ അസിസ്റ്റന്‍റ് കോഡിനേറ്റർ എ. ബീനാ, എന്നിവർ പ്രസംഗിച്ചു.

വികസനമുരടിപ്പ്: ബിജെപി ധർണ നടത്തി

പാരിപ്പള്ളി : കല്ലുവാതുക്കൽ പഞ്ചായത്തിന്‍റെ വികസനത്തിനെപിന്നോട്ടടിച്ചത് വർഷങ്ങളായി ഭരിച്ചിരുന്നഇടതുമുന്നണിയുടെ ദുർഭരണം ആണെന്ന് ബിജെ പി കൊല്ലം വെസ്റ്റ് ജില്ലാ പ്രസിഡന്‍റ് എസ്. പ്രശാന്ത്പറഞ്ഞു. കല്ലുവാതുക്കൽ പഞ്ചായത്തിന് മുന്നിൽ ബിജെപി നടത്തിയ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മുപ്പത് വർഷത്തോളം പഞ്ചായത്ത് ഭരിച്ചത് ഇടത് വലത് മുന്നണികളാണ് .ഈ കാലയളവിൽ നടന്ന അഴിമതിയുടെ രേഖകൾ ആ കാലയളവിലെ ഓഡിറ്റ് റിപ്പോർട്ടുകൾ പരിശോധിക്കുബോൾ മനസിലാകും. ഈ കാലയളവിൽ എംഎൽ എ അടക്കമുള്ള ജനപ്രതിനിധികളും ഇടതുമുന്നണിയുടെ ആയിരുന്നു. എന്നിട്ടും കല്ലുവാതുക്കലിന്‍റെ വികസനത്തിനായി ഒന്നും ചെയ്തില്ല. ബിജെ പി ജില്ലാ വൈസ് പ്രസിഡന്‍റ് പരവൂർ സുനിൽ മുഖ്യപ്രഭാഷണം നടത്തി. കല്ലുവാതുക്കൽ മേഖല പ്രസിഡന്‍റ് വർക്കല വിഷ്ണു അധ്യക്ഷത വഹിച്ചു. പരവൂർ മണ്ഡലം പ്രസിഡന്‍റ് പ്രദീപ്.ജി. കുറുമണ്ടൽ, മണ്ഡലം ജനറൽ സെക്രട്ടറിമാരായ ബൈജു ലക്ഷ്മൺ, വിഷ്ണു കുറുപ്പ്, ബ്ലോക്ക് പഞ്ചായത്ത് അംഗം രോഹിണി, മൂൻ പഞ്ചായത്ത് പ്രസിഡന്‍റ് എസ്.സുധീപ, എസ്. സത്യപാലൻ, ഗ്രാമപഞ്ചായത്ത് അംഗം മുരളീധരൻ എന്നിവർ പ്രസംഗിച്ചു.

കുമ്മിളിൽ കഞ്ചാവുമായി യുവാവ് പിടിയിൽ

ചടയമംഗലം: കുമ്മിളിൽ കഞ്ചാവു മായി പ്രതി പിടിയിൽ .കടയ്ക്കൽ മാർക്കറ്റിന് സമീപം നടത്തിയ പരിശോധനയിൽ 1.451 കിലോഗം കഞ്ചാവ് കൈവശം വെച്ച കുറ്റത്തിന് മങ്കാട് സച്ചിൻ നിവാസിൽ സച്ചിനെ (31) അറസ്റ്റ് ചെയ്തു. മാർക്കറ്റിലും പരിസരപ്രദേശങ്ങളിലും കഴിഞ്ഞ കുറച്ച്നാളുകളായി സന്ധ്യ സമയങ്ങളിൽ പ്രതിയും സുഹൃത്തുക്കളും ചേർന്ന് കഞ്ചാവ് കച്ചവടവും ലഹരി വസ്തുക്കളുടെ കൈമാറ്റവും വില്പനയും നടക്കുന്നുണ്ടെന്ന്‌ എക്‌സൈസ് റേഞ്ച് ഇൻസ്‌പെക്ടർ രാജേഷിന് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടത്തിയ റെയ്ഡിലാണ് ഇയാളെ പിടികൂടിയത് . അന്യ സംസ്ഥാനങ്ങളിൽ നിന്നും കഞ്ചാവ് എത്തിച്ച് ചെറു പൊതികളിലാക്കി വിൽക്കുന്ന തായിരുന്നു ഇവരുടെ രീതി .സംഘത്തിലുള്ള മറ്റുള്ളവരെ പറ്റിയും എക്സൈസിന് വിവരം ലഭിച്ചിട്ടുണ്ട് .വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകും. പ്രിവന്‍റീവ് ഓഫീസർമാരായ സനിൽകുമാർ, ബിനേഷ്,സിവിൽ എക്സൈസ് ഓഫീസർമാരായ സബീർ, ബിൻസാഗർ, ശ്രേയസ് ഉമേഷ്, നിഷാന്ത്, ജെ.ആർ.സാബു, ലിജി എന്നിവരാണ് അറസ്റ്റിന് നേതൃത്വം നൽകിയത്.

ദേശീയ ഭക്ഷ്യ ഭദ്രതാ പദ്ധതി പ്രവര്‍ത്തനം വിലയിരുത്തി സംസ്ഥാന ഭക്ഷ്യ കമ്മീഷന്‍

കൊല്ലം: ജില്ലയില്‍ ദേശീയ ഭക്ഷ്യ ഭദ്രതാ നിയമത്തിന്‍റെ ഭാഗമായി വിവിധ വകുപ്പുകള്‍ മുഖേന നടപ്പാക്കുന്ന പദ്ധതികളുടെ പ്രവര്‍ത്തനം വിലയിരുത്തുന്നതിനായി ഭക്ഷ്യ കമ്മീഷന്‍ ചെയര്‍പേഴ്സണ്‍ ഡോ.ജിനു സഖറിയ ഉമ്മന്‍റെയും അംഗം അഡ്വ.സബിദാ ബീഗത്തിന്‍റെയും നേതൃത്വത്തിലുള്ള ഉദ്യോഗസ്ഥ സംഘം വാടി, തങ്കശേരി മേഖലകളിലെ അങ്കണവാടികള്‍, സ്‌കൂളുകള്‍ സന്ദര്‍ശിച്ചു. കുട്ടികളുടെ എണ്ണം വിലയിരുത്തി അവര്‍ക്ക് ആവശ്യമായ ഭക്ഷ്യവിതരണം ഉറപ്പാക്കി ഉച്ചഭക്ഷണ പദ്ധതി കാര്യക്ഷമമാക്കാന്‍ കമ്മീഷന്‍ നിര്‍ദ്ദേശിച്ചു.വാടി ഹാര്‍ബര്‍ മേഖലയിലെ മത്സ്യതൊഴിലാളികളുമായി സംവദിച്ച് പരാതികളും സ്വീകരിച്ചു. വള്ളിക്കീഴ് ജി എച്ച് എസ് എസിന് കീഴിലുള്ള എല്‍ കെ ജി കുട്ടികള്‍ക്ക് മതിയായ ശുചിമുറി സൗകര്യം ഇല്ലെന്ന് ലഭിച്ച പരാതിയില്‍ സ്‌കൂളിലെത്തിയ കമ്മീഷന്‍, പരിഹാര നടപടികള്‍ക്കും നിര്‍ദ്ദേശം നല്‍കി. ഐ സി ഡി എസ് ഓഫീസര്‍ നിഷ നായര്‍, എ ഇ ഒ ആന്‍റണി പീറ്റര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

കുരീപ്പുഴ പാണ്ടോന്നില്‍ -കൊച്ചുകോട്ടയത്ത് കടത്ത് സര്‍വീസിന് തുടക്കമായി

കൊല്ലം: തൃക്കടവൂര്‍ കുരീപ്പുഴ പാണ്ടോന്നില്‍ -കൊച്ചുകോട്ടയത്ത് കടവ് കടത്ത് സര്‍വീസ് മേയര്‍ ഹണി ഫ്ളാഗ് ഓഫ് ചെയ്ത് ഉദ്ഘാടനം നിര്‍വഹിച്ചു. പ്രദേശവാസികളുടെയും കൗണ്‍സിലര്‍മാരുടെയും നിരന്തര ആവശ്യത്തെ തുടര്‍ന്ന് കോര്‍പറേഷന്‍ കൗണ്‍സില്‍ തീരുമാനമെടുത്താണ് കടത്ത് സര്‍വീസ് ഏര്‍പ്പെടുത്തിയത്. ഡെപ്യൂട്ടി മേയര്‍ എസ് .ജയന്‍ അധ്യക്ഷനായി. പാണ്ടോന്നില്‍ കടവില്‍ ചേര്‍ന്ന യോഗത്തില്‍ സ്റ്റാന്‍ഡിങ് കമ്മിറ്റി ചെയര്‍മാന്‍ സജീവ് സോമന്‍, വിദ്യാഭ്യാസ- കായിക സ്റ്റാന്‍റിംങ് കമ്മിറ്റി ചെയര്‍പേഴ്സണ്‍ സവിതാദേവി, ഗിരിജ തുളസിധരന്‍, ടെല്‍സാ തോമസ്, കെ. ബിജോയി, എന്‍.ഗോപാലകൃഷ്ണന്‍,വി.എസ്.ഷാജി, കുരീപ്പുഴ മോഹന്‍, ബി .അജിത്ത് കുമാര്‍, കോര്‍പറേഷന്‍ സൂപ്രണ്ട് രവീന്ദ്രന്‍ നായര്‍ തുടങ്ങിയവര്‍ പ്രസംഗിച്ചു.

ടിഎസ് കനാലിനു കുറുകെ നിർമിച്ച കോണ്‍ക്രീറ്റ് നടപ്പാലത്തിന്‍റെ ഉദ്ഘാടനം നാളെ

ചവറ : കെ എം എം എൽ എംഎസ് യൂണിറ്റിന് മുന്നില്‍ ടി.എസ് കനാലിന് കുറുകെ നിർമിച്ച കേരളത്തിലെ ആദ്യത്തെ സിംഗിള്‍ ഗര്‍ഡര്‍ പ്രീ സ്‌ട്രെസ്ഡ് കോണ്‍ക്രീറ്റ് നടപ്പാലത്തിന്‍റെ ഉദ്ഘാടനം നാളെ മന്ത്രി പി രാജീവ് നിര്‍വഹിക്കും. കേരളത്തിലെ അഭിമാന പദ്ധതിയായ ദേശീയ ജലപാതാ വികസനത്തിന് ഉതകുന്ന തരത്തിലാണ് പുതിയ സാങ്കേതിക വിദ്യയില്‍ പാലം നിര്‍മിച്ചിരിക്കുന്നത്. 5.07 കോടി രൂപ ചെലവിലാണ് 45 മീറ്റര്‍ നീളമുള്ള പാലം ഒരുങ്ങിയത്. റോഡ്സ് ആന്‍റ് ബ്രിഡ്ജസ് കോര്‍പറേഷന്‍റെ അനുമതിയോടെ കൊച്ചിയിലെ എഫ്എസിടിയുടെ ഡിസൈനിംഗ് വിംഗ് ആയ ഫെഡോ ആണ് നടപ്പാലം രൂപകല്‍പ്പന ചെയ്തത്. കെ എം എം എല്‍ മിനറല്‍ സെപ്പറേഷന്‍ യൂണിറ്റിലെ സിവില്‍ വിഭാഗത്തിന്‍റെ നേതൃത്വത്തില്‍ ഇന്‍കല്‍ ആണ് പാലത്തിന്‍റെ നിര്‍മാണം പൂര്‍ത്തീകരിച്ചത്. മിനറല്‍ സെപ്പറേഷന്‍ യൂണിറ്റിന് മുന്‍ഭാഗത്ത് ദേശീയ ജലപാതക്ക് കുറുകെ നേരത്തെ ഒരു സ്റ്റീല്‍ നടപ്പാലമാണ് ഉണ്ടായിരുന്നത്. കമ്പനിയിലെ ജീവനക്കാരും പൊതു ജനങ്ങളും സ്ഥിരമായി ഉപയോഗിക്കുകയും ആശ്രയിക്കുകയും ചെയ്തിരുന്ന ഈ പാലം ദേശീയ ജലപാതാ വികസനത്തിന് തടസം സൃഷ്ടിച്ച സാഹചര്യത്തില്‍ പുതിയ പാലം നിര്‍മിക്കുന്നതിന് ആലോചിച്ചു വരികയായിരുന്നു. ഈ അവസരത്തിലാണ് 15 വര്‍ഷത്തോളം പഴക്കം ചെന്ന സ്റ്റീല്‍ പാലം തകർന്നത്. തുടര്‍ന്ന് കമ്പനിയിലെ ജീവനക്കാരുടെയും പൊതു ജനങ്ങളുടേയും ഗതാഗതത്തിനായി വര്‍ഷം 15 ലക്ഷത്തോളം രപ ചെലവഴിച്ച് ബോട്ട് സര്‍വീസ് നടത്തുകയായിരുന്നു. പുതിയ പാലം വന്നതോടെ ഈ തുക ലാഭിക്കാൻ കമ്പനിക്ക് കഴിയും. കെ എം എം എല്‍ മിനറല്‍ സെപ്പറേഷന്‍ യൂണിറ്റിന് മുന്നിലൂടെ കടന്നുപോകുന്ന തിരുവനന്തപുരം - ഷൊര്‍ണൂര്‍ കനാല്‍ ജലപാതയിലൂടെയുള്ള സുഗമമായ യാത്രയ്ക്കു തടസമായി നില്‍ക്കുന്ന രണ്ടു പാലങ്ങളാണ് നിലവിലുണ്ടായിരുന്നത്. ഒന്ന് തൃക്കുന്നപ്പുഴയിലും മറ്റൊന്ന് കോവില്‍ത്തോട്ടത്തുള്ളതും.തൃക്കുന്നപ്പുഴയിലെ പാലം പുനര്‍നിര്‍മിക്കുന്നതിനുള്ള നടപടികള്‍ ഇതിനോടകം സര്‍ക്കാര്‍ സ്വീകരിച്ച് കഴിഞ്ഞു. കോവില്‍ത്തോട്ടം ദേവാലയത്തിന് സമീപമായി സ്ഥിതി ചെയ്തിരുന്ന നടപ്പാലം മുഴുവനായി പൊളിച്ചുമാറ്റുകയും വാഹന ഗതാഗത യോഗ്യമായ പാലത്തിന്‍റെ നിർമാണം നടന്നുവരികയുമാണ്. ഈ പാലം നിർമാണത്തിലും കെ എം എം എല്‍ തുക വകയിരുത്തിയിട്ടുണ്ട്.

കിരണ്‍കുമാറിനു ജാമ്യം അനുവദിച്ചത് ഞെട്ടിപ്പിച്ചു; നിയമ നടപടിയുമായി കുടുംബം മുന്നോട്ടുപോകും

കൊല്ലം: വിസ്മയ കൊലപാതക കേസില്‍ പ്രതിയായ ഭർത്താവ് കിരണ്‍കുമാറിന് സുപ്രീംകോടതി ജാമ്യം അനുവദിച്ചത് തങ്ങളെ ഞെട്ടിപ്പിച്ചുവെന്ന് വിസ്മയയുടെ സഹോദരൻ വിജിത് പറഞ്ഞു. കേസിലെ ശിക്ഷാവിധി മരവിപ്പിക്കണമെന്ന ആവശ്യം കോടതി അംഗീകരിച്ചത് എന്തുകൊണ്ടാണന്ന് മനസിലാകുന്നില്ല. എന്തായാലും വിധി പരിശോധിച്ച ശേഷം നിയമ നടപടിയുമായി മുന്നോട്ടുപോകുമെന്നും അദ്ദേഹം വ്യക്തമാക്കി. ജില്ല കോടതിയും ഹൈക്കോടതിയും ശിക്ഷിച്ച സംഭവത്തിലാണ് ഹൈക്കോടതി ഫുൾബഞ്ചിൽ നൽകിയ അപ്പീലിൽ തീരുമാനം വരുന്നതിന് മുമ്പ് ഇപ്പോഴത്തെ സുപ്രീംകോടതിവിധി. എല്ലാ തെളിവുകളും കണ്ടെത്തിയാണ് കിരൺ കുമാറിനെ ശിക്ഷിച്ചത്. സുപ്രീം കോടതിയുടെ ഇപ്പോഴത്തെ വിധി കുറ്റവാളികൾക്ക് പ്രചോദനമാവുകയേ ഉള്ളൂവെന്ന് മർച്ചന്‍റ് നേവി ഓഫീസർ കൂടിയായ വിജിത് ചൂണ്ടികാട്ടി. വിസ്മയയുടെ പിതാവ് ത്രിവിക്രമൻ നായരും വിധിയിൽ അത്ഭുതം പ്രകടിപ്പിച്ചു. സ്ത്രീധന പീഡനത്തെത്തുടര്‍ന്ന് ബിഎഎംഎസ് വിദ്യാര്‍ഥിനി വിസ്മയ ജീവനൊടുക്കിയ കേസിലാണ് പ്രതി കിരണ്‍കുമാറിന്‍റെ ശിക്ഷാവിധി സുപ്രീംകോടതി മരവിപ്പിച്ചത്. കേസിലെ ശിക്ഷാവിധി റദ്ദാക്കണമെന്ന് ആവശ്യപ്പെട്ട് കിരണ്‍കുമാര്‍ സുപ്രീംകോടതിയെ സമീപിച്ചിരുന്നു. കേരള ഹൈക്കോടതിയിലുള്ള അപ്പീലിൽ തീരുമാനമാകുന്നതുവരെ കിരണിന് സുപ്രീംകോടതി ജാമ്യം അനുവദിച്ചു. കേസില്‍ ശിക്ഷിക്കപ്പെട്ട കിരണ്‍കുമാര്‍ നിലവില്‍ പരോളിലാണ്. കേസില്‍ കൊല്ലം അഡീഷനല്‍ സെഷന്‍സ് കോടതി പത്തുവര്‍ഷത്തെ തടവും 12.55 ലക്ഷം രൂപ പിഴയുമാണ് കിരണ്‍കുമാറിന് ശിക്ഷ വിധിച്ചത്. വിസ്മയ ജീവനൊടുക്കിയ കേസില്‍ തനിക്കെതിരായ ശിക്ഷ മരവിപ്പിക്കണം, ജാമ്യം നല്‍കണം എന്നിവ ആവശ്യപ്പെട്ടാണ് കിരൺ സുപ്രീംകോടതിയെ സമീപിച്ചത്. നേരത്തെ ഇതേ ആവശ്യങ്ങളുമായി കിരണ്‍കുമാര്‍ ഹൈക്കോടതിയെ സമീപിച്ചിരുന്നു. എന്നാല്‍, രണ്ടുവര്‍ഷമായിട്ടും ഹൈക്കോടതിയില്‍ നല്‍കിയ ഹര്‍ജിയില്‍ തീരുമാനമാകാത്തതിനാലാണ് പ്രതി സുപ്രീംകോടതിയെ സമീപിക്കുന്നത്. നിലമേൽ കൈതോട് കെകെഎംപി ഹൗസിൽ - സീ വില്ല കെ.ത്രിവിക്രമൻ നായരുടെയും സജിതയുടെയും മകൾ വിസ്മയയെ 2021 ജൂൺ 21നാണു ശാസ്താംകോട്ട പോരുവഴിയിലെ ഭർതൃവീട്ടിൽ മരിച്ച നിലയിൽ കാണപ്പെട്ടത്. 2020 മേയ് 30 നായിരുന്നു പോരുവഴി ശാസ്താനട ചന്ദ്രാലയത്തിൽ കിരൺകുമാറുമായുള്ള വിവാഹം. 2022 മേയിൽ കോടതി കിരണിനെ പത്തുവർഷം തടവിനു ശിക്ഷ വിധിച്ചിരുന്നു. വിവിധ വകുപ്പുകളിലായി ആകെ 25 വർഷം കഠിന തടവും 12.55 ലക്ഷം രൂപ പിഴയും വിധിച്ചെങ്കിലും ശിക്ഷ ഒന്നിച്ച് അനുഭവിച്ചാൽ മതിയെന്നതിനാൽ 10 വർഷം ജയിലിൽ കിടന്നാൽ മതി.

ഡോക്ടർമാർ സമൂഹത്തിന്‍റെ പ്രതീക്ഷ : ബിഷപ് ഡോ.പോൾ ആന്‍റണി മുല്ലശേരി

കൊല്ലം : ഡോക്ടർമാർ സമൂഹത്തിന്‍റെ പ്രതീക്ഷയാണ്. അവരുടെ സമർപ്പിത സേവനം പ്രശംസനീയമാണ്. സ്നേഹവും കരുണയും നഷ്ടപ്പെട്ടിട്ടില്ല എന്നുള്ളതാണ് സേവനങ്ങളിലൂടെ വ്യക്തമാകുന്നതെന്നും ബിഷപ് പോൾ ആന്‍റണി മുല്ലശേരി പറഞ്ഞു. ബെൻസിഗർ ആശുപത്രിയിൽ ഡോക്ടേഴ്സ് ദിനാചരണ പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം . രോഗികൾക്ക്, രോഗാവസ്ഥയിൽ നൽകുന്ന സാന്ത്വനവും കരുതലും സൗഖ്യത്തിൻെറ കര സ്പർശനവും മരുന്നുകൾക്ക് ഉപരിയായ സൗഖ്യത്തിനും കാരണമാകുന്നു എന്നും ബിഷപ് പറഞ്ഞു. ജീവന് തുടിപ്പേകുന്നവരാണ് ഞങ്ങളുടെ ഡോക്ടർമാർ എന്ന സന്ദേശത്തോടുകൂടിയാണ്” ഈ വർഷം ആശുപത്രിയിൽ ഡോക്ടർമാരെ ആദരിച്ചത്. ആശുപത്രി ഡയറക്ടർ ഓരോ ഡോക്ടറെയും നേരിൽ കണ്ട് ആശംസകളും സമ്മാനപ്പൊതികളും കൈമാറി . ഓരോ ഡോക്ടർമാരും ഈ സ്ഥാപനത്തിന്‍റെ തുടിക്കുന്ന ഹൃദയം ആണെന്നും ആയുസിനും മനുഷ്യജീവന്‍റെ നിലനിൽപ്പിനുവേണ്ടി സേവനം ചെയ്യുന്നതിനാൽ അവരെ ദൈവ തുല്യരായി കാണേണ്ടതാണെന്നും ഡയറക്ടർ ജോസഫ് ജോൺ ആമുഖ പ്രഭാഷണത്തിൽ വ്യക്തമാക്കി.കൊല്ലം ഡിഎംഒ ഡോ. എം.എസ് .അനു മുഖ്യ പ്രഭാഷണം നടത്തി. ആരോഗ്യരംഗത്ത് നേരിടേണ്ടിവരുന്ന പ്രതിസന്ധികൾ തരണം ചെയ്യേണ്ടതിന്‍റെ ആവശ്യകതയെക്കുറിച്ച് ഡോ.അനു പ്രസംഗിച്ചു. ചടങ്ങിന്‍റെ ഭാഗമായി ബെൻസിഗർ ആശുപത്രിയിലെ ഡോക്ടർമാരുടെ മികവുറ്റ സേവനങ്ങൾക്കുള്ള അവാർഡുകളും നൽകി. അഡ്മിനിസ്ട്രേറ്റർ സിസ്റ്റർ ജീന മേരി, അസോസിയേറ്റ് ഡയറക്ടർ ടി.ജയിംസ് , നഴ്‌സിംഗ് സൂപ്രണ്ട് സിസ്റ്റർ സിർളമേരി, മെഡിക്കൽ സൂപ്രണ്ട് ഡോ.ജി. മോഹൻ, ഡെപ്യൂട്ടി മെഡിക്കൽ സൂപ്രണ്ട് ഡോ. ബെന്നി ക്ളീറ്റസ് എന്നിവർ പ്രസംഗിച്ചു. ജീവനക്കാരുടെ കലാപരിപാടികൾ ചടങ്ങിനെ ഗംഭീരമാക്കി.

ഷാജി എൻ. കരുൺ അനുസ്മരണം

കുണ്ടറ: പുരോഗമന കലാ സാഹിത്യ സംഘം കുണ്ടറ ഏരിയ കമ്മിറ്റിയുടെ ആഭിമുഖ്യത്തിൽ സിനിമാ സംവിധായകൻ ഷാജി എൻ കരുണിനെ അനുസ്മരിച്ചു. ഏരിയ പ്രസിഡന്‍റ് സുശീല ടീച്ചറുടെ അധ്യക്ഷതയിൽ നടന്ന യോഗത്തിൽ സിനിമ നിരൂപകനും നാടക പ്രവർത്തകനുമായ ആർ ശ്രീരാജ് അനുസ്മരണ പ്രഭാഷണം നടത്തി. ഡി .സിന്ധു രാജ് ,കവി പെരുമ്പുഴ ഗോപാലകൃഷ്ണപിള്ള ,മാധ്യമപ്രവർത്തകൻ ആർ. തുളസി ,ജില്ലാ കമ്മിറ്റി അംഗം പി .പി .ജോസഫ് എന്നിവർ പ്രസംഗിച്ചു. തുടർന്ന് പിറവി എന്ന സിനിമയുടെ പ്രദർശനവും നടന്നു.

സനാതന ധർമം പഠിക്കാനും പഠിപ്പിക്കാനും തയാറാകണം: അമൃതാനന്ദമയി

കൊല്ലം: സംസ്കാരവും മൂല്യങ്ങളും ഉൾകൊള്ളുന്ന ഭാരതത്തിന്‍റെ സനാതന ധർമം പഠിക്കാനും പഠിപ്പിക്കാനും നമ്മൾ തയാറാകണമെന്ന് അമൃതാനന്ദമയി. സ്വാമി വിവേകാനന്ദന്‍റെ ജീവിതം നൽകുന്ന സന്ദേശം അതാണെന്നും പ്രകൃതി എല്ലാവരുടേതുമാണെന്നു ചിന്തിച്ചാൽ ലോകത്ത് സമാധാനം ഉണ്ടാകുമെന്നും അവർ പറഞ്ഞു. വിവേകാനന്ദ ഇന്റർനാഷണൽ റിലേഷൻസ് ഏർപ്പെടുത്തിയ വിവേകാനന്ദ അന്താരാഷ്ട്ര സമാധാന പുരസ്‌കാരം ഏറ്റുവാങ്ങി പ്രഭാഷണം നടത്തുകയായിരുന്നു അമൃതാനന്ദമയി. അമൃതപുരി ആശ്രമം ഹാളിൽ നടന്ന ചടങ്ങിൽ അമൃതാനന്ദമയി പുരസ്ക്കാരം ഏറ്റുവാങ്ങി. അന്താരാഷ്ട്രതലത്തിൽ നടത്തിവരുന്ന പൊതുജനക്ഷേമ പ്രവർത്തനങ്ങൾ കണക്കിലെടുത്താണ് പുരസ്കാരം. വിവേകാനന്ദ ഇന്‍റർനാഷണൽ റിലേഷൻസ് ഫൗണ്ടേഷൻ കൺവീനർ ഗഗൻ മഹോത്ര, മുഖ്യ രക്ഷാധികാരി രവികുമാർ അയ്യർ എന്നിവരിൽ നിന്നും ഫലകവും പ്രശസ്തി പത്രവും ഏറ്റുവാങ്ങി. ഗഗൻ മഹോത്ര, തർപ്പൺ ഫൗണ്ടേഷൻ സിഇഒ സരിക പന്ഹാൽകർ, സ്വാനാഥ് ഫൗണ്ടേഷൻ മാനേജിംഗ് ട്രസ്റ്റി ശ്രേയ ഭാരതീയ, ചക്ര ഫൗണ്ടേഷൻ ചെയർമാൻ എ. രാജശേഖരൻ, തുടങ്ങിയവർ പ്രസംഗിച്ചു.

എംഡിഎംഎയുമായി അയത്തിൽ സ്വദേശിയായ യുവാവ് അറസ്റ്റിൽ

കൊല്ലം: അയത്തിൽ നളന്ദ നഗറിൽ പോലീസ് നടത്തിയ പരിശോധനയിൽ രണ്ടു ഗ്രാമോളം എം ഡി എം എയുമായി യുവാവ് പിടിയിലായി. തട്ടാമല ഒലിക്കരവയൽ ശാർക്കര പുത്തൻ വീട്ടിൽ അൽത്താഫി(22) നെ ഇരവിപുരം പോലീസും കൊല്ലം സിറ്റി ഡാൻസാഫ് സംഘവും സംയുക്തമായി നടത്തിയ പരിശോധനയിലാണ് പിടികൂടിയത്. ലഹരി വ്യാപാര സംഘങ്ങളെ പിടികൂടുന്നതിനായി പോലീസ് നടത്തിയ പരിശോധനക്കിടെ രജിസ്‌ട്രേഷൻ നമ്പരില്ലാത്ത മോട്ടോർ സൈക്കിളിൽ എത്തിയ അൽത്താഫിനെ തടഞ്ഞ് നിർത്തി പരിശോധിച്ചപ്പോഴാണ് 1.93 ഗ്രാം എം ഡി എം എ കണ്ടെടുത്തത്. കൊട്ടിയം പോലീസ് സ്റ്റേഷനിൽ 2022 ൽ രജിസ്റ്റർ ചെയ്ത നരഹത്യാശ്രമ കേസിലും അൽത്താഫ് പ്രതിയാണ് . ഇരവിപുരം പോലീസ് ഇൻസ്‌പെക്ടർ രാജീവിന്‍റെ നേതൃത്വത്തിൽ എസ് ഐ മാരായ രാജ്‌മോഹൻ, സബിത, നൗഷാദ്, സി പി ഒ മാരായ അൽ സൗഫീർ, നിതിൻ, അനീഷ് എന്നിവരടങ്ങിയ പോലീസ് സംഘത്തോടൊപ്പം ഡാൻസാഫും സംയുക്തമായി നടത്തിയ പരിശോനയിലാണ് ഇയാൾ പിടിയിലാവുന്നത്.

സിലിണ്ടറിലേക്ക് തീ പടർന്ന് വീട് കത്തി നശിച്ചു

കൊല്ലം: ചിതറ അരിപ്പ വേങ്കൊല്ലയിൽ പാചകവാതക സിലിണ്ട റിലേക്ക് തീ പടർന്ന് വീട് മുഴുവൻ കത്തി നശിച്ചു. താന്നിമൂട്ടിൽ തുളസിയുടെ വീടാണ് കത്തി നശിച്ചത്. വീടിന് സമീപത്തെ ഷെഡിൽ വിളക്കിൽ നിന്നും തീ പടരുകയും, തീ അണയ്ക്കാൻ ശ്രമിക്കുന്നതിനിടെ ഗ്യാസിലേക്ക് പടരുകയുമായിരുന്നു. നാട്ടുകാരുടെ നേതൃത്വത്തിലാണ് തീ അണക്കാൻ ശ്രമം നടന്നത്.തീ പടർന്നതോടെ ഗ്യാസ് സിലിണ്ടർ പൊട്ടിത്തെറിച്ചു വീട് തകർന്നു. സംഭവം നടക്കുമ്പോൾ വീട്ടിൽ ആരും ഉണ്ടായിരുന്നില്ല. ഫയർഫോഴ്‌സും നാട്ടുകാരും ചേർന്ന് തീ നിയന്ത്രണ വിധേയമാക്കി.

കന്നുകാലി തൊഴുത്തിലെ മാലിന്യം ഒഴുക്കിവിടുന്നു : കിണറിൽകോളിഫോം ബാക്ടീരിയ: റിപ്പോർട്ട് തേടി മനുഷ്യാവകാശ കമ്മീഷൻ

കൊല്ലം : കന്നുകാലി തൊഴുത്തിലെ മാലിന്യം അലക്ഷ്യമായി ഒഴുക്കിവിടുന്നതു മൂലം കിണറും പരിസരവും മലിനമാകുന്നുവെന്ന പരാതിയിൽ, ശാസ്താംകോട്ട പഞ്ചായത്ത് സെക്രട്ടറിയുടെ റിപ്പോർട്ട് തേടി മനുഷ്യാവകാശ കമ്മീഷൻ. വിഷയം കോടതികളും ലീഗൽ സർവീസസ് അതോറിറ്റിയും പരിഗണിച്ചതാണോ എന്നതിനെകുറിച്ച് ശാസ്താംകോട്ട പഞ്ചായത്ത് സെക്രട്ടറി റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ അംഗം വി. ഗീതയുടേതാണ് ഉത്തരവ്. ശാസ്താംകോട്ട പള്ളിശേരിൽ സ്വദേശി. എം. ഷംസുദ്ദീൻ കുഞ്ഞ് സമർപ്പിച്ച പരാതിയിലാണ് നടപടി. മാലിന്യം തുറസായ സ്ഥലത്ത് നിക്ഷേപിക്കാൻ പാടില്ലെന്ന് എതിർകക്ഷിക്ക് നിർദ്ദേശം നൽകിയതായി സെക്രട്ടറി കമ്മീഷനെ അറിയിച്ചു. ആറിൽ താഴെ മാത്രം പശുക്കളെ വളർത്തുന്ന സാഹചര്യത്തിൽ തദ്ദേശസ്വയംഭരണസ്ഥാപനമാണ് മലിനീകരണം സംബന്ധിച്ച പരാതിയിൽ നടപടിയെടുക്കേണ്ടതെന്ന് മലിനീകരണ നിയന്ത്രണ ബോർഡ് കമ്മീഷനെ അറിയിച്ചു. തന്‍റെ കിണറിൽ കോളിഫോം ബാക്ടീരിയയുടെയും ഗോമൂത്രത്തിന്‍റെയും അംശമുണ്ടെന്നാണ് പരാതിക്കാരൻ കമ്മീഷനെ അറിയിച്ചത്.വിഷയം കോടതിയിൽ തീർപ്പാക്കിയതാണെന്ന് കന്നുകാലികളുടെ ഉടമ കമ്മീഷനെ അറിയിച്ചു. എന്നാൽ പരാതി താലൂക്ക് ലീഗൽ സെല്ലിന്‍റെ പരിഗണനയിലാണെന്നാണ് പഞ്ചായത്ത് അറിയിക്കുന്നത്. ഈ സാഹചര്യത്തിലാണ് കോടതി തീർപ്പാക്കിയതിന്‍റെ വിശദാംശങ്ങൾ ഹാജരാക്കാൻ എതിർകക്ഷി മുരുകേശനും പഞ്ചായത്ത് സെക്രട്ടറിക്കും കമ്മീഷൻ നിർദ്ദേശം നൽകിയത്. ജൂലൈയിൽ നടക്കുന്ന സിറ്റിങ്ങിൽ കേസ് വീണ്ടും പരിഗണിക്കാനിരിക്കുകയാണ്.

എസ്എഫ്ഐയുടെ നേതൃത്വത്തില്‍ അഭിമന്യു രക്തസാക്ഷിത്വ ദിനാചരണം സംഘടിപ്പിച്ചു

അഞ്ചല്‍ : എര്‍ണാകുളം മഹാരാജാസ് കോളജില്‍ കൊലചെയ്യപ്പെട്ട എസ്എഫ്ഐ നേതാവ് അഭിമന്യുവിന്‍റെ രക്തസാക്ഷിത്വ ദിനാചരണം സംഘടിപ്പിച്ചു. എസ്എഫ്ഐ അഞ്ചല്‍ ഏരിയാ കമ്മിറ്റിയുടെ നേതൃത്വത്തില്‍ അഭിമന്യു കൊല്ലപ്പെട്ട രാത്രി 12 ന് അഞ്ചല്‍ ആര്‍ഒ ജംഗ്ഷനിലാണ് പരിപാടി സംഘടിപ്പിച്ചത്. എസ്എഫ്ഐ മുൻ ജില്ല പ്രസിഡന്‍റും സിപിഎം അലയമണ്‍ ലോക്കല്‍ കമ്മിറ്റി സെക്രട്ടറിയുമായ എ.ആര്‍. അസീം വര്‍ഗീയതയ്ക്കെതിരെ ബാനര്‍ എഴുതി ഉദ്ഘാടനം ചെയ്തു. തുടര്‍ന്നു പ്രവര്‍ത്തകര്‍ ജ്വാല തെളിയിച്ചു. എസ്എഫ്ഐ അഞ്ചൽ ബ്ലോക്ക്‌ പ്രസിഡന്‍റ് അതുൽ അധ്യക്ഷനായ ചടങ്ങിൽ എസ്എഫ്ഐ ഏരിയ സെക്രട്ടറി ബുഹാരി, ഡിവൈഎഫ്ഐ ബ്ലോക്ക്‌ സെക്രട്ടറി ഷൈൻ ബാബു, പ്രസിഡന്‍റ് അഭിലാഷ്, ജില്ലാ കമ്മിറ്റി അംഗം രാം രാജ്, അക്ഷയ്, തുടങ്ങിയവർ പ്രസംഗിച്ചു.

സൗജന്യ തൊഴിൽ പരിശീലനം ഉദ്ഘാടനം ചെയ്തു

ചാത്തന്നൂർ: അറിവ് ത്രൂ ദി സോൾ ഓഫ് ഗുരു, കേന്ദ്ര നൈപുണ്യ വികസന മന്ത്രാലയത്തിന്‍റെ കീഴിലുള്ള ജൻശിക്ഷൺ സൻസ്ഥാന്‍റെ സഹകരണത്തോടെ നടത്തുന്ന സൗജന്യ തൊഴിൽ പരിശീലനത്തിന്‍റെ 15-ാമത് ബാച്ചിന്‍റെ ഉദ്ഘാടനം കൊല്ലം മേയർ ഹണി ബെഞ്ചമിൻ നിർവഹിച്ചു. സാമൂഹിക സേവന രംഗത്ത് മാതൃകാപരമായ പ്രവർത്തനം നടത്തുന്ന ബി. പ്രേമാനന്ദിനെ ചടങ്ങിൽആദരിച്ചു. തൊഴിൽ പരിശീലനം നേടി സംരംഭകരായി മാറുന്ന സ്ത്രീകൾ സാമ്പത്തിക ഉന്നമനം നേടുന്നതോടൊപ്പം കൂടുതൽ ശാക്തീകരിക്കപ്പെടുകയാണെന്ന് മേയർ ഹണി ബെഞ്ചമിൻ പറഞ്ഞു. അറിവ് പ്രസിഡന്‍റ് ബി.സജൻലാൽ അധ്യക്ഷത വഹിച്ചു .ജൻ ശിക്ഷൺ സൻസ്ഥാൻ ഡയറക്ടർ വി.കെ.സിന്ധു സൗജന്യ തൊഴിൽ പദ്ധതി വിശദീകരിച്ചു. പ്രോഗ്രാം ഓഫിസർ പി.ജയകൃഷ്ണൻ, അറിവ് ജനറൽ സെക്രട്ടറി ജി. ഹസ്താമലകൻ , ഡോ. ആർ. ബിനോയ് , പോളയിൽ രാമചന്ദ്രൻ പിള്ള, പി.എസ്.സരളകുമാരി, ഡോ. ടി.ജെ. അജിത്ത് എന്നിവർ പ്രസംഗിച്ചു.

തുമ്പോട് സെന്‍റ് കുറിയാക്കോസ് ഓര്‍ത്തഡോക്സ് ഇടവക ശതാബ്ദി നിറവില്‍

ഒരു വര്‍ഷം നീണ്ടു നില്‍ക്കുന്ന ആഘോഷ പരിപാടികള്‍ ആറിന് തുടങ്ങും അഞ്ചല്‍ : ഏരൂര്‍ ഭാരതീപുരത്തെ തുമ്പോട് സെന്‍റ് കുറിയാക്കോസ് ഓര്‍ത്തഡോക്സ് ഇടവക ശതാബ്ദി നിറവില്‍. ശതാബ്ദിയുടെ ഭാഗമായി ഒരു വര്‍ഷം നീണ്ടു നില്‍ക്കുന്ന ആഘോഷ പരിപാടികള്‍ക്ക് ആറിന് തുടക്കമാകും. ആരിന് രാവിലെ വിശുദ്ധ കുര്‍ബാനയോടെയാകും ആഘോഷങ്ങള്‍ക്ക് തുടക്കമാവുക. ഡോ. ഗബ്രിയേല്‍ മാര്‍ ഗ്രിഗോറിയോസ് മെത്രോപ്പൊലീത്ത കുര്‍ബാനയ്ക്ക് കാര്‍മികത്വം വഹിക്കും. തുടര്‍ന്നു പുതുതായി നിര്‍മിച്ച ധ്യാന മുറിയുടെ ഉദ്ഘാടനം നടക്കും. ഈവര്‍ഷത്തെ ഇടവക പെരുന്നാള്‍ കൊടിയേറ്റിന് ശേഷം നടക്കുന്ന ശതാബ്ദി ആഘോഷങ്ങളുടെ ഉദ്ഘാടന ചടങ്ങില്‍ ഇടവക വികാരി ഫാ : ഗീവര്‍ഗീസ് പള്ളിവാതുക്കല്‍ അധ്യക്ഷത വഹിക്കും. ഡോ. ഗബ്രിയേല്‍ മാര്‍ ഗ്രിഗോറിയോസ് മെത്രോപ്പൊലീത്ത ആഘോഷ പരിപാടികള്‍ ഉദ്ഘാടനം ചെയ്യും. എന്‍.കെ. പ്രേമചന്ദ്രന്‍ എംപി മുഖ്യപ്രഭാഷണവും, പി.എസ്. സുപാല്‍ എംഎല്‍എ ശതാബ്ദി ഗാനപ്രകാശനവും, ഗ്രാമപഞ്ചായത്ത് പ്രസിഡന്‍റ് ജി. അജിത്ത് സന്നദ്ധ പ്രവര്‍ത്തനങ്ങളുടെ ഉദ്ഘാടനവും നിര്‍വഹിക്കും. ട്രസ്റ്റി പി.ടി. കൊച്ചുമ്മച്ചന്‍, പെരുന്നാള്‍ കണ്‍വീനര്‍ റെജി എബ്രഹാം, ഗ്രാമപഞ്ചായത്ത് അംഗങ്ങളായ ഷീന കൊച്ചുമ്മച്ചന്‍, ജോസഫ്, ഫാ. ജോഷ്വ കൊച്ചുവിളയില്‍, സ്വാമി നിത്യാനന്ദ ഭാരതി, ശിഹാബുദ്ദീന്‍ മദനി, ബിജി എം രാജു, രാധാകൃഷ്ണന്‍, മുരളീധരന്‍ എന്നിവര്‍ പ്രസംഗിക്കും. എസ്എസ്എല്‍സി, പ്ലസ്ടു പരീക്ഷകളില്‍ വിജയിച്ച കുട്ടികളെ ചടങ്ങില്‍ ആദരിക്കും. പെരുന്നാള്‍ ആഘോഷങ്ങള്‍ക്ക് 15 നു സമാപനം കുറിക്കുമെന്നും ശതാബ്ദി ആഘോഷങ്ങളുടെ ഭാഗമായി 12 മാസം 12 പദ്ധതികള്‍ നടപ്പിലാക്കുമെന്നും ഇടവക വികാരി ഫാ. ഗീവര്‍ഗീസ് പള്ളിവാതുക്കല്‍, ട്രസ്റ്റി പി.ടി. കൊച്ചുമ്മച്ചന്‍, സെക്രട്ടറി റോയ്തോമസ്, പെരുന്നാള്‍ കണ്‍വീനര്‍ റെജി എബ്രഹാം, കെ.കെ. റോയ് മോന്‍, ഒ.എം. ചാക്കോ എന്നിവര്‍ അഞ്ചലില്‍ വിളിച്ചുചേര്‍ത്ത വാര്‍ത്താ സമ്മേളനത്തില്‍ അറിയിച്ചു.

പഞ്ചായത്ത് കൈകോര്‍ത്ത ആദ്യ ഗ്രാമവണ്ടി നാടിനു പ്രിയങ്കരം

ചാത്തന്നൂര്‍: ചാത്തന്നൂര്‍ ഗ്രാമപഞ്ചായത്തിന്‍റെ നാട്ടുവഴികളിലൂടെ പഞ്ചായത്ത് കൈകോര്‍ത്തതോടെ കെ എസ് ആര്‍ ടി സിയുടെ ഗ്രാമവണ്ടി നാടിനു പ്രിയങ്കരമായി. നാട്ടിന്‍പുറമാകെ ഓടിയെത്തുന്ന ബസ് സര്‍വീസ് ആശ്രയിക്കാത്തവരായി ആരുമില്ല. സ്വീകാര്യത ഏറിയതോടെ ഗ്രാമവണ്ടിയുടെ വരുമാനവും ഏറി. ഗ്രാമീണമേഖലയില്‍ പൊതുഗതാഗതസൗകര്യം വിപുലീകരിക്കുന്നതിന്‍റെഭാഗമായി ചാത്തന്നൂര്‍ ഗ്രാമപഞ്ചായത്തും കെഎസ്ആര്‍ടിസിയും സംയുക്തമായി നടപ്പിലാക്കിയ പദ്ധതി ഇതോടെ വിജയത്തിന്‍റെ മറ്റൊരു മാതൃകയായി. ചാത്തന്നൂര്‍, പാരിപ്പള്ളി, കൊട്ടിയം, കൊല്ലം തുടങ്ങിയ പ്രധാന കേന്ദ്രങ്ങളിലൂടെയും പഞ്ചായത്തിലെ ഒട്ടുമിക്ക വാര്‍ഡുകളിലൂടെയും ഗ്രാമവണ്ടി സഞ്ചരിക്കുന്നു. ശീമാട്ടിമുക്ക്, സ്പിന്നിംഗ് മില്‍, കല്ലുവാതുക്കല്‍, മെഡിക്കല്‍ കോളജ്, കോഷ്ണക്കാവ്, മേലെവിള, വരിങ്ങല, ഇടനാട്, കൊല്ലായിക്കല്‍, മംഗളം ജംഗ്ഷന്‍, റാണി സ്റ്റോര്‍ ജംഗ്ഷന്‍, വയലിക്കട, മരക്കുളം, ഇത്തിക്കര, കോതേരി, കൊച്ചാലുംമൂട്, ബ്ലോക്ക് ജംഗ്ഷന്‍ എന്നിവിടങ്ങളിലൂടെയെല്ലമാണ് യാത്ര. അവധി ദിവസങ്ങള്‍ ഒഴികെ മറ്റെല്ലാ ദിവസങ്ങളിലും സര്‍വീസ് നടത്തുന്നു. വിദ്യാര്‍ഥികള്‍ക്കും ഓഫീസ് ജീവനക്കാര്‍ക്കും ഉപകാരപ്രദമായ സമയക്രമവും നിശ്ചയിച്ചിട്ടുണ്ട്.പഞ്ചായത്തിന്‍റെ ജനകീയ ആസൂത്രണ പദ്ധതിപ്രകാരമാണ് ഗ്രാമവണ്ടി ആരംഭിച്ചത്. നിശ്ചിത കിലോമീറ്റര്‍ അടിസ്ഥാനത്തില്‍ പ്രതിമാസ ഡീസല്‍ചെലവ് പഞ്ചായത്തിന്‍റെ തനത് ഫണ്ടില്‍നിന്നും നല്‍കും. ഭരണസമിതി ചുമതലപ്പെടുത്തിയ പ്രത്യേക കമ്മിറ്റി കൃത്യമായ നിരീക്ഷണവും നടത്തുന്നു. പ്രതിവര്‍ഷം 10 ലക്ഷം രൂപയാണ് പദ്ധതിക്കായി മാറ്റിവയ്ക്കുന്നത്. ജില്ലയില്‍പദ്ധതി നടപ്പിലാക്കിയ ഏക പഞ്ചായത്താണ് ചാത്തന്നൂരെന്ന് പഞ്ചായത്ത് പ്രസിഡന്‍റ് എസ്.കെ. ചന്ദ്രകുമാര്‍ പറഞ്ഞു.

പഴയേരൂർ സെന്‍റ് തോമസ് പള്ളിയിൽ ഇടവക തിരുനാൾ

പഴയേരൂർ: പഴയേരൂർ സെന്‍റ്തോമസ് പള്ളിയിൽ നടന്നു വരുന്ന ഇടവകത്തിരുനാൾ ആറിന് നടക്കുന്ന തിരുനാൾ പ്രദക്ഷിണത്തോടെ സമാപിക്കും. വിശുദ്ധ കുർബാനക്ക് ശേഷം ഇടവക ധ്യാനം ഫാ. ക്രിസ്റ്റി ചക്കാനിക്കുന്നേൽ നയിച്ചു. ഇന്ന് ദുക്റാന തിരുനാൾ ദിനത്തിൽ വൈകുന്നേരം 4 .30ന് കൽക്കുരിശ് വെഞ്ചിരിപ്പ് വികാരി ഫാ. ജോൺ തെക്കേക്കര നിർവഹിക്കും. തുടർന്ന് തിരുനാൾ കൊടിയേറ്റ്. ആഘോഷമായ വിശുദ്ധ കുർബാന ഫാ. മാത്യു നടയ്ക്കൽ അർപ്പിക്കും. തുടർന്ന് ഇടവക ദിനാഘോഷ പരിപാടികൾ നടക്കും. ഫാ. ജോസഫ് അയ്യങ്കരി സന്ദേശം നൽകും.ഇടവകയിലെ മരിച്ചവരുടെയും ഓർമദിവസം നാളെയാണ്. വൈകുന്നേരം നാലിന് റംശാ പ്രാർഥന, ആഘോഷമായ വിശുദ്ധ കുർബാന എന്നിവ ഫാ .ജോസഫ് തൈക്കള ത്തിന്‍റെ നേതൃത്വത്തിൽ നടക്കും. തുടർന്ന് സെമിത്തേരി സന്ദർശനം. അഞ്ചിന് വൈകുന്നേരം നാലിന് റംശാ പ്രാർഥന. ആഘോഷമായ വിശുദ്ധ കുർബാന സീറോ മലങ്കര ക്രമത്തിൽ ഫാ. ജോഷ്വാ കൊച്ചു വിളയിൽ അർപ്പിക്കും. തുടർന്ന് ആഘോഷമായ തിരുനാൾ പ്രദക്ഷിണം. ഫാ. ടോം കന്യാകോണിലിന്‍റ നേതൃത്വത്തിൽ പള്ളിയിൽനിന്ന് മറവഞ്ചിറ വഴി തോട്ടംമുക്ക് കുരിശടി ചുറ്റി പള്ളിയിലേക്ക് പോകും. തിരുനാൾ സമാപന ദിനമായ ആറിന് രാവിലെ 9.30ന് നടക്കുന്ന പ്രഭാത പ്രാർഥനക്ക് ശേഷം ഫാ. ജോജി മരങ്ങാത്തിന്‍റെ നേതൃത്വത്തിൽആഘോഷമായ തിരുനാൾ -റാസക്കുർബാന നടക്കും. തുടർന്ന് തിരുനാൾ പ്രദക്ഷിണം, നേർച്ച വസ്തുക്കളുടെ ലേലം, കൊടിയിറക്ക്‌ എന്നിവയോടെ തിരുനാൾ സമാപിക്കും.

ഭക്ഷ്യസുരക്ഷയുടെ പേരിൽ നടക്കുന്ന പരിശോധനകൾ പ്രഹസനം

കൊല്ലം: കിഴക്കൻ മേഖലയിൽ അടക്കം ഭക്ഷ്യ സുരക്ഷാ വിഭാഗവും ആരോഗ്യ വിഭാഗവും നടത്തുന്ന പരിശോധനകളൊക്കെ പ്രഹസനമാണെന്ന് പരാതി. പരിശോധന കഴിഞ്ഞു ഒരു നോട്ടിസും നൽകി മടങ്ങുന്നതല്ലാതെ തുടർ നടപടികൾ ഒന്നും ഉണ്ടാവാറില്ല. കിഴക്കുംഭാഗം, കുമ്മിൾ കടയ്ക്കൽ, നിലമേൽ എന്നിവിടങ്ങളിൽ ഭക്ഷ്യ സാധനങ്ങളുടെ വിൽപന സംബന്ധിച്ച് ഉയരുന്ന പരാതികൾക്കൊന്നിനും പരിഹാരമില്ലെന്നതാണ് വാസ്തവം. കഴിഞ്ഞ ദിവസമാണ് ചിതറ കിഴക്കും ഭാഗത്തെ ഹോട്ടലിൽ നിന്നു വാങ്ങിയ ബിരിയാണിയിൽ കുപ്പിച്ചില്ല് കണ്ടെത്തുന്നത്. പരാതിയെ തുടർന്ന് എത്തിയ ആരോഗ്യ വകുപ്പും ഭക്ഷ്യ സുരക്ഷാ വകുപ്പും പതിവ് പോലെ പരിശോധന നടത്തി. ബിരിയാണിയുടെ സാംപിൾ പരാതിക്കാരനിൽ നിന്ന് എടുക്കാൻ പോലും ഉദ്യോഗസ്ഥർ തയാറായില്ല. ഹോട്ടലിൽ പരിശോധന നടത്തിയ സംഘം ജീവനക്കാർക്ക് ഹെൽത്ത് കാർഡ് വേണമെന്ന് നിർദേശിച്ച് മടങ്ങുകയായിരുന്നു. കുപ്പിച്ചില്ല് കഴുത്തിൽ കുടുങ്ങി തൊണ്ട മുറിഞ്ഞ കിളിത്തട്ടു സ്വദേശി സൂരജ് ആശുപത്രി ചികിത്സയിലാണ്. പരാതി അന്വേഷിക്കാനെത്തിയ ഉദ്യോഗസ്ഥരുടെ അന്വേഷണം മറ്റു പല വഴിക്കാണ് നീങ്ങിയത്. ഹോട്ടലിലെ ഹൈജീൻ മാനദണ്ഡങ്ങൾ, അവശിഷ്ടങ്ങൾ സൂക്ഷിക്കുന്നത്, ഭക്ഷ്യ സാധനകളുടെ ശുദ്ധി, തെറ്റായ പാചക സംവിധാനം, തൊഴിലാളികൾക്ക് ഹെൽത്ത് കാർഡ് ഇല്ലായ്മ എന്നിവയിൽ അന്വേഷണം വഴിമാറി.കുമ്മിളിൽ കഴിഞ്ഞ ദിവസം 200 കിലോ പഴകിയ കോഴി ഇറച്ചി പിടികൂടിയിരുന്നു. നാട്ടുകാർ ഓട്ടോ തട‍ഞ്ഞ് നിർത്തി പരിശോധിക്കുമ്പോഴാണ് ഇറച്ചി കണ്ടെത്തുന്നത്. ആരോഗ്യ വകുപ്പു ഉദ്യോഗസ്ഥരും പോലീസും സ്ഥലത്തെത്തി ഓട്ടോ ഡ്രൈവറെ കസ്റ്റഡിയിൽ എടുത്തെങ്കിലും അനധികൃതമായി കോഴി ഇറച്ചി എത്തിച്ച കാര്യത്തിൽ ഒരു നടപടിയും എടുക്കാതെ കസ്റ്റഡിയിൽ എടുത്ത ആളെ വിട്ടയക്കുകയായിരുന്നു. കടയ്ക്കൽ മാർക്കറ്റിൽ ഭക്ഷ്യ സുരക്ഷാ വകുപ്പ് നടത്തിയ പരിശോധനയിലും കുറ്റക്കാരെ രക്ഷിക്കുന്ന പതിവ് ശൈലി തന്നെയാണ് നടന്നത്. പരിശോധന നടത്തി പിടികൂടിയ അഴുകിയ മത്സ്യം കുഴിച്ചിട്ടെങ്കിലും യാതൊരു നടപടിയും ഉണ്ടായില്ല. പഴകിയ മത്സ്യ വിൽപന അവിടെ ഇപ്പോഴും പൊടിപൊടിക്കുകയാണെന്നാണ് നാട്ടുകാർ ആരോപിക്കുന്നത്. അടുത്ത ദിവസമാണ് നിലമേലിലെ ഒരു ഹോട്ടലിൽ ഉച്ച ഭക്ഷണം കഴിക്കാൻ എത്തിയ കുടുംബത്തിന് അഴുകിയ മത്സ്യം വറുത്തത് നൽകുന്നത്. പരാതി പറ‍ഞ്ഞപ്പോൾ ആദ്യം നൽകിയ മത്സ്യം മാറ്റി മറ്റൊന്ന് നൽകി. ഇതും പഴയത് തന്നെ ആയിരുന്നു. സംഭവം സംബന്ധിച്ച് നിലമേൽ ആരോഗ്യ കേന്ദ്രത്തിൽ എത്തി ആരോഗ്യ വകുപ്പ് ഉദ്യോഗസ്ഥർക്ക് പരാതി നൽകിയെങ്കിലും പരിശോധന നടത്തി താക്കീത് നൽകി ഉദ്യോഗസ്ഥർ ചെന്നപോലെ മടങ്ങി. ബേക്കറിയിൽ നിന്നു വാങ്ങിയ ഷവർമയിൽ പുഴു കണ്ടെത്തിയ സംഭവം ഉണ്ടായതും കടക്കലിലാണ്. പരാതി ഉണ്ടായപ്പോൾ കടയ്ക്കൽ പള്ളിമുക്കിലെ ബേക്കറിയിൽ ആരോഗ്യ വകുപ്പ് ഉദ്യോഗസ്ഥർ പരിശോധന നടത്തി പതിവ് ശൈലിയിൽ നോട്ടിസ് നൽകി മടങ്ങുകയാണ് ചെയ്തത്. പല പരാതികളിന്മേലും ഭക്ഷ്യ സുരക്ഷാ വകുപ്പ് ഉദ്യോഗസ്ഥർ എത്താറില്ലെന്നാണ് പ്രധാന പരാതി. പത്ര വാർത്തകളോ രാഷ്ട്രീയ സമ്മർദ്ദങ്ങളോ ഉണ്ടായാൽ ദിവസങ്ങൾ കഴിഞ്ഞു സാമ്പിൾ പോലും എടുക്കാൻ കഴിയാതെ പരിശോധന നടത്താനെന്ന പേരിൽ വന്നു മടങ്ങാറാണ് പതിവ്.

കാണാതായ വയോധികയെ മരിച്ച നിലയിൽ കണ്ടെത്തി

ചവറ : കാണാതായ വയോധികയെ ഒഴിഞ്ഞ പുരയിടത്തിൽ മരിച്ച നിലയിൽ കണ്ടെത്തി. നീണ്ടകര എ എം സി മുക്ക് തെറ്റിക്കാട്ട് വീട്ടിൽ ബാബുവിന്‍റെ ഭാര്യ തങ്കമ്മ (71) യെയാണ് മരിച്ച നിലയിൽ കണ്ടെത്തിയത്. ജൂൺ 22 മുതൽ ഇവരെ കാണാതായിരുന്നു. പോലീസിൽ പരാതി നൽകി അന്വേഷണം നടത്തിയെങ്കിലും കണ്ടെത്തിയിരുന്നില്ല. ചവറ പോലീസ് ഇൻക്വസ്റ്റ് തയ്യാറാക്കി മൃതദേഹം പാരിപ്പള്ളി മെഡിക്കൽ കോളജിലേക്ക് മാറ്റി. എന്നാൽ വീടിന് സമീപത്തു നിന്നും അല്പം മാറിയുള്ള പുരയിടത്തിൽ വയോധിക എന്തിനു പോയിയെന്ന് അറിയില്ല. പോസ്റ്റുമോർട്ടം റിപ്പോർട്ട് കിട്ടിയാലേ മരണകാരണം വ്യക്തമാകുയെന്ന് പോലീസ് പറഞ്ഞു. മക്കൾ: സുമേഷ്, സുരേഷ്, സുധീഷ് മരുമക്കൾ : ബിന്ദു, ഗ്രീഷ്മ.

കെഎസ്എസ്പിഎ ധർണ നടത്തി

ചടയമംഗലം : പെൻഷൻ പരിഷ്കരണം നടപ്പിലാക്കുക, ഡി ആർ കുടിശിക മുൻകാല പ്രാബല്യത്തോടെ നടപ്പാക്കുക, മെഡിസെപ് പരിഷ്കരിക്കുക, തുടങ്ങിയ അവകാശ നിഷേധങ്ങൾക്കെതിരെ കെഎസ്എസ്പിഎ ചടയമംഗലം നിയോജകമണ്ഡലം കമ്മിറ്റിയുടെ നേതൃത്വത്തിൽ ചടയമംഗലം സബ്ട്രഷറിയുടെ മുൻപിൽ ധർണയും പ്രകടനവും നടത്തി. സമ്മേളനം ജില്ലാ വൈസ് പ്രസിഡന്‍റ് പട്ടരുവിള വിജയൻ ഉദ്ഘാടനം ചെയ്തു. നിയോജകമണ്ഡലം സെക്രട്ടറി ചിതറ നിസാം, ട്രഷറർ സുദർശനൻ പിള്ള, സംസ്ഥാന കൗൺസിൽ അംഗങ്ങളായ പി. ഒ. പാപ്പച്ചൻ, എച്ച്. നാസർ, ജവഹർ അലിഖാൻ, വടക്കതിൽ സലീം, വി. ചന്ദ്രമോഹനൻ, ജേക്കബ് ആന്‍റണി തുടങ്ങിയവർ നേതൃത്വം നൽകി.

കൊട്ടാരക്കരയിലെ ഐടി കാമ്പസ് മുഖ്യമന്ത്രി ഇന്ന് നാടിന് സമര്‍പ്പിക്കും

കൊല്ലം: പ്രാദേശികതലത്തില്‍ യുവതയുടെ തൊഴില്‍നൈപുണ്യം, അവസരം ലക്ഷ്യമാക്കി സ്വകാര്യ സ്ഥാപനങ്ങളുടേയും സാന്നിധ്യം ഉറപ്പാക്കുന്നു.രാജ്യാന്തര ഐടി കമ്പനിയായ സോഹോ കോര്‍പറേഷ െ ന്‍റ ഇന്ത്യയിലെ രണ്ടാമത്തെ ഐടി കാമ്പസ് കൊട്ടാരക്കര നെടുവത്തൂരില്‍ തുടങ്ങുകയാണ്. നവകാല തൊഴില്‍ സാധ്യതകളെ പരമാവധി പ്രയോജനപ്പെടുത്താനുള്ള മന്ത്രി കെ. എന്‍. ബാലഗോപാലി െ െ ന്‍റ ലക്ഷ്യത്തി െന്‍റ തുടര്‍ച്ചയാണ് പുതുസംരംഭവും. ഇന്ന് വൈകുന്നേരം നാലിന് മുഖ്യമന്ത്രി പിണറായി വിജയന്‍ ഉദ്ഘാടനം നിര്‍വഹിക്കും. മന്ത്രി കെ.എന്‍.ബാലഗോപാല്‍ അധ്യക്ഷനാകും.ഒന്നര വര്‍ഷം മുന്‍പ് കൊട്ടാരക്കര ഐഎച്ച്ആര്‍ഡി കാമ്പസില്‍ സ്റ്റാര്‍ട്ട് അപ് മിഷന്‍റെ സഹകരണത്തോടെ സ്ഥാപിച്ച ആര്‍ ആൻഡ് ഡി കേന്ദ്രത്തിന്‍റെ തുടര്‍ച്ചയാണ് പുതിയ സ്ഥാപനവും. ആദ്യഘട്ടത്തില്‍ 250 പേര്‍ക്ക് ജോലി ലഭ്യമാക്കും. വന്‍നഗരങ്ങള്‍ കൂടാതെ ഗ്രാമ-ചെറു പട്ടണങ്ങളിലെ തൊഴില്‍നൈപുണ്യമുള്ളവരുടെ സേവനം ഐ ടി മേഖലയില്‍ ഉറപ്പാക്കാന്‍ കഴിയുന്ന പദ്ധതികള്‍ നടപ്പാക്കുകയാണ് സംസ്ഥാന സര്‍ക്കാര്‍. റോബോട്ടിക്‌സ്, നിര്‍മിത ബുദ്ധി മേഖലകള്‍ കേന്ദ്രീകരിച്ചാണ് പുതു സംരംഭങ്ങളുടെ പ്രവര്‍ത്തനം. പരിപാടിയില്‍ കേരള സ്റ്റാര്‍ട്ട് അപ് മിഷന്‍ ഉള്‍പ്പെടെ വിവിധ കമ്പനികളുമായി ചേര്‍ന്ന് പ്രവര്‍ത്തിക്കുന്നതി െ ന്‍റ പ്രഖ്യാപനവും ധാരണാപത്രം കൈമാറലും നടക്കും. കൊടിക്കുന്നില്‍ സുരേഷ് എംപി, ഐഎസ്ആര്‍ഒ മുന്‍ ചെയര്‍മാന്‍ ഡോ. എസ്. സോമനാഥ്, ഐടി സെക്രട്ടറി ശ്രീറാം സാംബശിവറാവു, കേരള സ്റ്റാര്‍ട്ട് അപ് മിഷന്‍ സി.ഇ.ഒ അനൂപ് അംബിക, സോഹോ കോര്‍പറേഷന്‍ സി.ഇ.ഒ ശൈലേഷ് കുമാര്‍ ധാവേ, ആര്‍ ആന്‍ഡ് ഡി സെന്‍റര്‍ പ്രിന്‍സിപ്പല്‍ റിസര്‍ച്ചര്‍ ഡോ. ജയരാജ് പോരൂര്‍, സഹ സ്ഥാപകരായ ശ്രീധര്‍ വെമ്പു, ടോണി ജി. തോമസ്, പ്രോഗ്രാം മാനേജര്‍ മഹേഷ് ബാല, കൊട്ടാരക്കര നഗരസഭാ ചെയര്‍മാന്‍ കെ. ഉണ്ണികൃഷ്ണമേനോന്‍, ത്രിതല പഞ്ചായത്ത് പ്രതിനിധികള്‍ തുടങ്ങിയര്‍ പങ്കെടുക്കും.

വനപാലകനെ കൈയേറ്റം ചെയ്ത പ്രതി അറസ്റ്റിൽ

വിതുര: പൊന്മുടി യാത്രക്കിടയിൽ വനപാലകനെ കൈയേറ്റം ചെയ്ത പ്രതിയെ വിതുര പോലീസ് അറസ്റ്റ് ചെയ്തു. വെള്ളറട കിളിയൂർ കാരുണ്യ ഭവനിൽ സുജിയാണ് പോലീസിന്‍റെ പിടിയിലായത്. കഴിഞ്ഞദിവസം സുഹൃത്തുക്കളുമൊത്ത് ട്രാവലർ വാഹനത്തിൽ പൊന്മുടിയിൽ പോകുന്നതിനിടയിൽ കാട്ടിനുള്ളിലെ മൃഗങ്ങൾക്കു ശല്യം ഉണ്ടാവുന്ന രീതിയിൽ വാഹനത്തിലെ സൗണ്ട് സിസ്റ്റം ഉപയോഗിച്ച് വലിയ ശബ്ദം പുറപ്പെടുവിച്ചു. കൂടാതെ പൊന്മുടിയിൽ പോയി തിരിച്ചു വരുന്നവഴി ഗോൾഡൻ വാലി ചെക്ക് പോസ്റ്റിൽ എത്തിയപ്പോൾ ഡ്യൂട്ടിയിൽ ഉണ്ടായിരുന്ന ബീറ്റ് ഫോറസ്റ്റ് ഓഫീസറെ കൈയേറ്റം ചെയ്യുകയും ചെയ്തു. തുടർന്നു വിതുര പോലീസ് സ്ഥലത്തെത്തി ഇയാളെ അറസ്റ്റ് ചെയ്തു. ഇയാളുടെ പേരിൽ വെള്ളറട സ്റ്റേഷനിൽ നിരവധി കേസുകൾ നിലവിലുണ്ടെന്നു പോലീസ് അറിയിച്ചു.

ഞാങ്കടവ് കുടിവെള്ള പദ്ധതി അവസാനഘട്ടത്തിൽ

കൊല്ലം കോര്‍പറേഷന്‍ നടപ്പാക്കുന്ന പദ്ധതി 2026 മേയ് മാസം കമ്മീഷന്‍ ചെയ്യുന്നതോടെ 24 മണിക്കൂറും നഗരത്തില്‍ ശുദ്ധജല ലഭ്യത ഉറപ്പാകും കൊല്ലം: ഞാങ്കടവ് കുടിവെള്ള പദ്ധതി അവസാനഘട്ടത്തിലേക്ക്. നഗരമേഖലയിലെ കുടിവെള്ള ദൗര്‍ലഭ്യതയ്ക്ക്പരിഹാരമാകുന്ന ഞാങ്കടവ് കുടിവെള്ളപദ്ധതി അവസാനഘട്ടത്തില്‍. കൊല്ലം കോര്‍പറേഷന്‍ നടപ്പാക്കുന്നപദ്ധതി 2026 മേയ് മാസം കമ്മീഷന്‍ ചെയ്യുന്നതോടെ 24 മണിക്കൂറും നഗരത്തില്‍ ശുദ്ധജല ലഭ്യത ഉറപ്പാകും. അമൃത് ഒന്നാം ഘട്ടം, രണ്ടാംഘട്ടം, കിഫ്ബി ഫണ്ടുകള്‍ ഉപയോഗിച്ച് 600 കോടി രൂപ ചിലവിലുള്ള പദ്ധതിയാണ് ഞാങ്കടവ്. അമൃത് ഒന്നാം ഘട്ടത്തില്‍ നിന്നും 104.42 കോടിയും രണ്ടാംഘട്ടത്തില്‍ നിന്ന് 227.13 കോടിയും കിഫ്ബി ഫണ്ടില്‍ നിന്ന് 235 കോടിയുമാണ് ഭരണാനുമതിയായത്.കടവൂര്‍, ശക്തികുളങ്ങര, ആശ്രാമം, കിളികൊല്ലൂര്‍, ആനന്ദവല്ലീശ്വരം, ജലഭവന്‍, വടക്കേവിള, ബിഷപ്പ് ജെറോം എന്നിവിടങ്ങളിലെ സംഭരണികളിലൂടെയാണ് ശാസ്താംകോട്ട കുടിവെള്ള പദ്ധതിയുടെ ഭാഗമായി നിലവില്‍ നഗരത്തില്‍ വെള്ളം എത്തിക്കുന്നത്. ഞാങ്കടവ് കുടിവെള്ള പദ്ധതിയുടെ ഭാഗമായി മണിച്ചിത്തോട്ടിലും വസൂരി ചിറയിലും പുതിയ ജലസംഭരണി നിര്‍മിച്ചു കഴിഞ്ഞു. ആനന്ദവല്ലീശ്വരത്തും ബിഷപ്പ് ജെറോം നഗറിലും നിലവിലുള്ളവ കൂടാതെ പുതിയ ജലസംഭരണിയുടെയും അഞ്ചാലുംമൂട്, മുണ്ടയ്ക്കല്‍, ഇരവിപുരം എന്നിവിടങ്ങളില്‍ പുതിയ ജലസംഭരണിയുടെയും നിര്‍മാണം ഉടന്‍ തുടങ്ങും. പുന്തലത്താഴത്തിനടുത്ത് വസൂരിചിറയിലെ ഏഴ് ഏക്കറിലാണ്പദ്ധതിക്കായി ജലശുചീകരണ പ്ലാന്‍റ്. കല്ലടയാറില്‍നിന്നും ജലം പ്രധാന പൈപ്പിലൂടെ 28 കിലോമീറ്റര്‍ അകലെയുള്ള വസൂരി ചിറയിലെ പ്ലാന്‍റില്‍ എത്തിച്ച് ശുദ്ധീകരിച്ചതിന് ശേഷം പൈപ്പുകള്‍വഴി വിവിധ ഭാഗത്തെ ജലസംഭരണികളിലേക്കും അവയില്‍നിന്നും ചെറിയ പൈപ്പുകളിലേക്കും ഗാര്‍ഹികവിതരണ പൈപ്പുകളിലേക്കും എത്തിക്കുകയാണ് ലക്ഷ്യം. കുണ്ടറ-പെരിനാട് പഞ്ചായത്ത് റോഡ് വഴിയുള്ള പൈപ് ലൈന്‍ പ്രവര്‍ത്തനങ്ങള്‍ രണ്ടുമാസത്തിനകം പൂര്‍ത്തിയാകും. 2026 മെയ് മാസത്തോടെ പ്ലാന്‍റ് കമ്മീഷന്‍ ചെയ്യാനാകുമെന്നാണ് പ്രതീക്ഷ. ആധുനിക രീതിയിലുള്ള സ്‌കോഡ പമ്പ് സെറ്റുകളാണ് വെള്ളം കൊണ്ടുവരുന്നതിനായി ഉപയോഗിക്കുന്നത്. (ഒരു മണിക്കൂറില്‍ ശുദ്ധീകരിച്ചതും ഒരു ദിവസം ശുദ്ധീകരിച്ചതുമായ ജലത്തി െ ന്‍റ അളവ്, ഗുണനിലവാരം തുടങ്ങി എല്ലാ വിവരങ്ങളും നല്‍കുന്ന ഓട്ടോമേറ്റഡ് സംവിധാനമാണ് സൂപ്പര്‍വൈസറി കണ്‍ട്രോള്‍ ആന്‍ഡ് ഡാറ്റാ അക്വിസിഷന്‍ സിസ്റ്റം എന്ന സ്‌കോഡ.) ഇതിലൂടെ ജലശുദ്ധീകരണവും ജലവിതരണവും 24 മണിക്കൂറും കണ്‍ട്രോള്‍ റൂമിലിരുന്ന് നിരീക്ഷിക്കാന്‍ കഴിയും.ആനന്ദവല്ലീശ്വരത്ത് പുതിയ പ്ലാന്‍റ് നിര്‍മിച്ച് ജലം എത്തിക്കാനുള്ള ശ്രമങ്ങളും പുരോഗമിക്കുകയാണ്. വാട്ടര്‍ അഥോറിറ്റിക്കാണ് പദ്ധതിയുടെ മേല്‍നോട്ട ചുമതല. ഞാങ്കടവില്‍ നിന്ന് വെള്ളം പമ്പ് ചെയ്ത് 100 എം എല്‍ ഡി ശേഷിയുള്ള വസൂരി ചിറയിലെ ജലസംഭരണിയില്‍ എത്തിച്ച് ശുദ്ധീകരിച്ച് കോര്‍പ്പറേഷ െ ന്‍റ വിവിധ ഭാഗത്തേക്ക് എത്തിക്കും. 40500 ഗാര്‍ഹിക കണക്ഷനും ഞാങ്കടവ് കുടിവെള്ള പദ്ധതി ഉറപ്പാക്കും. ശാസ്താംകോട്ട ശുദ്ധജല തടാകത്തില്‍നിന്നെത്തുന്ന ജലം ശേഖരിക്കുന്ന സംഭരണികളിലേക്കും പുതുതായി നിര്‍മിക്കാന്‍ പോകുന്ന ആറ് ജലസംഭരണികളിലേക്കും ജലശേഖരണം നടത്തിയാകും വസൂരിച്ചിറയിലെ പ്ലാന്‍റ് തുറന്നു പ്രവര്‍ത്തിക്കുക എന്ന് വാട്ടര്‍ അഥോ റിറ്റി എക്‌സിക്യൂട്ടീവ് എൻജിനിയര്‍ എം.സി. നാരായണന്‍ പറഞ്ഞു.

മെത്രാസന ശുശ്രൂഷക സംഘം വാർഷിക സമ്മേളനം നടന്നു

കുണ്ടറ : കൊല്ലം മെത്രാസന ശുശ്രൂഷക സംഘം വാർഷിക സമ്മേളനം നടന്നു. നെടുമ്പായിക്കുളം സെന്‍റ് ജോർജ് ഓർത്തഡോക്സ് പള്ളിയിൽ നടന്ന സമ്മേളനം ഭദ്രാസന മെത്രാപ്പോലീത്ത ഡോ. ജോസഫ് മാർ ദിവാന്നാസിയോസ് ഉദ്ഘാടനം ചെയ്തു. ഇടവക വികാരി ഫാ.മാത്യുസ് ടി. ജോർജ് തലവൂർ അധ്യക്ഷത വഹിച്ചു. ജോർജ് പുളിക്കൻ ക്ലാസുകൾക്ക് നേതൃത്വം നൽകി.

പേവിഷബാധ; ബോധവത്കരണ ക്ലാസ് നടത്തി

ചോഴിയക്കോട്: പേവിഷബാധയ്‌ക്കെതിരേ ആരോഗ്യവകുപ്പ് വിദ്യാഭ്യാസ വകുപ്പുമായി സഹകരിച്ച് നടത്തുന്ന ബോധവത്ക്കരണ കാമ്പയിൻ കുളത്തൂപ്പുഴ ഗവ. മോഡൽ റസിഡൻഷ്യൽ സ്കൂളിൽ സംഘടിപ്പിച്ചു. മൃഗങ്ങളുടെ കടിയോ, മാന്തലോ, പോറലോ ഏറ്റാല്‍ രോഗ പ്രതിരോധത്തി െ ന്‍റ ഭാഗമായി നല്‍കേണ്ട പ്രഥമ ശുശ്രൂഷ, വാക്‌സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയെപ്പറ്റി കുളത്തൂപ്പുഴ സിഎച്ച്സിയിലെ ജൂണിയർ ഹെൽത്ത് ഇൻസ്പെക്ടർമാരായ എം.എൻ. നസീംഖാൻ, വി.എസ്.പ്രദീപ് എന്നിവർ കുട്ടികള്‍ക്ക് ക്ലാസെടുത്തു. ‌ പേവിഷബാധ പ്രതിരോധ ബോധവത്കരണ പ്രതിജ്ഞയിൽ വിദ്യാർഥികളും ജീവനക്കാരും പങ്കാളികളായി. സ്കൂൾ മാനേജർ എസ്. ഷാഹിർ, സ്റ്റാഫ് സെക്രട്ടറി സണ്ണി സെറാഫിൻ, എൻ എസ് എസ് പ്രോഗ്രം ഓഫീസർ എസ്. ഉണ്ണികൃഷ്ണൻ നായർ, എം സി ആർ.ടി.രമേശ്, അധ്യാപകൻ എച്ച്. ഹസൈൻ എന്നിവർ ബോധവത്കരണ കാമ്പയിന് നേതൃത്വം നൽകി.

എസ്ബിഐ സ്ഥാപകദിനം ആഘോഷിച്ചു

കൊല്ലം: സ്റ്റേറ്റ് ബാങ്ക് ഓഫ് ഇന്ത്യ സ്ഥാപക ദിനത്തോടനുബന്ധിച്ചു എസ് ബി ഐ കൊല്ലം ഹോം ലോൺ സെന്‍ററി െന്‍റ ആഭിമുഖ്യത്തിൽ വിദ്യാഭ്യാസ വായ്‌പ മേള സംഘടിപ്പിച്ചു. ഡപ്യൂട്ടി ജനറൽ മാനേജർ ആനന്ദ് മുക്തൻ മേള ഉദ്ഘാടനം ചെയ്തു. അസി. ജനറൽ മാനേജർ എം.മഞ്ജു, വിദ്യാർഥികളായ സോന, ശബരിനാഥ് എന്നിവർക്കൊപ്പം ആഘോഷ കേക്ക് മുറിച്ചു മധുരം പങ്കുവച്ചു. ചീഫ് മാനേജർമാരായ രാജകൈലാസനാഥ് ആദി നാരായണൻ, ജി.ഹരികൃഷ്ണൻ തുടങ്ങിയവർ പങ്കെടുത്തു. സ്റ്റേറ്റ് ബാങ്ക് ഓഫ് ഇന്ത്യയുടെ എഴുപതാം പിറന്നാളിനോടനുബന്ധിച് 70 കുട്ടികൾക്ക് ഇന്നലെ വിദ്യാഭ്യാസ വായ്‌പക്കുള്ള അനുമതി പത്രം നൽകി.

റെയിൽവേ ഗേറ്റുകളിൽ വിരമിച്ച സൈനികരെ കരാർ അടിസ്ഥാനത്തിൽ നിയമിക്കാൻ ഉത്തരവ്

കൊല്ലം: റെയിൽവേ ഗേറ്റുകളിൽ നിന്ന് സ്ഥിരം ജീവനക്കാരായ കീപ്പർമാരെ ഒഴിവാക്കി പകരം എക്സ് സർവീസ്മാൻമാരെ നിയമിക്കാൻ ഉത്തരവ്. പകരക്കാരെ കരാർ അടിസ്ഥാനത്തിലാണ് നിയമിക്കുന്നത്. പുനലൂർ സെക്ഷനിലെ എട്ട് ഗേറ്റുകളിൽ ഇത്തരത്തിൽ വിരമിച്ച സൈനികരെ നിയമിച്ച് കഴിഞ്ഞ ദിവസം ഉത്തരവ് ഇറങ്ങി. മധുര ഡിവിഷന് കീഴിലുള്ള ചെങ്കോട്ടയിലെ അഡീഷണൽ ഡിവിഷണൽ എൻജിനിയറുടേതാണ് ഉത്തരവ്. വിചിത്രമായ ഈ ഉത്തരവിൽ പ്രതിഷേധിച്ച് ഡിവിഷണൽ റെയിൽവേ എംപ്ലോയീസ് യൂണിയൻ - ഡിആർഇയു അടക്കം വിവിധ സംഘടനകൾ രംഗത്ത് വന്നിട്ടുണ്ട്. വേണ്ടത്ര പരിശീലനമോ പ്രവർത്തി പരിചയമോ ഇല്ലാത്തവരെയാണ് ഇത്തരത്തിൽ നിയമിക്കുന്നതെന്ന് യൂണിയൻ പുനലൂർ ബ്രാഞ്ച് പ്രസിഡന്‍റ് പി. എസ്. പ്രിയേഷ് ബാബുവും സെക്രട്ടറി എ. അൻസാറും ചൂണ്ടിക്കാട്ടി. ട്രെയിൻ യാത്രകളുടെ തുടക്കം റെയിൽവേയുടെ സുരക്ഷാ സംവിധാനങ്ങളെ പ്രതികൂലമായി ബാധിക്കുന്നതാണ് ഈ ഉത്തരവ്. നേരത്തേയും ഇത്തരത്തിൽ കരാർ ജീവനക്കാരെ നിയമിക്കാൻ അധികൃതർ തീരുമാനിച്ചങ്കിലും റെയിൽവേ സ്ഥിരം ജീവനക്കാരുടെ ശക്തമായ എതിർപ്പ് കാരണം അത് നടന്നില്ല. നിലവിൽ ഗേറ്റ് ഡ്യൂട്ടി ചെയ്തവരെ ട്രാക്ക് വർക്കുകൾക്കായി നിയോഗിച്ച ശേഷമാണ് കരാർ ജീവനക്കാർക്ക് ചുമതല നൽകുന്നത്.നേരത്തേ വിരമിച്ച സൈനികരെ റെയിൽവേ ഇത്തരത്തിൽ റിക്രൂട്ട് ചെയ്തിരുന്നു. അന്ന് അവർക്ക് സ്ഥിരം ജീവനക്കാരായി നിയമനവും നൽകുകയുണ്ടായി. കൃത്യമായ പരിശീലനവും നൽകിയാണ് ഇവരെ പിന്നീട് ഡ്യൂട്ടിക്ക് നിയോഗിച്ചിട്ടുള്ളത്. ഇപ്പോഴത്തെ ഉത്തരവ് പ്രകാരം ഡ്യൂട്ടിക്ക് നിയോഗിക്കപ്പെട്ടവർക്ക് ഒരു ദിവസത്തെ പരിശീലനം മാത്രമാണ് നൽകുന്നത്. ഈ പരീശീലനം അപ്രായോഗികമാണെന്നും ജീവനക്കാരുടെ സംഘടനാ ഭാരവാഹികൾ പറഞ്ഞു. കരാർ അടിസ്ഥാനത്തിൽ നിയമിച്ചവർക്ക് തുഛമായ പ്രതിമാസ ശമ്പളം മാത്രമാണ് കൊടുക്കുന്നത്. മറ്റ് ആനുകൂല്യങ്ങൾ ഒന്നും നൽകാറില്ല. ഗേറ്റുകളിൽ കരാർ അടിസ്ഥാനത്തിൽ കീപ്പർമാരെ നിയമിക്കാനുള്ള ഉത്തരവ് അടിയന്തിരമായി പിൻവലിക്കണമെന്ന് ആവശ്യപ്പെട്ട് യൂണിയൻ ഭാരവാഹികൾ മധുര ഡിവിഷൻ റെയിൽവേ മാനേജർക്ക് നിവേദനം നൽകിയിട്ടുണ്ട്. അധികൃതരുടെ ഏകപക്ഷീയമായ നടപടിയിൽ പ്രതിഷേധിച്ച് ഇന്ന് പുനലൂരിലെ റെയിൽവേ സീനിയർ സെക്ഷൻ എൻജിനിയർ ഓഫീസിന് മുന്നിൽ ഡിആർഇയുവി െന്‍റ നേതൃത്വത്തിൽ സമര പരിപാടികളും സംഘടിപ്പിച്ചിട്ടുണ്ട്.

ജില്ലയിൽ ഇന്ന് എഐഎസ്എഫ് വിദ്യാഭ്യാസ ബന്ദ്

കൊല്ലം: ടികെഎം കോളജിൽ എഐഎസ്എഫ് ജില്ലാ ഭാരവാഹികളെ എസ്എഫ്ഐ പ്രവർത്തകർ മർദിച്ചതിൽ പ്രതിഷേധിച്ച് എഐഎസ്എഫ് ജില്ലാ കമ്മിറ്റി ഇന്ന് ജില്ലയിൽ വിദ്യാഭ്യാസ ബന്ദിന് ആഹ്വാനം ചെയ്തു. ജില്ലയിലെ പല കോളജുകളിലും എഐഎസ്എഫിന് നേരെ എസ്എഫ്‌ഐയുടെ ആക്രമണമുണ്ടായെന്നും സംസ്ഥാന സെക്രട്ടറി എ.അധിൻ പത്രസമ്മേളനത്തിൽ ആരോപിച്ചു. കലാലയങ്ങളിൽ അക്രമ രാഷ്്‌ട്രീയം ഏറ്റവും കൂടിയ ജില്ലയായി കൊല്ലം മാറി. ഇന്നലെ ടികെഎം കോളജിന് മുന്നിൽ സ്ഥാപിച്ചിരുന്ന തങ്ങളുടെ കൊടി തോരണങ്ങൾ എസ്എഫ്‌ഐ നശിപ്പിച്ചു. എഐഎസ്എഫ് പ്രവർത്തകരെ ആക്രമിക്കുകയും ഉണ്ടായി. ഏരിയാ സെക്രട്ടറിയുടെ നേതൃത്വത്തിലായിരുന്നു മർദനം. എസ്എൻ കോളജിലെ എസ്എഫ്ഐ യൂണിറ്റ് ഭാരവഹികളാണ് ടികെഎം കോളജിലെത്തി ആക്രമണം നടത്തിയതെന്ന് അധിൻ വ്യക്തമാക്കി.

രവാഡ ചന്ദ്രശേഖറിനെ സംസ്ഥാന ഡിജിപിയായി നിയമിച്ചതില്‍ ദുരൂഹത: പ്രേമചന്ദ്രന്‍ എംപി

കൊല്ലം: സഖാവ് പുഷ്പന്‍ ഉള്‍പ്പെടെ ധീരരായ ആറ് ഡിവൈഎഫ്ഐ സഖാക്കളുടെ രക്തസാക്ഷിത്വത്തിനിടയാക്കിയ കൂത്തുപ്പറമ്പ് വെടിവെയ്പ്പ് കേസിലെ പ്രധാനപ്രതിയെന്ന് സിപിഎം ആരോപിച്ച രവാഡ ചന്ദ്രശേഖറിനെ സിപിഎം നേത്വത്വത്തിലുളള ഗവണ്‍മെന്‍റ് തന്നെ സംസ്ഥാന ഡിജിപിയായി നിയമിച്ചതില്‍ ദുരൂഹതയുണ്ടെന്ന് എന്‍.കെ. പ്രേമചന്ദ്രന്‍ എംപി ആരോപിച്ചു. പിണറായി വിജയന്‍ ഗവണ്‍മെന്‍റ് പൂർണമായും ബിജെപി - സംഘപരിവാര്‍ ശക്തികള്‍ക്ക് വിധേയപ്പെട്ടിരിക്കുന്നു എന്നതിന്‍റെ ഒടുവിലത്തെ ഉദാഹരണമാണിതെന്ന് പ്രേമചന്ദ്രന്‍ പറഞ്ഞു. 2016-ല്‍ പിണറായി മുഖ്യമന്ത്രിയായ ശേഷം പ്രധാനമന്ത്രിയുമായി ഡല്‍ഹിയില്‍ നടന്ന കൂടിക്കാഴ്ചയ്ക്ക് ശേഷമാണ് ടി.പി സെന്‍കുമാറിനെ ഒഴിവാക്കി ലോക്നാഥ് ബഹ്റയെ ഡിജിപിയായി നിയമിച്ചത്. ആ നിമയനത്തിന് സമാനമാണ് ഇപ്പോഴത്തെ ഡിജിപി നിയമനവും. ഇത് കേരളത്തിലെ സിപിഎമ്മനേയും ബിജെപിയേയും ബന്ധിപ്പിക്കുന്ന ദൃഢമായ ‘ഹൗറ പാലമാണ്'. രവാഡ ചന്ദ്രശേഖറിനെ കുറ്റവിമുക്തനാക്കി ന്യായീകരിക്കാന്‍ മത്സരിക്കുന്ന സിപിഎം നേതാക്കള്‍ കേരള സമൂഹത്തോട് പരസ്യമായി മാപ്പ് പറയണമെന്നും പ്രേമചന്ദ്രന്‍ ആവശ്യപ്പെട്ടു.

ഹോട്ടലില്‍ നിന്നും വാങ്ങിയ ബിരിയാണിയില്‍ കുപ്പിച്ചില്ല്

കൊല്ലം: ഹോട്ടലില്‍ നിന്നും വാങ്ങിയ ബിരിയാണിയില്‍ കുപ്പിച്ചില്ല് കണ്ടതായി പരാതി. ചിതറയിലെ ഹോട്ടലില്‍ നിന്ന് വാങ്ങിയ ബിരിയാണിയിലാണ് കുപ്പിച്ചില്ല് കണ്ടത്. ചില്ല് കുടുങ്ങി തൊണ്ട മുറിഞ്ഞ കിളിത്തട്ട് സ്വദേശി സൂരജ് ആശുപത്രിയില്‍ ചികിത്സ തേടി. കഴിഞ്ഞ ദിവസം ഉച്ചയ്ക്ക് ഒന്നരയ്ക്കാണ് ചിതറ പഞ്ചായത്തിലെ താത്കാലിക ജീവനക്കാരനായ സൂരജ് ഹോട്ടലില്‍ നിന്നും നാല് ബിരിയാണി പാർസലായി വാങ്ങിയത്. വീട്ടിലെത്തിയ സൂരജ് ഗര്‍ഭിണിയായ ഭാര്യയ്ക്കും സഹോദനുമൊപ്പം ബിരിയാണി കഴിച്ചു.പകുതിയോളം കഴിച്ചപ്പോൾ സൂരജിന് വായ്ക്കുള്ളില്‍ എന്തോ തടഞ്ഞതായി തോന്നി. എല്ലിന്‍ കഷണമാണന്ന് കരുതി കടിച്ചു പൊട്ടിച്ചു. അസ്വാഭാവികത അനുഭവപ്പെട്ടതിനെ തുടര്‍ന്ന് പുറത്തെടുത്തപ്പോഴാണ് കുപ്പിച്ചില്ലാണെന്ന് മനസിലായത്. തുടര്‍ന്ന് കടയ്ക്കല്‍ താലൂക്ക് ആശുപത്രിയില്‍ ചികിത്സ തേടി. ഇയാളുടെ തൊണ്ടയില്‍ മുറിവുണ്ട്. എക്‌സ്-റേ ഉള്‍പ്പെടെ എടുത്ത് നോക്കിയെങ്കിലും ശരീരത്തിനുള്ളില്‍ കുപ്പിച്ചില്ല് ഉള്ളതായി കണ്ടെത്തിയില്ല. എന്നാല്‍ മറ്റു ശാരീരിക ബുദ്ധിമുട്ടുകള്‍ ഉണ്ടാവുകയാണെങ്കില്‍ സ്‌കാനിംഗ് ഉള്‍പ്പെടെ നടത്തണമെന്ന് നിര്‍ദേശിച്ച് ആശുപത്രി അധികൃതര്‍ മരുന്ന് നല്‍കി വിട്ടയച്ചു. തുടർന്ന് ഭക്ഷ്യസുരക്ഷാ വകുപ്പിനും കടയ്ക്കല്‍ പോലീസിലും യുവാവ് പരാതി നല്‍കി.സംഭവം ഹോട്ടലുടമയെ അറിയിച്ചപ്പോള്‍ മോശമായി പെരുമാറിയെന്നും സൂരജ് പറയുന്നു. തന്‍റെ സ്ഥാപനത്തെ അപകീര്‍ത്തിപ്പെടുത്താനാണ് സൂരജി െന്‍റ ശ്രമമെന്നാണ് ഹോട്ടലുടമയുടെ പ്രതികരണം.അതേ സമയം ബിരിയാണിയിൽ നിന്നും കുപ്പിച്ചില്ല് കണ്ടെത്തിയ സംഭവത്തെ തുടർന്ന്, ചിതറ കിഴക്കുംഭാഗത്തെ ഹോട്ടലിൽ ഭക്ഷ്യസുരക്ഷാ വകുപ്പ് ഉദ്യോഗസ്ഥർ ഇന്നലെ പരിശോധന നടത്തി. ഹോട്ടലിലെ ഹൈജീൻ മാനദണ്ഡങ്ങൾ, അവശിഷ്ടങ്ങൾ സൂക്ഷിക്കുന്ന രീതികൾ, ഭക്ഷ്യപദാർഥങ്ങളുടെ ശുദ്ധത, പാചക സംവിധാനങ്ങളുടെ സ്ഥിതി എന്നിവ വിശദമായി പരിശോധിച്ചു. പരിശോധനയുടെ ഭാഗമായി തൊഴിലാളികൾക്ക് ഹെൽത്ത് കാർഡുകൾ ഇല്ലായ്മ, തെറ്റായ സംഭരണ സംവിധാനങ്ങൾ, പത്രങ്ങളിലെ അപാകതകൾ തുടങ്ങിയ കാരണങ്ങൾ ചൂണ്ടിക്കാട്ടി ഹോട്ടൽ ഉടമയ്ക്ക് അധികൃതർ നോട്ടീസ് നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]