കോട്ടയം: നവംബർ 14 ഇന്ത്യയുടെ പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്റുവിന്‍റെ ജന്മദിനം നാം വിപുലമായി ശിശുദിനമായി ആചരിക്കുകയാണല്ലോ. കുട്ടികളെ അത്രയധികം സ്നേഹിച്ചിരുന്നതുകൊണ്ടാണ് ചാച്ചാജിയുടെ ജന്മദിനം ശിശുദിനമായി തെരഞ്ഞെടുത്തത്.

'ഇന്നത്തെ കുട്ടികളാണ് നാളത്തെ ഭാരതത്തിന്‍റെ ശില്പികൾ' എന്ന അദ്ദേഹത്തിന്‍റെ വാക്കുകൾ വെറുമൊരു സന്ദേശത്തിനപ്പുറം, രാജ്യത്തിന്‍റെ ഭാവി കുട്ടികളുടെ കൈകളിൽ സുരക്ഷിതമാണെന്ന ഓർമപ്പെടുത്തൽ കൂടിയാണ്. ഈ ആധുനിക കാലഘട്ടത്തിൽ ഈ ഓർമപ്പെടുത്തലിന്‍റെ പ്രസക്തി വലുതാണ്.

സ്ക്രീനുകളിൽ തളയ്ക്കപ്പെടുന്ന ബാല്യം

കഴിഞ്ഞ തലമുറയിലെ കുട്ടികൾ കളിച്ചുവളർന്നത് തുറന്ന മൈതാനങ്ങളിലും നാടൻ കളികളിലുമായിരുന്നു. കൂട്ടായ്മകളും സ്നേഹവും പങ്കുവയ്ക്കലുമായിരുന്നു കുട്ടിക്കാലത്തിന്‍റെ സൗന്ദര്യം. എന്നാൽ ഇന്നത്തെ കുട്ടികളുടെ ലോകം സ്മാർട്ട് ഫോണുകളിലും ടാബ്ലറ്റുകളിലും ഒതുങ്ങിയിരിക്കുന്നു.

ഡിജിറ്റൽ ലോകം അറിവിന്‍റെ വാതായനങ്ങൾ തുറന്നു കൊടുക്കുന്നുണ്ടെങ്കിലും അത് കുട്ടികളെ സമൂഹത്തിൽ നിന്നും പ്രകൃതിയിൽ നിന്നും ഒറ്റപ്പെടുത്തുന്നു എന്നതാണ് യാഥാർത്ഥ്യം. കളിസ്ഥലങ്ങൾ അപ്രത്യക്ഷമാകുമ്പോൾ ബാല്യത്തിന്‍റെ സ്വാഭാവികമായ ഊർജ്ജവും സർഗാത്മകതയും സ്ക്രീനുകൾക്കുള്ളിൽ ഇല്ലാതാകുകയാണ്.

ഡിജിറ്റൽ ലോകവും സൈബർ ഭീഷണികളും

ഇന്നത്തെ കുട്ടികൾ നേരിടുന്ന ഏറ്റവും വലിയ വെല്ലുവിളി ഡിജിറ്റൽ ഇടങ്ങളിലെ അരക്ഷിതാവസ്ഥയാണ്. ഓൺലൈൻ ഗെയിമുകളുടെയും സമൂഹമാധ്യമങ്ങളുടെയും അഡിക്ഷൻ കുട്ടികളുടെ മാനസികാരോഗ്യത്തെ ഗുരുതരമായി ബാധിക്കുന്നു.

സൈബർ ഭീഷണികൾ, മോശം ഉള്ളടക്കങ്ങൾ, ലഹരിയുടെ ഓൺലൈൻ ലഭ്യത എന്നിവയെല്ലാം നമ്മുടെ കുഞ്ഞുങ്ങളെ കാത്തുനിൽക്കുന്ന വലിയ വിപത്തുകളാണ്. വെർച്വൽ ലോകത്ത് അഭിരമിക്കുന്ന കുട്ടികൾക്ക് യഥാർഥ ലോകത്തിലെ സ്നേഹവും ബന്ധങ്ങളും തിരിച്ചറിയാൻ കഴിയാതെ പോകാനുള്ള സാധ്യതകളും വലുതാണ്.

മാറ്റം അനിവാര്യമാണ്

ചാച്ചാജി കണ്ട സ്വപ്നത്തിലെ ഇന്ത്യ യാഥാർഥ്യമാകണമെങ്കിൽ കുട്ടികൾ ഡിജിറ്റൽ ജയിലറകളിൽ നിന്ന് മോചിപ്പിക്കപ്പെടണം. അവർക്ക് സ്മാർട്ട്ഫോണുകൾക്ക് പകരം പുസ്തകങ്ങളും കളിക്കൂട്ടുകാരെയും തിരികെ നൽകേണ്ടതുണ്ട്. അറിവ് മാത്രമല്ല, നല്ല മൂല്യങ്ങളും സ്നേഹവും സുരക്ഷിതത്വവുമാണ് അവർക്ക് ലഭിക്കേണ്ടത്.

സുരക്ഷിതവും സ്വാതന്ത്ര്യവും നിറഞ്ഞ ഒരു ബാല്യം ഓരോ കുട്ടിയുടെയും അവകാശമാണ്. ആ അവകാശം ഉറപ്പുവരുത്താൻ നമുക്ക് കൈകോർക്കാം.

Tags : Childrens Day JawaharlalNehru Chachaji Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash