Deepika
ADVERTISEMENT
Leader Page
ജന്തർ മന്തറിൽ സമീപകാലത്ത് ഏറ്റുമുട്ടുന്നത് പ്രതിഷേധക്കാരും പൊലിസും മാത്രമല്ല; പൗരസ്വാതന്ത്ര്യവും ഭരണകൂടത്തിന്‍റെ നിയന്ത്രണാധികാരവുമാണ്. പ്രതിഷേധിക്കാനെത്തുന്ന യുവതീ-യുവാക്കളെ വഴിയിൽത്തന്നെ തടയുന്നു; ചിലരെ വിമാനത്താവളത്തിൽനിന്നുതന്നെ കസ്റ്റഡിയിലെടുക്കുന്നു; പ്രതിഷേധസ്ഥലങ്ങളിലേക്കുള്ള വഴികൾ ബാരിക്കേഡുകൾകൊണ്ട് അടയ്ക്കുന്നു.
പ്രതിപക്ഷകക്ഷി നേതാക്കളെയുൾപ്പടെ പ്രതിഷേധക്കാരെ പിടിച്ചുവലിച്ചും ബലംപ്രയോഗിച്ചും പൊലിസ് വാഹനങ്ങളിലേക്കു കയറ്റുന്നു. അവ രേഖപ്പെടുത്താനെത്തുന്ന മാധ്യമപ്രവർത്തകരും പൊലിസ് നടപടിക്കു വിധേയരാകുന്നു. പ്രതിഷേധദൃശ്യങ്ങൾ പ്രചരിപ്പിക്കുന്ന സമൂഹമാധ്യമ അക്കൗണ്ടുകളിലേക്കുപോലും അന്വേഷണം നീളുന്നു. പ്രതിഷേധത്തെ നേരിടുക മാത്രമല്ല, അതിനെ തടയുകയും നിരീക്ഷിക്കുകയും അതിന്‍റെ ദൃശ്യതപോലും നിയന്ത്രിക്കുകയും ചെയ്യുന്ന ഒരു ഭരണകൂടത്തിന്‍റെ യുക്തി ഒരു ജനാധിപത്യസമൂഹത്തെ അത്യന്തം അസ്വസ്ഥപ്പെടുത്തുന്നതാണ്.
തെരഞ്ഞെടുപ്പു കമ്മിഷന്‍റെ പ്രത്യേക വോട്ടർപട്ടിക പരിഷ്കരണമായ എസ്ഐആറിനെതിരേയാണ് ഈ പ്രതിഷേധങ്ങൾ. മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാർ രാജിവയ്ക്കണമെന്നും എസ്ഐആർ പിൻവലിക്കണമെന്നും അവർ ആവശ്യപ്പെടുന്നു.
ഭരണകൂടത്തെ ചോദ്യം ചെയ്താൽ?
ഒരു ജനാധിപത്യരാജ്യത്ത് ഭരണകൂടത്തെ ചോദ്യംചെയ്യുക എന്നതു പൗരസമൂഹത്തിന്‍റെ മൗലികാവകാശമാണ്; ജനാധിപത്യത്തിന്‍റെ കരുത്തളക്കേണ്ടത് ഭരണകൂടത്തെ അനുകൂലിക്കുന്ന അഭിപ്രായങ്ങൾ എത്ര സ്വതന്ത്രമായി പ്രകടിപ്പിക്കപ്പെടുന്നു എന്നതിലല്ല; മറിച്ച് അതിനെ അസ്വസ്ഥമാക്കുന്ന വിയോജിപ്പുകളോട് അധികാരം എത്രത്തോളം സഹിഷ്ണുത കാണിക്കുന്നു എന്നതിലാണ്.
ഇവിടെ പ്രധാന പ്രശ്നം, പ്രതിഷേധങ്ങളെ മുൻകൂട്ടി നിയന്ത്രിക്കുകയും മെരുക്കുകയും ചെയ്യുന്ന ഭരണകൂടത്തിന്‍റെ ജനാധിപത്യവിരുദ്ധമായ ഭരണയുക്തിയാണ്. പ്രതിഷേധം ഭരണകൂടം വരച്ചിടുന്ന വൃത്തത്തിനുള്ളിൽ മാത്രമേ പാടുള്ളൂവെന്ന് നിഷ്കർഷിക്കുന്ന ഈ അച്ചടക്കാധികാരം ജനാധിപത്യപരമായ ഏതൊരു സമൂഹത്തിനും അപമാനവും വിരോധാഭാസവുമാണ്.
ആധുനിക അധികാരം എല്ലായ്പോഴും ലാത്തിയുടെയോ ജയിലിന്‍റെയോ രൂപത്തിൽ മാത്രം പ്രവർത്തിക്കുന്നില്ലെന്ന് ഫ്രഞ്ച് സമൂഹശാസ്ത്രജ്ഞനായ മിഷേൽ ഫൂക്കോ ചൂണ്ടിക്കാട്ടി. മനുഷ്യർ എവിടെ നിൽക്കണം, എപ്പോൾ, എങ്ങനെ സഞ്ചരിക്കണം, എപ്പോൾ സംഘം ചേരണം, എന്തെല്ലാം ചെയ്യാം എന്നതിന്‍റെ അതിരുകൾ ക്രമീകരിച്ചുകൊണ്ടും അധികാരം പ്രവർത്തിക്കുന്നു.
അതുകൊണ്ടുതന്നെ വഴികളടച്ച് റോഡുകളിൽ നിരത്തിയിരിക്കുന്ന ബാരിക്കേഡുകൾക്ക് മറ്റൊരു രാഷ്ട്രീയ അർഥമുണ്ട്. അവ വെറുമൊരു ഇരുമ്പുവേലിയല്ല. “ഇതിനപ്പുറം നിങ്ങളുടെ ശരീരത്തിന് പ്രവേശനമില്ല” എന്നു പറയുന്ന അധികാരത്തിന്‍റെ ഭാഷയാണ്. പ്രതിഷേധസ്ഥലത്തെത്തുന്നതിന് മുമ്പുള്ള കസ്റ്റഡി, അനുമതിനിഷേധം, നിരോധനാജ്ഞ, കേസെടുക്കുമെന്ന മുന്നറിയിപ്പ് ഇവയൊക്കെ ലാത്തി ഉയരുന്നതിനു മുമ്പുതന്നെ പ്രതിഷേധത്തെ നിയന്ത്രിക്കുന്ന മാർഗങ്ങളാണ്.
പ്രതിഷേധത്തെ നേരിട്ടുള്ള ബലപ്രയോഗത്തിലൂടെ അടിച്ചമർത്തുന്നതിനേക്കാൾ, നിരീക്ഷണത്തിലൂടെയും നിയന്ത്രണത്തിലൂടെയും മനുഷ്യരെ സ്വയം അച്ചടക്കത്തിനു വിധേയരാക്കുന്ന അധികാരത്തിന്‍റെ ഈ സൂക്ഷ്മരൂപമാണ് ഫൂക്കോ തന്‍റെ രചനകളിൽ അന്വേഷിച്ചത്. ഫൂക്കോയുടെ ജന്മശതാബ്‌ദി ആചരിക്കുന്ന ഈ വർഷം, അധികാരം എങ്ങനെ നിരീക്ഷിക്കുന്നു, നിയന്ത്രിക്കുന്നു, എപ്രകാരം സ്വയം അനുസരിപ്പിക്കുന്നു എന്ന അദ്ദേഹത്തിന്‍റെ ചോദ്യം ഇന്ത്യൻ തെരുവുകളിൽ അരങ്ങേറുന്ന സംഭവങ്ങളുടെ പശ്ചാത്തലത്തിൽ കൂടുതൽ പ്രസക്തമാകുകയാണ്. നിരീക്ഷണം എങ്ങനെയാണ് മനുഷ്യരെ അനുസരിപ്പിക്കുന്ന അച്ചടക്ക അധികാരമായി മാറുന്നത്? ഈ ചോദ്യത്തിന് ഫൂക്കോ നൽകുന്ന ഏറ്റവും ശക്തമായ വിശദീകരണമാണ് പനോപ്റ്റിക്കോൺ എന്ന സങ്കൽപം.
പനോപ്റ്റിക് അധികാരത്തിന്‍റെ ശക്തിയും സൗന്ദര്യവും
ബ്രിട്ടീഷ് തത്വചിന്തകനായ ജെറമി ബെന്തം പതിനെട്ടാം നൂറ്റാണ്ടിൽ രൂപകല്പന ചെയ്ത സവിശേഷമായ ജയിൽ മാതൃകയായിരുന്നു പനോപ്റ്റിക്കോൺ. ചുറ്റുമുള്ള തടവുമുറികളിലുള്ളവരെ നടുവിലെ നിരീക്ഷണഗോപുരത്തിൽനിന്ന് കാണാൻ കഴിയും; എന്നാൽ ഓരോ നിമിഷവും തന്നെ ആരെങ്കിലും നിരീക്ഷിക്കുന്നുണ്ടോയെന്ന് തടവുകാർക്ക് അറിയാനാകില്ല. താൻ നിരീക്ഷിക്കപ്പെടുന്നുണ്ടാകാമെന്ന ബോധംതന്നെ തടവുകാരനെ സ്വയം നിയന്ത്രിക്കാൻ പ്രേരിപ്പിക്കുന്നു. അധികാരത്തിന്‍റെ നോട്ടം മനസിൽ പതിയുന്നതോടെ ബാഹ്യമായ ഭീഷണിപ്പെടുത്തലുകളില്ലാതെതന്നെ വ്യക്തി സ്വയംനിയന്ത്രണത്തിലേക്ക് വഴിമാറുന്നു.
പനോപ്റ്റിക്കോണിനെ കേവലമൊരു ജയിൽമാതൃകയായിട്ടല്ല ഫൂക്കോ കണ്ടത്; ആധുനികസമൂഹത്തിലെ അച്ചടക്കാധികാരം പ്രവർത്തിക്കുന്നതിന്‍റെ ശക്തമായൊരു രൂപകമായിട്ടാണ് അതിനെ വികസിപ്പിച്ചത്. മനുഷ്യരുടെ ശരീരത്തെയും ചലനത്തെയും പെരുമാറ്റത്തെയും നിരീക്ഷിക്കുകയും ക്രമപ്പെടുത്തുകയും അതുവഴി അവരെ അനുസരണവിധേയരാക്കുകയും ചെയ്യുന്ന സൂക്ഷ്മമായ പ്രവർത്തനങ്ങളിലൂടെയും അധികാരം പ്രയോഗിക്കപ്പെടുന്നു. പ്രത്യക്ഷമായ മർദനമില്ലാതെതന്നെ നിരീക്ഷണത്തിന്‍റെ സാധ്യതയിലൂടെ മനുഷ്യരെ സ്വയം അച്ചടക്കത്തിനു വിധേയരാക്കുന്നതിലാണ് പനോപ്റ്റിക് അധികാരത്തിന്‍റെ ശക്തി.
ഇന്നത്തെ ഡിജിറ്റൽ സമൂഹത്തിൽ പനോപ്റ്റിക്കോണിന്‍റെ ഗോപുരം അപ്രത്യക്ഷമായെങ്കിലും അതിന്‍റെ കണ്ണുകൾ എല്ലായിടത്തുമുണ്ട്; അതിന്‍റെ നോട്ടം കൂടുതൽ വ്യാപകമായിരിക്കുന്നു. നിരീക്ഷണകാമറകൾ, മുഖം തിരിച്ചറിയൽ സംവിധാനങ്ങൾ, മൊബൈൽ വിവരങ്ങൾ, സമൂഹമാധ്യമങ്ങൾ, കേന്ദ്രീകൃത വിവര എജൻസികൾ എന്നിവയുള്ളതിനാൽ നിരീക്ഷണം ഇന്ന് ഒരു കെട്ടിടത്തിനുള്ളിലല്ല, സമൂഹത്തിലാകെ വ്യാപിച്ച ഒരു ശൃംഖലയാണ്. പ്രതിഷേധത്തിനെത്തുന്ന ഓരോരുത്തരെയും പൊലിസ് നേരിട്ടു തടയേണ്ടതില്ല; പൊലിസിന്‍റെ സാധ്യതയുള്ള നോട്ടം അവരുടെ ഉള്ളിൽ പതിച്ചാൽ മതി. മറുവശത്ത്, ഡിജിറ്റൽ കാലം ഈ നിരീക്ഷണത്തിന് ശക്തമായൊരു പ്രതിനോട്ടവും സാധിക്കുന്നു എന്നത് സമകാലിക ജനാധിപത്യ പ്രതിഷേധങ്ങൾക്ക് പുതിയ കരുത്ത് പകരുന്നു.
സിനോപ്റ്റിക്കോൺ ആശയം
ഫൂക്കോയുടെ പനോപ്റ്റിക്കോണിനെ വികസിപ്പിച്ചുകൊണ്ട് സമൂഹശാസ്ത്രജ്ഞനായ തോമസ് മത്തീസൻ സിനോപ്റ്റിക്കോൺ എന്ന ആശയം മുന്നോട്ടുവച്ചു. പനോപ്റ്റിക്കോണിൽ കുറച്ചുപേർ അനേകരെ നിരീക്ഷിക്കുന്നുവെങ്കിൽ, സിനോപ്റ്റിക്കോണിൽ അനേകർ കുറച്ചുപേരെ നിരീക്ഷിക്കുന്നു. ഇന്നത്തെ ജനാധിപത്യ പ്രതിഷേധത്തിൽ തിരിച്ചുള്ള ഈ നിരീക്ഷണത്തിന് പുതിയൊരു രാഷ്‌ട്രീയശക്തിയുണ്ട്.
പൊലിസ് പ്രതിഷേധക്കാരെ കാമറയിൽ പകർത്തുമ്പോൾ പ്രതിഷേധക്കാരുടെയും പൊതുസമൂഹത്തിന്‍റെയും മാധ്യമങ്ങളുടെയും മൊബൈൽ കാമറകൾ പൊലിസിന്‍റെ നടപടികളെയും പകർത്തുന്നു. ഒരു യുവാവിനെ പിടിച്ചുവലിക്കുന്നതോ ഒരു യുവതിയോട് ബലംപ്രയോഗിക്കുന്നതോ രാഷ്‌ട്രീയനേതാക്കളെയോ മാധ്യമപ്രവർത്തകരെയോ തടയുന്നതോ സന്നിഹിതരായ ഏതാനും പേരുടെ അനുഭവമായി അവസാനിക്കുന്നില്ല. നിമിഷങ്ങൾക്കുള്ളിൽ ആ ദൃശ്യങ്ങൾ ലക്ഷക്കണക്കിന് മനുഷ്യരുടെ സ്ക്രീനുകളിലെത്താം. അധികാരം പൗരസമൂഹത്തെ നിരീക്ഷണത്തിനു വിധേയമാക്കുമ്പോൾ, പൗരസമൂഹവും അധികാരപ്രയോഗത്തെ പൊതുസമൂഹത്തിനു മുന്നിൽ ദൃശ്യമാക്കുന്നു.
ഇവിടെയാണ് സിനോപ്റ്റിക് നോട്ടം ജനങ്ങളുടെ "പ്രതിരോധ നോട്ടമായി' മാറുന്നത്. തെരുവിലെ പ്രതിഷേധത്തോടൊപ്പം അധികാരത്തെ രേഖപ്പെടുത്തുകയും ദൃശ്യങ്ങൾ പങ്കുവയ്ക്കുകയും പൊതുസമൂഹത്തിന്‍റെ പരിശോധനയ്ക്കു വിധേയമാക്കുകയും ചെയ്യുന്നത് സമകാലിക ജനാധിപത്യ പ്രതിരോധത്തിന്‍റെ ശക്തമായ രൂപങ്ങളിലൊന്നാണ്. അതുകൊണ്ടുതന്നെ പ്രതിഷേധക്കാരുടെയും പൊതുജനങ്ങളുടെയും മാധ്യമപ്രവർത്തകരുടെയും കാമറകളും മൊബൈൽ ഫോണുകളും സംരക്ഷിക്കപ്പെടേണ്ട ജനാധിപത്യ ഉപകരണങ്ങളാണ്.
പ്രതിഷേധിക്കുന്നർ ശത്രുക്കളോ?
എസ്ഐആറിനെക്കുറിച്ചുള്ള ആരോപണങ്ങൾ പരിശോധിക്കപ്പെടട്ടെ; തെരഞ്ഞെടുപ്പ് കമ്മിഷൻ അതിന്‍റെ നടപടികൾക്ക് മറുപടി പറയട്ടെ; കോടതികൾ നിയമസാധുത പരിശോധിക്കട്ടെ. എന്നാൽ അതിനിടയിൽ പ്രതിഷേധിക്കുന്നവരെ ശത്രുക്കളായി കാണുന്ന ഒരു ഭരണസംസ്കാരം വളരാൻ അനുവദിക്കരുത്. ചോദ്യംചെയ്യുന്ന യുവത്വം ജനാധിപത്യത്തിന്‍റെ ഭീഷണിയല്ല; അതിന്‍റെ ജീവശക്തിയാണ്. വിയോജിപ്പിനെ പൊലിസിനെക്കൊണ്ട് മെരുക്കുന്നതിനു പകരം രാഷ്ട്രീയമായി നേരിടുകയും പൊതുസമൂഹത്തിനു മുന്നിൽ മറുപടി പറയുകയും ചെയ്യുന്നതാണ് ജനാധിപത്യ ഭരണകൂടത്തിന്‍റെ ഉത്തരവാദിത്വം.
ഫൂക്കോ നമ്മെ ഓർമിപ്പിച്ചതുപോലെ അധികാരത്തിന്‍റെ ഏറ്റവും അപകടകരമായ രൂപം എല്ലായ്പ്പോഴും അതിന്‍റെ അക്രമാസക്തമായ രൂപമല്ല. അനുസരണത്തെ സ്വാഭാവികമാക്കുകയും ഭയത്തെ പൗരരുടെ ഉള്ളിൽ സ്ഥാപിക്കുകയും ചെയ്യുന്ന അധികാരമാണ് കൂടുതൽ ആഴത്തിൽ പ്രവർത്തിക്കുന്നത്. അതുകൊണ്ട് നാം മുഖ്യമായും ചോദിക്കേണ്ടത്, എത്രപേർ അറസ്റ്റിലായി എന്നതു മാത്രമല്ല. ബാരിക്കേഡിനു മുന്നിൽ തടയപ്പെട്ട ഒരു യുവതിയോ യുവാവോ അടുത്ത തവണ തെരുവിലിറങ്ങാൻ ഭയപ്പെടുമോ എന്നതുകൂടിയാണ്. പ്രതിഷേധിക്കാനുള്ള ധൈര്യത്തെ ഭയം കീഴടക്കുകയും ആ ഭയം പൗരബോധത്തിൽ വേരുറപ്പിക്കുകയും ചെയ്യുമ്പോഴാണ് ജനാധിപത്യത്തിന്‍റെ ഇടങ്ങൾ യഥാർഥത്തിൽ ചുരുങ്ങിത്തുടങ്ങുന്നത്. എന്നാൽ അതേ പൗരസമൂഹം അധികാരത്തെ തിരിച്ചുനോക്കുകയും അതിന്‍റെ പ്രവൃത്തികളെ പൊതുസമൂഹത്തിനു മുന്നിൽ ദൃശ്യമാക്കുകയും ചെയ്യുമ്പോൾ ജനാധിപത്യം അതിന്‍റെ പ്രതിരോധശേഷി വീണ്ടെടുക്കുന്നു.
(ലേഖകൻ കേരള സർവകലാശാലയിൽ സോഷ്യോളജി പ്രഫസറും വകുപ്പ് മേധാവിയുമായിരുന്നു)
National
മുംബൈ: മുഖ്യതെരഞ്ഞെടുപ്പ് കമ്മിഷണര്‍ ഗ്യാനേഷ് കുമാര്‍ രാജിവയ്ക്കണമെന്ന് ആവശ്യപ്പെട്ട് നടന്ന പ്രതിഷേധത്തിനിടയില്‍ നടത്തിയ പ്രകോപനപരമായ ഇടപെടലുകള്‍ക്ക് ഇമ്രാന് ഖാന്‍ മാപ്പു പറയണമെന്ന ബോംബെ ഹൈക്കോടതി ആവശ്യപ്പെട്ടതിനെത്തുടർന്നാ‍യിരുന്നു മാപ്പുപറച്ചിൽ.
ഓവര്‍സീസ് സിറ്റിസണ്‍ ഓഫ് ഇന്ത്യ (ഒസിഐ) കാര്‍ഡ് ഉടമയായ അദ്ദേഹത്തിന് ഇന്ത്യന്‍ പൗരനെപ്പോലെ പെരുമാറാന്‍ സാധിക്കില്ലെന്നും എസ്ഐആര്‍ പ്രക്രിയ ഒരു തരത്തിലും ബാധിക്കാത്ത സാഹചര്യത്തില്‍ ഇത്തരം പ്രതിഷേധങ്ങളില്‍ പങ്കെടുക്കാനോ പ്രക്ഷോഭങ്ങള്‍ക്ക് പ്രോത്സാഹനം നല്‍കാനോ ഇമ്രാന് അവകാശമില്ലെന്നും കോടതി വ്യക്തമാക്കി. ഇതേത്തുടര്‍ന്നാണു നടന്‍ കോടതിയിൽ മാപ്പുപറഞ്ഞത്.
പ്രക്ഷോഭങ്ങളില്‍ പങ്കെടുത്തതിന് ഇന്ത്യ വിട്ടുപോകണമെന്ന് നിര്‍ദേശിച്ച് ഫോറിനേഴ്‌സ് റീജിയണല്‍ രജിസ്‌ട്രേഷന്‍ ഓഫീസ് നല്‍കിയ നോട്ടീസ് ചോദ്യം ചെയ്ത് ഇമ്രാന് ഖാന്‍ സമര്‍പ്പിച്ച ഹര്‍ജി പരിഗണിക്കവേയായിരുന്നു കോടതിയുടെ പരാമര്‍ശം.
അദ്ദേഹം ഇന്ത്യന്‍ പൗരനല്ലെന്നും വോട്ടര്‍ പട്ടിക പുതുക്കുന്നതിനുള്ള എസ്ഐആർ നടപടികള്‍ അദ്ദേഹത്തെ ബാധിക്കുന്നില്ലെന്നും ബോംബെ ഹൈക്കോടതി വ്യക്തമാക്കി.
National
ന്യൂഡൽഹി: ജനവിധി അട്ടിമറിക്കാൻ ശ്രമിച്ചെന്നാരോപിച്ച് മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ രൂക്ഷവിമർശനവും ‘ജനകീയ വിചാരണ’യുമായി പ്രതിപക്ഷ കൂട്ടായ്മയായ ‘ഇന്ത്യ’ സഖ്യം.
എഐസിസി അധ്യക്ഷൻ മല്ലികാർജുൻ ഖാർഗെയുടെ രാജാജി മാർഗിലുള്ള പത്താം നമ്പർ വസതിയിലാണു രാജ്യത്തിന്‍റെ ചരിത്രത്തിലെ വേറിട്ട പ്രതിഷേധപരിപാടി സംഘടിപ്പിച്ചത്. ലക്ഷങ്ങൾ പങ്കെടുക്കുന്ന ഇന്നത്തെ മഹാറാലിക്കു മുന്നോടിയായി ഗ്യാനേഷ് കുമാറിനെതിരേ ആറു പ്രധാന ആരോപണങ്ങൾ അടങ്ങിയ കുറ്റപത്രവും നേതാക്കൾ വേദിയിൽ അവതരിപ്പിച്ചു.
► പൂന്തോട്ടത്തിൽ പ്രതീകാത്മക പാർലമെന്‍റ്
ഖാർഗെയുടെ വസതിയിലെ പൂന്തോട്ടത്തിൽ പച്ചപ്പരവതാനി വിരിച്ച്, പാർലമെന്‍റിന്‍റെ മാതൃകയിലാണ് ഇരിപ്പിടങ്ങൾ സജ്ജീകരിച്ചത്. മുൻ ലോക്സഭാ സ്പീക്കർ മീരാ കുമാർ സ്പീക്കറുടെ പദവി അലങ്കരിച്ചപ്പോൾ, രാജ്യസഭാ പ്രതിപക്ഷ നേതാവ് മല്ലികാർജുൻ ഖാർഗെ ഗ്യാനേഷ് കുമാറിനെതിരേ ആറു പോയിന്‍റുള്ള പ്രമേയം അവതരിപ്പിച്ചുകൊണ്ട് ജനകീയവിചാരണയ്ക്ക് തുടക്കമിട്ടു.
എസ്ഐആർ പ്രക്രിയയിലൂടെ ലക്ഷക്കണക്കിനു പൗരന്മാരുടെ വോട്ടവകാശം നിഷേധിച്ചെന്നും തെരഞ്ഞെടുപ്പു കമ്മിഷനെ മുൻനിർത്തി കേന്ദ്രസർക്കാർ വോട്ടെടുപ്പ് അട്ടിമറിക്കാൻ ശ്രമിച്ചെന്നും തുടർന്നു സംസാരിച്ച പ്രതിപക്ഷ നേതാക്കൾ ആരോപിച്ചു.
► ഇരകളുടെ മൊഴികളും വോട്ടെടുപ്പും
വിവിധ സംസ്ഥാനങ്ങളിൽനിന്നുള്ള പ്രതിപക്ഷ എംപിമാർക്കുപുറമെ എസ്ഐആർ വഴി വോട്ടർപട്ടികയിൽനിന്നു പുറത്താക്കപ്പെട്ട സാധാരണ പൗരന്മാരും വിദ്യാർഥികളും സാമൂഹ്യപ്രവർത്തകരും തങ്ങളുടെ അനുഭവങ്ങൾ വേദിയിൽ പങ്കുവച്ചു.
ഖാർഗെയുടെ പ്രമേയത്തെ പിന്തുണച്ചു സംസാരിച്ച ഇന്ത്യ സഖ്യം നേതാക്കളെല്ലാം തങ്ങളുടെ സംസ്ഥാനങ്ങളിൽ എസ്ഐആറിലൂടെ എങ്ങനെ തെരഞ്ഞെടുപ്പുകൾ മോഷ്‌ടിക്കപ്പെട്ടുവെന്നും മോദി-ഷാ-ഗ്യാനേഷ് ത്രയം തെരഞ്ഞെടുപ്പുകൾ അട്ടിമറിക്കുകയാണെന്നും ചൂണ്ടിക്കാട്ടി. എസ്ഐആറിൽ എന്തെല്ലാം നിയമവിരുദ്ധ പ്രവർത്തനങ്ങൾ നടന്നുവെന്നും വോട്ടവകാശങ്ങൾ എങ്ങനെ നിഷേധിക്കപ്പെട്ടുവെന്നും തെരഞ്ഞെടുപ്പുകൾ അട്ടിമറിക്കാൻ കമ്മിഷൻ നടത്തിയ ഗൂഢാലോചനകളും വേദിയിൽ സംസാരിച്ചവർ പങ്കുവച്ചു.
പരിപാടിയിൽ 20 മിനിറ്റോളം നീണ്ട ശക്തമായ പ്രസംഗമാണു ലോക്സഭാ പ്രതിപക്ഷനേതാവ് രാഹുൽ ഗാന്ധി നടത്തിയത്. തുടർന്ന് ഗ്യാനേഷ് കുമാറിനെ പദവിയിൽനിന്നു പുറത്താക്കണമെന്ന് ആവശ്യപ്പെടുന്ന പ്രമേയം "സഭാംഗങ്ങ'ളായിരുന്ന എല്ലാവരും കൈകളുയർത്തി ഐക്കണ്ഠ്യേന പാസാക്കി.
സ്പീക്കറുടെ സമാപന പ്രസംഗത്തിനും ദേശീയഗാനാലാപനത്തിനും ശേഷമാണ് പ്രതീകാത്മക പാർലമെന്‍റ് പിരിഞ്ഞത്. ഗ്യാനേഷ് കുമാർ പുറത്താകുന്നതുവരെ സമരം തുടരുമെന്ന് സഖ്യനേതാക്കൾ വ്യക്തമാക്കി.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേയും തെരഞ്ഞെടുപ്പ് ക്രമക്കേടുകൾക്കെതിരേയും പ്രതിഷേധിക്കാൻ പ്രതിപക്ഷ ഇന്ത്യ സഖ്യം പ്രഖ്യാപിച്ച ചലോ ദില്ലി മാർച്ച് ഇന്ന് ഡൽഹി രാംലീല മൈതാനത്തു നടക്കും.
കൊണാട്ട് പ്ലേസിലെ മിന്‍റോ റോഡ് ജംഗ്ഷനിൽനിന്ന് ഉച്ചയ്ക്ക് 12ന് രാംലീല മൈതാനത്തേക്ക് മാർച്ച് നടത്തി ലക്ഷങ്ങൾ അണിനിരക്കുന്ന പ്രക്ഷോഭത്തിന് തുടക്കമിടുമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി എക്‌സിലൂടെ അറിയിച്ചു.
അതേസമയം, രാംലീല മൈതാനത്തെ പ്രതിഷേധത്തിന് അനുമതി നൽകിയിട്ടുണ്ടെങ്കിലും അങ്ങോട്ടേക്കു മാർച്ച് നടത്തുന്നതിന് ഇന്ത്യ സഖ്യം മുൻകൂട്ടി അനുമതി നേടിയിട്ടില്ലെന്ന് ഡൽഹി പൊലിസ് വാർത്താ ഏജൻസിയോടു പ്രതികരിച്ചു.
എന്നാൽ, നേരത്തേ ഗ്യാനേഷ് കുമാറിനെതിരേ പതിനായിരങ്ങൾ അണിനിരന്ന ഇന്ത്യ സഖ്യത്തിന്‍റെ സുപ്രീംകോടതി മാർച്ചും അനുമതിയില്ലാതെയാണു സംഘടിപ്പിച്ചിരുന്നതെന്ന് നേതാക്കൾ ചൂണ്ടിക്കാട്ടുന്നു.
രാജ്യം മുഴുവൻ ഇന്നു ഡൽഹിയിലേക്ക് എത്തുമെന്നും ഡൽഹി കണ്ടിട്ടുള്ളതിൽവച്ച് ഏറ്റവും വലിയ റാലികളിൽ ഒന്നായിരിക്കും ഇതെന്നും എഐസിസി സംഘടനാ ജനറൽ സെക്രട്ടറി കെ.സി. വേണുഗോപാൽ പറഞ്ഞു.
National
ന്യൂഡൽഹി: മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ആഞ്ഞടിച്ച് പ്രതിപക്ഷ നേതാവ് രാഹുൽ ഗാന്ധി. ഇന്ത്യാ മുന്നണിയുടെ നേതൃത്വത്തിൽ നടത്തിയ പ്രതീകാത്മക ഇംപീച്ച്മെന്റ് നടപടിയിലാണ് രാഹുൽ കടുത്തവിമർശനം ഉന്നയിച്ചത്. ഗ്യാനേഷ് കുമാർ സ്ഥാനത്തുനിന്ന് മാറാതെ മറ്റു വഴികളില്ലെന്നും തെളിവുകൾ പുറത്തുവരുന്നതോടെ അദ്ദേഹത്തിന് രാജിവെക്കേണ്ടിവരുമെന്നും രാഹുൽ പറഞ്ഞു.
എക്കാലവും തെരഞ്ഞെടുപ്പ് കമ്മീഷന്‍റെ മറവിൽ കഴിയാമെന്ന് കരുതേണ്ട. ഇന്നല്ലെങ്കിൽ നാളെ ജനങ്ങളെ നേരിടേണ്ടിവരുമെന്നും അദ്ദേഹം മുന്നറിയിപ്പ് നൽകി. മറ്റ് എല്ലാ വഴികളും അടഞ്ഞ സാഹചര്യത്തിലാണ് ഗ്യാനേഷ് കുമാറിനെതിരെ ഒന്നടങ്കം പ്രതിപക്ഷം ഒന്നിച്ചെത്തിയത്. മോദിയെയും അമിത് ഷായെയും രാഷ്ട്രീയമായി നേരിടാൻ പ്രതിപക്ഷത്തിന് അറിയാം. എന്നാൽ അവരുടെ ആയുധമായി തെരഞ്ഞെടുപ്പ് കമ്മീഷന് എക്കാലവും തുടരാനാവില്ലെന്നും രാഹുൽ തുറന്നടിച്ചു.
ഭരണഘടന സംരക്ഷിക്കാനുള്ള പരിശുദ്ധ പോരാട്ടമാണിതെന്നും അദ്ദേഹം പറഞ്ഞു. തെരഞ്ഞെടുപ്പുകൾ അട്ടിമറിച്ചാലും ഭരണഘടനാ സ്ഥാപനങ്ങളെ കൈവശപ്പെടുത്തിയാലും ജനങ്ങളുടെ ശബ്ദം കേൾക്കേണ്ടിവരും. ഇന്ത്യയുടെ ആത്മാവിനെയാണ് ആക്രമിക്കുന്നതെന്നും അട്ടിമറിക്ക് കൂട്ടുനിന്നവരുടെ നാശത്തിനായാണ് ഈ രാഷ്ട്രീയ കൂട്ടായ്മയെന്നും അദ്ദേഹം ആരോപിച്ചു.
കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ ചേർന്ന യോഗത്തിൽ 250 എംപിമാരാണ് ഗ്യാനേഷ് കുമാറിനെതിരായ നീക്കത്തിൽ പങ്കുചേർന്നത്. ഗ്യാനേഷ് കുമാർ നിയമപരമായ വിചാരണ നേരിടണമെന്ന ആവശ്യവുമായി പ്രതിപക്ഷം അവതരിപ്പിച്ച പ്രമേയം വോട്ടെടുപ്പിലൂടെ പാസാക്കി.
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ പ്രതിപക്ഷ ഇന്ത്യ സഖ്യം ഇന്നലെ എഐസിസി അധ്യക്ഷൻ മല്ലികാർജുൻ ഖാർഗെയുടെ രാജാജി മാർഗിലുള്ള പത്താം നമ്പർ വസതിയിൽ സംഘടിപ്പിച്ച ‘ജനകീയ വിചാരണ’യിൽ ഗ്യാനേഷ് കുമാറിനെതിരേ ആറു പ്രധാന ആരോപണങ്ങൾ അടങ്ങിയ കുറ്റപത്രം അവതരിപ്പിച്ചു. രാജ്യസഭാ പ്രതിപക്ഷ നേതാവുകൂടിയായ മല്ലികാർജുൻ ഖാർഗെയാണ് ആറു കുറ്റങ്ങളുമായി പ്രമേയം അവതരിപ്പിച്ചത്. പ്രമേയത്തിലെ ആറു കുറ്റങ്ങൾ ചുവടെ:
►തെരഞ്ഞെടുപ്പുകൾ മോഷ്‌ടിക്കാൻ ഗൂഢാലോചന നടത്തി.
►13.2 കോടി വോട്ടർമാരെ വോട്ടർപട്ടികയിൽനിന്ന് ഇല്ലാതാക്കി.
►പാർലമെന്‍ററി മേൽനോട്ടമോ അറിവോ ഇല്ലാതെ ഫോം 6 മാറ്റിയെഴുതി.
►ഇസിഐ നെറ്റ് വഴി വോട്ടർപട്ടികകൾ പിടിച്ചെടുത്തു.
►മറ്റു രണ്ട് തെരഞ്ഞെടുപ്പ് കമ്മിഷണർമാരെ മാനിക്കാതെ ഏകപക്ഷീയമായി തീരുമാനമെടുത്തു.
►മോദിയുടെയും ഷായുടെയും നിർദേശപ്രകാരം പ്രവർത്തിച്ചു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഇന്ത്യാ മുന്നണിയുടെ പ്രതീകാത്മക ഇംപീച്ച്മെന്റ്. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ ഡൽഹിയിലെ ഔദ്യോഗിക വസതിയിൽ നടന്ന പരിപാടിയിൽ ഗ്യാനേഷ് കുമാറിനെ പുറത്താക്കണമെന്ന പ്രമേയം ഖാർഗെ അവതരിപ്പിച്ചു. മുൻ ലോക്സഭാ സ്പീക്കർ മീരാ കുമാർ നടപടികൾക്ക് അധ്യക്ഷത വഹിച്ചു.
വോട്ടർപട്ടിക പരിഷ്കരണത്തിലെ ക്രമക്കേടുകൾ ഉൾപ്പെടെ ഗുരുതര ആരോപണങ്ങൾ ഉന്നയിച്ചാണ് ഇന്ത്യാ മുന്നണിയുടെ നീക്കം. വോട്ടവകാശം രാജ്യത്ത് ഗുരുതരമായ ഭീഷണി നേരിടുകയാണ്. ഭരണഘടനാ സ്ഥാപനങ്ങളുടെ അന്തസ് സംരക്ഷിക്കാനാണ് ഈ നടപടിയെന്നും ഖാർഗെ പറഞ്ഞു. മുഖ്യ തെരഞ്ഞെടുപ്പ് കമ്മീഷണറോട് വ്യക്തിപരമായ ശത്രുതയില്ലെന്നും തെരഞ്ഞെടുപ്പ് കമ്മീഷൻ നിഷ്പക്ഷമായി പ്രവർത്തിക്കണമെന്നാണ് പ്രതിപക്ഷത്തിന്‍റെ ആവശ്യമെന്നും അദ്ദേഹം വ്യക്തമാക്കി.
പ്രധാനമന്ത്രി നരേന്ദ്ര മോദിയുടെയും ആഭ്യന്തരമന്ത്രി അമിത് ഷായുടെയും നിർദേശപ്രകാരമാണ് ഗ്യാനേഷ് കുമാർ തെരഞ്ഞെടുപ്പ് കമ്മീഷനെ നയിക്കുന്നതെന്നും ഖാർഗെ ആരോപിച്ചു. അദ്ദേഹത്തിനെതിരെ ആറ് പ്രധാന ആരോപണങ്ങളാണ് ഖാർഗെ ഉന്നയിച്ചത്. തെരഞ്ഞെടുപ്പ് അട്ടിമറിക്കാൻ ഗൂഢാലോചന നടത്തിയെന്നും 13.2 കോടി വോട്ടർമാരുടെ വോട്ടവകാശം ഇല്ലാതാക്കിയെന്നും ഖാർഗെ ആരോപിച്ചു. പാർലമെന്‍റിന്‍റെ അനുമതിയില്ലാതെ ഫോം 6ൽ മാറ്റങ്ങൾ വരുത്തി.
ഇസിഐനെറ്റ് മൊബൈൽ ആപ്ലിക്കേഷൻ ഉപയോഗിച്ച് വോട്ടർപട്ടികയിൽ ഇടപെടൽ നടത്തിയെന്നും ആരോപണങ്ങളുണ്ട്. പുതിയ ആളുകളെ വോട്ടർപട്ടികയിൽ ചേർക്കുന്നതിനും യഥാർഥ വോട്ടർമാരെ വോട്ടുചെയ്യുന്നതിൽനിന്ന് തടയുന്നതിനും ശ്രമം നടന്നുവെന്നും അദ്ദേഹം കുറ്റപ്പെടുത്തി. തെരഞ്ഞെടുപ്പ് കമ്മീഷനിലെ മൂന്ന് കമ്മീഷണർമാർക്കും തുല്യ അധികാരമുണ്ടെന്നിരിക്കെ മറ്റ് രണ്ട് കമ്മീഷണർമാരുടെ അഭിപ്രായങ്ങൾ ഗ്യാനേഷ് കുമാർ അവഗണിച്ചുവെന്നും ഖാർഗെ ആരോപിച്ചു.
ജനാധിപത്യത്തിന്‍റെ ആത്മാവിനേറ്റ പ്രഹരമാണ് തെരഞ്ഞെടുപ്പ് കമ്മീഷന്‍റെ നടപടികളെന്ന് മീരാ കുമാർ പറഞ്ഞു. ലോക്സഭാ നടപടികൾക്ക് സമാനമായ രീതിയിലാണ് പ്രതീകാത്മക ഇംപീച്ച്മെന്റ് നടപടികൾ സംഘടിപ്പിച്ചത്. സോണിയാഗാന്ധി, രാഹുൽ ഗാന്ധി, കെ.സി. വേണുഗോപാൽ, കപിൽ സിബൽ തുടങ്ങിയ പ്രമുഖരും സിവിൽ സൊസൈറ്റി പ്രതിനിധികളും വോട്ടർപ്പട്ടികയിൽനിന്ന് പേരൊഴിവാക്കപ്പെട്ടവരും ചടങ്ങിൽ പങ്കെടുത്തു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഇന്ത്യാ സഖ്യത്തിന്‍റെ നേതൃത്വത്തിൽ പ്രതീകാത്മക ജനകീയ ഇംപീച്ച്മെന്റ് നടപടികൾ ആരംഭിച്ചു. ബിജെപി നേതൃത്വത്തിലുള്ള എൻഡിഎ സർക്കാർ നിയമാനുസൃതമല്ലെന്നും സമീപകാല തെരഞ്ഞെടുപ്പുകൾ അട്ടിമറിക്കപ്പെട്ടുവെന്നുമുള്ള പ്രതിപക്ഷത്തിന്‍റെ ആരോപണങ്ങൾ ആവർത്തിച്ചുകൊണ്ടാണ് നടപടി. കോൺഗ്രസ് അധ്യക്ഷൻ മല്ലികാർജുൻ ഖാർഗെ ഇംപീച്ച്മെന്റ് പ്രമേയം അവതരിപ്പിച്ചു.
മുൻ ലോക്സഭാ സ്പീക്കർ മീരാ കുമാർ നടപടികൾക്ക് അധ്യക്ഷത വഹിച്ചു. യഥാർത്ഥ പാർലമെന്‍റിന്‍റെ പ്രവർത്തനരീതിക്ക് സമാനമായ രീതിയിലാണ് പ്രതീകാത്മക വിചാരണ സംഘടിപ്പിച്ചത്. പഴയ പാർലമെന്‍റ് മന്ദിരത്തിലെ സെൻട്രൽ ഹാളിന്‍റെ മാതൃകയിലായിരുന്നു വേദിയും ഇരിപ്പിട ക്രമീകരണവും. ലോക്‌സഭയും രാജ്യസഭയും സംയുക്തമായി സമ്മേളിച്ചിരുന്ന സെൻട്രൽ ഹാളിന് സമാനമായി പുൽത്തകിടിയിൽ ഇരിപ്പിടങ്ങൾ ഒരുക്കുകയും വേദിയിൽ മീരാ കുമാറിന് പ്രത്യേക ഇരിപ്പിടം സജ്ജീകരിക്കുകയും ചെയ്തു.
വോട്ടർമാരുടെ അവകാശങ്ങൾ നിഷേധിച്ചുവെന്നും സുപ്രീംകോടതിയിൽ തെറ്റായ സത്യവാംഗ്മൂലം സമർപ്പിച്ചുവെന്നും ഉൾപ്പെടെയുള്ള ആരോപണങ്ങൾ ഉന്നയിച്ച് ഗ്യാനേഷ് കുമാറിനെതിരായ പൗര കുറ്റപത്രവും പ്രതിപക്ഷം അവതരിപ്പിച്ചു. മല്ലികാർജുൻ ഖാർഗെ, രാഹുൽ ഗാന്ധി തുടങ്ങിയ പ്രമുഖ രാഷ്ട്രീയ നേതാക്കൾക്കു പുറമെ മുൻ സുപ്രീംകോടതി ജഡ്ജിമാർ, നിയമവിദഗ്ധർ, സാമൂഹിക പ്രവർത്തകർ എന്നിവരും പ്രതീകാത്മക പാർലമെന്‍ററി നടപടികളിൽ പങ്കാളികളായി.
പ്രതിഷേധ പരിപാടിയുടെ പശ്ചാത്തലത്തിൽ ഖാർഗെയുടെ വസതിക്ക് മുന്നിലും ഡൽഹിയിലെ പ്രധാന മേഖലകളിലും കനത്ത സുരക്ഷയാണ് ഏർപ്പെടുത്തിയിരിക്കുന്നത്. അതേസമയം പരിപാടിക്കെതിരെ പരിഹാസവുമായി ബിജെപി രംഗത്തെത്തി. യഥാർത്ഥ തെരഞ്ഞെടുപ്പുകളിൽ വിജയിക്കാൻ കഴിയാത്ത രാഹുൽ ഗാന്ധി തനിക്ക് ഇഷ്ടമുള്ള പാർലമെന്‍റിൽ ഇരിക്കുകയാണെന്നായിരുന്നു ബിജെപിയുടെ പരിഹാസം.
ഡൽഹിയിലെ രാംലീല മൈതാനിയിൽ നവംബർ ഒന്നിന് നടക്കാനിരിക്കുന്ന ഇന്ത്യാ സഖ്യത്തിന്‍റെ മഹാറാലിക്ക് മുന്നോടിയായാണ് പ്രതീകാത്മക പാർലമെന്‍റ് സമ്മേളനം നടന്നത്. മുഖ്യമന്ത്രിമാരും പ്രമുഖ പ്രതിപക്ഷ നേതാക്കളും പരിപാടിയിൽ പങ്കെടുത്തു. പ്രതിപക്ഷ പാർട്ടികൾക്കൊപ്പം പ്രതിഷേധങ്ങൾക്ക് നേതൃത്വം നൽകുന്ന കോക്ക്റോച്ച് ജനത പാർട്ടി ഉൾപ്പെടെയുള്ള സംഘടനകളും റാലിക്ക് പിന്തുണ പ്രഖ്യാപിച്ചിട്ടുണ്ട്. എന്നാൽ ആം ആദ്മി പാർട്ടി ഉൾപ്പെടെ ചില സംഘടനകൾ ഇന്ത്യാ സഖ്യത്തിന്‍റെ ഭാഗമല്ലെന്ന നിലപാട് വ്യക്തമാക്കിയിട്ടുണ്ട്.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെ പ്രതീകാത്മകമായി പുറത്താക്കുന്നതിനായി പ്രതിപക്ഷ ഇന്ത്യ സഖ്യം പ്രഖ്യാപിച്ച “ജനങ്ങളുടെ കുറ്റവിചാരണ” ഇന്നത്തേക്കു മാറ്റി. ഡൽഹിയിൽ രണ്ടു ദിവസമായി തുടരുന്ന ശക്തമായ മഴയെത്തുടർന്നാണു പരിപാടി മാറ്റിവച്ചത്.
കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ ചേർന്ന സഖ്യത്തിലെ മുതിർന്ന നേതാക്കളുടെ യോഗത്തിലാണ് തീരുമാനം. നേതാക്കൾക്കു മഴയത്തിരുന്ന് പ്രതിഷേധിക്കുന്നതിലുള്ള ബുദ്ധിമുട്ടുകൾ കണക്കിലെടുത്താണ് മാറ്റമെന്ന് ലോക്സഭാ പ്രതിപക്ഷനേതാവ് രാഹുൽ ഗാന്ധി മാധ്യമങ്ങളെ അറിയിച്ചു.
ന്യൂഡൽഹിയിലെ രാജാജി മാർഗിലുള്ള ഖാർഗെയുടെ പത്താം നമ്പർ വസതിയിലാണു ഗ്യാനേഷ് കുമാറിനെതിരേയുള്ള പ്രതീകാത്മക കുറ്റവിചാരണ നടക്കുക. നാളെ ഇന്ത്യ സഖ്യം പ്രഖ്യാപിച്ചിട്ടുള്ള "ചലോ ദില്ലി' ബഹുജന പ്രക്ഷോഭറാലിയുടെ കർട്ടൻ റെയ്സറായിട്ടാണ് ഈ കുറ്റവിചാരണ അരങ്ങേറുന്നത്.
അതേസമയം, ഡൽഹിയിലേക്ക് ആളുകൾ എത്തുന്നതു തടയാൻ ആഭ്യന്തരമന്ത്രി അമിത് ഷാ പരമാവധി ശ്രമിക്കുകയാണെന്ന് രാഹുൽ ഗാന്ധി കുറ്റപ്പെടുത്തി. ജനങ്ങൾക്കിടയിൽ വലിയ കോപവും വൈകാരിക വേദനയുമുണ്ടെന്നും ഇതു സർക്കാരിനെതിരേയുള്ള ഒറ്റപ്പെട്ട പ്രതിഷേധമല്ലെന്നും അദ്ദേഹം കൂട്ടിച്ചേർത്തു.
ജനം റാലിയിൽ പങ്കെടുക്കണം: ശശി തരൂർ
നാളത്തെ ഇന്ത്യ സഖ്യം റാലിയിൽ പങ്കെടുക്കാൻ ജനങ്ങളോട് അഭ്യർഥിച്ച് കോൺഗ്രസ് എംപി ശശി തരൂർ. തെരഞ്ഞെടുപ്പു പ്രക്രിയകളെയും ജനാധിപത്യസ്ഥാപനങ്ങളെയും കുറിച്ചുള്ള ആശങ്കകൾക്ക് പൊതുജനങ്ങളുടെ കൂടുതൽ ശ്രദ്ധ ആവശ്യമാണെന്നു വ്യക്തമാക്കിയ തരൂർ, വോട്ടർ പട്ടികകളെയും തെരഞ്ഞെടുപ്പു പ്രക്രിയയെയും കുറിച്ചുള്ള ആശങ്കകൾ തെരഞ്ഞെടുപ്പുകളുടെ നിഷ്പക്ഷതയെയും വിശ്വാസ്യതയെയും സംബന്ധിച്ച് ചോദ്യങ്ങൾ ഉയർത്തിയിട്ടുണ്ടെന്നും ചൂണ്ടിക്കാട്ടി.
വലിയതോതിൽ വോട്ടർമാരുടെ പേരുകൾ നീക്കം ചെയ്തത് പൗന്മാർക്കിടയിൽ ആശങ്ക സൃഷ്‌ടിച്ചിരിക്കുകയാണെന്നും ഇക്കാര്യത്തിൽ ബന്ധപ്പെട്ട അധികാരികളിൽനിന്നു വിശദീകരണവും ബാധ്യസ്ഥതയും തേടണമെന്നും തരൂർ പറഞ്ഞു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ പ്രതീകാത്മക പരസ്യ വിചാരണയുമായി ഇന്ത്യാ സഖ്യം. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ ഇന്ന് ഉച്ചകഴിഞ്ഞ് 3.30നാണ് വിചാരണ നടപടികൾ ആരംഭിക്കുക. മുൻ ലോക്സഭാ സ്പീക്കർ മീരാ കുമാർ പ്രതീകാത്മക സ്പീക്കറാകുന്ന വിചാരണയിൽ ഗ്യാനേഷ് കുമാറിനെ പുറത്താക്കിയതായി പ്രഖ്യാപിക്കും.
തെരഞ്ഞെടുപ്പ് കമ്മീഷനെതിരായ പ്രതിഷേധം ശക്തമാക്കുന്നതിന്‍റെ ഭാഗമായാണ് പ്രതിപക്ഷത്തിന്‍റെ നീക്കം. ഗ്യാനേഷ് കുമാറിനെ ഇംപീച്ച് ചെയ്യാനുള്ള നീക്കം പാർലമെന്‍റിൽ ഒരുതവണ പരാജയപ്പെട്ടിരുന്നു. രണ്ടാമത് നൽകിയ നോട്ടീസിലും രാജ്യസഭയിൽ ഇതുവരെ നടപടികളുണ്ടായിട്ടില്ല. ഇതോടെയാണ് പ്രതീകാത്മക വിചാരണയിലൂടെ പ്രതിഷേധം ശക്തമാക്കാൻ പ്രതിപക്ഷം തീരുമാനിച്ചത്.
അശോക ഹോട്ടൽ, തൽക്കത്തോറ സ്റ്റേഡിയം, രാംലീല മൈതാനം എന്നിവിടങ്ങളിൽ പ്രതിഷേധ പരിപാടികൾക്ക് തുടർച്ചയായി അനുമതി നിഷേധിച്ചതോടെയാണ് ഖാർഗെയുടെ വസതി വിചാരണയ്ക്കുള്ള വേദിയായി തെരഞ്ഞെടുത്തത്. മീരാ കുമാർ സ്പീക്കറാകുന്ന പ്രതീകാത്മക പാർലമെന്‍റിൽ രാജ്യസഭാ പ്രതിപക്ഷ നേതാവ് മല്ലികാർജുൻ ഖാർഗെ ഗ്യാനേഷ് കുമാറിനെ പുറത്താക്കണമെന്ന പ്രമേയം അവതരിപ്പിക്കും. തുടർന്ന് എംപിമാരും വിവിധ കക്ഷിനേതാക്കളും സംസാരിക്കും.
വോട്ടർപട്ടിക പരിഷ്കരണത്തെ തുടർന്ന് വോട്ടവകാശം നഷ്ടപ്പെട്ടവരെന്ന് ആരോപിക്കപ്പെടുന്നവരെയും വേദിയിലെത്തിച്ച് അവരുടെ അനുഭവങ്ങൾ പങ്കുവെപ്പിക്കും. പൗരാവകാശ സംഘടനാ നേതാക്കളും വിചാരണയിൽ സംസാരിക്കും. ഒടുവിൽ രാഹുൽ ഗാന്ധി മറുപടി പ്രസംഗം നടത്തും. പിന്നാലെ ഗ്യാനേഷ് കുമാറിനെ പുറത്താക്കിയതായി മീരാ കുമാർ പ്രതീകാത്മക വിധി പ്രഖ്യാപിക്കും.
അതേസമയം ഞായറാഴ്ച ഡൽഹിയിലെ രാംലീല മൈതാനിയിൽ നടക്കുന്ന അടുത്ത ഘട്ട പ്രതിഷേധത്തിൽ രാഷ്ട്രീയഭേദമന്യേ ജനങ്ങൾ പങ്കെടുക്കണമെന്ന് രാഹുൽ ഗാന്ധി ആഹ്വാനം ചെയ്തു. പത്ത് ലക്ഷം പേർ റാലിയിൽ പങ്കെടുക്കുമെന്നാണ് കോൺഗ്രസിന്റെ അവകാശവാദം. ഡൽഹിയിലേക്ക് പ്രവർത്തകരുമായി എത്തുന്ന വാഹനങ്ങൾ തടഞ്ഞ് തിരിച്ചയക്കുകയാണെന്ന് കോൺഗ്രസ് ആരോപിച്ചു. പൊലിസിനെയോ ലാത്തിച്ചാർജിനെയോ ഭയപ്പെടേണ്ടതില്ലെന്നും രാംലീല മൈതാനത്തെ പ്രതിഷേധം ഒരു രാഷ്ട്രീയ പാർട്ടിയുടെ മാത്രം പരിപാടിയല്ലെന്നും രാഹുൽ ഗാന്ധി വ്യക്തമാക്കി.
National
ന്യൂഡൽഹി: മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ പ്രതിഷേധവുമായി ഇന്ത്യ മുന്നണി. ഗ്യാനേഷ് കുമാറിനെതിരെ നാളെ കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ വസതിയിൽ വെച്ച് പ്രതീകാത്മക പരസ്യ വിചാരണ നടത്തും. മുൻ ലോക്സഭാ സ്പീക്കർ മീരാ കുമാർ പ്രതീകാത്മക സ്പീക്കറാകുന്ന ചടങ്ങിൽ മല്ലികാർജുൻ ഖർഗെ പ്രമേയം അവതരിപ്പിക്കും. രാഹുൽ ഗാന്ധിയുടെ മറുപടിക്ക് ശേഷം ഗ്യാനേഷ് കുമാറിനെ പുറത്താക്കിയതായി സ്പീക്കർ പ്രതീകാത്മക വിധി പ്രഖ്യാപനം നടത്തും.
അതിനിടെ, നവംബർ ഒന്നിന് രാംലീല മൈതാനിയിൽ നടത്താൻ നിശ്ചയിച്ചിരിക്കുന്ന മഹാറാലി ദീപാവലി സീസൺ പ്രമാണിച്ച് മാറ്റിവെക്കണമെന്ന് ആവശ്യപ്പെട്ട് ഡൽഹിയിലെ വ്യാപാരികളുടെ കൂട്ടായ്മ ഇന്ത്യ മുന്നണി നേതാക്കൾക്ക് കത്തയച്ചു. വ്യാപാരം തടസപ്പെടുമെന്നതിനാൽ റാലി മാറ്റണമെന്നാണ് ആവശ്യം. എന്നാൽ റാലി മാറ്റാനാകില്ലെന്നും പത്ത് ലക്ഷത്തോളം പേർ പങ്കെടുക്കുമെന്നും രാഹുൽ ഗാന്ധി വ്യക്തമാക്കിയിട്ടുണ്ട്. ഗ്യാനേഷിനെ പുറത്താക്കുന്നത് വരെ പിന്നോട്ടില്ലെന്ന നിലപാടിലാണ് പ്രതിപക്ഷ കക്ഷികൾ.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെ പ്രതീകാത്മകമായി കുറ്റവിചാരണ നടത്തുന്നതിനുള്ള പ്രതിപക്ഷ ഇന്ത്യ സഖ്യത്തിന്‍റെ മോക്ക് ഇംപീച്ച്മെന്റ് കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ നടത്തും.
ഖാർഗെയുടെ ഡൽഹി രാജാജി മാർഗിലെ പത്താം നമ്പർ വസതിയിൽ നാളെ ഉച്ചകഴിഞ്ഞ് 3.30 മുതലാണ് പൊതു ഇംപീച്ച്മെന്റ് നടത്തുന്നതെന്ന് എഐസിസി ജനറൽ സെക്രട്ടറി ജയ്റാം രമേശ് അറിയിച്ചു.
രാംലീല മൈതാനിയിലും അശോക് ഹോട്ടലിലും മോക്ക് ഇംപീച്ച്മെന്റ് നടത്തുന്നതിന് പൊലിസ് അനുമതി നിഷേധിച്ചതായി കോൺഗ്രസ് കഴിഞ്ഞദിവസം ആരോപിച്ചിരുന്നു.
ന
വംബർ ഒന്നിന് ഇന്ത്യ സഖ്യം രാംലീല മൈതാനിയിൽ പ്രഖ്യാപിച്ചിട്ടുള്ള ബഹുജനറാലിക്കു മുന്നോടിയായാണ് ഗ്യാനേഷ് കുമാറിനെതിരേ മോക്ക് ഇംപീച്ച്മെന്റ് നടത്തുന്നത്.
സഖ്യനേതാക്കൾ, പൗരസമൂഹ പ്രതിനിധികൾ, വിദ്യാർഥി നേതാക്കൾ എന്നിവരെയെല്ലാം ഉൾപ്പെടുത്തി ഗ്യാനേഷ് കുമാറിനെ കുറ്റവിചാരണ ചെയ്യാനാണ് മോക്ക് ഇംപീച്ച്മെന്‍റിലൂടെ പ്രതിപക്ഷം ലക്ഷ്യമിടുന്നത്.
National
ന്യൂഡൽഹി: തെരഞ്ഞെടുപ്പു കമ്മിഷനെതിരേ ഉയരുന്ന ആരോപണങ്ങളുടെ എല്ലാ വശങ്ങളും പരിശോധിക്കുമെന്ന് സുപ്രീംകോടതി. കേസിൽ കമ്മിഷൻ സമർപ്പിച്ച മറുപടി സത്യവാങ്മൂലത്തിൽ എതിർ സത്യവാങ്മൂലം സമർപ്പിക്കാൻ പത്തു ദിവസം സമയം അനുവദിച്ചുകൊണ്ടാണ് ചീഫ് ജസ്റ്റീസ് അധ്യക്ഷനായ ബെഞ്ച് ഇക്കാര്യം വ്യക്തമാക്കിയത്.
എസ്ഐആറുമായി ബന്ധപ്പെട്ട തീരുമാനങ്ങൾ മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാർ ഏകപക്ഷീയമായി കൈക്കൊണ്ടതു ചോദ്യം ചെയ്ത് ഇന്ത്യ സഖ്യം നേതാക്കൾ നൽകിയ ഹർജി സുപ്രീംകോടതി ദീപാവലി അവധിക്കുശേഷം നവംബർ 17ന് വീണ്ടും പരിഗണിക്കും.
എസ്ഐആർ നടപടികളുമായി ബന്ധപ്പെട്ട കമ്മിഷന്‍റെ എല്ലാ രേഖകളും തീരുമാനങ്ങളും സംരക്ഷിക്കാനോ കോടതിയിൽ ഹാജരാക്കാനോ ഉത്തരവിടണമെന്ന് ഇന്നലത്തെ ഹ്രസ്വവാദത്തിനിടയിൽ ഹർജിക്കാർ ആവശ്യപ്പെട്ടു.
തീരുമാനങ്ങൾ ഏകകണ്ഠമായാണോ അതോ ഏകപക്ഷീയമായാണോ എടുത്തതെന്ന് നിർണയിക്കുന്നതിന് ഈ രേഖകൾ നിർണായകമാണെന്നു ചൂണ്ടിക്കാട്ടിയാണ് ഹർജിക്കാർ ഇത്തരമൊരു ആവശ്യം ഉന്നയിച്ചത്. എന്നാൽ, ഇതുസംബന്ധിച്ച് ഇടക്കാല ഉത്തരവ് കോടതി പുറപ്പെടുവിച്ചില്ല. മറിച്ച് എല്ലാ വിഷയങ്ങളും പരിശോധിക്കുമെന്നാണ് ചീഫ് ജസ്റ്റീസ് പ്രതികരിച്ചത്.
എസ്ഐആറുമായി ബന്ധപ്പെട്ട എല്ലാ തീരുമാനങ്ങളും കമ്മിഷൻ ഏകകണ്ഠമായാണു കൈക്കൊണ്ടതെന്നാണ് തിങ്കളാഴ്ച രാത്രി സുപ്രീംകോടതിയിൽ സമർപ്പിച്ച മറുപടി സത്യവാങ്മൂലത്തിൽ തെരഞ്ഞെടുപ്പു കമ്മിഷൻ വ്യക്തമാക്കിയത്. ഏകപക്ഷീയമായി തീരുമാനങ്ങളെടുത്തെന്ന ആരോപണവും കമ്മിഷൻ നിഷേധിച്ചു. വോട്ടർപട്ടികയിൽ പേര് ചേർക്കുന്നതിനുള്ള ഫോം ആറിൽ ഭേദഗതി വരുത്തിയിട്ടില്ലെന്നും കമ്മിഷൻ അവകാശപ്പെട്ടു.
കമ്മിഷൻ സമർപ്പിച്ച സത്യവാങ്മൂലം ഹർജിക്കാരുടെ വാദങ്ങളെ ശരിവയ്ക്കുന്നതാണെന്ന് തൃണമൂൽ കോൺഗ്രസ് എംപി ഡോല സെന്നിനുവേണ്ടി ഹാജരായ മുതിർന്ന അഭിഭാഷക ഡോ. മേനക ഗുരുസ്വാമി ഇന്നലെ കോടതിയിൽ ചൂണ്ടിക്കാട്ടി. വോട്ടർപട്ടികയിൽ പേര് ഉൾപ്പെടുത്തുന്നതിനുള്ള ഫോം ആറിൽ കമ്മിഷൻ മാറ്റം വരുത്തിയെന്നും സുപ്രീംകോടതി അതിന് അംഗീകാരം നൽകിയെന്ന് അവകാശപ്പെട്ട് പത്രക്കുറിപ്പ് ഇറക്കിയെന്നും അവർ ആരോപിച്ചു.
എന്നാൽ, കമ്മിഷൻ ഈ വാദങ്ങളെല്ലാം തള്ളി. ഈ വിഷയങ്ങളിലുൾപ്പടെ എതിർ സത്യവാങ്മൂലം ലഭിച്ചശേഷം സുപ്രീംകോടതി വാദം കേൾക്കും.
അതേസമയം കമ്മിഷനെതിരായ പ്രതിഷേധത്തിൽ സുപ്രീംകോടതിയിലേക്കു പ്രതിപക്ഷപാർട്ടികൾ നടത്തിയ മാർച്ചിൽ മാധ്യമപ്രവർത്തകയെ തള്ളിയിട്ടെന്ന പരാതിയിൽ പ്രതിപക്ഷനേതാവ് രാഹുൽ ഗാന്ധിക്കെതിരേ കേസ് രജിസ്റ്റർ ചെയ്യണമെന്ന ആവശ്യത്തിൽ കോടതി നോട്ടിസ് അയച്ചു.
National
ന്യൂഡൽഹി: ഡൽഹിയിലെ വ്യാപാരികളോട് മുഖ്യതെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ പുറത്താക്കാൻ പ്രധാനമന്ത്രി നരേന്ദ്ര മോദിയോട് ആവശ്യപ്പെടണമെന്ന് ലോക്സഭ പ്രതിപക്ഷ നേതാവ് രാഹുൽ ഗാന്ധി.
ഗ്യാനേഷ് കുമാറിനെ പുറത്താക്കിയാൽ എസ്ഐആർ നടപടിക്കെതിരായ പ്രതിഷേധങ്ങൾ 30 സെക്കൻഡിനുള്ളിൽ അവസാനിക്കുമെന്ന് രാഹുൽ ഗാന്ധി പറഞ്ഞു. "വോട്ട് ചോരി' വ്യാപാരത്തിനും സമ്പാദ്യത്തിനും കുട്ടികളുടെ ഭാവിക്കും ഭീഷണിയാകുമെന്നും രാഹുൽ ഗാന്ധി മുന്നറിയിപ്പ് നൽകി.
എക്സ് പോസ്റ്റിലൂടെയാണ് രാഹുൽ ഗാന്ധി വിഷയത്തിൽ നിലപാട് വ്യക്തമാക്കി രംഗത്തെത്തിയത്. എസ്ഐആർ നടപടിക്രമങ്ങൾക്കെതിരായ പ്രതിഷേധങ്ങൾക്കിടെ മെട്രോ സർവീസുകൾ അടച്ചുപൂട്ടിയും റോഡുകൾ അടച്ചും തലസ്ഥാനത്തെ വ്യാപാരത്തെ കേന്ദ്രസർക്കാർ തടസപ്പെടുത്തിയെന്നും അദ്ദേഹം ആരോപിച്ചു.
നവംബർ ഒന്നിന് രാംലീല മൈതാനത്ത് നടക്കാനിരിക്കുന്ന റാലി നവംബർ 10 വരെ മാറ്റിവയ്ക്കാൻ ചേംബർ ഓഫ് ട്രേഡ് ആൻഡ് ഇൻഡസ്ട്രി ഇന്ത്യ സഖ്യത്തോട് അഭ്യർഥിച്ചിരുന്നു. ഇതിനുപിന്നാലെയാണ് രാഹുൽ ഗാന്ധി വിഷയത്തിൽ നിലപാട് അറിയിച്ചത്.
National
ന്യൂഡൽഹി: എസ്ഐആർ ക്രമക്കേടിൽ മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ പ്രതിപക്ഷം നടത്തുന്ന പ്രക്ഷോഭം കൂടുതൽ ശക്തമാകുന്നു.
നവംബർ ഒന്നിന് ഡൽഹി രാംലീല മൈതാനത്തു സംഘടിപ്പിക്കുന്ന മഹാറാലിയിൽ പത്തു ലക്ഷത്തോളം പ്രവർത്തകരെ അണിനിരത്തി പ്രതിഷേധം കടുപ്പിക്കാനാണ് ഇന്ത്യ സഖ്യത്തിന്‍റെ നീക്കം. ഗ്യാനേഷിനെതിരേ തുടരുന്ന പ്രതിഷേധത്തിൽ പ്രതിപക്ഷം ഒറ്റക്കെട്ടാണെന്ന സൂചന നൽകുന്ന തരത്തിൽ എല്ലാ നേതാക്കളെയും റാലിയിൽ അണിനിരത്തും.
ഇതിന്‍റെ ഭാഗമായി എഐസിസി ആസ്ഥാനത്തു സംഘടനാ ജനറൽ സെക്രട്ടറി കെ.സി. വേണുഗോപാലിന്‍റെ നേതൃത്വത്തിൽ യോഗം ചേർന്ന് ഒരുക്കങ്ങൾ വിലയിരുത്തി. യോഗത്തിൽ വിവിധ മുന്നണികളുടെ പ്രതിനിധികൾ പങ്കെടുത്തു. നേരത്തേ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി വദ്രയും കെ.സി. വേണുഗോപാലും ഉത്തർപ്രദേശിലെയും ഹരിയാനയിലെയും പാർട്ടി നേതാക്കളുമായി കൂടിക്കാഴ്ച നടത്തിയിരുന്നു.
പ്രതിഷേധങ്ങൾ ശക്തമാക്കാൻ പ്രതിപക്ഷനീക്കം നടക്കുന്നതിനിടയിൽ ഡൽഹി പൊലിസ് ആസ്ഥാനം സന്ദർശിച്ച ആഭ്യന്തരമന്ത്രി അമിത് ഷാ ക്രമസമാധാനനില വിലയിരുത്തി. അതേസമയം, ദീപാവലി ഷോപ്പിംഗ് സീസണിലെ കച്ചവടത്തെ ബാധിക്കുമെന്ന ആശങ്ക ചൂണ്ടിക്കാട്ടി ഡൽഹിയിലെ വ്യാപാരികൾ റാലിക്കെതിരേ രംഗത്തെത്തിയിട്ടുണ്ട്.
ദീപാവലി ആഘോഷങ്ങൾ നടക്കുന്ന പശ്ചാത്തലത്തിൽ റാലി നടത്തുന്നത് ഏകദേശം 10,000 കോടി രൂപയുടെ വ്യാപാരനഷ്‌ടം വരുത്തുമെന്നാണ് ചേംബർ ഓഫ് ട്രേഡ് ആൻഡ് ഇൻഡസ്ട്രി (സിടിഐ) ചൂണ്ടിക്കാട്ടിയത്. ചാന്ദ്‌നി ചൗക്ക്, സദർ ബസാർ തുടങ്ങി രാംലീലാ മൈതാനത്തിനു ചുറ്റുമുള്ള 20ഓളം പ്രധാന മൊത്തവ്യാപാര-ചില്ലറവ്യാപാര മാർക്കറ്റുകളെ റാലി പ്രതികൂലമായി ബാധിക്കുമെന്നാണ് വ്യാപാരി സംഘടനകൾ പറയുന്നത്.
ഇക്കാര്യം ചൂണ്ടിക്കാട്ടി പ്രതിപക്ഷ നേതാവ് രാഹുൽ ഗാന്ധിക്ക് വ്യാപാരികൾ കത്തെഴുതി. ഈ മാസത്തെ വിവിധ പ്രക്ഷോഭങ്ങൾ കാരണം ഡൽഹിയിലെ വ്യാപാരികൾക്ക് ഇതിനകം 3,000 കോടി രൂപയുടെ നഷ്‌ടം വന്നിട്ടുണ്ടെന്നും ഉത്സവ സീസൺ കഴിഞ്ഞുള്ള തിയതിയിലേക്ക് റാലി മാറ്റിവയ്ക്കണമെന്നുമാണ് വ്യാപാരികളുടെ ആവശ്യം.
National
ന്യൂഡല്‍ഹി: ഗ്യാനേഷ് കുമാറിന്‍റെ കോലം കത്തിച്ച് "രാവണ ദഹനം' നടത്തി പ്രതിഷേധിക്കാനൊരുങ്ങിയ എഎഎസ്എഫ്, എഐവൈഎഫ് പ്രവര്‍ത്തകരെ ഡൽഹി പൊലിസ് തടഞ്ഞു.
ഐടിഒയിലെ സിപിഐ ആസ്ഥാനമായ അജോയ് ഭവന് സമീപത്തുവച്ചായിരുന്നു പ്രവര്‍ത്തകര്‍ ഗ്യാനേഷിന്‍റെ കോലം കത്തിക്കാന്‍ ശ്രമിച്ചത്. ഐടിഒ മെട്രോ സ്റ്റേഷനു സമീപം രാവണ ദഹനം നടത്താനായിരുന്നു തീരുമാനിച്ചിരുന്നതെങ്കിലും പ്രതിഷേധ മാര്‍ച്ച് സിപിഐ ആസ്ഥാനത്തിന് മുന്നില്‍വച്ചുതന്നെ പൊലിസ് തടഞ്ഞു.
ഇതോടെ പ്രവര്‍ത്തര്‍ മുദ്രാവാക്യം വിളിച്ച് കോലം കത്തിക്കാന്‍ ശ്രമിച്ചുവെങ്കിലും പൊലിസ് അതും തടഞ്ഞു. പിന്നാലെ പ്രവര്‍ത്തകര്‍ ചെരുപ്പൂരി ഗ്യാനേഷിന്‍റെ കോലത്തില്‍ തല്ലുകയും വോട്ടുകള്ളാ കസേര (സിംഹാസനം) വിടൂ (വോട്ട് ചോര്‍, ഗദ്ദി ഛോഡ്) എന്നുള്ള മുദ്രാവാക്യങ്ങള്‍ മുഴക്കുകയും ചെയ്തു.
ദസറ ആഘോഷങ്ങളുടെ ഭാഗമായി രാജ്യത്തിന്‍റെ വിവിധയിടങ്ങളില്‍ ഗ്യാനേഷ് കുമാറിന്‍റെ കോലം കത്തിക്കുന്ന പ്രതിഷേധ പരിപാടികള്‍ പ്രതിപക്ഷ പാര്‍ട്ടികള്‍ നടത്തിവരുന്നുണ്ട്. ശ്രീനഗറിലും ഹരിയാനയിലും ഗ്യാനേഷിന്‍റെ കോലം കത്തിച്ചിരുന്നു.
പാറ്റകളുടെ കോലം കത്തിക്കാൻ ബിജെപി അനുകൂല സംഘടനകളും ശ്രമിക്കുന്നുണ്ട്.
International
ലണ്ടൻ: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനും വോട്ടുകൊള്ളയ്ക്കുമെതിരേ ലണ്ടനിൽ നൂറുകണക്കിനു വിദ്യാർഥികൾ പ്രതിഷേധിച്ചു. കോൺഗ്രസും ഇന്ത്യൻ വിദ്യാർഥി ഗ്രൂപ്പുകളുമാണ് പ്രതിഷേധം സംഘടിപ്പിച്ചത്.
പാർലമെന്‍റ് സ്ക്വയറിലെ മഹാത്മാഗാന്ധി പ്രതിമയ്ക്കുമുന്നിലായിരുന്നു "സ്റ്റോപ്പ് വോട്ട് ചോരി' പ്രതിഷേധം. ആക്‌ടിവിസ്റ്റും യുട്യൂബറുമായ ധ്രുവ് റാത്തി മുഖ്യപ്രഭാഷണം നടത്തി. ഇതിനിടെ "മോദി, മോദി' വിളികളുമായി ചെറുസംഘം പ്രതിഷേധമുയർത്തി. ഇവരെ പൊലിസ് നീക്കി.
National
ന്യൂഡൽഹി: രണ്ടു വർഷത്തോളമായി പുകഞ്ഞുനിൽക്കുന്ന വോട്ടുചോരി ആരോപണം ജനകീയ പ്രക്ഷോഭമായി കത്തിപ്പടർന്നതോടെ പിടിച്ചുനിൽക്കാൻ തിരക്കിട്ട തിരുത്തലുകളുമായി തെരഞ്ഞെടുപ്പ് കമ്മീഷൻ രംഗത്ത്. വോട്ടുനഷ്ടപ്പെട്ടെന്നോ വെട്ടിനീക്കിയെന്നോ ഉള്ള പരാതികൾക്ക് യാതൊരു പരിഗണനയും കൊടുക്കാതെ തന്നിഷ്ടപ്രകാരം കാര്യങ്ങൾ മുന്നോട്ടുകൊണ്ടുപോയിരുന്നു കമ്മീഷനാണ് ഇപ്പോൾ ജനരോഷം എതിരാണെന്നു കണ്ടതോടെ തിരുത്തലുകൾക്ക് തയാറായിരിക്കുന്നത്.
ഇതോടൊപ്പം, ഗ്യാനേഷ്കുമാറിന്‍റെ ഏകപക്ഷീയവും നിയമവിരുദ്ധവുമായ നീക്കങ്ങൾക്ക് മറ്റ് രണ്ടു കമ്മീഷണർമാരുടെ പിന്തുണയില്ലായിരുന്നു എന്ന റിപ്പോർട്ടുകൾകൂടി പുറത്തുവന്ന സാഹചര്യത്തിലാണ് പിടിച്ചുനിൽക്കാൻ ഗ്യാനേഷ്കുമാർ അവസാന ശ്രമങ്ങൾ നടത്തുന്നതെന്നു ചൂണ്ടിക്കാണിക്കപ്പെടുന്നു.
ഭരണകൂടത്തിന്‍റെ അകമഴിഞ്ഞ പിന്തുണയുണ്ടെങ്കിലും തെരുവിൽ ശക്തിപ്പെടുന്ന പ്രക്ഷോഭം കാര്യങ്ങൾ വഷളാക്കുമെന്നു തിരിച്ചറിഞ്ഞുകൊണ്ടാണ് തിരുത്തൽ നടപടികൾക്ക് കമ്മീഷൻ തയാറായിരിക്കുന്നത്. നിയമപരമായി ചോദ്യം ചെയ്യപ്പെടാവുന്ന കാര്യങ്ങൾക്ക് കൂട്ടുനിന്നാൽ തങ്ങളും കുഴപ്പത്തിലാകുമെന്നു തിരിച്ചറിഞ്ഞാണ് മറ്റ് രണ്ടു കമ്മീഷർമാർ വിയോജനക്കുറിപ്പുകൾ എഴുതിയതെന്നു വിലയിരുത്തപ്പെടുന്നു. അടുത്ത ദിവസങ്ങളിൽ തെരഞ്ഞെടുപ്പ് കമ്മീഷൻ ധൃതി പിടിച്ച് പല തീരുമാനങ്ങളുമെടുത്തുവരികയാണ്. അവ ഏതൊക്കെയെന്നു നോക്കാം.
ഫോം 6 മാറ്റി
പുതുതായി വോട്ടർമാരെ ചേർക്കാനുള്ള ഫോം 6 ൽ വരുത്തിയ മാറ്റങ്ങൾ നീക്കി. പുതുതായി വോട്ടു ചേർക്കുന്നവർ സത്യപ്രസ്താവന നൽകണമെന്ന വ്യവസ്ഥ വെബ്സൈറ്റിൽനിന്നു നീക്കി. എസ്ഐആർ നടക്കുന്നിടത്തു മാത്രമേ ഫോം 6ന് ഒപ്പം സത്യപ്രസ്താവന നൽകേണ്ടതുള്ളൂ. ഫോം 6ന് സുപ്രിം കോടതിയുടെ അനുമതിയുണ്ടെന്ന അവകാശവാദം കോടതി തള്ളിക്കളഞ്ഞത് കമ്മീഷനു വലിയ അടിയായി മാറിയിരുന്നു.
തിരികെ ചേർക്കും
വീടുകൾ സന്ദർശിച്ച് എസ്ഐആറിൽ പുറത്തായവരെ തിരിച്ചെടുക്കാൻ തെരഞ്ഞെടുപ്പ് ഉദ്യോഗസ്ഥർക്ക് നിർദേശം നൽകി. എസ്ഐആർ കരട് പ്രകാരം അർഹതയുണ്ടായിരുന്ന 9.5 കോടി പേർ പട്ടികയ്ക്കു പുറത്തായിരുന്നു. ആകെ പുറത്തായത് 13.3 കോടി പേർ ആയിരുന്നു.
ഇതിൽ 2.08 കോടി മരിച്ചുപോയവരും 1.08 കോടി ഇരട്ടവോട്ടിന്‍റെ പേരിൽ നീക്കം ചെയ്യപ്പെട്ടവരുമായിരുന്നു.
ജനകീയ പ്രക്ഷോഭം കനത്തതോടെയാണ് അർഹതയുണ്ടായിട്ടും പുറത്തായ 9.5 കോടി പേരെ വീടു സന്ദർശനങ്ങളിലൂടെ കണ്ടെത്തി തിരിച്ചെടുക്കാൻ ഇപ്പോൾ കമ്മീഷൻ നിർദേശിച്ചിരിക്കുന്നത്. ഇതിനായി ബിഎൽഒമാരോടു വീടുകയറാനാണ് നിർദേശം.
ഡൽഹിയിലെ തിരുത്തൽ
ഡൽഹിയിലെ എസ്ഐആറിൽ വന്ന അബദ്ധങ്ങളും വീഴ്ചകളും തിരുത്താനുള്ള നെട്ടോട്ടം തുടങ്ങി. തെരഞ്ഞെടുപ്പ് കമ്മീഷർ തന്നെയായ സുഖ്ബിർ സിംഗ് സന്ധുവിനും എൽ.കെ. ആഡ്വാനിക്കും ഡൽഹി മുഖ്യമന്ത്രി രേഖാ ഗുപ്തയ്ക്കും അരവിന്ദ് കേജരിവാളിനും അടക്കം 33 ലക്ഷം പേർക്ക് ഹിയറിംഗ് നോട്ടീസ് അയച്ചതോടെ വിവാദത്തിൽ കുരുങ്ങിയ എസ്ഐആർ പരാതികൾ പരിഹരിക്കാൻ തീവ്രശ്രമം തുടങ്ങി.
വിഐപി വോട്ടർമാരുടെ വോട്ടുകൾ രേഖകൾ പരിശോധിക്കാതെ തന്നെ പുനഃസ്ഥാപിക്കാനും നിർദേശം നൽകിയിട്ടുണ്ട്. ചാന്ദിനി ചൗക്കിലെ ബൂത്തിൽ വെട്ടു കഴിഞ്ഞപ്പോൾ ഒരു വോട്ടർ മാത്രമാണ് അവശേഷിച്ചത്. ഇതും ഉടൻ പരിഹരിക്കാനാണ് നിർദേശം.
ഫോം 7 ദുരുപയോഗം
ഫോം 7 ഉപയോഗിച്ച് വോട്ടർമാരെ കൂട്ടത്തോടെ വെട്ടിനീക്കുന്ന പരിപാടിക്കും തടയിടാൻ തെരഞ്ഞെടുപ്പ് കമ്മീഷൻ നീക്കം തുടങ്ങി. അനർഹമായി കടന്നുകൂടുന്നവരെ മറ്റൊരാൾക്ക് ചൂണ്ടിക്കാണിച്ച് പുറത്താക്കുന്നതിനു വിനയോഗിക്കാവുന്നതാണ് ഫോം 7. എന്നാൽ, ഫോം 7 ദുരുപയോഗം ചെയ്ത് വോട്ടർമാരെ കൂട്ടത്തോടെ വെട്ടിനീക്കിയതായുള്ള പരാതി പലേടത്തുംനിന്നും വന്നിരുന്നു. അതുകൊണ്ട് ഇതിന്‍റെ ഉപയോഗം പരിമിതപ്പെടുത്താനാണ് നിർദേശം. ഒരാൾക്ക് 10 ഫോം7 മാത്രം നൽകാൻ കഴിയുന്ന രീതിയിലാണ് നിയന്ത്രണം വരുന്നത്.
അതായത് എസ്ഐആർ സമയത്ത് ഒരാൾക്കു പരമാവധി പത്തു പേർക്കെതിരേ ഫോം 7 നൽകാനേ ഇനി കഴിയൂ. ഫോം 7 നൽകുന്നയാളുടെ യഥാർഥ ഒപ്പ് ആണെങ്കിലേ ഇനി ഫോം സ്വീകരിക്കൂ. നേരത്തെ സീൽ പതിപ്പ് ഫോം സമർപ്പിക്കാമായിരുന്നു. കർണാടക, തെലുങ്കാന, ബംഗാൾ തുടങ്ങിയ സ്ഥലങ്ങളിൽ ബിജെപിയുടെ ബൂത്ത് ലെവൽ ഏജന്‍റുമാർ ഫോം 7 നൽകി നിരവധി പേരുടെ വോട്ടു വെട്ടിയെന്ന ആരോപണം കോൺഗ്രസ് നേരത്തെ ഉന്നയിച്ചിരുന്നു.
മലക്കം മറിഞ്ഞ് കമ്മീഷൻ
വോട്ടുചോരി ആരോപണം ആദ്യം ഉന്നയിച്ച സമയത്ത് രാഹുൽ ഗാന്ധിയും വിവിധ രാഷ്ട്രീയ പാർട്ടികളും വോട്ടർ പട്ടികയുടെ മെഷീൻ റീഡ് ചെയ്യാൻ കഴിയുന്ന ഡിജിറ്റൽ രൂപം ആവശ്യപ്പെട്ടിരുന്നു. പട്ടിക പരിശോധിക്കാനുള്ള എളുപ്പത്തിനായിരുന്നു ഇത്. എന്നാൽ, അതു സ്വകാര്യതയെ ബാധിക്കുമെന്ന വിചിത്ര വാദം ഉയർത്തി തെരഞ്ഞെടുപ്പ് കമ്മീഷൻ അതു നിഷേധിച്ചു. തുടർന്ന് രാഹുൽ കെട്ടുകണക്കിനു പ്രിന്‍റ് ചെയ്ത വോട്ടർ പട്ടിക പ്രദർശിപ്പിച്ച് രാഹുൽ ഗാന്ധി പത്രസമ്മേളനം നടത്തിയത് ഏറെ ശ്രദ്ധിക്കപ്പെട്ടിരുന്നു. മെഷീൻ റീഡ് മോഡിൽ പിഡിഎഫ് ആയി വോട്ടർ പട്ടിക നൽകാനാണ് ഇപ്പോൾ പ്രക്ഷോഭം കനത്തതോടെ കമ്മീഷൻ തയാറായിരിക്കുന്നത്.
ഐടി വിഭാഗം പ്രതിക്കൂട്ടിൽ
വോട്ടർ പട്ടികയുടെ അടക്കം നിയന്ത്രണം ഉത്തരവാദിത്വപ്പെട്ട ഉദ്യോഗസ്ഥരെ മറികടന്ന് ഡോ. സീമ ഖന്നയുടെ നേതൃത്വത്തിലുള്ള ഐടി വിഭാഗം കൈയാളിയത് വൻ വിവാദമായി മാറിയിരുന്നു. തെരഞ്ഞെടുപ്പ് കമ്മീഷണർമാരായ വിവേക് ജോഷിയും സുഖ്ബിർ സിംഗ് സന്ധുവും ഇക്കാര്യത്തിലുള്ള വിയോജിപ്പും പ്രകടിപ്പിച്ചിരുന്നു.
സംസ്ഥാനങ്ങളിലെ വോട്ടർ പട്ടികയിൽ തിരുത്തൽ വരുത്താൻ നിയമപരമായി അവകാശമുള്ള ഉദ്യോഗസ്ഥർക്കു പോലും അതിനുള്ള അക്സസ് അനുവദിക്കാതെയാണ് ഡിജിറ്റൽ സംവിധാനങ്ങൾ പ്രവർത്തിച്ചിരുന്നത്.
എസ്ഐആറിൽ പുറത്തായവരിൽ യഥാർഥ വോട്ടർമാരെന്നു കണ്ടെത്തിയവരെ കൂട്ടിച്ചേർക്കാനുള്ള ഒാപ്ഷൻ പോലും ഐടിവിഭാഗം ലഭ്യമാക്കിയിരുന്നില്ല. ഗോവയിലും ബംഗാളിലുമൊക്കെ ഈ പ്രശ്നം ഉദ്യോഗസ്ഥർ ചൂണ്ടിക്കാട്ടിയിട്ടും തെരഞ്ഞെടുപ്പ് കമ്മീഷൻ ഗൗനിച്ചില്ല. എന്നാൽ, ജനരോഷം കനത്തതോടെ ഇതിനുള്ള അവസരം ഇപ്പോൾ തുറന്നു നൽകിയിരിക്കുകയാണ് കമ്മീഷൻ.
വീണ്ടും എസ്എസ്ആർ
വീണ്ടും എസ്എസ്ആർ (വാർഷിക വോട്ടർ പട്ടിക പരിഷ്കരണം) നടത്താനും കമ്മീഷൻ തയാറായിരിക്കുന്നു. എല്ലാ വർഷവും വോട്ടർ പട്ടികയിലേക്ക് പുതിയ ആളുകളെ ചേർക്കുന്ന ഡ്രൈവ് ആണ് എസ്എസ്ആർ. എസ്ഐആർ തുടങ്ങിയതോടെ ഇതു നിർത്തിവച്ചിരിക്കുകയായിരുന്നു. പരാതി ശക്തമായതോടെയാണ് എസ്എസ്ആർ വീണ്ടും തുടങ്ങിയിരിക്കുന്നത്.
ഇത്തരം നടപടികളിലൂടെയൊക്കെ ജനങ്ങളുടെ പരാതികളും പ്രതിഷേധങ്ങളും തണുപ്പിച്ച് എങ്ങനെയും പിടിച്ചുനിൽക്കാനുള്ള ശ്രമമാണ് ഗ്യാനേഷ് കുമാർ നടത്തുന്നതെന്നു ചൂണ്ടിക്കാണിക്കപ്പെടുന്നു. എന്നാൽ, ഇത്തരം മിനുക്കുപണികൾക്കൊണ്ട് ഗ്യാനേഷ്കുമാറിനെതിരേയുള്ള പ്രതിഷേധം പ്രതിപക്ഷം അവസാനിപ്പിക്കാൻ സാധ്യതയില്ല. ഗ്യാനേഷ് കുമാർ അവിടെ തുടരുന്നിടത്തോളം കാലം ഇനിയും സുതാര്യമല്ലാത്ത പലതും നടക്കാൻ സാധ്യതയുണ്ടെന്നാണ് പ്രതിപക്ഷത്തിന്‍റെ ആരോപണം.
അതുകൊണ്ട് പ്രക്ഷോഭത്തിൽനിന്ന് അവർ പിന്നോട്ടുപോകാൻ സാധ്യതയില്ല. ജനരോഷം പേടിച്ച് ഗ്യാനേഷ്കുമാർ ഇപ്പോൾ പൊതുപരിപാടികളിലൊന്നും പങ്കെടുക്കുന്നില്ല. അദ്ദേഹം പങ്കെടുക്കേണ്ട പല പരിപാടികളും മാറ്റിവച്ചിരിക്കുകയാണ് കമ്മീഷൻ. സീമ ഖന്നയും പൊതുവേദികളിൽ പ്രത്യക്ഷപ്പെടുന്നില്ല. അതുകൊണ്ടു തന്നെ ഇവർ ഡെറാഡൂണിൽ ഒളിവിലാണെന്ന തരത്തിൽ പ്രതിപക്ഷകേന്ദ്രങ്ങൾ പരിഹാസം ഉയർത്തുന്നുണ്ട്.
National
ന്യൂഡൽഹി: എസ്ഐആർ ക്രമക്കേടിൽ പ്രതിപക്ഷ പ്രതിഷേധം കരുത്താർജിച്ചതോടെ പ്രതിരോധത്തിലായ ബിജെപി, മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെ സംരക്ഷിക്കാൻ പ്രത്യാക്രമണത്തിന് വട്ടം കൂട്ടുന്നു.
രാജ്യത്ത് അരാജകത്വം സൃഷ്‌ടിക്കാനുള്ള ശ്രമമാണ് പ്രതിപക്ഷം നടത്തുന്നതെന്ന ആരോപണം ഉന്നയിച്ചും തെരഞ്ഞെടുപ്പ് കമ്മിഷനിൽ അനൈക്യം ഇല്ലെന്ന സന്ദേശം നൽകിയും പ്രതിഷേധം തണുപ്പിക്കാനാണ് കേന്ദ്ര സർക്കാരിന്‍റെ ശ്രമം. ഇതിന്‍റെ ഭാഗമായി പ്രതിഷേധങ്ങളെ പ്രതിരോധിച്ചും വിമർശിച്ചും കേന്ദ്രമന്ത്രിമാരും പ്രധാന നേതാക്കളും രംഗത്തെത്തിത്തുടങ്ങി.
ആഭ്യന്തരമന്ത്രി അമിത് ഷാ നടത്തിയ വെല്ലുവിളിക്കു പിന്നാലെ പ്രതിരോധമന്ത്രി രാജ്നാഥ് സിംഗും രംഗത്തെത്തി. ബംഗ്ലാദേശ് മോഡൽ ഭരണമാറ്റം പ്രതിപക്ഷം ആഗ്രഹിക്കുവെന്നും യുവാക്കളെ ഉപയോഗിച്ച് രാജ്യത്ത് അരാജകത്വം വ്യാപിപ്പിക്കാനുള്ള ശ്രമമാണ് നടക്കുന്നത് എന്നുമാണ് രാജ്നാഥ് സിംഗ് പറഞ്ഞത്. സമാന വിമർശനം ബിജപി വക്താവ് പ്രദീപ് ഭണ്ഡാരി ഉന്നയിച്ചതിന് പിന്നാലെയാണ് രാജ്നാഥ് സിംഗിന്‍റെ പരാമർശം.
2029ലെ പൊതുതെരഞ്ഞെടുപ്പിൽ വൻ തോൽവിക്ക് തയാറായിക്കൊള്ളാൻ ആയിരുന്നു പ്രതിപക്ഷത്തോടുള്ള ആഭ്യന്തരമന്ത്രി അമിത് ഷായുടെ വെല്ലുവിളി. ദിമാഗി നക്സലുകളും (ബുദ്ധിജീവികളായ നക്സലുകൾ) ദേശസ്നേഹികളായ ഇന്ത്യക്കാരും തമ്മിലുള്ള പോരാട്ടമാണ് ഇപ്പോൾ നടക്കുന്നതെന്നാണ് കേന്ദ്രമന്ത്രി കിരൺ റിജിജുവിന്‍റെ ഭാഷ്യം.
ബിജെപി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരെയും രംഗത്തിറക്കുന്നുണ്ട്. ഉത്തർപ്രദേശ് മുഖ്യമന്ത്രി യോഗി ആദിത്യനാഥും ആസാം മുഖ്യമന്ത്രി ഹിമന്ത വിശ്വ ശർമയും പ്രതിപക്ഷത്തിനെതിരെയും വിദ്യാർഥികൾക്കെതിരേയും ഇതിനോടകം രംഗത്തെത്തി. കമ്മിഷനെതിരേ പ്രതിഷേധിക്കുന്നവർ രാജ്യത്ത് അരാജകത്വം സൃഷ്‌ടിക്കുന്നു എന്നതാണ് പ്രധാന വാദം. ബിജെപി എംപിമാരും രംഗത്തുണ്ട്.
തെരഞ്ഞെടുപ്പിലൂടെ മാത്രം ഭരണമാറ്റം നടത്താനാണ് പ്രതിപക്ഷം ലക്ഷ്യമിടുന്നതെന്ന് കോൺഗ്രസ് പ്രതികരിച്ചു. തങ്ങൾ വോട്ട് ചോർ ഗഡ്ഡി ചോഡ് (വോട്ടുകള്ളാ, കസേര വിട്ടിറങ്ങൂ) എന്നൊരു ക്യാമ്പയിൻ നടത്തുന്നുണ്ടെന്നും രാജ്യം മുഴുവൻ ഇത് പരസ്യമായി പറയുന്നുണ്ടെന്നും എഐസിസി ആസ്ഥാനത്ത് നടത്തിയ വാർത്താസമ്മേളനത്തിൽ കോൺഗ്രസ് നേതാവും രാജ്യസഭാംഗവുമായ പവൻ ഖേര പറഞ്ഞു. ഈ സർക്കാരിനെ പരാജയപ്പെടുത്തണമെന്നും ഈ വ്യവസ്ഥിതി മാറ്റണമെന്നുമാണ് തങ്ങളുടെ ഉദ്ദേശ്യമെന്നും അദ്ദേഹം പറഞ്ഞു.
തെരഞ്ഞെടുപ്പു കമ്മിഷനിൽ ഐക്യമില്ലെന്നത് മാധ്യമസൃഷ്‌ടിയാണെന്ന് വരുത്തി ത്തീർക്കാനും ബിജെപി ശ്രമിക്കുന്നുണ്ട്. എന്നാൽ കമ്മിഷണർമാരെ ഒന്നിച്ചിരുത്തിയുള്ള വാർത്താസമ്മേളനത്തിന് പദ്ധതിയിട്ടെങ്കിലും നടന്നില്ലെന്നാണ് സൂചന. സഹ കമ്മിഷണർമാരെ അനുനയിപ്പിക്കുന്നതിനുള്ള ശ്രമവും നടക്കുന്നുണ്ട്. അതിന്‍റെ സൂചനയാണ് ഒരു വർഷത്തിൽ കൂടുതലായി മുടങ്ങിക്കിടന്ന പ്രത്യേക വോട്ടർപട്ടിക പുതുക്കൽ (എസ്എസ്ആർ) പ്രഖ്യാപിച്ചത്.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ വിചിത്രവും വിവാദപരവുമായ പ്രതിഷേധവുമായി പാലക്കാട്ടെ കോൺഗ്രസ് പ്രവർത്തകർ. ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പാലക്കാട് സ്റ്റേഡിയം ബസ് സ്റ്റാൻഡിന് സമീപമാണ് ഈ പ്രതിഷേധം അരങ്ങേറിയത്.
ഡിസിസി ഓഫീസിൽ നിന്ന് ബസ് സ്റ്റാൻഡിലേക്ക് പ്രതീകാത്മകമായി ശവമഞ്ചം വഹിച്ചുകൊണ്ടുവന്ന പ്രവർത്തകർ, അവിടെ വെച്ച് ചിതയൊരുക്കി. മാലയിട്ട ഫോട്ടോയും വെച്ച് ഹിന്ദു ആചാരപ്രകാരമുള്ള സംസ്കാര ചടങ്ങുകൾ അനുകരിച്ച ശേഷമാണ് ചിതയ്ക്ക് തീ കൊളുത്തിയത്.
എന്നാൽ ഇതിനുശേഷം നടന്ന സംഭവങ്ങളാണ് വലിയ വിവാദത്തിന് വഴിവെച്ചത്. ചിത കത്തിച്ച ശേഷം ചാരം ശേഖരിച്ച പ്രവർത്തകർ അത് ഒരു ടോയ്‌ലറ്റിൽ കൊണ്ടുപോയി തള്ളുകയായിരുന്നു.
തെരഞ്ഞെടുപ്പ് കമ്മീഷണറെ അപമാനിക്കുന്ന രീതിയിലാണ് ഇവർ ഇത്തരമൊരു പ്രതിഷേധം സംഘടിപ്പിച്ചത്. മുൻപ് സമാനമായ രീതിയിൽ പ്രതിഷേധം സംഘടിപ്പിച്ച ഇടത് സംഘടനകളെ വിമർശിച്ചവരാണ് ഇന്ന് ഇത്തരത്തിലൊരു പ്രതിഷേധവുമായി എത്തിയിരിക്കുന്നതെന്ന വിമർശനങ്ങളും ശക്തമാണ്.
National
ന്യൂഡൽഹി: സമ്മർദങ്ങൾക്ക് വഴങ്ങില്ലെന്നും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കില്ലെന്നും കേന്ദ്ര പ്രതിരോധ മന്ത്രി രാജ്നാഥ് സിംഗ്. ഡൽഹിയിൽ നടത്തിയ വാർത്താസമ്മേളനത്തിലാണ് രാജ്നാഥ് സിംഗ് കോൺഗ്രസിനും രാഹുൽ ഗാന്ധിക്കുമെതിരെ രൂക്ഷ വിമർശനം ഉന്നയിച്ചത്.
രാഷ്ട്രീയ താത്പര്യങ്ങൾക്കായി രാജ്യത്തിന്‍റെ ഭരണഘടനാ സ്ഥാപനങ്ങളെ ബലികൊടുക്കാൻ കഴിയില്ലെന്ന് അദ്ദേഹം വ്യക്തമാക്കി. രാജ്യത്തെ യുവാക്കളെ അരാജക രാഷ്ട്രീയത്തിന്‍റെ കരുക്കളാക്കി മാറ്റാൻ ശ്രമം നടക്കുന്നുണ്ടെന്നും, ബംഗ്ലാദേശിൽ കണ്ടതിന് സമാനമായ രീതിയിൽ ഇവിടെയും ഭരണമാറ്റത്തിനാണ് ചിലർ ശ്രമിക്കുന്നതെന്നും അദ്ദേഹം ആരോപിച്ചു.
തെരഞ്ഞെടുപ്പ് കമ്മീഷനെപ്പോലെയുള്ള ജനാധിപത്യ സ്ഥാപനങ്ങളെ അപകീർത്തിപ്പെടുത്താനാണ് പ്രതിപക്ഷത്തിന്‍റെ ശ്രമം. രാഹുൽ ഗാന്ധിയും കോൺഗ്രസും അവസരവാദ രാഷ്ട്രീയമാണ് പുറത്തെടുക്കുന്നത്. പൊതുജനാഭിപ്രായത്തെ മാനിക്കാൻ രാഹുൽ ഗാന്ധി തയ്യാറാകണമെന്നും രാജ്നാഥ് സിംഗ് ആവശ്യപ്പെട്ടു. സർക്കാരിനെ അട്ടിമറിക്കാൻ ധിക്കാരപൂർവം ആഹ്വാനം ചെയ്യുന്നവർ രാജ്യത്ത് അരാജകത്വം സൃഷ്ടിച്ച് അധികാരം പിടിച്ചെടുക്കാനുള്ള ഗൂഢാലോചനയാണ് നടത്തുന്നത്.
ഗാന്ധിയുടെ പേര് ഉപയോഗിക്കാനുള്ള എല്ലാ ധാർമിക അവകാശങ്ങളും കോൺഗ്രസ് നേതാക്കൾക്ക് നഷ്ടപ്പെട്ടുകഴിഞ്ഞതായും പ്രതിരോധ മന്ത്രി കൂട്ടിച്ചേർത്തു.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടു കോക്രോച്ച് ജനതാ പാർട്ടി (സിജെപി) ഇന്ന് ഡൽഹി കൊണാട്ട് പ്ലേസിൽ തിരംഗ മാർച്ച് നടത്തും. എന്നാൽ, ഇതിന് അനുമതി നിഷേധിച്ച ഡൽഹി പൊലിസ്, പ്രതിഷേധം നടത്തിയാൽ ശക്തമായ നടപടി സ്വീകരിക്കുമെന്ന മുന്നറിയിപ്പും നൽകിയിട്ടുണ്ട്.
ഇന്നു വൈകുന്നേരം അഞ്ചിന് കൊണാട്ട് പ്ലേസിലേക്ക് എത്താൻ ദേശസ്നേഹികളായ എല്ലാ ജനങ്ങളോടും അഭ്യർഥിക്കുന്നതായി അഭിജീത് ദീപ്കെ വീഡിയോ സന്ദേശത്തിലൂടെ അറിയിച്ചു.
നിലവിൽ ഔദ്യോഗിക പ്രതിഷേധസ്ഥലമല്ലാത്ത ജന്തർ മന്തറിൽ പ്രവേശിച്ചു ദേശീയ പതാക വീശി എന്നാരോപിച്ചു അറസ്റ്റ് ചെയ്ത സിജെപി ഭാരവാഹികളായ സൗരവ് ദാസ്, അശുതോഷ് റാങ്ക എന്നിവരെ ഉടനടി മോചിപ്പിക്കണമെന്ന് ആവശ്യപ്പെട്ട ദീപ്കെ, ദേശീയപതാക വീശുന്നത് കുറ്റകൃത്യമല്ലെന്ന സന്ദേശം പൊതുസമൂഹത്തിന് നൽകാനാണ് ഈ പ്രതിഷേധമെന്നും കൂട്ടിച്ചേർത്തു.
National
ന്യൂഡൽഹി: വോട്ടുകൊള്ളയിൽ തെരുവിൽ തുടരുന്ന പോരാട്ടത്തിനൊപ്പം സുപ്രീംകോടതിയിൽ നിയമപോരാട്ടവും കടുക്കുന്നു. കോടതി ഉത്തരവ് മറികടന്ന് സമരം പൊളിക്കാൻ ഏർപ്പടുത്തിയ നിയന്ത്രണങ്ങൾ, എസ്ഐആറിൽ രാഹുൽ സമർപ്പിച്ച ഹർജി, സമരക്കാർക്കെതിരേ പൊലിസ് നടത്തിയ അതിക്രമം, മാധ്യമ പ്രവർത്തകർക്കെതിരായ പൊലിസ് നടപടികൾ, ജന്തർ മന്തർ പൂട്ടിയത് തുടങ്ങി 46 ഹർജികളാണ് ചീഫ് ജസ്റ്റീസ് സൂര്യകാന്ത്, ജസ്റ്റീസ് ജോയ്മല്യ ബാഗ്ചി എന്നിവരുടെ ബെഞ്ചിന് മുന്നിൽ പരിഗണനയ്ക്കെത്തിയത്.
ഗ്യാനേഷ് കുമാറിനെതിരേ ഇന്ത്യ മുന്നണി സർപ്പിച്ച ഹർജിയിൽ തെരഞ്ഞെടുപ്പ് കമ്മിഷനും മുഖ്യ തെരഞ്ഞെടുപ്പ് കമ്മിഷണർക്കും സുപ്രീംകോടതി നോട്ടീസ് അയച്ചു. അതേസമയം, ഇന്ത്യ സഖ്യത്തിന്‍റെ സുപ്രീംകോടതി മാർച്ചിൽ അതൃപ്തി പ്രകടിപ്പിച്ച ചീഫ് ജസ്റ്റീസ് ഹർജിക്കാരിൽ ഒരാളുടെ പെരുമാറ്റത്തെക്കുറിച്ച് അടുത്ത വാദംകേൾക്കലിൽ പ്രതികരണം തേടുമെന്ന് വ്യക്തമാക്കി. എന്നാൽ ആരെപ്പറ്റിയാണ് പരാമർശിക്കുന്നതെന്ന് കോടതി പറഞ്ഞില്ല.
പ്രതിഷേധങ്ങൾ തടയാൻ ഡൽഹിയിൽ ഏർപ്പെടുത്തിയ നിയന്ത്രണങ്ങളിൽ കേന്ദ്ര ആഭ്യന്തര സെക്രട്ടറി സുപ്രീംകോടതിക്ക് മുന്നിൽ മാപ്പപേക്ഷിച്ചു. എല്ലാ ഹർജികളിലും കക്ഷികളുടെ പ്രതികരണം ലഭിച്ചശേഷം സുപ്രീംകോടതി വിശദമായ വാദം കേൾക്കും. പ്രതിഷേധത്തിൽ പങ്കെടുത്ത രാജ്യസഭാംഗം ജോൺ ബ്രിട്ടാസ് നേരിട്ട പൊലിസ് അതിക്രമം അദ്ദേഹം നേരിട്ടെത്തി ബെഞ്ചിനെ അറിയിച്ചു. കേസിൽ കൂടുതൽ വാദത്തിലേക്ക് കടക്കുമ്പോൾ ഇക്കാര്യം പരിഗണിക്കുമെന്ന് ചീഫ് ജസ്റ്റീസ് വ്യക്തമാക്കി.
അഭിഭാഷകർക്കും വനിതാ മാധ്യമ പ്രവർത്തകർക്കും ഡൽഹി പൊലിസിൽനിന്ന് ക്രൂരനടപടി നേരിടേണ്ടി വന്നതായും ഹർജിക്കാർ കോടതിയെ അറിയിച്ചു. തുടർന്ന് പ്രതിഷേധവുമായി ബന്ധപ്പെട്ട സിസിടിവി ദൃശ്യങ്ങളും മറ്റ് ഡിജിറ്റൽ തെളിവുകളും സുരക്ഷിതമായി സൂക്ഷിക്കാൻ കോടതി നിർദേശം നൽകി.
സുപ്രീംകോടതി മാർച്ചിൽ അതൃപ്തി
ഇന്ത്യ മുന്നണിയുടെ നേതൃത്വത്തിൽ തിങ്കളാഴ്ച സുപ്രീംകോടതിയിലേക്ക് നടത്തിയ മാർച്ചും കോടതി രജിസ്ട്രിയിൽ പ്രവേശിച്ചതുമായി ബന്ധപ്പെട്ട ഹർജിയിൽ രാഹുൽ ഗാന്ധി ഉൾപ്പടെ പ്രതിപക്ഷ നേതാക്കൾക്ക് സുപ്രീംകോടതി നോട്ടീസ് നൽകി.
കോടതി പരിസരത്തുണ്ടായ സംഭവവികാസങ്ങളിൽ അതൃപ്തി പ്രകടിപ്പിച്ച ചീഫ് ജസ്റ്റീസ് സൂര്യകാന്ത് അധ്യക്ഷനായ ബെഞ്ച്, ഇത്തരം സംഭവങ്ങളിലൂടെ കോടതിയെ ആർക്കും ഭീഷണിപ്പെടുത്താനാകില്ലെന്നും വ്യക്തമാക്കി.
National
ചെന്നൈ: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരേ തമിഴ്നാട്ടിൽ കോൺഗ്രസിന്റെ നേതൃത്വത്തിൽ ഇന്ത്യ മുന്നണിയിലെ കക്ഷികൾ സംഘടിപ്പിച്ച പ്രതിഷേധത്തിൽ ടിവികെ നേതാവും മുഖ്യമന്ത്രിയുമായ സി.ജോസഫ് വിജയ്യും.
തമിഴ്നാട് സിസിസി അധ്യക്ഷനും എംപിയുമായ ബി. മാണിക്യമാണു പ്രതിഷേധത്തിനു നേതൃത്വം നൽകിയത്. ഒക്‌ടോബർ മൂന്നിനാണ് ടിവികെയ്ക്ക് ഇന്ത്യ മുന്നണിയിൽ സ്ഥാനംലഭിച്ചത്.
ഇതിനുശേഷം മുന്നണി സംഘടിപ്പിക്കുന്ന ശ്രദ്ധേയ പരിപാടികളിലൊന്നാണിത്. ടിവികെ ഇന്ത്യ മുന്നണിയിലെത്തിയതോടെ മുഖ്യപ്രതിപക്ഷമായ ഡിഎംകെ കൂട്ടായ്മയിൽനിന്ന് അകലുകയും ചെയ്തു.
ചെന്നൈ എഗ്‌മോറിൽ നടന്ന പ്രതിഷേധത്തിൽ നിവേദിത് ആൽവ, വിസികെ സ്ഥാപകനും എംപിയുമായ തോൽ തിരുമാവളവൻ, ഐയുഎംഎൽ നേതാവ് ഖാദർ മൊയ്തീൻ, എംഡിഎംകെ ജനറൽ സെക്രട്ടറി വൈകോ, സിപിഐ സംസ്ഥാന സെക്രട്ടറി എം. വീരപാണ്ഡ്യൻ, സിപിഎം സംസ്ഥാനസെക്രട്ടറി പി. ഷൺമുഖം തുടങ്ങിയവരും പങ്കെടുത്തു.
National
ന്യൂഡൽഹി: ജന്തർ മന്തറിലെ പ്രതിഷേധങ്ങളുമായി ബന്ധപ്പെട്ട് കേന്ദ്ര സർക്കാരിനും പ്രധാനമന്ത്രി നരേന്ദ്ര മോദിക്കുമെതിരെ രൂക്ഷവിമർശനവുമായി സിജെപി. "ഡൽഹിയെ നിശ്ചലമാക്കുകയും റെയിൽവേയും മെട്രോയും അടച്ചുപൂട്ടി ഡൽഹിയെ ഒരു ഇന്ത്യാ-പാകിസ്താൻ അതിർത്തി പോലെയാക്കി മാറ്റുകയും ചെയ്തിരിക്കുന്നു.
വിദ്യാർഥി സംഘടനകളെയും പ്രതിപക്ഷ നേതാക്കളെയും മുൻ മുഖ്യമന്ത്രിമാരെയും തെരുവുകളിലൂടെ വലിച്ചിഴച്ചു. ഇതെല്ലാം കേവലം ഒരു ഗ്യാനേഷ് കുമാറിന് വേണ്ടിയാണോ? ഗ്യാനേഷ് കുമാർ നരേന്ദ്ര മോദിക്ക് എന്താണ് ഇത്രയധികം പ്രധാനപ്പെട്ട ആളാകുന്നത്?" എന്ന് അദ്ദേഹം ചോദിച്ചു.
ഡൽഹിയിൽ നടത്തിയ വാർത്താ സമ്മേളനത്തിനിടെ ഇടത് വിദ്യാർഥി സംഘടന നേതാവ് നേഹ ബോറ, ചലച്ചിത്രതാരവും ഇടത് സഹയാത്രികനുമായ പ്രകാശ് രാജ് തുടങ്ങിയവരും പങ്കെടുത്തു.
National
ന്യൂഡൽഹി: രാജ്യത്തെ തെരഞ്ഞെടുപ്പ് ക്രമക്കേടുകൾക്കെതിരേയും പ്രതിഷേധക്കാർക്കെതിരായ പൊലിസ് അക്രമങ്ങൾക്കെതിരേയും ജന്തർ മന്തർ സമരഭൂമിയായി പുനഃസ്ഥാപിക്കണമെന്ന് ആവശ്യപ്പെട്ടും തലസ്ഥാനത്ത് ഇന്നലെയും ശക്തമായ പ്രതിഷേധമുണ്ടായി.
ഫിറോസ് ഷാ റോഡിൽനിന്ന് ജന്തർ മന്തറിലേക്ക് ഇടത് വിദ്യാർഥി-യുവജന സംഘടനകളായ ഡിവൈഎഫ്ഐയും എസ്എഫ്ഐയും സംയുക്തമായി പ്രതിഷേധമാർച്ച് നടത്തിയപ്പോൾ യൂത്ത് കോൺഗ്രസ് പൊലിസ് അതിക്രമങ്ങൾക്കെതിരേ പാർലമെന്‍റ് സ്ട്രീറ്റ് പൊലിസ് സ്റ്റേഷനിലേക്കു മാർച്ച് നടത്തി. രണ്ട് മാർച്ചുകളും പൊലിസ് തടയാൻ ശ്രമിച്ചു. പിരിഞ്ഞുപോകാൻ കൂട്ടാക്കാതിരുന്ന നൂറോളം പേരെ പൊലിസ് കസ്റ്റഡിയിലെടുത്തു നീക്കി.
ഫിറോസ് ഷാ റോഡിൽനിന്ന് ആരംഭിച്ച ഡിവൈഎഫ്ഐ-എസ്എഫ്ഐ മാർച്ച് ജന്തർ മന്തറിലേക്കുള്ള റോഡിലേക്ക് കടക്കുന്നതിനു മുമ്പേ പൊലിസ് ബാരിക്കേഡുകളിട്ടു തടഞ്ഞു. എംപിമാരായ എ.എ. റഹിം, വി. ശിവദാസൻ, യുവജനനേതാക്കളായ ആദർശ് എം. സജി, ജെയ്ക് സി. തോമസ് എന്നിവരുടെ നേതൃത്വത്തിലായിരുന്നു മാർച്ച്.
ബാരിക്കേഡുകൾ മറികടക്കാൻ ചില പ്രവർത്തകർ ശ്രമിച്ചെങ്കിലും പിന്നീട് പ്രതിഷേധക്കാർ റോഡിൽ കുത്തിയിരുന്ന് മുദ്രാവാക്യം വിളിക്കുകയായിരുന്നു. പ്രതിഷേധം അവസാനിപ്പിക്കാൻ ഇവരോട് പൊലിസ് ആവശ്യപ്പെട്ടെങ്കിലും അര മണിക്കൂറിലേറെ പ്രതിഷേധം തുടർന്നതോടെ നേതാക്കളെയും വനിതാ പ്രവർത്തകരെയുമടക്കം വലിച്ചിഴച്ച് കസ്റ്റഡിയിലെടുക്കുകയായിരുന്നു.
പാർലമെന്‍റ് സ്ട്രീറ്റ് സ്റ്റേഷനിലേക്കു മാർച്ച്
ജന്തർ മന്തർ സമരവേദിയായി പുനഃസ്ഥാപിക്കണമെന്നാവശ്യപ്പെട്ടും പ്രതിഷേധക്കാർക്കു നേരേയുള്ള പൊലിസ് അക്രമങ്ങൾക്കെതിരേയും യൂത്ത് കോൺഗ്രസ് ആസ്ഥാനത്തുനിന്ന് പാർലമെന്‍റ് സ്ട്രീറ്റ് പൊലിസ് സ്റ്റേഷനിലേക്ക് പ്രവർത്തകർ മാർച്ച് നടത്തി.
ത്രിവർണപതാകകളേന്തിയുള്ള മാർച്ചിനിടെ പട്ടേൽ ചൗക്ക് മെട്രോ സ്റ്റേഷനു സമീപം ഇവർ അൽപസമയം കുത്തിയിരുന്നും പ്രതിഷേധിച്ചു. പിന്നീട് നൂറോളം പ്രവർത്തകരുമായി പാർലമെന്‍റ് സ്ടീറ്റ് പൊലിസ് സ്റ്റേഷനിലേക്കെത്തിയ ഇവർ അവിടെ നിന്ന് മുദ്രാവാക്യം വിളിച്ചു.
Kerala
തിരുവനന്തപുരം: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ നേരത്തേയുണ്ടായിരുന്ന എട്ട്‌ വിജിലൻസ് കേസുകളുമായി ബന്ധപ്പെട്ട അന്വേഷണമാണ് ഇപ്പോൾ നടത്തുന്നതെന്ന് ആഭ്യന്തരമന്ത്രി രമേശ് ചെന്നിത്തല നിയമസഭയിൽ പറഞ്ഞു.
വിജിലൻസിന്‍റെ അന്വേഷണം നിഷ്പക്ഷവും നീതിപൂർവകവുമായിരിക്കും. വസ്തുതകളും ഫയലുകളും പരിശോധിച്ച ശേഷം സർക്കാർ തുടർനടപടി എടുക്കും.
കെഎസ്ടിപി പദ്ധതിയിലെ കരാർ കന്പനികൾക്ക് എസ്റ്റിമേറ്റ് തുകയേക്കാൾ കൂടുതൽ തുകയിൽ കരാറുകൾ അനുവദിച്ചതിലൂടെ സർക്കാരിന് 700 കോടി രൂപയുടെ നഷ് ടമുണ്ടാക്കിയെന്നും ഭൂമി ഏറ്റെടുക്കലിനും പുനരധിവാസത്തിനും എസ്റ്റിമേറ്റ് 187 കോടിയായിരുന്നെങ്കിലും 323 കോടി ചെലവഴിച്ചെന്നുമുള്ള പരാതിയിൽ ഗ്യാനേഷിനെതിരേ അന്വേഷണമുണ്ടായിരുന്നു.
അതേസമയം വിജിലൻസ് അന്വേഷണം വേണ്ട രീതിയിൽ നടന്നിട്ടില്ലെന്ന പുതിയ പരാതിയാണ് ഇപ്പോൾ വിജിലൻസിന് കൈമാറിയതെന്നും എ.കെ.എം അഷറഫിന്‍റെ സബ്മിഷന് മന്ത്രി മറുപടി നൽകി.
കെഎസ്ടിപി റോഡ് വികസന പദ്ധതിയിൽ ഗുരുതര അഴിമതി ആരോപണമാണ് അന്ന് മരാമത്ത് സെക്രട്ടറിയായിരുന്ന ഗ്യാനേഷ് കുമാറിനെതിരേ ഉയർന്നതെന്ന് അഷറഫ് ചൂണ്ടിക്കാട്ടി.
National
ലണ്ടൻ: മുഖ്യ തെരഞ്ഞെടുപ്പു കമ്മിഷണറുടെ രാജിയാവശ്യപ്പെട്ട് ഡൽഹിയിൽ നടക്കുന്ന സമരത്തെ അനുകൂലിച്ച് ലണ്ടനിലും പ്രതിഷേധം.
ലണ്ടനിലെ ഇന്ത്യൻ ഹൈക്കമ്മിഷൻ ഓഫീസിനു പുറത്തായിരുന്നു സൗത്ത് ഏഷ്യ സോളിഡാരിറ്റി ഗ്രൂപ്പ്, ഹിന്ദുത്വത്തിനെതിരേയുള്ള കേംബ്രിജ് സൗത്ത് ഏഷ്യൻ കൂട്ടായ്മ, ഇന്ത്യൻ വർക്കേഴ്സ് അസോസിയേഷൻ, അംബേദ്കർ സൊസൈറ്റി തുടങ്ങിയ സംഘടനകളുടെ നേതൃത്വത്തിൽ പ്രതിഷേധം.
ഗ്യാനേഷ് കുമാറിന്‍റെ രാജി ആവശ്യപ്പെട്ടും, പ്രതിഷേധക്കാർക്കെതിരേയുള്ള പോലീസ് നടപടിയെ അപലപിച്ചുമുള്ള പ്ലാക്കാർഡുകൾ പ്രതിഷേധക്കാർ ഉയർത്തി.
National
ന്യൂഡൽഹി: മിന്നൽ സമരങ്ങൾക്ക് തയ്യാറായിരിക്കാൻ എംപിമാരോട് രാഹുൽ ഗാന്ധി. സമരം തീരുമാനിച്ചാൽ 24 മണിക്കൂറിനുള്ളിൽ വലിയ മുന്നേറ്റം നടത്താൻ ആകണമെന്നാണ് ഇന്ത്യാസഖ്യ നേതാക്കളോട് രാഹുൽ ഗാന്ധി അറിയിച്ചത്. ജന്തര്‍മന്തറിനെ ഔദ്യോഗിക പ്രതിഷേധ വേദികളുടെ പട്ടികയില്‍ നിന്നൊഴിവാക്കിയ നടപടിക്കെതിരെ നീങ്ങാനാണ് രാഹുല്‍ ഗാന്ധിയുടെ ആഹ്വാനം. ജന്തര്‍മന്തര്‍ തിരിച്ചുപിടിക്കാനാണ് അടുത്ത പോരാട്ടമെന്ന് രാഹുല്‍ ഗാന്ധി എക്സില്‍ കുറിച്ചിരുന്നു. മിന്നല്‍ സമരങ്ങള്‍ക്ക് തയ്യാറായിരിക്കാനും ഇന്ത്യ സഖ്യം നേതാക്കള്‍ക്ക് രാഹുല്‍ നിര്‍ദേശം നല്‍കി.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള ഡൽഹിയിലെ പ്രതിഷേധങ്ങൾ അണപൊട്ടുന്നു. പാർലമെന്‍റ് അംഗങ്ങളായ വി.കെ. ശിവദാസൻ, എ.എ. റഹീം, ജോൺബ്രിട്ടാസ് എന്നിവരുടെ നേതൃത്വത്തിൽ നടന്ന ഡിവൈഎഫ്ഐ-എസ്എഫ്ഐ മാർച്ചിലെ സംഘർഷത്തിന് പിന്നാലെ കോൺഗ്രസ് യുവജന, വിദ്യാർഥി സംഘടനകളായ യൂത്ത് കോൺഗ്രസ്-കെഎസ്‌യു മാർച്ചും സംഘർഷ ഭരിതം. ഡൽഹിയിലെ പാർലമെന്‍റ് സ്ട്രീറ്റ് പൊലീസ് സ്റ്റേഷനിലേക്കായിരുന്നു പ്രതിഷേധ മാർച്ച്. വൻ പൊലിസ് സന്നാഹത്തെ മറികടക്കാൻ ശ്രമിച്ച പ്രവർത്തകരെ വലിയ തോതിലാണ് പൊലിസ് അറസ്റ്റ് ചെയ്ത് നീക്കിയത്. മുൻ ഡൽഹി പിസിസി അധ്യക്ഷൻ ഉദയ്ബാനു ചിബ് ഉൾപ്പെടെയുള്ളവർ സമരത്തിൽ പങ്കാളികളായിരുന്നു.
NRI
മനാമ: രാജ്യത്തെ ജനാധിപത്യ പ്രക്രിയയുടെ സുതാര്യതയും ഭരണഘടനാ മൂല്യങ്ങളും സംരക്ഷിക്കാൻ മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കം ചെയ്യണമെന്ന് ആവശ്യപ്പെട്ട് കേരള നിയമസഭാ പ്രമേയം പാസാക്കിയത് സ്വാഗതാർഹമാണെന്ന് പ്രവാസി വെൽഫെയർ ബഹ്റിൻ അറിയിച്ചു.
ഇന്ത്യ മഹാരാജ്യത്തെ നീതിപൂർവമായ തെരഞ്ഞെടുപ്പിന് നിഷ്പക്ഷമായും സ്വതന്ത്രമായും പ്രവർത്തിക്കേണ്ട ഭരണഘടനാ സ്ഥാപനമായ തെരഞ്ഞെടുപ്പ് കമ്മീഷന്‍റെ വിശ്വാസ്യത ചോദ്യം ചെയ്യപ്പെടുന്ന സാഹചര്യമാണ് നിലവിലുള്ളത്.
വോട്ടർപട്ടിക ക്രമീകരണങ്ങളിലെ സുതാര്യതയില്ലായ്മയും പൗരന്മാരുടെ അടിസ്ഥാനപരമായ വോട്ടവകാശം സംരക്ഷിക്കുന്നതിലുണ്ടായ വീഴ്ചകളും ജനാധിപത്യ സംവിധാനത്തിന് കനത്ത ഭീഷണിയാണ്.
ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയിൽ വിദേശത്തുള്ള പ്രവാസികൾ ഉൾപ്പെടെയുള്ള ദശലക്ഷക്കണക്കിന് പൗരന്മാരുടെ വോട്ടവകാശം സുരക്ഷിതമാണെന്ന് ഉറപ്പുവരുത്താൻ തെരഞ്ഞെടുപ്പ് കമ്മീഷന് സാധിക്കണം.
കമ്മീഷന്‍റെ ഭരണഘടനാപരമായ സ്വയംഭരണാധികാരം വീണ്ടെടുക്കുന്നതിനും ജനങ്ങളുടെ വിശ്വാസ്യത നിലനിർത്തുന്നതിനും ശക്തമായ നടപടികൾ അത്യന്താപേക്ഷിതമാണ്.
രാജ്യത്തെ ജനാധിപത്യ മൂല്യങ്ങളും പൗരന്മാരുടെ അവകാശങ്ങളും സംരക്ഷിക്കുന്നതിനായി കേരള നിയമസഭാ ഉയർത്തിയ ഈ ശബ്ദം കേന്ദ്ര സർക്കാരും ഭരണഘടനാ സ്ഥാപനങ്ങളും ഗൗരവമായി പരിഗണിക്കണമെന്ന് പ്രവാസി വെൽഫെയർ ബഹ്റിൻ പുറത്തിറക്കിയ പ്രസ്താവനയിൽ ആവശ്യപ്പെട്ടു.
National
ചെന്നൈ: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്ത്യ സഖ്യം ചെന്നൈയിൽ സംഘടിപ്പിക്കുന്ന പ്രതിഷേധ പൊതുയോഗത്തിൽ നടൻ വിജയ്യുടെ തമിഴക വെട്രി കഴകവും പങ്കെടുക്കും. നാളെ നടക്കുന്ന യോഗത്തിന്‍റെ പ്രാസംഗികരുടെ പട്ടികയിൽ ടിവികെ നേതാവ് രാജ്‌മോഹനും ഉൾപ്പെട്ടിട്ടുണ്ട്.
ഡൽഹിയിലെ സിജെപി പ്രക്ഷോഭങ്ങളിൽ നിന്ന് ടിവികെ വിട്ടുനിന്നതിനെ തുടർന്ന്, വിജയ് ബിജെപിയുടെ 'ബി-ടീമും' അപ്രഖ്യാപിത അടിമയുമാണെന്ന് ഡിഎംകെയും ഉദയനിധി സ്റ്റാലിനും കടന്നാക്രമിച്ചിരുന്നു. എന്നാൽ രാഹുൽ ഗാന്ധിയും വിജയ്യും ഒന്നിച്ചുള്ള പോസ്റ്ററുകൾ പുറത്തുവന്നതോടെ തമിഴ്നാട് രാഷ്ട്രീയത്തിൽ നിർണായക വഴിത്തിരിവാണ് ഉണ്ടാകുന്നത്.
കഴിഞ്ഞ ദിവസം പ്രക്ഷോഭത്തിൽ പങ്കെടുത്തതിന് ചെന്നൈയിൽ എസ്എഫ്ഐ, എഐഎസ്എഫ് പ്രവർത്തകർ ഉൾപ്പെടെ 140 പേരെ പൊലിസ് കസ്റ്റഡിയിലെടുത്തിരുന്നു
National
ന്യൂഡൽഹി: ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്ത്യാ സഖ്യം നടത്തിയ പ്രതിഷേധത്തിനെതിരെ രൂക്ഷ വിമർശനവുമായി കേന്ദ്ര ആഭ്യന്തരമന്ത്രി അമിത് ഷാ. പ്രതിപക്ഷ നേതാവ് രാഹുൽ ഗാന്ധിയെയും അദ്ദേഹം കടന്നാക്രമിച്ചു. ജനങ്ങൾ ഇന്ത്യാ സഖ്യത്തെ പൂർണമായും തള്ളിക്കളഞ്ഞു.
രാജ്യത്ത് നടന്ന ഉപതെരഞ്ഞെടുപ്പുകളിലെ ബിജെപിയുടെ വിജയം ഇതിന് ഉദാഹരണമാണെന്ന് അമിത് ഷാ പറഞ്ഞു. പ്രതിഷേധ പ്രകടനങ്ങളിൽ പങ്കെടുക്കാൻ ഇന്ത്യാ സഖ്യത്തിലെ വിവിധ പാർട്ടികൾ ഒന്നിച്ചുനിന്ന് ശ്രമിച്ചിട്ടും 8,000 പേരെ മാത്രമാണ് എത്തിക്കാനായത്. ഒന്നര കിലോമീറ്റർ മാത്രം നീളുന്ന റോഡ് ഷോകൾ രാജ്യത്തെ ജനങ്ങളുടെ പൊതുശബ്ദത്തെ പ്രതിനിധീകരിക്കില്ലെന്നും അദ്ദേഹം വിമർശിച്ചു.
നുഴഞ്ഞുകയറ്റക്കാർക്ക് വോട്ടവകാശം ഉറപ്പാക്കാനാണ് രാഹുൽ ഗാന്ധി തെറ്റായ പ്രചാരണങ്ങൾ നടത്തുന്നതെന്നും അമിത് ഷാ ആരോപിച്ചു. 2029ലെ പൊതുതെരഞ്ഞെടുപ്പിലും കോൺഗ്രസിനെ ജനങ്ങൾ നിരാകരിക്കുമെന്ന് അദ്ദേഹം കൂട്ടിച്ചേർത്തു. അതേസമയം ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള പ്രക്ഷോഭം കൂടുതൽ ശക്തമാക്കാൻ ഇന്ത്യ സഖ്യം നേതാക്കൾ തീരുമാനിച്ചു.
ലോക്സഭ പ്രതിപക്ഷ നേതാവ് രാഹുൽ ഗാന്ധിയുടെ വസതിയിൽ ചേർന്ന സഖ്യകക്ഷി നേതാക്കളുടെ യോഗത്തിന് ശേഷമാണ് ഭരണഘടനാ മൂല്യങ്ങളും ജനാധിപത്യവും സംരക്ഷിക്കുന്നതിനായി ഒറ്റക്കെട്ടായി മുന്നോട്ടുപോകാൻ തീരുമാനിച്ചത്. എത്രയൊക്കെ ബാരിക്കേഡുകൾ തീർത്തും സമരങ്ങൾ അടിച്ചമർത്താൻ നോക്കിയാലും ലക്ഷ്യം കാണുന്നതുവരെ പോരാട്ടം തുടരുമെന്ന് യോഗത്തിന് ശേഷം നേതാക്കൾ സംയുക്തമായി പ്രഖ്യാപിച്ചു.
Kerala
തിരുവനന്തപുരം: മുഖ്യ തെരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്‍റെ രാജി ആവശ്യപ്പെട്ട് നടക്കുന്ന പ്രതിഷേധത്തിൽ പങ്കെടുക്കുന്നതിനായി ആഭ്യന്തര മന്ത്രി രമേശ് ചെന്നിത്തല ഉള്‍പ്പെടെയുള്ളവർ ഡൽഹിയിലേക്ക്.
എ.പി. അനില്‍കുമാർ, പി.സി. വിഷ്ണുനാഥ്, ടി. സിദ്ദിഖ്, റോജി എം. ജോണ്‍ എന്നിവരും നാളെയോടെ ഡൽഹിയിലെത്തും. കഴിഞ്ഞ ദിവസം ചേർന്ന കെപിസിസി ഓൺലൈൻ യോഗത്തിൽ കേരളത്തിൽ നിന്ന് പരമാവധി നേതാക്കള്‍ പങ്കെടുക്കണമെന്ന് നിർദേശമുണ്ടായിരുന്നു.
നാളെ ജില്ലകളിൽ ജനാധിപത്യ സംരക്ഷണ സദസുകള്‍ നടത്താനും തീരുമാനിച്ചിട്ടുണ്ട്. എസ്ഐആര്‍ സമരമല്ലാതെ മറ്റു വിഷയങ്ങളൊന്നും ചര്‍ച്ച ചെയ്യേണ്ടെന്ന് നേതൃത്വം യോഗത്തിൽ നിര്‍ദേശിച്ചെന്നാണ് വിവരം.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടും വോട്ട് ചോർച്ച ആരോപിച്ചും പ്രതിപക്ഷ കൂട്ടായ്മയായ ഇന്ത്യ സഖ്യം പ്രഖ്യാപിച്ച 'ചലോ ദില്ലി' സുപ്രീംകോടതി മാർച്ച് ആരംഭിച്ചു. ലോക്സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് അധ്യക്ഷൻ മല്ലികാർജ്ജുൻ ഖർഗെ, സിപിഎം ജനറൽ സെക്രട്ടറി എം.എ. ബേബി, പ്രിയങ്ക ഗാന്ധി, നേഹ ബോറ, യോഗേന്ദ്ര യാദവ് എന്നിവരുടെ നേതൃത്വത്തിലാണ് ബസുകളിൽ നേതാക്കളും എംപിമാരും സുപ്രീംകോടതി പരിസരത്തേക്ക് തിരിഞ്ഞത്.
പ്രതിഷേധക്കാരെ തടയുന്ന ഇടങ്ങളിൽ വെച്ച് ശക്തമായ പ്രക്ഷോഭം തുടരാനാണ് പ്രതിപക്ഷത്തിന്‍റെ നീക്കം. ഭരണഘടന സംരക്ഷിക്കാനായി രാഷ്ട്രീയ-ജാതി-മത ഭേദമന്യേ ജനങ്ങൾ തെരുവിൽ അണിനിരക്കണമെന്ന് രാഹുൽ ഗാന്ധി ആഹ്വാനം ചെയ്തു. സമാധാനപരമായി പ്രതിഷേധിക്കാനെത്തിയ യുവാക്കൾക്ക് നേരെ നടന്ന പൊലിസ് അതിക്രമത്തെ കടുത്ത ഭാഷയിൽ വിമർശിച്ച നേതാക്കൾ, ചീഫ് ജസ്റ്റിസിനെ നേരിൽ കണ്ട് പരാതി നൽകാനാണ് പദ്ധതിയിടുന്നത്. വൻ ജനപ്രവാഹം എത്തുന്ന സാഹചര്യത്തിൽ തലസ്ഥാനത്ത് സുരക്ഷ കടുപ്പിച്ചിരിക്കുകയാണ്.
Movies
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഡൽഹിയിൽ നടക്കുന്ന പ്രതിഷേധങ്ങൾക്ക് പിന്തുണയുമായി പ്രമുഖ ബോളിവുഡ് താരങ്ങളായ വിജയ് വർമയും ഹുമ ഖുറേഷിയും രംഗത്ത്. സമൂഹമാധ്യമങ്ങളിലൂടെയാണ് ഇരുവരും തങ്ങളുടെ നിലപാട് വ്യക്തമാക്കിയത്. പ്രതിഷേധക്കാരെ അടിച്ചമർത്തുന്ന ഡൽഹി പൊലിസിന്‍റെ നടപടിക്കെതിരെ രൂക്ഷമായ പ്രതികരണമാണ് ഹുമ ഖുറേഷി നടത്തിയത്.
'സ്വതന്ത്രവും നിഷ്പക്ഷവുമായ തെരഞ്ഞെടുപ്പിന്‍റെ മുഖം' എന്ന കുറിപ്പോടെ ഗ്യാനേഷ് കുമാറിന്‍റെ ചിത്രം പങ്കുവച്ചാണ് വിജയ് വർമ പരിഹാസരൂപേണ പ്രതികരിച്ചത്. സ്റ്റീവൻ സ്പിൽബർഗിന്‍റെ ക്ലാസിക് ഹോളിവുഡ് ചിത്രം 'സേവിംഗ് പ്രൈവറ്റ് റയാൻ' ഓർമിപ്പിച്ചുകൊണ്ട് 'സേവിംഗ് പ്രൈവറ്റ് ഗ്യാൻ' എന്ന ടാഗ്‌ലൈനും അദ്ദേഹം ഉപയോഗിച്ചു. 'നമ്മുടെ ദേശീയ നായകനെ രക്ഷിക്കാൻ സേനകൾ ഒന്നിക്കുന്നതിൽ സന്തോഷം, എന്തുവിലകൊടുത്തും അദ്ദേഹത്തെ സംരക്ഷിക്കണം' എന്നും താരം കുറിച്ചു.
ജനാധിപത്യ മൂല്യങ്ങളെയും പൗരന്മാരുടെ അവകാശങ്ങളെയും ഊന്നിപ്പറഞ്ഞുകൊണ്ടായിരുന്നു ഹുമ ഖുറേഷിയുടെ ശക്തമായ കുറിപ്പ്. സമാധാനപരമായ പ്രതിഷേധം കുറ്റമല്ലെന്നും അധികാരത്തിലിരിക്കുന്നവരോട് ഉത്തരവാദിത്തം ആവശ്യപ്പെടുന്നത് എങ്ങനെയാണ് തെറ്റാകുകയെന്നും താരം ചോദിച്ചു.
'ലോകത്തിലെ ഏറ്റവും വലിയ ജനാധിപത്യ രാജ്യമാണ് നമ്മുടേത്. സമാധാനപരമായ പ്രതിഷേധത്തിനുള്ള അവകാശം അധികാരത്തിലിരിക്കുന്നവർ നൽകുന്ന ഔദാര്യമല്ല. ശബ്ദമുയർത്തിയാൽ വ്യക്തിപരമായ ആക്രമണങ്ങളും തൊഴിൽപരമായ തിരിച്ചടികളും നേരിടേണ്ടിവരുമെന്ന് അറിയാം. എങ്കിലും എനിക്ക് മൗനം പാലിക്കാൻ കഴിയില്ല. ദേശസ്നേഹം എന്നത് അന്ധമായ മൗനമല്ല, ജനാധിപത്യം എന്നത് അന്ധമായ അനുസരണയല്ല, വിയോജിപ്പ് രാജ്യവിരുദ്ധവുമല്ല' - ഹുമ ഖുറേഷി വ്യക്തമാക്കി.
National
ന്യൂഡൽഹി: വോട്ടർ പട്ടിക ക്രമക്കേടുകൾക്കും 'വോട്ട് ചോരി' ആരോപണങ്ങൾക്കുമെതിരെ സമരം ചെയ്യുന്ന പ്രതിഷേധക്കാർക്ക് നേരെ ഡൽഹി പൊലിസ് നടത്തിയ അതിക്രമങ്ങളുടെയും മർദനങ്ങളുടെയും ദൃശ്യങ്ങൾ മാധ്യമങ്ങൾക്ക് മുന്നിൽ പുറത്തുവിട്ട് ലോക്സഭാ പ്രതിപക്ഷ നേതാവ് രാഹുൽ ഗാന്ധി. ഡൽഹിയിൽ നടന്ന വാർത്താ സമ്മേളനത്തിനിടെയാണ് പൊലിസിന്‍റെ നരനായാട്ട് വ്യക്തമാക്കുന്ന വീഡിയോ ദൃശ്യങ്ങൾ അദ്ദേഹം പ്രദർശിപ്പിച്ചത്.
National
ന്യൂഡൽഹി: 'വോട്ട് ചോരി' ആരോപണങ്ങളും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടും ഇന്ത്യ മുന്നണി ഇന്ന് നടത്തുന്ന സുപ്രീംകോടതി മാർച്ചിന് മുന്നോടിയായി കേന്ദ്ര സർക്കാരിനെതിരെ രൂക്ഷവിമർശനവുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി.
ഡൽഹിയെ ഒരു 'കോട്ട' പോലെയാക്കി മാറ്റിയത് എന്തിനാണെന്നും, ഗ്യാനേഷ് കുമാറിനെ മോദി സർക്കാർ സംരക്ഷിക്കുകയാണെന്നും അദ്ദേഹം ആരോപിച്ചു. സർക്കാർ സംവിധാനങ്ങൾക്കുള്ളിൽ നിന്ന് 200-ഓളം ഉദ്യോഗസ്ഥർ തങ്ങളുമായി ബന്ധപ്പെടുന്നുണ്ടെന്നും അവർ വിവരങ്ങൾ പങ്കുവെക്കുന്നുണ്ടെന്നും രാഹുൽ ഗാന്ധി അവകാശപ്പെട്ടു.
'ചലോ ഡൽഹി - മാർച്ച് ഫോർ ഡെമോക്രസി' എന്ന നാമകരണത്തിൽ ഉച്ചയ്ക്ക് 1:30-ന് കൊണാട്ട് പ്ലേസ്-ബരാഖംബ റോഡ് ജംഗ്ഷനിൽ നിന്നാണ് പ്രതിഷേധ മാർച്ച് ആരംഭിക്കുന്നത്. സമാജ്‌വാദി പാർട്ടി അധ്യക്ഷൻ അഖിലേഷ് യാദവും മാർച്ചിൽ പങ്കെടുക്കുമെന്നാണ് സൂചന. സുരക്ഷ മുൻനിർത്തി പട്ടേൽ ചൗക്ക്, ജൻപഥ്, രാജീവ് ചൗക്ക്, മണ്ഡി ഹൗസ്, സെൻട്രൽ സെക്രട്ടേറിയറ്റ്, ബരാഖംബ റോഡ് എന്നീ ആറ് മെട്രോ സ്റ്റേഷനുകളുടെ കവാടങ്ങൾ ഉച്ചയ്ക്ക് നാല് മണി വരെ അടച്ചിട്ടിരിക്കുകയാണ്.
National
ന്യൂഡൽഹി: കേന്ദ്ര സർക്കാരിനും പൊലിസിനുമെതിരെ രൂക്ഷവിമർശനവുമായി ഇൻഫ്ലുവൻസര്‍ ധ്രുവ് റാഠി രംഗത്ത്. മുതിർന്ന അഭിഭാഷകൻ കപിൽ സിബലുമായുള്ള കൂടിക്കാഴ്ചയ്ക്ക് ശേഷമായിരുന്നു വിഷയത്തിൽ പ്രതികരണവുമായി ധ്രുവ് റാഠി രംഗത്തെത്തിയത്.
രാജ്യത്ത് നിലവിൽ അപ്രഖ്യാപിത അടിയന്തരാവസ്ഥയാണെന്ന് അദ്ദേഹം ആരോപിച്ചു. തന്‍റെ ആദ്യ വാർത്താസമ്മേളനമാണിതെന്ന് പറഞ്ഞ ധ്രുവ് കഴിഞ്ഞ 10 വർഷമായി നമ്മുടെ പ്രധാനമന്ത്രി ഒരു വാർത്താസമ്മേളനം പോലും നടത്തിയിട്ടില്ലെന്നും വ്യക്തമാക്കി.
തന്‍റേത് കേവലം പൊലിസ് കസ്റ്റഡി ആയിരുന്നില്ലെന്നും പൊലിസ് തട്ടിക്കൊണ്ടുപോകുകയായിരുന്നുവെന്നും ധ്രുവ് റാഠി പറഞ്ഞു. ഇരുപതോളം പൊലിസുകാർ വീട്ടിൽ ഇരച്ചുകയറി ഉപദ്രവിക്കുകയായിരുന്നു. പലർക്കും യൂണിഫോം പോലും ഉണ്ടായിരുന്നില്ലെന്നും അദ്ദേഹം വ്യക്തമാക്കി.
അച്ഛനും അമ്മയും വീട്ടിലുള്ളപ്പോഴായിരുന്നു ഈ അതിക്രമം. ഒരു ഗുണ്ടയോടെന്ന പോലെയാണ് പൊലിസ് പെരുമാറിയത്. ചെരുപ്പിടാനോ വെള്ളം കുടിക്കാനോ പോലും അനുവദിച്ചില്ലെന്നും ഫോൺ പിടിച്ചെടുത്തതായും അദ്ദേഹം കൂട്ടിച്ചേർത്തു.
National
ന്യൂഡൽഹി: മുഖ്യതെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഡൽഹിയിൽ പ്രതിഷേധം കനക്കുന്നു. രാത്രിയിലും വിദ്യാർഥി സംഘടനകൾ സമരം തുടരുകയാണ്. കൊണാട്ട്പ്ലേസിലേക്ക് വീണ്ടും വിദ്യാർഥികൾ മാർച്ചുമായെത്തി.
എസ്എഫ്ഐ വനിതകളുടെ തിരംഗ മാർച്ചുമായി പ്രതിഷേധിക്കുന്നുണ്ട്. എസ്എഫ്ഐ നേതാവ് ഐഷി ഘോഷിന്‍റെ നേതൃത്വത്തിലാണ് പ്രതിഷേധം. അതേസമയം സംഘടിച്ചെത്തിയ വിദ്യാർഥികളെ പൊലീസ് ബലംപ്രയോഗിച്ച് നീക്കുകയാണ്. വിദ്യാർഥികൾ പൊലിസ് ബസിന് മുകളിൽ കയറി നിന്നും പ്രതിഷേധിക്കുന്നുണ്ട്.
Kerala
കോട്ടയം: വോട്ടർപട്ടിക ശുദ്ധീകരണത്തിന്‍റെ മറവിൽ കോടിക്കണക്കിന് പൗരന്മാരുടെ വോട്ടവകാശം റദ്ദാക്കുന്നതിന് നേതൃത്വം കൊടുത്ത മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ്കുമാർ ഇന്ത്യൻ ജനാധിപത്യത്തിന് അപമാനമാണന്ന് കേരള കോൺഗ്രസ് ചെയർമാൻ പി.ജെ. ജോസഫ്.
കേരള കോൺഗ്രസ് ജന്മദിന സമ്മേളനം കോട്ടയത്ത് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ജനവാസ കേന്ദ്രങ്ങളും കൃഷിയിടങ്ങളും ഇഎസ്എയിൽ നിന്നും പൂർണമായും ഒഴിവാക്കപ്പെടുന്നതു വരെ അവിടുത്തെ ജനങ്ങളോടൊപ്പം കേരള കോൺഗ്രസ് പാർട്ടി വിശ്രമമില്ലാതെ ഉണ്ടാകുമെന്നും പി.ജെ. ജോസഫ് പറഞ്ഞു.
വർക്കിംഗ് ചെയർമാൻ പി.സി. തോമസ് അധ്യക്ഷത വഹിച്ചു. ഗവൺമെന്‍റ് ചീഫ് വിപ്പ് അപു ജോൺ ജോസഫ് മുഖ്യപ്രഭാഷണം നടത്തി. സെക്രട്ടറി ജനറൽ ജോയി ഏബ്രഹാം, എംഎൽഎമാരായ വർഗീസ് മാമ്മൻ, റജി ചെറിയാൻ, വിനു ജോബ്, നേതാക്കളായഏബ്രഹാം കലമണ്ണിൽ, എം.പി. പോളി, ഡി.കെ. ജോൺ, ഇ.ജെ. ആഗസ്തി, ജോൺ കെ. മാത്യൂസ്, അഹമ്മദ് തോട്ടത്തിൽ, വി.ജെ. ലാലി, ഗ്രേസമ്മ മാത്യു, കുര്യാക്കോസ് പടവൻ തുടങ്ങിയവര്‍ പ്രസംഗിച്ചു.
National
ന്യൂഡൽഹി: എസ്ഐആറിൽ അട്ടിമറി ആരോപിച്ച് മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ പ്രതിപക്ഷ പ്രതിഷേധം രാജ്യവ്യാപകമാകുന്നതിനിടയിൽ എൻഡിഎ സഖ്യകക്ഷികൾക്കിടയിലും വിഷയത്തിൽ അമർഷം പുകയുന്നതായി റിപ്പോർട്ടുകൾ. തെരഞ്ഞെടുപ്പു കമ്മിഷനെ പ്രതിരോധിക്കാൻ ബിജെപി മാത്രമാണ് ഇതുവരെ രംഗത്തു വന്നത് എന്നതും സഖ്യകക്ഷികളാരും കമ്മിഷനെ പിന്തുണച്ചിട്ടില്ല എന്നതും ശ്രദ്ധേയമാണ്.
കമ്മിഷനെതിരേ പരസ്യപ്രതികരണത്തിനു മുതിർന്നില്ലെങ്കിലും എൻഡിഎയിലെ പ്രധാന ഘടകകക്ഷിയായ ജെഡിയു കടുത്ത അതൃപ്തി അറിയിച്ചതായാണു വിവരം. എസ്ഐആറിലൂടെ തങ്ങളുടെ പരമ്പരാഗത വോട്ടുകൾ വ്യാപകമായി വെട്ടിമാറ്റപ്പെട്ടുവെന്ന ചർച്ച പാർട്ടിക്കുള്ളിൽ സജീവമാണ്. രണ്ടു പതിറ്റാണ്ടിലേറെ ബിഹാർ മുഖ്യമന്ത്രിയായിരുന്ന നിതീഷ് കുമാർ കഴിഞ്ഞ ഏപ്രിലിലാണു പദവി ബിജെപിക്കു കൈമാറിയത്. ഇതിനുശേഷം ദേശീയ-സംസ്ഥാന രാഷ്ട്രീയത്തിൽ അർഹമായ പരിഗണന ലഭിക്കാത്തതിലെ നിരാശയും ജെഡിയുവിനുണ്ട്.
കേന്ദ്രസർക്കാരിന്‍റെ പ്രധാന ബില്ലുകളിലടക്കം ബിജെപിയെ പിന്തുണയ്ക്കാറുള്ള ഒഡീഷയിലെ ബിജെഡി തെരഞ്ഞെടുപ്പു കമ്മിഷനെതിരായ പ്രതിപക്ഷ പ്രക്ഷോഭത്തിൽ പങ്കാളിയായത് ബിജെപിക്കു വൻ തിരിച്ചടിയായി.
മുന്നണിയുടെ ഭാഗമല്ലെന്നു വ്യക്തമാക്കുമ്പോഴും, തെരഞ്ഞെടുപ്പു കമ്മിഷന്‍റെ നടപടിക്കെതിരേ ഇന്ത്യാ സഖ്യത്തിനൊപ്പം നിൽക്കാനാണു പാർട്ടിയുടെ തീരുമാനം. എസ്ഐആർ വഴി വോട്ട് വെട്ടിയതു പല പ്രാദേശിക പാർട്ടികളുടെയും ജനകീയാടിത്തറയെ ബാധിച്ചതിനാൽ, കക്ഷിരാഷ്‌ട്രീയം മറന്ന് പ്രതിപക്ഷ പ്രതിഷേധത്തിന് കൂടുതൽ പ്രാദേശിക പാർട്ടികളുടെ പിന്തുണ ലഭിക്കുന്നുണ്ട്.
കേന്ദ്രമന്ത്രി ചിരാഗ് പാസ്വാന്‍റെ എൽജെപി, ആന്ധ്രപ്രദേശ് മുഖ്യമന്ത്രി എൻ. ചന്ദ്രബാബു നായിഡുവിന്‍റെ തെലുങ്കുദേശം പാർട്ടി (ടിഡിപി), ഉപേന്ദ്ര കുശ്വാഹയുടെ രാഷ്ട്രീയ ലോക് മോർച്ച തുടങ്ങിയ എൻഡിഎ ഘടകകക്ഷികളും വിഷയത്തിൽ വിശദീകരണം ആവശ്യപ്പെട്ട് ഇതിനോടകം രംഗത്തെത്തിയിട്ടുണ്ട്.
തെരഞ്ഞെടുപ്പു പ്രക്രിയയുടെ നിഷ്പക്ഷതയിൽ ജനങ്ങൾക്കു സംശയം ഉടലെടുക്കുന്നത് ജനാധിപത്യത്തിനു ഭീഷണിയാണെന്നും ജനങ്ങളുടെ ആത്മവിശ്വാസം വീണ്ടെടുക്കാൻ കമ്മിഷൻ അടിയന്തരമായി പരസ്യ വിശദീകരണം നൽകണമെന്നുമാണ് ഈ പാർട്ടികളുടെ ആവശ്യം.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് തുടർച്ചയായ മൂന്നാം ദിനവും ഇന്ത്യാ സഖ്യം എംപിമാരുടെ അപ്രതീക്ഷിത പ്രതിഷേധം. കഴിഞ്ഞ ദിവസം ജന്തർ മന്തറിലേക്കായിരുന്നെങ്കിൽ ഗാന്ധിസമാധിയായ രാജ്ഘട്ടിലായിരുന്നു ഇന്നലെ പ്രതിഷേധം.
തലേദിവസത്തെ അപേക്ഷിച്ച് രാജ്ഘട്ടിലെ പ്രതിഷേധം സമാധാനപൂർണമായിരുന്നു. രാജ്ഘട്ടിലെ ഗാന്ധിസ്മാരകത്തിൽ പുഷ്പാർച്ചനയും പ്രാർഥനയും നടത്തി പ്രതിപക്ഷ നേതാക്കൾ മടങ്ങി. എന്നാൽ, വരുംദിവസങ്ങളിൽ രാജി ആവശ്യപ്പെട്ടുള്ള പ്രതിഷേധം കൂടുതൽ ശക്തമാകുമെന്ന് നേതാക്കൾ അറിയിച്ചു.
ഇന്ത്യയുടെ ആത്മാവിനെ തൊട്ടറിഞ്ഞ് രാജ്ഘട്ടിലേക്ക്
മൂന്നാം ദിവസത്തെ പ്രതിഷേധത്തിലെ നയതന്ത്രവും ബുധനാഴ്ചത്തെപ്പോലെയായിരുന്നു. സാഗർ രത്ന ഹോട്ടലിന് അടുത്തുതന്നെയുള്ള മോയെറ്റ്സ് ഹോട്ടലിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ ഇന്നലെ എംപിമാർക്ക് ഉച്ചഭക്ഷണം ഒരുക്കിയപ്പോൾത്തന്നെ പൊലിസ് കഴിഞ്ഞ ദിവസത്തിന്‍റെ ആവർത്തനം മണത്തു.
നിശ്ചയിക്കപ്പെട്ട സമരവേദിയായ ജന്തർ മന്തറിൽ പ്രതിഷേധം നടത്തുകയെന്ന നിശ്ചയദാർഢ്യമായിരുന്നു കഴിഞ്ഞ ദിവസം കണ്ടതെങ്കിൽ അഹിംസാപരമായ സമരത്തിന്‍റെ സന്ദേശം നൽകി രാജ്ഘട്ടിലേക്കായിരുന്നു ഇന്നലെ എംപിമാർ മൂന്ന് ബസുകളിലായി പ്രതിഷേധത്തിനായി തിരിച്ചത്. കൊണാട്ട് പ്ലേസിൽനിന്ന് നാലു കിലോമീറ്റർ അപ്പുറമുള്ള രാജ്ഘട്ടിലേക്ക് എംപിമാർ ബസിൽ പോകുമ്പോൾ നൂറോളം സുരക്ഷാ ഉദ്യോഗസ്ഥരും മുന്നൂറോളം പ്രവർത്തകരും ബസുകൾക്ക് അകമ്പടിയേകി.
ത്രിവർണം ചൂടി നിൽക്കുന്ന ഡൽഹിയിലെ ഐതിഹാസിക റെയിൽവേ ഓവർ ബ്രിഡ്ജായ മിന്‍റോ റോഡിനു താഴെക്കൂടിയും കൂറ്റൻ കെട്ടിടമായ ഡോ.എസ്.പി മുഖർജി സിവിക് സെന്‍ററിനു സമീപത്തുകൂടിയും രാംലീല മൈതാനത്തിനും തുർക്ക്മാൻ ഗേറ്റിനുമിടയിലൂടെയുള്ള ചേരികളിലൂടെയും ബസ് കടന്നുപോയപ്പോൾ "യഥാർഥ' ഇന്ത്യയിലൂടെയുള്ള ബസ് യാത്ര കൂടിയായി എംപിമാർക്ക്. ജനങ്ങളുടെയും വഴിയാത്രക്കാരുടെയും അഭിവാദ്യം ഏറ്റുവാങ്ങിയായിരുന്നു നാലു കിലോമീറ്റർ യാത്ര.
ഒന്നരമണിക്കൂർ നീണ്ട ബസ് യാത്രയ്ക്കുശേഷം രാജ്ഘട്ടിലെത്തി എംപിമാർ ഓരോരുത്തരായി ഗാന്ധിജിയുടെ സ്മാരകത്തിലേക്കു പ്രവേശിച്ചു. കോൺഗ്രസിന്‍റെയും യൂത്ത് കോൺഗ്രസിന്‍റെയും എൻഎസ്‌യുവിന്‍റെയും മുന്നൂറിലേറെ പ്രവർത്തകരോടൊപ്പം ഇടത് വിദ്യാർഥി-യുവജന സംഘടനകളായ എഐഎസ്എഫും എഐവൈഎഫും സമരത്തിനു പിന്തുണ നൽകിയതോടെ രാജ്ഘട്ട് പരിസരം പ്രതിഷേധധ്വനികളിൽ മുങ്ങി.
എന്നാൽ നേതാക്കൾ ഗാന്ധിസമാധിയിൽ പ്രാർഥനകൾ മാത്രം നടത്തി മടങ്ങുകയായിരുന്നു.
National
ബംഗളൂരു: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജിയാവശ്യപ്പെട്ട് ബംഗളൂരുവിൽ വൻ പ്രതിഷേധത്തിനു തുടക്കമിട്ട് കോക്രോച്ച് ജനതാ പാർട്ടി.
ബംഗളൂരുവിലെ ഫ്രീഡം പാർക്കിലാണ് "പീപ്പിൾസ് ട്രൈബ്യൂണൽ’എന്ന പേരിൽ സിജെപി പ്രതിഷേധ പരിപാടി സംഘടിപ്പിക്കുന്നത്. സിജെപി സ്ഥാപകൻ അഭിജീത് ദീപ്കെ, നടൻ പ്രകാശ് രാജ്, കേന്ദ്രസർക്കാരിന്‍റെ നിശിത വിമർശകനായ യുട്യൂബർ ധ്രുവ് റാഠി തുടങ്ങിയവർ പ്രതിഷേധത്തിനു നേതൃത്വം നൽകി.
വോട്ടർപട്ടികയിലെ പേരുകൾ വെട്ടിമാറ്റുന്നത് ബിജെപിയെ എതിർക്കുന്നവരെ ലക്ഷ്യമിട്ടാണെന്ന് അഭിജിത് ദിപ്കെ ആരോപിച്ചു. ""പ്രധാനമന്ത്രി നരേന്ദ്രമോദിയും തെരഞ്ഞെടുപ്പു കമ്മിഷനും രാജ്യത്തെ ജനാധിപത്യം തകർക്കുകയാണ്. വോട്ട് വെട്ടിയും വോട്ടുകൊള്ള നടത്തിയുമാണു നരേന്ദ്ര മോദി പ്രധാനമന്ത്രിയായത്''. -ദീപ്കെ പറഞ്ഞു.
ഡോ. ബി.ആർ. അംബേദ്കറുടെയോ പെരിയാർ ഇ.വി. രാമസ്വാമിയുടെയോ തത്ത്വശാസ്ത്രങ്ങളിൽ ആർഎസ്എസ് വിശ്വസിക്കുന്നില്ല. മഹാത്മാ ഗാന്ധി ഇന്ത്യയുടെ ആത്മാവാണ്. അംബേദ്കർ അതിന്‍റെ നട്ടെല്ലും ജവഹർലാൽ നെഹ്റു മനസുമാണ്.
മോദി, അമിത് ഷാ എന്നിവരുടെ നിർദേശപ്രകാരം മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാർ അടക്കമുള്ള ഉദ്യോഗസ്ഥർ വോട്ടുകൾ നീക്കം ചെയ്യുകയാണ്. രാജ്യത്താകെ 13 കോടി വോട്ടർമാരെയും കർണാടകയിൽ ഒരു കോടി വോട്ടർമാരുടെയും പേരുകൾ ഇത്തരത്തിൽ നീക്കം ചെയ്തു. -ദീപ്കെ ആരോപിച്ചു.
മോദിയും അമിത് ഷായും പറയുന്നതനുസരിച്ചാണ് ഗ്യാനേഷ് കുമാർ പ്രവർത്തിക്കുന്നതെന്ന് യോഗത്തിൽ പങ്കെടുത്ത നടൻ പ്രകാശ്‌രാജ് ആരോപിച്ചു. എസ്ഐആർ നടപടി വെറും വോട്ടുകൾ വെട്ടിമാറ്റൽ മാത്രമല്ല; മറിച്ച് , പൗരന്മാരുടെ അന്തസിനും അവകാശങ്ങൾക്കും നേരേയുള്ള കടന്നുകയറ്റമാണെന്നും അദ്ദേഹം ചൂണ്ടിക്കാട്ടി.
ഗ്യാനേഷ് കുമാർ വഞ്ചകനാണെന്നും എസ്ഐആറിൽ തെരഞ്ഞെടുപ്പ് കമ്മീഷന്‍റെ ഭാഗത്തുനിന്ന് യാതൊരു സുതാര്യതയും ഉത്തരവാദിത്വവുമില്ലെന്നു കേന്ദ്രസർക്കാരിന്‍റെ നിശിത വിമർശകനായ യുട്യൂബർ ധ്രുവ് റാഠി കുറ്റപ്പെടുത്തി.
വോട്ടർപട്ടികയിലെ ക്രമക്കേടുകൾ ചൂണ്ടിക്കാണിച്ചു സംഘടിപ്പിച്ച പ്രതിഷേധത്തിൽ വോട്ടർപട്ടികയിനിന്നു പേരു വെട്ടിമാറ്റപ്പെട്ട നിരവധി സംസ്ഥാനങ്ങളിൽനിന്നുള്ളവരും പങ്കെടുത്തു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള ഇന്ത്യ മുന്നണിയുടെ പ്രതിഷേധം ഡൽഹിയിൽ മൂന്നാം ദിവസവും ശക്തമായി തുടരുന്നു. രാജ്ഘട്ടിലെ ഗാന്ധി സ്മൃതി മണ്ഡപത്തിൽ പുഷ്പാർച്ചനയും പ്രാർഥനയും നടത്തിയ ശേഷമാണ് ഇന്നത്തെ സമരപരിപാടികൾ അവസാനിപ്പിച്ച് നേതാക്കൾ മടങ്ങിയത്. ഗ്യാനേഷ് കുമാറിന്‍റെ രാജി വരെ പ്രതിഷേധത്തിൽ നിന്ന് പിന്നോട്ടില്ലെന്നും സമരം തുടരുമെന്നും പ്രതിപക്ഷ നേതാക്കൾ വ്യക്തമാക്കി.
കോൺഗ്രസ് അധ്യക്ഷൻ മല്ലികാർജുൻ ഖർഗെ ഒരുക്കിയ ഉച്ചഭക്ഷണ യോഗത്തിന് ശേഷമാണ് എംപിമാർ മൂന്ന് ബസുകളിലായി രാജ്ഘട്ടിലെത്തിയത്. ഹിമാചൽ പ്രദേശ് മുഖ്യമന്ത്രി സുഖ്‌വീന്ദർ സിംഗ് സുഖുവും തെലങ്കാന മുഖ്യമന്ത്രി രേവന്ത് റെഡ്ഡിയും ഇന്നത്തെ പ്രതിഷേധത്തിൽ പങ്കെടുത്തു. ഡൽഹിയിൽ തന്നെ തുടരാൻ കോൺഗ്രസ് എംപിമാർക്ക് എഐസിസി നിർദേശം നൽകിയിട്ടുണ്ട്.
സമരം കൂടുതൽ ശക്തമാക്കുന്നതിന്‍റെ ഭാഗമായി മമത ബാനർജി, ഉദ്ധവ് താക്കറെ, തേജസ്വി യാദവ് തുടങ്ങിയ പ്രമുഖ പ്രതിപക്ഷ നേതാക്കളെ നാളത്തെ പ്രതിഷേധത്തിൽ പങ്കെടുക്കാൻ രാഹുൽ ഗാന്ധി ക്ഷണിച്ചിട്ടുണ്ട്. തെരഞ്ഞെടുപ്പ് അട്ടിമറിച്ച കേന്ദ്ര സർക്കാരിനോടും തെരഞ്ഞെടുപ്പ് കമ്മീഷണറോടും വിട്ടുവീഴ്ചയില്ലെന്ന് കെ.സി. വേണുഗോപാലും കൊടിക്കുന്നിൽ സുരേഷ് എംപിയും വ്യക്തമാക്കി.
സമാധാനപരമായ പ്രതിഷേധമാണ് നടത്തുന്നതെന്നും എന്നാൽ സർക്കാർ അതിനെ തടയാൻ ശ്രമിക്കുകയാണെന്നും പ്രതിപക്ഷം ആരോപിക്കുന്നു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർക്കെതിരെയും ഭരണഘടനാ സ്ഥാപനങ്ങൾക്കെതിരെയും ഇന്ത്യ മുന്നണിയുടെ നേതൃത്വത്തിൽ ഡൽഹിയിൽ ശക്തമായ പ്രതിഷേധങ്ങൾ തുടരുന്നതിനിടയിൽ, പ്രതിപക്ഷത്തിന് പരോക്ഷ മറുപടിയുമായി പ്രധാനമന്ത്രി നരേന്ദ്ര മോദി. ആരെത്ര ബഹളം വെച്ചാലും താൻ രാജ്യത്തിനുവേണ്ടിയുള്ള പ്രവർത്തനങ്ങളുമായി മുന്നോട്ട് പോകുമെന്ന് പ്രധാനമന്ത്രി വ്യക്തമാക്കി.
ഖജനാവ് കൊള്ളയടിച്ചവർക്ക് ഒരിക്കലും തന്നെ സ്നേഹിക്കാനാകില്ലെന്ന് അറിയാമെന്നും, വിമർശനങ്ങളും പ്രതിഷേധങ്ങളും തന്നെ തളർത്തില്ലെന്നും അദ്ദേഹം പരാമർശിച്ചു. വോട്ടർ പട്ടിക പരിഷ്കരണവുമായി ബന്ധപ്പെട്ട് പ്രതിപക്ഷം ഡൽഹിയിൽ ശക്തമായ സമരമുഖം തുറന്നിരിക്കുന്ന സാഹചര്യത്തിലാണ് പ്രധാനമന്ത്രിയുടെ ഈ പ്രസ്താവന.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്ത്യ മുന്നണി നേതാക്കൾ രാജ്ഘട്ടിലും നഗരത്തിന്‍റെ വിവിധ ഭാഗങ്ങളിലും സത്യാഗ്രഹ സമരവും പ്രക്ഷോഭങ്ങളും തുടരുകയാണ്. രാജ്യത്തെ ജനാധിപത്യ സ്ഥാപനങ്ങൾ സംരക്ഷിക്കണമെന്നാവശ്യപ്പെട്ട് പ്രതിപക്ഷം പ്രതിഷേധം ശക്തമാക്കുമ്പോൾ, എതിർപ്പുകളെ വകവെയ്ക്കാതെ സർക്കാർ സ്വന്തം നിലപാടുകളുമായി മുന്നോട്ട് പോകുമെന്നാണ് പ്രധാനമന്ത്രിയുടെ പ്രതികരണം വ്യക്തമാക്കുന്നത്.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN