5

അന്‍റാർട്ടിക്കയിലെ മഞ്ഞുമലകൾക്കിടയിൽ കണ്ടെത്തിയ നിഗൂഢമായ ഒരു വാതിലിന്‍റെ ദൃശ്യങ്ങൾ സമൂഹമാധ്യമങ്ങളിൽ വലിയ ചർച്ചകൾക്ക് തിരികൊളുത്തിയിരിക്കുകയാണ്.

ഉപഗ്രഹ ചിത്രങ്ങളിൽ പതിഞ്ഞ ഈ വിചിത്രമായ ആകൃതി ഏതെങ്കിലും രഹസ്യ കേന്ദ്രത്തിലേക്കുള്ള പ്രവേശന കവാടമാണോ എന്ന ആശങ്കയാണ് പലരും പങ്കുവെക്കുന്നത്.

ചതുരാകൃതിയിൽ കാണപ്പെടുന്ന ഈ ഭാഗം ഒരുപക്ഷേ മനുഷ്യനിർമ്മിതമാകാം എന്ന് വിശ്വസിക്കുന്നവരും കുറവല്ല. എന്നാൽ ഇതിനു പിന്നിൽ അസ്വാഭാവികമായ ഒന്നുമില്ലെന്നാണ് ശാസ്ത്രലോകം വ്യക്തമാക്കുന്നത്.

പ്രകൃതിദത്തമായ പ്രതിഭാസങ്ങളുടെ ഭാഗമായി മഞ്ഞുപാളികളിൽ ഉണ്ടാകുന്ന വിള്ളലുകൾ കാഴ്ചയിൽ കൃത്യമായ രൂപങ്ങളായി തോന്നുന്നത് സ്വാഭാവികമാണ്.

കടുത്ത ശൈത്യവും കാറ്റും ഹിമാനികളുടെ നിരന്തരമായ ചലനവും മൂലം ഐസിലുണ്ടാകുന്ന വിള്ളലുകൾ നിഴലുകളുമായി ചേർന്നുനിൽക്കുമ്പോൾ അവ വാതിലിന്‍റെ രൂപത്തിൽ കാണപ്പെടുന്നു.

ഇത്തരം കാര്യങ്ങളെ പരിചിതമായ രൂപങ്ങളായി വ്യാഖ്യാനിക്കാൻ മനുഷ്യന്‍റെ മനസ് പ്രത്യേക താല്പര്യം കാണിക്കാറുണ്ട്. അതുകൊണ്ടുതന്നെ ഇല്ലാത്ത ഒരു കാര്യം നമുക്ക് സത്യമായി തോന്നുക മാത്രമാണ് ചെയ്യുന്നത്.

അന്‍റാർട്ടിക്കയുടെ വശ്യതയും അജ്ഞാതമായ പ്രത്യേകതകളും കാരണം ഇത്തരം വാർത്തകൾക്ക് വലിയ പ്രചാരം ലഭിക്കാറുണ്ട്. എന്നാൽ ഈ വാതിൽ എങ്ങോട്ടും തുറക്കുന്ന ഒന്നല്ലെന്നും മറിച്ച് മഞ്ഞുമലയിലെ വിള്ളലുകൾ സൃഷ്ടിച്ച ഒരു കൗതുകകരമായ കാഴ്ചയാണെന്നും വ്യക്തമാണ്.

എങ്കിലും, ഭൂമിയിലെ ഏറ്റവും നിഗൂഢമായ പ്രദേശങ്ങളിൽ ഒന്നായ അന്‍റാർട്ടിക്കയെക്കുറിച്ചുള്ള ഇത്തരം ചർച്ചകൾ മനുഷ്യന്‍റെ ജിജ്ഞാസയെ ഉണർത്തുന്നുണ്ട്.

Tags : Antarctica Mystery Science ViralNews NaturePhotography