കൂടെ നിൽക്കുന്നവർക്കു വേണ്ടി പോലും ഒന്നും ചെയ്യാത്തയാളാണ് വി.എസ് എന്ന് മുൻ പിഎ സുരേഷ്
Saturday, October 7, 2017 1:40 PM IST
തിരുവനന്തപുരം: മുൻ മുഖ്യമന്ത്രി വി.എസ് അച്യുതാനന്ദനെതിരെ കടുത്ത ആരോപണങ്ങളുമായി മുന്‍ പിഎയും സന്തതസഹചാരിയുമായിരുന്ന എ.സുരേഷ് രംഗത്ത്. പാര്‍ട്ടി പുനഃപ്രവേശനം സംബന്ധിച്ച് വി.എസ്.അച്യുതാനന്ദന്‍ തനിക്കുവേണ്ടി ഒന്നും ചെയ്തിട്ടില്ലെന്ന് സുരേഷ് പറഞ്ഞു. താന്‍ ആവശ്യപ്പെടാതെ തന്നെ വി.എസ് ഇക്കാര്യത്തില്‍ ഇടപെടേണ്ടതായിരുന്നു. കൂടെ നില്‍ക്കുന്നവര്‍ക്ക് വേണ്ടി അദ്ദേഹം ഒന്നും ചെയ്തിട്ടില്ലെന്നും സുരേഷ് കുറ്റപ്പെടുത്തി.

ഒ.കെ.വാസുവിനെയടക്കം പാര്‍ട്ടിയിലെടുത്തപ്പോള്‍ കമ്മ്യൂണിസ്റ്റ് പ്രത്യയശാസ്ത്രങ്ങളില്‍ നിന്നും വ്യതിചലിക്കാത്ത താനടക്കമുള്ളവർ മാറ്റിനിര്‍ത്തപ്പെടുന്നതില്‍ വിഷമമുണ്ടെന്നും സുരേഷ് കൂട്ടിച്ചേർത്തു. ഒരു വാർത്താ ചാനലിനു നൽകിയ അഭിമുഖത്തിലാണ് സുരേഷ് വി.എസിനെതിരെ തുറന്നടിച്ചത്. പാലക്കാട് കല്‍മണ്ഡപം ബ്രാഞ്ച് സെക്രട്ടറിയായിരിക്കെ 2002ൽ വി.എസിന്‍റെ പിഎയായ സുരേഷ് ഇതാദ്യമായാണ് അദ്ദേഹത്തിനെതിരെ ഒരാരോപണം ഉന്നയിക്കുന്നത്.

പാര്‍ട്ടിയില്‍ നിന്നും പുറത്തായ ശേഷം വിദേശത്തേക്ക് ജോലി തേടിപ്പോയ സുരേഷ് നാട്ടില്‍ തിരിച്ചെത്തിയ ശേഷം പാർട്ടി ജനറൽ സെക്രട്ടറി സീതാറാം യെച്ചൂരിയുമായി കൂടിക്കാഴ്ച നടത്തിയിരുന്നു. പാര്‍ട്ടിയുടെ വിവരങ്ങള്‍ മാധ്യമങ്ങള്‍ക്ക് ചോര്‍ത്തിക്കൊടുത്തുവെന്ന് ആരോപിച്ച് 2013 മെയ് 14നാണ് സുരേഷ്, അഡീഷണല്‍ പ്രൈവറ്റ് സെക്രട്ടറി വി.കെ.ശശിധരന്‍, പ്രസ് സെക്രട്ടറി കെ. ബാലകൃഷ്ണന്‍ എന്നിവരെ പാര്‍ട്ടിയില്‍ നിന്ന് പുറത്താക്കിയത്.
RELATED NEWS
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.