അഖ്ലാക്കിന്റെ കുടുംബത്തെ അറസ്റ്റ് ചെയ്യാനുള്ള നിർദേശത്തിന് സ്റ്റേ
Friday, August 26, 2016 5:47 AM IST
ലക്നോ: വീട്ടിൽ പശു ഇറച്ചി സൂക്ഷിച്ചെന്നാരോപിച്ച് ജനക്കൂട്ടം മർദിച്ചു കൊലപ്പെടുത്തിയ മുഹമ്മദ് അഖ്ലാക്കിന്റെ കുടുംബാംഗങ്ങളെ അറസ്റ്റ് ചെയ്യുന്നതിന് കോടതിയുടെ സ്റ്റേ. ജസ്റ്റീസ് പ്രഭാത് ചന്ദ്ര ത്രിപാഠിയും രമേഷ് സിൻഹയും അധ്യക്ഷനായ അലഹബാദ് ഹൈക്കോടതിയുടെ ബഞ്ചാണ് അറസ്റ്റിന് സ്റ്റേ ഏർപ്പെടുത്തിയത്. എന്നാൽ അഖ്ലാക്കിന്റെ സഹോദരൻ ജാൻ മുഹമ്മദിന്റെ അറസ്റ്റിന് കോടതി സ്റ്റേ നൽകിയിട്ടില്ല.

ജൂൺ 14ന് അഖ്ലാക്കിന്റെ കുടുംബത്തിനെതിരേ കേസ് രജിസ്റ്റർ ചെയ്യാൻ ഗ്രേറ്റർ നോയിഡയിലെ കോടതി നിർദേശിച്ചിരുന്നു. ഉത്തർപ്രദേശിൽ ഗോവധം നിരോധിച്ചിരിക്കുന്നതിനാൽ ഇന്ത്യൻ പീനൽ കോഡിലെ വിവിധ വകുപ്പുകൾ ചുമത്തി അഖ്ലാക്കിന്റെ കുടുംബത്തിലെ ഏഴു പേർക്കെതിരേ കേസെടുക്കാനാണ് കോടതി നിർദേശിച്ചത്.

അഖ്ലാക്കിന്റെ കൊലപാതകവുമായി ബന്ധപ്പെട്ട് പോലീസ് അറസ്റ്റ് ചെയ്തവരാണ് കോടതിയെ സമീപിച്ചത്. അഖ്ലാക്കിന്റെ വീട്ടിൽനിന്നു പിടിച്ചെടുത്ത ഇറച്ചി പശുവിന്റേതാണെന്ന മഥുര ഫോറൻസിക് ലബോറട്ടറി റിപ്പോർട്ടിന്റെ പശ്ചാത്തലത്തിലാണ് പ്രതികൾ കോടതിയെ സമീപിച്ചത്. അന്വേഷണത്തിന്റെ തുടക്കത്തിൽ ഇരയുടെ വീട്ടിൽനിന്നു പിടിച്ചെടുത്തത് ആട്ടിറച്ചിയാണെന്നായിരുന്നു റിപ്പോർട്ടുകൾ പുറത്തുവന്നിരുന്നത്്.

കഴിഞ്ഞവർഷം സെപ്റ്റംബറിലാണ് വീട്ടിൽ പശു ഇറച്ചി സൂക്ഷിച്ചെന്നും ഉപയോഗിച്ചെന്നും ആരോപിച്ച് 52കാരനായ അഖ്ലാക്കിനെ ജനക്കൂട്ടം അടിച്ചുകൊലപ്പെടുത്തിയത്. അഖ്ലാക്കിന്റെ മകൻ ഡാനിഷിന് ആക്രമണത്തിൽ ഗുരുതരമായി പരിക്കേറ്റിരുന്നു. ഇതേതുടർന്ന് കേന്ദ്രം ഭരിക്കുന്ന ബിജെപി സർക്കാരിനെതിരേ രാജ്യത്ത് അസഹിഷ്ണുതാ വിവാദം ഉയർന്നു.

അഖ്ലാക്കിന്റെ കൊലപാതകവുമായി ബന്ധപ്പെട്ട് 19 പേരെയാണ് പോലീസ് അറസ്റ്റ് ചെയ്തിരിക്കുന്നത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.