നൈജീരിയയില്‍ ഭീകരാക്രമണത്തില്‍ ഏഴു പേര്‍ കൊല്ലപ്പെട്ടു
Saturday, December 29, 2012 10:49 PM IST
അബൂജ: വടക്കന്‍ നൈജീരിയയിലെ രണ്ടു നഗരങ്ങളില്‍ നടന്ന ഭീകരാക്രമണങ്ങളില്‍ ഏഴു പേര്‍ കൊല്ലപ്പെട്ടു. മെയ്ദുഗുരി ഗ്രാമത്തിന്റെ പ്രാന്തപ്രദേശത്ത് ഇസ്ലാമിസ്റ് തീവ്രവാദികള്‍ നടത്തിയ ആക്രമണത്തില്‍ അഞ്ചു പേര്‍ കൊല്ലപ്പെട്ടതായി സൈനിക വക്താവ് അറിയിച്ചു.

ഇസ്ലാമിസ്റ് തീവ്രവാദ സംഘടനയായ ബൊക്കോ ഹാറമിനു സ്വാധീനമുള്ള മേഖലയിലാണ് ആക്രമണം നടന്നത്. കാമറൂണ്‍ രാജ്യാന്തര അതിര്‍ത്തിയ്ക്കു സമീപം മെയ്ഹ നഗരത്തിലാണ് രണ്ടാമത്തെ ആക്രമണമുണ്ടായത്. പോലീസുകാരന്‍ അടക്കം രണ്ടു പേരെ വെടിവച്ചുകൊന്ന ഭീകരര്‍ സര്‍ക്കാര്‍ മന്ദിരത്തിനു തീവച്ചതായും പ്രാദേശിക വാര്‍ത്താ ഏജന്‍സികള്‍ റിപ്പോര്‍ട്ടു ചെയ്തു. അതേസമയം, ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. സംഭവത്തിനു പിന്നാലെ മൂന്നു പേരെ അറസ്റു ചെയ്തതായും വന്‍ആയുധ ശേഖരം പിടിച്ചെടുത്തതായും നൈജീരിയന്‍ സൈനിക വക്താവ് അറിയിച്ചു.