അഗസ്ത വെസ്റ്ലാന്‍ഡിനു ഇന്ത്യയുടെ കാരണംകാണിക്കല്‍ നോട്ടീസ്
Friday, February 15, 2013 6:10 PM IST
ന്യൂഡല്‍ഹി: വിവാദ ഹെലികോപ്ടര്‍ ഇടപാടില്‍ ഇറ്റാലിയന്‍ കമ്പനിയായ അഗസ്ത വെസ്റ്ലാന്‍ഡിനു ഇന്ത്യ കാരണംകാണിക്കല്‍ നോട്ടീസ് നല്‍കി. ഏഴു ദിവസത്തിനകം മറുപടി നല്‍കണമെന്നാണ് നോട്ടീസിലെ നിര്‍ദേശം. അതിവിശിഷ്ട വ്യക്തികള്‍ക്കായി ഇറ്റലിയില്‍ നിന്ന് അഗസ്ത വെസ്റ്ലാന്‍ഡ് ഹെലികോപ്ടറുകള്‍ വാങ്ങുന്നതിനുള്ള കരാറിലെ ക്രമക്കേടുകള്‍ നടന്നുവെന്ന ആരോപണത്തേക്കുറിച്ച് കൂടുതല്‍ വിവരങ്ങള്‍ ആരാഞ്ഞ് പ്രതിരോധമന്ത്രാലയവും ഇറ്റലിക്കു നോട്ടീസ് അയച്ചിട്ടുണ്ട്.

ഹെലികോപ്ടര്‍ ഇടപാടില്‍ ഇന്ത്യയിലെ സ്ഥാപനങ്ങളോ വ്യക്തികളോ കോഴ വാങ്ങിയിട്ടുണ്െടങ്കില്‍ ഇക്കാര്യം വ്യക്തമാക്കണമെന്ന് ഇറ്റാലിയന്‍ സ്ഥാപനമായ ഫിന്‍മെക്കാനിക്കയോടു പ്രതിരോധമന്ത്രാലയം ആവശ്യപ്പെട്ടു. കോഴ നല്‍കിയാണു കരാര്‍ നടപ്പാക്കിയതെന്നു വ്യക്തമായാല്‍ സ്ഥാപനത്തെ കരിമ്പട്ടികയില്‍ ഉള്‍പ്പെടുത്തുന്നതുള്‍പ്പെടെ നടപടികള്‍ സ്വീകരിക്കുമെന്നും പ്രതിരോധമന്ത്രാലയം വ്യക്തമാക്കിയിട്ടുണ്ട്. ഹെലികോപ്ടര്‍ ഇടപാടില്‍ കോഴനല്‍കിയെന്ന കുറ്റത്തിന്റെ പേരില്‍, സിഇഒയായിരുന്ന ജ്യു സപ്പെ ഓര്‍സിയെ ചൊവ്വാഴ്ച ഇറ്റലിയില്‍ അറസ്റു ചെയ്തിരുന്നു. ഫിന്‍മെക്കാനിക്കയുടെ ഉപകമ്പനിയാണ് അഗസ്ത വെസ്റ്ലാന്‍ഡ്. വിവിഐപികള്‍ക്കായി ഇറ്റലിയില്‍ നിന്ന് അഗസ്ത വെസ്റ്ലാന്‍ഡ് ഹെലികോപ്ടറുകള്‍ വാങ്ങുന്നതിനുള്ള 3,600 കോടി രൂപയുടെ ഇടപാടില്‍ 362 കോടി രൂപ കോഴ നല്‍കിയതായാണ് ആരോപണം.