നുഴഞ്ഞുകയറ്റ ശ്രമം പരാജയപ്പെടുത്തി ബിഎസ്എഫ്
Wednesday, May 28, 2025 2:36 AM IST
ഗോഹട്ടി: അനധികൃതമായി ക‌ടന്നുകയറാനുള്ള ശ്രമം ബിഎസ്എഫ് തടഞ്ഞതോടെ ഇന്ത്യ-ബംഗ്ലാദേശ് അതിർത്തിയിൽ സംഘർഷാവസ്ഥ.
ഇന്നലെ രാവിലെ ആസാമിലെ സൗത്ത് സൽമാര മങ്കാചാർ ജില്ലയിലെ മങ്കാചാർ സെക്ടറിലായിരുന്നു സംഭവം. 14 ബംഗ്ലാദേശി പൗരന്മാർ നുഴഞ്ഞുകയറാനുള്ള ശ്രമമാണ് ബിഎസ്എഫ് തടഞ്ഞത്.
പിടികൂടിയവരെ കൈമാറുന്നത് ബംഗ്ലാദേശ് അതിർത്തി സുരക്ഷാ സേന (ബിജിബി) എതിർത്തതാണ് സംഘർഷാവസ്ഥയ്ക്കു കാരണമായത്. അതിർത്തിയുടെ മറുവശത്ത് ആളുകൾ തടിച്ചുകൂടിയതോടെ ഇവരെ പിരിച്ചുവിടാൻ ബിഎസ്എഫിന് ആകാശത്തേക്കു വെടിവയ്ക്കേണ്ടിവന്നു.