എയറിലായി ‘ഭാഷാ’ പ്രയോഗം; കമൽഹാസനെതിരേ കന്നഡിഗർ
Thursday, May 29, 2025 12:19 AM IST
ബംഗളൂരു: തമിഴ് ചിത്രം തഗ് ലൈഫിന്‍റെ പ്രമോഷൻ പരിപാടിയിൽ നടൻ കമൽഹാസൻ നടത്തിയ ‘ഭാഷാ’ പ്രയോഗം എയറിലേറി.
കന്നഡ ഭാഷ ഉണ്ടായത് തമിഴിൽനിന്നാണെന്ന ഉലകനായകന്‍റെ പ്രസ്താവനയാണ് വിവാദമായത്. കമൽഹാസന്‍റെ പ്രസ്താവനയ്ക്കെതിരേ കർണാടകയിലെ രാഷ്‌ട്രീയ, സാംസ്കാരിക രംഗത്തെ പ്രമുഖർ രംഗത്തുവന്നു.
കന്നഡ ഭാഷയ്ക്ക് ദീർഘകാല ചരിത്രമുണ്ടെന്ന് കർണാടക മുഖ്യമന്ത്രി സിദ്ധരാമയ്യ പറഞ്ഞു. കന്നഡയുടെ ചരിത്രപരവും സാംസ്കാരികവുമായ പ്രാധാന്യത്തെക്കുറിച്ച് കമൽഹാസന് വ്യക്തമായ ധാരണയില്ലെന്ന് സിദ്ധരാമയ്യ പറഞ്ഞു.
കോൺഗ്രസ് എംഎൽഎ റിസ്‌വാൻ അർഷാദും കമൽഹാസന്‍റെ പ്രസ്താവനയെ അപലപിച്ചു. കന്നഡ ഭാഷയ്ക്ക് ആയിരക്കണക്കിന് വർഷത്തെ ചരിത്രമുണ്ട്. ലിപിക്ക് തന്നെ 1,500 വർഷം പഴക്കമുണ്ട്. തമിഴ്, കന്നഡ, തെലുങ്ക് എന്നിവ പുരാതനവും ജ്യത്തിന്‍റെ അടിത്തറയുമാണ്. അവയ്ക്കോരോന്നിനും സഹസ്രാബ്ദങ്ങളുടെ പാരമ്പര്യമുണ്ട്- അർഷദ് പറഞ്ഞു.
സംസ്കാരശൂന്യമെന്നായിരുന്നു കർണാടക ബിജെപി അധ്യക്ഷൻ വിജയേന്ദ്ര യെദ്യൂരപ്പയുടെ പ്രതികരണം. കമൽഹാസൻ പരസ്യമായി മാപ്പ് പറയണമെന്നും അദ്ദേഹം ആവശ്യപ്പെട്ടു.