സിബിഎസ്ഇ പത്താം ക്ലാസ് പരീക്ഷ രണ്ടുതവണ നടത്തുന്നതിനെ ന്യായീകരിച്ച് കേന്ദ്ര വിദ്യാഭ്യാസ മന്ത്രി
Wednesday, June 11, 2025 1:57 AM IST
ന്യൂഡൽഹി: സിബിഎസ്ഇ പത്താംക്ലാസ് ബോർഡ് പരീക്ഷ ഒരു അക്കാദമിക് വർഷത്തിൽ രണ്ടു തവണയായി നടത്തുന്നതിനെ ന്യായീകരിച്ച് കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ.
സിബിഎസ്ഇയുടെ പദ്ധതി പ്രക്രിയയെ ദുർബലപ്പെടുത്തില്ലെന്നും പകരം വിദ്യാർഥികളുടെ സമ്മർദം കുറയ്ക്കുമെന്നും വിദ്യാഭ്യാസമന്ത്രി വ്യക്തമാക്കി. രണ്ടു വാർഷിക പരീക്ഷകൾ നടത്താൻ രാജ്യത്തുടനീളമുള്ള സ്കൂൾ വിദ്യാഭ്യാസ സംവിധാനം പ്രാപ്തമാണെന്നും അദ്ദേഹം കൂട്ടിച്ചേർത്തു.
നാഷണൽ ടെസ്റ്റിംഗ് ഏജൻസി(എൻടിഎ) ജോയിന്റ് എൻട്രൻസ് എക്സാമിനേഷൻ (ജെഇഇ) വർഷത്തിൽ രണ്ടുതവണ സംഘടിപ്പിക്കാറുണ്ടെന്നും അതിൽനിന്നു വിദ്യാർഥികൾക്ക് മികച്ച സ്കോർ തെരഞ്ഞെടുക്കാൻ കഴിയുമെന്നും പ്രധാൻ പറഞ്ഞു.
2026 അക്കാദമിക് വർഷം മുതൽ പത്താം ക്ലാസ് ബോർഡ് പരീക്ഷകൾ വർഷത്തിൽ രണ്ടുതവണയാക്കാനുള്ള പദ്ധതി സിബിഎസ്ഇ ഫെബ്രുവരിയിലാണ് മുന്നോട്ടുവച്ചത്.