വിനോദസഞ്ചാരികളുടെ താമസം : കക്കയത്തെ കെഎസ്ഇബിയുടെ കെട്ടിടങ്ങൾ ഉപയോഗപ്പെടുത്തണമെന്ന് : Deepika.com Nattu Visesham

KOZHIKODE

വിനോദസഞ്ചാരികളുടെ താമസം : കക്കയത്തെ കെഎസ്ഇബിയുടെ കെട്ടിടങ്ങൾ ഉപയോഗപ്പെടുത്തണമെന്ന്

Thursday, August 14, 2025 5:14 AM IST

കൂരാച്ചുണ്ട്: കക്കയം മേഖലയിൽ കെഎസ്ഇബിയുടെ അധീനതയിലുള്ള ഭൂമിയിൽ ഉപയോഗശൂന്യമായി കിടക്കുന്ന കെട്ടിടങ്ങൾ അറ്റകുറ്റപ്പണികൾ നടത്തി വിനോദ സഞ്ചാരികൾക്ക് താമസിക്കാൻ ഉപയോഗപ്പെടുത്തണമെന്ന് കക്കയം ടൂറിസം വികസന സമിതി യോഗം ആവശ്യപ്പെട്ടു.

കോഴിക്കോട് ജില്ലയിലെ പ്രധാന വിനോദ സഞ്ചാര കേന്ദ്രങ്ങളിലൊന്നാണ് കക്കയത്തെ ടൂറിസം കേന്ദ്രങ്ങൾ. എന്നാൽ ഇവിടെയെത്തുന്ന വിനോദസഞ്ചാരികൾക്ക് താമസ സൗകര്യമില്ലാത്തത് ടൂറിസം പദ്ധതിയെ ഏറെ ബാധിക്കുന്നതോടൊപ്പം പ്രദേശത്തിന്‍റെ വികസന മുരടിപ്പിനു കാരണമാകുന്നതായും യോഗം വിലയിരുത്തി.

കേരള വൈദ്യുതി ബോർഡിന്‍റെ ഉത്തരവ് പ്രകാരം കെഎസ്ഇബിയുടെ ഉടമസ്ഥതയിലുള്ള പഴയ കെട്ടിടങ്ങളും മറ്റും അറ്റകുറ്റപ്പണികൾ നടത്തി ടൂറിസ്റ്റുകൾക്ക് താമസത്തിനായി വാടകയിനത്തിൽ നൽകാമെന്നുള്ള ഉത്തരവ് നടപ്പാക്കണമെന്നും എത്രയും വേഗം കക്കയത്ത് നടപ്പാക്കാൻ വേണ്ട നടപടികൾ സ്വീകരിക്കണമെന്നും യോഗം ആവശ്യപ്പെട്ടു.

ഇതു സംബന്ധിച്ചുള്ള നിവേദനം വൈദ്യുതി വകുപ്പ് മന്ത്രിക്കും കെഎസ്ഇബി ചീഫ് എൻജിനീയർ, എക്സിക്യൂട്ടീവ് എൻജിനീയർ എന്നിവർക്ക് നൽകിയതായും അറിയിച്ചു. ടൂറിസം വികസന സമിതി പ്രസിഡന്‍റ് ആൻഡ്രൂസ് കട്ടിക്കാന അധ്യക്ഷത വഹിച്ചു.

ബേബി തേക്കാനം, ഡാർലി ഏബ്രഹാം, സലോമി തോമസ്, ഷമീർ പിച്ചൻ, ജോൺസൺ കക്കയം എന്നിവർ പ്രസംഗിച്ചു.