കാഞ്ഞങ്ങാട്: ധനസഹായ വിതരണ പ്രവര്‍ത്തനങ്ങള്‍ സമീപ ഭാവിയില്‍ ഓണ്‍ലൈന്‍ സംവിധാനത്തിലൂടെ നടപ്പിലാക്കുമെന്നും അതുവഴി പരാതികള്‍ക്കിടനല്‍കാതെ കൂടുതല്‍ വേഗത്തില്‍ ധനസഹായ വിതരണം നടത്താന്‍ സാധിക്കുമെന്നും സഹകരണമന്ത്രി വി.എന്‍. വാസവന്‍. കാഞ്ഞങ്ങാട് വ്യാപാര ഭവനില്‍ കേരള സഹകരണ വികസന ക്ഷേമനിധി ബോര്‍ഡ് ഫയല്‍ തീര്‍പ്പാക്കല്‍ അദാലത്തും ധനസഹായ വിതരണവും ഉദ്ഘാടനം ചെയ്യുകയായിരുന്നു അദ്ദേഹം.
സഹകരണ വികസന ക്ഷേമനിധി ബോര്‍ഡിന്‍റെ കേരള സഹകരണ റിസ്‌ക് ഫണ്ട് പദ്ധതിയിലൂടെ ജില്ലയില്‍ 631 അപേക്ഷകള്‍ തീര്‍പ്പാക്കി, 4,07,56,899 രൂപയുടെ ധനസഹായം വിതരണം ചെയ്തു.
കാസര്‍ഗോഡ് താലൂക്കില്‍ 116 അപേക്ഷകളില്‍ 76,60,354 രൂപയും ഹൊസ്ദുര്‍ഗ് താലൂക്കില്‍ 236 അപേക്ഷകളിലായി 1,41,00,270 രൂപയും വെള്ളരിക്കുണ്ട് താലൂക്കില്‍ 180 അപേക്ഷകളിലായി 1,05,52,257 രൂപയും മഞ്ചേശ്വരം താലൂക്കില്‍ 68 പരാതികളിലായി 47,65,431 രൂപയും കേരള ബാങ്കില്‍ 31 അപക്ഷകളില്‍ 36,78,587 രൂയമായി ആകെ 631 അപേക്ഷകളിലായി 4,07,56,899 രൂപയുടെ ധനസഹായം വിതരണം ചെയ്തു.
എം. രാജഗോപാലന്‍ എംഎല്‍എ അധ്യക്ഷത വഹിച്ചു. സി.എച്ച്. കുഞ്ഞമ്പു എംഎല്‍എ, സഹകരണ വികസന ക്ഷേമനിധി ബോര്‍ഡ് വൈസ് ചെയര്‍മാന്‍ സി.കെ. ശശീന്ദ്രന്‍, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, നഗരസഭ ചെയര്‍പേഴ്‌സണ്‍ കെ.വി. സുജാത, ബോര്‍ഡ് മെംബര്‍ സാബു ഏബ്രഹാം, ഹൊസ്ദുര്‍ഗ് താലൂക്ക് സര്‍ക്കിള്‍ സഹകരണ യൂണിയന്‍ അധ്യക്ഷന്‍ പി. മണിമോഹനന്‍, ജോയിന്‍റ് രജിസട്രാര്‍ ജനറല്‍ ഇന്‍ ചാര്‍ജ് വി. ചന്ദ്രന്‍, ജോയിന്‍റ് ഡയറക്ടര്‍ ഓഡിറ്റ് ടി.എം. മാത്യു, കേരള കോ-ഓപ്പറേറ്റീവ് എംപ്ലോയീസ് സംഘടനാ പ്രതിനിധികളായ കെ.വി. വിശ്വന്‍, സി.ഇ. ജയന്‍, ബി. സുകുമാരന്‍, കേരള സഹകരണ വികസന ക്ഷേമനിധി ബോര്‍ഡ് മെംബര്‍ എം. മോഹനന്‍ എന്നിവര്‍ പ്രസംഗിച്ചു. ജോയിന്‍റ് രജിസ്ട്രാര്‍ ജയകുമാര്‍ റിപ്പോര്‍ട്ട് അവതരിപ്പിച്ചു.