ബാലചന്ദ്രൻ നായർ
കാട്ടാക്കട: റബർ മുറിച്ച് മാറ്റി അവിടെ കൃഷി ചെയ്തത് മാവും പ്ലാവും. തൃക്കാർത്തികക്ക് ദിവസങ്ങൾ മാത്രം ശേഷിക്കെ പുഴുക്കിനുള്ള വിഭവങ്ങളുടെ വിളവെടുപ്പ് നടത്തുകയാണ് കർഷകനായ നരുവാമുട് ചിറ്റിക്കോട് പ്രശാന്തിയിൽ ബാലചന്ദ്രൻ നായർ (65) എന്ന സംഘമൈത്രി ബാലചന്ദ്രൻ. മണ്ണറിഞ്ഞ് ബാലചന്ദ്രൻ വിത്തിറക്കിയപ്പോൾ മണ്ണിൽ വിളഞ്ഞത് പൊന്ന്. കാട്ടാക്കട ഓണംകോടുള്ള നാല് ഏക്കർ കൃഷിഭൂമിയിൽ നടക്കുന്നത് അക്ഷരാർത്ഥത്തിൽ കൂവക്കൊയ്ത്ത്.
2017 ലാണ് ബാലചന്ദ്രൻ ഓണംകോടുള്ള നാല് ഏക്കറിലെ റബർ മുറിച്ചുമാറ്റി 150 മൂട് 10 ഇനങ്ങളിലുള്ള വരിക്കപ്ലാവുകളും 150 മൂട് കോട്ടുകോണം മാവുകളും നട്ടത്. ഇപ്പോൾ മാവും പ്ലാവും സമൃദ്ധമയി കായ്ഫലം നൽകുന്നു. ഇവയ്ക്ക് ചുവട്ടിലാണ് ആറു മാസം മുൻപ് കൂവക്കിഴങ്ങ് വിത്തുകൾ പാകിയത്. പ്ലാവിൽനിന്നും മാവിൽ നിന്നും കൊഴിയുന്ന ഉണക്കിലകൾ കൂവയ്ക്ക് വളവുമായി. ഇന്നലെ മുതൽ വിളവെടുപ്പ് തുടങ്ങിയപ്പോൾ ഓരോ മൂട്ടിൽനിന്ന് കിട്ടിയതാവട്ടെ, അരക്കിലോ മുതൽ ഒന്നരക്കിലോ കൂവക്കിഴങ്ങുകൾ വരെ.
നരുവാമൂടുള്ള ബാലചന്ദ്രന്റെ മൂന്ന് ഏക്കർ പാടത്തും ചേനയും നനകിഴങ്ങും ചേമ്പും മധുരക്കിഴങ്ങുമൊക്കെ കാർത്തികപ്പുഴുക്കിനായി പാകമായി. ഇവയുടെ വിളവെടുപ്പും നടക്കുകയാണ്. കൃഷിയിടത്തിൽ നേരിട്ടെത്തുന്നവർക്ക് മൊത്തമായും ചില്ലറയായും കാർത്തിക വിഭവങ്ങൾ വിൽക്കും. ബാലചന്ദ്രൻ ചെയർമാനായുള്ള കർഷക കൂട്ടായ്മയായ സംഘമൈത്രിയുടെ ഗ്രാമ, നഗരപ്രദേശങ്ങളിലെ 20 ഔട്ട്ലെറ്റുകൾ വഴിയും വിറ്റഴിക്കുന്നു. ഭാര്യ: പ്രിയ.എസ്.നായർ.മകൾ അവസാനവർഷ ബിരുദ വിദ്യാർഥിനി കീർത്തന.ബി.പിള്ള.
Tags : Sowed seeds Nattuvishesham DistrictNews understanding of the soil