കോട്ടയം: ആത്മഹത്യക്കെതിരേയുള്ള ബോധവത്കരണത്തിന്റെ ഭാഗമായി വാര്ഷികപദ്ധതിയില് ഉള്പ്പെടുത്തി വൈക്കം ബ്ലോക്ക് പഞ്ചായത്ത് നടപ്പാക്കുന്ന "മധുരം ജീവിതം' പദ്ധതിയുടെ ബ്രാന്ഡ് അംബാസഡറായി ഗായിക വൈക്കം വിജയലക്ഷ്മിയെ ഇന്നു പ്രഖ്യാപിക്കും. ഉച്ചകഴിഞ്ഞ് മൂന്നിന് വൈക്കം മുഹമ്മദ് ബഷീര് സ്മാരക ഹാളില് നടക്കുന്ന ചടങ്ങ് ജില്ലാ കളക്ടര് ചേതന് കുമാര് മീണ ഉദ്ഘാടനം ചെയ്യും. വൈക്കം ബ്ലോക്ക് പഞ്ചായത്ത് പ്രസിഡന്റ് കെ.കെ. ശശികുമാര് അധ്യക്ഷത വഹിക്കും. ബ്രാന്ഡ് അംബാസഡറുടെ നയപ്രഖ്യാപനം വൈക്കം വിജയലക്ഷ്മി നിര്വഹിക്കും.
ആത്മഹത്യാ പ്രതിരോധപ്രവര്ത്തനങ്ങളുടെ ഭാഗമായി കേരള ഗവണ്മെന്റ് മെഡിക്കല് ഓഫിസേഴ്സ് അസോസിയേഷനുമായി(കെജിഎംഒഎ) സഹകരിച്ചാണ് ബ്ളോക്ക് പഞ്ചായത്ത് പദ്ധതി നടപ്പാക്കുന്നത്. രണ്ടരലക്ഷം രൂപയാണ് പദ്ധതിക്കായി വകയിരുത്തിയിട്ടുള്ളത്.
ബ്ലോക്ക്പഞ്ചായത്ത് പരിധിയിലെ വീടുകളില് ബോധവത്കരണ സന്ദേശം എത്തിക്കുകയാണ് ലക്ഷ്യം. വീടുതോറുമുള്ള വിവരശേഖരണം, സെമിനാറുകൾ, സംവാദങ്ങള്, പൊതുയോഗങ്ങള്, കലാ-സാംസ്കാരിക പരിപാടികള് എന്നിവ പദ്ധതിയുടെ ഭാഗമായി സംഘടിപ്പിക്കും.
കുടുംബശ്രീ-ആശ - പാലിയേറ്റീവ് പ്രവര്ത്തകർ, ആരോഗ്യവകുപ്പ്, പൊലിസ്, എക്സൈസ്, എന്എസ്എസ് വോളണ്ടിയര്മാർ, സന്നദ്ധ സംഘടനകള്, ക്ലബ്ബുകൾ, രാഷ്ട്രീയ-യുവജന സംഘടനകള് തുടങ്ങിയവരുടെ പങ്കാളിത്തവും ഉറപ്പാക്കും. ബ്ലോക്ക് പഞ്ചായത്ത് പ്രസിഡന്റ് അധ്യക്ഷനും സെക്രട്ടറി കണ്വീനറുമായുള്ള സമിതിയാണ് പ്രവര്ത്തനങ്ങള് ഏകോപിപ്പിക്കുന്നത്. ബ്ലോക്ക് പഞ്ചായത്ത് പരിധിയിലെ ആറു ഗ്രാമപഞ്ചായത്തുകളിലും സമാനമായ സമിതികള് രൂപീകരിക്കും. വാര്ഡുതലത്തിലും ജനപ്രതിനിധികളുടെ നേതൃത്വത്തില് പ്രവര്ത്തനങ്ങള് നടപ്പാക്കും.