സ്നേഹദീപം ഭവനപദ്ധതിപ്രകാരമുള്ള 68-ാം സ്നേഹവീടിന്റെ ശിലാസ്ഥാപനം കെ. ഫ്രാന്സിസ് ജോര്ജ് എംപി നിര്വഹിക്കുന്നു. ജില്ലാ പഞ്ചായത്തംഗം ജോസ്മോന് മുണ്ടയ്ക്ക
മരങ്ങാട്ടുപിള്ളി: അടിസ്ഥാന സൗകര്യങ്ങള് ലഭ്യമാകാത്ത സഹജീവികള്ക്കായി കരുണയുടെ മുഖം തുറക്കണമെന്നും സ്വന്തമായി സുരക്ഷിത ഭവനമില്ലാതെ ബുദ്ധിമുട്ടുന്ന പതിനായിരക്കണക്കിന് ആളുകള് ഇന്നും നമ്മുടെ സമൂഹത്തില് ഉണ്ടെന്നുള്ളത് ഏറെ വേദനിപ്പിക്കുന്ന വസ്തുതയാണെന്നും കെ. ഫ്രാന്സിസ് ജോര്ജ് എംപി. ജില്ലാ പഞ്ചായത്തംഗം ജോസ്മോന് മുണ്ടയ്ക്കല് നേതൃത്വം നൽകുന്ന സ്നേഹദീപം ഭവന പദ്ധതിപ്രകാരമുള്ള 68-ാം സ്നേഹവീടിന്റെ ശിലാസ്ഥാപനം മണ്ണയ്ക്കനാട്ടില് നിര്വഹിക്കുകയായിരുന്നു അദ്ദേഹം. മരങ്ങാട്ടുപിള്ളി സ്നേഹദീപത്തിന്റെ ആഭിമുഖ്യത്തിലുള്ള ആദ്യസ്നേഹവീടാണിത്.
കിടങ്ങൂര് സ്വദേശിയായ അമേരിക്കന് മലയാളി സൈമണ് കോട്ടൂരാണ് വീട് നിര്മാണത്തിനുള്ള നാലു ലക്ഷം രൂപ സ്നേഹദീപത്തിന് നല്കിയത്. മണ്ണയ്ക്കനാട് ഹോളിക്രോസ് റോമന് കത്തോലിക്കാ പള്ളിയാണ് തറയുടെ നിര്മാണം നടത്തുന്നത്. മരങ്ങാട്ടുപിള്ളി സ്നേഹദീപം പ്രസിഡന്റ് ജോയി ഇടത്തിനാല് അധ്യക്ഷത വഹിച്ചു.
മണ്ണയ്ക്കനാട് ഹോളിക്രോസ് റോമന് കത്തോലിക്കാ പള്ളി വികാരി ഫാ. തോമസ് പഴവക്കാട്ടില് ശിലയുടെ വെഞ്ചരിപ്പ് നടത്തി. ജില്ലാ പഞ്ചായത്തംഗം ജോസ്മോന് മുണ്ടയ്ക്കല്, മരങ്ങാട്ടുപിള്ളി സഹകരണബാങ്ക് പ്രസിഡന്റ് എം.എം. തോമസ്, പഞ്ചായത്ത് പ്രസിഡന്റ് ഗ്രേസിക്കുട്ടി ഏബ്രഹം, ബ്ലോക്ക് പഞ്ചായത്ത് അംഗങ്ങളായ ബെല്ജി എമ്മാനുവല്, ജൂബി തെക്കേല്, ഗ്രാമപഞ്ചായത്ത് വൈസ് പ്രസിഡന്റ് സബിന് ലാല്, സൊസൈറ്റി ഭാരവാഹികളായ സാബു തെങ്ങുംപള്ളിയില്, ജോര്ജ് പയസ്, ജയിൻ തുണ്ടത്തില് തുടങ്ങിയവർ പ്രസംഗിച്ചു.