സർവീസിലിരിക്കേ അച്ഛൻ ജീവനൊടുക്കി; ഫാമിലി പെൻഷൻ കുടിശിക ലഭിക്കും

അച്ഛൻ സർവീസിലിരിക്കെ ജീവനൊടുക്കി. തുടർന്ന് അമ്മയും മരണപ്പെട്ടു. എനിക്ക് പത്തു വയസുള്ളപ്പോഴാണ് അച്ഛന്‍റെ മരണം. എനിക്ക് ഒരു സഹോദരി കൂടിയുണ്ട്. അച്ഛന്‍റെ അമ്മയുടെ കൂടെയാണ് ഞങ്ങൾ താമസിക്കുന്നത്. സമാശ്വാസ തൊഴിൽപ്രകാരം ആറു മാസം മുന്പ് എനിക്ക് ജോലി ലഭിച്ചു. എന്നാൽ ഫാമിലി പെൻഷൻ ഇതുവരെ ലഭിച്ചിട്ടില്ല. സഹോദരി പഠിക്കുകയാണ്. അച്ഛന്‍റെ പേരിലുള്ള ഫാമിലി പെൻഷൻ എന്‍റെ പേരിൽ ലഭിക്കേണ്ടതല്ലേ? അതുപോലെ എനിക്ക് ജോലി ലഭിച്ചതുകൊണ്ട് സഹോദരിക്ക് ഫാമിലി പെൻഷൻ ലഭിക്കാൻ അർഹതയില്ലേ?
ശ്യാംകുമാർ, കൊല്ലം

സർവീസിലിരിക്കേ മരണമടയുന്ന ജീവനക്കാരന്‍റെ ഭാര്യക്കോ അല്ലെങ്കിൽ മൂത്ത കുട്ടിയുടെ പേരിലോ ഫാമിലി പെൻഷൻ അനുവദിക്കപ്പെടേണ്ടതാണ്. അതിനുള്ള അപേക്ഷ, ആവശ്യമായ സർട്ടിഫിക്കറ്റുകൾ സഹിതം അച്ഛൻ ജോലി ചെയ്തിരുന്ന ഓഫീസിൽ സമർപ്പിക്കേണ്ടതാണ്. ആവശ്യമായ രേഖകൾഹാജരാക്കുവാൻ കാലതാമസം വന്നാൽ ഫാമിലി പെൻഷൻ അനുവദിക്കുന്നതിനു കാലതാമസത്തിന് ഇടയാക്കും. എന്തായാലും ജോലി ലഭിച്ചതുകൊണ്ട് ഒരു ആശ്വാസമുണ്ട്. താങ്കളുടെ അച്ഛൻ മരണമടഞ്ഞതിന്‍റെ പിറ്റേദിവസം മുതൽ താങ്കൾക്ക് ജോലി ലഭിച്ച തീയതി വരെയുള്ള ഫാമിലി പെൻഷൻ കുടിശികയായി ലഭിക്കും. അതിനുശേഷം സഹോദരിയുടെ പേരിൽ ഫാമിലി പെൻഷൻ മാറ്റി വാങ്ങാവുന്നതാണ്. അച്ഛൻ അവസാനം ജോലി ചെയ്ത ഓഫീസ് മുഖേന അപേക്ഷ സമർപ്പിക്കണം.