ചക്കിട്ടപാറ: വടകര പാർലമെന്‍റ് എൽഡിഎഫ് സ്ഥാനാർഥി കെ.കെ. ശൈലജയ്ക്ക് ചക്കിട്ടപാറയിൽ ഊഷ്മള സ്വീകരണം. പേരാമ്പ്ര മണ്ഡലം തല പ്രചാരണ പരിപാടിയുടെ ഭാഗമായാണ് ശൈലജ ചക്കിട്ടപാറയിലെത്തിയത്. നൂറ് കണക്കിനു പ്രവർത്തകർ ചേർന്നു ഘോഷയാത്രയായി അവരെ സ്വീകരിച്ചു ആനയിച്ചു.
ചക്കിട്ടപാറ സ്വദേശിയും ജില്ലാ പഞ്ചായത്ത് പ്രസിഡന്‍റുമായ ഷീജ ശശി സ്ഥാനാർഥിയെ വേദിയിൽ ചുവപ്പ് ഷാളണിയിച്ചു. എൽഡിഎഫ് ഭരണത്തിൻ കീഴിൽ ചക്കിട്ടപാറ മേഖലയിൽ വന്നിരിക്കുന്ന വികസന പ്രവർത്തനങ്ങളെക്കുറിച്ച് ടി.പി. രാമകൃഷ്ണൻ എംഎൽഎ വിശദീകരിച്ചു. വികസനത്തെ സഹായിക്കുന്ന എംപി കൂടെ ഉണ്ടായാൽ വയനാട് ബദൽ റോഡ് ഉൾപ്പെടെയുള്ള വികസന പ്രവർത്തനങ്ങൾക്ക് ആക്കം കൂട്ടാൻ സാധിക്കുമെന്ന് അദ്ദേഹം കൂട്ടിച്ചേർത്തു.
കേരളാ കോൺഗ്രസ് -എം ജില്ലാ ജനറൽ സെക്രട്ടറി ബോബി ഓസ്റ്റിൻ അധ്യക്ഷത വഹിച്ചു. കെ.കെ. ഹനീഫ, എം. കുഞ്ഞമ്മദ്, ബേബി കാപ്പുകാട്ടിൽ, എൻ.പി. ബാബു, കെ. സുനിൽ, എൻ.കെ. വത്സൻ, കെ.കെ. ഭാസ്കരൻ, എസ്.കെ. സജീഷ്, ജോസഫ് അമ്പാട്ട്, ബിജു ചെറുവത്തൂർ, ടോമി അമ്പാട്ട്, സി.ഡി. പ്രകാശ്, എ.ജി. ഭാസ്കരൻ,
പി.പി. രഘുനാഥ്, എ.ജി. രാജൻ തുടങ്ങിയവർ പങ്കെടുത്തു. ചക്കിട്ടപ്പാറ പഞ്ചായത്തിലെ മുതുകാട്ടിലും സ്ഥാനാർഥിക്ക് സ്വീകരണം നൽകി. പി.സി. സുരാജൻ അധ്യക്ഷത വഹിച്ചു.