കൽപ്പറ്റ: ലോക്സഭാ തെരഞ്ഞെടുപ്പിന് ജില്ലയിൽ നടത്തുന്നത് വിപുലമായ ഒരുക്കം. കൽപ്പറ്റ, മാനന്തവാടി, സുൽത്താൻ ബത്തേരി നിയോജക മണ്ഡലങ്ങളിലായി 576 പോളിംഗ് സ്റ്റേഷനുകൾ സജ്ജമാക്കും.
കൽപ്പറ്റ-187, മാനന്തവാടി-173, സുൽത്താൻ ബത്തേരി-216 എന്നിങ്ങനെയാണ് പോളിംഗ് സ്റ്റേഷനുകളുടെ എണ്ണം. ഇതിൽ 49 എണ്ണം മാതൃകാ പോളിംഗ് സ്റ്റേഷനുകളാണ്. എല്ലാ വില്ലേജിലും ഒന്ന് എന്ന കണക്കിലാണ് മാതൃകാ പോളിംഗ് സ്റ്റേഷനുകൾ ഒരുക്കുന്നത്.
മുഴുവൻ പോളിംഗ് കേന്ദ്രങ്ങിലും കുടിവെള്ള സൗകര്യം ഉറപ്പാക്കും. പോളിംഗ് സ്റ്റേഷൻ ലൊക്കേഷനുകളിൽ വോട്ടർ അസിസ്റ്റൻസ് ബൂത്ത് സജ്ജീകരിക്കും. സമ്മതിദായകരെ സഹായിക്കുന്നതിന് ഉദ്യോഗസ്ഥരുടെ സേവനം ഉറപ്പാക്കും. അംഗപരിമിതർക്ക് വീൽചെയർ, റാംപ്, എന്നിവയും പ്രത്യേകം വാഹനങ്ങളും ലഭ്യമാക്കും. സ്ത്രീകൾക്കും പുരുഷൻമാർക്കും പ്രത്യേകം ടോയ്ലെറ്റുകളുണ്ടാകും.
പോളിംഗ് ബൂത്തിൽ വോട്ടർമാർക്കു നിർദേശങ്ങൾ നൽകുന്ന സൂചനാ ബോർഡുകൾ സ്ഥാപിക്കും.കൽപ്പറ്റ നിയോജക മണ്ഡലത്തിൽ കൽപ്പറ്റ ഹിദായത്തുൽ ഇസ്ലാം മദ്രസ യുപി സ്കൂൾ, മാനന്തവാടിയിൽ ലിറ്റിൽ ഫ്ളവർ യുപി സ്കൂൾ, ബത്തേരിയിൽ സെന്റ് മേരീസ് കോളജ് എന്നിവിടങ്ങളിലെ പോളിംഗ് സ്റ്റേഷനുകൾ വനിതാ ഉദ്യോഗസ്ഥരുടെ നിയന്ത്രണത്തിലായിരിക്കും.
പോളിംഗ്, പോലീസ് ഉദ്യോഗസ്ഥർ വനിതകളായിരിക്കും. ബത്തേരി നിയോജക മണ്ഡലത്തിലെ കുറിച്യാട് മുൻ ഏകാധ്യാപക വിദ്യാലയം, ചെട്ട്യാലത്തൂർ ഗവ.എൽപി സ്കൂൾ എന്നിവിടങ്ങളിലെ പോളിംഗ് സ്റ്റേഷനുകൾ യുവ ഓഫീസർമാർ നിയന്ത്രിക്കും. ജില്ലയിലെ മൂന്ന് മണ്ഡലങ്ങളിലുമായി രണ്ട് പ്രശ്നബാധിത ബൂത്തുകളും 84 പ്രത്യേക സുരക്ഷാ നിർദേശ ബൂത്തുകളുമാണുള്ളത്.
സുരക്ഷാ ബൂത്തുകളിൽ സുഗമമായ പോളിംഗിനു ക്രമീകരണം ഏർപ്പെടുത്തും. മാനന്തവാടി നിയോജക മണ്ഡലത്തിൽ 50, കൽപ്പറ്റയിൽ 28, ബത്തേരയിൽ ആറ് എന്നിങ്ങനെയാണ് പ്രത്യേക സുരക്ഷാ ബൂത്തുകൾ. പ്രശ്ന ബാധിത ബൂത്തുകൾ രണ്ടും മാനന്തവാടി നിയോജക മണ്ഡലത്തിലാണ്. ഹരിതചട്ടം പാലിച്ചാണ് പോളിംഗ് ബൂത്തുകൾ ഒരുക്കുക.
തെരഞ്ഞെടുപ്പ് ഡ്യൂട്ടി;ഫെസിലിറ്റേഷൻ കേന്ദ്രത്തിൽ വോട്ടു ചെയ്യാം
കൽപ്പറ്റ: ലോക്സഭാ തെരഞ്ഞെടുപ്പിൽ പോസ്റ്റൽ വോട്ടിനായി ഫോം 12ൽ അപേക്ഷിച്ചതിൽ പരിശീലന കേന്ദ്രങ്ങളിൽ വോട്ടുചെയ്യാൻ കഴിയാത്ത പോളിംഗ് ഉദ്യോഗസ്ഥർ, മറ്റു മണ്ഡലങ്ങളിൽ വോട്ടുള്ള വയനാട്ടിൽ തെരഞ്ഞെടുപ്പ് ജോലിക്കു നിയോഗിച്ച ഉദ്യോഗസ്ഥർ, ഡ്രൈവർമാർ, വീഡിയോഗ്രാഫർമാർ തുടങ്ങി പൊതുവായി തെരഞ്ഞെടുപ്പ് ജോലിക്ക് നിയോഗിക്കപ്പെട്ടവർ എന്നിവർക്കായി കൽപ്പറ്റ എസ്കെഎംജെ ഹൈസ്കൂളിൽ വോട്ടേഴ്സ് ഫെസിലിറ്റേഷൻ സെന്റർ സജ്ജമായി.
നാളെ മുതൽ 24 വരെ രാവിലെ ഒൻപത് മുതൽ വൈകുന്നേരം അഞ്ചു വരെ ഈ കേന്ദ്രത്തിൽ വോട്ടുചെയ്യാം.
വോട്ടർമാർക്ക് ഹെൽപ്പ് ലെെൻ ആപ്പ്
കൽപ്പറ്റ: വോട്ടർ പട്ടികയിൽ പേരുണ്ടോ എന്നറിയാൻ ഹെൽപ്പ്ലൈൻ ആപ്പുമായി തെരഞ്ഞെടുപ്പ് കമ്മീഷൻ. തെരഞ്ഞെടുപ്പ് സംബന്ധിച്ച സേവനങ്ങളും വിവരങ്ങളും വോട്ടർമാർക്ക് എളുപ്പത്തിൽ ലഭിക്കാൻ സഹായകമാവുന്ന ആപ്പ് ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ മുഖേന ഡൗണ്ലോഡ് ചെയ്ത് ഉയോഗിക്കാം.
വോട്ടർ പട്ടികയിൽ പേര് തിരയുക, വ്യക്തിഗത വിവരങ്ങൾ തിരുത്തുക, വോട്ട് മറ്റൊരിടത്തേക്ക് മാറ്റുക, ഡിജിറ്റൽ ഫോട്ടോ വോട്ടർ സ്ലിപ്പുകൾ ഡൗണ്ലോഡ് ചെയ്യുക, വോട്ടർ ഐഡി ആധാറുമായി ബന്ധിപ്പിക്കുക, വോട്ടർപട്ടികയിൽ നിന്ന് പേര് നീക്കാൻ അപേക്ഷ നൽകുക,
പരാതികൾ സമർപ്പിക്കുക, അതിന്റെ സ്റ്റാറ്റസ് തിരയുക തുടങ്ങിയവ മൊബൈൽ ആപ്പ് വഴി ചെയ്യാനാവും. തെരഞ്ഞെടുപ്പുമായി ബന്ധപ്പെട്ട വാർത്തകളും വിവരങ്ങളും ഹെൽപ്പ്ലൈൻ ആപ്പിലൂടെ അറിയാം.