മൂവാറ്റുപുഴ: ഇടുക്കി ലോക്സഭാ മണ്ഡലം യുഡിഎഫ് സ്ഥാനാർത്ഥി ഡീൻ കുര്യാക്കോസ് ദേവികുളം നിയോജക മണ്ഡലത്തിൽ തെരഞ്ഞെടുപ്പ് പര്യടനം നടത്തി. കാന്തല്ലൂർ ടൗണിൽ മുതിർന്ന കോണ്ഗ്രസ് നേതാവും മുൻ എംഎൽഎയുമായ എ.കെ. മണി ഉദ്ഘാടനം ചെയ്തു.
ജനങ്ങളെ വഞ്ചിച്ച കേന്ദ്ര, സംസ്ഥാന സർക്കാരുകൾക്കെതിരേയുള്ള വിധിയെഴുത്തായിരിക്കും ഈ തെരഞ്ഞെടുപ്പെന്ന് അദ്ദേഹം പറഞ്ഞു. ദേവികുളം താലൂക്കിലെ ജനങ്ങളെ ദോഷകരമായി ബാധിക്കുന്ന 15ഓളം ഉത്തരവുകളാണ് കഴിഞ്ഞ എട്ട് വർഷങ്ങളിൽ സംസ്ഥാന സർക്കാർ പുറപ്പെടുവിച്ചതെന്ന് അദ്ദേഹം പറഞ്ഞു. സർവ്വ മേഖലകളിലും പരാജയമായ ഒരു സർക്കാരാണ് ഇതെന്നും എ.കെ. മണി ആരോപിച്ചു.
യുഡിഎഫ് ചെയർമാൻ എം.ബി. സൈനുദീൻ അധ്യക്ഷത വഹിച്ചു. ഉച്ചകഴിഞ്ഞ് വാഴവര ഫാക്ടറി, തലയാർ, നയമക്കാട്, കന്നിമല ഫാക്ടറി, പെരിയമ്മ ഫാക്ടറി, നല്ലതണ്ണി ഈസ്റ്റ്, കല്ലാർ ഫാക്ടറി, നടയാർ സൗത്ത്, മൂന്നാർ കോളനി എന്നിവിടങ്ങളിൽ പര്യടനം നടത്തി മൂന്നാർ ടൗണിൽ സമാപിച്ചു. കെപിസിസി നിർവാഹക സമിതി അംഗം റോയി കെ. പൗലോസ് സമാപന സമ്മേളനം ഉദ്ഘാടനം ചെയ്തു.
രണ്ടാംഘട്ട പ്രചാരണത്തിന് ഡീൻ ഇന്ന് മൂവാറ്റുപുഴയിൽ
മൂവാറ്റുപുഴ: രണ്ടാംഘട്ട സ്ഥാനാർഥി പര്യടനത്തിന്റെ ഭാഗമായി ഇടുക്കി ലോക്സഭാ മണ്ഡലം യുഡിഎഫ് സ്ഥാനാർഥി ഡീൻ കുര്യാക്കോസ് ഇന്ന് മുവാറ്റുപുഴയിൽ പ്രചാരണം നടത്തും. രാവിലെ ആവോലിയിൽ പുളിക്കായത്ത് കടവിൽ പര്യടനം ആരംഭിക്കും. തുടർന്ന് ആവോലി, മാറാടി, വാളകം, മുളവൂർ, പായിപ്ര, മുവാറ്റുപുഴ ടൗണ് എന്നിവിടങ്ങളിൽ പര്യടനം നടത്തി വൈകുന്നേരം കീച്ചേരിപ്പടി റോയൽ ജംഗ്ഷനിൽ സമാപിക്കും. 40ഓളം കേന്ദ്രങ്ങളിൽ സ്ഥാനാർഥി സ്വീകരണങ്ങൾ ഏറ്റുവാങ്ങും.