International
കീവ്: ഡോൺബാസ് പ്രദേശം റഷ്യക്കു വിട്ടുകൊടുക്കുന്നതിനു പകരമായി യുക്രെയ്നു നാറ്റോ അംഗത്വം നല്കാമെന്ന വാഗ്ദാനം അമേരിക്ക മുന്നോട്ടു വച്ചതായി പ്രസിഡന്റ് സെലൻസ്കി.
യുക്രെയ്ൻ യുദ്ധം അവസാനിപ്പിക്കാൻ അമേരിക്കയിലെ ട്രംപ് ഭരണകൂടം നടത്തുന്ന നീക്കങ്ങളിൽ നാറ്റോ അംഗത്വം ഉൾപ്പെടുന്നത് ഇതാദ്യമാണ്. അമേരിക്കൻ പ്രതിനിധികളായ സ്റ്റീവ് വിറ്റ്കോഫും ജാരദ് കുഷ്നറും അടുത്തിടെ റഷ്യൻ പ്രസിഡന്റ് പുടിനുമായും യുക്രെയ്ൻ പ്രസിഡന്റ് സെലൻസ്കിയുമായും ചർച്ച നടത്തിയിരുന്നു.
യുക്രെയ്നു നാറ്റോ അംഗത്വം നല്കുന്നതിനു പകരം റഷ്യക്ക് കിഴക്കൻ യുക്രെയ്നിലെ ഡോൺബാസ് വിട്ടുകൊടുക്കാനാകുമോ എന്നാണ് അമേരിക്കൻ സംഘം ആരാഞ്ഞതെന്നു സെലൻസ്കി അറിയിച്ചു. പക്ഷേ, ഈ വിഷയത്തിൽ പുടിന്റെ എതിർപ്പ് എല്ലാവർക്കും അറിയാവുന്നതാണെന്നും സെലൻസ്കി കൂട്ടിച്ചേർത്തു.
യുക്രെയ്ൻ നാറ്റോയിൽ ചേരുന്നത് റഷ്യക്ക് ഒരിക്കലും അംഗീകരിക്കാനാവില്ലെന്നു പുടിൻ വ്യക്തമാക്കിയിട്ടുള്ളതാണ്. 2022ൽ റഷ്യൻ സേന യുക്രെയ്നിൽ അധിനിവേശം ആരംഭിക്കാനുള്ള കാരണങ്ങളിലൊന്നായി പുടിൻ ചൂണ്ടിക്കാട്ടിയതും യുക്രെയ്ന്റെ നാറ്റോ മോഹങ്ങളാണ്.
റഷ്യക്കു ഭൂമി വിട്ടുകൊടുക്കാൻ തയാറല്ല എന്നതാണ് തന്റെ നിലപാടെന്നും സെലൻസ്കി ഇന്നലെ പറഞ്ഞു. പക്ഷേ, സുരക്ഷാ ഉറപ്പ്, മികച്ച സൈന്യം, പുനർനിർമാണ ഫണ്ട് എന്നിവ യുക്രെയ്നു നല്കാമെങ്കിൽ ഭൂമി വിട്ടുകൊടുക്കുന്നതിൽ ജനഹിത പരിശോധന നടത്താൻ തയാറാണ്.
കോസ്റ്റ്യാന്റിക്ക്വ പ്രദേശത്ത് മാനുഷിക പരിഗണനയുടെ പേരിൽ വെടിനിർത്താമെന്ന പുടിന്റെ വാഗ്ദാനം തള്ളുന്നതായും സെലൻസ്കി അറിയിച്ചു. സൈന്യത്തെ ഉപയോഗിച്ച് പ്രദേശം പിടിക്കാൻ പറ്റില്ലെന്നു മനസിലാക്കിയ പുടിൻ യുക്രെയ്ൻ സൈനികരെ അവിടെനിന്ന് ഒഴിവാക്കാൻ പ്രയോഗിക്കുന്ന തന്ത്രമാണിതെന്ന് അദ്ദേഹം കൂട്ടിച്ചേർത്തു.
International
ടെഹ്റാൻ: സാമ്പത്തിക പ്രതിസന്ധിയും കുതിച്ചുയരുന്ന ജീവിതച്ചെലവും ഇറാനിലെ സാധാരണക്കാരുടെ ജീവിതം കൂടുതൽ ദുഃസഹമാക്കുന്നു. കടം വീട്ടാനും കുടുംബത്തിന്റെ നിത്യച്ചെലവുകൾ കണ്ടെത്താനും സ്വന്തം അവയവങ്ങൾ വിൽക്കാൻ പരസ്യം നൽകുന്നവരുടെ എണ്ണം വർധിക്കുകയാണ്. വൃക്കയും കരളും കോശങ്ങളും അസ്ഥിമജ്ജയുമെല്ലാം വിൽപനയ്ക്ക് വച്ചാണ് പലരും ജീവിതം മുന്നോട്ടുകൊണ്ടുപോകാൻ ശ്രമിക്കുന്നത്.
അതേസമയം, കടുത്ത തണുപ്പിൽ ഹീറ്ററുകൾ പോലുമില്ലാത്ത ക്ലാസ് മുറികളിൽ വിദ്യാർഥികൾ പഠിക്കേണ്ടിവരുന്നു. ഈ ദുരിതങ്ങൾക്കിടയിൽ കോടികൾ ചെലവിട്ട് പുതിയ ഭൂഗർഭ മിസൈൽ കേന്ദ്രം തുറന്ന സൈനിക നേതൃത്വത്തിനെതിരെയും ജനരോഷം ശക്തമാണ്.
തൊഴിൽമേഖലയിലെ വാർത്തകൾ റിപ്പോർട്ട് ചെയ്യുന്ന 'ഇൽന' വാർത്താ ഏജൻസിയാണ് ഇറാനിലെ അവയവ വിൽപനയുടെ വ്യാപ്തി പുറത്തുകൊണ്ടുവന്നത്. മധ്യ ടെഹ്റാനിലെ തെരുവുകളിലെ ചുവരുകളിലും കെട്ടിടങ്ങളുടെ ഇരുമ്പുവാതിലുകളിലുമെല്ലാം അവയവങ്ങൾ വിൽക്കാനുണ്ടെന്ന പരസ്യങ്ങൾ നിറഞ്ഞിരിക്കുകയാണ്. 'കിഡ്നി സ്ട്രീറ്റ്' എന്നറിയപ്പെടുന്ന ഫർഹാംഗ് ഹൊസൈനി സ്ട്രീറ്റ് അവയവങ്ങൾ വിൽക്കാൻ തയാറുള്ളവരുടെയും വാങ്ങാൻ താൽപര്യമുള്ളവരുടെയും പ്രധാന കേന്ദ്രമായി മാറിയിരിക്കുന്നു.
വൃക്കയ്ക്ക് കോടികളുടെ വില
സാമ്പത്തികമായി തകർന്ന തൊഴിലാളികളാണ് അവയവങ്ങൾ വിൽക്കാൻ മുന്നോട്ടുവരുന്നവരിൽ ഭൂരിഭാഗവുമെന്ന് ടെഹ്റാനിലെ സദ്ര ആശുപത്രിയിലെ ജീവനക്കാരൻ പറയുന്നു. വൃക്കയ്ക്ക് സാധാരണയായി 30 മുതൽ 40 ബില്യൺ റിയാൽ വരെയാണു വില. രക്തഗ്രൂപ്പിന്റെ ലഭ്യതയനുസരിച്ച് വിലയിൽ വലിയ വ്യത്യാസവുമുണ്ട്.
ഒ പോസിറ്റീവ് രക്തഗ്രൂപ്പുള്ളവർ എട്ടു ബില്യൺ റിയാലിന് വൃക്ക നൽകാൻ തയാറാകുമ്പോൾ അപൂർവ രക്തഗ്രൂപ്പുകൾക്ക് വില 50 ബില്യൺ റിയാൽ വരെയെത്തുന്നു. കടം വീട്ടാൻ 35 ബില്യൺ റിയാൽ ആവശ്യമുള്ള 30 വയസുകാരനായ മോട്ടോർ സൈക്കിൾ കൊറിയർ ജീവനക്കാരൻ നേരത്തേ ലഭിച്ച 15 ബില്യൺ റിയാലിന്റെ വാഗ്ദാനം നിരസിച്ചു. ചെക്ക് കേസിൽനിന്നു രക്ഷപ്പെടാൻ ഏഴു മുതൽ എട്ടു ബില്യൺ റിയാൽ വരെ ആവശ്യമായതിനാൽ വിപണി വിലയേക്കാൾ 20-30 ശതമാനം കുറച്ച് അവയവം നൽകാൻ തയാറാണെന്ന് 58 വയസുകാരനായ മറ്റൊരു തൊഴിലാളിയും അറിയിച്ചിട്ടുണ്ട്.
കടബാധ്യത തീർക്കാൻ ഒന്നിലധികം അവയവങ്ങൾ വിൽക്കാൻ തയാറായവരുമുണ്ട്. 33 വയസുകാരനായ നിർമാണത്തൊഴിലാളി അസ്ഥിമജ്ജയ്ക്ക് 40 ബില്യൺ റിയാൽ ആവശ്യപ്പെട്ടതിനൊപ്പം വൃക്കയും കരൾ കോശങ്ങളും വിൽക്കാമെന്നും പരസ്യം നൽകിയിട്ടുണ്ട്. താൻ പൂർണ ആരോഗ്യവാനാണെന്നും ആവശ്യമായ മെഡിക്കൽ രേഖകൾ കൈവശമുണ്ടെന്നും ഇയാൾ അവകാശപ്പെടുന്നു.
അഞ്ചുകോടി പേർ ദാരിദ്ര്യത്തിൽ
സർക്കാരിന്റെ കറൻസി സബ്സിഡി നയത്തിലെ വീഴ്ചകൾ രാജ്യത്തെ അഞ്ചു കോടിയോളം പേരെ കടുത്ത ദാരിദ്ര്യത്തിലേക്കും പോഷകാഹാരക്കുറവിലേക്കും തള്ളിയിട്ടതായി പാർലമെന്ററി സാമൂഹികകാര്യ സമിതി അധ്യക്ഷൻ അലി ബാബായി കർണാമി വെളിപ്പെടുത്തി.
യുദ്ധസാഹചര്യങ്ങളും സാമ്പത്തിക തകർച്ചയും കാരണം ലക്ഷക്കണക്കിന് ആളുകൾ പുതുതായി ദാരിദ്ര്യത്തിലേക്ക് വീഴുന്നതായി യുഎൻ റിപ്പോർട്ടിൽ ചൂണ്ടിക്കാട്ടുന്നു. സ്ഥിരവരുമാനമുള്ള സർക്കാർ ജീവനക്കാരും തൊഴിലാളികളും പോലും ജീവിതച്ചെലവ് താങ്ങാനാകാതെ ദാരിദ്ര്യത്തിലേക്ക് കൂപ്പുകുത്തുകയാണ്. പലപ്പോഴും അടിസ്ഥാന മിനിമം വേതനം, ജീവിതച്ചെലവിന് ആവശ്യമായ തുകയുടെ മൂന്നിലൊന്നു പോലും തികയാത്ത അവസ്ഥയാണ്.
ഭക്ഷ്യവസ്തുക്കളുടെ വില 90 മുതൽ 140 ശതമാനം വരെ വർധിച്ചതോടെ സാധാരണക്കാരുടെ തീൻമേശകളിൽനിന്നു മാംസം, പഴവർഗങ്ങൾ, പോഷകാഹാരങ്ങൾ എന്നിവ അപ്രത്യക്ഷമാകുന്ന സ്ഥിതിയാണ്. ഗ്രാമീണമേഖലകളിൽ ഏകദേശം 66 ശതമാനത്തോളം കുടുംബങ്ങൾ ഭക്ഷ്യ അരക്ഷിതാവസ്ഥ നേരിടുന്നുണ്ട്.
പുതപ്പുമായി ക്ലാസ് മുറികളിൽ വിദ്യാർഥികൾ
സാമ്പത്തിക പ്രതിസന്ധിക്കൊപ്പം ഊർജക്ഷാമവും ഇറാനിലെ ജനജീവിതത്തെ ബാധിക്കുന്നു. കനത്ത മഴയും മഞ്ഞുവീഴ്ചയും കാരണം താപനില പൂജ്യത്തിനും താഴെയെത്തിയിട്ടും പല സ്കൂളുകളിലും ഹീറ്ററുകൾ പ്രവർത്തിപ്പിക്കുന്നില്ല. കൊടുംതണുപ്പിൽ വിറച്ചുകൊണ്ടാണ് കുട്ടികൾ ക്ലാസ് മുറികളിലിരിക്കുന്നത്.
വടക്കുപടിഞ്ഞാറൻ നഗരമായ തബ്രിസിൽ താപനില മൈനസ് അഞ്ചു ഡിഗ്രി സെൽഷ്യസിലെത്തിയിട്ടും റേഡിയേറ്ററുകൾ പ്രവർത്തിപ്പിക്കാൻ സ്കൂൾ അധികൃതർ തയാറായില്ലെന്നാണ് പരാതി. സ്വന്തം ശ്വാസംകൊണ്ട് ക്ലാസ് മുറികൾ ചൂടാക്കാൻ വിദ്യാർഥികളോട് അധികൃതർ നിർദേശിച്ചതായും റിപ്പോർട്ടുകളുണ്ട്. അർദബീലിൽ മഞ്ഞുവീഴ്ചയ്ക്കിടയിലും ഹീറ്ററുകൾ പ്രവർത്തിക്കാത്തതിനാൽ കുട്ടികൾ യാത്രാപുതപ്പുകളുമായാണ് സ്കൂളിലെത്തുന്നത്.
വടക്കൻ പ്രവിശ്യയായ ഗിലാനിലെ ഒരു ഹൈസ്കൂളിൽ പ്രിൻസിപ്പലിന്റെ ഓഫിസിൽ മാത്രമാണു ഹീറ്റർ പ്രവർത്തിക്കുന്നത്. ക്ലാസ് മുറികളിലെ ഹീറ്ററുകൾ കഴിഞ്ഞവർഷം മുതൽ കേടായിക്കിടക്കുകയാണ്. ടെഹ്റാനിലെ പല സ്കൂളുകളിലും വൈദ്യുതിയും ഗ്യാസുമില്ല. ഭീമമായ ഫീസ് ഈടാക്കുന്ന സ്കൂളുകൾ അടിസ്ഥാന സൗകര്യങ്ങൾ ഒരുക്കാൻപോലും തയാറാകുന്നില്ലെന്ന് രക്ഷിതാക്കൾ ആരോപിക്കുന്നു.
സർക്കാർ സ്കൂളുകൾ പോലും വൈദ്യുതി, വെള്ളം, ഗ്യാസ് ബില്ലുകൾ അടയ്ക്കാനും പരീക്ഷാ പേപ്പറുകൾ വാങ്ങാനുമായി രക്ഷിതാക്കളിൽനിന്നു പണം പിരിക്കുന്നതായും പരാതിയുണ്ട്. അഹ്വാസിലെ ഒരു സ്കൂളിൽ പരീക്ഷാപേപ്പറുകൾക്കായി പത്തു ലക്ഷം റിയാൽ ആവശ്യപ്പെട്ടെന്നും പണം നൽകാത്തവർക്കു മാർക്ക് കുറയ്ക്കുമെന്ന് ഭീഷണിപ്പെടുത്തിയെന്നും വിദ്യാർഥികൾ ആരോപിക്കുന്നു. ഇന്റർനെറ്റ് തടസങ്ങളും ഉയർന്ന ഡാറ്റാ നിരക്കുകളും കാരണം ഓൺലൈൻ പഠനത്തിലേക്കു മാറാനും കുടുംബങ്ങൾക്ക് കഴിയുന്നില്ല.
മിസൈൽ നഗരത്തിനെതിരേ ജനരോഷം
സാധാരണക്കാർ ദാരിദ്ര്യത്തിലും ഊർജക്ഷാമത്തിലും വലയുമ്പോൾ പുതിയ ഭൂഗർഭ 'മിസൈൽ നഗരം' തുറന്ന ഇറാന്റെ റവല്യൂഷണറി ഗാർഡ്സിന്റെ (ഐആർജിസി) നടപടിയും വലിയ വിമർശനത്തിന് ഇടയാക്കിയിട്ടുണ്ട്. ജനങ്ങളുടെ ജീവിതനിലവാരം തകരുമ്പോൾ സൈനിക ആവശ്യങ്ങൾക്കായി വൻതുക ചെലവഴിക്കുന്ന ഭരണകൂടത്തിന്റെ മുൻഗണനകളെയാണ് പൗരന്മാർ ചോദ്യം ചെയ്യുന്നത്.
സായുധസേനാ മേധാവി അലി അബ്ദുള്ളാഹിയും റവല്യൂഷണറി ഗാർഡ്സ് എയ്റോസ്പേസ് ഫോഴ്സ് കമാൻഡർ മജീദ് മൗസവിയും പുതിയ ഭൂഗർഭ മിസൈൽ കേന്ദ്രം സന്ദർശിക്കുന്ന ചിത്രങ്ങൾ കഴിഞ്ഞ പത്തിനാണ് ഇറേനിയൻ മാധ്യമങ്ങൾ പുറത്തുവിട്ടത്.
'മിസൈൽ നഗരങ്ങൾക്കായി മലകൾ തുരന്ന് തുരങ്കങ്ങൾ നിർമിച്ചവർ ജനങ്ങളുടെ തീൻമേശകളിൽ അതിനേക്കാൾ വലിയ വിള്ളലുകളാണ് സൃഷ്ടിച്ചിരിക്കുന്നത്' എന്നായിരുന്നു ഷിറാസ് സ്വദേശിയുടെ പ്രതികരണം. ജനങ്ങളുടെ ഉപജീവനത്തിനായി ചെലവഴിക്കേണ്ട പണമാണ് സൈനിക ആവശ്യങ്ങൾക്കായി വിനിയോഗിക്കുന്നതെന്നും ഇറാന്റെ അവസ്ഥ ഉത്തരകൊറിയയുടേതിനു സമാനമായി മാറുകയാണെന്നും വിമർശനമുയരുന്നു.
പണപ്പെരുപ്പവും ഊർജക്ഷാമവും
ഒക്ടോബറിലെ കണക്കുകൾ പ്രകാരം ഇറാനിലെ വാർഷിക പണപ്പെരുപ്പം 88.7 ശതമാനത്തിലെത്തിയിട്ടുണ്ട്. ശൈത്യകാലത്ത് 430 ദശലക്ഷം ക്യുബിക് മീറ്റർ ഗ്യാസിന്റെ കുറവുണ്ടാകാൻ സാധ്യതയുള്ളതിനാൽ ഊർജോപഭോഗം കുറയ്ക്കണമെന്നു സർക്കാർ വക്താവ് ഫാത്തിമ മൊഹാജെറാനി ജനങ്ങളോട് അഭ്യർഥിച്ചിരുന്നു.
വീടുകളിൽ ഗ്യാസ് ഉപയോഗം കുറയ്ക്കാൻ ആവശ്യപ്പെടുന്ന സർക്കാർ തന്നെ ഭൂഗർഭ സൈനിക കേന്ദ്രങ്ങൾക്കായി വൻതോതിൽ ഊർജം വിനിയോഗിക്കുന്നതിലെ വൈരുധ്യവും ജനങ്ങൾ ചൂണ്ടിക്കാട്ടുന്നു. യുദ്ധമുണ്ടായാൽ സാധാരണക്കാർക്ക് അഭയം തേടാൻ ആവശ്യമായ ഭൂഗർഭ ഷെൽട്ടറുകളോ സുരക്ഷാ സംവിധാനങ്ങളോ ഒരുക്കാത്തതിലും പ്രതിഷേധമുണ്ട്.
മിസൈൽ കേന്ദ്രങ്ങൾക്കു പകരം ജനങ്ങൾക്കായി ഭൂഗർഭ അഭയകേന്ദ്രങ്ങൾ നിർമിക്കേണ്ടതായിരുന്നുവെന്നാണ് പലരുടെയും അഭിപ്രായം. ജനങ്ങളുടെ അടിസ്ഥാന ആവശ്യങ്ങൾ നിറവേറ്റുന്നതിലും കുട്ടികൾക്ക് സുരക്ഷിതമായ വിദ്യാഭ്യാസാന്തരീക്ഷം ഉറപ്പാക്കുന്നതിലും പരാജയപ്പെടുന്ന ഭരണകൂടം സൈനികശക്തി വർധിപ്പിക്കുന്നതിന് നൽകുന്ന മുൻഗണനയാണ് ഇറാനിൽ ഇപ്പോൾ വലിയ ചർച്ചയാകുന്നത്.
സ്വന്തം ശരീരഭാഗങ്ങൾ വിറ്റ് കടം വീട്ടേണ്ടിവരുന്ന മനുഷ്യരും കൊടുംതണുപ്പിൽ പുതച്ചിരുന്ന് പഠിക്കേണ്ടിവരുന്ന കുട്ടികളും രാജ്യത്തെ സാമ്പത്തിക-സാമൂഹിക പ്രതിസന്ധിയുടെ ആഴം വ്യക്തമാക്കുന്നു. വൈദ്യുതി-വാതക ക്ഷാമം കാരണം വ്യവസായശാലകൾ പലതും അടച്ചുപൂട്ടുകയോ ഉത്പാദനം വെട്ടിക്കുറയ്ക്കുകയോ ചെയ്തു. ഇത് യുവാക്കൾക്കിടയിലെ തൊഴിലില്ലായ്മയും അനൗപചാരിക മേഖലകളിലെ വരുമാനനഷ്ടവും വർധിപ്പിച്ചു.
Tech
എഐ വന്നു കളം പിടിച്ചതോടെ ജോലി പോയവരെയൊക്കെ കമ്പനികൾ തിരികെ വിളിക്കുകയാണത്രേ, ഇതിനെ 'എഐ റീബൗണ്ടിംഗ്' എന്നാണ് വിളിക്കുന്നത്, ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് ജോലിയിൽ നിന്ന് ഒഴിവാക്കിയ ജീവനക്കാരെ യുകെയിലെയും യുഎസിലെയും പ്രമുഖ കമ്പനികൾ തിരികെ വിളിക്കുന്ന പ്രവണത ശക്തമായിക്കൊണ്ടിരിക്കുകയാണ്.
ടാലന്റ് അസസ്മെന്റ് സ്ഥാപനമായ SHL നടത്തിയ ഗവേഷണം, റിപ്പോർട്ട് അനുസരിച്ച്, സർവേയിൽ പങ്കെടുത്ത യുഎസ് ജീവനക്കാരിൽ 19.1 ശതമാനം പേർ തങ്ങൾക്ക് പകരം എഐ കൊണ്ടുവന്ന ശേഷവും കമ്പനികൾ തങ്ങളോട് തിരികെ ജോലിയിൽ പ്രവേശിക്കാൻ ആവശ്യപ്പെട്ടു. യുഎസിലും യുകെയിലുമായി ഇത് 16 ശതമാനമാണ്.
അപ്പോ എഐക്ക് പകരം വെക്കാൻ ആളില്ലേ, എവിടെയാണ് കമ്പനികൾക്ക് പാളിയത് ?
കമ്പനികൾ തങ്ങളുടെ ജീവനക്കാരുടെ കഴിവുകളും അനുഭവസമ്പത്തും ശരിയായി വിലയിരുത്താതെ ദൃതിപിടിച്ച് ജോലി ഓട്ടോമേറ്റ് ചെയ്തതാണ് വിനയായത്. സ്ഥാപനത്തെക്കുറിച്ചുള്ള ആഴത്തിലുള്ള അറിവ്, ഉപഭോക്താക്കളുമായുള്ള ബന്ധം, പ്രഫഷണൽ തീരുമാനങ്ങളെടുക്കാനുള്ള ശേഷി എന്നിവ ജീവനക്കാർ നൽകുന്നുണ്ടെന്നും ഇവ സാങ്കേതികവിദ്യയിലൂടെ മാത്രം പകർത്തിയെഴുതാൻ കഴിയില്ലെന്നും കമ്പനികൾ തിരിച്ചറിയാൻ തുടങ്ങി.
ചാറ്റ്ബോട്ടുകൾക്കും എഐ ടൂളുകൾക്കും കമ്പനിയുടെ അനുഭവസമ്പത്തോ മനുഷ്യരുടെ ക്രിയേറ്റിവിറ്റിയോ കസ്റ്റമർ റിലേഷൻഷിപ്പോ നൽകാൻ കഴിയുന്നില്ല. പ്രതീക്ഷിച്ച തരം ക്വാളിറ്റിയും ഫലവും എഐ ടൂളുകളിൽ നിന്ന് ലഭിക്കാതെ വന്നതോടെ ഒഴിവാക്കിയ വിദഗ്ദ്ധരെ സ്ഥാപനങ്ങൾക്ക് തിരികെ കൊണ്ടുവരേണ്ടി വന്നു.
തങ്ങളുടെ എഐ ക്വാളിറ്റി കൺട്രോൾ ടൂളുകൾ പ്രതീക്ഷിച്ച പോലെ പ്രവർത്തിക്കാത്തതിനെ തുടർന്ന് വാഹന നിർമാതാക്കളായ ഫോർഡ് 350 അനുഭവസമ്പന്നരായ എൻജിനീയർമാരെ നിയമിക്കുകയും സ്ഥാനക്കയറ്റം നൽകുകയും ചെയ്തു.
എഐ ചാറ്റ്ബോട്ടുകളെ അമിതമായി ആശ്രയിക്കാനുള്ള നീക്കം പരാജയപ്പെട്ടതോടെ സ്വീഡിഷ് ഫിൻടെക് കമ്പനിയായ ക്ലാർണ വീണ്ടും ഹ്യൂമൻ കസ്റ്റമർ സർവീസ് പ്രതിനിധികളെ നിയമിക്കാൻ തുടങ്ങി.
ഇനി കമ്പനികൾ തിരിച്ചുവിളിച്ചാലോ ?
കൃത്യമായ പഠനമില്ലാതെ ജീവനക്കാരെ ഒഴിവാക്കി എഐ നടപ്പിലാക്കാൻ ശ്രമിച്ച കമ്പനികൾക്ക് അവരെ മുൻപത്തേക്കാൾ ഉയർന്ന ചെലവിൽ തിരികെ ജോലിയിൽ പ്രവേശിപ്പിക്കേണ്ടി വരുന്ന സാഹചര്യം സൃഷ്ടിക്കപ്പെട്ടിരിക്കുകയാണ്.
തിരികെ വിളിക്കപ്പെടുന്ന ജീവനക്കാർ പഴയ വ്യവസ്ഥകളിൽ ജോലി ചെയ്യാൻ തയ്യാറല്ല എന്നതും ശ്രദ്ധേയമാണ്. SHL ന്റെ കണ്ടെത്തലുകൾ പ്രകാരം, 51% ജീവനക്കാരും തിരികെ ജോലിയിൽ പ്രവേശിക്കുന്നതിന് മുൻപ് വലിയ ശമ്പള വർദ്ധനവ് വേണമെന്ന് ആവശ്യപ്പെട്ടു. 42% പേർ തങ്ങളുടെ ഭാവി തൊഴിൽ സുരക്ഷിതത്വത്തെക്കുറിച്ച് ലിഖിതമായ ഉറപ്പ് ആവശ്യപ്പെട്ടു. 40% പേർ തങ്ങളുടെ ജോലിയിൽ എഐ എങ്ങനെയാണ് ഉപയോഗിക്കുന്നത് എന്നതിനെക്കുറിച്ച് കൂടുതൽ വ്യക്തത ആവശ്യപ്പെട്ടു.
ഇന്ത്യയിലും ഇതിന്റെ ഇംഫാക്ട് എങ്ങനെയാണ് എന്നു ചോദിച്ചാൽ,
ഇന്ത്യയിൽ എഐ കാരണം 31,000-ൽ അധികം ആളുകൾക്ക് ജോലി നഷ്ടപ്പെട്ടെങ്കിലും, 83,000-ൽ അധികം പുതിയ AI അധിഷ്ഠിത നിയമനങ്ങളും നടന്നിട്ടുണ്ട്. ചുരുക്കി പറഞ്ഞാൽ, എഐ ഉപയോഗിക്കാൻ അറിയുന്നതിനൊപ്പം നമ്മളുടെ അനുഭവസമ്പത്തും സ്കില്ലുമാണ് പ്രധാനം.
International
ലണ്ടൻ: റഷ്യയ്ക്ക് രഹസ്യവിവരങ്ങൾ ചോർത്തി നൽകിയതുമായി ബന്ധപ്പെട്ട് അമേരിക്കൻ സൈനികൻ അറസ്റ്റിൽ. 41 വയസുള്ള സൈനികൻ ബ്രിട്ടണിൽ വച്ചാണ് അറസ്റ്റിലായത്.
ഇയാളുടെ മറ്റുവിവരങ്ങൾ അധികൃതർ പുറത്തുവിട്ടിട്ടില്ല. ദേശീയ സുരക്ഷാ നിയമലംഘനങ്ങളുടെയും ചാരവൃത്തിയുടെയും പേരിലാണ് നടപടി.
യുകെ കൗണ്ടർ ടെററിസം പൊലിസിങ്ങും യുഎസ് അധികാരികളും എഫ്ബിഐയും അമേരിക്കൻ സൈന്യവും സംയുക്തമായി നടത്തിയ അന്വേഷണത്തിനൊടുവിൽ ചൊവ്വാഴ്ചയാണ് ഇയാൾ പിടിയിലായത്.
നാഷണൽ സെക്യൂരിറ്റി ആക്ട് 2023 പ്രകാരം വിദേശ രഹസ്യാന്വേഷണ ഏജൻസിയെ സഹായിച്ചതിനും സംരക്ഷിത വിവരങ്ങൾ ശേഖരിച്ച് ചോർത്തിയതിനുമാണ് ഇയാൾക്കെതിരെ കേസെടുത്തിരിക്കുന്നത്. ഇയാൾ നിലവിൽ ലണ്ടനിൽ പൊലിസ് കസ്റ്റഡിയിലാണ്. അന്വേഷണത്തിന്റെ ഭാഗമായി ഗ്ലൗസെസ്റ്റർഷയറിലെ രണ്ട് കേന്ദ്രങ്ങളിൽ പരിശോധന പുരോഗമിക്കുകയാണ്.
യുകെയും യുഎസും തമ്മിലുള്ള ശക്തമായ സുരക്ഷാ സഹകരണത്തിന്റെ ഫലമാണ് ഈ നിർണായക അറസ്റ്റെന്ന് കൗണ്ടർ ടെററിസം പൊലിസിംഗ് സീനിയർ നാഷണൽ കോർഡിനേറ്റർ ഡെപ്യൂട്ടി അസിസ്റ്റന്റ് കമ്മീഷണർ വിക്കി ഇവാൻസ് വ്യക്തമാക്കി. രാജ്യത്തിന്റെ സുരക്ഷയെ അപകടപ്പെടുത്തുന്നവർക്കെതിരെ വിട്ടുവീഴ്ചയില്ലാത്ത നടപടിയെടുക്കുമെന്ന് എഫ്ബിഐ ഡയറക്ടർ കാഷ് പട്ടേൽ പറഞ്ഞു.
International
ടെഹ്റാൻ: ഇറാനെതിരെ നിർണായക നീക്കവുമായി അമേരിക്ക. ഇറാന്റെ ആയുധ നീക്കം തടയാനെന്ന പേരിൽ അമേരിക്ക ദൗത്യ സംഘത്തെ നിയോഗിച്ചു. കര വഴിയും കടൽ വഴിയും ഇറാനിലേക്ക് ആയുധ സാമഗ്രികളും ഉത്പന്നങ്ങളും എത്തുന്നത് തടയുകയാണ് ലക്ഷ്യം.
അയേണ് ഗേറ്റ് എന്ന പേരിലാണ് അമേരിക്ക ഇറാനെതിരെ ടാസ്ക് ഫോഴ്സിനെ പ്രഖ്യാപിച്ചിരിക്കുന്നത്. കാസ്പിയൻ കടൽ വഴിയും മറ്റും ഇറാനിലെത്തുന്ന സാമഗ്രികൾ ആയുധ നിർമാണത്തിന് ഉപയോഗിക്കുന്നു എന്നാണ് അമേരിക്കയുടെ ആരോപണം.
ഇതുകൂടാതെ ഇറാന്റെ ആണവ പദ്ധതികളെ കുറിച്ച് വിവരം നൽകുന്നവർക്ക് രണ്ട് കോടി ഡോളർ വരെ പാരിതോഷികവും അമേരിക്ക പ്രഖ്യാപിച്ചിട്ടുണ്ട്. യുഎസ് സെൻട്രൽ കമാൻഡ് ആണ് ആണവ പദ്ധതികളെ കുറിച്ച് വിവരം നൽകുന്നവർക്ക് പാരിതോഷികം പ്രഖ്യാപിച്ചത്.
ആണവ പദ്ധതികൾ, സ്ഥലം, പിന്നിലുള്ള വ്യക്തികൾ തുടങ്ങിയ വിവരം നൽകുന്നവർക്കാണ് വൻ പാരിതോഷികം പ്രഖ്യാപിച്ചിരിക്കുന്നത്. എന്നാൽ ഇറാൻ ഇതുവരെ അമേരിക്കയുടെ പ്രഖ്യാപനത്തോട് പ്രതികരിച്ചിട്ടില്ല.
Tech
വലിയ ശമ്പളമുള്ള ജോലി സ്വമേധയാ ഉപേക്ഷിക്കാൻ ടെക് ഭീമന്മാരായ ഗൂഗിൾ, മെറ്റ, മൈക്രോസോഫ്റ്റ് തുടങ്ങിയ കമ്പനികൾ ജീവനക്കാർക്ക് വൻ തുക നൽകിത്തുടങ്ങി. ആർട്ടിഫിഷ്യൽ ഇന്റലിജൻസിന്റെ കാലത്ത് തങ്ങളുടെ കമ്പനികളുടെ ഘടന മാറ്റിയെഴുതുന്നതിന്റെ ഭാഗമായാണ് ഇത്തരം 'വളണ്ടറി എക്സിറ്റ്' (Voluntary Exit) പദ്ധതികളുമായി കമ്പനികൾ രംഗത്തെത്തിയിരിക്കുന്നത്.
കാനഡ, ഫ്രാൻസ്, ജർമനി, ജപ്പാൻ, സ്വിറ്റ്സർലൻഡ് തുടങ്ങിയ രാജ്യങ്ങളിലാണ് ഗൂഗിൾ ഈ പദ്ധതി വ്യാപിപ്പിച്ചിരിക്കുന്നത്. സ്വിറ്റ്സർലൻഡിൽ ജോലി ചെയ്ത ഓരോ വർഷത്തിനും ഒരു മാസത്തെ ശമ്പളം വീതം നൽകാനാണ് തീരുമാനം (പരമാവധി 12 മാസത്തെ ശമ്പളം വരെ ലഭിക്കും). ഗൂഗിളിന്റെ എഐ റിസർച്ച് വിഭാഗമായ 'ഡീപ് മൈൻഡ്' ഇതിൽ ഉൾപ്പെട്ടിട്ടില്ല.
ഫ്രാൻസിലെ ജീവനക്കാർക്കായി മെറ്റ പുതിയ പദ്ധതിയാണ് നടപ്പിലാക്കുന്നത്. ജോലി ചെയ്ത ഓരോ വർഷത്തിനും 2.15 മാസത്തെ ശമ്പളത്തിന് തുല്യമായ നഷ്ടപരിഹാരം നൽകും. കൂടാതെ, പുതിയ കരിയർ കണ്ടെത്താൻ 10 മാസത്തെ 'കരിയർ ട്രാൻസിഷൻ ലീവ്' കാലയളവിൽ ഗ്രോസ് ശമ്പളത്തിന്റെ 80 ശതമാനവും നൽകും. പ്രഫഷണൽ റീട്രെയിനിംഗിനും ബിസിനസ് തുടങ്ങാനും കമ്പനി സഹായം വാഗ്ദാനം ചെയ്യുന്നുണ്ട്.
ഓക്ടോബർ 26നാണ് മൈക്രോസോഫ്റ്റ് തങ്ങളുടെ 'വളണ്ടറി എക്സിറ്റ് ഓഫർ' (VEO) പ്രഖ്യാപിച്ചത്. ഇന്ത്യ, കാനഡ, യുകെ, യുഎസ് എന്നിവിടങ്ങളിലെ ലെവൽ 70ൽ താഴെയുള്ള തെരഞ്ഞെടുത്ത ജീവനക്കാർക്കാണ് ഈ ആനുകൂല്യം ലഭിക്കുക. അർഹരായ ജീവനക്കാരെ ഇമെയിൽ മുഖേന വിവരങ്ങൾ അറിയിക്കുന്നുണ്ട്.
എഐ സാങ്കേതികവിദ്യയ്ക്കായി വൻതുക മുടക്കേണ്ടി വരുന്നതാണ് കമ്പനികളെ ഇത്തരം തീരുമാനങ്ങളിലേക്ക് നയിക്കുന്നത്. ഡാറ്റാ സെന്ററുകൾ നിർമ്മിക്കുന്നതിനും എഐ വിദഗ്ധരെ നിയമിക്കുന്നതിനും കോടിക്കണക്കിന് രൂപയാണ് കമ്പനികൾ ചെലവഴിക്കുന്നത്. ചെറിയ ടീമുകൾക്ക് വലിയ ജോലികൾ ചെയ്യാൻ കഴിയുന്ന രീതിയിലേക്ക് കമ്പനികളെ മാറ്റാനാണ് മാർക്ക് സുക്കർബർഗും മറ്റ് സിഇഒമാരും ലക്ഷ്യമിടുന്നത്.
International
ടെഹ്റാൻ: ആണവപദ്ധതി സംബന്ധിച്ച പുതിയ നിർദേശങ്ങൾ അമേരിക്കയ്ക്കു കൈമാറിയതായി ഇറാൻ. എന്നാൽ, ഇവയിൽ ചർച്ച നടക്കുന്നതിനു മുന്പായി ഇറാന്റെ എഴു നിബന്ധനകൾ അംഗീകരിക്കണമെന്നും അവിടെനിന്നുള്ള ചില വൃത്തങ്ങൾ വെളിപ്പെടുത്തിയതായി വാർത്താ ഏജൻസി റിപ്പോർട്ട് ചെയ്തു.
മധ്യസ്ഥശ്രമങ്ങൾ നടത്തുന്ന ഖത്തർ വഴിയാണു പുതിയ നിർദേശങ്ങൾ അമേരിക്കയ്ക്ക് ഇറാൻ കൈമാറിയത്. അമേരിക്ക ഈ നിർദേശങ്ങൾ വിലയിരുത്തിവരികയാണെന്നും റിപ്പോർട്ടിൽ പറയുന്നു.
അമേരിക്ക ഇറാനിൽ ആക്രമണം പുനരാരംഭിക്കാൻ സാധ്യതയുള്ളതിനാൽ വെടിനിർത്തലിനു മധ്യസ്ഥശ്രമം സജീവമാണ്. ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടി തോറ്റെങ്കിലും ഇറാനിലെ സൈനിക നടപടി തുടരുമെന്ന സൂചനയാണു പ്രസിഡന്റ് ട്രംപ് നല്കിയത്. അമേരിക്ക ആക്രമിച്ചാൽ ഗൾഫിൽ ശക്തമായ തിരിച്ചടി നല്കാൻ ഇറാനും പദ്ധതിയിടുന്നതായി റിപ്പോർട്ടുണ്ട്.
ചർച്ച നടക്കണമെങ്കിൽ ഇറാന്റെ ഏഴ് ഉപാധികൾ അംഗീകരിക്കണമെന്നു മുതിർന്ന ഇറേനിയൻ സൈനിക നേതാവ് മൊഹ്സൻ റേസായി കഴിഞ്ഞ ദിവസം റഷ്യാ സന്ദർശനത്തിനിടെ പറഞ്ഞിരുന്നു. അല്ലാതെ ഹോർമുസ് കടലിടുക്ക് ഇറാൻ തുറക്കില്ലെന്നും അദ്ദേഹം കൂട്ടിച്ചേർത്തു.
അമേരിക്കൻ ഉപരോധം പിൻവലിക്കുക, മരവിപ്പിച്ച ആസ്തികൾ വിട്ടുനല്കുക, യുദ്ധത്തിലെ നാശത്തിനു നഷ്ടപരിഹാരം നല്കുക തുടങ്ങിയ ആവശ്യങ്ങളാണ് ഇറാൻ മുന്നോട്ടുവച്ചിരിക്കുന്നത്.
National
ന്യൂഡല്ഹി: യുഎസിലേക്ക് നോണ് സ്റ്റോപ്പ് വിമാന സര്വീസുകള് പുനഃസ്ഥാപിച്ച് എയര്ഇന്ത്യ.
ഡല്ഹിയെയും മുംബൈയെയും ന്യൂയോര്ക്കിലെ ജെഎഫ്കെ ഇന്റർനാഷണൽ എയർപോർട്ട്, നെവാര്ക്ക് ലിബര്ട്ടി ഇന്റര്നാഷണല് എയര്പോര്ട്ട് എന്നിവയുമായി ബന്ധിപ്പിക്കുന്ന നാല് സര്വീസുകളിലൂടെ നവംബര് നാലിനാണ് നോൺസ്റ്റോപ്പ് സർവീസ് തുടങ്ങിയത്.
യുഎസ്-ഇറാന് സംഘര്ഷം രൂക്ഷമാകുകയും മേഖലയിലുടനീളമുള്ള വിമാന സര്വീസുകള് തടസപ്പെടുകയും ചെയ്തതിനെത്തുടര്ന്ന്, ഈ വര്ഷം ആദ്യം മുതല് എയര് ഇന്ത്യ റൂട്ട് മാറ്റി റോമില് അധിക സ്റ്റോപ്പ് എടുത്തായിരുന്നു അമേരിക്കയിലേക്ക് സര്വീസ് നടത്തിക്കൊണ്ടിരുന്നത്.
ഈ റൂട്ടില് ഏകദേശം 20 മണിക്കൂറാണ് യാത്രാസമയം. നോണ്സ്റ്റോപ്പ് സര്വീസിൽ യാത്രാസമയം നാല് മണിക്കൂര് കുറഞ്ഞ് പഴയതുപോലെ 15-16 മണിക്കൂറായി മാറി.
International
ലോസ് ആഞ്ചലസ് അമേരിക്കയിലെ രണ്ടാമത്തെ വലിയ നഗരമായ ലോസ് ആഞ്ചലസിന്റെ മേയർ തെരഞ്ഞെടുപ്പിൽ രാഷ്ട്രീയനിരീക്ഷകരെ ഒന്നടങ്കം ഞെട്ടിച്ചുകൊണ്ട് മലയാളിയായ നിത്യ വി. രാമന് ചരിത്രവിജയം. അതേസമയം, ചരിത്രപ്രാധാന്യമുള്ള നഗരങ്ങളിൽ സോഷ്യലിസ്റ്റുകൾ അധികാരം പിടിച്ചത് ദുരന്തമായിരിക്കുമെന്ന വിമർശവുമായി അമേരിക്കൻ പ്രസിഡന്റ് ഡോണൾഡ് ട്രംപ് രംഗത്തുവന്നു.
ചൊവ്വാഴ്ച നടന്ന ആവേശകരമായ പോരാട്ടത്തിൽ 52.70 ശതമാനം വോട്ടുകൾ നേടിയാണ് ഡെമോക്രാറ്റിക് സോഷ്യലിസ്റ്റ് നേതാവും സിറ്റി കൗൺസിലറുമായ നിത്യ, നിലവിലെ മേയറും ഡെമോക്രാറ്റിക് പാർട്ടിയിലെ മുതിർന്ന നേതാവുമായ കാരൻ ബാസിനെ (47.30 ശതമാനം വോട്ട്) അട്ടിമറിച്ചത്. ലോസ് ആഞ്ചലസിന്റെ മേയർ പദവിയിലെത്തുന്ന ആദ്യ ഇന്ത്യൻ വംശജയും ആദ്യ ദക്ഷിണേഷ്യക്കാരിയുമാണ് നിത്യ. ഒരുഘട്ടത്തിലും തെരഞ്ഞെടുപ്പിൽ തോറ്റിട്ടില്ലാത്ത രാഷ്ട്രീയ അതികായനായ കാരൻ ബാസിനെതിരേ ചെറുപ്പക്കാരായ വോട്ടർമാരുടെ ശക്തമായ പിന്തുണയോടെയാണ് നിത്യ ഈ വലിയ വിജയം സ്വന്തമാക്കിയത്.
വ്യാഴാഴ്ച സമൂഹമാധ്യമത്തിലൂടെ തോൽവി സമ്മതിച്ച കാരൻ ബാസ്, നിത്യ രാമനെ ഫോണിൽ വിളിച്ച് അഭിനന്ദനങ്ങൾ അറിയിക്കുകയും സുഗമമായ ഭരണമാറ്റം ഉറപ്പാക്കുമെന്ന് വ്യക്തമാക്കുകയും ചെയ്തു.
ന്യൂയോർക്ക് സിറ്റി മേയർ സോഹ്റാൻ മംദാനി, വാഷിംഗ്ടൺ ഡിസി മേയർ ജനീസ് ലൂയിസ് ജോർജ് എന്നിവർക്കു പിന്നാലെ നിത്യ രാമനും വിജയിച്ചതോടെ അമേരിക്കയിലെ പ്രധാന നഗരങ്ങളുടെ ഭരണനേതൃത്വത്തിലേക്ക് ഡെമോക്രാറ്റിക് സോഷ്യലിസ്റ്റ് നേതാക്കൾ എത്തുന്നത് ശ്രദ്ധേയമായ രാഷ്ട്രീയ മാറ്റമായി വിലയിരുത്തപ്പെടുന്നു.
കണ്ണീരണിഞ്ഞ് നിത്യ
വിജയത്തിനുശേഷം ലോസ് ആഞ്ചലസിലെ ഒറിജിനൽ ഫാർമേഴ്സ് മാർക്കറ്റിനു പുറത്ത് മാധ്യമങ്ങളെ കണ്ട നിത്യ രാമൻ വികാരാധീനയായി. ലോസ് ആഞ്ചലസിലെ ജനങ്ങളോട് ഞാൻ ഏറെ കടപ്പെട്ടിരിക്കുന്നു. നഗരത്തെ മഹത്തരമായ ഒരു ഭാവിയിലേക്കു നയിക്കാൻ നമുക്ക് ഒന്നിച്ചു മുന്നോട്ടുപോകാം -നിത്യ രാമൻ പ്രതികരിച്ചു.
നഗരത്തിലെ പാർപ്പിട പ്രതിസന്ധി, ഭവനരഹിതർക്കുള്ള സഹായങ്ങൾ, പൊതുസുരക്ഷ, അടിസ്ഥാനസൗകര്യ വികസനം, ഹോളിവുഡ് മേഖലയിലെ തൊഴിൽ സംരക്ഷണം എന്നിവ പരിഹരിച്ചു നഗരസഭയെ വലിയ മാറ്റങ്ങളോടെ പുനഃസംഘടിപ്പിക്കുകയാണ് തന്റെ ലക്ഷ്യമെന്നു നിത്യ വ്യക്തമാക്കി. പ്രമുഖ ശതകോടീശ്വരൻ റിക്ക് കരുസോ ഉൾപ്പടെയുള്ളവർ നിത്യയ്ക്ക് അഭിനന്ദനങ്ങൾ അറിയിച്ചു.
ജനവിധിയും
കഴിഞ്ഞ വർഷം ലോസ് ആഞ്ചലസിലുണ്ടായ വൻ കാട്ടുതീയും അതിനെത്തുടർന്നുണ്ടായ ദുരന്തങ്ങളുമാണ് തെരഞ്ഞെടുപ്പിൽ ഏറ്റവും നിർണായകമായത്. ഡസൻകണക്കിന് ആളുകളുടെ ജീവനെടുക്കുകയും നിരവധി വീടുകൾ ചാമ്പലാക്കുകയും ചെയ്ത ദുരന്തസമയത്ത് മേയർ കാരൻ ബാസിന്റെ ഭാഗത്തുനിന്നുണ്ടായ വീഴ്ചകളും നഗരസഭയുടെ മോശം ഏകോപനവും വലിയ പ്രതിഷേധത്തിനു കാരണമായിരുന്നു.
വരാനിരിക്കുന്ന 2027 സൂപ്പർ ബൗൾ, 2028 സമ്മർ ഒളിമ്പിക്സ് എന്നിവയ്ക്ക് ആതിഥേയത്വം വഹിക്കുകയെന്നതാണ് പുതിയ മേയറായ നിത്യ രാമന് മുന്നിലുള്ള പ്രധാന ചുമതല.
വിമർശനവുമായി ട്രംപ്
അതേസമയം, രാജ്യത്തെ പ്രധാന നഗരങ്ങളിൽ സോഷ്യലിസ്റ്റ് നേതാക്കൾ അധികാരത്തിൽ വരുന്നത് ചരിത്രം പരിശോധിച്ചാൽ വലിയൊരു ദുരന്തമായിരിക്കുമെന്ന് പ്രസിഡന്റ് ഡോണൾഡ് ട്രംപ് ഓവൽ ഓഫീസിൽ മാധ്യമങ്ങളോടു പ്രതികരിച്ചു.
Tech
ന്യൂയോർക്ക് : മെറ്റായുടെ ജനപ്രിയ ആർട്ടിഫിഷ്യൽ ഇന്റലിജൻസ് ഏജന്റായ 'മ്യൂസ്' ഉപയോക്താക്കൾക്ക് മുന്നിൽ ഇനി നേരിട്ട് സംസാരിക്കും. ടൈപ്പ് ചെയ്യുന്നതിനോ ശബ്ദം മാത്രം കേൾക്കുന്നതിനോ പകരം എഐ കഥാപാത്രങ്ങളുമായി റിയൽ-ടൈം വിഡിയോ കോൾ ചെയ്യാൻ സഹായിക്കുന്ന 'മ്യൂസ് വോയ്സ്' ഫീച്ചർ മെറ്റാ യുഎസിൽ അവതരിപ്പിച്ചു.
മൊബൈൽ ഫോണുകൾ, വെബ്ബ്, മാക് എന്നിവയിൽ ഈ ഫീച്ചർ നിലവിൽ ലഭ്യമാണ്. മെറ്റായുടെ ചീഫ് എഐ ഓഫീസർ അലക്സാണ്ടർ വാംഗ് ആണ് ഈ പുതിയ അപ്ഡേറ്റ് പുറത്തുവിട്ടത്.
എന്തൊക്കെയാണ് പുതിയ പ്രത്യേകതകൾ?
സാധാരണ വോയ്സ് അസിസ്റ്റന്റുകളിൽ നിന്ന് വ്യത്യസ്തമായി മ്യൂസിന് ഒരു മുഖമുണ്ട്. 'ജോളി' എന്ന് പേരിട്ടിരിക്കുന്ന ഒരു ക്യൂട്ട് ആനിമേറ്റഡ് കഥാപാത്രമാണ് ഡിഫോൾട്ടായി വരുന്നത്. ഉപയോക്താക്കളുടെ സംഭാഷണത്തിന്റെ മൂഡിനനുസരിച്ച് ഫേഷ്യൽ എക്സ്പ്രഷനുകൾ നൽകാൻ ഇതിന് സാധിക്കും. കൂടാതെ ഉപയോക്താക്കൾക്ക് ഈ അവതാരത്തെ മനുഷ്യനായോ മൃഗങ്ങളായോ മറ്റ് കഥാപാത്രങ്ങളായോ മാറ്റാനും സാധിക്കും.
സംഭാഷണവും അവതാരത്തിന്റെ ചുണ്ടനക്കങ്ങളും ഭാവങ്ങളും കൃത്യമായി ഒത്തുപോകുന്നുണ്ടെന്ന് ഉറപ്പാക്കാൻ 'Muse Realtime Avatar', 'Muse Realtime Voice' എന്നീ രണ്ട് പുതിയ എഐ മോഡലുകളാണ് മെറ്റാ ഉപയോഗിക്കുന്നത്. വിഡിയോ കോളുകളുടെ ദുരുപയോഗം തടയാൻ 'Meta Video Seal' എന്ന വാട്ടർമാർക്ക് ഉൾപ്പെടുത്തിയിട്ടുണ്ട്. കൂടാതെ 18 വയസിന് മുകളിലുള്ളവർക്ക് മാത്രമേ ഈ സേവനം ഉപയോഗിക്കാൻ അനുമതിയുള്ളൂ.
ഈ വർഷം അവസാനത്തോടെ ചെറിയൊരു തമാഗോച്ചി മോഡൽ വെയറബിൾ ഗാഡ്ജറ്റായ 'മ്യൂസ് ചാം' വിപണിയിലെത്തിക്കാനും മെറ്റാ പ്ലാൻ ചെയ്യുന്നുണ്ട്. ചെറിയൊരു സ്ക്രീനുള്ള ഈ ഡിവൈസ് വഴി ഫോൺ എടുക്കാതെ തന്നെ ഉപയോക്താക്കൾക്ക് തങ്ങളുടെ എഐ അവതാരവുമായി സംസാരിക്കാനും ടാസ്കുകൾ പൂർത്തിയാക്കാനും സാധിക്കും. ഭാവിയിൽ മെറ്റായുടെ സ്മാർട്ട് ഗ്ലാസുകളിലേക്കും ഈ വിഡിയോ കോളിംഗ് ഫീച്ചർ എത്തുന്നതായിരിക്കും.
International
വാഷിംഗ്ടൺ ഡിസി: ട്രംപ് ഭരണകൂടത്തിന്റെ വിലയിരുത്തലായി അമേരിക്കയിൽ ഇന്ന് ഇടക്കാല തെരഞ്ഞെടുപ്പ്. അധികാരത്തിലിരിക്കുന്ന പ്രസിഡന്റിന്റെ ഭരണത്തിനും നയങ്ങൾക്കും ജനങ്ങൾ നൽകുന്ന മറുപടിയാണ് അമേരിക്കയിൽ സാധാരണയായി ഇടക്കാല തെരഞ്ഞെടുപ്പുകൾ.
ജനപ്രതിനിധിസഭയിലെ മുഴുവൻ 435 സീറ്റുകളിലേക്കും സെനറ്റിലെ 34 സീറ്റുകളിലേക്കുമാണ് പോരാട്ടം. സഭകൾക്കു പുറമേ 36 സംസ്ഥാനങ്ങളിലെ 39 ഗവർണർ പദവികളിലേക്കും സംസ്ഥാന നിയമസഭകളിലേക്കും ഇതോടൊപ്പം വോട്ടെടുപ്പ് നടക്കുന്നുണ്ട്.
അടുത്ത പ്രസിഡന്റ് തെരഞ്ഞെടുപ്പിലേക്കുള്ള ദിശാസൂചികയായും ഈ ഫലം മാറും. 435 അംഗ ജനപ്രതിനിധി സഭയിൽ 218-214 എന്ന നേരിയ ഭൂരിപക്ഷവും 100 അംഗ സെനറ്റിൽ 53-47 എന്ന ഭൂരിപക്ഷവുമാണ് നിലവിൽ റിപ്പബ്ലിക്കൻ പാർട്ടിക്കുള്ളത്. ഇരുസഭകളുടെയും ഭരണം പിടിച്ചെടുക്കാൻ ഡെമോക്രാറ്റിക് പാർട്ടിക്ക് ഇനി നാല് സീറ്റുകൾ വീതം അധികമായി വിജയിക്കേണ്ടതുണ്ട്.
സെപ്റ്റംബറിലെ സർവേകൾ പ്രകാരം പ്രസിഡന്റ് ഡോണൾഡ് ട്രംപിന്റെ ജനപ്രീതി താഴ്ന്നത് റിപ്പബ്ലിക്കൻ പാർട്ടിക്കു തിരിച്ചടിയാണ്. വർധിച്ചുവരുന്ന ജീവിതച്ചെലവിൽ അസംതൃപ്തരായ ജനങ്ങളുടെ നിലപാട് തങ്ങൾക്ക് അനുകൂലമാകുമെന്ന പ്രതീക്ഷയിലാണ് ഡെമോക്രാറ്റിക് പാർട്ടി. ഈ തെരഞ്ഞെടുപ്പിൽ മത്സരിക്കുന്നവരിൽ 57 ഇന്ത്യൻ വംശജരായ സ്ഥാനാർഥികളും ഉൾപ്പെടുന്നു.
International
വാഷിംഗ്ടൺ ഡിസി: പേട്രിയറ്റ് വ്യോമപ്രതിരോധ സംവിധാനത്തിൽ ഉപയോഗിക്കുന്ന ഇന്റർസെപ്റ്റർ മിസൈലുകൾ 500 എണ്ണം യുക്രെയ്നു വിൽക്കാൻ അമേരിക്കയിലെ ട്രംപ് ഭരണകൂടം അനുമതി നല്കി.
റഷ്യൻ വ്യോമാക്രമണം നേരിടുന്ന യുക്രെയ്ന് ആശ്വാസം പകരുന്ന കാര്യമാണിതെങ്കിലും ഇന്റർസെപ്റ്റർ മിസൈലുകൾ ഉടനടി ലഭ്യമാകില്ല എന്നാണു റിപ്പോർട്ട്.
റഷ്യൻ മിസൈലുകളെ വെടിവച്ചിടാൻ യുക്രെയ്ന്റെ പക്കലുള്ള ഏക ആയുധമാണ് അമേരിക്കൻ നിർമിത പേട്രിയറ്റ്. ഇതിലുപയോഗിക്കുന്ന മിസൈലുകൾ തീർന്നതിനാൽ യുക്രെയ്ൻ കടുത്ത പ്രതിസന്ധി നേരിടുന്നു. അടുത്തകാലത്ത് റഷ്യൻ മിസൈൽ ആക്രമണത്തിൽ ആൾനാശവും മറ്റു നഷ്ടങ്ങളും വൻതോതിൽ വർധിച്ചിരിക്കുകയാണ്.
അമേരിക്കൻ പ്രസിഡന്റ് ട്രംപ് യുക്രെയ്ൻ പ്രസിഡന്റ് സെലൻസ്കിയോടുള്ള അനിഷ്ടം പ്രകടിപ്പിച്ചിരിക്കേയുണ്ടായ തീരുമാനം അപ്രതീക്ഷിതമായി. 210 കോടി ഡോളറിനാണ് ഇത്രയും പേട്രിയറ്റ് മിസൈലുകൾ യുക്രെയ്നു നല്കുന്നതെന്ന് യുഎസ് വിദേശകാര്യ വകുപ്പ് അറിയിച്ചു.
കാനഡ, ജർമനി, നോർവേ തുടങ്ങിയ മിത്രരാജ്യങ്ങളാണ് യുക്രെയ്നുവേണ്ടി പണം മുടക്കുക. അമേരിക്കൻ ധനസഹായം ഇതിനില്ല.
അമേരിക്കൻ തീരുമാനത്തെ യുക്രെയ്ൻ പ്രസിഡന്റ് സെലൻസ്കി സ്വാഗതം ചെയ്തു. എന്നാൽ, മിസൈലുകൾ ലഭിക്കാൻ വർഷങ്ങൾ എടുക്കുമെന്ന് അദ്ദേഹം കൂട്ടിച്ചേർത്തു.
ഒരു വർഷം 600 പേട്രിയറ്റ് മിസൈലുകളാണ് അമേരിക്കയിലെ ലോക്ക്ഹീഡ് മാർട്ടിൻ കന്പനി ഉത്പാദിപ്പിക്കുന്നത്. ഇറാൻ യുദ്ധത്തിലും ഈ മിസൈൽ വ്യാപകമായി ഉപയോഗിച്ചിരുന്നു.
International
സിയാറ്റിൽ: ഗാന്ധിജിയുടെ പൂർണകായ പ്രതിമ അമേരിക്കയിനെ നോർത്ത് ഡക്കോട്ട സംസ്ഥാനത്ത് സ്ഥാപിച്ചു. തലസ്ഥനമായ ബിസ്മാർക്ക് നഗരത്തിന്റെ മധ്യഭാഗത്ത് പീസ് പാർക്കിലാണ് പ്രതിമ.
നോർത്ത് ഡക്കോട്ടയിലെ ഇന്ത്യൻ സമൂഹത്തിന്റെ പിന്തുണയോടെ സിയാറ്റിലിലെ ഇന്ത്യൻ കോൺസുലേറ്റ് ജനറലാണ് പ്രതിമ സ്ഥാപിച്ചത്. സംസ്ഥാനത്തെ ആദ്യ പൂർണകായ ഗാന്ധിപ്രതിമയാണിത്.
International
വാഷിംഗ്ടൺ ഡിസി: റഷ്യയോടുള്ള സമീപനത്തിൽ മാറ്റം വരുത്താൻ യൂറോപ്യൻ സഖ്യകക്ഷികൾക്ക് അമേരിക്ക നിർദേശം നല്കിയതായി റിപ്പോർട്ട്. റഷ്യയെ പ്രകോപിപ്പിക്കുന്ന പ്രസ്താവനകളിൽനിന്നു വിട്ടുനിൽക്കണം. ചില നേതാക്കളുടെ പ്രസ്താവനകൾ യൂറോപ്യൻ ഭൂഖണ്ഡത്തിന്റെ സുരക്ഷ അപകടത്തിലാക്കും.
അമേരിക്കൻ പ്രതിരോധ വകുപ്പായ പെന്റഗൺ ആണ് ബാൾട്ടിക് രാജ്യങ്ങളായ ലിത്വാനിയ, ലാത്വിയ, എസ്തോണിയ എന്നിവയ്ക്ക് ഇക്കാര്യത്തിൽ നിർദേശം നല്കിയതെന്ന് വിഷയവുമായി ബന്ധപ്പെട്ട വൃത്തങ്ങൾ പറഞ്ഞു.
ഉഭയകക്ഷി ചർച്ചകളിൽ പെന്റഗണിലെ നയരൂപവത്കരണ വിഭാഗം മേധാവി എൽബ്രിഡ്ജ് കോൾബിയാണ് യൂറോപ്യൻ നേതാക്കൾക്കു നിർദേശം നല്കിയത്. റഷ്യയെ അനാവശ്യമായി ‘ചൊറിയേണ്ട’ എന്ന് അദ്ദേഹം പറഞ്ഞതായാണു റിപ്പോർട്ടുകൾ. അതേസമയം, കോൾബിയുടെ വാക്കുകളിൽ അധികാരത്തിന്റെ സ്വരമില്ലായിരുന്നുവെന്നും പറയുന്നു.
അമേരിക്കൻ പ്രസിഡന്റ് ഡോണാൾഡ് ട്രംപ്, യുക്രെയ്ൻ യുദ്ധം അവസാനിപ്പിക്കാൻ വീണ്ടും ശ്രമം നടത്തുന്നതിനിടെയാണ് ഈ നിർണാക നീക്കം.
Tech
റെഡ്മണ്ട്: ആർട്ടിഫിഷ്യൽ ഇന്റലിജൻസ് മേഖലയിലേക്ക് കൂടുതൽ ശ്രദ്ധ കേന്ദ്രീകരിക്കുന്നതിനും പ്രവർത്തനച്ചെലവ് കുറയ്ക്കുന്നതിനുമായി പുതിയ പദ്ധതിയുമായി മൈക്രോസോഫ്റ്റ്. കമ്പനിയിലെ 60,000ത്തോളം വരുന്ന ജീവനക്കാർക്കായി 'വളണ്ടറി എക്സിറ്റ് ഓഫർ' അഥവാ സ്വമേധയാ രാജിവെക്കാനുള്ള പദ്ധതി കമ്പനി പ്രഖ്യാപിച്ചു. സാമ്പത്തിക ആനുകൂല്യങ്ങളോടെ കമ്പനി വിടാൻ അവസരം നൽകുന്നതാണ് ഈ പദ്ധതി.
ചീഫ് പീപ്പിൾ ഓഫീസർ ആമി കോൾമാൻ നൽകിയ ആന്തരിക സന്ദേശത്തിലാണ് ഈ കാര്യം വ്യക്തമാക്കിയിട്ടുള്ളത്. ഇന്ത്യ, യുഎസ്, യുകെ, കാനഡ എന്നീ രാജ്യങ്ങളിലെ യോഗ്യരായ ജീവനക്കാർക്കാണ് ഈ അവസരം ലഭിക്കുക. മൈക്രോസോഫ്റ്റിലെ ആകെ ജീവനക്കാരുടെ കാൽ ഭാഗത്തോളം വരും ഈ സംഖ്യ.
60,000 പേർക്ക് ഓഫർ നൽകിയിട്ടുണ്ടെങ്കിലും ഏകദേശം 3,000-ൽ താഴെ ആളുകൾ (ഏകദേശം 5%) മാത്രമേ ഇത് സ്വീകരിക്കാൻ സാധ്യതയുള്ളൂ എന്ന് മൈക്രോസോഫ്റ്റ് വക്താവും ചീഫ് ഫിനാൻഷ്യൽ ഓഫീസർ ആമി ഹൂഡും വ്യക്തമാക്കി. കമ്പനിയിൽ ലഭ്യമായ മികച്ച വളർച്ചാ സാധ്യതകളാണ് ഇതിന് കാരണമായി ചൂണ്ടിക്കാണിക്കുന്നത്.
യുഎസ്, കാനഡ, ഇന്ത്യ, യുകെ എന്നിവിടങ്ങളിലെ ലെവൽ 70-ഉം അതിനു താഴെയുമുള്ള യോഗ്യരായ ജീവനക്കാർക്ക് ഇതിൽ പങ്കാളികളാകാം.
എക്സ്ബോക്സ് , വിൻഡോസ്, കോപൈലറ്റ് , ഫിനാൻസ് എന്നീ പ്രധാന വിഭാഗങ്ങളിലെ ജീവനക്കാർക്ക് ഈ ഓഫർ ലഭിക്കും. എന്നാൽ ഡാറ്റാ സെന്റർ, സെയിൽസ്, മാർക്കറ്റിംഗ്, സൈബർ സുരക്ഷ, ക്വാണ്ടം കമ്പ്യൂട്ടിംഗ് എന്നീ വിഭാഗങ്ങളിലുള്ളവരെ ഇതിൽ നിന്ന് ഒഴിവാക്കിയിട്ടുണ്ട്.
രാജിവെക്കാൻ താല്പര്യമുള്ള ജീവനക്കാർക്ക് ഡിസംബർ ആദ്യവാരം വരെ തീരുമാനമെടുക്കാൻ സമയമുണ്ട്. ഓഫർ സ്വീകരിക്കുന്നവർ ഈ വർഷാവസാനത്തോടെ കമ്പനിയിൽ നിന്ന് വിടുതൽ നേടേണ്ടിവരും. സേവനകാലയളവും തസ്തികയും അനുസരിച്ച് മികച്ച സാമ്പത്തിക പാക്കേജും കരിയർ പ്ലാനിംഗ് സഹായങ്ങളും കമ്പനി വാഗ്ദാനം ചെയ്യുന്നുണ്ട്.
National
ന്യൂഡല്ഹി: പശ്ചിമേഷ്യന് സംഘര്ഷം ആരംഭിച്ചതിന് പിന്നാലെ 22 ഇന്ത്യക്കാര്ക്ക് ജീവന് നഷ്ടമായതായി കേന്ദ്ര വിദേശകാര്യ മന്ത്രാലയം. ഇതില് 14 പേര് നാവികരാണ്. പശ്ചിമേഷ്യൻ സംഘർഷത്തിൽ ആശങ്കയുണ്ടെന്നും ഇന്ത്യൻ സമൂഹത്തിന്റെ സുരക്ഷയും ക്ഷേമവും ഉറപ്പുവരുത്താനായി നിരന്തരം ബന്ധം പുലർത്തുന്നുണ്ടെന്നും വിദേശകാര്യ വക്താവ് രൺദീർ ജയ്സ്വാൾ അറിയിച്ചു.
സൗദിയിൽ മൂന്ന് ഇന്ത്യൻ പൗരന്മാർക്കാണ് ജീവൻ നഷ്ടമായത്. മേഖലയില് കടുത്ത ശത്രുത തുടരുന്ന സാഹചര്യത്തില് പ്രവാസികളുടെ സുരക്ഷയ്ക്കായി ചെയ്യാന് കഴിയുന്നതിന്റെ പരമാവധി ചെയ്യുന്നുണ്ടെന്നും രൺദീർ ജയ്സ്വാൾ കൂട്ടിച്ചേർത്തു.
International
ടെഹ്റാന്: പശ്ചിമേഷ്യൻ സംഘർഷങ്ങൾക്കിടെ ഇറാന് വീണ്ടും മുന്നറിയിപ്പുമായി യുഎസ് പ്രസിഡന്റ് ഡോണൾഡ് ട്രംപ്. സമാധാന കരാറിലെത്തിയില്ലെങ്കില് ഇറാനെതിരായ നാളെത്തന്നെ ആക്രമണം ഉണ്ടാകുമെന്നാണ് ട്രംപിന്റെ മുന്നറിയിപ്പ്. ഒരു 'എപ്പിക് ഫ്യൂറി' ആക്രമണം കൂടി നടത്തിയേക്കാം, അല്ലെങ്കിൽ അവർ കരാറിന് തയാറാകണം. ബുദ്ധിയുള്ളവരാണെങ്കിൽ അവർ ചർച്ചയ്ക്ക് മുന്നോട്ടുവരും എന്നാണ് ട്രംപ് പറഞ്ഞത്.
എന്നാല് സമാധാന ചര്ച്ചകളെ തകര്ക്കുന്നത് യുഎസ് ആണെന്ന് ഇറാന് പ്രസിഡന്റ് മസൂദ് പെസെഷ്കിയാന് കുറ്റപ്പെടുത്തി. യുഎസ് ഭീരുക്കളാണെന്നും എല്ലാം നശിപ്പിക്കുന്നത് അവരാണെന്നും അദ്ദേഹം കൂട്ടിച്ചേർത്തു.
കഴിഞ്ഞ ഫെബ്രുവരിയിലാണ് യുഎസും ഇസ്രയേലും ചേർന്ന് ഇറാനെതിരെ ഓപ്പറേഷൻ എപ്പിക് ഫ്യൂറി എന്ന പേരിൽ സംയുക്ത സൈനിക ആക്രമണം ആരംഭിച്ചത്. ഈ ആക്രമണത്തിൽ ഇറാന്റെ പരമോന്നത നേതാവായിരുന്ന ആയത്തുള്ള അലി ഖമനെയിയും കുടുംബാംഗങ്ങളും കൊല്ലപ്പെട്ടിരുന്നു.
International
കീവ്: റഷ്യ-യുക്രെയ്ൻ-അമേരിക്ക പ്രതിനിധികൾ നവംബർ പകുതിക്കു മുന്പായി അബുദാബിയിൽ സാങ്കേതികതല ചർച്ചയ്ക്കു സമ്മതിച്ചതായി യുക്രെയ്ൻ പ്രസിഡന്റ് സെലൻസ്കി അറിയിച്ചു.
യുദ്ധം അവസാനിപ്പിക്കാനായി അമേരിക്കയിലെ ട്രംപ് ഭരണകൂടം വീണ്ടും നടത്തുന്ന ശ്രമങ്ങളുടെ ഭാഗമായിട്ടാണിത്. ട്രംപിന്റെ ദൂതൻ സ്റ്റീവ് വിറ്റ്കോഫ് അടുത്തിടെ സെലൻസ്കിയെയും റഷ്യൻ പ്രസിഡന്റ് പുടിനെയും കണ്ടിരുന്നു.
ഈ ചർച്ചയ്ക്കു പിന്നാലെ രാജ്യത്തലവന്മാരുടെ കൂടിക്കാഴ്ച ഉണ്ടായേക്കുമെന്നാണു പ്രതീക്ഷയെന്നും സെലൻസ്കി കൂട്ടിച്ചേർത്തു.
അതേസമയം, സാങ്കേതികതല ചർച്ച അബുദാബിയിലോ സ്വിറ്റ്സർലൻഡിലോ ആയിരിക്കുമെന്നാണ് അമേരിക്കൻ വൃത്തങ്ങൾ പറഞ്ഞത്.
ഒലെഷ്്കിയിലെ വെടിനിർത്തൽ ചൊവ്വാഴ്ച മുതൽ
ഇതിനിടെ, ഒലെഷ്കി നഗരത്തിൽ റഷ്യയും യുക്രെയ്നും സമ്മതിച്ച വെടിനിർത്തൽ ചൊവ്വാഴ്ച ആരംഭിക്കും. ഭക്ഷ്യ പ്രതിസന്ധി നേരിടുന്ന നഗരത്തിൽ മാനുഷിക പരിഗണനയുടെ അടിസ്ഥാനത്തിൽ വെടിനിർത്താൻ ഇരുകൂട്ടരും സമ്മതിക്കുകയായിരുന്നു. അമേരിക്കൻ പ്രഥമ വനിത മെലാനിയ ട്രംപാണ് വെടി നിർത്താൻ മുൻകൈ എടുത്തതെന്ന് റഷ്യയും യുക്രെയ്നും പറഞ്ഞു.
നാലരവർഷം മുന്പ് റഷ്യൻ സേന യുക്രെയ്നിൽ അധിനിവേശം ആരംഭിച്ചപ്പോൾ തന്നെ പിടിച്ചെടുത്ത പ്രദേശങ്ങളിലൊന്നാണിത്.
National
ന്യൂഡല്ഹി: ഇന്ത്യ-യുഎസ് വ്യാപര കരാറിനെതിരേ സമരം ശക്തമാക്കാന് കര്ഷക സംഘടനകള്. യുഎസ് വ്യാപാര കരാറുമായി മുന്നോട്ടുപോയാല് അതിശക്തമായ സമരം നടത്തുമെന്ന് അഖിലേന്ത്യ കിസാന് സഭ (എഐകെഎസ്) വ്യക്തമാക്കി.
വ്യാപാര കരാര് വഴി യുഎസിന് നല്കുന്ന ഇളവുകള് രാജ്യത്തെ കാര്ഷിക മേഖലയെ തകര്ക്കുമെന്നും വന്കിട കോര്പറേറ്റുകള്ക്ക് കാര്ഷികമേഖലയില് സ്വാധീനം ചെലുത്താന് വഴിവയ്ക്കുമെന്നും ചൂണ്ടിക്കാട്ടിയാണ് എഐകെഎസ് രംഗത്ത് വന്നത്.
അമേരിക്കയില് വന്തോതില് സബ്സിഡി ലഭിക്കുന്ന കാര്ഷിക ഉത്പാദകരുമായി മത്സരിക്കാന് ഇന്ത്യയിലെ സാധാരണ കര്ഷകര്ക്ക് സാധിക്കില്ലെന്ന് ഇവര് ചൂണ്ടിക്കാട്ടുന്നു.
കരാറുമായി ബന്ധപ്പെട്ട വിവരങ്ങള് പാര്ലമെന്റില്നിന്ന് സര്ക്കാര് മറച്ചുവയ്ക്കുകയാണെന്ന് കിസാന് സഭ കുറ്റപ്പെടുത്തി. അമേരിക്കയുടെ പാല് ഉത്പന്നങ്ങള് ഇന്ത്യയില് വില്ക്കാനുള്ള ആവശ്യമാണ് കരാറിലെ അവസാന തടസമെന്നും കരാര് വളരെ അടുത്തെത്തിക്കഴിഞ്ഞെന്നും അമേരിക്കൻ സ്റ്റേറ്റ് സെക്രട്ടറി മാര്ക്കോ റൂബിയോ പ്രസ്താവിച്ച പശ്ചാത്തലത്തിലാണ് എഐകെഎസ് കേന്ദ്രത്തിന് മുന്നറിയിപ്പുമായി രംഗത്തുവന്നത്.
സംയുക്ത കിസാന് മോര്ച്ച ഉള്പ്പടെയുള്ള കര്ഷക സംഘടനകളും പ്രതിഷേധവുമായി രംഗത്തെത്തുമെന്നാണ് അറിയുന്നത്.
International
റിയാദ്: സൗദി അറേബ്യക്ക് സംരക്ഷണമൊരുക്കാൻ യുകെയും രംഗത്തിറങ്ങുമെന്ന് റിപ്പോർട്ടുകൾ. ഹൂതി ആക്രമണങ്ങളിൽ നിന്ന് സൗദിക്ക് സംരക്ഷണം നൽകാനാണ് യുകെയുടെ നീക്കം. ആക്രമണങ്ങളെ ചെറുക്കാൻ സൗദിക്ക് വേണ്ടി യുകെ പോർവിമാനങ്ങൾ വിന്യസിക്കാനാണ് തീരുമാനം.
സൗദി അറേബ്യ കൂടുതൽ രാജ്യങ്ങളുമായി ചർച്ചകൾ നടത്തുന്നതായും റിപ്പോർട്ടുകളുണ്ട്. ഇതിനിടെ സൗദി തലസ്ഥാനമായ റിയാദിലേക്ക് ഹൂതികൾ വീണ്ടും ആക്രമണം നടത്തി. മിസൈലുകൾ തകർത്തതായി സൗദി സേന അറിയിച്ചു.
അതേസമയം സംഘർഷങ്ങൾക്കിടെ മേഖലയിൽ നിർണായക ചർച്ചകൾ നടക്കുകയാണ്. ഫ്രാൻസുമായി യുഎഇ തന്ത്രപ്രധാന പ്രതിരോധ സഹകരണ കരാറിലേക്ക് നീങ്ങുകയാണ്. ഇതിനായി ചട്ടക്കൂട് രൂപീകരിച്ചു.
National
ന്യൂഡൽഹി: യുഎസ് സ്റ്റേറ്റ് സെക്രട്ടറി മാർക്കോ റൂബിയോയുടെ സന്ദർശനവുമായി ബന്ധപ്പെട്ട് ഉയർന്ന വിവാദങ്ങളിൽ ഒടുവിൽ മൗനം വെടിഞ്ഞു വിദേശകാര്യമന്ത്രാലയം. സന്ദർശനത്തിൽ വ്യക്തത വരുത്തിക്കൊണ്ട് മന്ത്രാലയം ഔദ്യോഗിക വിശദീകരണം പുറത്തിറക്കി.
ഈമാസം 20ന് വിദേശകാര്യ മന്ത്രി എസ്. ജയശങ്കർ മാർക്കോ റൂബിയോയുമായി മുംബൈയിൽ കൂടിക്കാഴ്ച നടത്തുമെന്ന് വിദേശകാര്യ വക്താവ് രൺധീർ ജയ്സ്വാൾ സ്ഥിരീകരിച്ചു.
ഇതിനുപുറമെ 19, 20 തീയതികളിൽ യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാനെയും മുംബൈയിൽ ഔദ്യോഗികമായി സ്വീകരിക്കും. 20ന് നടക്കുന്ന അമേരിക്കൻ സ്വാതന്ത്ര്യത്തിന്റെ 250-ാം വാർഷികാഘോഷങ്ങളിൽ മുഖ്യാതിഥിയായി എസ്. ജയ്ശങ്കർ പങ്കെടുക്കുമെന്നും വിദേശകാര്യ മന്ത്രാലയം വ്യക്തമാക്കി.
ദേശീയതലസ്ഥാനമായ ഡൽഹിക്കു പുറത്തുള്ള മറ്റ് പ്രമുഖ നഗരങ്ങളിൽ വച്ച് വിദേശനേതാക്കളെയും പ്രമുഖരെയും സ്വീകരിക്കുന്നത് പുതിയ കാര്യമല്ലെന്നും കഴിഞ്ഞ ഒരു പതിറ്റാണ്ടായി ഇന്ത്യ തുടരുന്ന പതിവുരീതിയാണിതെന്നും മന്ത്രാലയം കൂട്ടിച്ചേർത്തു.
വിവാദങ്ങൾക്കു കാരണം
റൂബിയോയുടെ സന്ദർശനവിവരം വിദേശകാര്യ മന്ത്രാലയം സ്ഥിരീകരിക്കുന്നതിന് മുന്പേതന്നെ ഇന്ത്യയിലെ അമേരിക്കൻ എംബസി വാർത്താക്കുറിപ്പിലൂടെ അറിയിച്ചതാണ് പ്രധാനമായും വിവാദങ്ങൾക്കു വഴിവച്ചത്. ഇതിനുപുറമെ, വിദേശകാര്യ മന്ത്രാലയം നൽകിയ വാർത്താക്കുറിപ്പിൽ പറയുന്ന മുംബൈ സന്ദർശനത്തിനുപുറമെ തലസ്ഥാനമായ ന്യൂഡൽഹി ഒഴിവാക്കി ഗുജറാത്തിലെ ജാംനഗറിലേക്ക് അദ്ദേഹം എത്തുന്നതും വലിയ വിമർശനങ്ങൾക്കു കാരണമായിരുന്നു.
മുംബൈയിൽ നടക്കുന്ന കൂടിക്കാഴ്ചയിൽ ഊർജം, വ്യാപാരം, നിക്ഷേപം, പ്രതിരോധം, അത്യാധുനിക സാങ്കേതികവിദ്യ തുടങ്ങിയ മേഖലകളിൽ ഇരുരാജ്യങ്ങളും തമ്മിലുള്ള സഹകരണം വർധിപ്പിക്കാൻ ചർച്ചകൾ നടക്കും.
ജാംനഗറിൽ അംബാനി കുടുംബം വരവേൽക്കും
അതേസമയം, റിലയൻസ് ഇൻഡസ്ട്രീസിന്റെ ലോകത്തിലെ ഏറ്റവും വലിയ സിംഗിൾ-സൈറ്റ് റിഫൈനറി സ്ഥിതി ചെയ്യുന്ന ജാംനഗറിലേക്കുള്ള റൂബിയോയുടെ യാത്രയ്ക്ക് വലിയ രാഷ്ട്രീയ-സാമ്പത്തിക പ്രാധാന്യമുണ്ട്. സന്ദർശനവേളയിൽ അംബാനി കുടുംബം അദ്ദേഹത്തിനായി വൻ സ്വീകരണമൊരുക്കുമെന്നും റിപ്പോർട്ടുകളുണ്ട്.
ടെക്സസിലെ ബ്രൗൺസ്വില്ലെയിൽ റിലയൻസ് നിർമിക്കുന്ന റിഫൈനറി നിക്ഷേപത്തെക്കുറിച്ച് കഴിഞ്ഞ മാർച്ചിൽ യുഎസ് പ്രസിഡന്റ് ഡോണൾഡ് ട്രംപ് പ്രഖ്യാപിച്ചിരുന്നെങ്കിലും ഇതിന്റെ കൃത്യമായ വിവരങ്ങൾ പുറത്തുവന്നിരുന്നില്ല.
National
ന്യൂഡൽഹി: ഇന്ത്യ- അമേരിക്ക വ്യാപാര കരാറിന്റെ ആദ്യഘട്ടത്തിന് അന്തിമരൂപമായതായും കരട് കരാറിന്റെ രൂപീകരണം അതിവേഗം പുരോഗമിക്കുകയാണെന്നും കേന്ദ്ര വാണിജ്യമന്ത്രി പീയുഷ് ഗോയൽ.
വ്യാപാരക്കരാറിന്റെ ആദ്യ ഘട്ടം പൂർണതയിലേക്ക് എത്തിക്കൊണ്ടിരിക്കുകയാണ്. മറ്റു രാജ്യങ്ങളെ അപേക്ഷിച്ച് നമുക്ക് അനുകൂലമായതോ മത്സരക്ഷമതയുള്ളതോ ആയ സാഹചര്യം ലഭിച്ചാലുടന് കരാര് അന്തിമമാക്കാൻ കഴിയുമെന്നാണു പ്രതീക്ഷയെന്നും മന്ത്രി പറഞ്ഞു.
ഡല്ഹിയില് നടന്ന എസ്ആര്സിസി സെന്റനറി കോണ്ക്ലേവിലായിരുന്നു മന്ത്രിയുടെ പ്രതികരണം.
International
വാഷിംഗ്ടൺ ഡിസി: യുഎസ് ഇടക്കാല തെരഞ്ഞെടുപ്പിനെ സ്വാധീനിക്കുക ലക്ഷ്യമിട്ട് രാജ്യാന്തര എണ്ണ വില ഉയർത്താൻ ഇറാൻ നീക്കം നടത്തുന്നതായി റിപ്പോർട്ട്. ഇതിന്റെ ഭാഗമായി ഹോർമുസ് കടലിടുക്കിലൂടെയുള്ള ചരക്കുനീക്കം തടസപ്പെടുത്താനും കപ്പലുകൾക്ക് നേരെ ആക്രമണങ്ങൾ കടുപ്പിക്കാനുമാണ് ടെഹ്റാന്റെ പുതിയ തന്ത്രം. വാർത്താ ഏജൻസിയായ റോയിട്ടേഴ്സാണ് ഈ വിവരം പുറത്തുവിട്ടത്.
യുഎസിനും ഇസ്രയേലിനുമെതിരായ സംഘർഷങ്ങളുടെ പശ്ചാത്തലത്തിൽ ഹോർമുസ് കടലിടുക്കിന്റെ പൂർണ നിയന്ത്രണം പിടിച്ചെടുക്കാനുള്ള ശ്രമങ്ങൾ ഇറാൻ നേരത്തെ തന്നെ ആരംഭിച്ചിരുന്നു. ഇതിന്റെ തുടർച്ചയെന്നോണം, നിയന്ത്രണങ്ങൾ ലംഘിച്ച് മുന്നോട്ടുപോകുന്ന കപ്പലുകൾ ലക്ഷ്യമിട്ട് വ്യത്യസ്തമായ ആക്രമണരീതികൾ കഴിഞ്ഞ പത്ത് ദിവസത്തിനിടയിൽ ഇറാൻ പ്രയോഗിച്ചു തുടങ്ങിയതായി ഒരു മുതിർന്ന ഇറാൻ ഉദ്യോഗസ്ഥൻ വെളിപ്പെടുത്തി.
എണ്ണ വില പിടിച്ചുനിർത്താൻ യുഎസും സഖ്യകക്ഷികളും നടത്തുന്ന നിരന്തരമായ ശ്രമങ്ങളെ പൊളിച്ചടുക്കുകയാണ് ഈ നീക്കത്തിലൂടെ ഇറാൻ ലക്ഷ്യമിടുന്നത്.
National
ന്യൂഡൽഹി: ഇന്ത്യൻ ഐടി കമ്പനികളെ പെർമനന്റ് ലേബർ സർട്ടിഫിക്കേഷൻ പ്രോഗ്രാമിൽനിന്നു സസ്പെൻഡ് ചെയ്ത അമേരിക്കൻ നടപടിയെ വിമർശിച്ച് ഇന്ത്യ. ഇരുരാജ്യങ്ങളുടെയും പൊതുവായ ലക്ഷ്യങ്ങൾ കൈവരിക്കാൻ ഈ നടപടി സഹായിക്കില്ല.
അമേരിക്കൻ പ്രസിഡന്റ് ജെ.ഡി. വാൻസ് വിദേശ പ്രഫഷണലുകളെ അടിമപ്പണിക്കാരെന്നു വിശേഷിപ്പിച്ചത് തികച്ചും അനാവശ്യവും അങ്ങേയറ്റം അപമാനകരവുമാണെന്ന് ഇന്ത്യ അറിയിച്ചു. വിദേശ പ്രഫഷണലുകളുടെ എണ്ണം കുറയ്ക്കുന്നതിന്റെ ഭാഗമായാണു ട്രംപ് ഭരണകൂടം എട്ടു പ്രമുഖ ഐടി കമ്പനികളെ പെർമനന്റ് ലേബർ സർട്ടിഫിക്കേഷൻ പ്രോഗ്രാമിൽനിന്നു സസ്പെൻഡ് ചെയ്തത്. ഇന്ത്യ-യുഎസ് ബന്ധത്തിലെ ഉലച്ചിലിനിടെയാണുപുതിയ തീരുമാനം.
എച്ച്1ബി വീസയിൽ ജോലി ചെയ്യാനെത്തുന്ന വിദേശികളായ ഇന്ത്യൻ ഐടി പ്രഫഷണലുകൾക്ക് സ്ഥിരതാമസാനുമതിയായ ഗ്രീൻ കാർഡിന് അപേക്ഷിക്കാൻ തടസമാകുന്ന നടപടിയാണിത്. കോഗ്നിസന്റ്, ഇൻഫോസിസ്, ടിസിഎസ്, വിപ്രോ, എച്ച്സിഎൽ എന്നീ ഇന്ത്യൻ കമ്പനികളെയാണ് പെർമനന്റ് ലേബർ സർട്ടിഫിക്കേഷൻ പ്രോഗ്രാമിൽനിന്നു സസ്പെൻഡ് ചെയ്തിരിക്കുന്നത്.
പെർമനന്റ് ലേബർ സർട്ടിഫിക്കേഷനു പുറത്തുള്ള കമ്പനികൾക്ക് അവരുടെ ജീവനക്കാർക്കായി ഗ്രീൻ കാർഡിന് അപേക്ഷിക്കാനാകില്ല. ഇരുരാജ്യങ്ങൾക്കും വലിയ തോതിൽ പരസ്പര നേട്ടമുണ്ടാക്കുന്ന മേഖലയാണ് ഐടി. എല്ലാവരും ഇക്കാര്യം മനസിലാക്കുമെന്ന് പ്രതീക്ഷിക്കുന്നു.
യുഎസ് പ്രഖ്യാപിച്ച നടപടികൾ ഇരുരാജ്യങ്ങളുടെയും പൊതുവായ ലക്ഷ്യങ്ങളെ മുന്നോട്ടു കൊണ്ടുപോകാൻ സഹായിക്കില്ലെന്ന് വിദേശകാര്യമന്ത്രാലയം പ്രസ്താവനയിൽ പറഞ്ഞു.
Business
മുംബൈ: ഇന്ത്യൻ ഓഹരി വിപണി ഇന്നലെ വൻ തിരിച്ചുവരവ് നടത്തി. ക്രൂഡ് ഓയിൽ വിലയിലുണ്ടായ കുറവ്, ഐടി ഓഹരികളിലുണ്ടായ ഉയർന്ന വാങ്ങൽ തുടങ്ങി വിവിധ ഘടകങ്ങൾ സെൻസെക്സിലും നിഫ്റ്റിയിലും ശക്തമായ മുന്നേറ്റത്തിന് വഴിയൊരുക്കുകയും എട്ട് ആഴ്ച നീണ്ടുനിന്ന നഷ്ടത്തിന്റെ പരന്പരയ്ക്ക് വിരാമമിടുകയും ചെയ്തു. വ്യാഴാഴ്ചയിലെ വ്യാപാര ദിനത്തിലെ കനത്ത തകർച്ചയ്ക്ക് ശേഷമാണ് വിപണിയുടെ ഈ തിരിച്ചുവരവ്.
സെൻസെക്സ് 850 പോയിന്റിലധികം ഉയർന്ന് 72,472ലും നിഫ്റ്റി 50 സൂചിക 280 പോയിന്റിലധികം നേട്ടമുണ്ടാക്കി 22,520ലും വ്യാപാരം അവസാനിപ്പിച്ചു. ഈ ശക്തമായ നേട്ടം ബിഎസ്ഇയിൽ ലിസ്റ്റ് ചെയ്തിട്ടുള്ള എല്ലാ കന്പനികളുടെയും ആകെ വിപണി മൂല്യത്തിൽ 4 ലക്ഷം കോടിയിലധികം രൂപയുടെ വർധനയുണ്ടാക്കി. ഇത് ആകെ മൂല്യം 465 ലക്ഷം കോടി രൂപയായി ഉയർത്തി.
മേഖലകൾ പരിശോധിച്ചാൽ, നിഫ്റ്റി ഐടി മൂന്നു ശതമാനം ഉയർന്ന് നേട്ടത്തിന് നേതൃത്വം നൽകിയപ്പോൾ നിഫ്റ്റി എഫ്എംസിജി, നിഫ്റ്റി പിഎസ്യു ബാങ്ക്, നിഫ്റ്റി പ്രൈവറ്റ് ബാങ്ക്, നിഫ്റ്റി റിയൽറ്റി, നിഫ്റ്റി ഫിനാൻഷ്യൽ സർവീസസ് തുടങ്ങി മറ്റ് പല മേഖലകളും നേട്ടമുണ്ടാക്കി. നിഫ്റ്റി ഓയിൽ ആൻഡ് ഗ്യാസ് മാത്രമാണ് നഷ്ടത്തിലായ ഏക മേഖല. വിപണിയിലെ അനിശ്ചിതത്വം അളക്കുന്ന ’ഇന്ത്യ വിക്സ്’ ആറു ശതമാനം കുറഞ്ഞു.
വിപണിയുടെ തിരിച്ചുവരവിനു കാരണങ്ങൾ
1) മിഡ്ടേം തെരഞ്ഞെടുപ്പ് വരെ ഇറാനെതിരെ ആക്രമണമില്ലെന്ന് ട്രംപ്
നവംബറിൽ നടക്കുന്ന കോണ്ഗ്രസ് മിഡ്ടേം തെരഞ്ഞെടുപ്പിന് മുന്പ് യുഎസ് ഇറാനെ ആക്രമിക്കില്ലെന്ന് വ്യാഴാഴ്ച യുഎസ് പ്രസിഡന്റ് ഡോണാൾഡ് ട്രംപ് പറഞ്ഞു. സംഘർഷം അവസാനിപ്പിക്കുന്നതിനായി ഇരുരാജ്യങ്ങളും തമ്മിൽ ഫലപ്രദമായ ചർച്ചകൾ നടക്കുന്നുണ്ടെന്നും അദ്ദേഹം കൂട്ടിച്ചേർത്തു.
2) ഐടി ഓഹരികളിൽ ശക്തമായ വാങ്ങൽ
ഐടി ഓഹരികളിലുണ്ടായ കനത്ത കുതിപ്പ് സെൻസെക്സിനെയും നിഫ്റ്റിയെയും ഉയരങ്ങളിലേക്ക് നയിച്ചു. ടാറ്റ കണ്സൾട്ടൻസി സർവീസസ് രണ്ടാം പാദത്തിൽ അവരുടെ ഏകീകൃത അറ്റാദായത്തിൽ 15 ശതമാനം വാർഷിക വളർച്ചയോടെ 13,884 കോടി രൂപ നേടിയെന്ന് റിപ്പോർട്ട് ചെയ്തുകൊണ്ട് ഐടി പ്രവർത്തനഫല പ്രഖ്യാപനങ്ങൾക്ക് തുടക്കമിട്ടു.
3) എണ്ണവില കുറഞ്ഞു
ട്രംപിന്റെ പ്രഖ്യാപനത്തെ തുടർന്ന് ബ്രെന്റ് ക്രൂഡ് ഫ്യൂച്ചേഴ്സ് ബാരലിന് 103 ഡോളറിന് താഴെയാവുകയും ഡബ്ല്യുടിഐ ക്രൂഡ് ഫ്യൂച്ചേഴ്സ് ബാരലിന് 90 ഡോളറിനടുത്ത് വ്യാപാരം നടത്തുകയും ചെയ്തു.
4) രൂപയുടെ മൂല്യം വർധിച്ചു
യുഎസ് ഡോളർ ദുർബലമായതും റിസർവ് ബാങ്ക് നടത്തിയ ഇടപെടലുകളും കാരണം ഇന്നലെ രൂപയുടെ മൂല്യം ഉയർന്നു. വ്യാപാരം പൂർത്തിയായപ്പോൾ രൂപയുടെ മൂല്യം 16 പൈസ ഉയർന്ന് 96.72 എന്ന നിലയിലെത്തി.
5) ബോണ്ട് യീൽഡുകൾ ശാന്തമാകുന്നു
ആഗോള ബോണ്ട് വിറ്റഴിക്കൽ അല്പം കുറഞ്ഞതോടെ ബോണ്ട് യീൽഡുകൾ വർഷങ്ങളിലെ ഉയർന്ന നിരക്കിൽ നിന്ന് താഴേക്ക് പോയി. യുഎസ് 30 വർഷ ബോണ്ട് യീൽഡ് 5.6 ശതമാനത്തിന് താഴെയെത്തി. ബെഞ്ച്മാർക്ക് 10 വർഷ നോട്ടുകളുടെ യീൽഡ് 5.2 ശതമാനമായും രണ്ട് വർഷത്തെ നോട്ടുകളുടേത് 4.75 ശതമാനമായും കുറഞ്ഞു.
6) സാങ്കേതിക തിരിച്ചു വരവ്
വ്യാഴാഴ്ച നിഫ്റ്റി പ്രധാന സാങ്കേതിക ലെവലുകൾ തകർത്ത് പുതിയ 52 ആഴ്ചയിലെ താഴ്ന്ന നിലവാരത്തിലെത്തിയത് ഒരു ടെക്നിക്കൽ റീബൗണ്ടിന് കളമൊരുക്കി.
International
വാഷിംഗ്ടൺ ഡിസി/ന്യൂഡൽഹി: ഇന്ത്യ-യുഎസ് നയതന്ത്രബന്ധം കൂടുതൽ വഷളാകുന്നു. റഷ്യൻ എണ്ണ വാങ്ങുന്നതിനെച്ചൊല്ലി വ്യാപാരചർച്ചകൾ അനിശ്ചിതത്വത്തിലായിരിക്കെ അമേരിക്കയിൽ ജോലി ചെയ്യുന്ന വിദേശ വിദഗ്ധർക്കു ഗ്രീൻ കാർഡ് (സ്ഥിരതാമസ അനുമതി) നൽകുന്നതിനുള്ള പ്രധാന പ്രക്രിയയായ പെർമനന്റ് ലേബർ സർട്ടിഫിക്കേഷൻ (പിഇആർഎം) പ്രോഗ്രാമിൽനിന്ന് പ്രമുഖ ഇന്ത്യൻ, ആഗോള ഐടി കമ്പനികളെ താത്കാലികമായി സസ്പെൻഡ് ചെയ്ത ട്രംപ് ഭരണകൂടത്തിന്റെ നടപടി ബന്ധം കൂടുതൽ അസ്വാരസ്യങ്ങൾക്കു വഴിവച്ചിരിക്കുകയാണ്.
ടിസിഎസ് , ഇൻഫോസിസ്, വിപ്രോ, എച്ച്സിഎൽ ടെക്, കോഗ്നിസന്റ് തുടങ്ങിയ പ്രമുഖ ഇന്ത്യൻ ഐടി ഭീമന്മാർക്കുപുറമെ മൈക്രോസോഫ്റ്റ്, അഡോബ്, ക്യാപ്ജെമിനി എന്നീ എട്ട് വൻകിട ടെക്നോളജി കമ്പനികൾക്കെതിരേയാണ് യുഎസ് തൊഴിൽ വകുപ്പ് നടപടി സ്വീകരിച്ചത്. ഇനി ഒരു അറിയിപ്പ് ഉണ്ടാകുന്നതുവരെ ഈ കമ്പനികളിൽനിന്നുള്ള പുതിയ പിഇആർഎം അപേക്ഷകൾ സ്വീകരിക്കുകയോ നിലവിലുള്ളവ പ്രോസസ് ചെയ്യുകയോ ചെയ്യില്ലെന്ന് യുഎസ് അധികൃതർ വ്യക്തമാക്കിക്കഴിഞ്ഞു.
അടുത്തിടെ വിദേശകാര്യ മന്ത്രി എസ്. ജയ്ശങ്കർ, വിദേശ തൊഴിലാളികൾക്കെതിരേ അമേരിക്ക നടത്തുന്ന നീക്കങ്ങളും എച്ച്-1ബി വീസയിലെ പ്രതിസന്ധികളും ഇരുരാജ്യങ്ങളും തമ്മിലുള്ള നയതന്ത്രബന്ധത്തിൽ വലിയ വെല്ലുവിളിയാണെന്നു ചൂണ്ടിക്കാണിച്ചിരുന്നു. അമേരിക്കൻ സാമ്പത്തിക വ്യവസ്ഥയിലേക്ക് ഇന്ത്യൻ ഐടി കമ്പനികൾ നൽകുന്ന വൻ സംഭാവനകൾ തള്ളിക്കളഞ്ഞുകൊണ്ട് ഭരണകൂടം സ്വീകരിക്കുന്ന ഇത്തരം കടുപ്പമേറിയ നിലപാടുകൾ ഇന്ത്യ-യുഎസ് സാമ്പത്തിക-വ്യാപാര അന്തരീക്ഷത്തെ വഷളാക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
ട്രംപ് ഭരണകൂടത്തിന്റെ ആരോപണം
വിദേശ തൊഴിലാളികളെ കുറഞ്ഞ വേതനത്തിൽ വൻതോതിൽ നിയമിക്കുന്നതുവഴി അമേരിക്കക്കാർക്കു ലഭിക്കേണ്ട തൊഴിലവസരങ്ങൾ ഇല്ലാതാക്കുന്നുവെന്നും വീസ സമ്പ്രദായം ദുരുപയോഗം ചെയ്യുന്നുവെന്നുമാണ് ട്രംപ് ഭരണകൂടത്തിന്റെ പ്രധാന ആരോപണം.
അമേരിക്കൻ തൊഴിലാളികളെ പിരിച്ചുവിട്ട് വിദേശ ജീവനക്കാരെ പകരം വയ്ക്കുന്നത് അംഗീകരിക്കാനാകില്ലെന്നും അമേരിക്കക്കാരുടെ തൊഴിലവസരങ്ങൾ സംരക്ഷിക്കാനാണ് ഈ സസ്പെൻഷനെന്നും യുഎസ് വൈസ് പ്രസിഡന്റ് ജെ.ഡി. വാൻസും തൊഴിൽ വകുപ്പ് ഉദ്യോഗസ്ഥരും തുറന്നടിച്ചു.
എച്ച്-1ബി വീസക്കാരെ എങ്ങനെ ബാധിക്കും?
അമേരിക്കയിൽ വിദേശ ജീവനക്കാർക്ക് ഗ്രീൻ കാർഡിനായി അപേക്ഷിക്കുന്നതിന് തൊഴിൽ വകുപ്പിൽനിന്നു നേടേണ്ട ഏറ്റവും പ്രധാനപ്പെട്ട ആദ്യഘട്ട സാക്ഷ്യപത്രമാണ് പിഇആർഎം. താത്കാലിക തൊഴിൽ വീസയായ എച്ച്-1ബി വീസകളിൽനിന്ന് ഇതു വ്യത്യസ്തമാണ്.
ഈ നടപടി നിലവിലുള്ള എച്ച്-1ബി വീസകളെ നേരിട്ട് റദ്ദാക്കില്ല. ജീവനക്കാർക്കു നിലവിലെ വീസയിൽ തുടർന്ന് ജോലി ചെയ്യാം.
പിഇആർഎം പ്രോസസിംഗ് തടസ്സപ്പെടുന്നതോടെ എച്ച്-1ബി വീസയിൽനിന്ന് ഗ്രീൻ കാർഡിലേക്കു മാറാൻ കാത്തിരിക്കുന്ന പതിനായിരക്കണക്കിന് ഇന്ത്യൻ വിദഗ്ധ തൊഴിലാളികളുടെയും അവരുടെ കുടുംബങ്ങളുടെയും ഗ്രീൻ കാർഡ് സ്വപ്നങ്ങൾ വലിയ അനിശ്ചിതത്വത്തിലാകും.
എച്ച്-1ബി വീസയുടെ പരമാവധി കാലാവധിയായ ആറു വർഷം പൂർത്തിയാകുന്ന ഘട്ടത്തിൽ പിഇആർഎം പ്രോസസിംഗ് ആരംഭിച്ചവർക്കു മാത്രമേ സാധാരണയായി വീസ നീട്ടി ലഭിക്കാറുള്ളൂ. പുതിയ സസ്പെൻഷൻ കാരണം ഈ ഘട്ടത്തിലുള്ളവർക്ക് വീസ നീട്ടിയെടുക്കാൻ പ്രയാസം നേരിട്ടേക്കാം.
റിക്രൂട്ട്മെന്റിനെ ബാധിക്കില്ലെന്നു ടിസിഎസ്
യുഎസ് സർക്കാരിന്റെ വിലക്ക് തങ്ങളുടെ പ്രവർത്തനങ്ങളെയോ തൊഴിൽ തന്ത്രങ്ങളെയോ ഉപഭോക്തൃ സേവനങ്ങളെയോ ബാധിക്കില്ലെന്ന് പ്രമുഖ ഇന്ത്യൻ ഐടി ഭീമനായ ടാറ്റാ കൺസൾട്ടൻസി സർവീസസ് (ടിസിഎസ്) വ്യക്തമാക്കി. കഴിഞ്ഞ കുറച്ചു വർഷങ്ങളായി പിഇആർഎം പ്രോഗ്രാം വഴി വളരെ കുറഞ്ഞ എണ്ണം അപേക്ഷകൾ മാത്രമാണു സമർപ്പിച്ചിട്ടുള്ളതെന്നും കമ്പനി അറിയിച്ചു.
മാത്രമല്ല, പ്രാദേശിക തൊഴിലവസരം വർധിപ്പിക്കുന്നതിന്റെ ഭാഗമായി അടുത്ത അഞ്ചു വർഷത്തിനുള്ളിൽ യുഎസിൽനിന്ന് 15,000 പേരെ കൂടി പുതുതായി കമ്പനിയിലേക്കു നിയമിക്കുമെന്നും ടിസിഎസ് വ്യക്തമാക്കി.
International
വാഷിംഗ്ടൺ ഡിസി: സൈബീരിയയിലെ പ്ലേഗ് ഗവേഷണ കേന്ദ്രത്തിലെ 28 കാരിയായ ജീവനക്കാരിയുടെ മരണവുമായി ബന്ധപ്പെട്ട് കൂടുതൽ വിവരങ്ങൾ പുറത്തുവിടാൻ റഷ്യ തയാറാകണമെന്ന് അമേരിക്കൻ വിദേശകാര്യ സെക്രട്ടറി മാർക്കോ റൂബിയോ ആവശ്യപ്പെട്ടു.സംഭവത്തിൽ അന്താരാഷ്ട്രതലത്തിൽ വലിയ ഊഹാപോഹങ്ങൾ ഉയർന്ന പശ്ചാത്തലത്തിലാണ് അമേരിക്കയുടെ പ്രതികരണം.
‘ലോകത്തിനുമുന്നിൽ കൂടുതൽ കാര്യങ്ങൾ തുറന്നുപറയാൻ റഷ്യ ബാധ്യസ്ഥരാണ്. ഞങ്ങൾ വളരെ ശ്രദ്ധയോടെ, ഓരോ മണിക്കൂറിലും സ്ഥിതിഗതികൾ നിരീക്ഷിച്ചുവരികയാണ് -ഐസ്ലൻഡ് സന്ദർശനത്തിനിടെ മാർക്കോ റൂബിയോ മാധ്യമപ്രവർത്തകരോട് പറഞ്ഞു.
യുവതിയുടെ മരണകാരണത്തെക്കുറിച്ച് അന്വേഷണം നടന്നുവരികയാണെന്നും ഇവരുമായി സമ്പർക്കത്തിൽ വന്നവർക്കാർക്കും ന്യുമോണിക് പ്ലേഗ് ബാധിച്ചിട്ടില്ലെന്നുമാണ് റഷ്യൻ ഉദ്യോഗസ്ഥർ വ്യക്തമാക്കുന്നത്. സൈബീരിയയിലെ ഇർകുട്സ്ക് മേഖലയിൽ ഗവേഷകയുടെ മരണത്തെത്തുടർന്ന് നിരവധി പേരെ നിരീക്ഷണത്തിലാക്കിയതായി വാർത്തകൾ പുറത്തുവന്നിരുന്നു.
ഗവേഷണത്തിനിടെ രോഗാണു അടങ്ങിയ ടെസ്റ്റ് ട്യൂബ് അബദ്ധത്തിൽ പൊട്ടിയതിനെത്തുടർന്നോ അതല്ലെങ്കിൽ വന്യജീവികളിൽ പ്ലേഗ് രോഗം കണ്ടുവരുന്ന മേഖലയിലെ ഫീൽഡ് സന്ദർശനത്തിനുശേഷമോ ആകാം ഇവർക്ക് അണുബാധയുണ്ടായതെന്ന സ്ഥിരീകരിക്കാത്ത റിപ്പോർട്ടുകൾ പുറത്തുവന്നിരുന്നു.
എന്നാൽ റഷ്യൻ അധികൃതർ ഈ വാർത്തകൾ തള്ളി. വ്യക്തമല്ലാത്ത കാരണങ്ങളാലുള്ള ന്യുമോണിയ മൂലം ജീവനക്കാരി മരിച്ചെന്നാണു റഷ്യൻ ആരോഗ്യ ഏജൻസിയായ ‘റോസ്പോട്രെബ്നാഡ്സോർ’ അറിയിച്ചത്.
ലോകാരോഗ്യ സംഘടനയ്ക്കു നൽകിയ ഔദ്യോഗിക പ്രസ്താവനയിൽ, ഇർകുട്സ്ക് നഗരത്തിൽ ഇത്തരം അപകടകരമായ രോഗങ്ങളൊന്നും റിപ്പോർട്ട് ചെയ്തിട്ടില്ലെന്ന് റഷ്യ വ്യക്തമാക്കി. രോഗിയുമായി സമ്പർക്കത്തിൽ വന്നവരെ കണ്ടെത്തി നിരീക്ഷിച്ചുവരികയാണെന്നും ഇതുവരെ ആർക്കും രോഗലക്ഷണങ്ങളില്ലെന്നും ലോകാരോഗ്യസംഘടന വക്താവ് ക്രിസ്റ്റ്യൻ ലിൻഡ്മെയർ അറിയിച്ചു.
സ്ഥിതിഗതികൾ സങ്കീർണമായാൽ റഷ്യയെ സഹായിക്കാൻ തങ്ങൾ സന്നദ്ധരാണെന്ന് യുഎസ് വ്യക്തമാക്കിയപ്പോൾ, തിരിച്ച് അമേരിക്കയിലെ പകർച്ചവ്യാധികൾ പ്രതിരോധിക്കാൻ സഹായിക്കാമെന്ന് റഷ്യ പരിഹാസരൂപേണ മറുപടി നൽകി.
വിഷയം ഗൗരവമായി നിരീക്ഷിക്കുകയാണെന്ന് യുഎസ് പ്രസിഡന്റ് ഡോണൾഡ് ട്രംപും വ്യക്തമാക്കി. ഭീതിയുടെ ആവശ്യമില്ലെന്നും ശരിയായ സമയത്ത് ആന്റിബയോട്ടിക് ചികിത്സ നൽകിയാൽ പ്ലേഗ് പൂർണമായും ഭേദമാക്കാൻ സാധിക്കുമെന്നും ആരോഗ്യ വിദഗ്ധർ ചൂണ്ടിക്കാണിക്കുന്നു.
International
വാഷിംഗ്ടൺ ഡിസി: അമേരിക്കയിലെ ഒഹായോയിൽ പ്രശസ്തമായ ശ്രീ സ്വാമിനാരായൺ വഡ്താൽ ധാം ഹിന്ദു ക്ഷേത്രത്തിന് നേരെ ആക്രമണം. ക്ഷേത്രത്തിന് നേരെ ഇഷ്ടികകളും കല്ലുകളും ഉപയോഗിച്ച് നടത്തിയ അക്രമത്തിൽ ജനൽച്ചില്ലുകൾ തകർന്നതായി അമേരിക്ക ആസ്ഥാനമായി പ്രവർത്തിക്കുന്ന ഹിന്ദു സംഘടനകൾ അറിയിച്ചു.
വെള്ളിയാഴ്ച ഉച്ചയ്ക്കുശേഷമാണ് സംഭവം നടന്നത്. ഈ സമയം ക്ഷേത്രത്തിനകത്ത് പൂജാരിമാരും വിശ്വാസികളും ഉണ്ടായിരുന്നതായി എൻഡിടിവി റിപ്പോർട്ട് ചെയ്തു.
സംഭവത്തിൽ ആർക്കെങ്കിലും പരിക്കേറ്റിട്ടുണ്ടോ എന്ന കാര്യം ഇതുവരെ വ്യക്തമല്ല. ഗ്രേറ്റർ ക്ലീവ്ലാൻഡ് പ്രദേശത്തുള്ള റിച്ച്മണ്ട് ഹൈറ്റ്സിലാണ് ഈ ക്ഷേത്രം സ്ഥിതി ചെയ്യുന്നത്.
Leader Page
ലോകത്തിൽ രണ്ടു വൻശക്തികൾ. അമേരിക്കയും ചൈനയും. അവയുടെ നേതാക്കൾ രണ്ടു ദിവസം ചർച്ച നടത്തി. എന്തുണ്ടായി? ചൈനീസ് പ്രസിഡന്റ് ഷി ചിൻപിംഗ് അമേരിക്ക സന്ദർശിച്ചിട്ട് ഒന്നുമുണ്ടായില്ല - ഒരു സംയുക്ത പ്രസ്താവന പോലും.
ഷി ബെയ്ജിംഗിൽ തിരിച്ചുചെന്ന ശേഷം പിങ് പിങ്, ഫു ഷുവാങ് എന്നീ ജയന്റ് പാണ്ട ഇണകളെ യുഎസിലെ അറ്റ്ലാന്റാ സൂവിലേക്കു 10 വർഷത്തെ വായ്പയായി അയച്ചുകൊടുത്തു. എടുത്തുപറയാവുന്ന കാര്യം അതാണ്. 1972ൽ റിച്ചാർഡ് നിക്സൺ ചൈന സന്ദർശിച്ചപ്പോൾ ഭാര്യ പാറ്റ് അവിടെ കണ്ട ജയന്റ് പാണ്ടകളെ ഇഷ്ടമായെന്ന് പ്രധാനമന്ത്രി ചൗ എൻ ലായിയോടു പറഞ്ഞു. രണ്ടു മാസത്തിനു ശേഷം ചൗ, പാണ്ഡാ ജോഡികളെ വാഷിംഗ്ടണിലേക്ക് അയച്ചുകൊടുത്തു. അര നൂറ്റാണ്ടിനു ശേഷം സമാനമായ ഒരു സമ്മാനം അമേരിക്കക്കാർക്കു ലഭിച്ചു.
►മൂന്നു ധാരണകൾ
വാണിജ്യം സംബന്ധിച്ച മൂന്നു ചെറിയ ധാരണകളാണു നേതൃചർച്ചയിൽ ഉണ്ടായത്.
ഒന്ന്: പരസ്പരം മൊത്തം 6000 കോടി ഡോളറിന്റെ തീരുവ കുറയ്ക്കും. പരസ്പരമുള്ള "വാണിജ്യ വെടിനിർത്തൽ' രണ്ടു മാസംകൂടി നീട്ടി. ചോളം, ഗോതമ്പ്, മണിച്ചോളം, പാലുത്പന്നങ്ങൾ, സസ്യ എണ്ണ, മാംസം, മത്സ്യം, മരം, കോസ്മെറ്റിക്സ് തുടങ്ങിയവയുടെ തീരുവ ചൈന കുറയ്ക്കും. ചീനപ്പാത്രങ്ങൾ, പുതപ്പുകൾ, കിടക്കവിരി, ചെറിയ ഗൃഹോപകരണങ്ങൾ, കളിപ്പാട്ടങ്ങൾ, വെടിക്കെട്ടു സാമഗ്രികൾ, ക്രിസ്മസ് അലങ്കാരം, കൃത്രിമ പൂക്കൾ തുടങ്ങിയവയ്ക്ക് അമേരിക്ക തീരുവ കുറയ്ക്കും.
രണ്ട്: വ്യാപാരകാര്യങ്ങൾ കൈകാര്യം ചെയ്യാൻ ട്രേഡ് കൗൺസിൽ (ബോർഡ് ഓഫ് ട്രേഡ്) സ്ഥാപിക്കും.
മൂന്ന്: നിർമിതബുദ്ധി (എഐ) യുടെ അപായങ്ങളും സാധ്യതകളും വിലയിരുത്താൻ ഉഭയകക്ഷി ചർച്ച തുടങ്ങും. ദേശീയസുരക്ഷയെ ബാധിക്കാവുന്ന എഐ വിഷയങ്ങൾക്കായി പ്രത്യേക കമ്യൂണിക്കേഷൻ ചാനൽ ഉണ്ടാക്കും. എഐ (ആർട്ടിഫിഷ്യൽ ഇന്റലിജൻസ്) യെ എസ്ഐ (സൂപ്പർ ഇന്റലിജൻസ്) എന്നു വിളിക്കാമെന്ന ട്രംപിന്റെ നിർദേശം ഷി സ്വീകരിച്ചു.
►അഭിപ്രായവ്യത്യാസങ്ങൾ തുടരുന്നു
തീരുവകുറയ്ക്കലും മറ്റും വലിയ കാര്യമല്ല. കാതലായ വാണിജ്യവിഷയങ്ങളിലെ സാരമായ അഭിപ്രായവ്യത്യാസം മാറാൻ വഴി തെളിഞ്ഞില്ല. അപൂർവധാതുക്കളുടെ ആഗോള സംസ്കരണ ശേഷിയിൽ 90 ശതമാനത്തോളം ചൈനയിലാണ്.
അമേരിക്കയടക്കമുള്ള പല രാജ്യങ്ങൾക്കും അപൂർവധാതു കാന്തങ്ങൾ നൽകുന്നത് ചൈന നിയന്ത്രിച്ചു. തന്ത്രപ്രധാനമായ പല മേഖലകളിലും (ഇലക്ട്രിക് വാഹനങ്ങൾ, മിസൈലുകൾ, റോക്കറ്റുകൾ, വിമാനങ്ങൾ...) തന്മൂലം അമേരിക്ക ഞെരുക്കത്തിലായി. ഇറാനും റഷ്യക്കും എതിരായ ഉപരോധത്തിൽ ചേരാനുള്ള യുഎസ് ആവശ്യത്തോട് ഷി അനുകൂലമായി പ്രതികരിച്ചിട്ടുമില്ല.
►ഹോട്ട് ലൈൻ തുടങ്ങുന്നു
എഐയിൽ ചൈനയേക്കാൾ ബഹുകാതം മുന്നിലാണ് അമേരിക്ക എന്ന് ട്രംപ് ആവർത്തിച്ച് അവകാശപ്പെടുന്നുണ്ടെങ്കിലും ചൈനയെ തുല്യരായി കണക്കാക്കിയുള്ള ധാരണയാണ് വാഷിംഗ്ടൺ ചർച്ചകളിൽ ഉണ്ടായത് (അതു ദേശീയ സുരക്ഷയ്ക്കു ഭീഷണിയാകും എന്നു ചിലർ മുന്നറിയിപ്പ് നൽകുന്നുണ്ട്). ഇതിന്റെ തുടർച്ചയായ യുഎസ്-ചൈന സൂപ്പർ ഇന്റലിജൻസ് ഡയലോഗ് നവംബറിൽ ആരംഭിക്കും.
ശീതയുദ്ധകാലത്തെ വാഷിംഗ്ടൺ- മോസ്കോ ഹോട്ട് ലൈനു സമാനമായ ഒന്നാണ് നിർദിഷ്ട കമ്യൂണിക്കേഷൻ ചാനൽ. ദേശീയ സുരക്ഷയെ ബാധിക്കുന്ന വിഷയങ്ങൾ ഉണ്ടാകുമ്പോൾ പെട്ടെന്നു ബന്ധപ്പെടാനും മുന്നറിയിപ്പ് നൽകാനുമാണിത്. ഏതെല്ലാം കാര്യങ്ങളാണ് ഹോട്ട് ലൈനിൽ കൈകാര്യം ചെയ്യേണ്ടത് എന്ന് നവംബറിലെ ചർച്ചയിൽ തീരുമാനിക്കും എന്നാണു പ്രതീക്ഷ.
►ആദരവ് തിരിച്ചുകിട്ടിയില്ല
ഷിയുടെ സന്ദർശനത്തിൽ ഏറ്റവും ശ്രദ്ധേയമായ ഒന്നുണ്ട്. ട്രംപ് ഷിയെ ആദരിക്കാൻ പരമാവധി ശ്രദ്ധിച്ചു. അതു ഷി എടുത്തുപറയുകയും ചെയ്തു. എന്നാൽ, തിരികെ ട്രംപിനെ രസിപ്പിക്കാനോ ആദരിക്കാനോ ഷി ഒന്നും പറഞ്ഞില്ല. വ്യക്തിതലത്തിൽ മാത്രമല്ല ഔദ്യോഗിക തലത്തിലും അങ്ങനെതന്നെ. ചൈന എന്തെങ്കിലും വിട്ടുവീഴ്ചകൾ പ്രഖ്യാപിച്ചില്ല. ഇറാൻ കാര്യത്തിൽ സഹായിക്കാൻ സന്നദ്ധത കാണിച്ചില്ല. തായ്വാൻ കാര്യത്തിൽ അയവും സൂചിപ്പിച്ചില്ല. മാത്രമല്ല, ചൈന അമേരിക്കയോടു തുല്യശക്തിയാണെന്ന ധ്വനിയോടെ ഒന്നിലേറെ തവണ സംസാരിക്കുകയും ചെയ്തു. മുൻ ആഴ്ചകളിൽ നടന്ന ഷാങ്ഹായ് കോ-ഓപ്പറേഷൻ ഓർഗനൈസേഷൻ (എസ്സിഒ), ബ്രിക്സ് എന്നീ ഉച്ചകോടികൾ ചൈനീസ് നേതൃത്വത്തിന്റെ ആഗോള സ്വീകാര്യത കാണിക്കുന്നു എന്ന മട്ടിൽ അവതരിപ്പിക്കാനും ചൈന ശ്രദ്ധിച്ചു. സഖ്യകക്ഷികളായ യൂറോപ്യൻ രാജ്യങ്ങളെയും കാനഡയെയും ഒക്കെ എതിർപക്ഷത്താക്കി നീങ്ങുന്ന ട്രംപിന്റേതിൽനിന്നു തീർത്തും ഭിന്നമായ സ്വഭാവമാണ് ഷി രാജ്യാന്തര രംഗത്ത് എടുക്കുന്നത്.
►ഷിയുടെ മാവോ സ്യൂട്ടിലെ നയതന്ത്രം
നയതന്ത്രത്തിൽ വാക്കുകൾപോലെ വസ്ത്രങ്ങളും ശക്തമായ ആയുധമാണ്. പല കാര്യങ്ങളും പറയാതെ പറയാൻ പറ്റുന്ന സൂചകമാണത്. 1979ൽ അമേരിക്കയിലെത്തിയ ചൈനീസ് സർവാധിപതി ഡെങ് സിയാവോ പിങ് വലിയ കൗബോയ് തൊപ്പി ധരിച്ചതു കാപ്പിറ്റലിസത്തിലേക്കുള്ള മാറ്റം വ്യക്തമാക്കാനായിരുന്നു. ഇത്തവണ ട്രംപിന്റെ ഔദ്യോഗിക ഡിന്നറിന് ഷി എത്തിയത് മാവോ സ്യൂട്ട് ധരിച്ചാണ്.
ഷി പ്രസിഡന്റായ ശേഷം പാശ്ചാത്യ ശൈലിയിലുള്ള സ്യൂട്ട് ആണ് ഔദ്യോഗിക ചടങ്ങുകളിൽ ധരിച്ചുപോന്നത്. അതിൽനിന്നു മാറി പരമ്പരാഗത ചൈനീസ് നേതൃത്വത്തിന്റെ വേഷം ധരിച്ചു. ചൈനയുടെ രാഷ്ട്രീയവും കാഴ്ചപ്പാടും പഴയതു തന്നെയാണെന്ന പ്രഖ്യാപനം. ട്രംപിന്റെ സ്വീകരണവും നല്ല വാക്കുകളും കൊള്ളാം. പക്ഷേ അതുകൊണ്ടു ചൈന പ്രവൃത്തിയിലോ നയങ്ങളിലോ മാറ്റമൊന്നും വരുത്തുന്നില്ല. അതാണു മാവോ സ്യൂട്ടിന്റെ സന്ദേശം. ചർച്ചകളിൽ അതു വ്യക്തമാകുകയും ചെയ്തു.
►തുസിഡൈഡസ് കെണി
യുഎസ്-ചൈന ബന്ധത്തെ പരാമർശിക്കുമ്പോൾ ഷി പലപ്പോഴും പ്രയോഗിക്കുന്നതാണു തുസിഡൈഡസ് കെണി (Thucydides trap). ബിസി അഞ്ചാം നൂറ്റാണ്ടിൽ നടന്ന പെലോപൊണേഷ്യൻ (Peloponnesian) യുദ്ധത്തെപ്പറ്റി ഗ്രീക്ക് ചരിത്രകാരൻ തുസിഡൈഡസ് എഴുതിയ ചരിത്രത്തിലെ പരാമർശമാണ് ഇതിൽ വിവക്ഷിക്കുന്നത്. നിലവിലുള്ള പ്രമുഖ ശക്തിയെ വെല്ലുവിളിക്കാൻ മറ്റൊരു ശക്തി ഉദിച്ചുവരുമ്പോൾ യുദ്ധം അനിവാര്യമാണെന്ന് തുസിഡൈഡസ് എഴുതി. ആസ്ഥാന ശക്തിയായിരുന്ന സ്പാർട്ടയെ വെല്ലുവിളിക്കാൻതക്ക ശക്തി ആഥൻസ് ആർജിച്ചതിന്റെ സ്വാഭാവിക പരിണതിയായി പെലോപൊണേഷ്യൻ യുദ്ധം (ബിസി 431-404) എന്ന് അദ്ദേഹം വിലയിരുത്തി. ചരിത്രത്തിലെ പല സംഘർഷങ്ങളെയും ഈ വിശകലനം ഉപയോഗിച്ചു പഠിച്ച ഹാർവാഡിലെ കെന്നഡി സ്കൂൾ പ്രഫസർ ഗ്രാം അലിസൺ യുഎസ്-ചൈന ബന്ധം ഇങ്ങനെയൊരു കെണിയിലാണെന്ന് ഒരു ദശകം മുന്പേ എഴുതിയിരുന്നു (ചൈനീസ് ഭരണകൂടത്തിലെ നിരവധി പേർ അലിസന്റെ ശിഷ്യരാണ്).
കഴിഞ്ഞ മേയിൽ ട്രംപ് ബെയ്ജിംഗിൽ എത്തിയപ്പോൾ ഷി ഈ കെണി പരാമർശിച്ചു. തുസിഡൈഡസ് കെണിയിൽ വീഴാതെ യുഎസിനും ചൈനയ്ക്കും മുന്നോട്ടു പോകാൻ കഴിയുമോ എന്ന് അദ്ദേഹം ചോദിച്ചു. ഇത്തവണ വാഷിംഗ്ടണിൽ ഷി അത് ആവർത്തിച്ചു. ഒപ്പം അതിന്റെ ഉത്തരവും നൽകി. പരസ്പര ബഹുമാനത്തോടെ, ഉത്തരവാദപൂർവം മത്സരിക്കാൻ തയാറായാൽ കെണിയിൽ വീഴാതെ മുന്നേറാം എന്നു ഷി പറഞ്ഞു.
തുല്യശക്തിയാണെന്ന്
ട്രംപ് ബെയ്ജിംഗിലും വാഷിംഗ്ടണിലും ഷിക്കു മറുപടി നൽകിയില്ല. ചൈനയെ തുല്യശക്തിയായി കണക്കാക്കണം എന്നാണു ഷി ആവശ്യപ്പെട്ടതിന്റെ ചുരുക്കം. അതു വകവച്ചു കൊടുക്കാൻ ട്രംപിനു പറ്റില്ലല്ലോ. ഇരുപത്തൊന്നാം നൂറ്റാണ്ടിലെ വൻശക്തികൾ അഞ്ചു മാസത്തിനിടെ രണ്ട് ഉന്നതതല കൂടിക്കാഴ്ച നടത്തി. പക്ഷേ, ബന്ധങ്ങളിൽ മാറ്റമൊന്നും വരുത്താനായില്ല. മൂന്നു മാസത്തിനകം രണ്ടു തവണകൂടി കാണുന്നുണ്ട്. നവംബറിൽ ഏഷ്യ പസഫിക് സാമ്പത്തിക ഉച്ചകോടിക്ക് ചൈനയിലെ ഷെൻചെനിലും ഡിസംബറിൽ ജി 20 ഉച്ചകോടിക്ക് അമേരിക്കയിലെ ഫ്ലോറിഡയിലും ആണു കൂടിക്കാഴ്ചകൾ. അവയും വ്യത്യസ്തമായ ഫലം നൽകാൻ സാധ്യതയില്ല. സംഘർഷം ഉള്ളിലൊതുക്കിയ ശീതയുദ്ധം പോലെ വൻശക്തിബന്ധം തുടർന്നുപോകും എന്നു മാത്രം പ്രതീക്ഷിക്കാം.
International
തായ്പെയ്: ചൈനീസ് ആക്രമണഭീഷണി നേരിടുന്ന തായ്വാന് അമേരിക്കയിൽനിന്ന് അത്യാധുനിക എഫ്-16 യുദ്ധവിമാനങ്ങൾ ലഭിച്ചുതുടങ്ങി. എഫ്-16 വി ബ്ലോക്ക് 70 ഇനത്തിൽപ്പെട്ട രണ്ടു യുദ്ധവിമാനങ്ങൾ അമേരിക്ക ഇന്നലെ തായ്വാനു കൈമാറി.
തായ്വാന്റെ വ്യോമപ്രതിരോധ ശേഷി വർധിച്ചതായി പ്രസിഡന്റ് ലായ് ചിംഗ് തെ പ്രതികരിച്ചു. ഇത്തരം ഇനത്തിൽപ്പെട്ട കൂടുതൽ യുദ്ധവിമാനങ്ങൾ വൈകാതെ ലഭിക്കുമെന്നു പ്രതിരോധമന്ത്രി വെല്ലിംഗ്ടൺ കൂ അറിയിച്ചു.
നിലവിൽ അമേരിക്കൻ നിർമിത എഫ്-16 ഫൈറ്റിംഗ് ഫാൽക്കൺ ഇനത്തിൽപ്പെട്ട യുദ്ധവിമാനങ്ങൾ ഉപയോഗിക്കുന്നുണ്ട്. ഇതിന്റെ കൂടുതൽ പരിഷ്കരിച്ച പതിപ്പാണ് ഇപ്പോൾ ലഭിച്ചിരിക്കുന്നത്. ഇത്തരം 66 യുദ്ധവിമാനങ്ങൾ വാങ്ങാനായി 2019ലാണ് കരാറുണ്ടാക്കിയത്.
ചൈനീസ് പ്രസിഡന്റ് ഷി ചിൻപിംഗ് വൈറ്റ്ഹൗസ് സന്ദർശിച്ച അമേരിക്കൻ പ്രസിഡന്റ് ട്രംപുമായി കൂടിക്കാഴ്ച നടത്തി ഒരാഴ്ചയ്ക്കുള്ളിലാണു തായ്വാന് പുതിയ യുദ്ധവിമാനങ്ങൾ ലഭിച്ചിരിക്കുന്നത്. കൂടിക്കാഴ്ചയിൽ, തായ്വാന്റെ കാര്യത്തിൽ അമേരിക്ക സൂക്ഷിച്ച് ഇടപെടണമെന്ന് ട്രംപിനോട് ഷി ആവശ്യപ്പെട്ടതായാണു റിപ്പോർട്ട്.
ജനാധിപത്യ ഭരണകൂടമുള്ള തായ്വാനെ വിഘടിത പ്രവിശ്യയായിട്ടാണ് ചൈന പരിഗണിക്കുന്നത്. 2028നു മുന്പ് ചൈന തായ്വാൻ പിടിച്ചെടുക്കാൻ ശ്രമിക്കില്ലെന്ന് അമേരിക്കൻ നേതൃത്വം കണക്കുകൂട്ടുന്നതായ റിപ്പോർട്ട് കഴിഞ്ഞദിവസം പുറത്തുവന്നിരുന്നു.
Business
വാഷിംഗ്ടണ്: യുഎസിലെ ഏറ്റവും വലിയ സ്റ്റീൽ പ്ലാന്റ് നിർമിക്കാൻ വൻ നിക്ഷേപ പദ്ധതിയുമായി ഇന്ത്യയിലെ വ്യാവസായിക ഭീമന്മാരായ എസ്സാർ ഗ്രൂപ്പ്.
1800 കോടി ഡോളറിന്റെ നിക്ഷേപമാണ് കന്പനി കണക്കാക്കുന്നത്. ഇതിൽ 1,500 കോടി ഡോളർ ചെലവഴിച്ച് എസ്സാർ ഗ്രൂപ്പിന്റെ യുഎസ് അനുബന്ധകന്പനിയായ മെസാബി മെറ്റാലിക്സ് അയോവയിൽ വന്പൻ സ്റ്റീൽ പ്ലാന്റ് നിർമിക്കും.
വൈറ്റ് ഹൗസിലെ ഓവൽ ഓഫിസിൽവച്ച് യുഎസ് പ്രസിഡന്റ് ഡോണാൾഡ് ട്രംപാണ് ഈ പ്രഖ്യാപനം നടത്തിയത്. അമേരിക്കൻ ചരിത്രത്തിലെ ഏറ്റവും വലിയ സ്റ്റീൽ പ്ലാന്റായിരിക്കും ഇതെന്ന് ട്രംപ് വിശേഷിപ്പിച്ചു.
2030ഓടെ അയോവയിലെ സ്റ്റീൽ പ്ലാന്റിൽനിന്ന് ഉത്പാദനം ആരംഭിക്കാനാകുമെന്നാണ് പ്രതീക്ഷ. പ്രതിവർഷം 7.5 മില്യണ് ടണ് സ്റ്റീൽ ഉത്പാദനമാണ് ആദ്യഘട്ടത്തിൽ ലക്ഷ്യമിടുന്നത്. പിന്നീട് ഇത് 10 മില്യണ് ടണ് ആയി ഉയർത്തും. മിനെസോട്ടയിലെ ഇരുന്പയിര് ഖനിയുമായി ബന്ധിപ്പിച്ചാണ് ഐയോവയിലെ സ്റ്റീൽ പ്ലാന്റ് പദ്ധതി വരുന്നത്.
International
വാഷിംഗ്ടണ്: ഇറാനുമാായുള്ള നയതന്ത്ര-സൈനിക തര്ക്കങ്ങള് രൂക്ഷമായിരിക്കെ, വിഷയത്തില് അന്തിമ തീരുമാനങ്ങളിലേക്ക് കടക്കുകയാണെന്ന മുന്നറിയിപ്പുമായി യു.എസ് പ്രസിഡന്റ് ഡോണള്ഡ് ട്രംപ്. ഇറാന് ഭരണകൂടം തങ്ങളുടെ നിലപാടുകളില് മാറ്റം വരുത്തിയില്ലെങ്കില് 'വളരെ വലിയ കാര്യങ്ങള് ഉടന് തന്നെ സംഭവിക്കാന് പോകുന്നു' എന്ന് ഫോക്സ് ന്യൂസിന് നല്കിയ അഭിമുഖത്തില് ട്രംപ് വ്യക്തമാക്കി.
ഇറാനെതിരെയുള്ള യുഎസ് നിലപാടില് പ്രധാനമായും മൂന്ന് വഴികളാണ് നിലവിലുള്ളതെന്ന് ട്രംപ് ചൂണ്ടിക്കാട്ടി. ഇറാന് മേല് പൂര്ണ സൈനിക നടപടി സ്വീകരിക്കുക, സാമ്പത്തിക ഉപരോധങ്ങളിലൂടെ രാജ്യത്തെ കൂടുതല് തകര്ച്ചയിലേക്ക് തള്ളിയിടുക, ഉഭയകക്ഷി ധാരണയിലൂടെയോ കരാറിലൂടെയോ പ്രശ്നം പരിഹരിക്കുക.
ഐക്യരാഷ്ട്രസഭയുടെ പൊതുസഭ ഉച്ചകോടിയില് പങ്കെടുക്കാന് ഇറാന് പ്രസിഡന്റ് മസൂദ് പെസഷ്കിയാന് ന്യൂയോര്ക്കിലേക്ക് എത്താനിരിക്കെയാണ് ട്രംപിന്റെ പ്രതികരണം. ഉപരോധങ്ങള് അവസാനിപ്പിക്കാനും ഹോര്മുസ് പ്രതിസന്ധി പരിഹരിക്കാനും ഖത്തര് വഴി തങ്ങളുടെ വ്യവസ്ഥകള് അമേരിക്കയെ അറിയിച്ചതായി ടെഹ്റാന് വ്യക്തമാക്കിയിട്ടുണ്ട്. യുഎന് ഉച്ചകോടിയുടെ ഭാഗമായി പെസഷ്കിയാനുമായി കൂടിക്കാഴ്ച നടത്താന് താന് തയാറാണെന്ന സൂചനയും ട്രംപ് നല്കിയിട്ടുണ്ട്.
International
വാഷിംഗ്ടൺ ഡി.സി: പ്രമുഖ അന്താരാഷ്ട്ര വാർത്താ മാധ്യമങ്ങളായ സിഎൻഎൻ, എം.എസ് നൗ, പൊളിറ്റിക്കോ എന്നിവയ്ക്ക് വൈറ്റ് ഹൗസിൽ പ്രവേശന വിലക്കേർപ്പെടുത്തി യുഎസ് പ്രസിഡന്റ് ഡോണൾഡ് ട്രംപ്. ട്രൂത്ത് സോഷ്യലിലൂടെയാണ് വിലക്ക് ഉടനടി പ്രാബല്യത്തിൽ വരുത്തുന്നതായി ട്രംപ് പ്രഖ്യാപിച്ചത്.
ഈ മാധ്യമങ്ങൾ തന്റെ ഭരണകൂടത്തിനെതിരെ നിരന്തരം "വ്യാജവാർത്തകളും നുണകളും" പ്രചരിപ്പിക്കുകയാണെന്ന് ട്രംപ് ആരോപിച്ചു. ട്രംപ് ഭരണകൂടത്തെ മോശമായി ചിത്രീകരിക്കാൻ ഈ മാധ്യമങ്ങൾ മനഃപൂർവം ശ്രമിക്കുകയാണെന്ന് ഓവൽ ഓഫീസിൽ മാധ്യമപ്രവർത്തകരോട് സംസാരിക്കവേ ട്രംപ് വ്യക്തമാക്കി. മറ്റ് പ്രമുഖ മാധ്യമങ്ങൾക്കെതിരെയും ഭാവിയിൽ സമാന നടപടിയുണ്ടാകുമെന്ന മുന്നറിയിപ്പും അദ്ദേഹം നൽകി.
ബൈഡൻ ഭരണകൂടത്തിന്റെ കാലത്ത് 'പൊളിറ്റിക്കോ' എന്ന മാധ്യമത്തിന് എട്ട് ദശലക്ഷം ഡോളറിന്റെ ഗവൺമെന്റ് സബ്സ്ക്രിപ്ഷൻ ലഭിച്ചതായും ഇത് വലിയ അഴിമതിയാണെന്നും ട്രംപ് ആരോപിച്ചു. അമേരിക്കൻ ഭരണഘടന വാഗ്ദാനം ചെയ്യുന്ന പത്രസ്വാതന്ത്ര്യത്തിൻമേലുള്ള കടന്നുകയറ്റമാണ് ഇതെന്നും തങ്ങളുടെ വാർത്താസംഘത്തിന് പൂർണ പിന്തുണ നൽകുമെന്നും സിഎൻഎൻ വ്യക്തമാക്കി.
റിപ്പോട്ടേഴ്സ് വിത്തൗട്ട് ബോർഡേഴ്സ് ഉൾപ്പെടെയുള്ള അന്താരാഷ്ട്ര മാധ്യമ കൂട്ടായ്മകളും നീക്കത്തിനെതിരെ രംഗത്തെത്തിയിട്ടുണ്ട്.
Editorial
ലോകത്തെ കരുത്തുറ്റ സാമ്പത്തിക-സാങ്കേതിക ശക്തികളിലൊന്നായി വളർന്നുപന്തലിച്ച നവഭാരതത്തെ ഡോണൾഡ് ട്രംപും അദ്ദേഹത്തിന്റെ ഭരണകൂടവും ഇനിയെങ്കിലും തിരിച്ചറിയണം. 140 കോടി ജനങ്ങളുടെ പരമാധികാരത്തെയും ആത്മാഭിമാനത്തെയും 100 ശതമാനം തീരുവഭീഷണിമുനയിൽ നിർത്തി വരുതിയിലാക്കാമെന്നതു കേവല വ്യാമോഹം മാത്രമാണ്. റഷ്യയിൽനിന്ന് ക്രൂഡ് ഓയിൽ വാങ്ങുന്ന ഇന്ത്യയും ചൈനയും ഉൾപ്പടെയുള്ള രാജ്യങ്ങൾക്കുമേൽ 100 ശതമാനം വരെ കടുത്ത നികുതി ചുമത്താൻ വ്യവസ്ഥ ചെയ്യുന്ന ‘ലിൻഡ്സെ ഒ. ഗ്രഹാം സാംഗ്ഷനിംഗ് റഷ്യ ആൻഡ് ഇറാൻ ആക്ട് 2026’ പാസാക്കിയതിലൂടെ അമേരിക്കയുടെ അഹങ്കാരവും നയതന്ത്രപരമായ ഇരട്ടത്താപ്പുമാണ് വീണ്ടും ലോകത്തിനു മുന്നിൽ അനാവൃതമായിരിക്കുന്നത്.
യുക്രെയ്നെതിരായ അധിനിവേശത്തിന്റെ പശ്ചാത്തലത്തിൽ റഷ്യൻ വരുമാനം തടയുകയാണ് ഉപരോധത്തിന്റെ ലക്ഷ്യമെന്ന് യുഎസ് സെനറ്റ് ഫോറിൻ റിലേഷൻസ് കമ്മിറ്റി വ്യക്തമാക്കുന്നു. ജനപ്രതിനിധിസഭയും സെനറ്റും പാസാക്കിയ ബിൽ ഉടൻതന്നെ പ്രസിഡന്റ് ഡോണൾഡ് ട്രംപ് ഒപ്പുവച്ച് നിയമമാക്കുമെന്നാണു കരുതുന്നത്.
സ്വന്തം കാര്യത്തിലേക്കു വരുമ്പോൾ അമേരിക്ക കാണിക്കുന്ന കപടതയും സ്വാർഥതയും തികച്ചും ജുഗുപ്സാവഹമാണ്. റഷ്യൻ എണ്ണയ്ക്കും പ്രകൃതിവാതകത്തിനുംമേൽ ലോകരാജ്യങ്ങൾക്കു വിലക്കേർപ്പെടുത്തുകയും ഉപരോധമേർപ്പെടുത്തുകയും ചെയ്യുന്ന അമേരിക്ക, തങ്ങളുടെ സ്വന്തം ആണവനിലയങ്ങൾക്ക് ആവശ്യമായ യുറേനിയം ഇറക്കുമതി ചെയ്യാൻ ഇതേ ഉപരോധ ബില്ലിൽ റഷ്യക്കു പ്രത്യേക ഇളവുകൾ അനുവദിച്ചിരിക്കുന്നു! തങ്ങളുടെ സിവിലിയൻ ആണവനിലയങ്ങളുടെ 26 ശതമാനത്തോളം യുറേനിയം ആവശ്യങ്ങൾക്കായി ഇന്നും റഷ്യയെ പൂർണമായി ആശ്രയിക്കുന്നവർ,
ഇന്ത്യ സ്വന്തം ജനങ്ങളുടെ ഊർജസുരക്ഷ ഉറപ്പാക്കാൻ കുറഞ്ഞ വിലയിൽ റഷ്യൻ എണ്ണ വാങ്ങുമ്പോൾ ഉപരോധഭീഷണി മുഴക്കുന്നത് എന്തു ന്യായത്തിന്റെ അടിസ്ഥാനത്തിലാണ്? പശ്ചിമേഷ്യൻ സംഘർഷങ്ങളിലും റഷ്യ-യുക്രെയ്ൻ തർക്കങ്ങളിലും കാര്യമാത്രപ്രസക്തമായി ഇടപെട്ടു സമാധാനം കൊണ്ടുവരാൻ കഴിയാതെ കാര്യങ്ങൾ കൂടുതൽ വഷളാക്കിയ ട്രംപ് ഭരണകൂടം, സ്വന്തം വീഴ്ചകൾ മറയ്ക്കാനാണു സൗഹൃദരാജ്യങ്ങളെ നികുതിഭീഷണിയിലാക്കി നിശബ്ദരാക്കാൻ നോക്കുന്നത്.
എവിടെനിന്ന് ഇന്ധനം വാങ്ങണം, ആരുമായി വ്യാപാരം നടത്തണം എന്ന് സ്വതന്ത്ര ജനാധിപത്യരാജ്യങ്ങളോടു കല്പിക്കാൻ അമേരിക്കയ്ക്ക് യാതൊരു അവകാശവുമില്ല. സ്വന്തം രാജ്യത്തുപോലും ട്രംപിന്റെ ഇത്തരം ഏകപക്ഷീയമായ വിദേശനയങ്ങൾക്കും സൈനികനീക്കങ്ങൾക്കുമുള്ള ജനപിന്തുണ കൂപ്പുകുത്തുകയാണ്. ഫോക്സ് ന്യൂസ് നടത്തിയ സർവേയിൽ 61 ശതമാനം വോട്ടർമാരും ട്രംപിന്റെ പ്രവർത്തനങ്ങളിൽ കടുത്ത അതൃപ്തി രേഖപ്പെടുത്തിയതും വിദേശനയത്തിനുള്ള ജനപിന്തുണ 37 ശതമാനമായി താഴ്ന്നതും, അമേരിക്കൻ ജനതയ്ക്കുപോലും ഈ നയതന്ത്ര പരാജയത്തോടും യുദ്ധവെറിയോടും താത്പര്യമില്ലെന്ന് വ്യക്തമാക്കുന്നു. ഇറാനെതിരേയുള്ള സൈനികനീക്കം തെറ്റായിരുന്നുവെന്നും ആഭ്യന്തരസുരക്ഷയെ ബാധിക്കുമെന്നും അവിടത്തെ ഭൂരിപക്ഷം ജനങ്ങളും വിശ്വസിക്കുന്നു.
അമേരിക്കയുടെ ഇത്തരം തീരുവഭീഷണികൾക്കു മുന്നിൽ പണയം വയ്ക്കാനുള്ളതല്ല ഇന്ത്യയുടെ സാമ്പത്തിക പരമാധികാരവും വ്യാപാര സ്വാതന്ത്ര്യവും. ഉഭയകക്ഷി ബന്ധത്തെയും ആഗോള ഊർജവിപണിയെയും ദോഷകരമായി ബാധിക്കുന്ന ഇത്തരം ഏകപക്ഷീയമായ കടന്നുകയറ്റങ്ങൾക്കെതിരേ വിദേശകാര്യ മന്ത്രാലയം കൈക്കൊണ്ട ഉറച്ച നിലപാട് അഭിനന്ദനാർഹമാണ്. യുഎസ് തീരുവ ഭീഷണി ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തെയും ആഗോള ഊർജവിപണിയെയും ബാധിക്കുമെന്ന് മുന്നറിയിപ്പു നൽകിയ ഇന്ത്യ,
രാജ്യത്തിന്റെ സാമ്പത്തിക-വ്യാപാര താത്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്നും വ്യക്തമാക്കിയിട്ടുണ്ട്. സ്വന്തം രാജ്യത്തിന്റെ സാമ്പത്തിക താത്പര്യങ്ങൾ സംരക്ഷിക്കാൻ ആവശ്യമായ തിരിച്ചടികൾ നൽകാൻ ഇന്ത്യ ഒട്ടും മടിക്കരുത്. ലോക പൊലിസ് ചമഞ്ഞ് ഇന്ത്യപോലുള്ള രാജ്യങ്ങളുടെ സ്വാതന്ത്ര്യത്തിന്മേൽ കുതിരകയറുന്ന അമേരിക്കൻ തന്ത്രങ്ങൾ ഇനിയും വിലപ്പോകില്ലെന്ന് അവരെ കൃത്യമായി ബോധ്യപ്പെടുത്താൻ സമയമായി.
അമേരിക്ക പാസാക്കിയ പുതിയ ഉപരോധബിൽ യുക്രെയ്നിലെ സമാധാനനീക്കങ്ങളെ കൂടുതൽ സങ്കീർണമാക്കുമെന്ന് റഷ്യ വ്യക്തമാക്കിക്കഴിഞ്ഞു. വർഷങ്ങളായി തുടരുന്ന ശത്രുതയിലും രക്തച്ചൊരിച്ചിലിലും ഇരു രാജ്യങ്ങളിലെയും ജനങ്ങൾ വലഞ്ഞുനിൽക്കുമ്പോൾ, സമാധാനത്തിനു വഴിയിടാതെ വീണ്ടും പ്രകോപനങ്ങളും ഉപരോധങ്ങളും സൃഷ്ടിക്കുന്ന അമേരിക്കൻ നിലപാട് കേവലം ക്രൂരതയെന്നല്ലാതെ മറ്റൊന്നും പറയാനില്ല. തീ തുപ്പുന്ന ബോംബുകൾക്കും സാമ്പത്തിക തകർച്ചയ്ക്കുമിടയിൽ ജീവനുവേണ്ടി നെട്ടോട്ടമോടുന്ന മനുഷ്യരുടെ കണ്ണീരു കാണാതെ, ആഗോള മേധാവിത്വത്തിനും ആയുധ-വ്യാപാര താത്പര്യങ്ങൾക്കുംവേണ്ടി നിലകൊള്ളുന്ന രാഷ്ട്രീയക്കളി അവസാനിപ്പിക്കേണ്ട സമയം അതിക്രമിച്ചിരിക്കുന്നു.
Leader Page
അമേരിക്കയുടെ സമ്മർദത്തെത്തുടർന്ന് സ്വീകരിച്ച നിരവധി നയപരമായ തീരുമാനങ്ങൾ ഇതിനകംതന്നെ ഇന്ത്യയെ പ്രതികൂലമായി ബാധിച്ചിട്ടുണ്ട്. റഷ്യയിൽനിന്നുള്ള ക്രൂഡ് ഓയിൽ ഇറക്കുമതി കുറച്ചത് എണ്ണവില വർധനയ്ക്കും പണപ്പെരുപ്പത്തിനും കാരണമായി. 2018ൽ ഇന്ത്യ-റഷ്യ അഞ്ചാം തലമുറ യുദ്ധവിമാന പദ്ധതി റദ്ദാക്കിയത് ഇന്ത്യയുടെ പ്രതിരോധശേഷി ദുർബലപ്പെടുത്തി. ജി-20 കാലഘട്ടത്തിലുൾപ്പെടെ കാർഷികോത്പന്നങ്ങളുടെ ഇറക്കുമതിത്തീരുവ ആവർത്തിച്ചു കുറച്ചത് കർഷകരെയും പ്രതികൂലമായി ബാധിച്ചു. ഇന്ത്യയെ മൊത്തത്തിൽ കരാർ ബാധിക്കുന്നതിലുപരി, കേരളത്തിന്റെ സമ്പദ് വ്യവസ്ഥയെ തകർക്കുന്നതാണ് ഈ കരാർ.
◄താങ്ങുവില സംവിധാനം അമേരിക്കയുടെ ലക്ഷ്യം
താങ്ങുവില (എംഎസ്പി) ഇന്ത്യൻ കാർഷിക മേഖലയുടെ പ്രധാന സുരക്ഷാ സംവിധാനമാണ്. ലോക വ്യാപാര സംഘടനയിൽ (WTO) ഇന്ത്യയുടെ താങ്ങുവില സംവിധാനത്തിൽ മാറ്റം വരുത്താൻ അമേരിക്ക സമ്മർദം ചെലുത്തിവരുന്നു. ഈ വിഷയം ഇന്ത്യ-അമേരിക്ക വ്യാപാരക്കരാറിന്റെ ഭാഗമാകുകയോ വെളിപ്പെടുത്താത്ത ധാരണയിൽ ഉൾപ്പെടുകയോ ചെയ്താൽ എംഎസ്പി ലഭിക്കുന്ന 22 വിളകളുടെ കർഷകരെ ബാധിക്കും. കേരളത്തിലെ നെല്ലും കൊപ്രയും ഇതിൽ ഉൾപ്പെടുന്നു.
ഇതോടൊപ്പം, അമേരിക്ക നൽകുന്ന വൻ കാർഷിക സബ്സിഡിയും വലിയ ഭീഷണിയാണ്. അമേരിക്കയുടെ ഫാം ബില്ലിൽ 2014ൽ 956 ബില്യൺ ഡോളറും 2024ൽ 1.5 ട്രില്യൺ ഡോളറും വകയിരുത്തി. ഒഇസിഡി - 2024 റിപ്പോർട്ട് പ്രകാരം അമേരിക്കയിലെ ഉത്പാദകർക്ക് സർക്കാർ നൽകുന്ന പിന്തുണ (Producer Support Estimate - PSE) +7.1% ആണ്. അതേസമയം, ഇന്ത്യൻ കർഷകർക്ക് ലഭിക്കുന്ന പിന്തുണ -14.5% ആണ്. ഫലത്തിൽ ഇത് ഇന്ത്യൻ കർഷകരുടെമേലുള്ള പരോക്ഷ നികുതിക്ക് സമാനമാണ്. വൻ സബ്സിഡി ലഭിക്കുന്ന അമേരിക്കൻ കാർഷികോത്പന്നങ്ങൾ ഇറക്കുമതി അനുവദിക്കുന്നത് ആഭ്യന്തര ഉത്പാദനത്തെ തകർക്കും.
ലോക വ്യാപാര സംഘടനയിൽ അമേരിക്കയുടെ കാർഷിക സബ്സിഡികളെ ഇന്ത്യ തുടർച്ചയായി എതിർത്തിട്ടുണ്ട്. ഇപ്പോൾ സബ്സിഡിയുള്ള അമേരിക്കൻ ഉത്പന്നങ്ങളുടെ ഇറക്കുമതി അനുവദിക്കുന്നത് ഇന്ത്യയുടെ ദീർഘകാല നിലപാടിനെ ദുർബലപ്പെടുത്തുകയും അമേരിക്കൻ സബ്സിഡികളെ ചോദ്യം ചെയ്യുന്നതിൽ ഇന്ത്യയെ പിന്തുണച്ച രാജ്യങ്ങളെ ചതിക്കലുമാകും.
◄നാളികേരവും റബറും
സോയാബീൻ എണ്ണയുടെ ഇറക്കുമതിത്തീരുവ കുറയ്ക്കുന്നത് കേരളത്തിലെ നാളികേര കർഷകരെ നേരിട്ടു ബാധിക്കും. ഇന്ത്യയുടെ ഭക്ഷ്യ എണ്ണ ഇറക്കുമതി 2010-11ലെ 8.8 ദശലക്ഷം ടണ്ണിൽനിന്ന് 2025-26ൽ 16.7 ദശലക്ഷം ടണ്ണായി ഉയർന്നു. അമേരിക്കൻ സോയാബീൻ എണ്ണയ്ക്ക് കൂടുതൽ വിപണി പ്രവേശനം ലഭിക്കുന്നത് ആഭ്യന്തര ഭക്ഷ്യ എണ്ണ വിളകളുടെ വിലയെയും ഉത്പാദനത്തെയും കൂടുതൽ ദുർബലപ്പെടുത്തും.
റബറിന്റെ കാര്യത്തിലും സ്ഥിതി ഗുരുതരമാണ്. ലോക വ്യാപാര സംഘടനയിൽ സ്വാഭാവിക റബറിൽ ഇന്ത്യയുടെ ബൗണ്ട് താരിഫ് 25 ശതമാനമാണെങ്കിലും ആസിയാൻ ഇന്ത്യ കരാർ പ്രകാരം കോമ്പൗണ്ട് റബർ വിഭാഗങ്ങളുടെ തീരുവ 0-5 ശതമാനം മാത്രമായത് റബർ കർഷകരെ ബാധിച്ചു. അമേരിക്ക കൃത്രിമ റബറിന്റെ പ്രധാന കയറ്റുമതി രാജ്യമാണ്. അമേരിക്കയിൽനിന്ന് ഇന്ത്യ ഇറക്കുമതി ചെയ്ത കൃത്രിമ റബറിന്റെ മൂല്യം 2021ലെ 75 ദശലക്ഷം ഡോളറിൽനിന്ന് 2025ൽ 114.42 ദശലക്ഷം ഡോളറായി ഉയർന്നു. കൃത്രിമ റബറിന്റെ തീരുവ ഇനിയും കുറച്ചാൽ സ്വാഭാവിക റബറിന്റെ വിലയിൽ സമ്മർദം വർധിക്കുകയും കേരളത്തിലെ റബർ കർഷകരെ ഗുരുതരമായി ബാധിക്കുകയും ചെയ്യും.
◄ജനിതകമാറ്റം വരുത്തിയ ഉത്പന്നങ്ങൾ
സോയാബീൻ എണ്ണയും ഡിഡിജി (ഡിസ്റ്റില്ലറിയിൽനിന്നുള്ള കാലിത്തീറ്റയായി ഉപയോഗിക്കാവുന്ന ഉപോത്പന്നം)യും വലിയ തോതിൽ ജനിതകമാറ്റം വരുത്തിയ വിളകളിൽനിന്നാണ് ഉത്പാദിപ്പിക്കുന്നത്. ഇവയുടെ ഇറക്കുമതി മതിയായ പൊതുചർച്ചയും നിയന്ത്രണ പരിശോധനയും കൂടാതെ അനുവദിക്കുന്നത് ജനിതകമാറ്റം വരുത്തിയ ഉത്പന്നങ്ങൾക്ക് പിൻവാതിലിലൂടെ ഇന്ത്യൻ വിപണിയിലേക്ക് പ്രവേശനം നൽകുന്നതിന് തുല്യമാകും.
◄ക്ഷീര, നെല്ല്, മാംസ മേഖലകൾ
അമേരിക്കൻ ക്ഷീരോത്പാദകർക്ക് ഏകദേശം 12 ബില്യൺ ഡോളറിന്റെ സബ്സിഡി ലഭിക്കുന്നു. പാൽപ്പൊടി, വേ പൗഡർ, പാൽക്കട്ടി തുടങ്ങിയ ഉത്പന്നങ്ങളുടെ ഇറക്കുമതിത്തീരുവ കുറച്ചാൽ ഇന്ത്യയിലെ ക്ഷീരകർഷകർക്ക് വൻ ഭീഷണിയാകും. അമേരിക്കൻ പാൽക്കട്ടി ഉത്പാദനത്തിന് പശുക്കിടാവിന്റെ കുടലിൽനിന്നുള്ള റെനെറ്റ് ഉപയോഗിക്കുന്നതുമായി ബന്ധപ്പെട്ട സാംസ്കാരികവും മതപരവുമായ ആശങ്കകളും നിലനിൽക്കുന്നു.
ലോക അരി ഉത്പാദനത്തിന്റെ രണ്ടു ശതമാനത്തിൽ താഴെ മാത്രമാണ് അമേരിക്ക ഉത്പാദിപ്പിക്കുന്നതെങ്കിലും അത് പ്രധാന കയറ്റുമതി രാജ്യമാണ്. അമേരിക്കയിലെ അരി സബ്സിഡി വർധിക്കുന്നത് കുറഞ്ഞ വിലയിൽ കയറ്റുമതി സാധ്യമാക്കുകയും ഇന്ത്യയുടെ കയറ്റുമതി വിപണിയെയും ആഭ്യന്തര നെല്ലുവിലയെയും ബാധിക്കുകയും ചെയ്യും.
കോഴി, പന്നി മേഖലകളിലും സമാന ഭീഷണിയുണ്ട്. ശീതീകരിച്ച അമേരിക്കൻ കോഴിയിറച്ചിക്കും പന്നിയിറച്ചിക്കും കൂടുതൽ വിപണി പ്രവേശനം ലഭിച്ചാൽ കേരളത്തിലെ വളർന്നുവരുന്ന കോഴി, പന്നി വളർത്തൽ മേഖലകൾ പ്രതിസന്ധിയിലാകും. ബാങ്ക് വായ്പകളെ വലിയ തോതിൽ ആശ്രയിക്കുന്ന ഈ മേഖലയുടെ തകർച്ച ബാങ്കിംഗ് മേഖലയിലും പ്രത്യാഘാതമുണ്ടാക്കും.
◄വിത്തിന്റെ പരമാധികാരം
അമേരിക്ക ഒപ്പുവച്ച പല സ്വതന്ത്ര വ്യാപാരക്കരാറുകളിലും ലോക വ്യാപാര സംഘടനയുടെ ബൗദ്ധിക സ്വത്തവകാശ കരാറിലും കടുത്ത ( TRIPS-plus) വ്യവസ്ഥകൾ ഉൾപ്പെടുന്നു. അവ ഉപോവ് കരാർ വ്യവസ്ഥകൾ ( UPOV 1991) സ്വീകരിക്കാൻ രാജ്യങ്ങളെ നിർബന്ധിതമാക്കുന്നു. കർഷകർക്ക് വിത്ത് സൂക്ഷിക്കാനും പുനരുപയോഗിക്കാനുമുള്ള അവകാശം നിയന്ത്രിക്കുന്ന ഇത്തരം വ്യവസ്ഥകൾ ഇന്ത്യ-അമേരിക്ക കരാറിൽ ഉൾപ്പെട്ടാൽ വിത്തിന്മേലുള്ള കർഷകരുടെ അവകാശം ദുർബലപ്പെടുകയും കോർപറേറ്റ് നിയന്ത്രണം ശക്തിപ്പെടുകയും ചെയ്യും.
◄മത്സ്യമേഖലയും നയസ്വാതന്ത്ര്യവും
അമേരിക്ക അടുത്തിടെ നടത്തിയ ചില സ്വതന്ത്ര വ്യാപാരക്കരാർ ചർച്ചകളിൽ പങ്കാളി രാജ്യങ്ങളോടു ലോക വ്യാപാര സംഘടനയുടെ മത്സ്യ സബ്സിഡി കരാർ അംഗീകരിക്കാനും പൂർണമായി നടപ്പാക്കാനും ആവശ്യപ്പെട്ടിട്ടുണ്ട്. ആർട്ടിക്കിൾ 12 പ്രകാരം, മത്സ്യ സബ്സിഡി കരാർ പ്രാബല്യത്തിൽ വന്നതിനുശേഷം നാല് വർഷത്തിനുള്ളിൽ സമഗ്രമായ നിയന്ത്രണ വ്യവസ്ഥകൾ അംഗീകരിക്കപ്പെടാത്ത പക്ഷം, ലോക വ്യാപാര സംഘടന ജനറൽ കൗൺസിൽ മറ്റൊരു തീരുമാനം എടുക്കാത്തിടത്തോളം കരാർ സ്വയം അവസാനിക്കും. വ്യാപാരക്കരാർ വ്യവസ്ഥകളിൽ ലോക വ്യാപാര സംഘടനയിലെ മത്സ്യ സബ്സിഡി കരാറിലെ ആർട്ടിക്കിൾ 12നെയും മറികടന്ന് മത്സ്യ സബ്സിഡി ബാധ്യതകൾ തുടരണമെന്ന് അമേരിക്ക ആവശ്യപ്പെടുന്നു.
ഇത്തരം വ്യവസ്ഥകൾ ഇന്ത്യ-അമേരിക്ക വ്യാപാരക്കരാറിൽ ഉൾപ്പെടുത്തിയാൽ ഇന്ത്യയുടെ മത്സ്യത്തൊഴിലാളികൾക്ക് നൽകുന്ന ഇന്ധന, സുരക്ഷ, അടിസ്ഥാനസൗകര്യ, ആധുനികീകരണ, ഉപജീവന സഹായങ്ങൾ നൽകാനുള്ള സർക്കാരിന്റെ നയസ്വാതന്ത്ര്യം പരിമിതപ്പെടാം. ദശലക്ഷക്കണക്കിന് ചെറുകിട, പരമ്പരാഗത മത്സ്യത്തൊഴിലാളികളുള്ള ഇന്ത്യക്ക് ഇത് അംഗീകരിക്കാനാകില്ല. കേരളത്തിന്റെ തീരദേശ സമ്പദ്വ്യവസ്ഥയെയും ഇത് നേരിട്ട് ബാധിക്കും.
ഇന്ത്യ-അമേരിക്ക വ്യാപാരക്കരാറിനെ കേവലം കയറ്റുമതിയും ഇറക്കുമതിയും വർധിപ്പിക്കുന്ന കരാറായി കാണാനാകില്ല. കേരളത്തെ സംബന്ധിച്ചിടത്തോളം നാളികേരം, റബർ, നെല്ല്, ക്ഷീരം, കോഴി-പന്നി വളർത്തൽ, മത്സ്യബന്ധനം, ചെറുകിട ചില്ലറ വ്യാപാരം എന്നിവയുടെ നിലനിൽപ്പുമായി ബന്ധപ്പെട്ട വിഷയമാണിത്. അതിനാൽ കർഷകരുടെയും മത്സ്യത്തൊഴിലാളികളുടെയും ചെറുകിട വ്യാപാരികളുടെയും താത്പര്യങ്ങളും ഇന്ത്യയുടെ നയപരമായ പരമാധികാരവും തകർക്കുന്ന ഈ കരാറിനെതിരേ എല്ലാ വിഭാഗം ജനങ്ങളും ഒന്നിച്ച് അണിനിരക്കണം. നടപ്പാക്കുന്നവരുടെ കപട രാജ്യസ്നേഹത്തെ തുറന്നു കാണിക്കണം.
International
വാഷിംഗ്ടൺ ഡിസി: 9/11 ഭീകരാക്രമണത്തിന്റെ 25-ാം വാർഷികത്തിൽ അമേരിക്കക്കാരുടെ ഏറ്റവും വലിയ ഭയം രാജ്യത്തിനുള്ളിലെതന്നെ ആഭ്യന്തര തീവ്രവാദമാണെന്ന് റോയിട്ടേഴ്സ്/ഇപ്സോസ് സർവേ.
വിദേശ ഭീകരസംഘടനകളേക്കാൾ സ്വന്തം നാട്ടിലെ തീവ്രവാദ ഗ്രൂപ്പുകളും വംശീയ-രാഷ്ട്രീയ അക്രമങ്ങളുമാണ് രാജ്യസുരക്ഷയ്ക്കു വലിയ ഭീഷണിയെന്ന് ഭൂരിഭാഗം പൗരന്മാരും അഭിപ്രായപ്പെട്ടു.
സർവേയിൽ പങ്കെടുത്ത 33% പേർ ‘ആഭ്യന്തര ഭീകരത’യാണ് ഏറ്റവും വലിയ ഭീഷണിയെന്നു ചൂണ്ടിക്കാട്ടിയപ്പോൾ 20% പേർ മാത്രമാണു വിദേശ ഭീകരതയെ ഭയക്കുന്നത്. 42% പേർ കൂട്ടവെടിവയ്പുകളെയാണ് പ്രധാന ഭീഷണിയായി കാണുന്നത്.
ഡോണൾഡ് ട്രംപിനുനേരേയുണ്ടായ വധശ്രമങ്ങൾ, വംശീയ അക്രമങ്ങൾ, 2025ൽ ചാർലി കിർക്ക് കൊല്ലപ്പെട്ട സംഭവം എന്നിവ ജനങ്ങൾക്കിടയിലെ ഭീതി വർധിപ്പിച്ചു.
കൂടാതെ, 9/11നുശേഷം യുഎസ് നടത്തിയ അഫ്ഗാനിസ്ഥാൻ, ഇറാക്ക് യുദ്ധങ്ങളും നിലവിൽ നടന്നുകൊണ്ടിരിക്കുന്ന ഇറാൻ സൈനിക നടപടിയും നഷ്ടമായിരുന്നുവെന്നാണ് ഭൂരിഭാഗം അമേരിക്കക്കാരുടെയും വിലയിരുത്തൽ.
Business
ടൊറന്റോ: കാനഡയും അമേരിക്കയും തമ്മിലുള്ള വ്യാപാരയുദ്ധങ്ങൾക്കു കൂടുതൽ ചൂടുപകർന്ന് അമേരിക്ക കനേഡിയൻ ഉത്പന്നങ്ങൾക്കു നിരോധനം ഏർപ്പെടുത്തുന്നു.
കാനഡയിൽനിന്നുള്ള പാലുത്പന്നങ്ങൾ, മദ്യം, മോട്ടോർ സൈക്കിളുകൾ എന്നിവയ്ക്കു നിരോധനം ഏർപ്പെടുത്തുകയാണെന്ന് വൈറ്റ് ഹൗസ് കഴിഞ്ഞദിവസം അറിയിച്ചു. കാനഡ അമേരിക്കയിൽനിന്നുള്ള ഏകദേശം 20 ബില്യൺ യുഎസ് ഡോളറിന്റെ ഇറക്കുമതി സാധനങ്ങൾക്കുമേൽ പുതിയ തീരുവ ചുമത്തിയതിനു പകരമായാണ് അമേരിക്കയുടെ പ്രതികാര നടപടി.
അമേരിക്കയെ അമിതമായി ആശ്രയിക്കുന്നതു കുറയ്ക്കുമെന്നും യൂറോപ്യൻ യൂണിനുമായുള്ള വ്യാപാരബന്ധങ്ങൾ ശക്തിപ്പെടുത്തുമെന്നും കനേഡിയൻ പ്രധാനമന്ത്രി മാർക്ക് കാർണി നേരത്തേ പ്രസ്താവന നടത്തിയിരുന്നു.
വലുതും നീണ്ടുനിൽക്കുന്നതുമായ സർക്കാർ കരാറുകളിൽനിന്ന് കനേഡിയൻ ഉത്പന്നങ്ങളെ ഒഴിവാക്കിക്കൊണ്ട് ഇതിനു മറുപടി നൽകാനാണ് അമേരിക്കൻ പ്രസിഡന്റ് ഡോണൾഡ് ട്രംപിന്റെ നീക്കം.
അമേരിക്കൻ ഉത്പന്നങ്ങൾക്ക് അർഹമായ മുൻഗണന ലഭിക്കാത്തിടത്തോളം കനേഡിയൻ ഉത്പന്നങ്ങൾക്കു കരാറുകളിൽ അയോഗ്യത കല്പിക്കാൻ യുഎസ് ജനറൽ സർവീസസ് അഡ്മിനിസ്ട്രേഷന് ട്രംപ് നിർദേശം നൽകിയിട്ടുണ്ട്.
International
ന്യൂയോർക്ക്: പശ്ചിമേഷ്യയിൽ സംഘർഷം രൂക്ഷമായതിന് പിന്നാലെ അന്താരാഷ്ട്ര വിപണിയിൽ വീണ്ടും കുതിച്ചുയർന്ന് എണ്ണവില. അസംസ്കൃത എണ്ണവില വീണ്ടും ബാരലിന് നൂറ് ഡോളറിലെത്തി. ജൂലൈ മാസത്തിന് ശേഷം ആദ്യമായാണ് ആഗോള എണ്ണവില നൂറ് ഡോളറിലേക്കെത്തുന്നത്.
ഹോർമുസ് പ്രതിസന്ധിയുൾപ്പെടെ എണ്ണ വിതരണത്തിലുണ്ടാകുന്ന പ്രതിസന്ധികളാണ് വില വർധനവിന് കാരണം. ബ്രെന്റ് ക്രൂഡ് ഓയിൽ വില ബുധനാഴ്ച തുടക്കത്തിൽ 2.3 ശതമാനം വർധിച്ച് ബാരലിന് 100 ഡോളറിലെത്തി.
യുഎസ് ക്രൂഡ് ഓയിൽ വില 1.3 ശതമാനം വർധിച്ച് ബാരലിന് 94 ഡോളറിലെത്തി. ഇറേനിയൻ എണ്ണക്കപ്പലുകൾക്ക് നേരെയുണ്ടായ അമേരിക്കൻ ആക്രമണവും സൗദി അറേബ്യയ്ക്ക് നേരെ ഇറാൻ പിന്തുണയുള്ള ഹൂതി വിമതരുടെ ആക്രമണങ്ങളുമാണ് എണ്ണവില വീണ്ടും കുതിച്ചുയരാൻ ഇടയാക്കിയത്.
അമേരിക്കയും ഇറാനും തമ്മിലുള്ള സംഘർഷം രൂക്ഷമായതാണ് സെപ്റ്റംബറിൽ വീണ്ടും എണ്ണവില കുതിച്ചുയരാൻ കാരണമായതെന്നാണ് വിലയിരുത്തലുകൾ. 2026ൽ ഇതുവരെ ബ്രെന്റ്, യുഎസ് ക്രൂഡ് ഓയിൽ വില 60 ശതമാനത്തിലേറെയാണ് വർധിച്ചിരിക്കുന്നത്. ഇതോടെ പെട്രോൾ, ഡീസൽ വിലയും കുതിക്കുകയാണ്.
International
ടെഹ്റാൻ: പശ്ചിമേഷ്യയിൽ അമേരിക്കയും ഇറാനും തമ്മിലുള്ള സംഘർഷം കൂടുതൽ രൂക്ഷമാകുന്നു. അമേരിക്കയുടെ അത്യാധുനിക ആളില്ലാ മുങ്ങിക്കപ്പൽ (ഡ്രോൺ സബ്മറൈൻ) ഇറാൻ സൈന്യം പിടിച്ചെടുത്തു. സംഭവത്തിന്റെ ദൃശ്യങ്ങൾ ഇറാൻ പുറത്തുവിട്ടിട്ടുണ്ട്. സമുദ്രനിരപ്പിൽ നിന്ന് 5,000 മീറ്ററിലധികം ആഴത്തിൽ തുടർച്ചയായി പത്തുദിവസം വരെ ദൗത്യം നടത്താൻ ശേഷിയുള്ള കപ്പലാണിത്.
തങ്ങളുടെ അധീനതയിലുള്ള മൂന്ന് എണ്ണ ടാങ്കറുകൾക്കെതിരെ അമേരിക്ക ഭീഷണി ഉയർത്തുന്നതായി ആരോപിച്ച ഇറാൻ ശക്തമായ തിരിച്ചടിയുണ്ടാകുമെന്നും മുന്നറിയിപ്പ് നൽകി. ഇതോടെ മേഖലയിൽ സംഘർഷാവസ്ഥ കൂടുതൽ കടുക്കുകയാണ്. അതേസമയം ഇറാനെതിരായ സാമ്പത്തിക സമ്മർദ്ദം ശക്തമാക്കുന്നതിന്റെ ഭാഗമായി ഇറാനുമായി ബന്ധമുള്ള 36 സ്ഥാപനങ്ങൾക്കെതിരെ അമേരിക്ക പുതിയ ഉപരോധം പ്രഖ്യാപിച്ചു.
ഇതിനിടെ ഇറാന്റെ പ്രധാന എണ്ണ കയറ്റുമതി കേന്ദ്രങ്ങളിലൊന്നായ ഖർഗ് ദ്വീപിലും ജസക്കിലും ശക്തമായ സ്ഫോടനങ്ങൾ ഉണ്ടായതായി റിപ്പോർട്ടുകളുണ്ട്. അമേരിക്കൻ തിരിച്ചടിക്ക് മറുപടിയായി യുഎസ് സൈന്യത്തിന് താവളമൊരുക്കുന്ന കുവൈറ്റ്, ബഹ്റൈൻ തുറമുഖങ്ങളിലെ എണ്ണക്കപ്പലുകൾ തങ്ങൾ ലക്ഷ്യമിടുമെന്ന് ഇറാൻ റെവല്യൂഷണറി ഗാർഡ്സ് മുന്നറിയിപ്പ് നൽകി.
International
ടെഹ്റാൻ: മാസങ്ങളായി തുടരുന്ന യുദ്ധവും യുഎസ് ഏർപ്പെടുത്തിയ കടുത്ത ഉപരോധവും മൂലം സാമ്പത്തിക നില പരിതാപകരമായതോടെ രാജ്യത്ത് ഇന്ധനവിലയിൽ വീണ്ടും വർധന വരുത്തി ഇറാൻ. സാമ്പത്തിക പ്രതിസന്ധി അതിരൂക്ഷമായിരിക്കുകയാണ് ഇറാനിൽ. പെട്രോളിയം ഇന്ധനം കൂടുതൽ അളവിൽ ഉപയോഗിക്കുന്നവർക്കായി ഉയർന്ന നിരക്ക് ഏർപ്പെടുത്തുകയാണ് ഇറാൻ ഇപ്പോൾ ചെയ്തിരിക്കുന്നത്. ഡിസംബറിനു ശേഷമുള്ള രണ്ടാമത്തെ വില വർധനയാണിത്.
അമേരിക്കയുമായുള്ള യുദ്ധത്തെക്കുറിച്ചോ ഉപരോധത്തെക്കുറിച്ചോ പറയാതെ നിലവിലെ സാഹചര്യം കണക്കിലെടുത്താണ് വില വർധനയെന്നാണ് സർക്കാർ അറിയിച്ചിരിക്കുന്നത്. അതേസമയം, വില വർധനയിലൂടെ ലഭിക്കുന്ന അധിക വരുമാനം കുടുംബങ്ങൾക്കു നൽകുമെന്നും പ്രഖ്യാപിച്ചിട്ടുണ്ട്.
പുതിയ വില വർധന അനുസരിച്ച് പ്രതിമാസ ക്വാട്ടയായ 110 ലിറ്ററിൽ (29 ഗാലൻ) കൂടുതൽ പെട്രോൾ വാങ്ങുന്നവർ ലിറ്ററിന് 1,00,000 റിയാൽ (ഏഴ് സെന്റ്) നൽകണം. ഇതു ഡിസംബർ മുതൽ അവർ നൽകിയിരുന്ന തുകയുടെ ഇരട്ടിയാണ്.
സാമ്പത്തിക പ്രതിസന്ധി രൂക്ഷമായതോടെ ജനജീവിതവും അതീവ ക്ലേശകരമായിരിക്കുകയാണ്. ജനരോഷം തണുപ്പിക്കാനാണ് വില വർധനയുടെ ആനുകൂല്യം കുടുംബങ്ങൾക്കു നൽകുമെന്നു സർക്കാർ പ്രഖ്യാപിച്ചിരിക്കുന്നത്. അമേരിക്ക ഉപരോധം കടുപ്പിച്ചതോടെ ഇറാനിലേക്കും പുറത്തേക്കുമുള്ള ചരക്കുനീക്കത്തെയും അതു ബാധിച്ചിട്ടുണ്ട്.
International
ടെഹ്റാൻ: പശ്ചിമേഷ്യൻ സംഘർഷം തുടരുന്നതിനിടെ ഹോർമുസിൽ ഒമാനുമായി ചേർന്നുള്ള പാത ഉടനെ പ്രഖ്യാപിക്കുമെന്ന് അവകാശപ്പെട്ട് ഇറാൻ വീണ്ടും രംഗത്ത്. ഒമാനുമായി ചേർന്നുള്ള പാതയിലൂടെ കൂടുതൽ ആധിപത്യം ഉറപ്പാക്കാനാണ് ഇറാന്റെ നീക്കം.
യുഎസ് നിലപാടിന് കാത്തുനിൽക്കാതെ ഹോർമുസ് ഭാഗികമായി തുറക്കാനുള്ള നീക്കത്തിലാണ് ഇറാൻ. ഒമാനുമായി ചേർന്നുള്ള കരാർ പ്രകാരമുള്ള പാത ഉടനെ തുറക്കുമെന്ന് ഇറാന്റെ പരമാധികാര ദേശീയ സുരക്ഷാ കൗൺസിൽ സെക്രട്ടറിയാണ് പ്രഖ്യാപിച്ചത്.
ഹോർമുസ് ഭാഗികമായി തുറക്കുന്നതിലൂടെ സമുദ്ര മേഖലയിലും തങ്ങളുടെ നിയന്ത്രണം കൊണ്ടുവരാനുള്ള ഇറാന്റെ നീക്കമായാണ് ഇതിനെ വിലയിരുത്തുന്നത്. ഉപാധികൾ അമേരിക്ക അംഗീകരിച്ചാൽ മാത്രമേ ഹോർമുസ് പൂർണമായി തുറക്കൂ.
അതേസമയം ഹോർമുസ് കടലിടുക്കിന് പകരമായി സിറിയ മുന്നോട്ടുവച്ച ബദൽമാർഗം അമേരിക്ക സ്വാഗതം ചെയ്തിരുന്നു. ഹോർമുസ് കടലിടുക്കിലെ പ്രതിസന്ധി തുടരുന്ന സാഹചര്യത്തിലാണ് സിറിയ പുതിയ ഗതാഗത മാർഗം മുന്നോട്ടുവച്ചത്.
International
ന്യൂയോർക്ക്: അമേരിക്കയിൽ രണ്ടു മലയാളി യുവതികൾ കൊല്ലപ്പെട്ട സംഭവത്തിൽ മറ്റൊരു മലയാളിയുവതി പോലീസ് കസ്റ്റഡിയിലായ സംഭവത്തിൽ നടുങ്ങിയിരിക്കുകയാണ് അമേരിക്കയിലെ മലയാളി സമൂഹം.
കോട്ടയം കുറിച്ചി പള്ളത്തറ വീട്ടിൽ ജേക്കബിന്റെ ഭാര്യയും തിരുവനന്തപുരം സ്വദേശിനിയുമായ ആനി ജേക്കബ് (35), തൃശൂർ പട്ടിക്കാട് മുടിക്കോട് പാണഞ്ചേരി തെക്കൂട്ട് ഹരിദാസ് -സുഷമ ദമ്പതികളുടെ മകൾ അഞ്ജന വിജീഷ് (35) എന്നിവരാണ് മരിച്ചത്. വെള്ളിയാഴ്ച കലിഫോർണിയയിലെ മിൽപിറ്റാസിലായിരുന്നു ഇരട്ടക്കൊലപാതകം.
സംഭവത്തിൽ മൂന്നിലവ് സ്വദേശിനിയായ അനില എന്ന ഇവരുടെ ഉറ്റ സുഹൃത്തായ മറ്റൊരു മലയാളി യുവതിയാണ് പോലീസ് കസ്റ്റഡിയിലായത്. എന്നാൽ, ശാന്ത സ്വഭാവക്കാരിയായ അനില ഇങ്ങനെ ചെയ്തുവെന്നു വിശ്വസിക്കാൻ ഇനിയും ഇവരെ അറിയുന്ന പലർക്കുമായിട്ടില്ല. വളരെ സൗഹാർദപരമായി ഇടപെടുന്ന സാധാരണ പെൺകുട്ടിയായിരുന്നു അനിലയെന്ന് ഇവർ പറയുന്നു.
ആനിയും അഞ്ജനയും അനിലും ഉറ്റ കൂട്ടുകാരും ഒരേ ഫ്ളാറ്റ് സമുച്ചയത്തിലെ താമസക്കാരുമായിരുന്നു. ഒന്നിച്ചു സിനിമ കാണാൻ പോവുകയും പരിപാടികളിൽ പങ്കെടുക്കുകയും ചെയ്യുമായിരുന്നു. കഴിഞ്ഞ ദിവസം ഈ കുടുംബങ്ങൾ ഒന്നിച്ചു സിനിമ കാണാനും ഒാണപ്പരിപാടികളിൽ പങ്കെടുക്കാനും പോയിരുന്നു. ഇത്രത്തോളം അടുപ്പം പുലർത്തിയ ഇവരിൽക്കിടയിൽ ഇങ്ങനെയൊരു പാതകം നടക്കാനുള്ള പ്രകോപനം എന്താണെന്ന് ഇനിയും വ്യക്തമായിട്ടില്ല.
ആനിയെ ആദ്യം ഫ്ലാറ്റിൽ കൊലപ്പെടുത്തിയ ശേഷം അഞ്ജനയെ പാർക്കിംഗ് ഏരിയയിലേക്കു വിളിച്ചുവരുത്തി കാർ ഇടിപ്പിച്ചു കൊലപ്പെടുത്തുകയായിരുന്നു. പകയോടെ നടത്തിയ കൊലപാതകം പോലെയാണ് ഈ സാഹചര്യങ്ങൾ സൂചിപ്പിക്കുന്നത്. അതേസമയം, കൂട്ടുകാരികൾ രണ്ടുപേരോടും ഒരു പോലെ പക തോന്നാൻ കാരണമെന്തെന്നുള്ളതാണ് മറ്റുള്ളവരെ അലട്ടുന്നത്.
അതേസമയം, ജോലി നഷ്ടപ്പെട്ടതിൽ കുറച്ച് ആഴ്ചകളായി വളരെ അസ്വസ്ഥയായിരുന്നു അനിലയെന്ന് അടുപ്പമുള്ളവർ പറയുന്നുണ്ട്. ജോലി നഷ്ടപ്പെട്ടതു മാനസിക സമ്മർദമായി മാറിയിരുന്നോയെന്ന് സംശയിക്കുന്നവരുണ്ട്. കൊല്ലപ്പെട്ട ആനിയും അഞ്ജനയും അധ്യാപകരായി ജോലി ചെയ്തുവരികയായിരുന്നു. പോലീസ് കസ്റ്റഡിയിൽ ആയതിനാൽ കൂടുതൽ വിവരങ്ങൾ പുറത്തുവന്നിട്ടില്ല.
International
ദുബായ്: പശ്ചിമേഷ്യ വീണ്ടും സംഘർഷഭരിതമാകുന്നു. ഇറാന്റെ റോക്കറ്റ് കേന്ദ്രങ്ങൾക്ക് നേരെ അമേരിക്ക ആക്രമണം നടത്തി. ഹോര്മുസിലെ ലാറഖ് ദ്വീപിലെ ഇറേനിയൻ റോക്കറ്റ് കേന്ദ്രങ്ങൾക്ക് നേരെയാണ് ആക്രമണമുണ്ടായത്.
ഇക്കാര്യം യുഎസ് സെൻട്രൽ കമാൻഡ് സ്ഥിരീകരിച്ചിട്ടുണ്ട്. അമേരിക്കൻ ആക്രമണത്തിൽ സാധാരണക്കാരും സൈനികരും കൊല്ലപ്പെട്ടുവെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് അറിയിച്ചു. ശക്തമായ തിരിച്ചടിയുണ്ടാകുമെന്നും ഐആർജിസി മുന്നറിയിപ്പ് നൽകിയിട്ടുണ്ട്.
പ്രത്യാക്രമണത്തിന്റെ ഭാഗമായി ജോർദാനിലെ അമേരിക്കൻ സൈനിക കേന്ദ്രങ്ങൾ ആക്രമിച്ചതായി ഐആർജിസി പിന്നീട് അറിയിച്ചു. ഇരുപക്ഷവും ആക്രമണം ആരംഭിച്ചതോടെ എണ്ണവിലയും വർധിച്ചിട്ടുണ്ട്. എണ്ണവിലയിൽ രണ്ട് ശതമാനത്തിലധികം വർധനയുണ്ടായി. ബ്രെന്റ് ക്രൂഡ് ഓയിൽ വില വീണ്ടും ബാരലിന് 90 ഡോളറിന് മുകളിലെത്തി.
International
വാഷിംഗ്ടൺ ഡിസി: വെനസ്വേലയുമായി ലോകചരിത്രത്തിലെതന്നെ ഏറ്റവും വലിയ എണ്ണക്കരാർ ഒപ്പുവച്ചതായി പ്രഖ്യാപിച്ച് യുഎസ് പ്രസിഡന്റ് ഡോണൾഡ് ട്രംപ്. വെനസ്വേലയിലെ എണ്ണപ്പാടങ്ങളിൽനിന്നുള്ള ഉത്പാദനവും ലാഭകരമായി സ്വന്തമാക്കാനുമാണു കരാറിലൂടെ അമേരിക്ക ലക്ഷ്യമിടുന്നത്. യുഎസ് വിദേശകാര്യ സെക്രട്ടറി മാർക്കോ റൂബിയോ, പ്രതിരോധ സെക്രട്ടറി പീറ്റ് ഹെഗ്സെത്, വെനസ്വേലയിലെ ആക്ടിംഗ് പ്രസിഡന്റ് ഡെൽസി റോഡ്രിഗസ് എന്നിവർ ചേർന്നാണ് കരാറിൽ ഒപ്പുവച്ചത്.
മാസങ്ങൾക്കുമുന്പ്, പ്രസിഡന്റ് നികോളാസ് മഡുറോയെ സൈനിക നടപടിയിലൂടെ പുറത്താക്കി അമേരിക്കയിലേക്കു കൊണ്ടുപോയതിനു പിന്നാലെയാണ് എണ്ണക്കരാർ. മഡുറോയ്ക്കു ശേഷം അധികാരത്തിൽ വന്ന ഡെൽസി റോഡ്രിഗസ്, രണ്ടു പതിറ്റാണ്ടുകളായി തുടരുന്ന സോഷ്യലിസ്റ്റ് നയങ്ങൾ മാറ്റിവച്ച് എണ്ണ മേഖലയെ സ്വകാര്യവത്കരിക്കാനുള്ള നിയമത്തിൽ ഒപ്പുവച്ചിരുന്നു.
കരാർ അനുസരിച്ച് വെനസ്വേലയിലെ 17 എണ്ണപ്പാടങ്ങളിലായി സ്ഥിതി ചെയ്യുന്ന ശേഖരം അമേരിക്കയുടെ കരങ്ങളിലെത്തും. വരും നാളുകളിൽ ഏകദേശം 100 ബില്യൺ യുഎസ് ഡോളറിന്റെ സ്വകാര്യനിക്ഷേപം വെനസ്വേലയിലേക്ക് എത്തും. ഇതുവഴി രാജ്യത്തിനു നികുതി ഇനത്തിൽ ഇരുപതു ലക്ഷം കോടിയിലേറെ വരുമാനം ലഭിക്കുമെന്നാണ് റിപ്പോർട്ട്. നൂറു വർഷത്തേക്ക് എണ്ണപ്പാടങ്ങളുടെ ഉടമസ്ഥാവകാശം അമേരിക്കയ്ക്കും അമേരിക്ക നിർദേശിക്കുന്ന സ്വകാര്യ കന്പനിക്കുമുള്ളതാകും. സൗദി അരാംകോയ്ക്ക് ശേഷം ലോകത്തിലെ ഏറ്റവും വലിയ രണ്ടാമത്തെ എണ്ണ ശേഖരമുള്ള കമ്പനിയായി ഇതു മാറും. പുതിയ കമ്പനിയുടെ ഉത്പാദനത്തിന്റെ 55 ശതമാനത്തോളം നിയന്ത്രണം അമേരിക്കയ്ക്കു മാത്രമായിരിക്കും.
ഇറാനുമായുള്ള യുദ്ധം പേർഷ്യൻ ഉൾക്കടലിലൂടെയുള്ള എണ്ണ വിതരണം തടസപ്പെടുകയും അമേരിക്കയിൽ ഇന്ധനവില കുത്തനെ ഉയരുകയും ചെയ്തിരുന്നു. രാജ്യത്തെ അടിയന്തര എണ്ണ ശേഖരം ഗണ്യമായി കുറഞ്ഞ സാഹചര്യത്തിലാണ് ട്രംപ് വെനസ്വേലയിലെ എണ്ണ ശേഖരത്തിലേക്കു തിരിഞ്ഞത്. യുഎസിന്റെ അടിയന്തര ആവശ്യങ്ങൾക്കും സൈനിക ആവശ്യങ്ങൾക്കും എണ്ണ ഉപയോഗിക്കും.
ലോകത്തിൽ ഏറ്റവും കൂടുതൽ എണ്ണ ശേഖരമുള്ള രാജ്യങ്ങളിലൊന്നാണ് വെനസ്വേല. എങ്കിലും, അടിസ്ഥാനസൗകര്യങ്ങളുടെ അഭാവത്തിൽ ആഗോള എണ്ണ ഉൽപ്പാദനത്തിന്റെ ഒരു ശതമാനം മാത്രമാണു നിലവിൽ വെനസ്വേലയിൽ നടക്കുന്നത്.
അതേസമയം, യുഎസ്-വെനസ്വേല കരാർ ലോകമെമ്പാടും വലിയ ചർച്ചകൾക്കു വഴിവച്ചിട്ടുണ്ട്. ഇരു രാജ്യങ്ങളിലെയും ജനങ്ങളുടെ വലിയ വിജയമായി അമേരിക്ക കരാറിനെ വിശേഷിപ്പിച്ചപ്പോൾ, കടുത്ത വിമർശനങ്ങളും ഉയരുന്നുണ്ട്. വെനസ്വേലയുടെ പരമാധികാരത്തിന്മേലുള്ള കടന്നുകയറ്റമാണെന്നും അമേരിക്ക നടത്തുന്ന കൊള്ളയാണിതെന്നും പല അന്താരാഷ്ട്രനിരീക്ഷകരും വിമർശിക്കുന്നു.
National
ന്യൂഡൽഹി: അമേരിക്കയിൽനിന്ന് അത്യാധുനിക ജാവലിൻ ആന്റി ടാങ്ക് ഗൈഡഡ് മിസൈൽ സംവിധാനങ്ങൾ വാങ്ങുന്നതിനായുള്ള കരാർ സമ്മതപത്രത്തിൽ (ലെറ്റർ ഓഫ് ഓഫർ ആൻഡ് ആക്സപ്റ്റൻസ്) ഇന്ത്യ ഒപ്പുവച്ചു. അമേരിക്കയുടെ ഫോറിൻ മിലിട്ടറി സെയിൽസ് (എഫ്എംഎസ്) വഴിയാണ് കരാർ നടപ്പാക്കുക.
ലോകത്തിലെ ഏറ്റവും അത്യാധുനികവും പ്രഹരശേഷിയുള്ളതുമായ ആന്റി ടാങ്ക് മിസൈൽ സംവിധാനമാണ് ജാവലിൻ. ശത്രുക്കളുടെ യുദ്ധടാങ്കുകൾ, കവചിത വാഹനങ്ങൾ, ബങ്കറുകൾ, താഴ്ന്നുപറക്കുന്ന ഹെലികോപ്റ്ററുകൾ എന്നിവ തകർക്കാൻ സൈനികർക്ക് തോളിൽവച്ച് പ്രയോഗിക്കാവുന്ന തരത്തിലാണ് ഇവ വികസിപ്പിച്ചിരിക്കുന്നത്. മിസൈൽ തൊടുക്കുന്നതിനുമുമ്പ് ലക്ഷ്യം ലോക്ക് ചെയ്താൽ മാത്രം മതി.
തൊടുത്തുകഴിഞ്ഞാൽ മിസൈൽ സ്വയം ലക്ഷ്യസ്ഥാനത്തേക്ക് വഴി കണ്ടെത്തി കുതിക്കും. വിദൂരമല്ലാത്ത ലക്ഷ്യങ്ങളെ തകർക്കാൻ മിസൈലിനു സാധിക്കും. കൂടാതെ രാത്രിയിലും പകലും ഏത് കാലാവസ്ഥയിലും കൃത്യമായി ലക്ഷ്യം കണ്ടെത്താൻ സഹായിക്കുന്ന തെർമൽ-ഇൻഫ്രാറെഡ് സാങ്കേതികവിദ്യ മിസൈലിനുണ്ട്. ലോഞ്ചറും മിസൈലും ഉൾപ്പെടെ ആകെ ഭാരം ഏകദേശം 22 കിലോഗ്രാമാണ്.
ഇന്ത്യ-യുഎസ് തന്ത്രപ്രധാന പ്രതിരോധ പങ്കാളിത്തത്തിന്റെ വ്യാപ്തി വർധിപ്പിക്കുന്നതിന്റെ തെളിവാണ് കരാറെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ പറഞ്ഞു.
യുഎസ് കരസേനയും മറൈൻ കോറും ഉപയോഗിക്കുന്ന ഈ മിസൈൽ സംവിധാനം, പുതിയ കരാറിലൂടെ ഇന്ത്യയിൽ സംയുക്തമായി നിർമിക്കുന്നതിനുള്ള ചർച്ചകൾക്കും വഴിതുറക്കുമെന്ന് എംബസി വ്യക്തമാക്കി. ആർടിഎക്സ്, ലോക്ക്ഹീഡ് മാർട്ടിൻ എന്നീ കമ്പനികൾ സംയുക്തമായാണ് മിസൈൽ നിർമിച്ചിരിക്കുന്നത്.