കോതമംഗലം മാർ അത്തനേഷ്യസ് കോളജിൽ സപ്തതി ആഘോഷങ്ങളുടെ സമാപന സമ്മേളനവും പുതിയ പ്രോഗ്രാമുകളും മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യുന്നു.
കോതമംഗലം: ഉന്നത വിദ്യാഭ്യാസം ഗവേഷണാധിഷ്ഠിതമായിരിക്കണമെന്നും കേരളത്തിൽ നിലവിലെ സ്ഥിതി അങ്ങനെയല്ലെന്നും അതിൽ മാറ്റം വരണമെന്നും മുഖ്യമന്ത്രി വി.ഡി. സതീശൻ. കോതമംഗലം മാർ അത്തനേഷ്യസ് കോളജിൽ സപ്തതി ആഘോഷങ്ങളുടെ സമാപന സമ്മേളനവും പുതിയ പ്രോഗ്രാമുകളും ഉദ്ഘാടനം ചെയ്യുകയായിരുന്നു മുഖ്യമന്ത്രി.
കുട്ടികൾ പഠിച്ചിറങ്ങുമ്പോൾ തന്നെ ജോലി കിട്ടുന്ന സാഹചര്യം ഉണ്ടാകണം. സംസ്ഥാന സർക്കാർ സർവകലാശാലകൾക്കും കോളജുകൾക്കും കൂടുതൽ സ്വാതന്ത്ര്യം നൽകാൻ പോകുകയാണെന്നും അതോടൊപ്പം പുതിയ കോഴ്സുകൾ തുടങ്ങാൻ അനുമതി നൽകുമെന്നും അദ്ദേഹം പറഞ്ഞു.
സർക്കാരും എഐ ഉപയോഗത്തിലേക്ക് കടക്കാൻ പോകുകയാണ്. ഫയലുകൾ തീർപ്പാക്കാൻ എഐ സഹായം ഉപയോഗിക്കും. അങ്ങനെയുള്ള സംവിധാനം മുഖ്യമന്ത്രിയുടെ ഓഫിസ് സജീകരിക്കുന്നുണ്ട്. ഇതിലൂടെ തീർപ്പാക്കാൻ ബാക്കിയുള്ള ഫയലുകളുടെ എണ്ണം അടുത്ത വർഷം ഗണ്യമായി കുറയ്ക്കാൻ കഴിയുമെന്നും അദ്ദേഹം പറഞ്ഞു.
കോളജിൽ പുതിയ പ്രോഗ്രാമുകളായ ബിഎസ്സി കമ്പ്യൂട്ടർ സയൻസ് ആൻഡ് എഐ, ആക്ച്ചുറിയൽ സയൻസ്, മൈക്രോ ബയോളജി, എംഎസ്സി ഗ്രീൻ ഹൈഡ്രജൻ എനർജി, പുതിയ റിസർച്ച് സെന്ററുകളായ സൂവോളജി, സ്റ്റാറ്റിസ്റ്റിക്സ്, ബോട്ടണി എന്നിവയുടെ ഉദ്ഘാടനവുമാണ് ചടങ്ങിൽ നിർവഹിച്ചത്.
എംഎ കോളജ് അസോസിയേഷൻ ചെയർമാൻ ഡോ. മാത്യൂസ് മാർ അപ്രേം മെത്രാപ്പോലീത്ത അധ്യക്ഷത വഹിച്ചു. കോളജ് ഉടൻ തന്നെ ഒരു കല്പിത സർവകലാശാല ആയി മാറട്ടെയെന്ന് അദ്ദേഹം പ്രത്യാശ പ്രകടിപ്പിച്ചു. കോളജ് അസോസിയേഷൻ സെക്രട്ടറി ഡോ. വിന്നി വർഗീസ് ആമുഖ പ്രഭാഷണം നടത്തി. ഡീൻ കുര്യാക്കോസ് എംപി, എംഎൽ എമാരായ ഷിബു തെക്കുംപുറം, സേനാപതി വേണു, കോളജ് പ്രിൻസിപ്പൽ ഡോ. മഞ്ജു കുര്യൻ, വൈസ് പ്രിൻസിപ്പൽ ഡോ. എബി പി. വർഗീസ് എന്നിവർ പ്രസംഗിച്ചു.